Iragarkia

32. ALDIZKARIA - 2018ko otsailaren 14a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

51E/2018 EBAZPENA, urtarrilaren 24koa, Ingurumeneko eta Lurraldearen Antolamenduko zuzendari nagusiak emana, zeinaren bidez 2017-2018ko deialdia onesten baita Nafarroako irabazi-asmorik gabeko ingurumen elkarteei laguntzak emateko, ehizazainak kontratatu ditzaten, ehiza-espezieen habitata hobetu dezaten eta kalteak prebenitu ditzaten.

Nafarroako Ehizari eta Arrantzari buruzko abenduaren 22ko 17/2005 Foru Legea aldatzen duen apirilaren 4ko 4/2014 Foru Legearen 51. artikuluak ezartzen du zer jarduketa egiteko den beharrezkoa barrutiek ehiza-zaintzako sistema bat izatea, barrutiaren kudeatzaileek jarri beharko dutena. Era berean, Nafarroako Ehizari eta Arrantzari buruzko abenduaren 22ko 17/2005 Foru Legearen 52. artikuluak (“Ehiza sustatzeko neurriak”) ezartzen du Nafarroako Gobernuak diru-laguntzak ematen ahalko dituela ehiza-zaintzako sistema bat ezartzeko.

Ehiza jarduera iraunkorra izateko tresna lagungarritzat hartzen da ehizazaina, bereziki Nafarroa bezalako kasuetan, non ehiza basa faunako populazioetan oinarritzen baita. Ehizazainei eskatzen zaien prestakuntzak, barnean direla ekosistemei eta basa faunari buruzko ezagupenak, bermatu behar du titularrek egiten duten ehizaren kudeaketak babes teknikoa duela.

Orobat, ehizazaina funtsezko elementua da landa esparruaren kudeaketa hobeezina izan dadin, maiz ehizazaina baita eragileen arteko zubi lana ongien egiten duena, hala nola barrutiaren kudeatzaileen eta nekazari eta abeltzainen artean.

Bestetik, Nafarroako Ehizari eta Arrantzari buruzko abenduaren 22ko 17/2005 Foru Legeak, 52. artikuluan (“Ehiza sustatzeko neurriak”), beste hainbat kontzepturen artean laguntza ekonomikoak ezartzea aurreikusten du, ehiza-espezieek eragiten dituzten kalteen kontrolerako neurriak hartzeko. Gainera, Basa Fauna eta Haren Habitatak Babestu eta Kudeatzeari buruzko martxoaren 5eko 2/1993 Foru Legeak, bere 2. eta 4. artikuluetan, gaitasuna ematen dio Administrazioari neurriak gauzatzeko basa fauna kontserbatze aldera.

Nekazaritzako habitatek sinplifikazio handia izan dute azken hamarkada hauetan Europa osoan. Nafarroa ez da salbuespena izan, eta 50eko hamarkadatik 90ekora bitarte lur landugabe andana galdu du, bai eta mugalde ugari ere 90eko hamarkadatik gaur egun arte. Nekazaritzako lurzatiak banantzeko elementu txiki horiek egundoko garrantzia daukate nekazaritzako sistemei lotutako espezieentzat, elikadura, babestokia eta habia egiteko lekua ematen baitizkiete.

Laguntza hauek orain urte anitzekoak direnez, administrazio tramiteak, hots, laguntzak esleitzea, egiaztagiriak aurkeztea, ordainketa egitea eta jarraipena egitea, bat etorri ahal izanen dira neurriak gauzatzeko teknikoki egokienak diren datekin.

Horregatik guztiagatik, beharrezkotzat jotzen da laguntzak ematen jarraitzea irabazi-asmorik gabeko elkarteei ehizazainen kontratazioa partzialki finantzatzeko, ehizazainek 2017ko azaroaren 1etik 2018ko irailaren 30era bitarte emandako lan zerbitzuetarako. Horrez gain, mantendu eginen da irabazi-asmorik gabeko elkarteentzako beste laguntza lerro bat ere, ehiza-espezieek sortzen dituzten kalteen prebentziorako eta espezie horien habitaten hobekuntzarako.

Nafarroako Gobernuak 2017ko irailaren 27ko bilkuran hartutako 4291 Erabakiaren bidez, baimena eman zitzaion Ingurumeneko eta Lurraldearen Antolamenduko zuzendari nagusiari 193.000 euroko gastu-konpromisoa har zezan, urte anitzekoa eta 2018ko ekitaldiari egoztekoa, 2017-2018ko diru-laguntzen deialdia onets zezan; diru-laguntza horiek ehizazainak kontratatzeko dira, bai eta ehiza-espezieen habitata hobetzeko eta kalteak prebenitzeko neurriak hartzeko ere.

Adierazitakoarekin bat, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak eta Landa Garapeneko, Ingurumeneko eta Toki Administrazioko Departamentuaren oinarrizko egitura organikoa ezartzen duen irailaren 21eko 78/2016 Foru Dekretuak ematen dizkidaten eskudantziak erabiliz,

EBATZI DUT:

1. Onestea irabazi-asmorik gabeko elkarteentzako laguntzen 2017-2018ko deialdia, ehizazainak kontrata ditzaten, ehiza-espezieen habitata hobetu dezaten eta kalteak prebenitu ditzaten.

