2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
ZIZUR NAGUSIA
Deialdia, familia-langile izateko lau lanpostu lanaldi osoan betetzeko
Tokiko gobernu batzarrak, 2019ko abuztuaren 23an hartu erabakiaren bidez, onetsi da Zizur Nagusiko Udaleko familia-langile izateko lau lanpostu lanaldi osoan eta lekualdatze lehiaketa bidez betetzeko deialdia. Lanpostuok 2019ko plantilla organikoari dagozkio, horretarako aldatu baitzen, eta honako zenbaki hauek dituzte: 45101, 45104, 45105 eta 45106.
Lekualdatze lehiaketa eginen da gaiari buruz honako hauetan xedatuarekin bat: Nafarroako Administrazio Publikoen zerbitzuko Langileen Estatutuaren testu bategina onesten duen abuztuaren 30eko 251/1993 Legegintzako Foru Dekretua, hura garatu eta betearazteko asmoz lanpostuak betetzeari buruzko azaroaren 6ko 215/1985 Foru Dekretuaren bidez onetsitako Erregelamendua, aplikatzekoak diren gainerako arauak eta deialdi honen oinarriak.
OINARRIAK
1.–Xedea.
1.1. Deialdiaren xedea da Zizur Nagusiko Udaleko familia-langile izateko lau lanpostu lanaldi osoan eta lekualdatze lehiaketa bidez betetzea. Lanpostuok 2019ko plantilla organikoari dagozkio, horretarako aldatu baitzen, eta honako zenbaki hauek dituzte: 45101, 45104, 45105 eta 45106.
1.2. Lekualdatze lehiaketa honek honako hauetan xedatuari jarraituko dio:
–251/1993 Legegintzako Foru Dekretua, abuztuaren 30ekoa, Nafarroako Administrazio Publikoen zerbitzuko Langileen Estatutuaren testu bategina onesten duena.
–Lanpostuak betetzeko Erregelamendua, azaroaren 6ko 215/1985 Foru Dekretuaren bidez onetsia.
–Aplikatzekoak diren gainerako arauak.
1.3. Borondatez mugitzeko prozedura. Dagoeneko lanaldi osokoak diren lau lanposturi esleitutako postua denez, horiek betetzeko, honako hauei jarraituko zaie: 8.3 artikuluan ezarritako prozedura, Lanpostuak betetzeari buruzko 215/1985 Foru Dekretuaren bidez onetsitako Erregelamendua eta Nafarroako Administrazio Publikoen zerbitzuko Langileen Estatutuaren testu bategina onesten duen abuztuaren 30eko 251/1993 Legegintzako Foru Dekretuaren hamargarren xedapen gehigarriko 1. paragrafoaren 1. apartatua.
Horrela, Zizur Nagusiko Udaleko lanaldi partzialeko familia-langile lanpostuaren titular diren lan-kontratudun finkoen lanaldia luzatuko da, eta lanaldi osoan arituko dira.
2.–Lanpostu hutsak.
2.1. Lekualdatze lehiaketa bidezko deialdi honetan, Zizur Nagusiko Udalaren zerbitzuan famili-langile izateko lanaldi osoko lau lanpostu eskaintzen dira.
3.–Betebeharrak.
3.1. Lekualdatze honetan parte hartu ahal izateko, eskabideak aurkezteko epearen azken egunean eta esleitutako lanpostuaz jabetu arte, honako baldintzak hauek bete beharko dira:
a) Zizur Nagusiko Udaleko lanaldi partzialeko lan-kontratudun finko izatea.
b) D mailan egotea.
c) Familia-langile lanpostu baterako izendatua izatea.
4.–Eskabidea, aurkezteko modua eta epea.
4.1. Izena ematea eta merezimenduak aurkeztea.
Lekualdatze lehiaketa honetan parte hartu nahi dutenek Zizur Nagusiko Udaleko erregistro orokorrean (Erreniega parkea z.g., 31180 Zizur Nagusia) aurkeztu beharko dute izena emateko eskaera edo, bestela, Administrazio Prozedura Erkideari buruzko urriaren 1eko 39/2015 Legearen 16. artikuluan ezarritako bideetako bat erabiliz.
