Iragarkia

134. ALDIZKARIA - 2021eko ekainaren 9a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

44/2021 FORU DEKRETUA, ekainaren 2koa, zeinaren bidez aldatzen baita apirilaren 30eko 37/2014 Foru Dekretua. Foru dekretu horren bidez arautu zen Nafarroako Foru Komunitateko Administrazioaren unibertsitatez kanpoko irakasle kidegoei dagozkien lanpostuak betetzea.

ZIOEN AZALPENA

Arau hau eman da Nafarroako Foru Komunitateak funtzio publikoaren arloan dituen eskumenez baliaturik (eskumen horiek Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 49.1 artikuluan aurreikusita daude) eta Estatuko oinarrizko araudi aplikagarria garatuz, arau hauek bereziki: azaroaren 8ko 1834/2008 eta azaroaren 4ko 1594/2011 Errege Dekretuak, Maisu-maistren eta Bigarren Hezkuntzako irakasle funtzionarioen kidegoetako espezialitateak ezartzen dituztenak, hurrenez hurren, eta urriaren 29ko 1364/2010 Errege Dekretua, Hezkuntzari buruzko maiatzaren 3ko 2/2006 Lege Organikoan ezarritako irakasleen kidegoetako langile funtzionarioen arteko estatu mailako lekualdatze-lehiaketa eta haiek bete beharreko lanpostuak betetzeko beste prozedura batzuk arautzen dituena.

Apirilaren 30eko 37/2014 Foru Dekretuak Nafarroako Foru Komunitateko Administrazioaren unibertsitateaz kanpoko irakasleen kidegoei dagozkien lanpostuak nola bete arautzen du, baita lanpostu horiek betetzeko erregelamenduzko araubidea jaso ere, zentzu zabalean hartuta; hau da, ez da behin betiko destinoa lortzera mugatzen, baizik eta ikasturte baterako edo zerbitzu-eginkizunetan emandako behin-behineko destinoak diren kasuetara ere iristen da.

Indarrean sartu zenetik gaur arte foru dekretu hori aplikatzean izan den esperientziak erakutsi du apirilaren 30eko 37/2014 Foru Dekretuaren erregulazioko eta garapeneko zenbait elementu berrikusi direla eta haietan komeni dela hobekuntzak egitea.

Proiektuak eta programak gauzatzeko zerbitzu-eginkizunen arloan (2. artikulua), azpimarratu beharrekoa da proiektu eta programa horiek aski heterogeneoak direla eta horrek haien helburuak barreiatu dituela eta, ondorioz, hezkuntza sistemako hobetzeko eraginkortasun gutxikoak gertatu direla. Arrazoi hori dela kausa, aurreikuspen hau sartu da: Hezkuntza Departamentuak, deialdiak egin baino lehenago, ezarri beharko du proiektu eta programa horiekin zer arlo estrategiko sustatu nahi den eta ez ditu deialdira aterako arlo horiekin bat ez datozenak. Horretaz gainera, praktiketako funtzionarioek ere deialdi hauetan parte hartzen ahalko dute. Zerbitzu-eginkizunak emanen zaizkie baldin eta zerbitzu-eginkizun horien ondorioen datan karrerako funtzionario izaera eskuratua badute. Bestalde, gerora sortutako arrazoiengatik zerbitzu-eginkizunak bukatzeko prozedura hobetzen da. Zerbitzu-eginkizun horien iraupenari dagokionez, oro har, orain arte bezala gehienez ere bi ikasturtekoa izanen da. Hala ere, bi urte baino gehiagoko proiektuak edo programak izan daitezkeenez, proiektu edo programa jakin batzuk egin behar direnean gehienez ere hiru ikasturte bitartekoak izan daitezke, salbuespenez eta arrazoituz.

Irakasleentzako laguntza zentroetako eta baliabide zentroetako zerbitzu-eginkizunen arloan (3. artikulua), praktiketan dauden langile funtzionarioendako aurreko paragrafoan egin den aurreikuspen bera bildu da eta argitu dira, orobat, behin betiko destinoa galtzeko baldintzak, zerbitzu-eginkizunak bigarren aldi baterako lortzen direnean, eta, zerbitzu-eginkizunak bukatzen direnean, lekualdatze-lehiaketetan parte hartzeko baldintzak. Bigarren alderdi honi dagokionez, 7.2 artikulua aldatu da eta hartan sartu destinoa galtzeko aukera, herria edo eskualdea aukeratzeko lehentasunezko eskubidea berekin dutenen artean.

“Beste zerbitzu-eginkizun batzuk” izeneko 4. artikulua aldatzen da. Han araututako alderdi batzuk argitu dira, esaterako, toki-korporazioko kidea izateagatikoa, eta ikastetxeak sortzea edo ikasketa berriak ezartzekoa.

