1. NAFARROAKO FORU KOMUNITATEA
1.7. BESTELAKOAK
1406/2018 EBAZPENA, 2018ko uztailaren 5ekoa, Nafarroako Unibertsitate Publikoko errektoreak emana, zeinaren bidez agintzen baita argitaratzeko “Erabakia, Nafarroako Unibertsitate Publikoko Administrazio eta Zerbitzuetako langileen plantilla organikoa aldatzen duena”, Gobernu Kontseiluak 2018ko uztailaren 5ean hartu zuen erabaki baten bidez onetsia.
2003ko maiatzaren 12ko 110/2003 Foru Dekretuak onetsitako Unibertsitateko Estatutuetako 40. artikuluak ematen dizkidan ahalmenak erabiliz, 2018ko uztailaren 5ean Gobernu Kontseiluak hartu zuen erabakia, zeinaren bidez onetsi baitzen Erabakia, Nafarroako Unibertsitate Publikoko Administrazio eta Zerbitzuetako langileen plantilla organikoa aldatzen duena.
“NAFARROAKO UNIBERTSITATE PUBLIKOKO GOBERNU KONTSEILUAREN ERABAKIA, ZEINAREN BIDEZ NAFARROAKO UNIBERTSITATE PUBLIKOKO ADMINISTRAZIO
ETA ZERBITZUETAKO LANGILEEN PLANTILLA ORGANIKOA
ALDATZEN BAITA
1993ko abuztuaren 30eko 251/1993 Foru Dekretu Legegileak, zeinaren bidez onesten baita Nafarroako Administrazio Publikoen Zerbitzuko Langileen Estatutuaren Testu Bategina, aplikatu beharrekoa Nafarroako Unibertsitate Publikoko Administrazio eta Zerbitzuetako Langileei, Unibertsitatearen Estatutuen 106. artikuluaren arabera, ezartzen du plantilla organikoa onetsi egin behar dela. Plantilla horretan, lanpostuak zerrendatu behar dira, behar bezala sailkaturik, eta adierazi behar da bakoitza zein mailari dagoen atxikia, eta, hala dagokionean, lanpostuan aritzeko egiaztatu behar diren betebehar espezifikoak ere bai, bai eta izendapen librearen bidez bete daitezkeen lanpostuak eta erregelamenduaren arabera ezarri diren ordainsari osagarriak esleituak dauzkatenak ere.
Gobernu Kontseiluak 2009ko urriaren 6an hartu zuen erabaki baten bidez, zeina 2009ko urriaren 30ean errektoreak eman zuen 1600/2009 Ebazpenaren bidez argitaratu baitzen, onetsi egin zen Nafarroako Unibertsitate Publikoko Administrazio eta Zerbitzuetako Langileen plantilla organikoa. Plantilla hori hurrenez hurren aldatzen da, urtero argitaratzen da, eta urte bakoitzeko abenduaren 31n dagoen egoera eta egitura organikoa islatzen du. Hain zuzen, 2018ko otsailaren 19an argitaratu zen azkenekoa, errektoreak 2018ko urtarrilaren 30ean eman zuen 152/2018 Ebazpenaren bidez.
Zerbitzu eta unitate organiko batzuek hala eskatu baitute, beharrezkoa da plantilla organikoan zenbait aldaketa egitea, zerbitzu eta unitate horien benetako beharretara egokitzeko.
Proposamena Negoziazio Mahaian aurkeztu, eta Nafarroako Unibertsitate Publikoan ordezkaritza duten sindikatuei entzun ondoren, hau da 2018ko uztailaren 5ean egin zuen bileran, Gobernu Kontseiluari kudeatzaileak hartzeko proposatu dion
ERABAKIA:
Lehena.–Nafarroako Unibertsitate Publikoko Administrazio eta Zerbitzuetako Langileen plantilla organikoan egiteko aldaketak onestea. Eranskin gisa gehitu den txostenean daude aldaketa horiek.
Bigarrena.–Erabaki hau Nafarroako Aldizkari Ofizialean argitaratzea.
Hirugarrena.–Erabaki honek Nafarroako Aldizkari Ofizialean argitaratu eta biharamunean hartuko du indarra.
