29. ALDIZKARIA - 2018ko otsailaren 9a

1. NAFARROAKO FORU KOMUNITATEA

1.3. LURRALDEAREN ANTOLAMENDUA ETA HIRIGINTZA

850E/2017 EBAZPENA, abenduaren 22koa, Ingurumeneko eta Lurraldearen Antolamenduko zuzendari nagusiak emana, zeinaren bidez behin betiko onesten baita Iruñeko udal-mugarteko Z2.2 unitatean Erruki Etxearen Udalez gaindiko Plan Sektoriala aldatzeko espedientea. Sustatzailea Morea Inversiones SA merkataritzako enpresa da.

Ingurumeneko eta Lurraldearen Antolamenduko zuzendari nagusiaren azaroaren 8ko 1307E/2016 Ebazpenaren bidez, hasiera eman zitzaion Iruñeko udal-mugarteko Z2.2 unitatean Erruki Etxearen Udalez gaindiko Plan Sektoriala aldatzeko espedientearen tramitazioari, sustatzailea Morea Inversiones SA merkataritzako enpresa zuena (2016ko 236. Nafarroako Aldizkari Ofiziala, abenduaren 9koa).

Espedientearen helburua da Z2.2 unitateko hirigintza antolaketako determinazio batzuk aldatzea, hain zuzen ere UPSan xehatu gisa definitutako batzuk, aipatutako unitate horretako eraikuntza bolumenak berrantolatzeko eta aurreikusitako merkataritza azalera eraikigarria murrizteko (eta horrek berekin dakar gainerako jardueren azalera handitzea).

Zehazki, proposatzen da determinazio hauek alda daitezela:

–Lerrokadurak, hegalkinak eta atzeraemanguneak. Eraikuntzaren behe solairuko gehieneko lerrokadurak aldatzen dira, beheko solairuaren gehieneko okupazioa handituz, 4.949,51 m²-tik 5.310,31 m²-ra. Horrek berekin dakar zamalanen eranskina kentzea, azaleran aurreikusita zegoena, Z-2.2 eta Z-2.3 unitateen artean, eraikinen sotoetan eginen baitira zamalanak, eta Ezkirotz kalearen aurreko espaloia murriztea. Goiko solairuetako lerrokadurak aldatzen dira, bolumenak berrantolatuta. Basamentuaren gainean markesina irtenak egiteko aukera sartzen da. Hori dena, UPSan zehaztutako gehieneko eraikigarritasuna aldatu gabe.

–Sestra gaineko solairu kopurua, gehienez ere. “Basamentu” deitutakoaren solairu kopurua handitu egiten da, B+I-etik B+II-ra, eta eraikin garaienean, B+10-etik B+11-ra, bietan ere UPSan zehaztutako gehieneko garaiera aldatu gabe (14 m eta 43,7 m, hurrenez hurren).

–Gehieneko garaiera. B+4+A blokerako ezarritako guztirako altuera 3,30 m txikitzen da, betiere guztirako solairu kopuru berari eutsiz.

–Eraikinen altuera, gehieneko altueraren gainetik (estalkiko elementuak). Fatxadatik lehenbiziko 3 metroetako zerrendan, 4 metroko gehieneko garaiera ezarrita zegoen, eta muga hori kendu egiten da. Orobat, gehitzen da ezen gehieneko altueratik gora eraikitzen den bolumenak ezkutatu egin beharko dituela, betiere, tximiniak eta instalazioak.

–Estalkiak. Berritasun gisa, makurdurak izan ditzakete, elementuak eta instalazioak ezkutatzeko balio baldin badute.

