2. NAFARROAKO TOKI ADMINISTRAZIOA
2.1. OPOSIZIOAK ETA LEHIAKETAK. LAN PUBLIKOAREN ESKAINTZA
TUTERA
Deialdia, hezitzaile espezializatu izateko hiru lanpostu barne igoera murriztuan eta oposizio bidez betetzeko
(B maila/taldearekin parekatuan)
Alkatetzaren otsailaren 27ko 328/2017 Ebazpenaren bidez onetsi zen Tuterako Udalaren zerbitzuan hezitzaile espezializatu izateko hiru lanpostu barne igoera murriztuan eta oposizio bidez betetzeko deialdia (B maila/taldearekin parekatuan).
Oposizioa eginen da aplikatu beharreko araudian xedatuari eta honako oinarri hauetan ezartzen denari jarraikiz:
OINARRIAK
1.–Arau orokorrak.
1.1. Deialdi honen xedea da hezitzaile espezializatu izateko hiru lanpostu barne igoera murriztuan eta oposizio bidez betetzea (B maila/taldearekin parekatuan), Nafarroako Administrazio Publikoen Zerbitzuko Langileriaren Estatutuaren 15.6 artikuluan ezarritako prozeduraren bidez, eta Tuterako Udaleko eta haren erakunde autonomoetako funtzionarioen eta lan-kontratudun finko nahiz aldi baterakoen lan-baldintzen gainean indarra duen akordioaren 32. artikuluari jarraikiz.
1.2. 2009ko plantilla organikoan, Osoko Bilkuraren uztailaren 3ko erabakiaren bidez onetsi baitzen, NAPIk Tuterako Udaleko lanpostuen balorazioari buruz egin azterlana aplikatzearen ondoriozko doikuntza batzuk egin ziren; hala, hezitzaile espezializatuaren lanpostuak B mailan geratu ziren, C mailan ordez, goragoko kategoriarekin parekatzeko osagarria aplikatuta, harik eta beharrezko erregulazioak egin arte. Hezitzaile espezializatuaren 3 lanpostu horiek (B maila) (plantillako kodeak: 0514C03601-02-03) dira deialdi honen xedea.
1.3. Hautaprobak gainditu ondoan aipatu lanpostuan aritzeko izendatzen den izangaia B mailan/taldean geratuko da eta plantilla organikoan maila edo talde horretarako ezarritako ordainsariak jasoko ditu.
1.4. Oposizioaldia gainditu duen izangaiak lortuko du barne igoera.
1.5. Igoera izan duen lagunak jatorrizko zerbitzuari edo arloari atxikirik jarraituko du; deialdiko maila eta kategoriari, eta eskatutako ikasketei egokitutako lan eta eginkizunetan ariko da eta, maila berriari dagozkion eginkizunez gain, ordura arte egiten zituenak ere beteko ditu.
1.6. Maila igotzeko proba hauetan parte hartzeak ez du deusetan aldatuko langileak izendapenaren aitzinetik zuen araubide juridikoa, izan hori funtzionarioena edo lan-kontratudunena. Eskubide pasiboen eta osasun laguntzaren araubide berari ere kontuko dio.
2.–Izangaiek bete beharreko baldintzak.
Oposizio honetan onartuak izateko, izangaiek, eskaerak aurkezteko epea amaitzen den egunean, baldintza hauek bete beharko dituzte:
a) Tuterako Udalaren zerbitzuko funtzionarioa edo lan-kontratudun finkoa izatea, C maila edo taldekoa.
b) Hezitzaile espezializatu izateko lanpostu bat edo lanpostu parekatu bat (C maila) betetzeko izendatua edo kontratatua izatea.
c) Abiapuntuko lanpostuan borondatezko edo nahitaezko eszedentzian ez egotea.
d) Nafarroako Administrazio Publikoetan bortz urteko antzinatasun onartua duela frogatzea.
e) Gizarte Hezkuntzako diplomadun edo gradudun titulua edo horien baliokidea edukitzea, edo titulu hori eskuratzeko eskubideak ordaindu izanaren gordekina, edo, bestela, dagokion gaikuntza lortu izana, apirilaren 30eko 4/2009 Legearen hirugarren xedapen iragankorreko 1. puntuan ezarri bezala, haren bidez eratu baitzen Nafarroako Gizarte Hezitzaileen Elkargo Ofiziala.
