Iragarkia

186. ALDIZKARIA - 2019ko irailaren 20a

1. NAFARROAKO FORU KOMUNITATEA

1.1. XEDAPEN OROKORRAK

1.1.2. Foru Dekretuak

206/2019 FORU DEKRETUA, irailaren 4koa, zeinaren bidez ebazten baita Faltzes eta Azkoiengo udal-mugarteak aldatzeko espedientea ebazten da, Nafarroako Ubidearen eremu ureztagarriko “22. sektorea –Arga3, Arga4–” izeneko esparruan.

Aldaketa honek jatorria du Toki Administrazioko zuzendari nagusiaren urriaren 9ko 408/2017 Ebazpenean, zeinaren bidez xedatzen baita hasiera ematea, besteak beste, Faltzes eta Azkoiengo udalerrietako muga jurisdikzionaleko marra berreskuratzeko eta haren hobekuntza geometrikoa egiteko lanei. Horrela, berariaz izendaturiko udal batzordeek iritzi zioten komenigarria zela bi udalerrien arteko muga-marra egokitzea Nafarroako Ubidearen eremu ureztagarriko “22. sektorea –Arga3, Arga4–” izeneko esparruan sorturiko lurzati-egitura berrira. Egokitzapen horrek, batzordeen eta Toki Administrazioko Zuzendaritza Nagusiaren ustez, udal-mugartearen aldaketa dakar, helburuen kariaz (Nafarroako Toki Administrazioari buruzko uztailaren 2ko 6/1990 Foru Legearen 13 artikulua, b) eta c) letrak) eta ukitutako azaleraren kariaz.

Nafarroako Toki Administrazioari buruzko uztailaren 2ko 6/1990 Foru Legearen 17. artikuluko 1. apartatuak ezartzen du udal-mugarteak aldatzeko ekimena, 15.1 artikuluan aurreikusitako kasuetan, hartarako interesa duten herritarrena eta udalarena edo udalena ez ezik Nafarroako Gobernuarena ere izan daitekeela. Ekimena baliatu ondoren, Foru Komunitateko Administrazioak bete beharreko prozeduran hauek egin behar dira: espedientea gutxienez ere bi hilabetez jendaurrean izatea, ukitutako udal eta kontzejuei entzutea ematea epe horretan berean, eta Nafarroako Kontseiluaren irizpena, Estatuko Administrazioak horren berri duela. Aldaketaren gaineko ebazpena ematea Nafarroako Gobernuari dagokio.

Ondorioz, Toki Administrazioko Zuzendaritza Nagusiak, ekainaren 4ko 314/2018 Ebazpenaren bidez, xedatu zuen Faltzes eta Azkoiengo udal-mugarteak aldatzeko espedientea tramitatzea, Nafarroako Toki Administrazioari buruzko uztailaren 2ko 6/1990 Foru Legearen 15.1.c) artikuluan ezarritakoaren arabera. Toki Antolamendurako Zerbitzuak prestatu du aurkeztutako dokumentazio teknikoa, eta Toki Entitateetako Biztanleriaren eta Lurralde Mugaketaren Erregelamenduaren 14. artikuluan ezarritako betebeharrak betetzen ditu (uztailaren 11ko 1690/1986 Errege Dekretuaren bidez onetsi zen erregelamendua). Jendaurrean paratzeko izapidea, 2018ko ekainaren 12an ireki zena Nafarroako Aldizkari Ofizialean argitaratuz 314/2018 Ebazpena, bukaerara iritsi da, eta bitartean aldaketak ez du alegaziorik jaso, agirietan proposaturiko terminoetan.