2. Diru-laguntzak emateko oinarri arautzaileak onestea. Ebazpen honen eranskinean jaso dira.

3. Deialdi honen konpromisoei aurre egiteko, jarraian adierazten diren aurrekontuko kredituak baimendu dira:

4. Eskaerak aurkezteko epea 30 egun naturalekoa da, deialdia Nafarroako Aldizkari Ofizialean argitaratu eta biharamunetik hasita.

5. Ebazpen honek ez du administrazio bidea amaitzen, eta haren aurka gora jotzeko errekurtsoa jartzen ahal da, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean hura argitaratu eta biharamunetik hasita.

6. Ebazpena eta eranskinak Nafarroako Aldizkari Ofizialean argitaratzea, eta ohartaraztea deialdiak ez duela ondoriorik sortuko harik eta bere laburpena Nafarroako Aldizkari Ofizialean argitaratu arte.

7. Oinarri arautzaile hauek eta dagokien deialdia Diru-laguntzei buruzko Datu-base Nazionalean (DDBN) erregistratuko dira.

Iruñean, 2018ko urtarrilaren 24an.–Ingurumeneko eta Lurraldearen Antolamenduko zuzendari nagusia, Eva García Balaguer.

I. ERANSKINA

Oinarri arautzaileak, laguntzak emateko Nafarroako irabazi-asmorik gabeko ingurumen elkarteei, ehizazainak kontrata ditzaten, ehiza-espezieen habitatak hobetu ditzaten eta kalteak prebenitu ditzaten

1. oinarria.–Xedea.

Oinarri hauen xedea da Nafarroako irabazi-asmorik gabeko ingurumen elkarteentzako (hala nola tokian tokiko ehiza-elkarteentzako) laguntzak arautzea 2017-2018 kanpainarako, honako gastu hauen zati bat ordaintzeko: ehizazainen kontratazioa eta ehiza-espezieen habitata hobetzeko eta kalteak prebenitzeko jarduketak.

2. oinarria.–Laguntzen helburua.

Ehizazainak kontratatzeko laguntzen helburua da barrutietan ehizazainak modu iraunkorrean egon daitezen bultzatzea, haiek egiten duten zaintza-lana ezinbestekoa baita barrutietako baliabide naturalak egoera onean kontserbatzeko; horrez gain, barrutietako ehiza-espezieen kudeaketa eta jarraipena ere egiten dute.

Bestalde, deialdi honen bidez lortu nahi da ehiza-espezieek sortzen dituzten kalteak prebenitzeko neurri eraginkorrak bultzatzea, bai eta ehiza-espezieentzat balio handikoak diren habitatak hobetzeko neurri eraginkorrak sustatzea ere, gizakien jarduketen ondorioz hondatuta edo sinplifikatuta dauden ekosistemetan aniztasuna areagotzea lortu nahi baita.

3. oinarria.–Onuradunak.

Laguntza hauek jaso ahal izanen dituzte Nafarroako irabazi-asmorik gabeko ingurumen elkarteek, hala nola ehiza-elkarteek, baldintza hauek betez gero:

3.1.–Ehizazainak kontratatzeko laguntzak jasotzeko, hiru baldintza hauek bete behar dira:

–Ehizazainak Nafarroako ehizazain titulua izan behar du, irailaren 4ko 94/2012 Foru Aginduaren arabera.

–Kontratatutako zerbitzuak 3.000 eurotik gorakoak izatea (soldata gordina edo BEZa kanpo) eskatzaile bakoitzeko.

–Ehizazainak ez du, deialdi honen epealdian zehar, desgaitua egon behar ehizarekin lotutako jardueretarako.

3.2.–Habitata hobetzeko eta kalteak prebenitzeko laguntzak jasotzeko, inbertsioak 1.000 eurotik gorakoa (BEZa kanpo) izan behar du eskatzaile bakoitzeko.

4. oinarria.–Eskaerak onartzeko irizpideak.

Eskaerak tramitera onartuak izateko, onuradunek baldintza hauek bete beharko dituzte:

4.1.–Diru-laguntzei buruzko azaroaren 9ko 11/2005 Foru Legearen 13. artikuluan laguntzen onuradun izateko ezarritako debeku-egoeretako bakar batean ere ez egotea. Eskabidean jasotako erantzukizunpeko adierazpenaren bidez frogatzen ahalko da hori.

4.2.–Tributu arloko betebeharrak eta Gizarte Segurantzarekikoak egunean izatea. Zerga arloko eginbeharrak eta Gizarte Segurantzarekikoak eguneraturik dauzkala frogatzeko, interesdunari jakinarazten zaio ezen eskaeran baimena ematen diola departamentuari hura frogatzen duten datuak diru-laguntzaren gaineko ebazpen proposamena ematen denean begiratzeko.

4.3.–Nafarroako Foru Komunitateko administrazioarekiko zorrik ez izatea.