Eskabideak aurkeztean egiaztatu beharko da 2.e) oinarrian aipatu titulazio-baldintza betetzen dela.
3.–Eskabideak.
3.1. Deialdian parte hartzeko eskabideak II. eranskineko ereduaren araberakoak izanen dira, eta Herritarrendako Laguntza Zerbitzuan (HLZ) erregistratu beharko dira (Plaza Vieja, 1), edo Escós Catalán kaleko 1. zenbakiko bulegoetan, edo bestela, Administrazio Publikoen Administrazio Prozedura Erkideari buruzko urriaren 1eko 39/2015 Legearen 16.4 artikuluan aurreikusitako bideetako edozein erabiliz, deialdia Nafarroako Aldizkari Ofizialean argitaratu eta biharamunetik hogeita hamar egun naturaleko epean; hartan, izangaiek adierazi beharko dute baldintza guztiak betetzen dituztela eskabideak aurkezteko epea amaitu baino lehen.
Eskabidea posta bulego batean aurkeztuz gero, gutun-azal irekian aurkeztuko da, postako langileek, ziurtatu aurretik, data eta zigilua jar ditzaten.
3.2. Eskabideari deialdian eskatzen den titulazioaren egiaztagiria gehituko zaio.
3.3. Eskabideak aurkezteko epea ezin izanen da luzatu.
4.–Izangaien onarpena eta erreklamazioak.
4.1. Eskabideak aurkezteko epea bukatutakoan, alkate udalburuak ebazpena emanen du onartu eta baztertuen behin-behineko zerrenda onesteko, eta Nafarroako Aldizkari Ofizialean, eta Tuterako Udalaren iragarki oholean eta web-orrian argitaratzeko aginduko.
4.2. Izangai baztertuek 10 egun balioduneko epea izanen dute, behin-behineko zerrenda Nafarroako Aldizkari Ofizialean argitaratzen denetik, erreklamazioak aurkezteko eta, akatsik egin badute, zuzentzeko.
4.3. Erreklamazioetarako epea amaitu eta aurkeztutakoak ebatzita, alkate udalburuak ebazpena emanen du onartuen eta baztertuen behin betiko zerrenda onesteko, eta zerrenda hori Nafarroako Aldizkari Ofizialean, eta Udalaren iragarki oholean eta web-orrian argitaratzeko aginduko du.
Ebazpen horretan probak non, zein egunetan eta zer ordutan hasiko diren adieraziko da.
Izangai bazterturik ez bada, onartuen zerrenda zuzenean onetsiko da behin betiko zerrenda gisa.
5.–Epaimahaia.
5.1. Epaimahaia honako kide hauek osatuko dute:
–Epaimahaiburua: Marisa Marqués Rodríguez, Tuterako Udaleko Gizarte Zerbitzuen zinegotzia.
–Ordezkoa: Silvia Cepas Medina, Tuterako Udaleko Hezkuntza, Gazteria eta Gizarte Etxeen zinegotzia.
–Mahaikidea: Silvia Enrique Modrego, Castejongo Udaleko gizarte-hezitzailea.
–Ordezkoa: Purificación Zabalza López, Corellako Udaleko gizarte-hezitzailea.
–Mahaikidea: Sara Apastegui Herrero, Buñuel aldeko Gizarte Zerbitzu Oinarrizkoen Mankomunitateko gizarte-hezitzailea.
–Ordezkoa: Berta Molina Salvatierra, Arguedasko, Valtierrako, Villafrancako, Milagroko eta Cadreitako Gizarte Zerbitzuen Mankomunitateko gizarte-hezitzailea.
–Mahaikidea: Mikel Ciordia Osta (langileen ordezkaria, Tuterako Udaleko Langileen Batzordeak proposatuta izendatua).
–Ordezkoa: langileen ordezkari bat, Tuterako Udaleko Langileen Batzordeak proposatuta izendatua.
–Idazkaria: Ana Cristina Martínez Cisneros (Langileen Erdi Mailako teknikaria).
–Ordezkoa: Miriam Mendoza (Tuterako Udaleko Giza Baliabideetako goi mailako teknikaria).
5.2. Epaimahaiko kideek ez dute parte hartuko, eta organo dei egileari horren berri emanen diote, baldin eta Sektore Publikoaren Araubide Juridikoari buruzko urriaren 1eko 40/2015 Legearen 23. artikuluan parte ez hartzeko aipatzen diren egoeratakoren batean badaude.
