Iragarkia

136. ALDIZKARIA - 2019ko uztailaren 15a

1. NAFARROAKO FORU KOMUNITATEA

1.7. BESTELAKOAK

50/2019 FORU AGINDUA, ekainaren 20koa, Hezkuntzako kontseilariak emana, honako hauei lotutako araudia garatzen duena: “Bestelako gastuak” eta “Langile osagarriak” moduluen justifikazioa, irakasleen hautaketa, eta Nafarroako Foru Komunitateko ikastetxe itunduek Hezkuntza Departamentuari jakinarazi beharreko hezkuntza arloko informazioa.

ZIOEN AZALPENA

Hezkuntzarako Eskubidea arautzen duen uztailaren 3ko 8/1985 Lege Organikoak, Hezkuntzari buruzko maiatzaren 3ko 2/2006 Lege Organikoak eta Hezkuntzaren Kalitatea Hobetzeko abenduaren 9ko 8/2013 Lege Organikoak hezkuntza itunak arautzen dituzte. Halaber, Hezkuntza Itunei buruzko Arauen Erregelamendua onesten duen abenduaren 14ko 416/1992 Foru Dekretuak itunen eremuetako batzuk garatzen ditu.

Foru agindu honen xedeak hezkuntza itunen eremuetako batzuk arautzea eta hezkuntza itundua finantzatzen duten funts publikoen kudeaketan gardentasun handiagoa bilatzen laguntzea da.

Foru aginduak atariko titulua eta hiru titulu gehiago ditu, araututako hiru eremuei dagozkienak.

I. tituluak arauak ezartzen ditu ikastetxe itunduek “Bestelako gastuak” eta “Langile osagarriak” moduluei dagozkien zenbatekoak justifikatzeko. Arau garapenik ez egoteak nolabaiteko anabasa sorrarazi du, ez baitago argi zer gastu hartu behar den modulu horien bidez finantza daitezkeen gastutzat. Kontuen Ganberak ere horren berri eman du “Funts publikoekin finantzatutako ikastetxe pribatuetako irakaskuntza ez-unibertsitarioari buruzko fiskalizazio-txostena (2012-2016)” dokumentuan, eta gomendatu du “xehetasun handiagoz zehaztea zer gastu finantza daitekeen itunen moduluko ‘Bestelako gastuak’ atalean”.

Foru agindu honetan garatzen den araudiak, “Bestelako gastuak” eta “Langile osagarriak” moduluei egotz dakizkiekeen gastuak zehazteaz gain, modulu horiei egotzi ezin zaizkien gastuak finkatzen ditu. Era berean, justifikazio prozedura bat ezartzen du, eta eskatutako informazioa aurkezteko epeak adierazten. Amaitzeko, ikastetxeek justifikazio gisa aurkeztu behar duten egiaztagiriaren eredua eransten da. Aipatu diren bi moduluen bidez jasotzen diren funtsen helburuari buruzko informazio zehatza du egiaztagiri horrek.

Hezkuntza administrazioaren aurreko justifikazio horren asmoa ez da ikastetxearen kontabilitate orokorra ikuskatzea, ikastetxe itunduetarako funts publikoen behar bezalako kontrola gauzatzea baizik. Nolanahi ere, eskola kontseiluaren eskumenak errespetatu nahi ditu, urteko kontuak emateko agiria onesteko orduan.

Kontuen Ganberak “ikastetxe itunduen lagin batean aurkeztutako ziurtagirien euskarriak eta justifikazioak urtero berrikusteko” egin duen gomendioari jarraikiz, foru agindu honek berariaz jasotzen du berrikuspen hori.

II. tituluak ikastetxe itunduetan irakasleak hautatzeko prozedurari buruzko arauak garatzen ditu. Zehatz-mehatz, foru agindu honek “Nafarroako ikastetxe itunduetako irakasleen lanpostu hutsak betetzeko prozedurak aplikatzeko baldintzak” ezartzen ditu, Hezkuntzarako Eskubidea arautzen duen Lege Organikoaren 60.5 artikuluaren arabera, irakasleen kontratazioetan publizitatea, gardentasuna eta objektibotasuna eraginkortasunez kontrolatu ahal izateko.

Amaitzeko, III. tituluak Nafarroako hezkuntza itunduko patronalen eta Nafarroako Gobernuko Hezkuntza Departamentuaren arteko hitzarmenaren edukia jasotzen du, ikastetxeek hezkuntza administrazioari EDUCA plataformaren bidez jakinarazi beharreko informazioari buruzkoa dena. 2019ko otsailaren 15eko hitzarmen berri horrek 2011ko otsailaren 23koa ordezten du, eta honako hauek adierazten ditu: ikastetxeei eskatzen zaien informazio eguneratua, informazioa EDUCAn erregistratzeko epeak, eta hezkuntza arloko informazioa kudeatzeko prozeduran esku hartzen duten alderdiek beren gain hartzen dituzten konpromisoak.