4.4.–Ehizan aritzeko zehapen irmorik ez izatea.

4.5.–Ez dira diruz lagunduko eskaera aurkeztu aurretik egindako ekintzak, nagusiki obrak. Atal honetatik kanpo daude, beren izaeragatik eta beren helburua lortzeko, deialdiaren aurreko lanak behar dituzten ekintzak. Ingurune Naturalaren Zerbitzuko teknikariek lan horiek egiaztatzeko aukera izan beharko dute laguntza ematen den bitartean.

4.6.–Ekintzak kokatzen diren lurren jabearen baimena behar da.

5. oinarria.–Gastu diruz lagungarriak.

5.1.–Ehizazainen kasuan, gastu diruz lagungarriak izanen dira 2017ko azaroaren 1etik 2018ko irailaren 30era bitarte ehizazainen berariazko zerbitzuak kontratatzetik sortutako haiek. Baldin eta ehizazainak karguari berari ez dagozkion lanak egiten baditu, ehizazainen berariazko lanak diren haiek baino ez dira izanen diruz lagungarriak; horretarako, kontratuan zehaztuta egon behar du, lanaldiari nahiz soldatari dagokionez.

5.2.–Ehiza-espezieen habitatak hobetzeko eta kalteak prebenitzeko, gastu diruz lagungarriak izanen dira, BEZa kanpo, jarduketa hauetatik eratorritako haiek, eta baldintza tekniko hauen arabera:

A. Laboreak babesteko hesi fisikoak.

A.1 Laboreak babesteko sareen kostu materiala, haiek ongi funtzionatzeko behar diren osagai guztiak barne. Metro bat altu izanen dira gutxienez, 20 zentimetro lurrean sartuta dutela. Sare-hesiak, justifikatutako kasuetan izan ezik, labore iraunkorretan ezarriko dira edo balio ekonomiko handikoetan, hala nola mahastietan, olibondoetan edo beste fruta-arbola batzuen alorretan, zainzuri, brokoli edo beste barazki batzuen sailetan, etab.

A.2. Babes hodien edo antzeko sistemen kostu materiala, haiek ongi funtzionatzeko behar diren osagai guztiak barne. Egoera bakoitzari eta babestu beharreko espezieari egokitutako ezaugarriak eta altuera izan beharko dituzte, eraginkorrak direla bermatzeko.

A.3. Laboreak babesteko hesi elektrikoen kostu materiala. Holakotzat hartuko dira haiek ongi funtzionatzeko behar diren osagai guztiak. Elikatze unitateak eta gainerako osagaiek beharrezko ezaugarriak izan beharko dituzte, eraginkorrak izan daitezen laboreak haien xedeko ehiza-espezieetatik babesteko. Hari kopuruak eta haien arteko tarteak kasu bakoitzerako egokiak izan beharko dute, eta baterien edo korronte elektrikoaren bidez elikatuko dira, halako moduan non haren intentsitatea etxeko abereentzat erabili ohi dena halako bi izanen baita.

A.4. Kalteak prebenitzeko beste modalitate batzuk, esperimentaziokoak, neurri txikikoak, teknikoki behar bezala justifikatuak eta oinarri zientifikoa dutenak. Proposamenaren oinarri edo argudioen iturri diren aurreko azterlan teknikoak aipatu beharko dira.

Hesi fisikoen ezarpenetik eta mantentze-lanetik sortutako gastu eta jarduketak ez dira diruz lagunduko. Nolanahi ere, hornitutako materialak gutxienez 5 urteko bizitza baliagarria izan beharko du. Horregatik, lurzati eta nekazari jakin batentzako materialaren eskaera ezin da berriz egin hurrengo bosturtekoan.

Lur-zerrendak nekazaritzako lurzatietan. Izan daitezke:

B.1. Uztatu gabeko zereal zerrendak lurzatien ertzean. Gutxienez 2tik 5 metrora arteko zabalera duten lur-zerrenda guztiak, diru-laguntza ematen den egunean, eta gutxienez abuztuaren 15era bitarte, uztatu ez badira, laborea zutik badago eta nahi den babeserako dentsitate funtzionala badu. Egun horretatik aurrera beren aprobetxamendua baimentzen da, besteak beste bazkatzeko, bai eta hurrengo laborantza ziklorako lur-lantzea ere. Baztertuko dira gizakien edo basa faunaren ekintzaren ondorioz aipatu dentsitatea ez duten azalerak.

B.2. Landu gabeko lur-zerrendak nekazaritzako lurzatietan. Gutxienez 2tik 5 metrora arteko zabalera duten lur-zerrenda hauek ez dute prestakuntza lanik edo tratamendu fitosanitariorik jaso izan behar, eta belar landaretza naturala mantendu beharko da. Lur-zerrenda hauetan ezin da lur-lantzerik egin irailaren 1era arte, baina bazkatzeko aprobetxamendua abuztuaren 15etik aurrera baimentzen ahal da.

Bi kasuetan, proposatutako lurzatien eta lur-zerrenden kokapen planoa aurkeztu beharko da.