Halaber, 6. artikuluan arautzen da nola hartu behar duten parte lekualdatze-lehiaketan behin-behineko destinoarekin eta praktiketan dauden irakasle funtzionarioek. Bigarren kasu honetan bada berritasun bat: haien egoera berdinduko da beren promozioko lankideekin batera praktikak egitea galarazten dien aparteko inguruabar bat dutenean, lehen behin betiko destinoa lortzeko dituzten aukerei dagokienez.

Artikulu horretan berean ezabatu da 2. apartatua, foru dekretua onetsi zenetik hona iragan den denboran eraginkortasuna galtzeagatik. Izan ere, apartatu horretan ezarritakoa aplikagarri zitzaien irakasleek jadanik behin betiko destinoa lortua dute.

Atzerriko hizkuntzaren egiaztagiri iragankorrari dagokionez, zeina arautua baitago apirilaren 30eko 37/2014 Foru Dekretuaren lehen xedapen iragankorrean, egiaztatu da eraginkortasun eskasekoa izan dela foru dekretu horren aplikazio-urteetan zehar. Horregatik, egoki ikusten da egiaztagiri hori kentzea. Xedapen iragankor berean, lanpostuak aldi baterako eta behin-behinekotasunez betetze aldera, aurreikusten zen Hezkuntzako kontseilariaren martxoaren 11ko 32/2013 Foru Aginduan araututako I, F edo ALE eskakizunen baliozkotasuna iragankorra izatea 2020-2021 ikasturtera arte eta subsidiarioa izatea hizkuntzaren goiko mailekin alderatuta. Egiaztagiri iragankorra kentzearen ondorioz, komeni da eskakizun horien baliozkotasuna izaera subsidiarioarekin ere mantentzea , baina orain modu iraunkorrean, lanpostuak aldi baterako eta behin-behinekotasunez betetzeko. Kentze horri dagokionez, bigarren xedapen gehigarrian aurreikusten da eskakizun horiek ofizioz egiaztatzea foru dekretu honek indarra hartutakoan behin-behineko egiaztagiria dagokion hizkuntzan dutenei. Honako aldaketa honek berekin dakar 10. eta 11. artikuluak ere aldatzea, arauari koherentzia emateko.

Aipatutako aldaketez gain, lehen xedapen gehigarri bat sartu da foru dekretu honetan, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.5 artikuluko bigarren paragrafoan xedatutakoaren babesean, Hezkuntza Departamentuaren eskumeneko prozeduren tramitazio elektronikoan gaur egun dauden aurreikuspenak osatzeko xedez.

Azkenik, bi azken xedapen sartu dira artikulu zehatz batzuk aldatzeko. Artikulu horiek, beste arau batzuetan sartuta dauden arren, irakasle lanpostuen hornidura ere arautzen dute. Lehena, hezkuntza orientazioaren antolaketari dagokiona, beharrezkotzat jotzen baita urriaren 29ko 66/2010 Foru Dekretua aldatzea (foru dekretu horren bidez arautu zen Nafarroako Foru Komunitateko ikastetxeetan hezkuntza- eta lanbide-orientabidea), orientazioaren antolaketa une oro ezarritako ikastetxe sarearen antolamenduarekin koherentea izan dadin.

Azken xedapenetako bigarrenean, uztailaren 6ko 225/1998 Foru Dekretuaren 19. eta 28. artikuluei eragiten dien aldaketa bat sartu da (dekretu horren bidez arautu ziren Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa eta Lanbide Hastapenerako Programak irakasten dituzten ikastetxe publikoetako irakasleen lanaldia eta ordutegia). Aldaketa horren bidez arautzen da, besteak beste eta lanpostuak betetzeko beharrezko jarraipen gisa, ikastetxe bakoitzeko departamentu bakoitzaren barruko taldeen eta gaien banaketa, halako moduz non nahikoa aurrerapenarekin bukatuta egonen baita hurrengo ikasturtearen hasierari begira.

Foru dekretu hori eman zen ikasleen azterketen deialdi berezia irailean egiten zenean, eta bertan adierazten zen, alde batetik, ikasturtea irailaren 1ean hasten zela eta, bestetik, banaketa hori ikasturtearen hasieran egin behar zela. Gaur egun, azterketen deialdi berezia ekainean egiten da, irailean egin beharrean. Horri esker, lanpostuak udako oporrak baino lehen banatu eta bete daitezke, eta irailaren 1erako prest dago ikasturte osorako ordutegia. Kontua da, beraz, araudia egungo egoerara egokitzea.

