Iragarkia

229. ALDIZKARIA - 2018ko azaroaren 27a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

2534/2018 EBAZPENA, urriaren 29koa, Funtzio Publikoko zuzendari nagusiak emana, deialdi bat onesten duena prestakuntzarako zerbitzu berezietako egoeran suhiltzaile-sarjentu lanpostuetan aritzeko izangaien zerrenda bat osatzeko hautaproben bidez.

Barne Zuzendaritza Nagusiko Nafarroako Suhiltzaileen Zerbitzuak dituen langile beharrak ikusirik, bidezkoa da deialdi bat onestea prestakuntzarako zerbitzu berezietako egoeran suhiltzaile-sarjentu lanpostuetan aritzeko izangaien zerrenda bat osatzeko hautaproben bidez, gerora Nafarroako Suhiltzaileen Zerbitzuan sortzen diren beharrei erantzuteko.

Deialdia honako arau hauen babesean onetsi da: 8/2005 Foru Legea, uztailaren 1ekoa, Nafarroako Babes Zibilari eta Larrialdien Kudeaketari buruzkoa; 82/2006 Foru Dekretua, azaroaren 20koa, Nafarroako Administrazio Publikoetako prebentzio, su-itzaltze eta salbamendu zerbitzuetan suhiltzaile-sarjentuen eta sarjentu-ofizialen lanpostuetan aritzeko eskatzen diren titulazioak zehazten dituena; 96/1997 Foru Dekretua, apirilaren 14koa, Nafarroako Administrazio Publikoen zerbitzuko Langileen Estatutuaren 24.2 artikulua hein batean garatzen duena; eta 199/2004 Foru Agindua, abenduaren 30ekoa, Lehendakaritza, Justizia eta Barneko kontseilariak emana, prestakuntzarako lanpostuetan aritzeko izangaien zerrendak osatu eta kudeatzeko prozedura ezarri zuena.

Horrenbestez, eta otsailaren 21eko 30/2005 Foru Dekretuaren bidez esleiturik ditudan eskudantziak erabiliz,

EBATZI DUT:

1. Deialdi bat onestea prestakuntzarako zerbitzu berezietako egoeran suhiltzaile-sarjentu lanpostuetan (B mailakoak) aritzeko izangaien zerrenda bat osatzeko hautaproben bidez, gerora Barne Zuzendaritza Nagusiko Nafarroako Suhiltzaileen Zerbitzuan sortzen diren beharrei erantzuteko.

2. Ebazpen hau eta eranskinak Nafarroako Aldizkari Ofizialean argitaratzeko agintzea.

3. Ebazpen hau eta eranskinak jakinaraztea Langileen Kudeaketarako Zerbitzuari, Argibide eta Erregistro Bulegoari eta epaimahaiko kideei, behar diren ondorioak izan ditzaten.

DEIALDIA, SUHILTZAILE-SARJENTU GISA PRESTAKUNTZARAKO ZERBITZU BEREZIETAKO EGOERAN ARITZEKO IZANGAIEN ZERRENDA BAT OSATZEKO

Hona hemen deialdiaren

OINARRIAK

Lehenbizikoa.

Deialdia egiten da suhiltzaile-sarjentu lanpostuetan prestakuntzarako zerbitzu berezietan arituko diren izangaien zerrenda bat osatzeko hautaproben bidez, gerora Barne Zuzendaritza Nagusiko Nafarroako Suhiltzaileen Zerbitzuan sortzen diren beharrei aldi batez erantzuteko.

Bigarrena.–Parte-hartzaileen betebeharrak.

2.1. Deialdi honetan parte hartu nahi duten izangaiek baldintza hauek bete beharko dituzte eskabideak aurkezteko epea bukatzen denean:

a) Nafarroako Foru Komunitateko Administrazioaren eta haren erakunde autonomoen zerbitzuko langile finkoa izatea, E, D edo C mailakoa edo taldekoa, eta eskubidez dagokien gehieneko prestakuntzaldia agorturik ez izatea.

b) Beren lanpostuan gutxienez hiru urteko zerbitzualdia benetan egina izatea.

c) Borondatezko edo nahitaezko eszedentzian ez egotea.

d) Ingeniaritza teknikoko edo arkitektura teknikoko unibertsitate-titulua edo ingeniaritzako edo arkitekturako gradua izatea, edo baliokidetzat hartzen den beste bat, edo eskaerak aurkezteko epea bukatzen den egunean titulu horietako bat eskuratzeko moduan egotea. Titulu hori ezin da izan langile finkoari jardunean aritzeko balio diona.

Tituluak atzerrian lortu badira, homologatuta daudela frogatzen duten frogagiriak eduki beharko dira.

e) Suhiltzaile-sarjentu gisa zerbitzu berezietan prestakuntza jasotzeko zerrenda batean ez egotea.

f) Deialdiaren xede den lanpostuari dagozkion eginkizunak betetzeko behar den gaitasun fisiko eta psikikoa izatea, eta ez egotea deialdiaren IV. eranskinean osasunagatik baztertzeko zehazten diren egoeretako batean ere.

g) C motako ibilgailuak gidatzeko baimena izatea.

h) Espainiako nazionalitatea izatea.

i) Nafarroako Babes Zibilari eta Larrialdien Kudeaketari buruzko uztailaren 1eko 8/2005 Foru Legearen 55. artikuluan araututako bigarren jarduerako lanpostu batean ez aritzea.

2.2. Aurreko paragrafoan ezarritakoa deusetan galarazi gabe, deialdi honetan parte hartzen ahalko dute, orobat, aurreko ataleko d) letran eskatutako tituluaren jabe izan gabe ere, Nafarroako Foru Komunitateko Administrazioaren zerbitzuko suhiltzaile-kaboen lanpostuetan gutxienez bost urteko zerbitzualdia egiazki eman dutela frogatzen duten pertsonek.