Diru-laguntzaren portzentajea aplikatzeko merkatuko gehieneko prezioa ondoko taulan agertzen da. Taula horretan lehorreko lurretako errendimenduaren eta merkatuko prezioaren azken bost urteetako batez besteko balioak agertzen dira, gehi %20 nekazaritzako eta ingurumeneko helburuagatik, Informazioa Integratzeko eta Ezagutza Sortzeko Ataleko Estatistika Bulegoaren datu ofizialen arabera kalkulatuak:

C. Faunarentzako ereintzak.

Jarduketa hauen gastuak izanen dira diru-laguntzaren xede:

C.1. Lurra prestatzeko lanak, ereintza eta hazien kostua. Diru-laguntzaren portzentajea aplikatzeko gehieneko prezioa (BEZa kanpo) 564 euro/ha izanen da.

C.2. Lurzatiak alokatu edo errentatzeagatiko kostuak. Diru-laguntzaren portzentajea aplikatzeko gehieneko prezioa (BEZa kanpo) 215 euro/ha izanen da.

Ereintza zurezko laboreen azpian egiten denean (olibondoen, mahatsondoen, arbendolondoen... azpian), baldintza bakarra dago: ereintza dosia 50 kg/ha baino handiagoa izatea eta fauna babesteko dentsitate funtzionala izatea abuztuaren 15era bitarte.

Gainerako lurzatietan ereiteko, baldintza tekniko hauek bete behar dira:

–Han-hemenka banatuta egon beharko dira barrutian, salbu behar bezala justifikatutako arrazoiren bat baldin bada, animaliak egokitu daitezen, lurraldetasuna errespetatu eta harraparien mesedeko pilaketak galarazteko. Hobe da eremu txiki frankotan ereitea lurzati handi gutxitan baino. Hori dela eta, diruz lagungarriak izanen dira 2.500 m²-tik beherako azaleretan zulo etenak baliatuz egindako ereintzak. Zulo horiek tamaina handiko lurzati baten barruan badaude, guztira ezin izanen dute hartu 10.000 m² baino gehiago lurzati bakoitzeko.

–Ereintzak nekazaritzarako lurzatietan eginen dira.

–Lurzati horiek ezin izanen dira uztatu, eta udazkenean identifikatuko dira azaleraren perimetroa ereinda ez egoteagatik. Lurzatietan azienda bazkatzen ahalko da abuztuaren 15etik aurrera.

–Ereintzaren guztizko dosia txikiagoa izaten ahal da produkziorako laboreetan erabiltzen dena baino, eta ez da 50 kg/ha baino txikiagoa izanen lekadunen eta proteina-landareen haziak nahasita. Ahal dela ez da ongarri mineralik erabiliko, salbu eta justifikatuta badago; hots, tokiko baldintzak direla-eta bermatuta ez badago ereindakoaren nolabaiteko hazkundea. Galarazita dago lurzati horietan produktu fitosanitarioak erabiltzea.

D. Sastraka garbitzea, fauna espezieen habitata hobetzeko. Landaketa sailetan sastraka garbitzeko egiten diren lanak, eskuz eginak edo mekanizatuak, eta azalera etenetan egindakoak; betiere, 2 hektareatik behera. Azalera hori gainditzen duten sailetan, 2 hektareari dagokiona izanen da gehienez emanen den diru-laguntza, sail bakoitzeko. Kontrarako justifikaziorik ez badago, lanak ingerada irregularreko diseinuarekin eta mosaikoan egin behar dira, eta tamaina handieneko zuhaitzak eta zuhaixkak errespetatu behar dira. Lanak eskuz edo makinaz egiten ahalko dira.

E. Zuhaitzak eta/edo zuhaixkak landatzea sailean, lerroan edo han-hemenka. Jarduera hauen gastuak izanen dira diru-laguntzaren xede:

E.1. Lurra prestatzeko lanen, landarearen eta landatzearen kostuak.

E.2. Landaketak lehendabiziko urteetan babesteko sistemen ezarpena eta kostu materiala.

E.3. Udako garbiketak eta mantentzeko ureztaketak 5 urte baino gutxiagoko landaketetan.

E.4. Landaretza sortzea edo hobetzea fauna espezieentzat interesa duten idoietan. Lehendik dagoen landaretza errespetatuko da. Landaketak eginen dira bertako zuhaixka espezieak erabiliz.

–Diru-laguntza jaso daiteke zuhaitzen landaketa, han-hemenka egiten badira 0,25 hektareatik beherako azalera baimenduetan (edo azalera handiagoetan, horretarako arrazoiak baldin badira).

–Orobat, diru-laguntza jaso daiteke landaketak lerroan egiteagatik edo heskaiak jartzeagatik bertara egokitutako espezieekin baimendutako tokietan. Lerroko landaketetan, zuhaitz espezieek inguruneari egokituta egon beharko dute, eta 5 m-tik gorako tartea utzi beharko da zuhaitzen artean, eta 2 m-tik gorakoa zuhaixken artean, salbu behar bezala justifikatutako kasuetan.