Horrenbestez, Nafarroako Kontseiluarekin bat eta Nafarroako Gobernuak 2021eko ekainaren 2an egindako bilkuran harturiko erabakiarekin bat,

DEKRETATZEN DUT:

Artikulu bakarra.–Apirilaren 30eko 37/2014 Foru Dekretua aldatzea. Foru dekretu horren bidez arautu zen Nafarroako Foru Komunitateko Administrazioaren unibertsitatez kanpoko irakasle kidegoei dagozkien lanpostuak betetzea.

Apirilaren 30eko 37/2014 Foru Dekretua, Nafarroako Foru Komunitateko Administrazioaren unibertsitatez kanpoko irakasle kidegoei dagozkien lanpostuak betetzea arautzen duena, honelaxe aldatzen da:

Bat.–2. artikulua aldatzen da, eta honela idatzita agertuko da:

“2. artikulua. Lanpostuak betetzea berariazko proiektu edo programetan, zerbitzu-eginkizunen araubidean.

1. Oro har, Hezkuntza Departamentuak deialdiak iragarriko ditu ikastetxean hastear diren edo hasi berriak diren berariazko programa edo proiektuak aztertu edo ezartzeko lanpostuak zerbitzu-eginkizunen araubidean betetzeko.

Aldez aurretik, gaian eskumena duten organoek zehaztuko dituzte Hezkuntza Departamentuak sustatu nahi dituen arlo estrategikoak, artikulu honetan aipatzen diren proiektu edo programa berariazkoak ezartzearen bidez, eta ez da deialdirik eginen baldin eta proiektu edo programa horiek ez badatoz bat arlo estrategiko horien sustapenarekin.

2. Proiektu edo programa hauei dagozkien lanpostuak zerbitzu-eginkizunen araubidean hornitzen ahalko dira, ezartzen diren ikastetxean, artikulu honetan ezarritakoarekin bat, eskuarki eta gehienez ere bi ikasturtetan. Deialdian gehienez ere hiru ikasturterako izan daitezkeela ezarriko da, gaian eskumena duen zuzendaritza nagusiak aldez aurretik motibaturik, salbuespenezko izaeraz eta programa edo proiektu zehatzak egiteko baldin badira.

Gehienezko epe hori iraganik, ezinezkoa izanen da ikastetxe berean ezaugarri bereko edo antzeko proiektu edo programa berariazko baten deialdirik egitea.

3. Eskumena duen organoak proposaturik eginen dira deialdiak, proiektu edo programa zein gairekin loturik dagoen, haren arabera. Gutxienez ere ondoko alderdiak bete beharko dituzte:

3.1. Berariazko proiektu edo programaren justifikazioa eta zein ikastetxetan ezarriko den, 1. apartatuan aipatzen diren arlo estrategikoei dagokienez.

3.2. Lanpostuaren berariazko ezaugarriak.

3.3. Proiektu bakoitzerako emanen diren zerbitzu-eginkizunen gehienezko kopurua.

3.4. Deialdian parte hartzeko baldintzak: kidegoa edo kidegoak, espezialitatea edo espezialitateak, eta hala behar bada, hizkuntza eta/edo eskakizuna; Hezkuntza Departamentuaren zerbitzuko funtzionario edo lan-kontratudun finko izatea; eta zerbitzu-eginkizunak hasten diren ikasturteko irailaren batean jardunean izatea.

3.5. Hautapen sistema ondokoa izanen da: eskuratu nahi den lanpostuaren eginkizunei lotutako memoria edo proiektuaren aurkezpena edo defentsa. Baztergarria izanen da hari esleitutako puntuazioaren erdia gainditzen ez dutenentzat.

3.6. Hautapen organoak hiru kidek osatuko dituzte, deialdi berean izendaturikoak edo deialdian adierazten den epe eta prozeduraren bidez izendaturikoak. Horietako bi Hezkuntza Departamentuan gaian eskumena duen zuzendaritza nagusiak proposatuko ditu eta, beste bat, Langile Irakasleen Batzordeak.

4. Artikulu honetan aipatzen diren zerbitzu-eginkizunak gauzatzeko nahitaezkoa izanen da deialdian sartu den ikastetxean dagokion espezialitate eta hizkuntzan eta, hala behar denean, hizkuntza-eskakizunean, lanpostu huts bat egotea, behin aurreikusitako premiak zehaztu direnean, ikasturte bakoitzerako hezkuntza plangintzarekin bat.