2.3. Oinarri honetako baldintza guztiak eskaerak aurkezteko epea bukatzen den egunean bete beharko dira, baita hautapen prozesu osoan, dei egiten zaien unean eta prestakuntzak iraun bitartean ere.

2.4. Deialdi honetan ezin dute parte hartu Osasun Departamentuaren menpeko erakunde autonomoei atxikitako langileek, Nafarroan Justizia Administrazioan ari diren langileek, ez eta Nafarroako Administrazio Publikoetako Langileen Estatutuaren aplikazio eremutik baztertutako langileek ere.

Hirugarrena.–Parte hartzeko eskabideak.

3.1. Hautapen prozedura honetan parte hartu nahi dutenek I. eranskinean jasotzen den eskabidea erabili beharko dute eskaera egiteko. Eskabide hori Nafarroako Gobernuko Erregistro Orokorreko edozein bulegotan dago eskuragarri. Interneten bidez ere lortzen ahal da, www.nafarroa.eus helbidean, bai deialdia argitaratzen deneko aldizkari ofizialetik abiatuta, bai deialdiaren estekatik abiatuta.

Parte hartzeko eskabidean, interesdunek adierazi behar dute baldintza guztiak betetzen dituztela eskabideak aurkezteko epea bukatzen den egunean.

3.2. Deialdian parte hartzeko eskabideak Nafarroako Gobernuko Erregistro Orokorrean aurkeztu beharko dira (Karlos III.aren etorbidea 2, atalondoa, 31002 Iruña), edo Nafarroako Gobernuaren beste edozein erregistro bulegotan (zerrenda Nafarroako Gobernuaren web-orrian ageri da: www.nafarroa.eus), edo, bestela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan adierazitako bideren bat erabiliz.

Eskabidea posta bulego batean aurkeztuz gero, gutun-azal ireki batean aurkeztuko da, postako langileek data eta zigilua jar diezazkioten eskabideari, ziurtatu aurretik.

Halaber, ekainaren 23ko 70/2008 Foru Dekretuan xedatutakoarekin bat, eskabidea telematika bidez aurkezten ahalko da, Nafarroako Foru Komunitateko Administrazioaren Erregistro Orokor Elektronikoan. Erregistro hori Nafarroako Gobernuaren web-orrian dago (www.nafarroa.eus). Kasu horretan, parte hartzeko eskabide berariazkoarekin batera aurkeztu beharreko dokumentazioa eransteko, Erregistro Orokor Elektronikoan artxiboak eransteko aurreikusita dauden formatuetatik edozein erabiltzen ahalko da.

3.3. Izangaiek parte hartzeko eskabideaz beste agiririk ez dute aurkeztu behar, izan ere, bigarren oinarriko 2.1.d) eta g) ataletan eskatzen diren baldintzak lanerako deitzen zaien unean frogatu beharko dituzte, agiri bidez, deialdiko hamargarren oinarrian ezarri bezala.

3.4. %33ko desgaitasuna edo handiagoa izanik parte hartzen dutenek horren berri eman beharko dute eskabidean; gainera, hura frogatzen duen dokumentazioa, organo eskudunak emana, erantsi beharko dute. Halaber, beharrezkotzat jotzen dituzten denbora edo baliabide egokitzapenak eskatzen ahalko dituzte. Kasu horretan, eskabidean adierazi egin beharko dute, eta, horrez gainera, aparteko orri batean, zer egokitzapen eskatzen duten zehaztu.

%33ko desgaitasuna edo handiagoa duten izangai horiek Pertsonen Autonomiarako eta Garapenerako Nafarroako Agentziara bideratuko dira, probak egiteko denbora eta baliabide aldetik behar dituzten egokitzapenak zehazteko.

Laugarrena.–Eskabideak aurkezteko epea.

Deialdian parte hartzeko eskabideak aurkezteko epea hamar egun baliodunekoa izanen da, ebazpen hau Nafarroako Aldizkari Ofizialean argitaratu eta biharamunetik hasita.

Bosgarrena.–Izangaien onarpena.

5.1. Behin-behineko zerrendak.

Eskaerak aurkezteko epea bukaturik, Lehendakaritzako, Funtzio Publikoko, Barneko eta Justiziako Departamentuko Funtzio Publikoko Zuzendaritza Nagusiak deialdian onartu eta baztertutako izangaien behin-behineko zerrendak ikusgai jarriko ditu Nafarroako Gobernuaren iragarki-taulan (Iruñeko Karlos III.aren etorbidea 2, atalondoa) eta Nafarroako Gobernuaren Interneteko webgunean (www.nafarroa.eus).

Zerrenda horien kontra interesdunek erreklamazioak aurkezten ahalko dituzte, edo eskabidean egindako akatsak zuzendu, hamar egun balioduneko epean, hura argitaratu eta biharamunetik hasita, idazki bat aurkeztuta Funtzio Publikoko Zuzendaritza Nagusiko Langileen Kudeaketarako Zerbitzuari.

Izangai bazterturik ez bada, onartuen behin betiko zerrendak onetsiko dira zuzenean.

5.2. Behin betiko zerrendak.

Erreklamazioak aurkezteko epea bukaturik eta haien gainean ebatzi ondoren, Funtzio Publikoko zuzendari nagusiak, ebazpen baten bidez, izangai onartu eta baztertuen behin betiko zerrendak onetsiko ditu, eta Nafarroako Gobernuaren iragarki-taulan (Karlos III.aren etorbidea 2, atalondoa, Iruña) eta Nafarroako Gobernuaren web-orrian (www.nafarroa.eus) argitaratuko ditu, adierazita deialdian ezarritako hautapen proba egiteko eguna, ordua eta tokia.