–Gainera, diru-laguntza jaso daiteke, lekura egokitutako zuhaitzak edo zuhaixkak tarte handiekin landatzeagatik, unitateak gutxienez 50 metrotan banatuta baimendutako tokietan, salbu behar bezala justifikatutako kasuetan.

Fauna espezieentzako idoi egokiak. Jarduera hauen gastuak izanen dira diru-laguntzaren xede:

F.1 Fauna espezieentzat interesa duten idoi txikiak sortzea. Diruz lagungarriak izanen dira idoi txikiak egiteko material eta eraikuntza gastuak; idoi txikitzat hartuko dira 400 m³ baino gutxiago bil ditzaketen haiek. Toki estrategikoetan kokatu behar dira, agorraldian haien funtzionaltasuna bermatzeko, eta ezpondaren tarteren batek gehieneko malda 2H/1V duela.

Segurtasun arloko araudiak hala ezartzen duen kasuetan, eskaerarekin batera eraikuntza-proiektu bat aurkeztu beharko da, egin beharreko lanak behar bezala definitzen dituena (lur-mugimenduak, ezponden geometria, betetzeko eta husteko sistemak, presen segurtasuna, etab.).

F.2. Fauna espezieentzat interesa duten idoi txikiak garbitzea. Diruz lagungarriak izan daitezke idoi txikiak garbitzeko egiten diren lanak. Parte bat garbitu gabe utzi beharko da, ur ekosistemei loturiko landare komunitateak bizirik jarrai dezan.

F.3. Fauna espezieentzat interesa duten idoiak berez birsortzeko itxiturak sortzea. Idoien inguruan itxitura partzialak ezartzeak eta materialaren kostuak diru-laguntza jaso dezakete.

G. Dokumentazio teknikoa prestatzea. Dokumentazio teknikoari eta, hala balegokio, obra zuzendaritzari lotutako diru-laguntza ordaintzeko, ezinbestekoa da Atik Fra arteko ataletan jasotako beste neurriren bat onartua izatea eta erregistro bidez aurkeztutako dokumentazioa bidaltzea (eskabideak, fitxak, eranskinak eta planoak), papereko formatuan ez ezik, formatu digital editagarrian ere (.xls, .shp, .doc), caza@navarra.es helbide elektronikora mezu bat bidalita.

6. oinarria.–Diru-laguntzaren zenbatekoa.

6.1.–Ehizazainak kontratatzeko laguntzetarako, ehizazain bakoitzeko gehienez emanen den diru-laguntza aipatu aldiari dagokion soldata gordinaren %40 izanen da. Kontratua zerbitzuak ematekoa baldin bada, deialdian ezarritako epeari dagokion kontratuan agertzen den zenbatekoaren %40 (BEZa kanpo) lagunduko da diruz. Kontratatutako zerbitzuen zenbatekoak 3.000 eurotik gorakoa izan behar du (soldata gordina edo BEZa kanpo) eskatzaileko.

6.2.–Habitata hobetzeko eta kalteak prebenitzeko laguntzetarako, honako hau izanen da diru-laguntzaren gehieneko zenbatekoa:

–B modalitatean eskatzen diren laguntzetarako onartutako kostuaren %80 (BEZa kanpo).

–A, C, D, E eta F modalitateetan eskatzen diren laguntzetarako onartutako kostuaren %60 (BEZa kanpo). Adostasunik ez bada, Nafarroako tarifa ofizialak erabiliko dira.

–G modalitatean eskatzen den laguntzarako, diru-laguntza Ingurune Naturalaren Zerbitzuak onetsitako jardueren exekuzio materialak duen prezioaren %10 izanen da, eta modalitate honetan gehienez ere emanen den diru-laguntza 400 eurokoa izanen da. Modalitate horretarako gutxieneko zenbatekoa 200 eurokoa izanen da espedienteko.

–Laguntza jasotzeko, gutxienez 1.000 euroko inbertsioa (BEZa kanpo) egin behar da habitata hobetzeko eta kalteak prebenitzeko jarduketetan, eskatzaileko.

Nolanahi ere, diru-laguntzak emateko, Administrazioak baliabide ekonomikoak izan beharko ditu eta behar den adinako kreditua aurrekontuetan, eskaeraren gaineko ebazpen administratiboa emateko unean.

7. oinarria.–Eskaerak eta eskatutako dokumentazioa aurkeztea.

7.1.–Eskaeren aurkezpena

7.1.1.–Eskaerak Nafarroako Gobernuko Landa Garapeneko, Ingurumeneko eta Toki Administrazioko Departamentuko Ingurune Naturalaren Zerbitzura zuzenduko dira, eta deialdia Nafarroako Aldizkari Ofizialean argitaratu eta biharamunetik 30 egun naturaleko epean aurkeztuko dira, departamentu horretako erregistroan (González Tablas kalea, 9, Iruña). Halaber, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aipatzen diren lekuetako edozeinetan aurkez daitezke.

7.1.2.–Eskaera posta bulego batean aurkezten bada, gutun-azalak irekita egon beharko du, lehen orriko goiko aldean agerrarazteko bulegoaren izena, eguna, tokia eta ordua (minutu eta guzti); datu horiek guztiak gordekinean ere azaldu beharko dira.