Izangaiak kasuan kasuko proiektu edo programarako baldintza gisa sartu diren espezialitateetako baten baino gehiagoren titularrak direnean, esleituko zaien lanpostu hutsa izanen da merezimendu-lehiaketa honetan parte hartzeko eskaera egitean atxikita duten espezialitate, hizkuntza, eta, kasua bada, hizkuntza-eskakizun berekoa. Lanpostu hutsik ez badago espezialitate horretan, administrazioak zehaztuko du zer lanpostu huts esleituko zaien, ikastetxeak proposatuta.

5. Artikulu honen babesean emandako zerbitzu-eginkizunak bukatu eginen dira ondoko kausetakoren bat tarteko:

a) Aldi jakin baterako eman zirelako eta aldi hori bukatu delako.

b) Zentroa kentzeagatik edo aldatzeagatik, kentze edo aldaketa horrek ezinezkoa egiten badu ukitutako zerbitzu-eginkizunei segida ematea.

c) Interesdunak berariaz uko egiteagatik.

d) Gerora sortutako arrazoiak, honako hauen ondorioz: lanpostua betetzeko gaitasun edo egokitasun falta, langilearen errendimendu eskasak agerian uzten duelako ezin dituela emandako eginkizunak eraginkortasunez bete.

Deialdia proposatu duen organoak txosten arrazoitu baten bidez eskatuko dio Langileen Araubide Juridikoaren Zerbitzuko zuzendariari hasiera eman diezaiola zerbitzu-eginkizunak bukatzeko prozedurari.

Prozedurari hasiera emanen zaio Langileen Araubide Juridikoaren Zerbitzuko zuzendariaren ebazpen bidez. Ebazpen hori igorriko zaio deialdia proposatu duen organoari, egokitzat jotako jarduketak egin ditzan, interesdunari entzunaldia ematea barne, ikastetxeko zuzendaritzari eta Langile Irakasleen Batzordeari.

Bidezko jarduketak egin ondotik, deialdia proposatu duen organoak betetako lanpostuari atxikitako langilearen gaitasuna eta egokitzapena baloratzeko txostena eginen du eta Araubide Juridikoaren Zerbitzura igorriko du.

Txosten hori negatiboa bada, zerbitzu-eginkizunei bukaera emanen zaie, Langileen Araubide Juridikoaren Zerbitzuaren ebazpen baten bidez.

e) Jarduneko zerbitzua ez den zeinahi beste egoera administratibotara pasatzea.

f) Administrazioan beste lanpostu baterako izendatua izatea.

g) Langileari beste zerbitzu-eginkizun bat eman izatea, Nafarroako Foru Komunitatearen Administrazioaren eta haren erakunde autonomoen barnean zein beste edozein administrazio publikotan.

h) Zerbitzu-eginkizunen kontzesioa arrazoitu zuen beharra desagertu izana, ikastetxean behin betiko destinoa duten irakasleek lanpostu hori bete dutelako.

i) Baldintzak gerora ez betetzea.

6. Salbu eta behar bezala justifikaturik dauden kasuetan, zerbitzu-eginkizuna modu aurreratuan bukatzen denean aurreko apartatuko b eta c letretan aurreikusitako kasuen ondorioz, bukaera horrek bat egin beharko du ikasturtearen bukaerarekin.

7. Bete gabeko lanpostuak deialdi bidez bete daitezke, behin bakarrik eta zerbitzu-eginkizunen araubidean, proiektuaren edo programaren xede den gaian eskumena duen organoak egindako proposamen arrazoituaren bidez, baldin eta interesdunak deialdiaren baldintzak betetzen baditu eta iraupena ikasturte batekoa baldin bada”.

Bi.–3. artikulua aldatzen da, eta honela idatzita agertuko da:

“3. artikulua. Lanpostuak betetzea zerbitzu-eginkizunen araubidean Hezkuntza Departamentuaren mendeko Irakasleentzako Laguntza Zentroetan eta Baliabide Zentroetan.

1. Hezkuntza Departamentuak merezimendu-lehiaketen deialdiak eginen ditu, zerbitzu-eginkizunen araubidean betetzeko Irakasleentzako Laguntza Zentroetako (ILZk) aholkulari eta zuzendarien lanpostuak eta Nafarroako Hezkuntza Bereziko Baliabideen Zentroko (NHBBZ), Euskararen Irakaskuntzarako Baliabide Zentroko (EIBZ) eta beste baliabide zentro batzuetako irakasleen lanpostuak.

2. Gaian eskumena duen organoak proposaturik eginen dira deialdiak, ikastetxea zein gairekin loturik dagoen haren arabera. Gutxienez ere ondoko alderdiak bete beharko ditu:

2.1. Eskaintzen diren lanpostuen kopurua eta ezaugarriak.

2.2. Deialdian parte hartzeko baldintzak: horien artean sartuko dira, gutxienez, kidegoa edo kidegoak, espezialitatea edo espezialitateak, eta hala behar bada, hizkuntza eta/edo eskakizuna; Hezkuntza Departamentuaren zerbitzuko funtzionario edo lan-kontratudun finko izatea; eta zerbitzu-eginkizunak hasten diren ikasturteko irailaren batean jardunean izatea.