4.2. Halaber, merezimenduak eskabideari erantsita aurkeztu beharko dira, betiere deialdiaren baremoan zehaztutako atalei jarraikiz.
4.3. Betebeharrak frogatzea.
Eskabideari, behar bezala bete ondotik, 3. atalean aipatu agiri hauek gehituko zaizkio:
a) Nortasun Agiri Nazionalaren kopia konpultsatua.
b) 3. oinarrian zehaztu baldintzak betetzen direla egiaztatzen duen ziurtagiria.
c) Merezimenduen frogagirien kopia konpultsatua.
Merezimendu guztiak agiri bidez frogatu beharko dira, lekualdatze lehiaketa honetan izena emateko eskabidea aurkezteko epean.
4.4. Eskabideak aurkezteko epea hamabost egun naturalekoa izanen da, deialdia Nafarroako Aldizkari Ofizialean argitaratu eta biharamunetik hasita, eta luzaezina izanen da.
5.–Onartuen behin-behineko zerrenda, erreklamazioak eta behin betiko zerrenda.
5.1. Eskabideak aurkezteko epea bukaturik, Lehendakaritzako, Funtzio Publikoko eta Herritarren Segurtasuneko zinegotzi ordezkariak onartuen eta baztertuen behin-behineko zerrenda onetsiko du, Nafarroako Aldizkari Ofizialean argitara dadila aginduko, eta ohartaraziko ezen, hurrengo bost egun naturaleko epean, baztertuek erreklamazioak egiten ahalko dituztela eta, akatsik baldin bada, haiek zuzendu.
5.2. Ezarritako epean eskaerarik aurkezten ez bada, Lehendakaritzako, Funtzio Publikoko eta Herritarren Segurtasuneko zinegotzi ordezkariak ebazpena emanen du, lehiaketa bete gabe gelditu dela deklaratzeko. Ebazpen hori Nafarroako Aldizkari Ofizialean argitaratu beharko da.
5.3. Izangai bazterturik ez bada, Lehendakaritzako, Funtzio Publikoko eta Herritarren Segurtasuneko zinegotzi ordezkariak zuzenean onetsiko du behin betiko zerrenda, eta Nafarroako Aldizkari Ofizialean argitaratuko da.
5.4. Erreklamazioetarako epea bukatutakoan eta horiek ebatzi ondotik, Lehendakaritzako, Funtzio Publikoko eta Herritarren Segurtasuneko zinegotzi ordezkariak onartu eta baztertuen behin betiko zerrenda onetsiko du, eta Nafarroako Aldizkari Ofizialean argitara dadila aginduko.
6.–Epaimahaiko kideak.
6.1. Lehiaketako kalifikazio epaimahaia honako hauek osatuko dute:
1.–Epaimahaiburua: Andoni Serrano Zabalza, Lehendakaritzako, Funtzio Publikoko eta Herritarren Segurtasuneko zinegotzi ordezkaria.
–Ordezkoa: Jon Gondán Cabrera, Zizur Nagusiko Udaleko alkatea.
2.–Epaimahaikide-idazkaria: Cristina Fabo Legarda, Zizur Nagusiko Udaleko idazkaria.
–Ordezkoa: M.ª Isabel Abadía Sanz, APT-Zizur Nagusiko Udaleko Giza Baliabideen arduraduna.
3.–Epaimahaikidea: Francisco Javier Severiano Pecharromán, Zizur Nagusiko Udaleko Funtzionarioen Batzordeak izendatutako ordezkaria.
–Ordezkoa: Lorenzo de la Villa Casado, Zizur Nagusiko Udaleko Funtzionarioen Batzordeak izendatutako ordezkaria.
