Iragarkia

250. ALDIZKARIA - 2021eko urriaren 29a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

61E/2021 FORU AGINDUA, urriaren 8koa, Kultura eta Kiroleko kontseilariak emana. Horren bidez onartzen da egoitza soziala Nafarroan duten kirol erakundeei, kirol kudeaketako enpresa publikoei eta kirol kudeaketako enpresa pribatuei dirulaguntzak emateko deialdia, banakako ebaluazioaren araubidean, 2021eko urritik 2022ko ekainera bitartean eginen den GARDENA (Nafarroako Kirolaren Kudeaketa Aurreratua) kudeaketa aurreratuko prestakuntza programan izena emateko gastuak finantzatzeko. DDBN identifikazioa: 589519.

Nafarroako Kirolari buruzko uztailaren 5eko 15/2001 Foru Legearen arabera, kirola herritarren eskubidea da, eta interes publikoko gizarte jarduera, laguntzen duena pertsonaren prestakuntza eta garapen integrala bultzatzen eta bizi kalitatea eta norbanakoen eta kolektiboaren ongizatea hobetzen. Gainera, elkarbizitza eta gizartearen kohesioa eta barne lotura errazten ditu, osasun publikoa hobetzen du, eta garapen ekonomikoa sustatzen.

Kirol erakundeen eta titulartasun publikoko zein pribatuko kudeaketa enpresen zeregina funtsezkoa da kirol jardueraren eskaintzan, eta, logikoa denez, kudeaketa egokia eta modernoa eskatzen du. Hori dela eta, Nafarroako Kirolaren Institutuak (NKI) kudeaketa aurreratuko prestakuntza bat bultzatu zuen. Euskalit fundazioak eta Nafarroako Bikaintasunerako Fundazioak eman eta ebaluatu zuten prestakuntza, GARDENA (Nafarroako Kirolaren Kudeaketa Aurreratua) akronimoarekin, eta 2020/2021 denboraldian Nafarroako kirol federazioei zuzenduta zegoen. Geroago, lehen esperientzia arrakastatsu horren ondoren, diseinua Kudeaketa Aurreratuko prestakuntza batera egokitu zen, gainerako kirol erakundeei zuzenduta, 2021/2022 denboraldirako; hots, kirol kudeaketako enpresa publikoak eta pribatuak, egoitza soziala Nafarroan dutenak.

2021erako deialdi honek laguntza bide bat ezartzen du erakunde horiek 2021eko urritik 2022ko ekainera bitartean Kudeaketa Aurreratuko prestakuntza horretan izena emateagatik sortzen diren gastuak zati batean ordaintzeko.

Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen arabera, eta erabiliz Kultura eta Kirol Departamentuaren egitura organikoa ezartzen duen urriaren 30eko 273/2019 Foru Dekretuan esleitu zaizkidan ahalmenak,

AGINTZEN DUT:

1. Egoitza soziala Nafarroan duten kirol erakundeei, kirol kudeaketako enpresa publikoei eta kirol kudeaketako enpresa pribatuei dirulaguntzak emateko deialdia onestea, 2021/2022 ikasturtean GARDENA (Kirolaren Kudeaketa Aurreratua Nafarroan) kudeaketa aurreratuko prestakuntza programan izena emateko.

2. Deialdiaren oinarri arautzaileak onestea; foru agindu honen 1. eranskinean jaso dira.

3. 30.000 euroko gastua baimentzea, bete dadin dirulaguntzen deialdi hau; 2021erako Nafarroako Aurrekontu Orokorretako honako partida hauetara inputatuko da:

4. Foru agindu hau eta 1. eranskina Nafarroako Aldizkari Ofizialean argitaratzea.

5. Deialdi honen eta oinarri arautzaileen aurka gora jotzeko errekurtsoa jar daiteke, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta hurrengo egunetik hasita.

Iruñean, 2021eko urriaren 8an.–Kultura eta Kiroleko kontseilaria, Rebeca Esnaola Bermejo.

1. ERANSKINA

Oinarri arautzaileak

1. Xedea.

1.1. Oinarri hauen xedea da dirulaguntzak emateko prozedura ezartzea, banakako ebaluazioaren araubidean, egoitza soziala Nafarroan duten kirol erakundeei, kirol kudeaketako enpresa publikoei eta kirol kudeaketako enpresa pribatuei dirulaguntzak emateko, 2021eko urritik 2022ko ekainera eginen den GARDENA (Kirolaren Kudeaketa Aurreratua Nafarroan) kudeaketa aurreratuko prestakuntza programan izena emateko, betiere eranskin honetako baldintzak betetzen badituzte eta aurrekontu kreditua badago.