2.3. Hautapen sistema. Bi zati izanen ditu eta balorazioa %50ean haztatuko da:

a) Lehen atalean eskuratu nahi den lanpostuaren eginkizunei lotutako memoria edo proiektua aurkeztu edo defendatu beharko da. Baztergarria izanen da zati honi esleitutako puntuazioaren erdia gainditzen ez dutenendako.

b) Bigarren atalean deialdian zehazten diren merezimenduak baloratuko dira. Horien artean dago deialdian sartzeko baldintza den irakasleen kidegoko edo kidegoetako karrerako funtzionario gisa izandako antzinatasuna, baremoaren %50eko puntuazioarekin (hau da, puntuazio osoaren %25), eta deialdiaren xederako egokiak diren beste merezimendu batzuk, baremoaren gainerako %50arekin baloratuko direnak (hau da, puntuazio osoaren %25).

2.4. Hautapen organoak hiru kidek osatuko dituzte, deialdi berean izendaturikoak edo deialdian adierazten den epe eta prozeduraren bidez izendaturikoak. Horietako bi Hezkuntza Departamentuan gaian eskumena duen zuzendaritza nagusiak proposatuko ditu eta, beste bat, Langile Irakasleen Batzordeak. Ordezkoak ere izenda daitezke.

3. Zerbitzu-eginkizun hauek hasiera batean bi ikasturte osoko iraupena izanen dute. Behin lehen ikasturtea bukatuta eta, bigarren ikasturteko martxoa baino lehenago, irakasle interesdunek laneko memoria aurkeztu beharko dute, dagozkien deialdiek zehazten dutenarekin bat. Memoriak balorazio ona izateak berekin ekarriko du zerbitzu-eginkizunak beste hiru ikasturtez luzatu ahal izatea.

4. Aurreko apartatuan aipatzen den bost urteko aldia bukatu ondoren, baliabide zentro edo irakasleei laguntzeko zentro berean lanpostuaz bigarren aldiz jabetzeak deialdi bidez, aurrez behin betikotasunez betetzen zuen irakasle lanpostuaren erreserba bukatzea ekarriko du.

5. Lanpostuaren erreserba bukatu ondoren eta irakasleak, zerbitzu-eginkizunen araubidean, lanean segitzen duen bitartean artikulu honetan aipatzen diren ikastetxeetako batean deialdi bidez erdietsitako lanpostuan, Hezkuntza Departamentuak deitutako lekualdatze-lehiaketetan bere borondatez parte hartzen ahalko du. Hala egiten badu lanpostu bat esleituko zaio lekualdatze-lehiaketa horietan eta horrek berekin ekarriko du zerbitzu-eginkizunei automatikoki uko egitea lekualdatze-lehiaketan esleitutako destinoaren jabetza hartzen den egunean.

Artikulu honetan aipatzen diren zentroetan zerbitzu-eginkizunak bukatu ondoren, irakasle horiek nahitaez parte hartu beharko dute deitutako lekualdatze-lehiaketetan eta destinoa lortzeko lehentasunezko eskubidea izanen dute beren azken behin betiko destinoa izan zuten herrian edo eskualdean.

6. Artikulu honen babesean emandako zerbitzu-eginkizunak bukatuko dira, horretaz gainera, 2.5. artikuluan ezarritako arrazoietakoren bat dela kausa, eta 2.6. artikuluan aurreikusitakoa aplikatuko zaie.

7. Merezimendu-lehiaketa bidez bete gabeko lanpostuak behin bakarrik bete daitezke zerbitzu-eginkizunen araubidean, proiektuaren edo programaren xede den gaian eskumena duen organoak egindako proposamen arrazoituaren ondoren, baldin eta interesdunak deialdiaren baldintzak betetzen baditu eta iraupena ikasturte batekoa baldin bada”.