Foru agindu honek inplikatutako eragileen parte-hartzea izan du (patronala eta sindikatuak), eta Nafarroako Eskola Kontseiluaren aldeko txostena jaso du.

Horrenbestez, abenduaren 3ko 14/2004 Foru Legearen 41.1 artikuluak ematen dizkidan eskudantziak erabiliz,

AGINTZEN DUT:

ATARIKO TITULUA

1. artikulua. Xedea eta aplikazio-eremua.

Foru agindu hau Nafarroako ikastetxe itundu guztiei aplikatuko zaie, “Bestelako gastuak” eta “Langile osagarriak” moduluen justifikazioari, irakasleen hautaketari, eta hezkuntza arloko informazioa EDUCA plataformaren bidez kudeatzeari dagokienez.

I. TITULUA

“Bestelako gastuak” eta “Langile osagarriak” moduluen justifikazioa

2. artikulua. Ikastetxe itunduetako eskola kontseiluek kontuak emateko onetsi beharreko agiriaren eredua.

Ikastetxe itunduetako eskola kontseiluek ikastetxeen titularrek aurkezten dituzten kontuen onespena ziurtatuko dute foru agindu honen I. eranskineko kontuak onesteko agiriaren ereduaren bidez. Egiaztagiri horrekin batera bi eranskin daude (A eta B), “Bestelako gastuak” moduluaren eta “Langile osagarriak” moduluaren justifikazioa biltzen dutenak, hurrenez hurren. Azken eranskin hori hezkuntza bereziko unitate itunduak dituzten ikastetxeek bakarrik bete beharko dute.

A eta B eranskinek, biek, honako hauek bilduko dituzte:

“Diru-sarreren egoera-orria”, Administrazioak ikastetxeari ordaindutako diru kopurua jasotzen duena; eta “Gastuen egoera-orria”, aurreko puntuko diru-sarreren helburua justifikatuko duena. Kontuak emateko agiriaren ereduak xehetasun edo azalpen handiagoa eskatzen du kontzeptu batzuetarako, kontzeptu horiek finantzatu diren eskola jarduerarekin harremanik duten ala ez behar bezala baloratzeari begira.

Goi mailako heziketa zikloetan, itun berezi partzialak direnez, Nafarroako Aurrekontu Orokorren legeek ikastetxeei aukera ematen diete irakaskuntza horietako ikasleei hilean diru kopuru batzuk kobratzeko; diru kopuru horien muga Nafarroako Aurrekontu Orokorren legeetan beretan ezarria dago. Kasu horietan, A eranskineko diru-sarreren egoera-orriak ikasleek ordaindutako diru kopuruak gehituko ditu, modu osagarrian. Diru kopuru horiek behar bezala xehatuko dira, alde hauek zehaztuta: hileko prezioa, ikasleen kopurua eta sortutako hilabeteen kopurua.

3. artikulua. Gastu egozgarriak.

Hezkuntza itunak finantzatzeko jasotzen diren funtsen helburua frogatzeko asmoz, gastu gisa zenbatuko dira, ezarritako epean egiteaz gain, finantzatutako jardueraren izaerarekin zalantzarik gabe bat datozenak.

A.–“Bestelako gastuak” modulua.

Ikastetxeek “Bestelako gastuak” kontzeptupean jasotzen dituzten diru kopuruak jarraian zehazten den gastu tipologiari aplikatu beharko zaizkio. Horiek sailkatzeko, kontuan hartu da Kontabilitate Plan Orokorraren kontuen egitura, ikastetxeek informazioa modu errazagoan presta dezaten; eta ikastetxeen gastuen egoera-orrien ereduak ere hartu dira kontuan, datuen alderagarritasuna ahalbidetzeko.

Nolanahi ere, itundu gabeko irakaskuntzako mailetako unitateei edo, ikastetxean garatu arren, modulu horren barruan finantzatu ezin diren beste jarduera batzuei dagokien zati proportzionala kendu behar da. Horri dagokionez, ikastetxeko eskola kontseiluak jakin behar du zein den/diren gastu horiek hainbanatzeko erabili den/diren formula/formulak, eta hori/horiek gehitu eta azaldu beharko du/ditu kontuak onesteko ziurtagirian.

–Zuzendaritzako eta/edo pedagogiako eginkizuna.