Laugarrena.–Erabaki honen aurka, zilegi da aukerako berraztertzeko errekurtsoa Gobernu Kontseiluaren aurrean, hilabeteko epean, edo administrazioarekiko auzi-errekurtsoa Nafarroako lerrun bereko Epaitegietan, bi hilabeteko epean, biak ere argitaratu eta biharamunetik kontatzen hasita”.
Iruñean, 2018ko uztailaren 5ean.–Errektorea, Alfonso Carlosena.
ERANSKINA
Oroitidazkia: Nafarroako Unibertsitate Publikoko administrazioko
eta zerbitzuetako langileen plantilla organikoaren aldaketak.
2018.urteko ekitaldia
A.–Sortzen diren lanpostuak.
Lanpostu hauek sortu dira:
IDAZKARITZA NAGUSIA /-/ IDAZKARITZA TEKNIKOA
–Teknikaria O.L. (Adar Juridikoa).
• Maila: A.
• Lanpostuaren zk.: 654.
• Lanaldi mota: goizez.
• Hiria: Iruñea.
• Titulazioa: Zuzenbideko lizentzia edo gradua.
• Zergatikoa: Europako Parlamentuaren eta Kontseiluaren 2016ko apirilaren 27ko 2016/679 Erregelamendua aplikatzeko -haren bidez pertsonen babesa arautu zen, datu pertsonalen tratamendua eta haien zirkulazio librea direla-eta-, Datuen Babeserako Delegatuaren figura nola izendatu finkatu behar da, eta, kargu horretarako behar den espezifikotasun juridiko eta teknikoa aintzat hartuta, gaur egun plantilla organikoko Idazkaritza Nagusi edo Idazkaritza Teknikoan 41. zenbakia duen lanpostu hutsa betetzen ari den pertsona izendatzeko asmoa dago, hau da, teknikaria OL (Adar Juridikoa). Aipatutako esparru materialerako eginkizun esklusibo hau esleitzeak, hots, datu pertsonalen tratamendua eta haien bermea esleitzeak, berekin dakar, ezinbestean, plantilla organikoan aldaketa bat egitea, lanpostua izendapen zehatz honekin definitzeko: Datuen Babeserako delegatua.
Azaldutako egoerak zuzeneko ondorioa du Unibertsitateko Idazkaritza Teknikoaren funtzionamendu arruntean. Gogoratu beharra dago Idazkaritza Teknikoak Unibertsitatearen hitzarmenak kudeatzeko eginkizuna duela, eta baitezpadakoa dela profil tekniko juridikoa ematea, ziurtatu behar baita egokia dela unibertsitatearen ohiko jardueran halako garrantzia duten itun juridikoetarako, gorantz baitoaz azken urteotan. Laguntza teknikoaren eginkizuna ere gehitu behar zaio, Idazkaritza Teknikoak laguntza hori ematen baitio Unibertsitateko Idazkaritza Nagusiari. Izan ere, Gobernu Kontseiluaren eta pertsona bakarreko gobernu-organoen ekintza eta xedapenen kalitate teknikoa bermatu nahi da (Gobernu Kontseiluaren erabaki eta xedapenena), baita haiek gauzatu aurreko kontrolarena ere.
Idazkaritza Teknikoak garatzen dituen eginkizunak bideragarriak izan daitezen, ezinbestekoa da beste lanpostu bat sortzea -teknikaria OL (Adar juridikoa)-, idazkaritzari berari atxikia, zerbitzua ematen jarraitu ahal izatearren eraginkortasunaren ohiko parametroetan.
KUDEATZAILETZA / ANTOLAKETAREN, KALITATEAREN ETA PROZESUEN ZERBITZUA / KUDEAKETA HOBETZEKO ATALA / IKASTEGIAK ETA SAILAK KOORDINATZEKO UNITATEA / ADMINISTRAZIO LAGUNTZAKO 4. UNITATEA.
–Administrari laguntzailea.
• Maila: D.
• Lanpostuaren zk.: 655.
• Lanaldi mota: zatitua, ikastegi eta sailetarako.
• Herria: Iruñea.
• Hizkuntza: euskara C1.
• Zergatikoa: Gizarte Laneko praktikak, orain arte “Unibertsitatea eta Gizartea” Fundazioan kudeatzen zirenak, Giza eta Gizarte Zientzien Fakultatean kudeatuko dira hemendik aurrera.
Iragarkiaren kodea: F1808858