Onartuen zerrendan agertzea ez da aski deialdian eskatutako betebeharrak betetzen direla aitortzeko. Izangaiek aurkeztutako dokumentazioa edo Administrazioak bere esku daukana aztertuta, eskatutako baldintzetako bat betetzen ez dutela ikusiz gero, interesdunek deialdian parte hartzeagatik dituzten eskubide guztiak galduko dituzte.

5.3. Izangai onartu eta baztertuen zerrendak argitaratzearekin ulertuko da interesdunei egin beharreko jakinarazpena egin dela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 45. artikuluan ezarritakoarekin bat.

Seigarrena.–Kalifikazio epaimahaia.

6.1. Kalifikazio epaimahaia honako hauek osatuko dute:

Epaimahaiburua: Francisco Javier Bayona Iturrarte jauna, Nafarroako Suhiltzaileen Zerbitzuko zuzendaria.

Ordezko epaimahaiburua: Mónica Labat Villalba andrea, Nafarroako Suhiltzaileen Zerbitzuko Logistikaren eta Ekipoen Ataleko burua.

Epaimahaikidea: Félix Esparza Fernández jauna, Nafarroako Suhiltzaileen Zerbitzuko Esku-hartze Operatiboaren Ataleko burua.

Ordezko epaimahaikidea: Francisco Echeverría Iriarte jauna, Nafarroako Suhiltzaileen Zerbitzuko suhiltzaile-ofiziala.

Epaimahaikidea: Carlos Orta González Orduña jauna, Nafarroako Suhiltzaileen Zerbitzuko Aurreneurri Ataleko burua.

Ordezko epaimahaikidea: José Javier Boulandier Herrera jauna, Nafarroako Suhiltzaileen Zerbitzuko suhiltzaile-ofiziala.

Epaimahaikidea: Miguel Javier Iturgaiz Guerrero jauna, Langileen Batzordeak izendatutako ordezkaria.

Ordezko epaimahaikidea: Pablo Arrastia Martínez jauna, Langileen Batzordeak izendatutako ordezkaria.

Epaimahaikide-idazkaria: Alfredo Fanlo Nuin jauna, Gorputz Hezkuntzako lizentziaduna, Nafarroako Suhiltzaileen Zerbitzukoa.

Ordezko epaimahaikide-idazkaria: Carlos Adín Sanz jauna, Nafarroako Suhiltzaileen Zerbitzuko Prestakuntza Ataleko burua.

6.2. Sektore Publikoaren Araubide Juridikoari buruzko urriaren 1eko 40/2015 Legean abstentziorako aipatzen diren arrazoietako bat gertatzen denean, epaimahaikideek ezin izanen dute kalifikazio epaimahaian parte hartu, eta Funtzio Publikoko Zuzendaritza Nagusiari jakinarazi beharko diote.

Halaber, zilegi da epaimahaikideak errekusatzea, inguruabar horietako bat gertatzen denean.

6.3. Hautaprobak egiten hasi aurretik eratuko da epaimahaia.

Epaimahaia ezin izanen da eratu, ezta jardun ere, bere kideen gehiengo absolutua bertan ez bada. Halaber, epaimahaiaren eraketak eta jardunak balio izateko, epaimahaiburuak eta idazkariak edo haien ordezkoek bertan egon beharko dute.

6.4. Epaimahaiak gehiengoz ebatziko ditu deialdiko oinarrien interpretazioaren eta aplikazioaren inguruan sortzen diren arazoak.

6.5. Epaimahaiak aholkulari espezialistak hartzen ahalko ditu probetarako, eta horiek beren espezialitate teknikoetan baizik ez dira ariko, eta haietan bakarrik emanen diete laguntza epaimahaikoei.

Zazpigarrena.–Hautapen prozesua.

7.1. Hautapen prozesua honela eginen da:

7.1.1. Proba fisikoak: ariketa hauek gainditu beharko dira:

a) Erresistentzia testa.

b) Pisu-jasotzea.

Proba horiek deialdi honen II. eranskinean ezarritakoari jarraikiz eginen dira.

Ariketen kalifikazioa GAI edo EZ-GAI izanen da. Bi ariketa horietan GAI kalifikazioa lortzen ez duten izangaiak bazterturik geldituko dira.

Epaimahaiak eskatuz gero, izangaiak behartuak daude dopinaren kontrako kontrola egitera, probak egin bitartean edo beste egun batean. Kontrola ariketaren batean lortutako sailkapenari jarraikiz egin daiteke, edo ausaz aukeratzen direnei bakarrik. Horretarako deialdia idatziz eginen da, Kirolean Osasuna Babesteko Espainiako Agentziaren neurrien arabera ezarrita dagoen dopinaren kontrol ofizialetarako inprimakia erabiliz. Jardunbide debekatuak detektatzeko edo egiaztatzeko analisiak behar den organo espezializatuak eginen ditu. Izangaiak kontrol hori egiteari uko eginez gero edo trabak jarriz gero, edo adierazten zaion tokian eta orduan agertzen ez bada behar bezala justifikatu gabe, hautapen prozesutik baztertu eginen da berehalakoan. Baztertzeko arrazoi izanen da, orobat, dopin kontrola legeak aurreikusi bezala egiteko trabak jartzea, kasurik ez egitea, bidegabeki luzatzea eta gordeka ibiltzea, baita, egitez edo omisioz, kontrola egitea eragozten, nahasten, galarazten edo saihesten duten gainerako jokabideak ere, eta, betiere, izangaiak nahita ekiditen duenean, egitez edo omisioz, hartu beharreko laginak biltzea.

Horren ondorioetarako, debekatuta egonen dira Kiroletako Kontseilu Goreneko Lehendakaritzaren 2017ko abenduaren 22ko Ebazpenaren eranskinean heldu diren substantziak, gai farmakologikoak, dopin metodoak eta manipulazioak, ebazpen horren bidez onetsi baitzen “kirolean debekatuta dauden substantzia eta metodoen zerrenda” (2017ko 316. Estatuko Aldizkari Ofizialean, abenduaren 29koan, argitaratua).

