129. ALDIZKARIA - 2022ko ekainaren 30a

1. NAFARROAKO FORU KOMUNITATEA

1.7. BESTELAKOAK

69/2022 FORU AGINDUA, maiatzaren 23koa, Ekonomia eta Ogasuneko kontseilariak emana. Horren bidez xedatzen da argitara dadila Pertsonen Autonomiarako eta Garapenerako Nafarroako Agentziak eta Ekonomia eta Ogasun Departamentuak 2022ko maiatzaren 20an hartutako Erabakia, zeinaren bidez batera baimentzen baita kudeaketa-esleipen bat egitea Ondare Zerbitzuko Kontratazio eta Aseguruen Atalari turismo-ibilgailuak erosteko lizitazioa egiteko.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 14.3 artikuluan ezarritakoarekin bat, 2022ko maiatzaren 20an hartutako erabakiaren bidez, Pertsonen Autonomiarako eta Garapenerako Nafarroako Agentziako zuzendari kudeatzaileak eta Ekonomia eta Ogasuneko kontseilariak batera baimendu zuten kudeaketa-esleipen bat egitea departamentu horretako Ondare Zerbitzuko Kontratazio eta Aseguruen Atalari turismo-ibilgailuak erosteko lizitazioen kudeaketa material eta teknikoa egiteko.

Aipatu foru legearen 14. artikuluaren 6. apartatuak xedatzen du kudeaketa-esleipena eraginkorra izan dadin beharrezkoa dela Nafarroako Aldizkari Ofizialean argitaratzea oso-osorik.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz,

AGINTZEN DUT:

1. Nafarroako Aldizkari Ofizialean argitaratzea foru agindu hau eta Pertsonen Autonomiarako eta Garapenerako Nafarroako Agentziak eta Ekonomia eta Ogasun Departamentuak 2022ko maiatzaren 20an hartutako Erabakia, zeinaren bidez batera baimendu baitzen kudeaketa-esleipen bat egitea Ondare Zerbitzuko Kontratazio eta Aseguruen Atalari turismo-ibilgailuak erosteko lizitazioen kudeaketa material eta teknikoa egiteko (eranskinean jaso da).

2. Foru agindu hau igortzea Ondare Zerbitzura, Pertsonen Autonomiarako eta Garapenerako Nafarroako Agentziara eta Eskubide Sozialetako Departamentuko eta Ekonomia eta Ogasun Departamentuko idazkaritza tekniko nagusietara, bai eta departamentu horietako kontu-hartzailetza delegatuetara ere, behar diren ondorioak izan ditzan.

Iruñean, 2022ko maiatzaren 23an.–Ekonomia eta Ogasuneko kontseilaria, Elma Saiz Delgado.

ERANSKINA

Erabakia, Pertsonen Autonomiarako eta Garapenerako Nafarroako Agentziak eta Ekonomia eta Ogasun Departamentuak hartutakoa, zeinaren bidez batera baimentzen baita kudeaketa-esleipena egitea Ondare Zerbitzuko Kontratazio eta Aseguruen Atalari turismo-ibilgailuak erosteko. Ibilgailu horiek erakunde autonomo horretan erabiliko dira, 2022an eta 2023an

Inés Francés Román andrea, Pertsonen Autonomiarako eta Garapenerako Nafarroako Agentziako zuzendari kudeatzailea.

Elma Saiz Delgado andrea, Ekonomia eta Ogasuneko kontseilaria.

ADITZERA EMATEN DUTE:

Lehenbizikoa.

Pertsonen Autonomiarako eta Garapenerako Nafarroako Agentziak eskumena dauka hornidura-kontratuak egiteko, azaroaren 6ko 301/2019 Foru Dekretu bidez onetsi ziren bere estatutuekin bat.

Bigarrena.

Hala ezartzen baitu bere 8.3 xedapen gehigarrian Kontratu Publikoei buruzko apirilaren 13ko 2/2018 Foru Legeak, kontratazio publikoaren arloan eskumena duen departamentuak eskumena izanen du Nafarroako Foru Komunitateko Administrazioaren hornidura-kontratuak egiteko. Ekonomia eta Ogasun Departamentuaren egitura organikoa ezartzen duen urriaren 30eko 264/2019 Foru Dekretuak zehazten du hura dela kontratazio publikoaren arloan eskumena duen departamentua.

Hirugarrena.

Ondare Zerbitzuko Kontratazio eta Aseguruen Atalari dagokio 60.000 eurotik beherako balio zenbatetsia duten hornidura-kontratu zentralizatuak egitea, hala ezartzen baitu bere 23 n) artikuluan Ekonomia eta Ogasun Departamentuaren egitura organikoa ezartzen duen urriaren 30eko 264/2019 Foru Dekretuak.

Laugarrena.

Pertsonen Autonomiarako eta Garapenerako Nafarroak Agentziak turismo-ibilgailuak erosteko beharra du berezkoak dituen eginkizunak betetzeko, baina ez du giza baliabiderik eta baliabide teknikorik lan horiek egiteko behar diren administrazio-espedienteak prestatzeko, tramitatzeko, esleitzeko eta gauzatzeko.

Bosgarrena.

Nafarroako Foru Komunitateko Administrazioari eta foru-sektore publiko instituzionalari buruzko martxoaren 11ko 11/2019 Foru Legearen 14.1 artikuluak xedatzen du Foru Administrazio Publikoko organoek zilegi izanen dutela beste organo batzuei edo zuzenbide publikoko beste erakunde eta entitate batzuei –lotutakoak edo haien menpekoak– eskuordetzea beren eskumeneko jarduera materialak eta teknikoak egitea, dela eraginkortasun arrazoiengatik, dela lan horietarako baliabide tekniko egokiak ez dituztelako, ondoko apartatuetan xedatuarekin bat. Eta manu horren 3. apartatuak ezartzen du esleipen hori egin behar dela bi departamentuetako titularren baterako baimen baten bitartez, baldin eta esleipena egiten duen organoa eta kudeaketa-esleipena egiten zaion administrazio organoa departamentu desberdinekoak badira, kasu honetan bezala.

Horrenbestez,

ERABAKITZEN DUTE:

Lehena.–Batera baimentzea kudeaketa-esleipena egitea Ondare Zerbitzuko Kontratazio eta Aseguruen Atalari, behar diren jarduketa material eta tekniko guztiak egiteko Pertsonen Autonomiarako eta Garapenerako Nafarroako Agentziak turismo-ibilgailuak eskura ditzan 2022an eta 2023an.

Bigarrena.–Kudeaketa-esleipen honek Nafarroako Aldizkari Ofizialean argitaratu ondoren izanen ditu ondorioak, eta 2023ko abenduaren 31ra bitarte egonen da indarrean.

Hirugarrena.–Erabaki hau igortzea, behar diren ondorioak izan ditzan, Ondare Zerbitzura, Pertsonen Autonomiarako eta Garapenerako Nafarroako Agentziara eta Eskubide Sozialetako Departamentuko eta Ekonomia eta Ogasun Departamentuko idazkaritza tekniko nagusietara, bai eta departamentu horietako kontu-hartzailetza delegatuetara ere.

Iruñean, 2022ko maiatzaren 20an.–Pertsonen Autonomiarako eta Garapenerako Nafarroako Agentziako zuzendari kudeatzailea, Inés Francés Román.

Iragarkiaren kodea: F2207621