Iragarkia

93. ALDIZKARIA - 2016ko maiatzaren 16a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

77/2016 EBAZPENA, apirilaren 25ekoa, Justiziako zuzendari nagusiak emana, Justizia Administrazioko kudeaketa prozesal eta administratiboko, tramitazio prozesal eta administratiboko eta laguntza judizialeko kidego eta eskaletako funtzionarioentzako lanpostu hutsak betetzeko lekualdatze lehiaketarako deialdia egiten duena.

Justizia Administrazioan kudeaketa prozesal eta administratiboko, tramitazio prozesal eta administratiboko eta laguntza judizialeko kidego eta eskaletan lanpostu huts orokorrak daude. Nafarroako Foru Komunitateko Justizia Zuzendaritza Nagusiak kudeatzen duen lurraldean bertako aurrekontutik finantzatzen dira. Bidezko da horietarako lekualdatze lehiaketarako dei egitea, Botere Judizialari buruzko uztailaren 1eko 6/1985 Lege Organikoa aldatu zuen abenduaren 23ko 19/2003 Legearen VIII. tituluan, eta Justizia Administrazioko funtzionarioen sarrerari, haien lanpostuak betetzeko moduari eta haien lanbide igoerari buruzko Erregelamenduaren 43. artikuluan eta hurrengoetan eta xedapen indargabetzaile bakarrean xedaturikoarekin bat (abenduaren 7ko 1451/2005 Errege Dekretuaren bidez onetsi baitzen erregelamendu hori).

Hori guztia kontuan hartuz, Justizia Zuzendaritza Nagusiak I. eranskineko zerrendako lanpostuak betetzeko lehiaketarako deialdia egitea erabaki du, honako oinarri hauen arabera:

OINARRIAK

Lehena.–Eskatzen ahal diren lanpostuak.

1.–Parte hartzen duten funtzionarioek I. eranskineko lanpostuetako edozein eska dezakete, baldin eta deialdi honetan eskatzen diren baldintza orokorrak eta baldintza zehatzak betetzen badituzte eskaerak aurkezteko epea bukatzen denerako, eta guztiei eusten badiete lehiaketa behin betiko ebatzi arte, destinoko herria dela-eta mugarik izan gabe.

2.–Lanpostu hutsei identifikazio bana emanen zaie, auzitegiko organoaren hurrenkera zenbakia hain zuzen. Auzitegiko organoaren hurrenkera zenbakia eskatuta, ulertzen da organo horretan dauden eta hurrenkera zenbaki horretarako iragarri diren kidegoko lanpostu huts guztiak eskatzen direla, bai eta prozesuaren ondorioz sortutakoak ere, iragartzen badira.

Melillako Prozeduraren Antolaketako Zerbitzu Erkideari dagokionez, han destinoa eskuratzen duten funtzionarioak behin-behinekoz atxikirik geldituko dira, zerbitzuaren beharren arabera, bulego judizial berriaren bestelako edozein lanposturi, aipatu zerbitzu erkidea abian jarri arte.

3.–Lehiaketa hau ebaztearen ondorioz hutsik gelditzen diren lanpostuak ere eskatzen ahalko dituzte, eskainitako lanpostuei gehituko baitzaizkie prozesuaren ondoriozko lanpostu gisa, non ez diren amortizatu nahi, plantilla organikoa aldatu edo langileak birbanatu edo berrantolatzeko proiektua dela eta, edo auzitegiko organo batek atxikia duen langile hornidura gainditu bada, funtzionario titular bat edo gehiagorekin, kasu horretan ez baita prozesuaren ondoriozko lanposturik iragarriko kasuan kasuko kidegoari dagokionez. Ezin dira eskatu lanpostu bati behin-behinekoz atxikita dauden funtzionarioek uzten dutenak, deialdian parte hartu eta lanpostu bat behin betiko lortu ondoren. Lanpostu hutsak eta ondoriozkoak tarteka eska daitezke.

Prozesuaren ondoriozko lanpostu izaerarekin soilik iragartzen diren lanpostuek ere auzitegiko organoaren hurrenkera zenbakia izanen dute. Auzitegiko organoaren hurrenkera zenbakia eskatuta, dagokion kidegoko hurrenkera zenbaki horretarako prozesuaren ondorioz hutsik gera daitezkeen lanpostu guztiak ere eskatzen direla ulertzen da.

Honekin batera egiten diren beste lehiaketa batzuetan parte-hartzaileek bete gabe uzten dituzten lanpostuak ez dira ondoriozkotzat hartuko.

Lehiaketaren ondoriozko lanpostu hutsak eskatzeko eskubidea erabili ahal izan dadin, agindu hau argitaratzen den egunetik hasi eta eskaerak aurkezteko epea amaitu arte, Ministerioaren web orrian (www.mjusticia.gob.es), Departamentuko Lurraldeetako Gerentzietako iragarki oholetan eta Justizia Administrazioaren zerbitzuko langileak hartzeko eskumena duten autonomia erkidegoetako departamentu eskudunetan ikusgai jarriko da zerrenda bat, hain zuzen ere Justizia Administrazioan deialdiaren xede diren lanpostuen izaera bereko organo judizialen, fiskalen eta zerbitzuetakoen zerrenda, eskatzen ahal direnena, organo horien hurrenkera zenbakia adierazirik.

Parte hartzen duten funtzionarioek ziurtatu beharko dute beren eskabidean zehazten dituzten deialdiko hurrenkera zenbakiak lehiaketa horretarako argitaratu direnekin bat datozela, bai I. eranskinean bai ondoriozko lanpostuetan, beste lehiaketa batzuetako kodeak saihesteko.

4.–Zenbait lanpostutan agertzen diren EAI siglek esan nahi dute organo judizial horiek, arlo zibileko eta zigor-arloko eginkizunekin batera, emakumeen aurkako indarkeriaren gainekoak ere hartuko dituztela beren gain, Botere Judizialaren Kontseilu Nagusiak 2005eko ekainaren 22an egindako osoko bilkuran hartutako erabakiari jarraikiz (2005-6-28ko EAO). Hona hemen Izena eta ONN zutabeetako gainerako siglen esanahia: BL (biktimentzako laguntza); E (espetxea); DB (dedikazio berezia); GU (guardiak); OB (ordutegi berezia); AM (auzitegiko medikuntza).