Hiru.–4. artikuluko lehen eta bigarren apartatuak aldatzen dira, eta honela idatzita agertuko dira:

“1. Hezkuntza Departamentuak zerbitzu-eginkizunak esleitu ahal izanen dizkie organikoki eta funtzionalki departamentu horren mendeko diren irakasle funtzionarioei, galarazi gabe Hezkuntzari buruzko maiatzaren 3ko 2/2006ko Lege Organikoan ezarritako irakasleen kidegoetako langile funtzionarioen arteko estatu mailako lekualdatze-lehiaketa eta haiek bete beharreko lanpostuak betetzeko beste prozedura batzuk arautzen dituen urriaren 29ko 1364/2010 Errege Dekretuan aurreikusitako zerbitzu-eginkizunak, ondoko kasuetan, besteak beste:

a) Langile funtzionarioen osasun arrazoiengatik.

b) Toki-korporazio bateko kide izateagatik ikastetxe batean irakasteko, toki-korporazio horretako kide den udalerrian edo inguruko udalerriren batean lanpostu hutsa dagoelako.

c) Ikastetxeetan edo baliabide zentroetan irakaskuntzako zuzendaritza karguetan aritzeko.

d) Berriki sortutako ikastetxeetan edo berriki ezarritako ikasketetan.

e) Atzerriko hizkuntzak ikasteko programak dituzten ikastetxeetan eta Musikako Goi Mailako Kontserbatorioan, betiere ez dagoenean aski irakasle ikastetxean behin betiko destinoarekin, dagozkien ikasketak eman ahal izateko.

f) Seme edo alaba adingabea zaintzeagatik eta salbuespeneko inguruabarrengatik.

g) Gaiaren araberako organo eskudunak txosten bidez behar bezala justifikaturiko bestelako langile premia bereziei erantzuteko.

2. Artikulu honetan aipatzen diren zerbitzu-eginkizunak ikasturte baterako izanen dira, c) apartatuan aurreikusitakoak izan ezik; azken hauek beren berariazko araudian xedatutakoa beteko dute.”

Lau.–6. artikulua aldatzen da, eta honela idatzita agertuko da:

“6. artikulua. Behin-behineko destinoa duten eta praktiketan dauden irakasle funtzionarioek lekualdatze-lehiaketetan parte-hartzea.

1. Kasuan kasuko deialdietan zehaztuko da lehen behin betiko destinoa eskuratu gabe behin-behineko destinoa duten irakasle funtzionarioak nahitaez hartu behar duela parte gainditu zuen hautapen prozedurako espezialitate eta hizkuntza berarekin Hezkuntza Departamentuak lanpostuak betetzeko deitzen dituen prozeduretan.

2. Praktiketan izendatutako langile funtzionarioek, praktikak hurrengo ikasturtera luzatu badituzte, izendatu eta deitzen diren lehen lekualdatze-lehiaketan hartu beharko dute parte eta, hala behar denean, lehiaketa horretan esleitutako destinoan egin beharko dituzte praktikak. Destino hori behin betiko bihurtuko da karrerako funtzionario izendatzen dituztenean”.

Bost.–7. artikulua aldatzen da, eta honela idatzita agertuko da:

“1. Urriaren 29ko 1364/2010 Errege Dekretuaren 16.1 a) artikuluan aurreikusitako ondorioetarako (dekretu horren bidez arautu ziren Hezkuntzari buruzko maiatzaren 3ko 2/2006 Lege Organikoan ezarritako irakasleen kidegoetako langile funtzionarioen arteko estatu mailako lekualdatze-lehiaketa eta haiek bete beharreko lanpostuak betetzeko beste prozedura batzuk), lanpostuak kentzeko ondoko kasuak hartuko dira aintzat:

a) Borondatezkoa, interesdunak hala eskatuta, Hezkuntzako Administrazioak zehazturiko planifikazioarekin bat eta baldin eta lanpostuak kentzea espresuki ebazpen formal baten bidez egiten bada.

b) Nahitaezkoa, hezkuntza plangintzaren ondorioz edo hezkuntza sisteman aldaketak egitearen ondorioz hainbat ikastetxe bakar batean fusionatzen direnean, ikastetxeak banatzen direnean edo ikastetxe bat ezabatzen denean eta behin betiko destinoa duten karrerako funtzionarioei eragiten dienean.

2. Foru dekretu honen 1. eta 2. eranskin gisa onesten dira Nafarroako Foru Komunitateko zonifikazioa, foru dekretu honen 3.5 artikuluan eta urriaren 29ko 1364/2010 Errege Dekretuaren 16. eta 17. artikuluetan aurreikusitako egoeretan (errege dekretu horrek arautzen ditu Hezkuntzari buruzko maiatzaren 3ko 2/2006 Lege Organikoan ezarritako irakasleen kidegoetako langile funtzionarioen arteko estatu mailako lekualdatze-lehiaketa eta haiek bete beharreko lanpostuak betetzeko beste prozedura batzuk) dauden irakasleek lehentasunezko eskubidea erabil dezaten.

Hezkuntza Departamentuak onetsitako lekualdatze-lehiaketek eguneratuko dituzte foru dekretu honetako 1. eta 2. eranskinak, ikastetxeak sortu, aldatu edo kentzeagatik”.