HLOren arabera, ikastetxearen titularrak irakaskuntzaz kanpoko zuzendaritza figurak izendatzen ahalko ditu. Horretarako, Hezkuntza Departamentuari hauek jakinaraziko dizkio: izendapena, ikastetxeko erregelamenduaren arabera lanpostu horrek duen izena, eta zuzendaritzako eta/edo pedagogiako kargua gauzatzeko diru kopurua. Diru kopuru horiek ikastetxeari ordainduko zaizkio zuzenean, hilean bitan “Bestelako gastuak” kontzeptuari lotuta egiten diren likidazioen barnean, aurrekontuen legeetan zehaztutako zenbatekoa emanda.

Kargu kopurua eta kargu motak ikastetxe bakoitzaren egituraren baitan egonen dira, haren barne araubidearen erregelamenduaren arabera. Hala ere, bakarrik justifikatzen ahalko dira finantzatutako jardueraren izaerarekin zalantzarik gabe bat datozen eginkizunak dituzten karguei buruzko gastuak. Beraz, kanpo geratzen dira erlijioari, eskolaz kanpoko jarduerei, kirolari eta antzekoei lotutako jardueretako karguak.

Horrenbestez, atal honetan zuzendaritzako eta/edo pedagogiako eginkizuna gauzatzeari lotutako ordainsariak gehitzen ahalko dira, baita gizarte-aurreikuspeneko sistemen ondoriozko derrigorrezko karga sozialak ere.

–Administrazioko eta zerbitzuetako langileak (AZL).

Honako hauek zehaztuko dira: zeregin horietarako kontratatutako pertsonen kopurua, lanbide-kategoria eta ordaindutako soldatak, baita gizarte-aurreikuspeneko sistemen ondoriozko derrigorrezko karga sozialak ere. Aldi berean, pertsona horien identifikazio datuak igorriko dira Hezkuntza Departamentura.

Funts publikoak kontrolatzeko arrazoiak direla eta, atal horren justifikazioa ezinbestekoa da.

–Funtzionamendu gastuak.

Honako hauek sartuko dira epigrafe honetan: hornidurak (gasa, argindarra, ura), komunikazioak (telefonoa, Internet, faxa), bulegoko materiala (papergintza, erreprografia, inprimagailuak), zuzkidurak (familiek ordaindu gabeko material didaktikoa, lantegietarako materiala, liburuak, bestelako erosketak), garbiketa (kanpoko zerbitzua, higiene eta garbiketa produktuak) eta materialen garraioak eta garraio-gastuak.

–Konponketak, mantentze-lanak eta kontserbazioa.

Atal honetan altzariak, ekipamendu informatikoak, makinak eta bestelako ibilgetu materiala konpontzearen ondoriozko gastuak jasoko dira. Halaber, instalazio, igogailu, su-itzalgailu eta segurtasun-instalazioen mantentze-lanak eta kontserbazioa sartuko dira, baita arkitektura-oztopoak kentzeari lotutako kostuak eta abar ere.

–Errentamenduak.

Higiezinen errentamenduak eta beste mota bateko errentamenduak egotziko dira, behar bezala zehaztuko direnak eta ikastetxearen titulartasunari zuzenean edo zeharka eragiten ez diotenak.

–Ordezteko inbertsioak.

Atal honetan eskolako altzariak ordezteko gastuak eta laborategiko ekipamenduei, eraikuntza berriei, Lanbide Heziketako makinei eta instalazioei lotutakoak sartuko dira, hala bada, ikasturte bakoitzari egotz dakiokeen zatian, gastu horiek periodifikatzen ahal badira. Ez da kapital propioaren interesik zenbatuko inola ere.

–Beste batzuk.

Aurreko ataletan aurreikusi gabeko gainerako gastuak sartuko dira, kontzeptuaren arabera banakatuak; adibidez, aholkularitzak, datu pertsonalak babesteari buruzko lege organikoa betetzeko zerbitzuak, laneko arriskuen prebentzioa, aseguruak (estaltzen diren arriskuak azalduta) edo finantzatzen den jarduera garatzeko ezinbestekotzat jotzen diren beste batzuk.

B.–“Langile osagarriak” modulua.

Hezkuntza bereziko ikastetxe edo unitateetako “Langile osagarriak” moduluari dagokionez, ikastetxeek jasotzen dituzten diru kopuruak ikastetxe horietan lan egiten duten eta ordainketa eskuordetuaren barnean ez dauden langile laguntzaileak finantzatzeko erabili beharko dira: fisioterapeutak, logopedak, hezkuntzako laguntzaile teknikoak, psikologoak, pedagogoak, gizarte-langileak edo beste kategoria batzuk.

Honako hauek zehaztuko dira: kontratatutako pertsonen kopurua, kategoria eta ordaindutako soldatak, baita derrigorrezko karga sozialak ere. Aldi berean, pertsona horien identifikazio datuak igorriko dira Hezkuntza Departamentura.

4. artikulua. Egotzi ezin diren gastuak.