Merkataritzako azalerari dagokionez, jatorrizko UPSak 20.746,10 m²-ko gehieneko eraikigarritasuna ezarri zuen, baita erabileren arauketa bat ere (27.9 art.) non hauxe esaten den: “oinarrizko unitateari esleitutako bulegoen erabilerarekin %100ean bateragarriak diren erabilera baimendutzat jotzen dira merkataritzakoa, aldi baterako bizitegiarena (hotelak, hostalak, apartahotelak, ostatu-etxeak eta antzekoak), laguntzadun eta laguntza gabeko bizitegi komunitarioarena (ikasle-egoitzak, zahar-egoitzak eta antzekoak), ekipamendukoak (publikoa zein pribatua) eta sukaldaritza, kultur, aisialdi eta kiroleko jarduketa ekonomikoak (gimnasioa, adibidez), bai eta antzekoen parekagarriak direnak ere”. Determinazio horietako bakar bat ere ez da aldatzen.

Nafarroan Merkataritza arautzen duen 17/2001 Foru Legearekin bat, beharrezkoa da UPS bat tramitatzea merkataritzako establezimendu handiak baimentzeko (hala definitzen dira beren merkataritzako azaleraren arabera). Jatorrizko UPSan merkataritzarako baimenak 8.000 m²-ko merkataritzako azalera jasotzen zuen, eta aldaketa honekin 4.641,60 m² izanen dira. Horri loturik, inguruan merkataritzako azalera berriak ireki dira, eta horrek denak ekarri du sustatzaileak ziurtatzea ezen jarduketa-portzentajea %2,14tik %1,19ra jaitsi dela eraginpeko eremuan.

Aldaketaren jendaurreko epean, hasi baitzen aipatutako 1307E/2016 Ebazpena Nafarroako Aldizkari Ofizialean argitaratu zenean, 2016ko abenduaren 9an, alegazio idazki bat aurkeztu zuten Rufino Javier Hernández Minguillonek, Marcos Escartín Miguelek eta Mikel Zabalza Zamarbidek.

Alegatzaileen ustez, jatorrizko UPSaren eranskin ziren agiri batzuk ez zetozen bat proposatutako aldaketarekin, besteak beste zaratari, jarduerari, hondakinen kudeaketari edo trafikoari buruzko azterlanak. Interesdunek, orobat, uste dute aldaketaren espedienteari ez zitzaiola gehitu azaleren eta erabileren definizio xehatu bat, ahalbidetuko zuena proiektua bermeekin ezagutzea; zehazki, ez da zehazten merkataritzako azalerak izanen duen okupazioa solairuen arabera banatuta.

Turismoa eta Merkataritza Antolatu eta Sustatzeko Zerbitzuari alegazioei buruzko txostena eskaturik, 2017ko ekainaren 13an erantzuna jaso zen. Txosten hori ikusirik, sustatzaileari eskatu zitzaion UPSko dokumentazioa osa zezala, Nafarroan Merkataritza arautzen duen 17/2001 Foru Legearen 21. artikuluan eskatutako agiriekin, aldaketarako behar baitira, eta salmentarako azaleraren portzentajea eta solairukako banaketa frogatzen duen dokumentazioarekin.

2017ko irailaren 19an (agiria: 678934), José Antonio Herraizek, Morea Inversiones SA ordezkatuz, agiri bat aurkeztu zuen, jatorrizko UPSaren agiriko aldaketa guztiekin.

2017ko azaroaren 15ean (agiria: 719194), José Antonio Herraizek, Morea Inversiones SA ordezkatuz, Iruñeko Udalaren txostena aurkeztu zuen.

Sustatzaileak 2017ko irailaren 19an aurkeztutako dokumentazioan, proposatu zen memoriaren 5.2.7 puntua aldatzeko, baita araudiaren 27.11 eta 36. artikuluak ere. Baina aldaketa hori ez da jendaurrean egon; beraz, ez da bidezkoa espedientearen tramitazioaren une honetan gehitzea.

Ondoren jaso dira alegazio idazki aurkeztuari emandako erantzuna eta edukia, laburturik:

–Aldez aurreko gaiak. 2014ko irailaren 24ko UPSaren balio falta.

Edukia:

Alegazioak auzitan jartzen du Gobernuak 2014ko irailaren 24an hartutako Erabakiaren bidez onetsitako UPSaren balioa, argudiatuz ez dela araudia osorik argitaratu, zehazki araudi idatziko artikuluek aipatzen dituzten araudiko plano edo grafikoak.