Sei.–10. artikulua aldatzen da, eta honela idatzita geldituko da:

“1. Ikasturte bakoitzaren hasierarako zehaztuko diren lanpostuak betetzeko, beren ikastetxetik desplazatuak izan diren unibertsitatez kanpoko irakasle funtzionarioak, behin betiko destinoa dutenak, eta zerbitzu-eginkizunak eskaini zaizkienak, titular diren espezialitateei dagozkien lanpostuen destinoa hautatuko dute.

Bestalde, behin-behineko destinoa duten langile funtzionarioek, hots, beren lehen behin betiko destinoa lortu ez dutenek, eta praktiketako funtzionarioek beren oposizioko espezialitatean eta hizkuntzan aukeratuko dute destinoa, dela gainditutako kidegoari, espezialitateari eta hizkuntzari dagozkien lanpostuetan edo, besterik bada, kidego bereko edo beste irakasle kidego batzuetako antzeko espezialitateetan, betiere errespetatuz funtzionarioek behar den espezialitatean eta hizkuntzan duten lehentasuna.

2. Aurreko apartatuan ezarritakoa galarazi gabe, ingeles, frantses eta aleman espezialitateetako langile funtzionarioei beren espezialitateko hizkuntzari dagokion hizkuntza eskakizunarekin zehaztuko diren beste espezialitate batzuetako lanpostuak esleitu ahal izanen zaizkie atzerriko hizkuntzen ikastetxeetan, baldin eta dagokion espezialitateko titularrak badira edo espezialitatea eskuratu badute eta dagokion hizkuntzaren egiaztagiria baldin badute.

3. Ikasturte bakoitzerako zehazten diren atzerriko hizkuntzako (frantsesa, ingelesa, alemana) eskakizuna duten irakaskuntzako espezialitateei dagozkien lanpostuak aldi baterako eta behin-behinekotasunez betetzeko, 9. artikuluan espezialitate eta hizkuntza bakoitzerako aurreikusitako egiaztagirien ordez, onartu eginen dira, une bakoitzean, Irakasleek frogatu ditzaketen berariazko eskakizunak zehaztu eta haiek egiaztatzeko prozedura ezartzen duen Hezkuntzako kontseilariaren martxoaren 11ko 32/2013 Foru Aginduaren I. eranskinean jasotako atzerriko hizkuntzaren titulazioak edo egiaztagiriak I, F eta ALE eskakizunetarako”.

Zazpi.–11. artikuluaren izena eta bigarren apartatua aldatzen dira, eta honela idatzita geldituko da:

“11. artikulua. Atzerriko hizkuntzaren eskakizuna duten lanpostuak aukeratzeko hurrenkera.

2. Aurreko multzoetako bakoitzaren barnean, lehentasuna izanen dute 9. artikuluko egiaztagiria dutenek hizkuntza-maila baxuagoa dutenen aldean”.

XEDAPEN GEHIGARRIAK

Lehen xedapen gehigarria.–Hezkuntza Departamentuaren eskumena diren prozeduren tramitazio elektronikoa.

1. Nafarroako Gobernuko Hezkuntza Departamentuari ahalmena ematen zaio irakasleei eta irakasle ez direnei zuzendutako jarduketetan tramitazio elektroniko osoa eskatzeko hautapen prozedura hauetan: sartu eta bertara igotzekoak, espezialitate berriak eskuratzekoak, lanpostuak betetzekoak, hizkuntza-eskakizunak egiaztatzekoak, aldi baterako kontrataziorako izangaien zerrendak eratzekoak, lanpostuak edo destinoak hautatzekoak, edo antzeko ezaugarriak dituzten jarduketak.

2. Halaber, Nafarroako Gobernuko Hezkuntza Departamentuari ahalmena ematen zaio interesdunei eskatzeko beren irakasleen eta irakasle ez direnen administrazio- eta lan-kontratuen sinadura elektronikoa.

3. Hezkuntzako kontseilariari baimena ematen zaio tramitazio elektronikoa eskatuko den prozedurak eguneratzeko.

Bigarren xedapen gehigarria.–Hezkuntzako kontseilariaren martxoaren 11ko 32/2013 Foru Aginduko I, F eta/edo ALE eskakizunak ofizioz egiaztatzea (foru agindu horren bidez ezarri zen irakasleek frogatu ditzaketen berariazko profilak zehaztu eta haiek egiaztatzeko prozedura).