6.2. Onartuen eta baztertuen behin betiko zerrenda argitaratu eta ondoko bost egunean osatuko da epaimahaia.
6.3. Epaimahaiak gehiengoz erabakiko ditu deialdiaren oinarriak aplikatzeko moduaz sortzen diren arazo guztiak.
6.4. Administrazio prozeduraren arauetan abstentziorako ezarritako arrazoiren bat gertatzen denean, epaimahaiko kideek ezin izanen dute epaimahaian parte hartu, eta deialdia egin duen organoari jakinaraziko diote. Izangaiek, halaber, zilegi izanen dute epaimahaikideak errefusatzea, egoera horietako bat gertatzen denean.
7.–Merezimenduak.
7.1. Aurreko 4.3.c) oinarrian ezartzen den bezala, merezimendu guztiak eskabideak aurkezteko epean aurkeztu beharko dira.
7.2. Aurkeztutako merezimenduak deialdi honen I. eranskinean ageri den baremoari jarraikiz kalifikatu eta puntuatuko ditu epaimahaiak.
7.3. Epaimahaiak ezin izanen du inolaz ere kontuan hartu alegatu gabeko eta agirien bidez frogatu gabeko merezimendurik, ezta atal bakoitzerako baremoan aipatzen den gehieneko puntuazioa baino handiagorik eman ere.
7.4. Izangaiek lehiaketan guztira lortzen dituzten puntuetan berdinketarik bada, Administrazio Publikoen zerbitzuan antzinatasunik handiena dutenen alde joko da. Hala ere, berdinduta segitzen badute, lehiakide adinez zaharrenari emanen zaio lehentasuna.
7.5. Epaimahaiak azalpenak eta datu osagarriak eskatzen ahalko ditu lehiatzaileek alegatu eta frogatutako merezimenduen gainean.
7.6. Merezimenduen kalifikazioa bukatu ondoren, epaimahaiak argitara emanen du Zizur Nagusiko Udalaren iragarki-taulan eta www.zizurmayor.es/eu web-orrian (“Taula” atalean) lehiatzaile bakoitzak lortutako puntuazioa, eta bost egun balioduneko epea irekiko du, interesdunek merezimenduen balorazioaren gainean eskubideko jotzen duten guztia alega dezaten.
7.7. Aurkeztutako erreklamazioak ebatzitakoan, epaimahaiak parte hartzen duten pertsona guztien behin betiko puntuazioak argitaratuko ditu Zizur Nagusiko Udaleko iragarki-taulan eta www.zizurmayor.es/eu web-orrian (“Taula” atalean). Era berean, lehiakideen zerrenda, lortutako puntuazioaren arabera ordenaturik, Lehendakaritzako, Funtzio Publikoko eta Herritarren Segurtasuneko zinegotzi ordezkariari igorriko dio, espediente osoarekin batera.
7.8. Euskararen jakite-maila egiaztatzeko probarako deia eginen zaie eskabidearen II. eranskinean proba hori egitea eskatu duten izangaiei, deialdiaren I. eranskineko c) atalean ezarritako merezimendua barematzeko.
8.–Lanpostu hutsak hautatzea.
8.1. Lehendakaritzako, Funtzio Publikoko eta Herritarren Segurtasuneko zinegotzi ordezkariak ebazpena emanen du lekualdatze lehiaketan azkenean sartzen diren lanpostu hutsak zehazteko, deialdi honen bigarren oinarrian xedatuaren arabera.
8.2. Lanpostu hutsak aukeratzeko ekitaldirako deia Lehendakaritzako, Funtzio Publikoko eta Herritarren Segurtasuneko zinegotzi ordezkariaren ebazpen bidez eginen da, eta argitara emanen da Zizur Nagusiko Udalaren iragarki-taulan eta www.zizurmayor.es/eu web-orrian (“Taula” atalean, deialdiaren iragarkian).
10 egun balioduneko epean hautatuko dituzte parte-hartzaileek lanpostu hutsak.
Aurreko epea iraganik, eta hurrengo lerroaldean xedatuaren aurretik, parte-hartzaileek uko egiten ahalko diote hautatutako destinoari.