Debekatuta dagoen edozein substantzia hautemanez gero, ukitutako izangaia hautapen prozesutik baztertuko da, deusetan galarazi gabe izangaiak kontra-analisia egin diezaiotela eskatzeko duen eskubidea, baita kalifikazio epaimahaiari bidezko alegazioak aurkezteko aukera ere.

7.1.2. Proba teoriko-praktikoa: egun berean egin beharreko bi ariketa izanen ditu.

Probak 100 puntuko kalifikazioa izanen du gehienez, eta bazterturik geldituko dira gehieneko puntuazio horren %30 gutxienez lortzen ez duten izangaiak.

Proba teoriko-praktikoa egiteko ez da inolako testurik erabiltzen ahalko, ezta kalkulagailurik edo bestelako materialik ere, mutur lodiko bolaluma urdina edo beltza izan ezik.

–Ariketa teorikoa: 50 galdera erantzun beharko dira, idatziz, deialdi honen III. eranskinean agertzen den gai zerrendako I. zatian bildutako gaiei buruz. Galdera bakoitzari erantzuteko lau aukera eskainiko dira, baina bakarra izanen da zuzena. Erantzun oker bakoitzak penalizazioa ekarriko du, hain zuzen ere erantzun zuzenaren balioaren herena.

Epaimahaiak finkatuko du ariketa bakoitzaren gehieneko iraupena, hura hasi baino lehen.

Ariketa honek, gehienez ere, 50 puntuko kalifikazioa izanen du.

–Ariketa praktikoa: epaimahaiak deialdi honen III. eranskinean agertzen den gai zerrendako II. zatian bildutako gaiei buruz proposatuko duen esku-hartze kasu praktiko bat ebatzi beharko da, idatziz.

Ariketa honek bi ordu iraunen du gehienez, eta 50 puntuz kalifikatuko da gehienez.

Ariketa hau plika sistemaren bidez eginen da.

7.2. Probarako dei bakarra eginen da. Parte-hartzaileek Nortasun Agiri Nazionala, pasaportea, gidabaimena edo epaimahaiak askiesten duen beste nortasun agiri bat aldean dutela agertu beharko dute proba egitera. Nor diren frogatzen ez dutenak edo agertzen ez direnak baztertu eginen dira.

7.3. Probak egiteko, beharrezkoak diren denbora eta baliabide egokitzapenak jarriko dira, desgaitasun aitorturen bat dutenentzat eta eskabidean eskatu dutenentzat.

Zortzigarrena.–Emaitzak.

8.1. Hautapen probak bukatu ondotik, epaimahaiak Nafarroako Gobernuaren iragarki-taulan eta Nafarroako Gobernuaren web-orrian (www.nafarroa.eus) argitaratuko ditu lortutako puntuazioak, eta bost egun balioduneko epea emanen du emaitzei buruzko alegazioak egiteko.

8.2. Alegazioak aurkezteko epea bukaturik eta haiek ebatzi ondoren, kalifikazio epaimahaiak parte-hartzaileen artean gertatzen diren berdinketak hautsiko ditu, eta, horretarako, deialdiko eskabideak aurkezteko epea bukatzen den egunean izangai bakoitzak duen antzinatasun aitortua hartuko du irizpide.

Berdinketak jarraitzen badu, kalifikazio epaimahaiak eginen duen berariazko zozketa bakar baten bidez erabakiko da. Hala, berdindutako izangai guztien artean bat hautatuko da, ausaz. Berdinketa guztiak hurrenkera alfabetikoari jarraikiz deseginen dira, abiapuntu harturik zozketa horretan hautatzen den izangaiaren abizenak eta izena. Bozketaren emaitzak Nafarroako Gobernuaren web-orrian eta iragarki-taulan jarriko dira jendaurrean.

8.3. Aurkezten diren alegazioak eta berdinketak ebatzirik, epaimahaiak Nafarroako Gobernuaren iragarki-taulan eta web-orrian (www.nafarroa.eus) argitaratuko du prestakuntzarako zerbitzu berezietako egoeran aritzeko hautapen prozesua gainditu duten pertsonen zerrenda, lortutako guztirako puntuazioaren arabera ordenatua.

Bederatzigarrena.–Trebakuntza ikastaroa.

9.1. Hautapen prozesuaren barruan, trebakuntza ikastaro bat dago. Gai kalifikazioa lortu behar da ikastaroa gainditzeko eta, modu horretan, suhiltzaile-sarjentu lanpostuetan aritzeko izangaien zerrendan eskuragarri egoteko. Baztertu eginen dira ez-gai kalifikazioa lortzen dutenak.

9.2. Probak gainditzen dituzten izangaiek borondatez parte hartzen ahalko dute trebakuntza ikastaroan. Nafarroako Segurtasun eta Larrialdi Eskolak eman eta garatuko du ikastaroa, eskolak berak ezartzen duen moduan.

9.3. Zortzigarren oinarrian ezarritako izapideak eginda, kalifikazio epaimahaiak trebakuntza ikastaroa egitera deitutako izangaien zerrenda argitaratuko du, eta hura zein egunetan hasiko den adieraziko.

Trebakuntza ikastarora deitutako pertsonen kopurua ezarriko da Nafarroako Suhiltzaileen Zerbitzuan aurreikusten diren langile beharren arabera. Izangaiei trebakuntza ikastarora joateko deia egiteko orduan, zerrendan guztira lortutako puntuazioari jarraituko zaio.