Erantzuna:

Lurraldearen Antolamenduari eta Hirigintzari buruzko Foru Legearen 29.2 artikuluak, lurralde antolamenduko tresnen izaera eta lehentasunari buruzkoak, horien determinazioak betearazteko baldintza gisa jartzen du aldez aurretik Nafarroako Aldizkari Ofizialean argitara dadila behin betiko onesteko erabakia eta UPSko hirigintzako arauak, ez ordea haren planorik edo bestelako agiririk.

Hala, bidezkoa da nabarmentzea ezen bai UPSaren 3. artikuluak bai Lurraldearen Antolamenduari eta Hirigintzari buruzko Foru Legearen 56. artikuluak (nolanahi ere, UPOari buruz, alderdi honetan UPStara aldatzen ahal dira) bereizten dituztela memoriari dagokion tresnaren agiria, araudiari dagokiona, informaziorako eta antolamendurako planoak, etab.

Orobat, kontuan hartu behar da ezen, azaldutakoarekin bat, behin betiko onespena eta hirigintzako arauak argitaratzea eraginkortasun oinarria dela, ez balio oinarria.

–Aldez aurreko gaiak. Nafarroako hirigintzari buruzko Informazio Sisteman okerreko dokumentazioa argitaratzea.

Edukia:

Nafarroako Gobernuaren atarian, Nafarroako hirigintzari buruzko Informazio Sisteman, 2016ko abuztuko zenbait agiri agertzen dira, jatorrizko UPSa idatzi zuten arkitektoek sinatuak, baina horietako bakar batek ez du testua egun horretan sinatu.

Erantzuna:

Nafarroako hirigintzari buruzko Informazio Sisteman 2016ko abuztuko datarekin argitaratutako testu bateginak ez du berritasunik ekartzen tramitatutako agiriarekin loturik, salbu Nafarroako Gobernuak 2014ko irailaren 24an hartutako Erabakiaren bidez inposatutako aldaketak, alegazioen ebazpenaren ondoriozkoak, eta erabaki horren III. epigrafean erabilera urbanistikoak arautzeari buruz daudenak.

Hala, ondorioztatzen da testu bateginak bere egin duela Nafarroako Gobernuak 2014ko irailaren 24an hartutako Erabakiaren edukia, bere baitan dituela espedientea tramitatu bitartean aurkeztu diren agiri partzial guztiak, eta, pentsatzen dugu alegatzaileek sinatu zituztela.

Nolanahi ere, ez da bidezkoa gai horretan sartzea, izan ere Administrazio honek egiten duen bakarra da agiria lurraldearen eta hirigintzaren arlotik aztertzea, eta ezin ditu baloratu agiriaren jabetzari buruzko alderdiak. Horri dagokionez, egoki den entitate sustatzailera jo beharko du, bere nahiak eskatzeko, eta, bidezkoa bada, egoki den kontratuzko erantzukizuna galdatzeko.

–Prozedura behar ez bezala erabiltzea.

Edukia:

Alegatzaileek ez dute uste egokia denik aldaketa “xehatua” dela esatea, izan ere uste dute argitaratu diren agiri gutxiekin ezin direla baloratu hirigintzako antolamenduko determinazioen aldaketaren edukia eta norainokoa.

Orobat, uste dute proposatu den planeamenduko aldaketak aldaketak eragiten dituela lurzatiko bolumetrian, erabileran eta okupazioan, UPSko alderdi garrantzitsuak ukitzen dituztenak, eta Iruñeko Udalarekin negoziazio espezifikoa izan zen hari buruz.

Gainera, beren iritziz proposatutako aldaketak ez dira eztabaidatu herritarren informazio eta parte-hartze prozesuan, eta, hala, uste dute urratu egin dela 35/2002 Foru Legearen espiritua, aldaketa horiek ingurumen eraginaren ebaluazioa alda dezaketela, eta ez dela koherentea aldaketa xehatu gisa sailkatzea, zeren Turismoa eta Merkataritza Antolatu eta Sustatzeko Zerbitzuaren txostena eskatzen baitu.