Azkenik, Lehendakaritzako, Funtzio Publikoko eta Herritarren Segurtasuneko zinegotzi ordezkariak ebazpena emanen du, lanpostu hutsak behin betiko esleitzeko, lehiaketan eskuratutako puntuazioaren ordenaren arabera, eta uko egin ezinezkoa izanen da.
Eskaera ezarritako epean aurkezten ez dutenek lehiaketaren xede diren lanpostu hutsak betetzeko eskubide guztiak galduko dituzte.
9.–Esleipena eta lanpostuaz jabetzea.
9.1. Lehendakaritzako, Funtzio Publikoko eta Herritarren Segurtasuneko zinegotzi ordezkariak, ebazpen bidez, dagokien lanpostua esleituko die lehiakideei, eta Nafarroako Aldizkari Ofizialean argitara dadila aginduko du.
9.2. Lehiakideek esleipenari buruzko ebazpena jakinarazi eta hamar egun balioduneko epean jabetu beharko dute lanpostuaz, non ez duen organo deitzaileak, ebazpen horretan, beste data bat ezartzen jabetza hartzeko.
10.–Ordainsariak.
Lekuz aldatzen direnek gaur egungo xedapenek esleitzen dizkieten ordainsariak jasoko dituzte.
11.–Errekurtsoak.
11.1. Epaimahaiak ematen dituen egintza eta ebazpenen kontra, gora jotzeko errekurtsoa aurkezten ahal da, Zizur Nagusiko Tokiko Gobernu Batzarrari zuzenduta, errekurtsoaren xede den egintza argitaratu edo jakinarazi eta biharamunetik hilabeteko epean.
11.2. Deialdi honen oinarrien kontra edo hura aplikatzeko egintzen kontra, egintza horiek ez badira epaimahaiak eginak, errekurtso hauetakoren bat paratzen ahal da, hautara:
a) Berraztertzeko errekurtsoa, egintzaren egileari zuzendua, hilabeteko epean, egintza argitaratu edo jakinarazi eta biharamunetik hasita.
Halaber, zinegotzi ordezkariak emandako egintzen aurka, berraztertzeko errekurtsoa aurkezten ahalko da, alkateari zuzendua, hilabeteko epean, errekurritutako egintza argitaratu edo jakinarazi eta hurrengo egunetik zenbatzen hasita.
b) Administrazioarekiko auzi-errekurtsoa, Administrazioarekiko Auzien Jurisdikzioko organo eskudunari zuzendua, Administrazioarekiko Auzien Jurisdikzioa arautzen duen uztailaren 13ko 29/1998 Legean xedatuaren arabera, bi hilabeteko epean, errekurritutako egintza jakinarazi edo argitaratu eta biharamunetik zenbatzen hasita.
c) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia jakinarazi edo argitaratu eta biharamunetik zenbatzen hasita.
11.3. Hori guztia Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan, eta Nafarroako Toki Administrazioari buruzko uztailaren 2ko 6/1990 Foru Legearen 333. artikuluan ezarritakoarekin bat.
Zizur Nagusian, 2019ko abuztuaren 23an.–Zizur Nagusiko Udalaren Lehendakaritzako, Funtzio Publikoko eta Herritarren Segurtasuneko zinegotzi ordezkaria, Andoni Serrano Zabalza.
I. ERANSKINA
Merezimenduak baloratzeko baremoa
a) Administrazio publikoetan egindako zerbitzuak.
Administrazio publikoetan egindako zerbitzuak baloratzeko, puntu bat emanen da deialdia argitaratzen den egunean aitortua duen antzinatasun urte bakoitzeko.
Oharrak:
1. Urteen kopurua osoa ez bada, zerbitzuan egindako aldiari proportzioan dagokion puntuazioa emanen zaio.
Lanaldi partzialean egindako zerbitzuen kasuan, behar den zatia kenduko da.