Honako hauek ezin izanen zaizkie egotzi “Bestelako gastuak” eta “Langile osagarriak” moduluei:

a) Ikastetxean egiten diren beste jarduera batzuk (adibidez, egoitzak, haurtzaindegiak, etxebizitzetarako eremuak eta abar), eta hirugarrenek ikastetxearen esparruan –baina eskola ordutegitik kanpo– egiten dituzten jardueren ondoriozkoak.

b) Ikastetxeko irakasleei ordaintzen zaizkien ordainsariak, ordainketa eskuordetuak estaltzen ez dituenak. Halaber, ezin izanen da sartu ordezko irakasleen kostua, “Gastu aldakorrak” moduluak ordainsari horiek estali zein ez.

c) “Langile osagarriak” moduluaren barnean jasotzen diren diru kopuruak ezin izanen dira inola ere erabili administrazioko eta zerbitzuetako langileei ordainketak egiteko, ezta ordainketa eskuordetuaren bidez finantzatu diren langile osagarriei ordaintzeko ere.

d) Honako hauek ez dira gastu finantzagarritzat jotzen:

d1) GKE, elkarte, federazio, fundazio, lanbide elkargo eta antzekoei egindako ordainketak, zerga arloko, kontabilitateko, laneko eta zuzenbideko aholkularitzako zerbitzuei edo gastu egozgarrien ataletan aipatutako beste zerbitzu batzuei dagozkien fakturak izan ezean.

d2) Hitzarmenaren gizarte edo soldata hobekuntzak.

d3) Ikastetxeak izan ditzakeen kudeaketa emaitzen ondoriozko galerak.

d4) Egiten diren gastuak, horiek itzultzea dakarten aseguru primek estaltzen dituztenak.

d5) Ikastetxearen beste laguntza edo diru-sarrera batzuen bidez finantzatzen diren gastuak.

d6) Kontingentzietarako hornidura.

d7) Pasiboak, maileguak edo hipotekak itzultze aldera egindako amortizazio ordainketak, pasiboa sinatzean ikastetxeak aldez aurretik izan dituen finantzako diru-sarreren bidez berdinduko baitira.

d8) Notario, erregistro eta peritu gastuak.

d9) Publizitate, propaganda eta harreman publikoetako gastuak.

d10) Irakasleen prestakuntza gastuak.

d11) Hezkuntzari buruzko maiatzaren 3ko 2/2006 Lege Organikoaren 117. artikuluan ezarritako gastu tipologiarekin bat ez datozen beste gastu batzuk.

5. artikulua. Justifikazio prozedura.

“Bestelako gastuak” eta “Langile osagarriak” moduluak justifikatzeko, honako prozedura honi jarraituko zaio:

1. Ikasturte bakoitza amaitu ondoko azaroaren 30era arte, ikastetxearen titularrak kontuak emateko urteko agiria aurkeztuko dio eskola kontseiluari, hori onets dezan. Horretarako, gastuen frogagiriak aurkeztuko ditu, baita diru-sarrerei buruzko jakinarazpenak ere.

2. Aurkeztutakoa ikusi ondoren, eskola kontseiluak kontuak onetsiko ditu, edo ez, eta eskola kontseiluko idazkariak hori egiaztatuko du foru agindu honen I. eranskineko ereduaren bidez.

3. Ikasturte bakoitza amaitu ondoko abenduaren 15a baino lehen, ikastetxearen titularrak egiaztagiria aurkeztuko du Hezkuntza Departamentuan.

4. Egiaztagiriak berrikustean, hezkuntza administrazioak hautematen badu justifikazioen formetan edo dokumentuetan akatsen bat egon daitekeela edo horien gainean edozein argibide behar badu, horren berri ematen duenetik hamabost egun balioduneko epea emanen die ikastetxeei, bai okerrak zuzentzeko, bai beharrezko argibideak emateko. Epe hori luzatzen ahalko da, ikastetxeak eskaera arrazoitua egin ondoren.

Aurreko paragrafoetan xedatutakoa gorabehera, edozein zirkunstantzia dela-eta aurreikusten bada ikastetxe zehatz batekiko hezkuntza ituna iraungitzea, horrek egiaztagiria aurkeztuko du iraungipenaren aurreko ikasturtea amaitu baino lehen.

Eskola kontseiluak ez baditu onesten aurkeztutako kontuak edo irregulartasun larriak hautematen baditu, arloaren arabera eskuduna den zuzendaritza nagusiaren titularrak Hezkuntzarako Eskubidea arautzen duen uztailaren 3ko 8/1985 Lege Organikoaren 61. artikuluan ezarritako Adiskidetze Batzordea eratzea aginduko du.

