1. NAFARROAKO FORU KOMUNITATEA
1.7. BESTELAKOAK
664/2019 EBAZPENA, urriaren 10ekoa, Lehendakaritzako eta Gobernu Irekiko zuzendari nagusiak emana, zeinaren bidez xedatzen baita Nafarroako Aldizkari Ofizialean argitaratzea Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakia, Nafarroako Toki Administrazioaren Erreformarako otsailaren 4ko 4/2019 Foru Legearen gainekoa.
Aintzat hartuz Konstituzio Auzitegiari buruzko urriaren 3ko 2/1979 Lege Organikoaren 33. artikulua, urtarrilaren 7ko 1/2000 Lege Organikoak aldatu zuena,
EBAZTEN DUT:
Estatuko Administrazio Orokorraren eta Nafarroako Foru Komunitatearen arteko Lankidetza Batzordearen 2019ko urriaren 2ko Erabakia, ebazpen honi eranskin gisa gehitua, Nafarroako Aldizkari Ofizialean argitara dadila xedatzea.
Iruñean, 2019ko urriaren 10ean.–Lehendakaritzako eta Gobernu Irekiko zuzendari nagusia, Joseba Asiain Albisu.
ERABAKIA, ESTATUKO ADMINISTRAZIO OROKORRAREN ETA NAFARROAKO FORU KOMUNITATEAREN ARTEKO LANKIDETZA BATZORDEARENA, NAFARROAKO TOKI ADMINISTRAZIOAREN ERREFORMARAKO OTSAILAREN 4KO 4/2019 FORU LEGEAREN GAINEKOA
Estatuko Administrazio Orokorraren eta Nafarroako Foru Komunitatearen arteko Lankidetza Batzordeak erabaki hau hartu du:
1. Estatuko Administrazio Orokorraren eta Nafarroako Foru Komunitatearen arteko Lankidetza Batzordearen Erabakian lantalde bat eratu beharra aurreikusi zen, Nafarroako Toki Administrazioaren Erreformarako otsailaren 4ko 4/2019 Foru Legearen 1. artikuluko 1. eta 19. apartatuen gainean (apartatu horiek Nafarroako Toki Administrazioari buruzko uztailaren 2ko 6/1990 Foru Legearen 3.1.e eta 213. artikuluak aldatzen dituzte, hurrenez hurren), eskumenak zirela-eta sortutako desadostasunak aztertu eta konponbidea proposa zezan; aurreikuspen hori beteta, eta lantaldean izandako aldez aurreko negoziazioen ondorioz, bi alderdien iritziz konponduta daude desadostasun horiek, interpretazio honetan oinarrituta:
a) Bi alderdiek ulertzen dute ezen plangintza orokorrerako mankomunitateak, Nafarroako Toki Administrazioaren Erreformarako otsailaren 4ko 4/2019 Foru Legearen 3.1.e eta 213. artikuluetan aipatuak, Nafarroako Foru Komunitatearen esparruan jarduten duten toki entitate mota bat direla, Nafarroako toki entitateek eta Foru Komunitateko Administrazioak eraturikoak, eta berariazko araubide juridiko bat dagokiela toki araubidearen gaineko foru legeriaren barnean. Entitate horien kategoria juridikoa, eman zaien izena gorabehera, udalerrien mankomunitateek dutenaz bestelakoa da; azken horiek araututa daude Toki Araubidearen Oinarriak arautzen dituen apirilaren 2ko 7/1985 Legearen 3.2.c eta 44. artikuluetan.
b) Bi alderdiek ulertzen dute ezen plangintza orokorrerako mankomunitateek, Nafarroako Toki Administrazioaren Erreformarako otsailaren 4ko 4/2019 Foru Legearen 3.1.e eta 213. artikuluetan aipatutakoek, Nafarroako Foru Komunitatearen eskubide historikoetan dutela oinarria, eta, zehazki, 1925eko azaroaren 4ko Lege Dekretuan eta xedapen osagarrietan, Espainiako 1978ko Konstituzioaren lehenbiziko xedapen gehigarrian eta Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 46.1 artikuluan ezarritakoaren arabera. Konstituzio Auzitegiak eskubide historiko horien irismenari dagokionez finkatu duen doktrinarekin bat interpretatu behar da hori guztia.
c) Bi alderdiek ulertzen dute ezen, behin plangintza orokorrerako mankomunitateak eraturik, zeinek helburu izanen baitute toki entitateen eskumeneko zerbitzu ematea koordinatzea, kasuan-kasuan eskumena duen legegile sektorialak bermatu behar duela mankomunitateetan integraturiko udalerrien autonomia, beren interesak kudeatzeko autogobernu-esparrua baita, aplikatzekoa den legeriak ezartzen badu eginkizun hori Foru Komunitateko Administrazioari dagokiola ezinbestean, eta Konstituzio Auzitegiaren doktrinak interpretaturikoari jarraikiz. Hori guztia, Nafarroako Toki Administrazioaren Erreformarako otsailaren 4ko 4/2019 Foru Legearen 3.1.e eta 213. artikuluen interpretazio zuzenak hala eskatzen duela iritzita, eta Espainiako Konstituzioaren 137. eta 140. artikuluetan eta Nafarroako Foru Eraentza Berrezarri eta Hobetzeari buruzko abuztuaren 10eko 13/1982 Lege Organikoaren 46.3 artikuluan xedatutakoari jarraikiz.
2. Bi alderdiak ados jarri direnez, bat datoz adieraztean konpondutzat jotzen dituztela agertutako desadostasunak eta, beraz, amaitutzat ematen dute eztabaida.
3. Erabaki hau Konstituzio Auzitegiari jakinaraztea, Konstituzio Auzitegiari buruzko urriaren 3ko 2/1979 Lege Organikoaren 33.2 artikuluan aurreikusitako ondorioetarako, eta erabaki hau Estatuko Aldizkari Ofizialean eta Nafarroako Aldizkari Ofizialean argitaratzea.
Iragarkiaren kodea: F1913081
