Iragarkia

96. ALDIZKARIA - 2015eko maiatzaren 20a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

246/2015 EBAZPENA, maiatzaren 5ekoa, Nekazaritza eta Abeltzaintzako zuzendari nagusiak emana, mahastia berregituratu eta birmoldatzeko planetarako laguntzak emateko deialdia eta oinarri arautzaileak onesten dituena, 2015-2016 kanpainarako.

Nekazaritzako merkatuen antolamendu bateratua sortu eta 922/72 (EE), 234/79 (EE), 1037/2001 (EE) eta 1234/2007 (EE) erregelamenduak indarrik gabe uzten dituen Europako Parlamentuaren eta Kontseiluaren 2013ko abenduaren 17ko 1308/2013 (EB) Erregelamenduaren II. kapituluko 4. atalak eta 1234/2007 (EE) Erregelamendua garatzeko arauak mahastizaintzaren sektorean laguntza programei dagokienez ezarri dituen Batzordearen ekainaren 27ko 555/2008 (EE) Erregelamenduaren II. tituluko II. kapituluko 2. atalak arautzen dituzte mahastiak berregituratzeari eta birmoldatzeari buruzko xedapenak, mahastizaintzako ekoizleen lehiakortasuna handitzeko neurri gisa.

Abenduaren 19ko 1079/2014 Errege Dekretuak oinarrizko araudia ezarri du Espainiako mahastizaintza eta ardogintza sektorerako laguntza programaren neurriak aplikatzeko. Aipatu errege dekretuaren II. kapituluko 2. atalak mahastia berregituratu eta birmoldatzeko laguntzei aplikatzen zaien oinarrizko araudia biltzen du. Dena dela, bertako aurreikuspen batzuk zehazteko, autonomia erkidegoen arau osagarri baten beharra dago.

Horrenbestez, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22. artikuluak ematen dizkidan eskudantziak erabiliz eta Landa Garapeneko, Ingurumeneko eta Toki Administrazioko Departamentuaren egitura organikoa ezartzen duen ekainaren 25eko 70/2012 Foru Dekretuarekin bat,

EBATZI DUT:

1.–Mahastia berregituratu eta birmoldatzeko planetarako laguntzak emateko deialdia onestea, 2015-2016 kanpainarako.

2.–2015-2016 kanpainan mahastia berregituratu eta birmoldatzeko planetarako laguntzak arautzen dituzten oinarriak, ebazpen honen I. eranskinean jasoak, onestea.

3.–2016ko ekitaldian Nekazaritza Bermatzeko Europako Funtsak (NBEUF) Nafarroako Foru Komunitateari bideratzen dion aurrekontuak aukera ematen duen heinean erantzunen zaie foru agindu honen ondoriozko gastu konpromisoei.

4.–Ebazpen hau eta eranskinak Nafarroako Aldizkari Ofizialean argitaratzea.

Ebazpen honek ez du administrazio bidea amaitzen, eta interesdunek gora jotzeko errekurtsoa jartzen ahal dute haren kontra, Landa Garapeneko, Ingurumeneko eta Toki Administrazioko kontseilariari zuzendua, argitara eman eta biharamunetik hilabeteko epean.

Iruñean, 2015eko maiatzaren 5ean.–Nekazaritza eta Abeltzaintzako zuzendari nagusia, Ignacio Guembe Cervera.

I. ERANSKINA

Mahastia berregituratu eta birmoldatzeko planetarako laguntzak emateko deialdiaren oinarri arautzaileak, 2015-2016 kanpainarako

Lehena.–Xedea eta aplikazio eremua.

1.–Nafarroako Foru Komunitatean mahastia berregituratu eta birmoldatzeko plan berrien aurkezpena eta onespena arautzea du xede ebazpen honek, mahastizaintzaren eta ardogintzaren merkatuaren antolakunde bateratuaren barrenean, eta plan horietan aurreikusitako jarduketetarako NBEUF laguntzak eskuratzea 2015-2016ko kanpainarako.

2.–Ardoa egiteko mahatsa ekoizten duten mahastiak berregituratu eta birmoldatzeko aurkezten diren plan berrietan aplikatzeko izanen dira oinarri hauek, betiere haien lurzatiak Nafarroako Foru Komunitatearen lurraldean badaude, eta “Nafarroa” jatorrizko deituraren babesean, “3 Erribera” adierazpen geografiko babestuan, “Queilesko Erribera” adierazpen geografiko babestuan, edo “Errioxa” jatorrizko deitura kalifikatuaren barrenean.

3.–Ez da laguntzarik emanen ekintza hauetarako:

a) Berezko ziklo naturala bukatua duten mahastien berritze normala, hots, lurzati bera mahatsondo barietate berarekin eta landaketa metodo beraren arabera birlandatzea.

b) Azkeneko hamar urteetan mahastia berregituratu eta birmoldatzeko laguntzen onuradun izan diren azalerak (salbu eta ontzi itxurako mahatsondotik besora pasatzeko izan bada). Epe hori onuradunak azalera horretarako ordainketa eskatu zuen egunetik hasita kontatuko da, edo, aurrerakina eskatuz gero, saldoaren likidazioa eskatu zuenetik.

c) Mahatsondoak atera eta berriak landatzea, abuztuaren 4ko 1472/2000 Errege Dekretuaren 2. artikuluan aipatzen diren landaketa berrien kontzesioaren ondorioz egina (aipatu errege dekretuak ardo produkzioaren ahalmena arautzen du, landaketa egin eta hamar urte pasatu arte).

d) Mahasti baten eguneroko kudeaketa-lanak.

e) Lurzatiak berrantolatzeko prozesuan dauden eremuetako lurzatietarako eskaerak, Landa Garapeneko, Ingurumeneko eta Toki Administrazioko Departamentuko Nekazaritzako Azpiegituren Zerbitzuaren baimena duten lurzatietarako izan ezik.

f) Mahastiekin batera beste labore bat duten esparruetan neurriei dagozkien azalerak.