1.2. Dirulaguntza horien bidez, aipatutako erakundeei kudeaketa aurreratuko prestakuntzan laguntzea lortu nahi da. Laguntzak onura publikokoak dira, Nafarroako bizilagunen kirol jarduera sustatzen, zabaltzen eta kudeatzen laguntzen dutelako.

2. Onuradunak eta betebeharrak.

2.1. Deialdi hau baliatzen ahalko dute Nafarroako Kirolaren Erregistroan inskribatuta dauden irabazi asmorik gabeko kirol erakundeek eta egoitza soziala Nafarroan duten kirol kudeaketako enpresa publiko zein pribatuek, baldin eta CNAE kode hauekin inskribatuta badaude Merkataritza Erregistroan: 8551, -9311, -9312, -9313, -9319 edo 9604. GARDENA programan izena emateko epea 2021eko irailaren 1etik 15era bitartekoa izan da.

2.2. Dirulaguntzei buruzko azaroaren 9ko 11/2005 Foru Legeko 13.2 artikuluan aipatzen diren gorabeheretariko batean dauden erakundeak ezin izanen dira deialdiaren xede diren laguntzen onuradun izan.

2.3. Horrez gain, ez dituzte deialdi honen xede diren dirulaguntzak jasoko sexuan edo generoan oinarritutako diskriminazioa dakarten lan arloko jardunbideak gauzatu edo toleratzeagatik zehapena edo zigorra jaso duten erakundeek, zigor edo zehapen horiek administrazio ebazpen irmoz edo epai irmoz ezarri badira.

2.4. Zerga betebeharrak, Gizarte Segurantzakoak eta Nafarroako Foru Komunitateko Administrazioaren edo haren erakunde autonomoen aldeko zorrak ordaintzeko betebeharrak egunean izan beharko dituzte.

3. Kontzeptu diruz lagungarriak.

Deialdi honen ondorioetarako, erakundeak GARDENA (Nafarroako Kirolaren Kudeaketa Aurreratua) programan parte hartzeko dituen izen-emate gastuak baino ez dira diruz lagunduko; guztizkoaren % 75, hain zuzen.

4. Dirulaguntzaren zenbatekoa.

4.1. Deialdi honetarako gastu ondartua 30.000 eurokoa da guztira. Hala ere, honako bloke hauek ezartzen dira erakunde onuradun motaren arabera, honako zenbateko hauekin:

– 15.000 euro Nafarroako Kirolaren Erregistroan izena emanda dauden kirol erakundeentzako dirulaguntzak finantzatzeko, 2021eko Nafarroako Aurrekontu Orokorretako A50002-15120-4819-336115 (COVID-19 Kirol erregistroan izena emanda dauden kirol erakundeen prestakuntzarako dirulaguntzak berraktibatzeko plana) partidaren kontura.

– 10.000 euro kirol kudeaketako enpresa publikoentzako dirulaguntzak finantzatzeko, 2021eko Nafarroako Aurrekontu Orokorretako A50002-A5120-4409-336100 (COVID-19 Kirol kudeaketako enpresa publikoen prestakuntzarako dirulaguntzak berraktibatzeko plana) partidaren kargura.

– 5.000 euro kirol kudeaketako enpresa pribatuentzako dirulaguntzak finantzatzeko, 2021eko Nafarroako Aurrekontu Orokorretako A50002-A5120-4709-336100 (COVID-19 Kirol kudeaketako enpresa pribatuen prestakuntzarako dirulaguntzak berraktibatzeko plana) partidaren kargura.

4.2. Dirulaguntzaren zenbatekoa, azkenik, kreditu egoki eta nahikoa egotearen arabera zehaztuko da.

5. Eskaeren aurkezpena, dokumentazioa eta epeak.

5.1. Eskaerak Nafarroako Kirolaren Institutuari zuzenduko zaizkio, eta telematika bidez aurkeztuko dira nahitaez, Nafarroako Gobernuak Interneten duen atariko (www.nafarroa.eus) tramiteen katalogoan dagokion esteka erabiliz.

