1. NAFARROAKO FORU KOMUNITATEA
1.7. BESTELAKOAK
898/2019 EBAZPENA, maiatzaren 24koa, Nafarroako Unibertsitate Publikoko errektoreak emana, zeinaren bidez agintzen baita argitaratzeko “Erabakia, Industria Teknologietako Ingeniaritzako Graduko, Telekomunikazio Teknologien Ingeniaritzako Graduko eta Ingeniaritza Informatikoko Graduko nazioarteko programei dagokien araudia aldatzen duena”, Gobernu Kontseiluak 2019ko maiatzaren 24an hartu zuen erabaki baten bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, agintzen dut argitaratzeko 2019ko maiatzaren 24ko Gobernu Kontseiluak hartutako erabakia, zeinaren bidez onetsi baitzen “Erabakia, Industria Teknologietako Ingeniaritzako Graduko, Telekomunikazio Teknologien Ingeniaritzako Graduko eta Ingeniaritza Informatikoko Graduko nazioarteko programei dagokien araudia aldatzen duena”.
“ERABAKIA, INDUSTRIA TEKNOLOGIEN INGENIARITZAKO, TELEKOMUNIKAZIO TEKNOLOGIETAKO INGENIARITZAKO ETA INFORMATIKA INGENIARITZAKO GRADUEN NAZIOARTEKO PROGRAMEN ARAUDIA ALDATZEN DUENA
Gobernu Kontseiluak 2016ko maiatzaren 23ko erabaki baten bidez onetsi zuen Nafarroako Unibertsitate Publikoaren Gradu eta Master ikasketen nazioarteko irakaskuntza-programek bete behar dituzten oinarrizko irizpideak ezartzen dituen testua.
Irizpide horiekin bat etorriz eta abiapuntutzat hartuz graduen nazioarteko programen araudiak eta orain arte izandako esperientzia (Industria Teknologien Ingeniaritzako, Telekomunikazio Teknologietako Ingeniaritzako eta Informatika Ingeniaritzako graduei buruzkoa), Telekomunikazio eta Industria Ingeniarien Goi Mailako Eskola Teknikoak (TIIGMET) nazioarteko programa horietan aldaketa batzuk egitea proposatu du. Zehazki, bi alderdi hauek aldatu nahi dira:
Lehenik eta behin, komeni da ikasleei eskatzea, graduaren nazioarteko programa bukatzeko, nazioarteko mugikortasun programaren bateko entitate batera joanda egin ditzatela ikasketak edo praktikak, hau da, ez dadila aski izan besterik gabe halako programa batean parte hartzeko eskaera aurkeztea.
Bigarrenik, kontuan hartuta nolako bilakaera izan duten ikasleen matrikula tasak eta errendimenduak, komeni da errendimendu akademikoaren araubide berezia aldatzea, hau da, ikasleek nazioarteko programen lehenbiziko urtean gainditu beharreko kreditu kopurua aldatzea.
Hori dela eta, hau da Gobernu Kontseiluak, Irakaskuntzako errektoreordeak proposatuta, bere kideek aldez aurretik eztabaida egin eta gero, 2019ko maiatzaren 4an egindako bileran hartu duen
ERABAKIA:
Lehena.–Industria Teknologien Ingeniaritzako, Telekomunikazio Teknologietako Ingeniaritzako eta Informatika Ingeniaritzako Graduen Nazioarteko Programaren araudiko 8.3.b) artikulua aldatzea, halako moldez non, honela dioen tokian:
“Nazioarteko mugikortasuneko eta/edo nazioarteko praktiketako deialdi batera edo gehiagotara aurkeztu behar dute. Nazioarteko leku horietako bat esleituz gero, egonaldia esleitutako ikaspostuan egingo dute, eta dagokion ikasketa-konpromisoan bildutako kredituen %80 gainditu beharko dute”.
Honela esan behar baitu:
“Ikasleek, titulua eman diezaietela eskatu baino lehen, nazioarteko mugikortasuneko egonaldi bat egin behar dute TIIGMETeko ikasleei eskaintzen zaizkien mugikortasuneko programetako edozeinetan: mugikortasun akademikoa, curriculumeko praktikak nazioartean edo curriculumaz kanpoko praktikak nazioartean. Baldin eta mugikortasun programa horretan beharrezkoa bada ikasleek ikasketa-konpromiso bat hartzea, konpromisoan adierazitako kredituen %80 gainditu behar dute gutxienez.
Bigarrena.–Industria Teknologien Ingeniaritzako, Telekomunikazio Teknologietako Ingeniaritzako eta Informatika Ingeniaritzako Graduen Nazioarteko Programaren araudiko 13.b) artikulua aldatzea, halako moldez non, honela dioen tokian:
“Lehen urtearen amaieran gaindituak izan beharko dituzte, beren irakaskuntza programazio espezifikoko hamar irakasgaietatik zortzi”.
Honela esan behar baitu:
“Lehenbiziko urtearen bukaeran gaindituak izan behar dituzte irakaskuntza-programazio espezifikoko kredituen %60 gutxienez”.
Hirugarrena.–Erabaki hau aditzera ematea Irakaskuntzako errektoreordeari, Nazioartekotze errektoreordeari, ikastegiei, Irakaskuntza Zerbitzuari eta Nazioartekotze eta Lankidetza Atalari.
Laugarrena.–Erabaki hau Nafarroako Aldizkari Ofizialean argitaratzeko agindua ematea.
Bosgarrena.–Erabaki honen aurka, zilegi da administrazioarekiko auzi-errekurtsoa jartzea, bi hilabeteko epean, Erabakia Nafarroako Aldizkari Ofizialean argitaratu eta biharamunetik kontatzen hasita, Administrazioarekiko Auzien Jurisdikzioari buruzko 1998ko uztailaren 13ko 29/1998 Legearen xedapenetan ezarritakoarekin bat”.
Iruñean, 2019ko maiatzaren 24an.–Errektorea, Alfonso Carlosena.
Iragarkiaren kodea: F1907262