Izangaiek, halaber, zilegi dute mahaikideak errefusatzea, aipatu diren egoera horietakoren bat gertatzen denean (urriaren 1eko 40/2015 Legearen 24. artikulua).
5.3. Hautaprobak egiten hasi aurretik eratuko da epaimahaia.
5.4. Epaimahaia ezin izanen da eratu, ezta jardun ere, kideen gehiengo osoa gutxienez bildu gabe.
5.5. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaz sortzen diren afera guztiak.
5.6. Epaimahaiak aholkulari adituen laguntza izan dezake proba batzuetan nahiz guztietan. Aholkulari horiek beren espezialitate teknikoetan aritzera mugatuko dira eta haiei buruz soilik emanen diete laguntza epaimahaikoei.
6.–Oposizioa nola eginen den.
6.1. Lehen ariketan, kasu teoriko-praktiko bat edo gehiago ebatzi beharko dira, deialdiaren xede den lanposturako espezifikoak, eta horren eginkizunen, egitekoen eta eginbeharren gainekoak, deialdiaren III. eranskineko gai zerrendan oinarrituak. Ariketan gehienez ere 80 puntu lortzen ahalko dira, eta baztertuta geratuko dira gutxienez 40 puntu eskuratzen ez dituzten oposiziogileak.
6.2. Bigarren ariketa: Profilari egokitzeko proba psikoteknikoak.
proba psikoteknikoak eginen dira, izangaiak deialdiko lanpostuaren soslai profesiografikoaren eskakizunei noraino egokitzen zaizkien neurtu beharrez. Proba hori Nafarroako Administrazio Publikoaren Institutuko Psikologia Zerbitzuaren laguntzaz eginen da.
6.3. Oposizioko ariketen balorazioan 100 puntu eman daitezke gehienez ere, honela banatuak:
Lehenbiziko ariketa: Gehienez ere 80 puntu.
Bigarren ariketa: Gehienez ere 20 puntu.
6.4. Oposizioko ariketak baztergarriak izanen dira. Bazterturik geldituko dira horietako ariketaren batean gutxienez gehieneko puntuazioaren erdia lortzen ez duten izangaiak.
6.5. Hautaketa-prozesua amaituta, epaimahaiak argitara emanen ditu izangaien zerrenda eta bakoitzak lortutako kalifikazioak, ariketa egin den tokian, eta Tuterako Udalaren iragarki oholean eta web-orrian.
6.6. Deialdi bakarra eginen da probetarako, eta haietara izangaiek Nortasun Agiri Nazionala edo horren legezko baliokidea daramatela agertu beharko dute. Agertzen ez diren izangaiak bazterturik geldituko dira.
7.–Gainditu dutenen zerrenda.
7.1. Ariketaren kalifikazioa burututa, epaimahaiak jendaurrean paratuko du, ariketa egin den tokian, eta Tuterako Udalaren iragarki oholean eta web-orrian gainditu dutenen zerrenda, lortu duten puntuazioaren araberakoa.
7.2. Epaimahaiak organo eskudunari igorriko dio gainditu duten eta deialdiko lanpostuetan sartzen diren izangaien aldeko izendapen proposamena, deialdi honen 6. oinarrian ezarritakoaren arabera.
8.–Izendapena eta jabetza hartzea.
8.1. Aurreko oinarrian aipatzen den hautatze prozedura burutu ondoan, alkateak ebazpena emanen du oposizioaldia gainditzen duten izangaiak izendatzeko, eta zer mailatan sartzen diren zehaztuko du bertan. Izendapena Nafarroako Aldizkari Ofizialean argitaratuko da.
8.2. Izangai izendatuak, izendapena jakinarazi eta ondoko hilabeteko epean lanpostuaren jabetza hartu beharko du edo lan kontratuaren eranskina formalizatu. Norbait jabetzen ez bada, ezinbertzeko kasuetan izan ezik, maila berria lortzeko eskubide guztiak galduko ditu.
9.–Errekurtsoak.
Deialdi honen aurka, nahiz bere oinarrien eta aplikazio egintzen aurka, errekurtso hauetakoren bat aurkez daiteke, hautara:
A) Berraztertzeko errekurtsoa, egintza gauzatu duen organoari berari zuzendua, hilabeteko epean, hura jakinarazi edo argitaratu eta biharamunetik hasita.