Halaber, Nafarroako Kirolaren Institutuaren webgunea ere baliatu daiteke horretarako:

https://www.deportenavarra.es/eu

Eskaera Nafarroako Kirolaren Institutuari zuzendu beharko zaio eta horretarako ezarritako eredu ofizialaren araberakoa izanen da (2. eranskina), Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.8 eta 66.6 artikuluetan xedatutakoarekin bat. ez aurkeztutzat joko dira laguntzen fitxan dagoen ereduarekin bat ez datozen eskaerak, bai eta fitxa horren bidez telematikoki aurkezten ez direnak ere. Horrenbestez, ez-aurkeztutzat jotzen direnez, eskaera horiek ezin izanen dira zuzendu.

Eskaerak aurkezteko epea deialdi hau Nafarroako Aldizkari Ofizialean argitaratu eta hurrengo egunean hasiko da, handik 10 egun natural arte.

Izena eman ondoan baino ezin izanen da egin eskabidea. Ez dago lehenago eskatzerik.

5.2. Ez da onartuko erakunde baten eskabide bat baino gehiago, nahiz eta batek erakunde bat ordezkatu eta besteak erakunde horren talde edo erakunde filial bat ordezkatu.

5.3. Agiri hauek aurkeztuko dira:

a) Eskabide orria.

Inprimakian, kasuan kasuko laukitxoak hautatu beharko dira eskaera beteta egoteko, baimen eta adierazpen hauekin:

–Baimena eskatzaileak Nafarroako Zerga Ogasunarekiko zerga betebeharrak egunean dituela frogatzen duen egiaztagiria kontsultatzeko.

–Erantzukizunpeko adierazpena, adierazteko ezen ez dela urratzen, onuradun izateko, Dirulaguntzei buruzko azaroaren 9ko 11/2005 Foru Legearen 13. artikuluan ezarritako inolako debekurik.

–Erantzukizunpeko adierazpena, zehazten duena entitate eskatzailea ez dela zehapen administratibo irmorik edo kondena-epai irmorik betetzen ari, edo, hala bada, ez dagoela zehapen eta kondena-epai bat bete zain, sexuan edo generoan oinarritutako diskriminazioa dakarten lan arloko jardunbideak gauzatu edo toleratzeagatik.

–Adierazpena, zehazteko erakundeak badakiela NKIk ziurtagiria eska dezakeela frogatzeko eskatzaileak Gizarte Segurantzarekiko betebeharrak egunean dituela.

b) Aitorpena, adierazten duena, hala badagokio, diruz lagunduko den jarduera finantzatua izan dela edo finantzatzea aurreikusten dela beste dirulaguntza, laguntza edo baliabide batzuekin.

c) Aitorpena, adierazten duena, apustu enpresek (apustu makinen operadore diren enpresak barne) ez dutela guztiz edo zati batean finantzatzen eta/edo babesten erakundea. Era berean, ez da izaten ahalko enpresa mota horien publizitaterik, ez instalazioetan, ez janzkeretan eta jarduerak egiteko erabilitako materialean.

d) Laguntza transferentzia bidez kobratzeko eskabidea (laguntza lehenbiziko aldiz eskatzen bada edo aldaketaren bat izan bada bakarrik).

e) Prestakuntza antolatzen duen erakundeak egindako fakturak, izen emateenak.

f) Ordainketaren egiaztagiria.

6. Antolamendua eta instrukzioa.

6.1. Dirulaguntza hauek emateko prozeduraren antolaketa eta instrukziorako organo eskuduna NKIko Kirol Zuzendariordetza izanen da.

Eskaerak aurkeztu ahala tramitatuko eta ebatziko dira espedienteak, aurrekontuan kreditu nahikoa dagoen bitartean.

Aurkeztutako dokumentazio administratiboa osorik ez badago edo deialdiko betebeharrak betetzen ez badira, interesdunari errekerimendua eginen zaio dokumentazioa osatu edo akatsak zuzendu ditzan 10 egun balioduneko epean, eta, halaber, ohartaraziko zaio, hala egin ezean, bere eskaerari uko egin diola ulertuko dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 68. artikuluari jarraikiz.

6.2. Organo horrek ahalmena du erakunde eskatzaileei eskatzeko aurkeztutako dokumentazio teknikoan dagoen informazioa argitu edo handitu dezatela.