5.–Orokorra nahiz ondoriozko lanpostuetarako den lehiaketa honetan, lanpostu hutsak eta ondoriozkoak kontuan hartuz eskatzen ahal den auzitegiko organoen gehieneko kopuruak ezin izanen du 200 hurrenkera zenbakia gainditu, ulerturik hurrenkera zenbaki bakoitzak auzitegiko organoaren lanpostu guztiak hartzen dituela, bai lanpostu hutsak bai, horrelakorik bada, ondoriozkoak ere. Muga hori abenduaren 7ko 1451/2005 Errege Dekretuaren 42. artikuluak baimentzen duen ahalmenarekin bat ezartzen da, lehiaketa arintzeko, funtzionario askok hartuko baitute parte, eta hiru kidego edo eskalak ukitzen dituen lehiaketa orokorra denez, Justizia Ministerioak eta langileak eta baliabideak eskualdatuak dituzten autonomia erkidegoek izenpetutako esparru hitzarmenean xedaturikoarekin bat.

6.–Ez da inolako aldaketarik onartuko egindako destino eskaeran, behin eskabideak aurkezteko epea iraganik. Ez da onartuko, era berean, lehiaketa behin betiko ebatzi ondoren, lortutako destinoari uko egitea, alegatutako inongo arrazoirik dela eta, ez eta lehiatzaileak huts egin izanagatik eskaeraren hurrenkera zenbakia betetzean eta, beraz, lehiaketan parte hartzen duten funtzionarioek ziurtatu beharko dute eskatzen diren deialdiko hurrenkera zenbakiak bat datozela zehatz-mehatz eskainitako auzitegiko organoen izenekin.

7.–Lehiaketan parte hartzeari uko egitea onar daiteke behin-behineko ebazpenari alegazioak egiteko epearen azken egunera arte, behar bezala justifikaturik dauden kasuetan.

8.–Salbuespen gisa, lanpostu huts edo prozesuaren ondorioz sortutako lanpostu gisa agertzen den baten bat kentzen ahalko da, hori egitera behartzen duen gorabeherarik gerora sortuz gero.

9.–Justizia Ministerioaren lurralde esparruko epaitegi barrutiren bateko jurisdikzio banaketa gertatuz gero, banaketak ukitutako lanpostuak, deialdi honen I. eranskinean adierazitakoak, eta horien ondoriozkoak, izen berriko auzitegiko organoei buruzkotzat joko dira.

Bigarrena.–Parte hartzeko betebehar eta baldintza orokorrak.

1.–Justizia Administrazioko kudeaketa prozesal eta administratiboko, tramitazio prozesal eta administratiboko eta laguntza judizialeko kidego edo eskaletako funtzionarioek hartzen ahalko dute parte lehiaketan eta kidego horietako organo judizialetako lanpostu hutsak eskatu, beren egoera administratiboa edozein izanik ere, salbu aurreko lehiaketetan destinoa lortuta esleitu zitzaien destinoaz jabetu ez zirenek izan ezik. Halaber, ezin izanen dute parte hartu etendura irmoa jasan dutenek, etendurak iraun bitartean, eta nahitaez lekualdatzeko zehapena jasan dutenek, urte batetik hirura bitarteko epean, hutsegitea larria edo oso larria izatearen arabera, destinoa zehapena ezarri zitzaien leku berean izanez gero. Epeak abenduaren 7ko 1451/2005 Errege Dekretuaren 43.2.c) artikuluarekin bat kontatuko dira.

Jarduneko zerbitzuan dauden funtzionarioek egoera hori mantendu behar dute lehiaketa behin betiko ebatzi arte. Zerbitzu berezietako egoeran edo ahaideak zaintzeko borondatezko eszedentzian daudenei, gordetako lanpostuan berriz sartzen badira, ez zaie eragotziko lehiaketan parte hartzea. Zerbitzu berezietako egoerara edo ahaideak zaintzeko borondatezko eszedentziara pasatzen diren jarduneko funtzionarioak ere ez dira baztertuko.

Funtzionario horiek, jardunean, zerbitzu berezietan edo senideak zaintzeko borondatezko eszedentzian badaude, lehiaketan parte hartzetik baztertuko dira, baldin eta, lehiaketa ebazteko prozesuan, borondatezko eszedentzian hasten badira sektore publikoan zerbitzuak emateagatik, norberaren aferengatik edo familia biltzeagatik, edo behin betiko etenaldia jasotzen badute.

Ordezko legelari aritzeagatik borondatezko eszedentzian den funtzionario batek bere lanpostura itzultzeko lehiaketan parte hartzen badu eta, lehiaketa prozesuan, Kudeaketa kidegora atxikitzen bada behin-behinekoz, haren administrazio egoera ez da aldatutzat joko, 1. puntuaren lehen oinarrian aurreikusitako ondorioetarako. Ez da baztertuko, ezta ere, administrazio egoera aldatzeagatik Kudeaketa kidegora behin-behinekoz atxikitako funtzionarioa, ordezko legelari aritzeagatik borondatezko eszedentzian izandakoa, baldin eta, eskaerak aurkezteko epea igarota, ordezko legelari izendatzen badute berriro.

2.–Kudeaketa, Tramitazio eta Laguntzako kidego edo eskaletako funtzionarioek jardunean dauden kidego edo eskala bererako parte hartzen ahalko dute, baldin eta, eskaerak aurkezteko azken egunean, bi urteko epea igaro bada funtzionarioak abiaburuko kidego edo eskalako azken behin betiko destinoa esleitu zion lekualdatze lehiaketa deitzeko ebazpena eman zenetik, betiere destino horretatik hartzen badu parte, edo behin betiko destinoa esleitu zion ebazpena eman zenetik, funtzionario berrien kasuan. Urteak zenbatzeari begira, lehen urte naturaltzat hartuko da ebazpena eman zen urtea, eguna edozein dela ere, eta bigarren urtetzat, hurrengo urte naturala (abenduaren 7ko 1451/2005 Errege Dekretuaren 46.1 artikulua).