Proposatutako aldaketaren edukiari dagokionez, interesdunek nabarmentzen dute behe solairuko okupazioa handituta ez direla zehazten zamalanetarako eremu berriaren baldintza urbanoak eta arkitektonikoak, Ezkirotz kaleko oinezkoen espaloia murrizten dela (eta erabilera berriekin kale horrek izanen du zirkulaziorik handiena) eta ez dela hondakin berrien kokapen zehatza ematen (jatorrizko UPSan eskatu zen, eta agirietan jaso). Dorrearen solairu kopurua handitzeari dagokionez, Udal Planaren aldaketan aurreikusitakoa gainditzen da, eta basamentua betetzeak eragina du mugakide diren kaleetan eta oinezkoentzako igarobideetan. Azkenik, alegatzaileek uste dute ezen dorrearen eta altuera txikiagoko blokearen posizioa eta konfigurazioa aldatzeak ukipenak ekartzen dituela ondoko kaleetan eta 2013an jakinarazitako jatorrizko UPSaren hirigintzako profilean.

Erantzuna:

Aldatu nahi diren determinazioen izaerari dagokionez, UPSak berak zehazten du bere determinazioen izaera egituratzailea edo xehatua, 35/2002 Foru Legearen 49. artikulua errespetatuz. Hala, 27. artikuluan ezartzen ditu UPSak bere determinazio xehatuak, besteak beste aldaketa honen xede diren guztiak: lerrokadurak, altuerak, lurzatian okupa daitekeen azalera eta erabilera publikoko azalera pribatua.

Bestalde, 2017ko azaroaren 15ean, sustatzaileak Iruñeko Udalaren txosten bat aurkeztu zuen, alegatutako gai honi erantzuna ematen ziona. Txosten hartan, Iruñeko Udalak honako zehaztapen hauek egiten ditu indarreko UPSan aldatutako determinazio berriei buruz:

–Lerrokadura berriak indarrekoak baino hobetzat jotzen dira, zuzenagoak baitira, eta txokoak kentzen baitituzte, eta, ondorioz, espazio publikoa hobetzen.

–Guztirako altuera ez da aldatzen. B+4+A altuerako eraikina, zaharren egoitzarako izanen dena, “L” formakoa izanen da, zuzkidura lurzatien parez pare, eta onar daitekeen gehieneko altuera izanen du, 17,5 m zabal diren kaleetan.

Azkenik idazten den proiektuan, justifikatu beharko da aurreikusitako gehieneko altueratik eta tamainatik gora ateratzen diren elementuak eraikitzeko premia.

–Aparkatzeko tokien erreserba murriztu bada ere, erreserba hori bat dator Udal Planaren Hirigintza Araudi Orokorrarekin.

Txostenean, bestalde, badira beste gai batzuk ere, aldaketa honi buruzkoak ez direnak, baizik indarreko UPS onetsian jada jasota dauden determinazioei buruzkoak –eta alegazioak ere izan dituzte–.

35/2002 Foru Legearen 45.5 artikuluan ezarrita dago UPStako determinazio xehatuak aldatzeko prozedura. Haren arabera:

Udalez gaindiko plan sektorialen zehaztapen xehakatuen aldaketak egiteko, Lurraldearen Antolamendu eta Etxebizitza Departamentuak onetsi beharko ditu, jendaurrean hilabetez egonda eta ukitutako udalei entzunaldia eman ondoren, edo kasuan kasuko udalak, departamentu horrek baimentzen badu eta hark emandako jarraibideekin bat.

Parte-hartze prozesurik izan den alde batera utzita, aldaketa jendaurrean egon da, Lurraldearen Antolamenduari eta Hirigintzari buruzko Foru Legean aurreikusitako ondorioetarako, baita Ingurumen ebaluazio estrategikoaren prozeduraren ondorioetarako ere, eta txostenak jaso dira Turismoa eta Merkataritza Antolatu eta Sustatzeko Zerbitzutik eta Iruñerriko Mankomunitatetik.