6.3. Gaitutako helbide elektronikora eta herritarren karpetara jakinarazpen elektronikoa igorriz eginen da dokumentazioa osatu edo zuzentzeko errekerimendua, aurreko paragrafoan ezarri dena.

7. Dirulaguntzak emateko ebazpena.

7.1. NKIko zuzendari kudeatzaileak laguntzak ematearen gaineko ebazpena gehienez bi hilabeteko epean emanen du, eskaera bakoitza aurkezten denetik aurrera. Epe hori espresuki ebazpenik eman gabe bukatzen bada, eskaera ezetsi egin dela ulertuko da.

Laguntzak onesteko ematen diren ebazpenetan onetsiko da, halaber, laguntzak ordaintzea, baldin eta 11. oinarrian ezartzen diren gardentasun betebeharrak bete badira.

7.2. Dirulaguntza emateko ebazpena interesdun bakoitzari jakinaraziko zaio. Ebazpenak dirulaguntzaren onuradunen zerrenda eta ukatutako eskaeren zerrenda, ukoaren arrazoia barne, jasoko ditu. Orobat, ebazpena www.navarra.es/home_eu/ webgunean egonen da ikusgai.

7.3. Ekitaldi ekonomiko jakin baten kargura dirulaguntza bat emateak ez du eskubiderik sortzen hurrengo ekitaldi ekonomikoen kargura ere dirulaguntzarik eskuratzeko.

8. Dirulaguntza ordaintzea.

Emakidaren ebazpenean erabakita egonen da dirulaguntzaren ordainketa. Transferentzia bidez ordainduko da bi hilabeteko epean gehienez, kasuan kasuko ebazpena jakinarazten denetik aurrera, eta, betiere, 2021eko abenduaren 31 baino lehenago eta oinarri hauetako 11. apartatuan aipatutako gardentasun betebeharra konplitu ondoan.

9. Frogagiriak eta aurkezteko epea.

Ez da beharko oinarri hauen 5. puntuan zehaztutakoez bestelako beste agiririk; izan ere, horiek eskabidean sartzen dira; aurkezteko epea Nafarroako Aldizkari Ofizialean argitaratu eta 10 egunera amaitzen da.

10. Onuradunek bete beharrekoak.

Deialdi honen babesean dirulaguntza jasotzen duten erakundeek betebehar hauek izanen dituzte:

a) Dirulaguntzak eman diren xedeetarako erabiltzea, bete dituztela dokumentu bidez frogatu, eta NKIk egiten dituen egiaztapenak onartu eta erraztea.

b) Jaso duen edo jasotzeko duen beste edozein diru sarrera, zuzena nahiz zeharkakoa, jakinaraztea eskabide ereduko inprimakia betez. Jakinarazpen hori ahal bezain laster eginen da eta, betiere, jasotako dirua zertan erabili den justifikatu baino lehen.

c) Ematen den dirulaguntza bateragarria izanen da Administrazioak berak, beste Administrazio Publiko batzuek, beste erakunde publiko edo pribatu batzuek edo partikularrek, naziokoek nahiz nazioartekoek, ematen dituzten bestelako dirulaguntzekin. Laguntza hauen zenbatekoak, eta jardueraren ondoriozko beste diru sarrera batzuek, bakarrik edo denak baturik, ezin izanen dute behin ere gainditu garatu beharreko jardueraren kostua.

d) Nafarroako Gobernuaren laguntza jaso dela adieraztea jardueren gaineko edonolako publizitatean, erakundearen webgunean eta instalazioetan, NKIk adierazten duen irudi korporatiboa jarriz.

e) Hizkuntza berdinzalea erabiltzea komunikazio, argitalpen, programa eta antzeko guztietan; emakumeenganako diskriminazioa islatzen duen irudi oro saihestea eta berdintasunari, aniztasunari, eginkizunen pluraltasunari eta ardurakidetzari lotutako baloreak sustatzea.

f) Pertsona guztien hizkuntza eskubideak bermatzeko, erakundeek euskararen eta gaztelaniaren presentzia bermatuko dute komunikazio guztietan: paperak, izena emateko orriak, kartelak, zabalkunderako bitartekoak, megafonia eta publizitateko logotipoak.

g) Erraztasunak ematea NKIri diruz lagundutako jardueraren gainean dagozkion kontrol lanak egin ditzan, oinarri hauetan ezarritakoa betetzen ote den egiaztatzeko.

h) Egiaztatu eta kontrolatzeko ahalmenak egoki erabiltzen direla bermatzeko, kontabilitate liburuak, erregistro eginbidetuak eta bestelako agiriak eduki eta mantendu beharko dira, behar bezala auditatuak, merkataritzari eta sektoreari buruzko legeetan xedatu bezala. NKIk edozein agiri eska dezake bidezkotzat jotzen badu eskatzailearen datuak berresteko.

i) Dirulaguntzei buruzko azaroaren 9ko 11/2005 Foru Legearen 35. artikuluan ezarritako kasuetan, hartutako dirulaguntzak itzultzea.