7.1.3.–Eskaera harturik, oinarri hauetan ezarritako baldintzak betetzen dituen egiaztatuko da. Eskaerak aipatutako baldintzak betetzen ez baditu, interesdunari eskatuko zaio gehienez ere 10 egun balioduneko epean zuzendu dezala, eta ohartaraziko, hala egin ezean, eskaera bertan behera uzten duela ulertuko dela, eta espedientea artxibatzeko ebazpena emanen dela, hari jakinaraziko zaiona.

7.2.–Eskatzen den dokumentazioa:

7.2.1.–II. eranskineko eskabide-orria.

7.2.2.–Gardentasun betebeharrari buruzko adierazpena (II. eranskina).

7.2.3.–Eskatzaileak laguntzak lehenbizikoz hartu behar dituenean edo laguntzak kobratzeko kontua aldatu nahi duenean, diru-laguntzaren eskaerarekin batera transferentzia bidez kobratzeko eskabidea aurkeztu beharko du, behar bezala bete eta sinatua.

7.2.4.–Ehizazainak kontratatzeko eskaeretarako, kontratua ere aurkeztu beharko da, haren iraupena eta kontratatutako ordu kopurua zehaztuta, bai eta egin beharreko lanak ere, honako arlo hauekin lotuta:

–Ehizari buruzko datuen kontrol administratiboa egitea.

–Administrazioaren, ehiztarien eta nekazarien arteko harremana bideratzea.

–Kalteak kudeatzea (kontrolatu eta aurrea hartzea).

–Ehiza-espezieetako populazioen kontrola eta jarraipena egitea.

–Harrapariak kontrolatzea.

–Habitatak kudeatzea.

–Usategien mantentze-lanak egitea hainbat arlotan (garbiketa, kokalekuaren kontrola, egoera).

–Administrazioari laguntzea, ehizaren kudeaketa errazteko eskatzen zaionean.

–Nafarroako Foru Komunitateko Administrazio Publikoak ehiza espezialitateko landazainentzat antolatzen dituen prestakuntza ikastaroetara joatea.

Ehiza barruti batzuk elkartzen badira ehizazain bat kontratatzeko, elkarte guztiek bete beharko dituzte baldintza hauek.

7.2.5.–Habitatak hobetzeko eta kalteak prebenitzeko eskaeretarako, honako hauek ere aurkeztu beharko dira:

a) “Ehiza-espezieen habitata hobetzeko eta kalteak prebenitzeko lanen laburpena” fitxa (II. eranskina).

b) Proposatutako neurriak kokatzen diren lurzatien kokapen eta xehetasun planoak. Deskripzio memoria bat aurkeztu beharko da, edo, bestela, proiektu bat, tamainagatik edo konplexutasun teknikoagatik halakorik behar duten ekintzetan. Nolanahi ere, 5. oinarrian arautzen diren neurrietako bakoitzaren helburua, deskribapena eta neurketa jaso beharko ditu, bai eta ekintza bakoitzeko aurrekontua eta plan orokorrak eta xehetasun edo kokapen planoak (poligonoa, lurzatia) ere.

8. oinarria.–Diru-laguntzak emateko lehentasun irizpideak.

8.1.–Norgehiagokako prozedurari jarraikiz emanen dira laguntza hauek. Habitata hobetzeko eta kalteak prebenitzeko neurrietan ez bezala, zeinetan irizpide hori aplikatuko baita, ehizazainak kontratatzeko laguntzen eskatzaile guztiek, kudeaketaren arduradun diren aldetik, ehiza-zaintzako zerbitzua kontratatzeko betebehar bera dute, 17/2005 Foru Legearen 51. artikuluaren arabera. Horregatik, bereizkeriarik ez egiteko, eskaerak aurrekontuko eskaintza gainditzen badu, diru-laguntza hainbanatuko da baldintzak betetzen dituzten eskatzaile guztien artean.

8.2.–Ehiza-espezieen habitatak hobetzeko eta kalteak prebenitzeko neurriei aplikagarri zaizkien lehentasun irizpideak:

8.2.1.–Emandako puntuen arabera eginen da eskaeren hurrenkera, honako balorazio irizpide hauen arabera:

8.2.2.–Eskaera batzuek puntuazio bera baldin badute, inbertsio ekonomiko handiagoaren irizpidea aplikatuko da, modalitateen hurrenkera ordena honi jarraikiz: A, B, C, D, E eta F.

8.2.3.–Lehentasun ordenaren arabera esleituko da aurrekontua, aurrekontuko partida agortu arte.

9. oinarria.–Ebaluazio organoa.

Ingurumeneko eta Lurraldearen Antolamenduko Zuzendaritza Nagusiko Ingurune Naturalaren Zerbitzuari dagokio neurri honetan aurreikusitako laguntzak emateko prozeduren instrukzioa.

10. oinarria.–Diru-laguntza esleitzeko prozeduraren instrukzioa.