9.4. Trebakuntza ikastaro hori egitetik salbuetsita daude Nafarroako Segurtasun eta Larrialdi Eskolan ikastaroa egina eta gainditua duten izangaiak. Ondorio horietarako, epaimahaiak proba gainditu duten izangaien zerrenda bidaliko dio Nafarroako Segurtasun eta Larrialdi Eskolari, hark trebakuntza ikastaroa gainditua duten izangaien berri eman dezan.

9.5. Nafarroako Segurtasun eta Larrialdi Eskolak epaimahaiari igorriko dizkio ikastaroaren emaitzak, honek Nafarroako Gobernuaren web-orrian eta iragarki-taulan argitara ditzan.

9.6. Aurrerago, aldian behin, trebakuntza ikastaro berrietarako deia eginen zaie izangaiei, sortzen diren langile beharren arabera. Zerrendan ageri den guztirako puntuazioari jarraituz deituko zaie izangaiei ikastarora. Prestakuntza ikastaroa gainditzen ez duten izangaiak baztertu eginen dira suhiltzaile-sarjentuen lanpostuetan trebakuntzarako zerbitzu berezietan aritzeko izangaien zerrendatik.

Nafarroako Segurtasun eta Larrialdi Eskolak ofizioz igorriko dio Funtzio Publikoko Zuzendaritza Nagusiari gai eta ez-gai kalifikazioa lortu duten izangaien zerrenda, prestakuntzarako zerrendan sartzeko edo bertatik kentzeko.

Hamargarrena.–Suhiltzaile-sarjentuen lanpostuetan prestakuntzarako zerbitzu berezietan aritzeko izangaien zerrenda eta lanerako deia.

10.1. Trebakuntza ikastaroa amaituta, epaimahaiak izangaien zerrendak bidaliko dizkio Funtzio Publikoko zuzendari nagusiari, hark onets ditzan, hautapen prozesuaren espediente osoarekin batera, trebakuntza ikastaroa gainditu duten izangaiak eta hori egitetik salbuetsita daudenak adierazita.

Hautapen prozesuaren espediente osoa jasota, izangaien zerrenda onetsiko da Funtzio Publikoko zuzendari nagusiaren ebazpen baten bidez. Ebazpen hori Nafarroako Gobernuaren iragarki-taulan argitaratuko da (Iruñeko Karlos III.aren etorbidea 2, atalondoa), baita Nafarroako Gobernuaren web-orrian ere (www.nafarroa.eus).

10.2. Lanerako deia.

Lanerako deia eta, hala badagokio, prestakuntzarako zerbitzu berezietako egoeraren deklarazioa honako hauetan ezarritakoaren arabera eginen dira: apirilaren 14ko 96/1997 Foru Dekretua, Lehendakaritza, Justizia eta Barneko kontseilariaren abenduaren 30eko 199/2004 Foru Agindua, prestakuntzarako lanpostuetan aritzeko izangaien zerrendak osatu eta kudeatzeko prozedura ezarri zuena, eta aplikatzekoak diren gainerako arauak.

Ezin izanen zaie inola ere deitu trebakuntza ikastaroa egitera deitu ez zaien izangaien atzetik dauden izangaiei.

10.3. Lanerako deia jasotzen dutenek eskatutako titulazio betebeharrak betetzen dituztela frogatzeko agiriak aurkeztu beharko dituzte; horretarako, Ingeniaritza Teknikoko edo Arkitektura Teknikoko tituluaren edo Ingeniaritzako edo Arkitekturako gradudun-tituluaren fotokopia aurkeztu beharko dute, edo horien baliokidetzat hartzen den beste batena, edo titulua eskuratzeko eskubideak ordaindu izanaren gordekinarena, edo, bestela, eskabideak aurkezteko epea bukatu baino lehen titulua lortzeko moduan egon izanaren ziurtagiria. Deialdi honen bigarren oinarriko 2.2 atalean aipatzen diren pertsonek ez dute titulu hori aurkeztu beharrik izanen.

Lanerako deia jasotzen dutenek, orobat, egiaztatu beharko dute C motako ibilgailuak gidatzeko baimen indarduna dutela.

Izangaiek aurkezten duten dokumentazioak ez du zertan izan jatorrizkoa edo fotokopia konpultsatua; hortaz, dokumentu horien fotokopia arruntak aurkezten ahalko dira.

Hala ere, Administrazioak noiznahi eskatzen ahalko dizkie izangaiei aurkeztutako dokumentazioaren jatorrizkoak edo fotokopia konpultsatuak.

10.4. Prestakuntzarako zerbitzu berezietako egoeran deklaratu baino lehen, osasun azterketa bat eginen zaie hautaturiko izangaiei, Lehendakaritzako, Funtzio Publikoko, Barneko eta Justiziako Departamentuak ezartzen duen moduan, zehazteko ez daudela hautatzen direneko lanpostutik baztertzeko moduko egoeretako bakar batean ere, IV. eranskinean jasotakoaren arabera.

10.5. Eskatutako baldintzak betetzen ez dituzten pertsonak hautapen prozesutik baztertuko dira Funtzio Publikoko zuzendari nagusiaren ebazpen baten bidez, eta deialdi honetan parte hartzeagatik izan ditzaketen eskubide guztiak galduko dituzte.

Hamaikagarrena.–Errekurtsoak.

Kalifikazio epaimahaiak ematen dituen egintzen eta ebazpenen kontra, gora jotzeko errekurtsoa aurkezten ahalko da, Funtzio Publikoko zuzendari nagusiari zuzendua, hilabeteko epean, errekurtsoaren xede den egintza argitaratu edo jakinarazi eta biharamunetik hasita.

Deialdiaren, oinarrien eta haiek aplikatzeko egintzen kontra, kalifikazio epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritzako, Funtzio Publikoko, Barneko eta Justiziako kontseilariari zuzendua, errekurritu nahi den egintza argitaratu edo jakinarazi eta biharamunetik hasita hilabeteko epean.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluei jarraikiz.