3.–Jardunera behin-behineko atxikipenaren bidez itzultzen diren funtzionarioak (abenduaren 7ko 1451/2005 Errege Dekretuaren 68.c) art.), baldin eta behartuta badaude lehiaketetan parte hartzera indarra duen legediarekin bat, oinarri honen 2. atalean ezarritako aldi bateko mugapenetik kanpo egonen dira. Orobat, haiek atxikita dauden probintziako beren kidego edo eskalako lanpostu guztiak eskatu beharko dituzte, hutsak nahiz iragartzen diren balizko ondoriozkoak. Behin-behinekoz atxiki ondoren egiten den lehen lehiaketan parte hartzen ez badute, beren interes partikularrengatik borondatezko eszedentzian daudela erabakiko da. Atxikipenaren probintzian lanposturik egonda, baten batek lanpostu guztiak eskatzen ez baditu, edo lanpostuak beste probintzia batean eskatzen baditu eta ez badu destinorik eskuratzen, behin betiko esleituko dio lanpostu bat eskumena duen autonomia erkidegoko organo eskudunak edo, zein ministeriori dagoen atxikita, haren esparrukoak, behin-behineko atxikita dagoen probintziaren esparruan, eta, hala ez bada, autonomia erkidegoaren esparruan.

Behin betiko destinorik lortzen ez badute eta behin-behinekoz betetzen zuten lanpostua betetzen bada, behin-behinekoz atxikiko zaizkio berriz lanpostu huts bati, lanpostu hutsak lehiaketarako zein probintzia edo lurralde esparrutan bildu diren, horko edozein bulego judizial edo destinoko zentrotan. Hurrengo lehiaketan behin betiko destinorik lortzen ez badu, behin betiko esleituko zaio lehiaketa horretan edozein lurralde esparrutan hutsik gelditzen diren lanpostuetatik edozein (abenduaren 7ko 1451/2005 Errege Dekretuaren 69. art.). Eskabidearekin batera, egun jardunean dauden lanpostuari behin-behinekoz atxikitzeko egindako F1R agiriaren fotokopia ere aurkeztu beharko dute.

4.–Botere Judizialari buruzko uztailaren 1eko 6/1985 Lege Organikoa aldatzen duen abenduaren 23ko 19/2003 Lege Organikoaren 506.d artikuluan ezarritako borondatezko eszedentzia egoeran (sektore publikoan zerbitzuak emateko eszedentzia) dauden funtzionarioek ez dute inolako denbora mugarik izanen egoera horretan zein kidegotan dauden, bertara lanera itzultzeko.

Botere Judizialari buruzko uztailaren 1eko 6/1985 Lege Organikoa aldatzeko abenduaren 23ko 19/2003 Lege Organikoren 506. artikuluko e) eta f) letretan ezarritako borondatezko eszedentzian dauden funtzionarioek (familia elkartzeak eta interes partikularrak eragindako eszedentziak) lehiaketan parte hartu ahal izateko, eskaerak aurkezteko epea amaitzen den egunean, bi urte iraganak izan behar dituzte gutxienez egoera horretan deklaratu ziren datatik.

5.–Botere Judizialari buruzko uztailaren 1eko 6/1985 Lege Organikoan (abenduaren 23ko 19/2003 Lege Organikoak aldatua) xedatuaren babesean, ahaideak zaintzeko eszedentzian dauden funtzionarioek parte hartzen ahalko dute lehiaketan abenduaren 7ko 1451/2005 Errege Dekretuaren 46.1 artikuluan ezarritako bi urteak iragan badira.

6.–Behin betiko gabeturik daudenek, betiere behin-behinekoz atxikirik badaude (abenduaren 7ko 1451/2005 Errege Dekretuaren 68.e) artikulua), lehiaketa honetan parte hartu beharko dute behin betiko lanpostua lortzeko. Lehiaketan parte hartzen ez badute edo eskatutako lanpostua eskuratzen ez badute, bidezkoa bada, atxikirik dauden lurralde esparruan, beste lehiatzaileei esleitu ez zaizkienetako bat emanen zaie behin betiko.

7.–Prozesu eta Administrazio Kudeaketako Kidegoko funtzionarioek, behin-behinekoz atxiki badira, baita, ordezko legelari izateari uzteagatik, eskaerak aurkezteko epearen barruan atxikita izan badira ere, lehentasunezko eskubidea izanen dute atxikiak dauden herriko lanpostu orokorrak betetzeko, lehiaketara lehen aldiz ateratzen direnean, abenduaren 7ko 1451/2005 Errege Dekretuaren 70.3 artikuluan ezarritakoari jarraikiz, eta ez dute lehentasuna galduko, eskaerak aurkezteko epearen barruan ordezko legelari izendatzen badituzte berriro. Lanpostu horietara heltzerik ez badute, beste funtzionario batzuek ere lehentasunezko eskubidea izan eta lortu dituztelako, behin-behineko atxikipen egoeran segituko dute, harik eta, hurrengo lehiaketetan parte hartu eta atxikirik dauden herriko lanpostu huts guztiak eskatu ondoren, behin betiko lanpostu bat esleitzen zaien arte.

Zehaztutako lehentasuna eskatu ezean, lehiaketan parte hartu ezean edo bere atxikipeneko herriko lanpostu huts guztiak (I. eranskinekoak) eskatu ezean, behin-behineko atxikipeneko lanpostua iragarririk ez badago ere, eta, horren ondorioz, lanpostua eskuratu ez badute, eskumena duen autonomia erkidegoko organo eskudunak edo bere atxikipeneko ministerioaren esparrukoak behin betiko destinoa emanen die esleitu gabeko edozein lanpostutan.

