1. NAFARROAKO FORU KOMUNITATEA
1.7. BESTELAKOAK
381E/2021 EBAZPENA, urriaren 27koa, Ekonomia Zirkularraren eta Klima Aldaketaren Zerbitzuko zuzendariak emana, zeinaren bidez partzialki onesten baita Ecoiruña Tratamiento de Residuos SLk egindako eskaera, Iruñeko udal-mugartean hondakinak kudeatzeko daukan instalazioaren ingurumen baimen integratuan ezarritako funtzionamendu baldintzak aldatzeko.
Instalazio horrek badu ingurumen baimen integratua, Ingurumenaren eta Uraren zuzendari nagusiak ekainaren 24ko 1041/2011 Ebazpenaren bidez emana, gero Ingurumen Kalitatearen eta Aldaketa Klimatikoaren zuzendari nagusiaren urriaren 5eko 356E/2015 Ebazpenaren bidez eguneratu zena.
2021eko maiatzaren 11n, titularrak eskatu zuen ingurumen baimen integratuan sartutako baldintzak aldatzeko. Eskatu zuen, batetik, hondakin berri batzuk sar zitezen kudeatzen dituen hondakinen zerrendan, zeina jasota baitago ingurumen baimen integratuaren III. eranskinean; eta, bestetik, zenbait kudeaketa prozesu berri sar zitezen hark kudeatutako hondakin batzuetarako: R05, EHZ kodea 150110* duen hondakinarentzat, eta R03, EHZ kodea 0300309 duen hondakinerako.
Behin aztertuta, Ekonomia Zirkularraren eta Klima Aldaketaren Zerbitzuak ondorioztatu du aurkeztutako eskaera onargarria dela, instalazioaren funtzionamendua egokia delako ingurumenaren aldetik eta aplikatzen direlako teknika erabilgarri onenak, salbu eta Europako Hondakinen Zerrendako kodea 030309 (kareharrizko lohien hondakinak) duen hondakinari R03 bukaerako kudeaketako eragiketa aplikatzeari dagokionez. Izan ere, definizioz, kode horretan biltzen diren hondakinen artean ez daude R03 prozesuaren bitartez baloriza daitezkeen substantziak, prozesuaren definizioan berean aipatzen denari jarraikiz (R03 prozesua, “Disolbagarri modura erabiltzen ez diren substantzia organikoak birziklatzea edo berreskuratzea” izenekoa, haren barnean dira konpost egitea eta eraldaketa biologikoko beste prozesu batzuk).
Ikusi da, kasu honetan, gertatzen direla Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 27. artikuluko d) letran aurreikusitako inguruabarrak, eta, horrenbestez, bidezko da ingurumen baimen integratuan ezarritako baldintzak ofizioz aldatzea, bat etorriz Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduaren 28. artikuluan ezarritako administrazio prozedurarekin, iritzita ez dela beharrezkoa aldaketa espediente hau jendaurrean jartzea.
Ebazpen proposamena instalazioaren titularrari entzunaldia emateko tramitean egon da hogeita hamar egunez, eta hark ez du proposamenaren aurkako alegaziorik aurkeztu.
Adierazitakoarekin bat, eta Ingurumeneko zuzendari nagusiaren azaroaren 8ko 107/2019 Ebazpenaren bidez eskuordeturik ditudan eskumenak erabiliz,
EBAZTEN DUT:
Lehenbizikoa.–Partzialki onartzea hondakinak kudeatzeko instalazio baten ingurumen baimen integratuan ezarritako funtzionamendu baldintzak aldatzeko eskaera, hain zuzen, Ecoiruña Tratamiento de Residuos SLk Iruñeko udal-mugartean duen instalazioari dagokiona. Horrenbestez, instalazioak eta jarduerak bete beharko dituzte instalazio horren ingurumen baimen integratuaren administrazio espedienteetan ezarritako baldintzak, eta, horiez gainera, baita ebazpen honen eranskinean adierazitakoak ere.
Bigarrena.–Ebazpen honetan jasotzen diren baldintzak ez betetzeak berekin dakar ingurumeneko diziplina-neurriak hartzea, hain zuzen ere, Kutsaduraren Prebentzio eta Kontrol Integratuaren Legearen testu bateginaren IV. tituluan jasotakoak (abenduaren 16ko 1/2016 Legegintzako Errege Dekretuaren bidez onetsi zen testu bategin hori), ezertan galarazi gabe sektoreko legerian ezarritakoa, aplikatzekoa izaten segituko baitu, eta, subsidiarioki, Ingurumena Babesteko Esku-hartzeari buruzko martxoaren 22ko 4/2005 Foru Legearen VI. tituluan ezarritako zehapen araubidean jasotakoak.
Hirugarrena.–Ebazpen hau Nafarroako Aldizkari Ofizialean argitaratzea.
Laugarrena.–Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jartzen ahalko dute, Landa Garapeneko eta Ingurumeneko kontseilariari zuzendua, hilabeteko epean. Administrazio publikoek administrazioarekiko auzi-errekurtsoa jar dezakete, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuari aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epeak ebazpen hau jakinarazi eta biharamunetik aurrera kontatuko dira.
Bosgarrena.–Ebazpen hau Ecoiruña Tratamiento de Residuos SLra eta Iruñeko Udalera igortzea, behar diren ondorioak izan ditzan.
Iruñean, 2021eko urriaren 27an.–Ekonomia Zirkularraren eta Klima Aldaketaren Zerbitzuko zuzendaria, Pedro Zuazo Onagoitia.
Oharra: ebazpen honetan aipatzen diren eranskinak interesdunen eskura egonen dira Ingurumen Zuzendaritza Nagusiaren bulegoetan (González Tablas kalea 9, behea, Iruña; Ekonomia Zirkularraren eta Klima Aldaketaren Zerbitzua) eta Nafarroako Gobernuaren webgune honetan: http://www.navarra.es/home_es/Temas/Medio+Ambiente/Evaluacion+ambiental/Autorizaciones+ambientales/.
Iragarkiaren kodea: F2115926