Iruñean, 2018ko urriaren 29an.–Funtzio Publikoko zuzendari nagusia, Amaia Goñi Lacabe.

I. ERANSKINA

Prestakuntzarako zerbitzu berezietarako eskabidea (Nafarroako Foru Komunitateko Administrazioko langile finkoak bakarrik) (PDFa).

II. ERANSKINA

Proba fisikoak

Erresistentzia testa (3.000 m).

Azalpena: irteera marraren atzean zutikako jarreran dagoela, eta bi oinak ere marraren atzean dituela, izangaiak, seinale akustikoa entzutearekin batera, 3.000 metro egin beharko ditu ahalik eta denbora gutxienean, lasterka, oinez edo bi modalitate horiek konbinatuz. Ezin da oinetako takodunik erabili. Izangaiek saio bakarra izanen dute proba hau egiteko. Gutxieneko markak lortu ezean, proba hauek baztertzaileak izanen dira.

Denbora taula eta horren araberako puntuazioa:

Pisua jasotzeko proba (bankako press-a, 30 kg).

Azalpena: banku batean etzanda, ahoz gora, izangaiak 30 kiloko pisua jaso behar du 60 segundoan, eta ezarritako gutxieneko jasoaldiak egin. Bi eskuekin goratuko du pisua, barra hartuta sorbalden zabalera baino pixka bat zabalago (barrari esku-ahurraz helduta eta behatzak itxita). Ariketa honela eginen da: hasieran barrak bularra ukitzen du, ukondoak flexionaturik, eta gero ukondoak erabat luzatzen dira bertikalean jarri arte. Izangaiek saio bakarra izanen dute proba hau egiteko. Gutxieneko markak lortu ezean, proba hauek baztertzaileak izanen dira.

Ariketaren hasieran ukondoak flexionatuak egonen dira eta barrak bularra ukituko du. Ukondoak estali gabe, eta ezin da eskularrurik erabili.

Oinak lehenbiziko goratzean nola dauden, horrela mantenduko dira ariketa osoan, aldatu gabe.

Ukondoak erabat luzatu ezean edo ukondoen flexio bakoitzean barrarekin bularra ukitu ezean, jasoaldia baliogabetuko da, eta, beraz, ez da kontatuko.

Izangaiak behar baino lehen bukatzen badu proba, ukondoak bertikalki erabat luzatuz bukatuko du.

Kontrolatzaileak ozenki kontatuko ditu banan-banan jasoaldiak.

Kasu hauetan, ariketa bukatutzat emanen da:

–Izangaiak ukondoak flexionaturik dituela, ariketa gelditzen badu barra bularrean bermatuz.

Egin beharreko jasoaldien taula eta bakoitzagatik emanen den puntuazioa:

III. ERANSKINA

Gai-zerrenda

I. zatia.

1. gaia.–Suaren teoria: ezaugarritzea. Teknikak.

2. gaia.–Hidraulika: ezaugarritzea. Teknikak.

3. gaia.–Barnealdeetako suteak. Suteen aireztatzea: ezaugarritzea. Esku hartzeko teknikak.

4. gaia.–Altuerako erreskatea: ezaugarritzea. Esku hartzeko teknikak.

5. gaia.–Eraikuntzak: ezaugarritzea. Eraikuntza sistemak eta lurrak egonkortzeko teknikak.

6. gaia.–Egitura kolapsatuak: ezaugarritzea. Esku hartzeko teknikak.

7. gaia.–Erremintak eta ekipamendu operatiboak: norbera babesteko ekipamenduak. Norbera babesteko ekipamendua: suhiltzaileen uniformea eta jantziak. Norbera babesteko ekipamendua: arnasbideak. Norbera babesteko ekipamendua altuerako lanetan. Norbera babesteko ekipamendua tentsio elektrikoarekin lan egiteko. Norbera babesteko ekipamendua ura tartean den esku-hartzeetarako.

II. zatia.

8. gaia.–Industrietako suteak.

9. gaia.–Landaredi suteak.

10. gaia.–Trafiko istripuetako erreskatea.

11. gaia.–Salgai arriskutsuekin esku hartzea.

Erreferentzia bibliografikoak:

“Formación libre para Bomberos” esku-liburuak, Guadalajarako CEIS erakundearen web-orrian argitaratuak (http://www.ceisguadalajara.es/category/documentacion)

IV. ERANSKINA

Deialditik baztertzeko arrazoi medikoak

1.–Begien sistema.

–Urrutiko gutxieneko begi-zorroztasuna zuzendu gabe (begien barreneko lenteak ez dira zuzenketa-lentetzat hartuko): gutxienez 5/10 begi okerrean, eta gutxienez 8/10 onenean.

–Ikuspegi binokular normala eduki behar da.

–Diplopiak.

–Nistagmus-a, ondorio funtzionalaren arabera.

–Diskromatopsia larriak.

–Estereopsi falta.

–Erretinopatiak.

–Afakiak eta pseudoafakiak.

–Edozein patologia edo akats palpebral, begia aire zabalean babesturik egotea galarazten duena.

–Begien sistemaren prozesu kronikoak, haren eragin funtzionalaren arabera.

–Begien beste edozein gaitz, modu nabarmenean begien zorroztasuna edo gaitasuna apaltzen duena edo suhiltzaile-sarjentuen funtsezko lanak segurtasunez egitea galarazten duena.

2.–Entzuteko sistema.

–Ez da onartuko audifonorik.

–Hipoakusia, 35 dB-ko edo hortik gorako galera monoaurala ekartzen duena 500, 1000, 2000, 3000 eta 4000 Hz-ko edozein frekuentziatan.

–Bertigoak eta orekari loturiko nahasmenduak, edozein etiologiatakoak.