Foru dekretu honek indarra hartzen duen egunean apirilaren 30eko 37/2014 Foru Dekretuaren lehen xedapen iragankorrean aipatzen den egiaztagiri iragankorra duten langileen kasuan, ofizioz egiaztatuko zaie Hezkuntzako kontseilariaren martxoaren 11ko 32/2013 Foru Aginduan aurreikusitako I, F eta/edo ALE eskakizuna, egiaztagiri iragankorraren hizkuntzaren arabera.

XEDAPEN INDARGABETZAILE BAKARRA

Apirilaren 30eko 37/2014 Foru Dekretuaren lehen xedapen iragankorra indarrik gabe gelditu da. Foru dekretu horren bidez arautu zen Nafarroako Foru Komunitateko Administrazioaren unibertsitatez kanpoko irakasle kidegoei dagozkien lanpostuak betetzea.

AZKEN XEDAPENAK

Azken xedapenetako lehena.–Nafarroako Foru Komunitateko ikastetxeetan hezkuntza-eta lanbide-orientabidea arautzen duen urriaren 29ko 66/2010 Foru Dekretuaren 11.1 artikulua aldatu da, eta honela idatzita geldituko da:

“1. Hezkuntza orientazioa antolatzeko, Bigarren Hezkuntzako institutuen eta Derrigorrezko Bigarren Hezkuntzako institutuen jarduketa eremua Nafarroako Foru Komunitateko ikastetxeetan hezkuntza- eta lanbide-orientazioa arautzen duen arautegian ezarritakoa izanen da.

Azken xedapenetako bigarrena.–Uztailaren 6ko 225/1998 Foru Dekretua aldatu da. Foru dekretu horren bidez erregulatu ziren Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa eta Lanbide Hastapenerako Programak irakasten dituzten ikastetxe publikoetako irakasleen lanaldia eta ordutegia.

1. Uztailaren 6ko 225/1998 Foru Dekretuaren 19. artikuluko 1. apartatuaren lehen paragrafoa aldatu da, eta honela idatzita geldituko da:

“1. Ekainean, Derrigorrezko Bigarren Hezkuntzako ikasmailetako ikasleen taldeak eratuta daudenean, aipatutako ikastetxeetako zuzendariak talde horietan irakaskuntza emanen duten irakasleak izendatuko ditu klaustroko bilkuran, honako hau kontuan hartuz:

–Derrigorrezko Bigarren Hezkuntzako lehen zikloan sartu diren maisu-maistren kidegoko irakasleek emanen dituzte ziklo horretan sartzeko espezialitatearen arloari dagozkion irakaskuntzak, bai eta gaituta daudeneko espezialitatearen arloari dagozkionak ere.

–Plastika eta Ikus-hezkuntzako eta Teknologiako arloetako irakaskuntzak dagokien irakasleei esleituko zaizkie, indarreko araudiarekin bat.

–Arlo berean behar adina eskola-ordurik ez badago, eta ikasleen hezkuntza beharrei erantzun ahal izateko, jakintza esparru berean curriculumeko bi arlo edo irakasgai (salbuespenez, 3 izaten ahalko dira) dituzten lanpostuak ezarriko dira.

–Derrigorrezko Bigarren Hezkuntzako lehen zikloko erlijio katolikoaren arloko irakaskuntzak emanen dituzten irakasleak, ahal dela, hala eskatzen duten irakasleen kidegoko kideak izanen dira, baldin eta dagokion elizako agintaritzaren oniritzia badute.”

2. Uztailaren 6ko 225/1998 Foru Dekretuaren 28. artikuluko 1. apartatuko lehen paragrafoa aldatzen da, eta honela idatzita geldituko da:

“Ekainean, hurrengo ikasturtea hasi baino lehen eta behin ezaguturik zein diren ordurako baimendutako taldeak, ikastetxeko zuzendariak, klaustroko bilkuran, departamentu didaktikoei adieraziko die esleituta dituzten irakasgaiei, arloei, gaiei edo heziketa zikloetako moduluei dagokien ordu kopurua eta, oro har, curriculum ofizialen arabera departamentu bakoitzari dagozkion irakastorduak, taldeen eta ordutegien banaketa egin ahal izateko. Taldeen banaketa hori adierazitako dataren ondoren egiten ahalko da, zuzendaritzaren irizpidearen arabera.”

Azken xedapenetako hirugarrena.–Erregelamendu bidezko garapena.

Hezkuntzako kontseilariari baimena ematen zaio foru dekretu hau garatzeko behar diren xedapen guztiak eman ditzan.

Azken xedapenetako laugarrena.–Indarrean jartzea.

Foru dekretu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2021eko ekainaren 2an.–Nafarroako Gobernuko lehendakaria, María Chivite Navascués.–Hezkuntzako kontseilaria, Carlos Gimeno Gurpegui.

Iragarkiaren kodea: F2109051