B) Administrazioarekiko auzi-errekurtsoa, Administrazioarekiko Auzien Iruñeko Epaitegiari zuzendua, bi hilabeteko epean, errekurritutako egintza edo erabakia jakinarazi edo argitaratu eta biharamunetik hasita.
C) Gora jotzeko errekurtsoa, Nafarroako Administrazio Auzitegiari zuzendua, hilabeteko epean, errekurritutako egintza edo erabakia argitaratu edo jakinarazten denetik hasita.
Epaimahaiaren egintzen aurka, gora jotzeko errekurtsoa aurkez daiteke, deialdia egin duen udal organoari zuzendua, hilabeteko epean, errekurritutako egintza edo erabakia jakinarazten denetik hasita.
Oharra: deialdi honetan eta haren eranskinetan egiten diren aipamenetan, genero maskulinoaren forma erabiltzen denean, gizonezkoei eta emakumezkoei aplikatu behar zaizkiela ulertu behar da.
Tuteran, 2017ko otsailaren 24an.–Alkate udalburua, sinadura ulertezina.
II. ERANSKINA
Eskabide eredua (PDFa).
III. ERANSKINA
1. gaia.–Gizarte Zerbitzuei buruzko abenduaren 14ko 15/2006 Foru Legea.
2. gaia.–69/2008 Foru Dekretua, ekainaren 17koa, Gizarte Zerbitzu Orokorren Zorroa onesten duena: Definizioak. Prestazio bermatuak eta bermatu gabeak oinarrizko osasun laguntzan, mendetasunaren, adinekoen, desgaitasunaren, gaixotasun mentalaren, bazterketa sozialaren, adingabeen eta genero indarkeriaren arretan.
3. gaia.–39/2006 Legea, abenduaren 14koa. Autonomia pertsonala sustatzeari eta mendetasun-egoeran dauden pertsonak zaintzeari buruzko Legea: Atariko titulua: xedapen orokorrak; I. titulua: Autonomiarako eta mendetasun-egoeran daudenei kasu egiteko sistema.
4. gaia.–15/2005 Foru Legea, abenduaren 5ekoa, Haurrentzako eta Nerabeentzako Sustapenari, Laguntzari eta Babesari buruzkoa; 7/2009 Foru Dekretua, 15/2005 Foru Legearen zati batean garatzen duen erregelamendua onesten duena. Martxoaren 20ko 13/2013 Foru Legeak sartutako aldaketak.
5. gaia.–14/2015 Foru Legea, apirilaren 10ekoa, Emakumeen kontrako Indarkeriari aurreko egitekoa. IV., V., VI., VII. eta VIII. tituluak.
6. gaia.–Gizarte-hezitzailearen kode deontologikoa.
7. gaia.–Gizarte hezitzailearen eginkizunen eta eskumenen katalogoa.
8. gaia.–Talde lana. Gizarte-hezitzailea talde multiprofesionalaren barrenean. Diziplinartekotasuna heziketa lanaren esparru gisa.
9. gaia.–Gizarte eta hezkuntza arloko esku-hartzea. Definizioak eta kontzeptuak. Gizarteko eta hezkuntzako esku-hartzearen eremuak. Esku-hartzearen estrategiak eta teknikak. Talde dinamika.
10. gaia.–Esku hartzeko programak diseinatu eta ebaluatzea. Programak prestatzea eta beharren azterketa. Faseak: diagnostikoa, plangintza, aplikazioa-gauzatzea, ebaluazioa.
11. gaia.–Nafarroako Gizarte Zerbitzuen Plan Estrategikoa: ikuspegia, egitekoa, printzipioak, xedeak, ildo orokorrak, ildo estrategikoak. Ebaluatzeko adierazleak.
12. gaia.–Prebentzioa: kontzeptua eta motak.
13. gaia.–Elkarrizketa hezkuntzako eta laguntzako harremanetan: ikaskuntza errazteko jarraibideak, irizpideak eta baldintzak.
14. gaia.–11/2005 Foru Legea, azaroaren 9koa, Diru-laguntzei buruzkoa. Atariko titulua: II. kapitulua: Diru-laguntza publiko guztiendako xedapenak.
Eranskin honetan aipatutako legedia kontuan hartuko da ondotik izandako aldaketa guztiekin (foru legedi osoa eguneratua dago www.lexnavarra.es helbidean).
Iragarkiaren kodea: L1702768