–Beste edozein prozesu otorrinolaringologiko, modu nabarmenean entzuteko zorroztasuna edo gaitasuna apaltzen duena edo suhiltzaile-sarjentuen funtsezko lanak segurtasunez egitea galarazten duena.

3.–Hizkera.

–Afasiak, disfemiak (toteltasuna), eta suhiltzaile-sarjentuen lanetan ahozko komunikazioa modu nabarmenean galarazten edo oztopatzen duten beste patologia batzuk.

4.–Sistema osteomuskularra.

–Prozesu artikularrak eta/edo kirurgia artikularren sekuelak, dauzkaten ondorio funtzionalen arabera, zeinahi etiologiaren ondorio direla ere.

–20º-tik gorako eskoliosiak eta haurtzaroko kirurgia zuzentzailea izan dutenak.

–45º-tik gorako zifosia.

–Espondilolisia, espondilolistesia, ornoen bategiteak eta ornoarteko diskoaren arazoak.

–Bizkarrezurrean ekintza inbaditzaileen ondorioak: blokeoak/kirurgia, huts egindako bizkarraren sindromea, ondorio funtzionalen arabera.

–Espondiloartropatia inflamatorioak.

–Artritis erreumatoidea.

–Paget-en eritasuna, ondorio funtzionalak dituena.

–Min erregional konplexuaren sindromearen ondorioak.

–Fibromialgia/neke kronikoaren sindromea.

–Galera eta/edo deformazio anatomikoak edo goiko nahiz beheko gorputz adarretako edozein muga, ondorio funtzionalen arabera.

–Goiko nahiz beheko gorputz adarretako herniak, ondorio funtzionalen arabera.

–Lokadura errekurrenteak sorbaldan edo belaunean, desoreka kronikoa ekartzen dutenean.

5.–Digestio sistema.

–Hesteetako gaixotasun inflamatorio kronikoak: Crohn-en eritasuna, kolitis ultzeraduna, etab.

–B eta C hepatitisa aktiboa izatea edo birusaren eramailea izatea.

–Gutxiegitasun hepatikoa.

–Zirrosiak eta zirrosi aurreko egoerak.

–Pankreatitis kronikoa.

–Pankreako fibrosi kistikoa.

–Wilson-en gaixotasuna.

–Hepatopatia alkoholikoak, maila desberdinetan.

–Ondorio entzimatiko nabarmenak dituzten beste hepatopatia batzuk eta hipertransaminasemia idiopatikoak, balio arrunta halako hiru edo gehiago dutenak.

–Sindrome diarreiko kronikoak.

–Hesteetako buxadura.

–Zöllinger Ellison-en sindromea edo digestioaren lesio neuroendokrinoak.

–Esplenektomia.

–Abdomen paretako herniak, ondorio funtzionalen arabera.

–Erresekzioak eta digestio hodiko beste kirurgia batzuk, ondorio funtzionalen arabera.

–Errefluxu gastroesofagiko sintomatikoa (asma, arnas infekzioen errekurrentzia, min kronikoa eta ultzera kronikoak).

6.–Kardiologia.

–Edozein mailatako bihotz gutxiegitasuna.

–Arritmiak eta blokeoak: aurre-eszitazioaren egoerak eta erritmo edo kondukzio kardiakoaren edozein nahasmendu, honako hauek salbu: arritmia sinusala, lehen mailako aurikula-bentrikuloaren blokeoa, eskuineko adarreko blokeo osoa eta ezkerreko adarreko hemiblokeoak.

–Kardiopatia iskemikoa, maila guztietan.

–Balbulopatiak, protesi balbularrak barne.

–Estenosi subaortiko hipertrofiko idiopatikoa.

–Miokardiopatiak.

–Sinkope errepikaria, etiologia edozein delarik ere.

–Perikarditis kronikoak, endokarditisa eta miokarditisa.

–Biriketako hipertentsio primarioa eta sekundarioa.

–Desfibrilatzailea edo taupada-markagailua izatea txertaturik.

–Sortzetiko kardiopatiak, ondorio funtzionalen arabera.

7.–Sistema baskularra.

–Arterietako iskemia kronikoaren sindromea.

–Aneurisma aortikoak, toraziko abdominalak eta/edo beste odol-hodi handi batzuetakoak.

–Estenosi karotidea, %50ekoa edo handiagoa.

–Raynaud fenomenoa, lehen eta/edo bigarren mailakoa.

–Zainetako gutxiegitasuna, ondorio funtzionalen arabera.

–Linfedema kronikoa, lehen mailakoa eta/edo bigarren mailakoa.

–Arterietako hipertentsioa.

–Arterietako hipotentsioa.

–Operatutako patologia baskularra, ondorio funtzionalen arabera.

–Aortako eta odol-hodi handietako lesioak, sortzetikoak izan edo bereganatuak.

8.–Arnas sistema.

–Arnas aparatuaren afekzio kronikoak: BGBK (buxadurazko bronkitis kronikoa, enfisema); asma eta/edo bronkioetako hiperrerreaktibotasuna; bronkiektasia; edo FEV1/FVC < %0.75 eta/edo FVC < %0.80 gisako arnas patroia.

–Hipoxemia – O2ren saturazio basala < %90.

–Pleurako isuri errepikaria.

–Pneumotorax berezkoa eta/edo errepikaria.

–Arnas sistemako kirurgiaren ondorioak, ondorio funtzionalen arabera.

–Diafragmaren anomaliak eta/edo horma torazikoaren deformazioak, ondorio funtzionalen arabera.

–Eritasun interstizialak eta/edo biriketako fibrosia.

–Loaren apnearen sindromea eta/edo hipobentilazio zentrala.

–Biriketako tronboenblismoa eta biriketako malformazio baskularrak.

9.–Nerbio-sistema.

–Epilepsia.

–Esklerosi anizkoitza eta bestelako eritasun desmielinizanteak.

–Neurona motorraren eritasunak.