10.1.–Ingurune Naturalaren Zerbitzuak, egindako ebaluazioa ikusita, laguntzak nori eman proposatzen duen txostena eginen du, eta Ingurumeneko eta Lurraldearen Antolamenduko zuzendari nagusiari igorriko.

10.2.–Proposamen txostena egitean, instrukzio organoak egiaztatuko du onuradunak egunean dituela bere zerga betebeharrak eta Gizarte Segurantzarekikoak, eta, halaber, ez dagoela Diru-laguntzei buruzko azaroaren 9ko 11/2005 Foru Legearen 13. artikuluan onuradun izateko ezarritako ezein debeku egoeratan.

10.3.–Kontrol horiek egiteko, instrukzio organoak oinarritzat hartuko ditu Foru Komunitatean eta/edo beste administrazio batzuetan dauden erregistro ofizialak edo eskura dauden bestelako informazio iturriak, betiere laguntza ordaintzeko eskaera aurkezten den unean dagoen informazioaren arabera.

10.4.–Ondoren, eskaerak ofizioz ebaluatuko dira norgehiagokako prozeduraren arabera eta arau hauetan ezarritako balorazio irizpide, modu eta lehentasunen arabera.

10.5.–Ebaluazioa ikusirik, ebazpen proposamena eginen da, eta laguntza esleitzeko espedientean jaso beharko da onuradunak laguntza eskuratzeko behar diren baldintza guztiak betetzen dituela.

11. oinarria.–Ebazpena.

11.1.–Ebazpen proposamena ikusirik, Ingurumeneko eta Lurraldearen Antolamenduko Zuzendaritza Nagusiak diru-laguntzak esleitzeari buruzko ebazpena emanen du.

11.2.–Ebazpena arrazoitua izanen da, eta hartutako ebazpenaren oinarriak frogaturik egonen dira beti.

11.3.–Diru-laguntza hartuko duten eskatzaileen zerrenda jaso beharko da ebazpenean, eta espresuki adieraziko da zein eskaera ezetsi diren, halakorik baldin bada.

11.4.–Deialdia ixten den egunetik hiru hilabeteko epean jakinaraziko da ebazpena, eta honako hauek jasoko ditu: esleitutako diru-laguntzaren zenbatekoa justifikatzeko nahikoa den informazioa eta onuradunak bete behar dituen baldintzak eta konpromisoak.

11.5.–Eskaera ezetsi egin dela ulertuko da baldin eta diru-laguntzaren oinarri arautzaile hauetan prozedura ebazteko ezarritako epea bukatutakoan berariazko ebazpenik eman ez bada. Aurkeztutako eskaeraren berariazko edo ustezko ezespenaren aurka interesdunek, administrazio publikoak izan ezik, gora jotzeko errekurtsoa jartzen ahalko dute, Landa Garapeneko, Ingurumeneko eta Toki Administrazioko kontseilariari zuzendua, administrazio prozedura erkideari buruzko legeriari jarraikiz.

12. oinarria.–Eskaerak aldatzea.

Ez da aldaketarik onartuko aurkeztutako eskaeretan.

13. oinarria.–Ordainketa eskaera: egindako gastuen eta ordainketen justifikazioa.

Frogagiriak aurkezteko azken eguna 2018ko urriaren 10a izanen da. Epe hori igaroz gero, laguntzaren %25eko penalizazioa aplikatuko da atzeratutako egun baliodun bakoitzeko, gehienez ere 4 eguneko atzerapenarekin. Frogagiri horiek Landa Garapeneko, Ingurumeneko eta Toki Administrazioko Departamentuaren erregistroan (González Tablas, 9; Iruña) aurkeztu beharko dira; bestela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aurreikusitako tokietako edozeinetan, Nafarroako Gobernuko Ingurune Naturalaren Plangintza Estrategikorako Atalari zuzenduta.

13.1.–Ehizazainen kontrataziorako, agiri hauek aurkeztu beharko dira:

–Lan kontratua eginez gero, 2017ko azaroaren 1etik 2018ko irailaren 30era bitarteko nomina guztien fotokopia, edo soldata gordinaren zenbatekoa kobratu izana justifikatzen duten beste agiri ofizial batzuena.

–Zerbitzu prestazioa izanez gero, 2017ko azaroaren 1etik 2018ko irailaren 30era bitarteko jatorrizko fakturak edo horien fotokopia. Egindako gastua ordaindu dela frogatzearren, bankuetako frogagiriak erantsi beharko zaizkie ordainagiriei.

13.2.–Habitata hobetzeko eta kalteak prebenitzeko, honako agiri hauek aurkeztu beharko dira:

–Egindako lanen egiaztagiriak, III. eranskineko ereduari jarraikiz. A modalitateko ekintzen kasuan (“Kalteen prebentzioa”), dagokion zutabea bete beharko da, materiala jasotzen duten nekazarien zerrenda eta nekazari horien sinadura barne.