Justifikatutako zenbatekoak ordainketa-aginduak baino txikiagoak badira –jasotako diru kopuru osoa ez justifikatzeagatik edo egiaztagiriaren berrikuspenean ez onartzeagatik egotzi diren gastuetako batzuk–, justifikatu gabeko diru kopurua konpentsatu eginen da “Bestelako gastuak” moduluaren hurrengo ordainketatik kenduz.

6. artikulua. Berrikuspena.

Hezkuntza Departamentuak ikastetxe itunduen lagin batean aurkeztutako ziurtagirien euskarriak eta justifikazioak berrikusiko ditu urtero.

Titulu honetan adierazitakoa alde batera utzita, ikastetxe itunduek onartu beharko dute indarreko xedapenek autonomia erkidegoko Kontu-hartze Orokorrari esleitzen dioten finantza kontrola, baita kanpoko kontroleko organoek ondoren zehazten dituzten kontrolak ere.

II. TITULUA

Irakasleen hautaketa

7. artikulua. Nafarroako ikastetxe itunduetako irakasleen lanpostu hutsak betetzeko prozedurak aplikatzeko baldintzak.

Lanpostu hutsak betetzeko, ikastetxe itunduek irakasleak hautatzeko prozesu gardenak eta objektiboak gauzatu beharko dituzte, merezimendu eta gaitasun printzipioetan oinarrituak, foru agindu honen II. eranskinean jasotzen den “Nafarroako ikastetxe itunduetako irakasleen lanpostu hutsak betetzeko prozedurak aplikatzeko baldintzak” agiriaren arabera.

8. artikulua. Nafarroako ikastetxe itunduetako irakasleen lanpostu hutsak betetzeari buruzko txostenaren eredua.

Administrazioak egiaztatu beharko du hautaketa prozesuak indarreko araudiaren arabera gauzatu direla. Horretarako, ikastetxeek lanpostu hutsak betetzeari buruzko txostena prestatu beharko dute, hautaketa prozesuaren garapena agertzen duena, foru agindu honen III. eranskinaren arabera. Txosten horretan, honako hauek zehaztuko dira: izangaiei eskatzen zaizkien ezinbesteko baldintzak, eskaintzen den lanposturako egokiena den izangaia hautatzeko orduan aplikatzen diren hautaketa irizpideak, eta izangai bakoitzaren inguruan egindako balorazioa. Halaber, txostenak prozesuaren emaitza eta horretaz egin den publizitatea zehaztuko ditu.

III. TITULUA

Hezkuntza arloko informazioa EDUCA plataformaren bidez kudeatzea

9. artikulua. Informazioaren tipologia.

Ikastetxeetan informazioaren kudeaketaren inguruan sortzen diren behar guztiei erantzuten eta horietara egokitzen saiatzen da EDUCA informazio sistema. Hezkuntza Departamentuak ikastetxe publiko guztien eskura jartzen du sistema hori doan, baita sistema erabili nahi duten ikastetxe itunduen eskura ere.

Hezkuntza administrazioari bere eginkizunak betetzeko behar duen informazio guztia eskuratzeko eskubidea aitortuta eta, aldi berean, ikastetxe itunduek gaur egungo legeriaren esparruan kudeatzeko autonomia eta sistema propioak izateko eskubidea onartuta, informazio mota hauek bereizten dira:

a) Ikastetxe guztiek EDUCAn adierazi beharreko informazioa.

Aukera dago informazio hori EDUCAn edo aplikazio propioetan kudeatzeko, ikastetxeek informazioa EDUCAri jakinaraztea ahalbidetzen duten garapen informatikoak baldin badituzte. Aldi berean, Hezkuntza Departamentuak informazio hori jaso duela adieraziko du EDUCA sisteman.

b) Ikastetxearen beraren kudeaketari dagokion informazioa; beraz, horren erabilpena ikastetxearen esku geratzen da. Ikastetxeek informazio hori kudea dezakete, bai EDUCAn, bai aplikazio propioen bidez.

Gauzak horrela, zenbait ikastetxe itunduk EDUCAren bidez baino ez dute kudeatzen beren informazioa, eta haren funtzionaltasun batzuk edo guztiak erabiltzen dituzte. Beste ikastetxe batzuek, berriz, aplikazio propioak dituzte informazioa kudeatzeko, eta EDUCA sistema erabiltzen dute hezkuntza administrazioak eskatzen duen derrigorrezko informazioa helarazteko.

10. artikulua. Hezkuntza administrazioak behar duen informazioa.

Jarraian, zehaztu egiten dira Hezkuntza Departamentuak hezkuntza sistema programatu, kudeatu eta kontrolatzeko eta estatistika helburuetarako behar duen informazioa, alde batetik, eta hezkuntza sistemaren bilakaerak eska dezakeena, beste aldetik.