2. Honako a) atal honi dagokion puntuazioa gehienez ere 30 puntukoa izanen da.
3. Deialdia argitaratu ondoren egindako zerbitzuak ez dira baloratuko.
4. Izangaia zerbitzu berezietan edo eszedentzia berezian egon bada, edo unitate organiko bateko buru edo zuzendari lanetan aritu bada, aldi horietako zerbitzuak kontatzeari dagokionez, egoera horietan sartzean zeukan lanpostuan egin izan balitu bezala kontatuko dira.
b) Prestakuntza, irakaskuntza eta ikerketa.
1) Erakunde edo zentro publikoek eta unibertsitateek antolatutako prestakuntza jardueretan parte hartzea: 0,10 puntu emanen dira kreditu akademiko edo horren baliokide bakoitzeko (10 ikastordu), eta gehienez ere 7 puntu.
Oharrak:
1. Baloratu beharreko ikastaroetan, eskola-orduen zatikiak hainbanatuko dira.
2. Eskola-orduen kopurua agertzen ez duten ziurtagiriei kreditu bateko balorazioa emanen zaie.
3. Ikasturte bateko iraupena frogatzen duten ziurtagiriei 12 kredituko balorazioa emanen zaie.
4. Erakunde antolatzaileari buruzko betebeharrak betetzen ez badituzte ere, Administrazioak agindurik edo oniritzirik eginak diren prestakuntza ekintzetan parte hartzea puntuazio berarekin baloratuko da. Horien artean, espresuki, sindikatuek administrazio publikoetako etengabeko prestakuntzarako itunen barruan antolatutakoak sartuko dira.
5. Titulu akademiko bat eskuratzeko ikasketak, hala unibertsitatekoak nola unibertsitatez kanpokoak, ez dira atal honetan baloratuko.
2) Txostenak edo komunikazioak biltzarretan edo jardunaldietan aurkeztea, lan zientifiko edo ikerlan bekadunak edo sarituak egitea eta haiek aldizkari espezializatuetan argitaratzea: 2 puntu gehienez ere, epaimahaiak baloratu beharrekoak, kontuan izanik lana edo jarduera bakarka edo taldeka egina den, bai eta biltzarra edo argitalpena tokikoa, eskualdekoa, herrialdekoa edo nazioartekoa den ere.
3) Sektore publikoaren esparruan prestakuntza jardueretan irakasle gisa parte hartzea eta/edo horrelakoak antolatzea: puntu bat gehienez ere; epaimahaiak baloratu beharrekoak haien iraupenaren arabera.
Oharrak b) atal osorako:
1. Atal honetan aipatutako merezimenduak lanpostuarekin zerikusia dutenean baizik ez dira baloratuko.
2. Baremoaren b) atal honetako puntuazioa 10 puntukoa izanen da gehienez.
c) Puntuazio erantsia euskara jakiteagatik.
Euskara jakiteagatik 6 puntu gehituko dira, honela banatuak:
1. EGA titulua izanez gero, edo beste titulu ofizial bat, Hizkuntzen Europako Erreferentzia Esparru Bateratuaren C1 mailaren baliokidea, gehieneko balorazioa jasoko da.
2. Titulu hori izan ezean, Hizkuntzetarako Europako Erreferentzia Esparru Bateratuaren A1 maila izanez gero, gehienez eman daitekeen puntuazioaren 1/5 jasoko da; A2 maila edo baliokidea izanez gero, 2/5; B1 edo baliokidea izanez gero, 3/5; eta B2 edo baliokidea izanez gero, 4/5.
3. Bestela, Hizkuntza Eskola Ofizialean gaindituriko maila bakoitzagatik gehieneko puntuazioaren 1/6 emanen da, edo Nafarroako Gobernuak antolatutako ikastaroetan gainditutako urrats bakoitzeko 1/12.
4. Izangaiak euskaraz dakiela frogatu ahal izanen du Euskarabideak-Euskararen Nafar Institutuak horretarako prestatutako berariazko proba gaindituz. Proba hori egin nahi duten izangaiek hautaprobetan onartuak izateko eskabidean adierazi beharko dute. Proba hori gainerakoak amaitu ondoren eginen da.
II. ERANSKINA
Eskabide orria (PDFa).
Iragarkiaren kodea: L1911398