Aldaketaren alderdi zehatzei dagokienez, aipagarria da zamalanen eremu berria eraikinaren beraren azpian gelditzen dela, inguratzailearen barnean, UPSak ezartzen dituen oinezkoentzako ibilbideak osorik mantenduz.

Alegatzaileek diote beharrezkoa dela hondakinak biltzeko eremua lekuz aldatzea –Hondakinen Planean aurreikusia zegoen, azaleran, zamalanen eremuaren ondoan–. Sustatzaileak aurkeztutako Hondakinen Plan berrian gai horri heldu zaio.

Aldatutako parametroei dagokienez, espaloien zabaleraren murrizketa aztertuta, ikusi da ondoriozko zabalerak zentzuzkoak direla, eta ingurukoak baino zabalagoak. Ezkirotz kalearen kasuan, proposatutako zabalera 8 metrokoa da.

Markesinak jartzearen aukerari buruz, aipatzekoa da UPSan jada bazela aukera. Nolanahi ere, exekuzio proiektuan zehaztuko dira, behar baldin bada, markesinen diseinua eta antolaera.

Eraikuntza-bolumenen altuerak, kokapenak eta posizioa aldatzeari dagokionez, aldaketak bere baitan du altueren eta bolumenen azterketa bat non ikusten baita solairu kopuruaren handitzeak ez dakarrela berekin eraikinen guztirako altuera handitzea. Aldaketarekin, dorrearen posizio-aukerak handitzen dira, Gaztelugibel aldera, Ezkirotz kalearen eta Antso Azkarraren etorbidearen elkargunetik urrutiratuz. Nolanahi ere, UPSaren aldaketak indarreko UPSak adina errespetatzen ditu inguruko eraikinak, eta alde bateko oinezkoentzako kalearen gaineko aldera ematen duten bi solairuen helburua da zamalanen bolumena kentzearen helburu bera, hots, toki horrek duen oinezkoentzako izaera indartzea.

–Iruñeko Udalaren nahitaezko baimenik eza, Merkataritzari buruzko Foru Legearen 21.3.b artikuluari jarraikiz.

Edukia:

Nafarroan Merkataritza arautzen duen uztailaren 12ko 17/2001 Foru Legearen 21.3 artikuluan ezartzen da zer dokumentazio erantsi behar den merkataritzako establezimendu bat baimentzeko Udalez gaindiko Plan Sektorial baten bidez, besteak beste, b) puntuaren arabera, udalaren txostena (zer tokitan egin nahi den eraikina hango lurralde eremuko udalarena), adieraziko duena ea bilatzen diren erabilera eta proiektua bat datozen hirigintzako planeamenduarekin.

Alegatzaileen ustez txosten hori nahitaezkoa da, proposatutako aldaketa morfologiko eta hirigintzakoengatik.

Erantzuna:

Nafarroan Merkataritza arautzen duen uztailaren 12ko 17/2001 Foru Legeari jarraikiz, 2017ko azaroaren 15ean sustatzaileak Iruñeko Udalaren txostena aurkeztu zuen, eta, hala, alegatutako auziari erantzuna eman zitzaion.

–35/2002 Legeak eskatzen duen dokumentaziorik eza.

Edukia:

Alegatzaileen ustez, aldatu gabeko jatorrizko UPSaren eranskin ziren agiri batzuk, besteak beste zaratari, jarduerari, hondakinen kudeaketari edo trafikoari buruzko azterlanak, baliogarri gisa mantendu dira, nahiz eta aldaketak planteatutakoa ez bezalako konponbide bat justifikatzen zuten.

Interesdunek, orobat, uste dute aldaketaren espedienteari ez zitzaiola gehitu azaleren eta erabileren definizio xehatu bat, ahalbidetuko zuena proiektua bermeekin ezagutzea; zehazki, ez da zehazten merkataritzako azalerak izanen duen okupazioaren erdia, eta, hala, 35/2002 Foru Legearen 43. artikulua urratzen da alegatzaileen ustez.