8.–Funtzionario batek uko egiten badio berariazko lehiaketa bidez lortutako lanpostu bati (abenduaren 7ko 1451/2005 Errege Dekretuaren 68.a artikulua), eta lanpostu batean behin-behinekoz aritzea esleitu bazaio, lehentasunezko eskubidea izanen du, lehiaketara lehen aldiz ateratzen denean, kargua utzi zuenean lan egiten zuen herrian berean lanpostu orokor bat betetzeko, eta herri horretan deitzen diren lanpostu guztiak eskatu beharko ditu, abenduaren 7ko 1451/2005 Errege Dekretuaren 54. artikuluan ezarritakoari jarraikiz. Lehiaketa horretan parte hartzen ez badu, behin betiko esleituko zaio esleitu gabeko edozein lanpostu.

Funtzionario batek uko egiten badio izendapen librearen bidez lortutako lanpostu bati edo halako lanpostutik kentzen badute (abenduaren 7ko 1451/2005 Errege Dekretuaren 62. eta 68 artikuluak), betiere lanpostu batean behin-behinekoz aritzea esleitu bazaio, lehentasunezko eskubidea izanen du, lehiaketara lehen aldiz ateratzen denean, kargua utzi zuenean lan egiten zuen herrian berean lanpostu orokor bat betetzeko, eta herri horretan deitzen diren lanpostu guztiak eskatu beharko ditu. Lehiaketa horretan parte hartzen ez badu edo eskatutako destinoetako bat ere lortzen ez badu, behin betiko esleituko zaio esleitu gabeko edozein lanpostu.

9.–Herrirako lehentasunezko eskubidearen arautzea, oinarri honen 7. eta 8. puntuetan adierazitakoa:

9.1.–Lehentasunak herri bateko hurrenkera zenbaki huts guztiak hartzen ditu, baina horrek ez du esan nahi eskabidean interesdunak eskatutako lehentasun hurrenkerako lehen zenbakia esleituko denik, baizik eta arauak ezartzen duela eskubide hori duen lehiatzaileak destinoa lortuko duela herri zehatz batean lanpostu hutsen artean iragarritako edozein hurrenkera zenbakitan, hurrengo puntuetan adierazten diren zehaztasunekin; horrexegatik, eskubide horretaz baliatzeko, lehentasuna zein herritan erabiltzen den, bertan eskaintzen diren I. eranskineko hurrenkera zenbaki huts guztiak eskatu beharko dituzte nahitaez, eta eskaera horiek bildu eskabideko lehentasun hurrenkerako lehen zenbakietan, eta horien atzetik ordenean jarri lehentasunik gabe eskatutako gainerako hurrenkera zenbakiak, eta horien artean eskatu ahal izanen ditu, nahi izanez gero, prozesuaren ondorioz sortutako gainerako hurrenkera zenbakiak, lehentasuna baliatzen duen herrikoak. Halaber, eskabidean eskatu beharko dute, P-1 atalean atxikirik dauden destinoko herria adierazita, eta lehentasun hori frogatzen duten agirien fotokopia konpultsatuak aurkeztu (behin-behineko atxikipena, jabetza akta).

9.2.–Bere puntuazioarekin lehentasuna zer herritarako erabili den, herri horrexetan eskaturiko deialdiko hurrenkera zenbakiren batean destinorik ez badu eta lehentasuna eta herri bererako puntu gehiago dituen beste funtzionariorik ez bada, puntu gehiago dituen lehiakideak lorturiko I. eranskineko herri horretako hurrenkera zenbakia esleituko da. Lehiakide batzuen artean berdinketarik bada, mailako zenbakiaren arabera erabakiko da. Horrek zenbaki hurrenkera horretan destinoa lortzeko eskubidea galduko du, baina parte hartzeko eskabideko gainerakoak aukeratzen ahalko ditu.

9.3.–Lehentasunezko eskubidea ezin izanen da erabili honako baldintza hauek betetzen ez badira: kasuan kasuko herriaren I. eranskinean diren deialdiko hurrenkera zenbaki huts guztiak eskabideko lehentasun hurrenkerako lehen zenbakietan eskatzea; eskabide ereduko P-1 atalean berariaz agerraraztea lehentasuna zer herritarako erabili nahi duen; eta, 9.1 puntuan adierazitako agirien fotokopia konpultsatuak aurkeztea.

10.–Abenduaren 7ko 1451/2005 Errege Dekretuaren 68.f) artikuluak eta 72. artikuluko 2. atalak aipatzen dituen funtzionarioek, birgaituak eta behin-behinekoz atxikiak baitira, deitzen den lehen lekualdatze lehiaketan hartu beharko dute parte, lanpostu bat eskuratze aldera. Lehiaketan parte hartzen ez badute edo eskatutako lanpostua eskuratzen ez badute, bidezkoa bada, edozein lurralde esparrutan, beste lehiatzaileei esleitu ez zaizkienetako batean emanen zaie behin betiko destinoa.

11.–Otsailaren 16ko 249/1996 Errege Dekretuaren bidez onetsitako Justizia Administrazioko ofizial, laguntzaile eta agenteen kidegoetako Erregelamendu Organikoaren 52. artikuluan jasotako baliabideen berrantolamendua dela-eta lanpostua nahitaez esleitu zaion funtzionarioak zilegi du lekualdatze lehiaketetan parte hartzea, baita legeak eskatzen duen urtebeteko epea amaitu ez bada ere. Horrez gain, lehentasun-eskubidea izanen du, behin bakarrik, zentro bereko beste lanpostu bat eskuratzeko, halakorik eskaintzen bada lehiaketa arruntean eta bertan parte hartzen badu (otsailaren 16ko 294/1996 Errege Dekretuaren 51. artikulua).

Eskubide horretaz baliatzeko honako zehaztasun hauek kontuan hartu beharko ditu:

Lehentasun hori lantokiko zein lanpostutarako baliatu nahi duen, lanpostu horiexek eskatu bere eskaerako lehentasun hurrenkerako lehen lekuetan.

Lehentasunaz baliatzeko zein lantoki eta herri hautatu dituen, haiexek adierazi V-3 eskabide ereduko P-2 atalean.

P-2 atalean adierazten diren lantoki eta herrirako egin zen nahitaezko izendapenaren fotokopia konpultsatua aurkeztea.