11. Gardentasun betebeharrak.

Administrazio publiko bati lotuta ez dauden erakunde pribatuek gardentasun betebeharra izanen dute (Gardentasunari, informazio publikoa eskuratzeari eta gobernu onari buruzko maiatzaren 17ko 5/2018 Foru Legearen 12.4 artikuluan ezarrita dago), baldin eta 20.000 eurotik gorako laguntzak edo dirulaguntzak jasotzen badituzte urtebetean Nafarroako Aurrekontu Orokorren kargura, edo jasotako laguntzak edo dirulaguntzak haien urteko diru sarrera guztien % 20 edo gehiago badira, eta gutxienez 5.000 eurora iristen badira.

Horretarako, dirulaguntza eskatzen duten erakunde eta pertsona juridiko pribatuek foru lege horren 12.4 artikuluan aipatzen den informazioa aurkeztu beharko dute beren eskabidearekin batera, erakundearen legezko ordezkariak sinatuta.

Aitorpen eredua eta nahitaezko dokumentazioa Nafarroako Gobernuak Interneten duen Atariko Tramiteen Katalogoko kasuan kasuko fitxaren bitartez kontsultatu, bete eta tramitatzen ahalko dira: www.nafarroa.eus.

12. Ez-betetzeak.

Deialdi honetako oinarrietan ezarritakoa betetzen ez bada, bereziki betebeharren atalean ezarritakoa, datu faltsuak ematen badira edo dirulaguntzaren xedea NKIren baimenik gabe aldatuz gero, laguntza galduko da, osorik edo partez, eta jasotako zenbatekoak itzuli beharko dira. Gainera, horrek ekartzen ahalko du aurrerantzean helburu horretarako edo antzekoetarako dirulaguntzaren eskaerarik ez onartzea, deusetan galarazi gabe antolamendu juridikoan aurreikusitako gainerako erantzukizunak.

Onuradunek frogagiriak epez kanpo aurkezten badituzte, bidezkoa izanen da dirulaguntza osorik edo partez galtzea, Dirulaguntzei buruzko azaroaren 9ko 11/2005 Foru Legearen arabera.

Nolanahi ere, onuradunak betebeharrak ia osorik betetzen dituenean eta zalantzarik gabe bere konpromisoak betetzeko jarrera frogatzen duenean, dirulaguntzaren zenbatekoa proportzionaltasun irizpideari jarraituz zehaztuko da.

13. Datu pertsonalak babestea.

Honako hauekin bat tratatuko dira deialdi hau tramitatzearen eta kudeatzearen ondorioz biltzen diren datu pertsonalak: Datuak Babesteko EB 2016/679 Erregelamendu Orokorra, Datu pertsonalak babesteari eta eskubide digitalak bermatzeari buruzko abenduaren 5eko 3/2018 Lege Organikoa eta arlo horretan indarrean dagoen gainerako araudia.

NKIko webgunean informazioa dago datu pertsonalen tratamenduari aplikatzen zaion datuak babesteko politikari buruz.

14. Errekurtsoak.

14.1. Deialdi honen eta bere oinarrien kontra gora jotzeko errekurtsoa jar daiteke, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita, Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

14.2 Orobat, Nafarroako Kirolaren Institutuko zuzendari kudeatzailearen ebazpen bidez foru agindu hau aplikatzeko ematen diren egintzen aurka, gora jotzeko errekurtsoa jar daiteke, Kultura eta Kiroleko kontseilariari zuzendua, hilabeteko epean, jakinarazi eta hurrengo egunetik hasita.

15. Legeria.

Foru agindu honetan ezarrita ez dagoen orotan, Dirulaguntzei buruzko azaroaren 9ko 11/2005 Foru Legean xedatutakoari jarraituko zaio.

Iragarkiaren kodea: F2114931