Erantzuna:

2017ko irailaren 19an, sustatzaileak dokumentazioa aurkeztu zuen, besteak beste Nafarroan Merkataritza arautzen duen uztailaren 12ko 17/2001 Foru Legeak eskatutako jatorrizko UPSko agiriak, hirigintzako determinazio berrien arabera aldatuak.

2017ko azaroaren 15ean, sustatzaileak txosten bat aurkeztu zuen, non adierazi baitzuen Oinarrizko Proiektuan zehazten zirela azalerak, eta horien denen koadro zehaztua erantsi zuen.

Hori guztia dela eta, proposatzen da alegazioen idazki hori partez baiestea.

Ingurumeneko eta Lurraldearen Antolamenduko zuzendari nagusiaren azaroaren 8ko 1307E/2016 Ebazpenak (haren bidez hasi zen espediente honen tramitazioa) sustatzaileari adierazi zion ezen, espedientea ebatzi aurretik, agiria osatu egin behar zela, hainbat gai kontuan hartuz. Ondotik aztertzen da nola zuzendu den:

–Hasieran onetsitako agiriaren memoriak inkoherentziak eta akatsak zituen, eta zuzendu egin dira.

–85/1995 Foru Dekretuaren 52. artikuluarekin bat, zeina indarrean baitago, kontra egiten ez dion bitartean maila goragoko ordenamendu juridikoari eta hirigintzakoari, planeamendua aldatzeko espediente orok izan behar ditu hirigintza arloko indarreko antolamendu determinazioak eta horiek ordeztuko dituztenak. 3. eranskinean aurkeztutako dokumentazioan, aldatzen diren jatorrizko araudiko artikuluak, eta, 4. eranskinean, aldatutako araudia.

–Justifikatzen da proposamenak bideragarritasun handiagoa duela, indarreko antolamenduaren aldean, izan ere hoteletako eta egoitzetako operadoreekin kontsulta egin ondoren, antolamendu berriarekin lortzen da toki lasaietarako (parkea) orientazioa irabaztea hoteleko geletarako, eta hegoaldeko orientazioa egoitzarako, eta, hala, efizientzia energetikoa ere irabazten da. Gainera, saiakera bat egin da gunerik zaratatsuenetik –zarataren azterlanaren arabera, Antso Azkarraren etorbidearen eta Ezkirotz kalearen arteko elkargunea– urrutiratzeko.

–Bestalde, lurzati pribatua izanik erabilera publikoko zortasuna duen azaleran basamentuko bolumetria berriak izanen duen eraginari dagokionez, eta aldaketak oinezkoen ibilbideen kalitatean kalterik ekarriko ez duelako justifikazioari dagokionez, aurkeztutako dokumentazioan argudiatzen da oinezkoen ibilbideek kalitatea irabaziko dutela, azalerako zamalanak desagertzeagatik. Orobat, argudiatzen da basamentuaren altuerek errespetatzen dituztela inguruko eraikinak (ez dituzte inoiz ere gainditzen) eta antolamendu berriaren asmoa dela oinezkoen eremuak dinamizatzen laguntzea.

–Behe solairuaren altuera zuzentzeaz gain (3 metroko gutxieneko altuera ezarri da), arauditik kentzen dira Udal Planaren eta indarreko UPSaren araudiko eskemak.

Ondoren, espedientearen tramitazioan jasotako txosten sektorialei buruzko gogoetak aztertzen dira:

Ingurumen Eraginaren eta Paisaiaren Atalaren txostena.

Ingurumen Eraginaren eta Paisaiaren Atalaren 2017ko maiatzaren 29ko txostenak dioenez, aldaketa txikia da Ingurumen Ebaluazioari buruzko abenduaren 9ko 21/2013 Legearen 5. artikuluan definitutakoaren arabera, ingurumenean ukipen nabarmenik gabekoa, eta indarrean segitzen du ingurumen ondorioen adierazpenak (Ingurumenaren eta Uraren zuzendari nagusiaren irailaren 16ko 408E/2014 Ebazpena). Hortaz, ondorioztatzen da ez dela beharrezkoa Ingurumen eraginaren azterketa aldatzea.