Aurreko hiru lerroaldeetan zehaztutako jarraibideei kasu egin ezean, galdu eginen du, lehiaketa honetarako, 52.c) artikuluak aitortzen dion lehentasunezko eskubidea.

12.–Lanpostua nahitaezko berresleipen prozesuaren bidez (abenduaren 7ko 1451/2005 Errege Dekretuaren 67. artikulua) esleitua duen funtzionarioak lekualdatze lehiaketetan parte hartzen ahalko du, nahiz eta erregelamendu beraren 46.1 artikuluan ezarritako legezko epea bukatu ez. Era berean, lehentasun eskubidea izanen du abiaburuko destinoko zentroan lanpostua lortzeko zentro horretako lanpostu orokorrak eskaintzen diren lehen lehiaketan.

Eskubide horretaz baliatzeko honako zehaztasun hauek kontuan hartu beharko ditu:

Lehentasun hori lantokiko zein lanpostutarako baliatu nahi duen, lanpostu horiexek eskatu bere eskaerako lehentasun hurrenkerako lehen lekuetan.

Lehentasunaz baliatzeko zein lantoki eta herri hautatu dituen, haiexek adierazi V-3 eskabide ereduko P-2 atalean.

P-2 atalean adierazten diren lantoki eta herrirako egin zen nahitaezko berresleipeneko izendapenaren fotokopia konpultsatua aurkeztea.

Aurreko hiru lerroaldeetan zehaztutako jarraibideei kasu egin ezean, galdu eginen du, lehiaketa honetarako, 67. artikuluak aitortzen dion lehentasunezko eskubidea.

13.–Berariazko lehiaketa bidez edo izendapen librearen bidez lanpostu berezi bat betetzen ari diren funtzionarioek lehiaketa honetan parte hartzen ahalko dute, lanpostu horretan gutxienez urtebete egin badute, jabetza hartu zuten egunetik hasita (abenduaren 7ko 1451/2005 Errege Dekretuaren 54. edo 62. artikulua).

14.–Funtzionarioak eskaturik lortutako destinoak uko egin ezinezkoak direnez, lekualdatze lehiaketaren ondorioz zerbitzura itzultzen denak destinoa lortzen badu, besterik gabe eszedentzian geldituko da jardunean zegoen kidegoan. Dena dela, funtzionario batek lanpostua berariazko lehiaketa bidez lortu badu, hari uko egiten ahalko dio, jabetza hartzeko epea amaitu baino lehen, behin betiko destinoa lortzen badu lehiaketa honetan; halakoetan, interesdunak organo dei-egileari jakinaraziko dio. Jakinarazi ezik, funtzionarioak esleitutako lehen destinoan hartuko du jabetza, abenduaren 7ko 1451/2005 EDren 53. artikuluan ezarritakoari jarraikiz.

Berariazko lehiaketaren ebazpena lehiaketa arruntaren behin betiko ebazpena baino lehen ematen bada, baita jabetza hartzeko epea igaro ondoren ere, ukitutako funtzionarioak berariazko lehiaketan lortutako destinoaren jabetza hartu beharko du, eta ez du aukerarik izango lehiaketa arruntean. Berariazko lehiaketaren ebazpena lehiaketa arruntaren ebazpena eman ondoren ematen bada, baita jabetza hartzeko epea igaro ondoren ere, ez du aukerarik izango berariazko lehiaketan.

Hirugarrena.–Baremoak.

Merezimenduak honela baloratuko dira: lanpostuak esleitzeko, antzinatasuna baloratzeko baremoari jarraikiz (abenduaren 7ko 1451/2005 Errege Dekretuaren 48.1.a) artikulua); eta autonomia erkidegoetako berezko hizkuntza ofizialaren ezagutza, artikulu horren b) letran ezarritakoaren arabera.

1.–Antzinatasuna.–Parte hartzen den kidegoan edo eskalan zerbitzuetan emandako urte oso bakoitzeko bi puntu emanen dira eta denbora tarte txikiagoak proportzionalki baloratuko dira (0,00555556 puntu eguneko). Hilabeteak 30 egunekoak izanen dira, eta gehienez 60 puntu eskuratzen ahalko dira.

2.–Autonomia erkidegoetako hizkuntza bereki ofiziala mintzatzen nahiz idazten jakitea.–Nafarroako Foru Komunitatean, Euskarari buruzko abenduaren 15eko 18/1986 Foru Legearen 5. artikuluan ezartzen diren eremu euskaldunean eta mistoan, ekainaren 15eko 55/2009 Foru Dekretuan (2009ko 81. Nafarroako Aldizkari Ofiziala, uztailaren 3koa) eta irailaren 13ko 210/2010 Ebazpenean (2010eko 117. Nafarroako Aldizkari Ofiziala, irailaren 27koa) ezarritakoari jarraikiz, euskaraz mintzatzen nahiz idazten jakiteak, maila bakoitza gainditu izana behar bezala frogatuta Nafarroako Gobernuko erakunde eskudunak edo baliokideak luzatutako ziurtagiriaren bidez, gehienez ere, eta ondorio hauetarako soilik, 12 puntu bitarte eskuratzeko eskubidea ematen du, honela frogatutako ezagupenen mailaren arabera:

1. B2 mailako ziurtagiria edo baliokidea: lau puntu.

2. C1. mailako ziurtagiria edo baliokidea: zortzi puntu.

3. C2 mailako ziurtagiria edo baliokidea: hamabi puntu.

Nafarroako Administrazio Publikoaren Institutuko zuzendari kudeatzailearen irailaren 13ko 210/2010 Ebazpenaren bidez, euskararen eta Europar Batasuneko hizkuntzen ezagutza-maila egiaztatzen duten titulu eta ziurtagirien arteko baliozkotzeak ezarri ziren, Hizkuntzen Europako Erreferentzia Esparru Bateratuaren arabera (2010eko 117. Nafarroako Aldizkari Ofiziala, irailaren 27koa). Hartan, C2 mailako ziurtagiri ofizialik ezartzen ez denez, arlo horretan eskudunak diren erakundeek horretarako deitzen duten egiaztapen azterketa gainditu beharko da, eta horrek balio izanen du dagokion ziurtagiria emateko.