–Egindako gastuen fakturak, edo, hala bada, kontratua eta ordainagiriak, jatorrizkoak edo fotokopiak izan, betiere onuradunaren izenean, eta gastu horiek frogatzen dituzten bankuko egiaztagiriak. 600 eurotik beherako fakturen kasuan, eskudiruzko ordainketa onartzen da, behar bezala egiaztatzen bada. B eta C modalitateen kasuan (“Lur-zerrendak lurzatietan” eta “Faunarentzako ereintzak”), nahikoa izanen da ordainagiria aurkeztea.

14. oinarria.–Diru-laguntza ordaintzea.

Egiaztagiriak azterturik, Ingurune Naturalaren Zerbitzuak ordaintzeko ebazpenaren proposamena igorriko dio Ingurumeneko eta Lurraldearen Antolamenduko zuzendari nagusiari. Horrekin batera, onuradunek diru-laguntza kobratzeko eskubidea sortzen duten eginbeharrak betetzen dituztela frogatzen duen memoria aurkeztuko da.

Ordainketa bakarrean pagatuko da.

15. oinarria.–Onuradunen betebeharrak, murrizketak eta ordainketa ez gauzatzeko arrazoiak.

15.1.–Onuradunek Diru-laguntzei buruzko Foru Legearen 9. artikuluan ezarritako betebehar orokorrak bete beharko dituzte.

15.2.–Diruz lagundutako jarduerak finantzatzeko lortutako beste diru-laguntza edo laguntza batzuen berri eman beharko zaio organo emaileari.

15.3.–Diru-laguntza emateko ebazpenetan, oinarri arautzaile hauetan edo Diru-laguntzei buruzko Foru Legean ezarritako betebeharren bat bete ezik, onartutako diru-laguntza kobratzeko eskubidea galduko da edo, hala badagokio, diru hori itzuli beharko da, foru lege horren 35. artikuluan xedatutakoarekin bat

15.4.–Halaber, aurreko betebeharretako bat hein batean betetzen ez bada, emandako diru-laguntzaren zenbatekoa berriro ere zehazten ahalko da, proportzionaltasun printzipioari jarraikiz, edo, zein den kasua, dagokion zenbatekoa itzuli beharko da.

16. oinarria.–Diru-laguntzaren bateragarritasuna/bateraezintasuna.

16.1.–Deialdi honen diru-laguntzak bateragarriak dira Foru Komunitateko Administrazioak, beste administrazio publiko batzuek, beste erakunde publiko nahiz pribatuek edo Espainiako nahiz atzerriko partikularrek emandako beste laguntza batzuekin.

16.2.–Kasu horretan, jarduera bererako emandako diru-laguntzen zenbatekoak, bakarrik edo denak baturik, ezin izanen du gainditu onuradunak egin beharreko jardueraren kostua. Aurreko lerroaldean ezarritako ondorioetarako, onuradunak helburu horrexetarako beste diru-laguntzaren bat jasotzen baldin badu, Ingurune Naturalaren Zerbitzuari jakinarazi beharko dio, Diru-laguntzei buruzko azaroaren 9ko 11/2005 Foru Legearen 9. d) artikuluan xedaturikoarekin bat.

16.3.–Kokaleku jakin batzuetako lanek ezin izanen dute diru-laguntzarik jaso, baldin eta kontzeptu berak (zehazki, lekadun haziez ereindakoak edo landu gabeko lur-zerrendak) “Estepako nekazaritza habitatak hobetzea” izeneko laguntza (Landa Garapeneko 2015-2021 Programa berrian jasoa) duten nekazarien konpromisoen parte badira.

17. oinarria.–Emandako diru-laguntzen publizitatea.

Diru-laguntzei buruzko Foru Legearen 15. artikuluan xedatutakoarekin bat, Ingurune Naturalaren Zerbitzuak jendaurrean jarriko ditu emandako diru-laguntzak Nafarroako Gobernuaren Interneteko atarian (www.navarra.es), honako hauek zehaztuta: deialdia, laguntza zein programari eta aurrekontu-kredituri egotziko zaien, onuraduna, emandako diru-kopurua eta diru-laguntzaren helburua.

Diru-laguntzei buruzko 15.2 artikuluari jarraikiz, onuradunek, publizitate egokiaren bidez, aditzera eman behar dute diru-laguntzaren xede diren programek, jarduerek, inbertsioek eta edozein motatako ekintzek finantzaketa publikoa dutela.

II. ERANSKINA

Eskaera ereduak eta laburpen fitxa

2017-2018 kanpainan ehizazainak kontratatzeko diru-laguntzaren eskaera.

Ehiza-espezieen habitata hobetzeko eta kalteak prebenitzeko laguntza eskaera.

Ehiza-espezieen habitata hobetzeko eta kalteak prebenitzeko lanen laburpen fitxa.

Gardentasun betebeharrari buruzko adierazpenaren eredua.

Adierazpen-egilearentzako informazio interesgarria.

III. ERANSKINA

Egindako gastu eta ordainketak egiaztatzeko eta justifikatzeko eredua

Ehiza-espezieen habitata hobetzeko eta kalteak prebenitzeko egindako lanen egiaztapena.

Deskargatu beharreko artxiboak PDF formatuan daude.

Iragarkiaren kodea: F1801243