Turismoa eta Merkataritza Antolatu eta Sustatzeko Zerbitzuaren txostenak.

Nafarroan Merkataritza arautzen duen uztailaren 12ko 17/2001 Foru Legeak 19. artikuluan xedatzen du merkataritza-establezimendu handiak ezartzeko udalez gaindiko plan sektorial bat tramitatu beharko dela, eta halakoak dira txikizkako merkataritzan aritzen diren establezimendu indibidual edo kolektiboak, 2.500 metro koadro baino gehiagoko azalera erabilgarria badute produktuak saldu eta erakusteko.

Aurrekoaren ildotik, espediente honen zergatia den UPSaren xedea da merkataritzako establezimendu kolektibo bat ezartzea, salmentarako gutxi gorabehera 8.000 m²-ko azalera erabilgarria izanen duena.

Aurkeztutako memoriaren arabera, merkataritzako establezimendua UPSan aurreikusitako azaleraren erdian eginen da. Hala ere, azalera murrizteak berekin dakar, nahitaez, eragina izatea UPSaren merkataritza-xedean, baita UPSa osatzen duen dokumentazioan eta nahitaezkoa den dokumentazioan (aipatutako 17/2001 Foru Legearen 21., 23. eta 25. artikuluen arabera) ere, merkataritzako establezimendua baimentzearen ondorioetarako. Hortaz, 2016ko urriaren 21ean, txosten tekniko bat eskatu zaio Turismoa eta Merkataritza Antolatu eta Sustatzeko Zerbitzuko Merkataritza Sustatzeko Atalari (Turismo eta Merkataritza Zuzendaritza Nagusia), bere eskumeneko gaiari buruz.

Atal horrek, 2017ko martxoaren 2an, argitzea eskatu zuen hasieran aurreikusitako merkataritzarako azaleraren murrizketari buruz, eta, orobat, salmentarako azalera eta solairukako banaketa frogatzeko agiriak ere eskatu zituen.

Sustatzaileak, 2017ko martxoaren 15eko idazkian, argitu zuen ezen aurreikusitako eraikigarritasun berri hauek direla: 5.000 m² merkataritzarako, UPSko 8.000 metro koadroak baino gutxiago, 6.200 m² hotelerako eta 9.000 m² egoitzarako, guztira 20.700 m², baimendutakoa (20.746,10 m²) baino eraikigarritasun txikiagoa. Nabarmentzen du merkataritzako eraikigarritasuna beheko solairuan kokatuko dela, eta egin ezin dena lehen solairura eramanen dela.

Martxaren 23an, Turismoa eta Merkataritza Antolatu eta Sustatzeko Zerbitzuak txosten bat eman zuen, adieraziz ezen merkataritzako azalera murriztuta inguruneko inpaktua ere murriztu eginen dela eta ez dagoela errekerimendu gehiagorik tramitazioari segida emateko ondorioetarako.

Nolanahi ere, alegazioak ikusirik, berriz ere gai horri buruzko txostena eskatu da, eta Turismoa eta Merkataritza Antolatu eta Sustatzeko Zerbitzuak txostena eman du, 2017ko ekainaren 13ko datarekin. Hartan, UPSa tramitatzen duen organoari ematen zaio eskumena aldaketak ukitutako UPSrako beste dokumentaziorik behar ote den erabakitzeko. Gainera, adierazten dute salmentarako portzentajearen ziurtagiria ere aldatu dela. Uste dute komenigarria dela merkataritzarako azaleraren determinazioan planoak erants daitezela, solairukako banaketa agertuko dutenak.