Espedientea Nafarroako Toki Administrazioari buruzko uztailaren 2ko 6/1990 Foru Legearen 17. artikuluan ezarririko prozedurarekin bat instruitu denez, lege beraren 13, 15, 16 eta 18. artikuluetan aipatzen diren betebeharrak betetzen direnez eta xede direnez 13.2.b) eta c) artikuluan aipatzen diren helburuak, udal-mugarteak egokitu egiten direlako lurraldearen errealitate fisikora eta areagotzen delako toki entitate ukituen kudeaketa gaitasuna, bidezko da Nafarroako Foru Komunitateko Administrazioak espedientea ebaztea, eta onartzea proposatzen den muga aldaketa, agiri teknikoetan deskribaturiko terminoetan, izan ere, foru dekretu honen lehen artikuluan dagoen definizio geometrikora egokitzen baita.

Espedientea osatzen dute Lurralde Mugaketako Batzordeak 2018ko abenduaren 14ko bilkuran emandako txostenak eta Nafarroako Kontseiluak 2019ko uztailaren 29an emandako aldeko irizpenak.

Horrenbestez, Lurralde Kohesiorako kontseilariak proposaturik, Nafarroako Kontseiluaren irizpenaren arabera, eta Nafarroako Gobernuak 2019ko irailaren 4ko bilkuran hartutako Erabakiarekin bat,

DEKRETATZEN DUT:

1. artikulua. Onesten da Faltzes eta Azkoiengo udal-mugarteen aldaketa Nafarroako Ubidearen eremu ureztagarriko “22. sektorea –Arga3, Arga4–” izeneko esparruan. Aldatutako tartean mugako marra espedienteko memoria teknikoan adierazten den gisan marratuko da, ondoko UTM-30N koordenatuak dituela:

2. artikulua. Aldaketaren memoriarekin eta 1690/1986 Errege Dekretuaren bidez onetsitako Toki Entitateetako Biztanleriaren eta Lurralde Mugaketaren Erregelamenduaren 14.2 artikuluan aurreikusitakoarekin bat, ondoko estipulazioak ezartzen dira:

a) Izapidatzen ez diren bitartean jurisdikzioaz aldatu diren zoruen hirigintza determinazioak zehazten dituzten Faltzes eta Azkoiengo udal plan orokorretako aldaketa puntualak, zoru horietan aplikagarriak izanen dira Lurralde Antolamenduari eta Hirigintzari buruzko Foru Legearen testu bateginean (uztailaren 26ko 1/2017 Legegintzako Foru Dekretua) eta Ebroko ardatzeko lurralde antolamenduko planean (POT-5) ezartzen diren araubidea eta determinazioak, babestu beharreko lurzoru urbanizaezinetarako, dagokien azpikategorietan.

b) Mugarte aldaketak ez du, berez, katastroko oinarrizko datuen aldaketarik eraginen ukitutako ondasun higiezinetan eta, bereziki, zerga ondorioetarako ondasun horiek izaten ahal duten balioespenean. Aldaketa bakarrak izanen dira mugartearen geoerreferentziazio zuzena egiteko beharrezkoak direnak.

3. artikulua. Lurralde Kohesiorako Departamentuari agintzen zaio foru dekretu hau betearazteko behar diren ekintza guztiak aurrera eman ditzala.

4. artikulua. Foru dekretu hau Faltzesko eta Azkoiengo udalei jakinaraztea. Aditzera ematen zaie haren kontra administrazioarekiko auzi-errekurtsoa paratzen ahalko dutela, Nafarroako Auzitegi Nagusiko Administrazioarekiko Auzien Salari zuzendua, bi hilabeteko epean, jakinarazi eta biharamunetik hasita. Horrek ez du alde batera uzten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

AZKEN XEDAPENA

Foru dekretu honek Nafarroako Aldizkari Ofizialean argitaratzen den egunean berean izanen ditu ondorioak.

Iruñean, 2019ko irailaren 4an.–Nafarroako Gobernuko lehendakaria, María Chivite Navascués.–Lurralde Kohesiorako kontseilaria, Bernardo Ciriza Pérez.

Iragarkiaren kodea: F1911526