Aplikazio propioen bidezko kudeaketa egiten duten ikastetxeetarako, Hezkuntza Departamentuak une jakin batzuetan behar diren datuak zehaztuko ditu, baita zenbatean behin eman behar diren eta informazioak bete beharreko parametro teknikoak ere.

Ikastetxe guztiek EDUCAn adierazi beharreko informazioa:

a) Ikasleak onartzeko prozesu arrunta eta berezia. Aurreinskripzioak eta lekualdaketa eskaerak sartuko dira.

b) Eskolatzeko aurreikuspena eta hezkuntza eskaintza.

c) Ikasleen matrikula, ikasturteari eta taldeari lotutako datu pertsonalak eta egin beharreko irakasgaiak adierazten dituena.

d) Hezkuntza Laguntzako Berariazko Premiak dituzten Ikasleak (HLBPI).

e) NUHEOko aurrematrikula.

f) Erakunde ofizialen estatistiketarako aldizkako inkestak edo galdetegiak.

g) Ikasturtearen egutegia eta ordutegi orokorra, eta taldeen eta irakasleen ordutegia.

h) Ikasleen ikasketen emaitzak: azken kalifikazioak eta ikasketa-espedienteak.

i) Tituluen eta egiaztagirien eskaerak.

j) Diagnostikoaren ebaluazioa.

k) Irakasleen datu profesionalak, honako hauek adierazita: espezialitatea, tituluak, hizkuntza-eskakizunak eta prestakuntza pedagogikoa (IGA, masterra, etab.). Horiei guztiei dagozkien egiaztagiriak EDUCAn sartuko dira eskaneatuta, itunak indarra hartu eta EDUCAn aukera hori erabilgarri egon ondoren.

l) Aurreko atalak barnean hartzen ditu ordainketa eskuordetuko irakasleak, ordezkoak, logopedak eta zaintzaileak, Hezkuntza Departamentuak finantzatzen baititu.

m) Ikastetxeko zuzendaritzako eta/edo pedagogiako karguak, haren barne erregelamenduaren arabera.

n) Sexu-izaerako delituen ziurtagiri negatiboak. EDUCAn txertatuko dira, EDUCAn aukera hori erabilgarri egon ondoren. Bien bitartean, Hezkuntza Departamentura igorriko dira, irakasleen kontratuekin batera.

o) Testuliburuak doan jasotzeko programari buruzko informazioa.

11. artikulua. Informazioa EDUCAn erregistratzeko epeak.

Aurreko artikuluan aipatutako informazioa EDUCAn erregistratu beharko da foru agindu honen IV. eranskineko taulan adierazten diren epeetan.

12. artikulua. Alderdien konpromisoak.

–Hezkuntza Departamentuaren konpromisoak:

1. Hezkuntza Departamentuak konpromisoa hartzen du hezkuntza arloko plangintza, kudeaketa eta kontrolerako eta estatistika helburuetarako behar den informazioa bakarrik eskatu eta erabiltzeko.

2. Orobat, Hezkuntza Departamentuak aukera ematen die ikastetxe itundu guztiei beren borondatez has daitezen EDUCAren bitartez kudeatzen. Kasu horretan, Hezkuntza Departamentuak konpromisoa hartzen du aplikazioa garatu eta mantentzeko, erabiltzaileak prestatzeko eta datuak sostengatu eta behar bezala erabiltzeko.

3. Orobat, Hezkuntza Departamentuak konpromisoa hartzen du ikastetxeen beraien kudeaketarena soilik den informazioa haiek nahi izanez gero bakarrik agerian jartzeko, baimen sistema egokiaren bidez; hori hala izan dadin bermatzeko, informazio horretan sartzeko moduen trazabilitatea erregistratuko da.

4. Datuak zer helburutarako eskatzen diren, hartarako bakarrik erabil daitezen zainduko du Hezkuntza Departamentuak. Hezkuntza administrazioa ezin da inola ere EDUCAko aukerako funtzionaltasunen ondoriozko datuetan sartu; horretarako, neurri egokiak hartuko dira, aurreko paragrafoan adierazitako moduan.

5. Kasu guztietan zorrotz beteko dira Datuak Babesteari buruzko Lege Organikoa eta estatistikako araudia, eta men eginen zaio Hezkuntzari buruzko maiatzaren 3ko 2/2006 Lege Organikoaren hogeita hirugarren xedapen gehigarrian ezarritakoari.

–Ikastetxe itunduen konpromisoak:

1. Kudeaketa EDUCAren bidez egitea aukeratzen duten ikastetxe itunduek hezkuntza administrazioak eskatzen duen informazioa emateko prozesu guztiak erabiliko dituzte. EDUCAk eskaintzen dituen gainerako funtzionaltasunak ikastetxeen irizpidearen arabera erabiliko dira, eta ikastetxe horiek aukera izanen dute Hezkuntza Departamentuaren 3. konpromisoari heltzeko.