–Ataxiak.

–Buruko eta integrazioko funtzioen nahasmenduak (arrazoitze abstraktoa, oroimena, adimena eta funtzio betearazleak).

–Parkinson-en eritasuna eta bestelako nahasmendu estrapiramidalak.

–Odol-hodien afekzio iskemikoak, hemorragikoak edo malformazioren baten ondoriozkoak.

–Miastenia larria eta juntura neuromuskularraren bestelako arazoak.

–Siringomielia, sintomatologia badu edo eginkizunetan eragina badu.

–Hidrozefalia.

–Muskulu-distrofiak eta bestelako miopatiak.

–Nerbio-sistema zentralaren lesioaren ondoriozko paralisia.

–Nerbio-sistema periferikoaren gaixotasunak, ondorio funtzionalen arabera.

–Anosmia.

–Loaren nahasmenduak, jatorria arnas aparatuan ez dutenak, ondorio funtzionalen arabera.

10.–Psikiatria.

–Nahasmendu mental organikoak, alde batera utzita prozesu automugatuak eta itzulgarriak edo arintze egoeran daudenak.

–Substantzia psikotropikoen eta alkoholaren kontsumoaren ondoriozko nahasmendu mentalak eta portaeraren nahasmenduak.

–Substantzia psikotropikoen kontsumoa atzemateko probetan, edozein emaitza positibok bazterketa ekarriko du.

–Eskizofrenia, nahasmendu eskizotipikoa eta ideien delirio-nahasmendua.

–Aldartearen nahasmenduak (afektiboak), ondorio funtzionalen arabera.

–Hersturaren nahasmenduak, ondorio funtzionalen arabera.

–Nahasmendu neurotikoak.

–Ohituren nahasmendua eta bulkadak kontrolatzekoa, ondorio funtzionalen arabera.

–Nortasunaren nahasmendua eta portaerarena, ondorio funtzionalen arabera.

11.–Sistema genitourinarioa.

–Giltzurruneko gutxiegitasuna.

–Giltzurrun-polikistosia.

–Edometriosia, ondorio funtzionalen arabera.

12.–Sistema endokrinologikoa.

–Mellitus diabetesa.

–Hipotalamo-hipofisario ardatzaren nahasmenduak, hiper edo hipotiroidismoa, gaixotasun adrenalak, adenomatosi endokrino anizkoitza, hiper eta hipoparatiroidismoa, betiere ondorio funtzionalen arabera.

–Kontrolatu gabeko nahasmendu metabolikoak, ondorio funtzionalen arabera.

13.–Dermatologia.

–Orbainak, mentaketak eta beste gaitz dermatologiko batzuk, haien zabalera, ondorio funtzionalak eta/edo kokapena direla-eta suhiltzaile-sarjentuen lanpostuari dagozkion lanak egitea edo norbera babesteko ekipamendua erabiltzea oztopatzen dutenean.

14.–Hematologia.

–Muineko aplasia idiopatikoa eta gaueko hemoglobinuria paroxistikoa.

–Anemia hemolitiko kronikoak.

–Drepanozitosia (zelula faltziformeen anemia).

–Hemoglobina < 10g/dL duten anemiak.

–Tronbopeniak, ondorio funtzionalen arabera (ez dira inola ere onartuko 100.000 plaketatik beherako zenbatekoak).

–Hemofiliak eta koagulazioaren beste nahasmendu batzuk.

–Immunoeskasiak.

–Koagulazioaren kontrako tratamendua.

15.–Neoplasiak.

–Tumoreak eta gaixotasun gaiztoak, diagnosi berrikoak edo egun tratatzen ari direnak.

–Gaixotasun neoplasikoen aurrekariak ebaluatzeko, egungo egoera fisikoari, patologiaren pronostikoari eta ondorio funtzionalei erreparatuko zaie.

16.–Gaixotasun sistemikoak eta beste batzuk.

–GIB birusaren antigorputzen eramailea.

–Kolagenoaren gaixotasunak.

–Amiloidosiak, kolagenosiak, lupus eritematoso sistemikoa, Sjögren sindromea, esklerodermia, baskulitisa eta beste batzuk.

17.–Azalpen orokorrak.

–Tumore onberak, edonon daudela ere, ondorio funtzionalen arabera.

–Edozein organoren transplantea.

–Obesitatea (GMI > 30 eta abdomenaren perimetroa 102 cm-tik gora gizonen artean eta 88 cm-tik gora emakumeen artean).

–Muturreko mehetasuna (GMI < 20).

–Edozein patologia eta/edo deformazio, suhiltzaile-sarjentu lanpostuari dagokion norbera babesteko ekipamendua edo ohiko ekipamendua behar bezala erabiltzea galarazten duena.

–Beste edozein patologia, ondorio edo ezaugarri somatiko, edozein aparatutan edo sistematan, ondorio funtzionalak direla-eta galarazten edo modu nabarmenean oztopatzen badu suhiltzaile-sarjentu lanpostuaren eginkizunak egitea, edo horretan arituta larriagotzen ahal bada.

–Edonola ere, osasun azterketan, ez da eduki behar gidabaimena ukatzeko arrazoia izan daitekeen gaixotasunik edo urritasunik (2. taldea), Gidarien Erregelamendu Orokorraren IV. eranskinak (Beharrezko gaitasun psikofisikoak gidabaimena eskuratzeko edo haren indarraldia luzatzeko) egun duen idazketaren arabera.

–Sendagaiak eta beste substantzia batzuk kontsumitzea, ibilgailuak gidatzeko edo makina edo lanabes arriskutsuak erabiltzeko gomendagarriak ez direnean edo suhiltzaile-sarjentu lanpostuaren eginkizunak betetzeko gaitasuna modu nabarmenean nahasten dutenean.

Iragarkiaren kodea: F1813894