Hizkuntzaren ezagutza frogatzeko agiriak fotokopia konpultsatuak izanen dira. Baldintza hori betetzen ez dutenak ez dira aintzat hartuko.

Eskaerak aurkezteko epea bukatzen denean baloratuko dira merezimenduak. Ziurtagiri horiek ez dira metatuko. Hortaz, lehiatzaileak hainbat mailatako tituluak baldin baditu, goragoko mailakoa bakarrik baloratuko da.

Laugarrena.–Eskabide ereduak eta eskaerak aurkezteko epeak.

1.–II. eranskina. V-1 laukia: Kudeaketa prozesal eta administratiboaren, tramitazio prozesal eta administratiboaren eta epaileen laguntzaileen kidego eta eskaletako lanpostuetan behin betiko destinoa duten funtzionarioek, zerbitzu berezietan daudenek eta ahaideak zaintzeko eszedentzian daudenek –eta lanpostua Estatuan gordea, eskumenak eskualdatu gabe– agindu honen II. eranskinean ageri den V-1 ereduaren araberako eskabidea aurkeztu beharko dute, behar diren atal guztiak beteta, deialdi hau Estatuko Aldizkari Ofizialean argitaratu ondoko 10 egun naturaleko epean. Nafarroako Foru Komunitateko Justizia zuzendari nagusiari zuzendu behar zaio, helbide honetara: Iratxeko Monasterioa, 22. 31011, Iruña.

Destinoa Euskadin, Katalunian, Galizian, Valentziako Erkidegoan, Kanarietan, Andaluzian, Nafarroan, Madrilen, Kantabrian, Aragoin, Asturiasen eta Errioxan duten funtzionarioek, lehiaketa honetan eskaintzen diren lanpostuetan interesik badute, gaur egun destinoa duten autonomia erkidegoko justizia departamentuari aurkeztu beharko diote eskaera.

2.–II. eranskina. V-2 laukia: Botere Judizialari buruzko uztailaren 1eko 6/1985 Lege Organikoa aldatu zuen abenduaren 23ko 19/2003 Lege Organikoaren 506.d) artikulua dela-eta Kudeaketa, Tramitazio eta Laguntzako kidego eta eskaletan eszedentzian dauden eta destinoa Justizia Administrazioko edo beste administrazioetako beste kidego edo eskaletan duten funtzionarioek, baldin eta lehiaketa honetako lanposturik eskatu nahi badute, V-2 eredua erabiliko dute, agindu honen II. eranskin gisa ageri dena. Eskatzen zaizkien atal guztiak bete beharko dituzte, eta EAOn argitaratu eta ondoko 10 egun naturaleko epean Justizia Ministerioaren Erregistro Orokorrean aurkeztuko (Bolsa kalea, 8, 28012 Madril), helbide honetara bidaliz:

Justizia Ministerioa - Justizia Administrazioaren zerbitzuko Langileen Zuzendariordetza Nagusia - Lehiaketa Atala - San Bernardo kalea, 21 (28015 Madril).

3.–II. eranskina. V-3 laukia: Ondoko egoeretako edozeinetan dauden eskatzaileek:

–Familia elkartzeagatik edo interes partikularragatik borondatezko eszedentzian daudenak.

–Behin betiko etenalditik lanera itzultzeagatik behin-behineko atxikipena dutenak.

–Birgaitua izateagatik behin-behineko atxikipenez lanera itzuli direnak.

–Jarduneko zerbitzura itzultzeagatik behin-behineko atxikipena duten parte-hartzaileak (lanpostua gordeta izan gabe).

–Izendapen librez lortutako lanpostuari uko egitearen edo lanpostua uztearen ondorioz edo berariazko lehiaketa bidez lortutako lanpostuari uko egitearen ondorioz behin-behineko atxikipena dutenek.

–Ordezko legelari izateari uzteagatik behin-behineko atxikipenez lanera itzuli direnak.

–Otsailaren 16ko 249/1996 Errege Dekretuaren 52.c) artikuluaren araberako langileen berrantolamenduan sartuta daudenek edo abenduaren 7ko 1451/2012 Errege Dekretuaren 67. artikuluaren araberako nahitaezko berresleipena dutenek.

Beren eskabidea aurkeztuko dute, agindu honen II. eranskineko V-3 laukia seinalatuz eta eskatzen zaizkien atal guztiak betez, agindu hau Estatuko Aldizkari Ofizialean argitaratu eta 10 egun naturaleko epean, Justizia Ministerioko Erregistro Orokorrean (Bolsa kalea, 8, 28012 Madril), helbide honetara zuzendurik:

Justizia Ministerioa - Justizia Administrazioaren zerbitzuko Langileen Zuzendariordetza Nagusia - Lehiaketa Atala - San Bernardo kalea, 21 (28015 Madril).

4.–Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38. artikuluan aurreikusitako moduan ere igor daitezke eskabideak. Argibide gisa adierazten da Estatuko Administrazio Orokorraren erregistro bulegoen zerrenda eguneratua dagoela http://administracion.gob.es/pagFront/atencionCiudadana/oficinas/encuentraOficina.htm tu oficina/Oficinas de Registro delako web orrian, eta bertan kontsulta egin daiteke lehiaketan parte hartzeko eskaera aurkezteko.

Posta bulegoetan aurkezten direnak honako bi modu hauetako baten bidez bidaliko dira:

a) Posta arruntaren bidez, eta kasu horretan Justizia Ministerioko Erregistro Orokorrean, Justizia lurraldeko gerentziakoan nahiz eskumen horiek transferituak dituen autonomia erkidegoko justizia departamentukoan izan beharko dute sarrera emana, eskabideak aurkezteko epea amaitu baino lehen.

b) Posta ziurtatuaren bidez, eta kasu horretan gutun-azal irekian aurkeztu behar dira posta-bulegoetan, han diharduen funtzionarioak data eta zigilua ezar diezazkien bidali aurretik. Lehiaketan parte hartu nahi dutenek posta-bulegoko zigilua duen eskabidea bidali behar dute, horiek aurkezteko epea bukatu eta gero ez baita beharkizun hori betetzen ez duen eskabiderik onartuko, nahiz eta gero zigilua jarri izana frogatu.