Txosten hori oinarri harturik, sustatzaileari eskatu zitzaion UPSko dokumentazioa osa zezala, merkataritzarako establezimendu handi bat ezartzeari buruzkoa, Nafarroan Merkataritza arautzen duen 17/2001 Foru Legearen 21. artikuluan eskatutako agiriekin, hain zuzen ere hirigintzako determinazioen aldaketak ukitutako dokumenetazioarekin, eta/edo aldaketan proposatzen den azalera murrizketek ukitutako dokumentazioarekin. Edo, bestela, justifikatu beharko da ez dagoela ukipenik.

Sustatzaileak ziurtatzen du jarduketa-portzentajea %2,14tik %1,19ra jaitsi dela eraginpeko eremuan, zeren jatorrizko UPSan merkataritzarako baimena 8.000 m² zen, eta aldaketa honen bidez 4.641,60 m²-ra jaitsiko da, eta, horretaz gain, inguruan merkataritzako merkataritzako azalera berriak ireki dira.

Behin errekerimendu horren erantzuna jasota, berriz ere txostena eskatu zitzaion Turismoa eta Merkataritza Antolatu eta Sustatzeko Zerbitzuari, 2017ko irailaren 26an. 2017ko urriaren 27an, txostena eman zuen, adieraziz ezen, aurkeztutako dokumentazioa ikusirik, Turismo eta Merkataritza Zuzendaritza Nagusiak ez duela eragozpenik ikusten, merkataritzari dagokionez soil-soilik.

Iruñerriko Mankomunitatearen txostena.

Iruñerriko Mankomunitateak, 2016ko abenduaren 23an, aldeko txostena eman zuen uraren ziklo integralari buruz.

Lurraldearen Antolamendu eta Hirigintza Zerbitzuak espedientea azterturik, eta Lurraldearen Antolamenduari eta Hirigintzari buruzko Foru Legearen testu bateginarekin bat (uztailaren 26ko 1/2017 Legegintzako Foru Dekretuaren bidez onetsi zen), eta Landa Garapeneko, Ingurumeneko eta Toki Administrazioko Departamentuaren egitura organikoa ezartzen duen irailaren 21eko 78/2016 Foru Dekretuaren bidez emandako ahalmenak erabiliz,

EBATZI DUT:

1. Aurkeztu diren alegazioak Ebazpen honetan azaldutako moduan ebaztea.

2. Behin betiko onestea Iruñeko udal-mugarteko Z2.2 unitatean Erruki Etxearen Udalez gaindiko Plan Sektoriala aldatzeko espedientea. Sustatzailea Morea Inversiones SA merkataritzako enpresa da.

3. Obren eragina jasan dezaketen beste azpiegitura eta zortasunei dagokienez edo obrak egitea baldintzatzen ahal duten azpiegitura eta zortasunei dagokienez, sustatzaileak behar diren baimen guztiak lortuko ditu kasuan kasuko gaian eskudun diren organoetatik.

4. Adieraztea ebazpen honek administrazio bidea amaitzen duela, eta honen aurka administrazioarekiko auzi-errekurtsoa jar daitekeela Nafarroako Auzitegi Nagusiko Administrazioarekiko Auzien Salan, bi hilabeteko epean, argitaratu eta biharamunetik hasita.

Dena dela, administrazio publikoek aurretiazko errekerimendua egiten ahalko dute, Nafarroako Gobernuari zuzendua, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.

Ebazpen honen jakinarazpena egin edo, bestela, Nafarroako Aldizkari Ofizialean argitaratu eta biharamunetik aurrera hasiko dira kontatzen epe horiek.

5. Ebazpen hau eta araudia Nafarroako Aldizkari Ofizialean argitaratzea, eta honako hauei jakinaraztea: sustatzaileari, Iruñeko Udalari, alegatzaileei, Turismoa eta Merkataritza Antolatu eta Sustatzeko Zerbitzuari, Ingurumen Eraginaren eta Paisaiaren Atalari eta Iruñerriko Mankomunitateari.

Iruñean, 2017ko abenduaren 22an.–Ingurumeneko eta Lurraldearen Antolamenduko zuzendari nagusia, Eva García Balaguer.

ERANSKINA

Araudia (PDFa).

Iragarkiaren kodea: F1715197