2. Nolanahi ere, kudeaketa EDUCA ez den beste plataforma batzuen bidez egiten duten ikastetxeek EDUCAn sartuko dute hezkuntza administrazioak eskatzen duen informazioa, eta konpromisoa hartzen dute behar diren garapen informatikoak finantzatzeko, Hezkuntza Departamentuak informazioa garaiz izan dezan eta zehazten diren parametro teknikoen araberakoa izan dadin. Horrez gain, Hezkuntza Departamentuak beharrezko garapen informatikoak gauzatuko ditu, informazioa EDUCAren eta ikastetxeen sistemen artean trukatzen laguntzeko (esportazioa zein inportazioa).

Xedapen indargabetzaile bakarra.–Indargabetu egiten dira foru lege honetan xedatutakoaren aurkako maila bereko edo apalagoko xedapen guztiak.

Azken xedapen bakarra.–Foru agindu honek indarra hartuko du Nafarroako Aldizkari Ofizialean argitaratu eta biharamunetik aurrera, “Bestelako gastuak” eta “Langile osagarriak” moduluen justifikazioari buruzko I. titulua izan ezik; izan ere, horrek indarra hartuko du 2019-2020 ikasturtetik aurrera.

Iruñean, 2019ko ekainaren 20an.–Hezkuntzako kontseilaria, María Roncesvalles Solana Arana.

I. ERANSKINA

Egiaztagiria, ikastetxearen titularrak 20xx-20xx ikasturteari begira urteko kontuak emateko aurkeztu duen agiria eskola kontseiluak onesteari buruzkoa.

A ERANSKINA

Bestelako gastuak.

B ERANSKINA

Langile osagarriak.

Deskargatu beharreko artxiboak PDF formatuan daude.

II. ERANSKINA

Nafarroako ikastetxe itunduetako irakasleen lanpostu hutsak betetzeko prozedurak aplikatzeko baldintzak

Hezkuntzarako Eskubidea arautzen duen uztailaren 3ko 8/1985 Lege Organikoaren (HELO) 60. artikuluak, abenduaren 9ko 8/2013 Lege Organikoak emandako testuan, honako hau ezartzen du, besteak beste: “Itunpeko ikastetxeetan, irakasle-lanpostu hutsak sortzen direnean, publikoki iragarriko da”.

Halaber, hauxe dio: “Hutsune horiek betetzeko, [...] hautatze-irizpideak ezarriko ditu, [...]; irizpide horien oinarri izango dira merezimendu- eta gaitasun-printzipioak”.

Eta hau agintzen dio hezkuntza administrazio eskudunari: “Hezkuntza-administrazio eskudunak egiaztatuko du irakasleak hautatu eta kaleratzeko prozedurak aurreko paragrafoetan xedatutakoarekin bat etorriz gauzatzen direla. Halaber, prozedura horiek aplikatzeko baldintzak garatu ahal izango ditu”.

Nafarroan, honako hauek dira ikastetxe itundu guztiek irakasleen lanpostu hutsak betetzeko prozesuetan aplikatu behar dituzten baldintzak:

1. Ikastetxearen titularrak txosten arrazoitu bat idatziko du hautaketa prozesuaren emaitzari buruz, ikastetxeko eskola kontseiluari aurkez dakion. Txosten hori foru agindu honen III. eranskinaren araberakoa izanen da, eta, horrela, txosten arrazoituek formatu bateratua izanen dute, horiek ulertzen laguntzen duena.

2. Publizitatea, lanpostu hutsei buruzkoa ez ezik, lanpostu hutsak betetzeko prozesuetan aplikatzen diren hautaketa irizpideei eta prozesuaren emaitzari buruzkoa ere izanen da. Emaitza (III. eranskineko txostena) izangaien izena aipatu gabe argitaratuko da; izangai horiek zenbaki baten bidez identifikatuko dira. Ikastetxeak izangaiei esleitutako zenbakiaren berri eman behar die aurretik.

3. Lanpostu hutsei, hautaketa irizpideei eta prozesuaren emaitzari buruzko publizitatea ikastetxeko iragarki-taulan eta ikastetxea barnean hartzen duen patronalaren webgunean argitaratuko da. Hezkuntza Departamentuak esteka bat izanen du bere webgunean, informazio hori atzitzeko aukera ematen duena.

4. Ikastetxe bakoitzeko eskola kontseiluak ezarriko ditu prozesuan izangaiak baloratzeko erabiltzen diren hautaketa irizpideak, ikastetxearen titularrak proposatuta.