5.–Interes partikularrengatik borondatezko eszedentzian direnek administrazio publikoetatik bereiziak ez izanaren aitorpena erantsi behar diote beren eskabideari.

Zerbitzuak sektore publikoan emateagatik borondatezko eszedentzian daudenek Botere Judizialari buruzko Lege Organikoaren 506.d) artikuluari jarraikiz, lehiaketan parte hartzeko eskabideari eginkizunetan aritzeko gabetze irmoko egoeran ez daudela dioen aitorpena erantsi beharko diote.

6.–Lehiaketa honetan parte hartzeko eskabidea bakarra izanen da funtzionario bakoitzarentzat, nahiz eta eskatutako lanpostuak eskumenak eskualdatuak dituzten autonomia erkidegoetakoak izan. Lanpostu horietako deialdiak aldi berean eginen dituzte autonomietako gobernuek eta tokian tokiko aldizkari ofizialetan argitaratuko dira.

Era berean, eskabide bakarrez hautatu beharko du funtzionarioak jardunean dagoen kidegotik parte hartzea edo eszedentzian dauden kidegora ez eta beste kidego batean jardunera itzultzea. Kidego eta eskala ezberdinetarako bi eskabide aurkeztuz gero, biak indargabetuko dira. Beraz, funtzionarioa bazterturik geldituko da lehiaketa honetatik.

7.–Egindako eskaera loteslea izanen da eskatzailearentzat, eskabideak aurkezteko epea amaitzen denean. Beraz, ezin izanen da aldatu. Inork bere eskabidea zuzendu nahi badu, beste bat aurkeztu beharko du parte hartzen zueneko kidego edo eskala bererako, eskabideak aurkezteko epea bukatu aitzin. Horrek besterik gabe indargabetu eginen du lehenago aurkezturikoa.

Lehiaketan parte hartzeari uko egiten ahalko zaio bakarrik behin-behineko ebazpenari alegazioak egiteko epea bukatu baino lehen.

8.–Eskabideak telematikoki egitea, morroiaren bidez.

Kudeaketa, Tramitazio eta Laguntza Kidegoetako funtzionarioen arteko lekualdatze lehiaketa honetan, Estatu mailan, parte hartzen duten funtzionarioek aukera dute eskabidea telematika bidez betetzeko, Justizia Ministerioko Intraneten bidez, https://ainoa.justicia.es helbidean.

Horrela kodeen transkripzioan akatsak saihestea lortuko da, izan ere, lehiatzaileak grabatutako datuak automatikoki bilduko dira sistema informatikoan.

Modalitate hori aukeratzen duten lehiatzaileek morroi informatikoak sortzen duen behin betiko inprimakian aurkeztu beharko dute eskabide eredua, ez zirriborroa, horrek ez baitu balioko. Aurkezpen hori ohiko sistemaren arabera eginen da, oinarri honen 1. puntutik 7. puntura bitarte xedatzen denarekin bat.

Eskatzaileetako batek dagoeneko egiaztaturik dagoen eskaera bat aldatu nahi badu, eskaerak aurkezteko epearen barruan, morroiaren bidez beste eskaera bat sortu eta egiaztatu dezake.

Epearen barnean beranduen sarturiko eskaeraren erregistro zigilua duenak balioko du eta, beraz, ezabatu eginen da data zaharragoa duen erregistro zigilua daramana.

Bosgarrena.–Baldintzatutako eskaerak.

Kidego bereko nahiz desberdineko bi funtzionariok udalerri, barruti judizial edo probintzia berean dauden lanpostu hutsak nahi izanez gero, aukera izanen dute euren eskaera baldintzapean jartzeko, hau da, destinoa biek udalerri, barruti judizial edo probintzia berean lortzeko eskaera egin dezakete, eta hori gertatu ezean, biek egindako baldintzapeko eskaerak deuseztatu eginen dira. Eskaera baldintzatu hau egiten duten funtzionarioek eskabidean C atalean zehaztu beharko dute, norekin baldintzatzen duen, horrexen izen-deiturak eta IFZ adieraziz, eta beste funtzionarioaren eskabidearen fotokopia aurkeztu. Lehiatzaileetariko baten batek C atalean adierazten ez badu, bi eskabideak baliorik gabe geldituko dira.

Eskabidearen C atala betetzearekin batera, ulertuko da Lanpostuetako sarrerari eta haiek betetzeari buruzko Erregelamenduaren 48.2 artikuluan ezartzen den eskaera baldintzatua eskaturiko hurrenkera zenbaki guztietan egiten dutela.

Seigarrerna.–Tramitazioa.

Lehiaketa honetan parte hartzeko eskabideak aurkezten direneko Justizia Ministerioko lurralde gerentzietako langileria unitateek eta Justizia Administrazioarekiko Harremanen Zuzendaritza Nagusiak eta eskumenak transferiturik dauzkaten autonomia erkidegoek eginen dute baremazioa, eskabidean agertzen diren datuetatik abiatuta.

Zazpigarrena.–Esleipenak.

1.–Lanpostuak esleitzeko lehentasun hurrenkera deialdi honen hirugarren oinarrian ezarritako baremoen arabera lortutako puntuazioak emanen du.

2.–Guztirako puntuazio bera duten bi izangai izanez gero, hizkuntza barne, kidegoan antzinatasunik handiena duenaren alde ebatziko da, eta hala ere berdinketak irauten badu, kidegoan sartzeko hautaprobetan lortutako ordena zenbakia hartuko da kontuan.

Zortzigarrena.–Behin-behineko ebazpena.

1.–Deialdi hau behin-behinekoz ebatziko da, arlo horretako eskumenak eskuordetuak dituzten autonomia erkidegoetako organo eskudunekin koordinaturik; horrela argitaratuko baitituzte aldi berean Justizia Ministerioko web orrian, Justiziako lurralde gerentzietako iragarki-oholetan eta aipatu autonomia erkidegoetako iragarki-oholetan. Partaide guztien III. eranskinek baremoa eta behin-behinekoz esleituriko destinoa edukiko dituzte eta Justizia Ministerioko web orrian eta, bidezko bada, eskumenak eskuordetuak dauzkaten autonomia erkidegoetako web orrian argitaratuko dira.

Behin-behineko ebazpenarekin batera, onetsi eta aipatu toki horietan agerian jarriko da baztertuen zerrenda, eta bertan adieraziko dira baztertzeko arrazoiak.

2.–Behin-behineko ebazpenean destinoa esleitu zaien interesdunen jatorrizko lanpostua eta herria adieraziko dira, eta era berean beren administrazio egoera, jardunekoa ez bada, eta esleituriko lanpostua.

3.–Behin-behineko ebazpenaren, III. eranskinaren eta baztertuen zerrendaren aurka zilegi da alegazioak aurkeztea hamar egun naturaleko epean, web orrian eta gorago aipatutako iragarki-oholetan argitaratzen direnetik, edo bertan aipatzen den egunetik, deialdi honen IV. eranskin gisa ageri den eredua erabiliz. Horretarako, epe horretan bidezko frogagiriak aurkeztu beharko dituzte eta aurkezturiko eskabidearen fotokopia zigilatua, Justizia Ministerioko Erregistro Orokorrean (Bolsa kalea, 8, 28012 Madril), hori guztia Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 76 artikuluan xedatutakoari jarraikiz. Helbide honetara zuzendurik:

Justizia Ministerioa - Justizia Administrazioaren zerbitzuko Langileen Zuzendariordetza Nagusia - Lehiaketa Atala - San Bernardo kalea, 21 (28015 Madril).

Epe horretan erreklamaziorik egin ezean, bertan ageri diren datuak, baremazioa eta behin-behineko destinoa ontzat hartu eta haiekin ados dagoela ulertuko da.

Alegazioak egiaztatuko dira, zuzenbidean egokia dena ebatziko da eta emaitza lehiaketaren behin betiko ebazpenean bilduko da. Horregatik, ez zaie jakinaraziko interesdunei banan-banan.

Ondoriozko lanpostuen lehiaketa denez, behin-behinekoz esleitutako destinoek aldaketak izan ditzakete behin betiko ebazpenean, eskabideen kudeaketan egindako akatsen ondorioz. Nolanahi ere, behin-behinekoz esleitzen diren destinoek ez dute eskubiderik sortzen lehiaketaren behin betiko ebazpenari begira.

Bederatzigarrena.–Behin betiko ebazpena eta lanpostuaz jabetzeko epea.

1.–Alegazioen gainean ebatzi ondoren, deialdiaren behin betiko ebazpena emanen da, eskumenak transferiturik dauzkaten autonomia erkidegoetako organo eskudunekin koordinaturik.

2.–Lehiaketaren ebazpenak kidegoz kidego ematen ahalko dira, lehiaketan parte hartzen duten funtzionarioen kargu-uzteak txandaka egin daitezen, baldin eta Administrazioak uste badu denak batera eginez gero zerbitzu publikoarentzat kaltegarria izan daitekeela.

3.–Ebazpena autonomia erkidegoetako aldizkari ofizialetan aldi berean argitaratzea lortzen ez bada, epeak Estatuko Aldizkari Ofizialean argitaratzen den egunaren biharamunetik kontatuko dira.

4.–Lanpostuaz jabetzeko epea hiru egun naturalekoa izanen da, funtzionarioak bere herria aldatu beharrik ez badu; zortzi egun naturalekoa, autonomia erkidego bereko beste herri batera joan beharra badu; eta hogei egun naturalekoa beste autonomia erkidego batera joan beharra badu, salbu eta Kanarietako eta Baleareetako autonomia erkidegoetara eta Ceutako eta Melillako hirietara joan beharra izanez gero, horietan epea hilabetekoa izanen baita, abiaburuko edo helmugako lanpostua uharte edo hiri horietan denean.

Lanpostuaz jabetzeko epea aurrekoa utzi eta biharamunetik hasiko da, lehiaketaren gaineko behin betiko ebazpenean aipatzen diren egunetan egin beharko baita.

5.–Funtzionarioak oporrez, baimen edo lizentzia batez gozatzen ari badira, haiek bukatutakoan hasiko dira kontatzen jabetza hartzeko epeak, salbu eta behar bezala arrazoitutako inguruabar bereziak direla medio eten edo baliogabe uzten badira.

Hamargarrena.–Esleituriko destinoen izaera.

1.–Lehiaketa honen ondoriozko lekualdatzeak borondatezkotzat hartuko dira, maiatzaren 24ko 462/2002 Errege Dekretuan, zerbitzuaren ondoriozko kalte-ordainei buruzkoan, aurreikusitako ondorioetarako.

2.–Behin betiko ebazpenean esleitutako lanpostuei ezin izanen zaie uko egin.

Hamaikagarrena.–Lehiaketan parte hartzeko mugak.

Lehiaketa honetan behin betiko destinoa eskuratzen duten funtzionarioek ezin izanen dute parte hartu kidego edo eskala bererako beste lekualdatze lehiaketa batean harik eta Botere Judizialari buruzko uztailaren 1eko 6/1985 Lege Organikoa aldatzen duen abenduaren 23ko 19/2003 Lege Organikoko 529.3 artikuluan ezarritako epeak eta abenduaren 7ko 1451/2005 Errege Dekretuko 46.1 artikuluan ezarritako epeak igaro arte.

Hamabigarrena.–Errekurtsoak.

Deialdi honen kontra gora jotzeko errekurtsoa jar daiteke, Lehendakaritzako, Funtzio Publikoko, Barneko eta Justiziako kontseilariari zuzendua, hilabeteko epean, Estatuko Aldizkari Ofizialean argitaratu eta biharamunetik aurrera.

Iruñean, 2016ko apirilaren 25ean.–Justiziako zuzendari nagusia, María Lourdes Aldave Villanueva.

II. ERANSKINA

Eskaera (PDF).

IV. ERANSKINA

Alegazioetarako eredua (PDF).

Iragarkiaren kodea: F1605618