5. Kontuan hartuta irizpide horiek egiaztatu behar dutela izangaien arteko hautaketa modu objektiboan eta merezimendu eta gaitasun merezimenduak betez gauzatu dela, honako eskakizun hauek bete beharko dira:

–Bete beharreko lanpostuari estu lotuta egon behar dute irizpideek.

–Irizpideek neurgarriak izan behar dute (adibidez: ikasketa-espedientearen nota, lanean emandako urteak –0,2 puntu urteko–, hizkuntza titulu ofizialak –C1: puntu 1, eta B2: 0,5 puntu–, 0,2 puntu ordu kopuru zehatz batetik gorako ikastaro bakoitzeko, eta abar).

–Irizpide subjektiboengatik (proiekturako egokitzapena, elkarrizketa...) ezin da esleitu azken puntuazioaren %35 baino gehiago. Hala ere, irizpide horiek erabakigarriak badira izangai bat ala bestea hautatzeko orduan, ikastetxeak bere balorazioa arrazoitu beharko du txosten zehaztu batean; arloaren araberako zuzendaritza orokorraren mendeko irakaskuntza itunduko kontrol unitatera igorri beharko du txosten hori.

–Irizpide bat ikastetxean bertan lortutako esperientzia bada, ikastetxean aurretik lanpostu bat eskuratzea ekarri zuen prozesuak prozedura horri berari jarraitu beharko dio, halako moduan non aukera-berdintasuna bermatuko baita izangai guztientzat. Prozedura horri jarraitu ez bazaio, ezin izanen da hori erabili hautaketa irizpide gisa.

–Irizpideek ezin izanen dute jaiotza, arraza, sexu, erlijio, iritzi edota beste edozein egoera edo inguruabar pertsonal edo sozialengatiko diskriminaziorik eragin. (Espainiako Konstituzioaren 14. art.).

6. Salbuespen gisa, ikastetxearen titularrak ez badu hautatzen puntuazio handiena duen izangaia, bere erabakia arrazoitu beharko du txosten zehaztu batean; arloaren araberako zuzendaritza orokorraren mendeko irakaskuntza itunduko kontrol unitatera igorri beharko du txosten hori. Administrazioak ez baditu baliozkotzat jotzen arrazoi horiek, HELOren 61. artikuluak ezarri bezala jokatuko du.

7. Halaber, ikastetxeak ezarri beharko ditu zein izanen diren puntuazio berdina duten izangaien arteko berdinketak desegiteko baldintzak.

8. Hezkuntza administrazioak ikastetxeari eskatzen ahalko dio lanpostua eskuratu duen izangaiaren puntuazioa justifikatzen duen dokumentazioa egiazta dezala.

Foru agindu honetan xedatutakoa ulertuko da Nafarroako “Ikastolak” sektoreko lan hitzarmen kolektiboan ezarritakoa ezertan eragotzi gabe, baldin eta kostu ekonomiko osagarririk ez badakar Administraziorako.

Jarraian, III. eranskineko lanpostu hutsak betetzeari buruzko txostenaren ereduaren datuak azaltzen dira.

Ikastetxearen txostena:

–Ikastetxearen izena:

–IFK:

–Lanpostuari buruzko informazioa:

• Ezinbesteko baldintzak (puntuaziorik gabe; lehiaketan parte hartu ahal izateko beharrezkoak direnak): tituluak eta lanposturako eskatzen diren ezinbesteko beste eskakizun batzuk. Adibidez: Lehen Hezkuntzako Irakasletza. EGA. Ingeleseko C1.

1.–Espezialitatea.

2.–Hizkuntza.

3.–Bestelakoak.

• Hezkuntza etapa: adibidez: Haur Hezkuntza, Lehen Hezkuntza, Bigarren Hezkuntza eta abar.
• Arloa (badagokio): adibidez: Gorputz Hezkuntza, Teknologia, etab.
• Hezkuntza: adibidez: euskara, ingelesa.
• Kontratuaren iraupena.
• Kontratu mota: adibidez: errelebo-kontratua, lanaldi partzialekoa (lanaldiaren bi herenekoa).

–Hautaketa irizpideak:

Hautaketa irizpide bakoitzarekin batera, haren gehieneko puntuazioa adierazi beharko da, bai prozesuaren puntuazio osoa, bai puntuazio oso hori lortzeko behar diren merezimenduak kontuan hartuta.

Adibidea:

• Irizpidea: irakaslaneko esperientzia.
• Azalpena: heziketa ziklo berean irakasle lan egindako urteen kopurua. 0,5 puntu urte bakoitzeko.
• Puntuazioa, guztira: 3 puntu.

III. ERANSKINA

Nafarroako ikastetxe itunduetako irakasleen lanpostu hutsak betetzeari buruzko txostena. (PDFa).

Iragarkiaren kodea: F1908425