Bigarrena.–Onuradunak.

Ardoa egiteko mahatsa ekoizteko mahastiak dituzten mahastizainak izan daitezke mahastiak berregituratu eta birmoldatzeko araubidearen onuradun.

Mahastien ustiategiko edozein azalerari dagokionez mahastiak landatzeari buruz indarra duen araudiari aurka egiten dioten titularrak ezin izanen dira diru-laguntzaren onuradunak izan.

Hirugarrena.–Diru-laguntza jaso dezaketen neurriak.

1.–2015-2016ko kanpainan, mahastiak berregituratzeko eta birmoldatzeko laguntza ondoko jarduera baterako edo batzuetarako eman daiteke soilik:

a) Mahastiak berrezartzea.

b) Mahats barietatea aldatzea.

c) Mahastiak kudeatzeko teknikak hobetzea, ontzi itxurako mahastitik besorako mahastira aldatzeko.

2.–Aurreko atalean aipatutako neurriei laguntza emateko, honako definizio hauek finkatu dira:

a) “Mahastiak berrezartzea”: lurzati bateko edo batzuetako mahatsondoak beste landaketa baten edo batzuen bidez ordeztea, betiere azalera bera badute. Mahastizaintzako lurzati berean berrezartzen bada, barietate aldaketa edo laborantza metodoaren aldaketa egin dela frogatu beharko da, gidamoduaren sistema edo txertaka aldatu dela ulertuta.

Lurzatiak berrantolatzeko prozesu batean, lurzatiak berrantolatzeko eremuan mahastiak kentzearen ondorioz sortutako eskubide guztiak baliozkoak izanen dira mahastia berrezartzeko.

b) “Mahats barietatea aldatzea”: mahasti lurzati bateko barietatea aldatzea, oraingo barietatearen gainetik txertatuz, lurzatiko mahatsondo kopurua handitu gabe. Barietatearen aldaketa 2011-2012 kanpainaren aurretik landatutako lurzatietan baizik ez da egiten ahalko.

c) “Ontzi itxurako mahastitik besorako mahastira aldatzeko jarduera”: gidamodu baxua duen mahastia besorako gidamodura jasotzeko ekintzak, mahastia modu egokian mekanizatu ahal izateko, bereziki inausketa eta mahats-bilketari dagokienez. Transformazioa landare eta osasun egoera onean dauden mahastietan baizik ez da egiten ahalko, betiere 2011-2012 kanpainaren aurretik landatuak baldin badira.

d) Behar diren kontseilu arauemaileek edo agintaritza eskudunak baimendutako barietate guztiek jaso dezakete diru-laguntza.

Laugarrena.–Mahastiak berregituratu eta birmoldatzeko planak.

1.–Mahastiak berregituratu eta birmoldatzeko araubidea berregituratu eta birmoldatzeko planen bitartez gauzatuko da, eta plan horiek bete beharreko neurriak ekarriko dituzte. Planak kolektiboak izanen dira, urtean betetzekoak.

2.–Mahastiak berregituratu eta birmoldatzeko plan kolektibo bat osatzeko gutxienez 20 mahastizain beharko dira.

3.–Planak mahastizain parte-hartzaileen artean sinatutako itun baten barnean eginen dira. Itun horren arabera planean parte hartzen dutenek ordezkari bat izendatu beharko dute, administrazio publikoarekin izan beharreko harremanez arduratzeko.

Bosgarrena.–Mahastiak berregituratu eta birmoldatzeko planen aurkezpena.

1.–Mahastiak berregituratu eta birmoldatzeko plan baten babesa nahi duten mahastizainek eskaera aurkeztu beharko dute 2015eko uztailaren 31 baino lehenago, beren plan kolektiboaren ordezkariaren bitartez. Eskaerak Landa Garapeneko, Ingurumeneko eta Toki Administrazioko Departamentuan aurkeztuko dira zuzenean edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38. artikuluan aipatzen diren baliabideetakoren bat erabiliz, Nafarroako Gobernuaren Interneteko Atariko zerbitzuen katalogoan eskuratzen ahal den ereduaz baliatuz.

2.–Diru-laguntzaren xede diren jarduerak egin baino lehen aurkeztu beharko dira eskaerak.

3.–Eskatzaileek, laguntza eskabidearekin batera, agiri hauek aurkeztu beharko dituzte:

A) Planaren proiektua, eduki honekin:

–Planaren helburuak.

–Planaren kokapena eta identifikazioa.

–Hura osatzen duten mahastizainen identifikazioa.

–Banakako fitxa, nekazaritza eta finantza arlokoa. Planean parte hartzen duen ekoizle bakoitzak gauzatuko dituen neurriak jasoko dira hartan: mahastia berrezartzeko, barietatea aldatzeko eta ontzi itxurako mahatsondoa besorako mahasti bihurtzeko. Fitxa horretan lurzatien kokapena eta ezaugarriak zehaztu behar dira, hasierakoak zein berregituratuak izan (barietateak, txertakak, eraketa sistemak, landare-tarteak, etab.), plana osatzen duten lurzatien NELIGS barrutiak identifikatuta, baita proiektuko landaketa eskubideak ere, ustiategiaren barneko edo handik kanpoko eskubideak eta aurreikusitako inbertsioaren zenbatekoa zehaztuz.

–Eskaturiko planaren laburpen fitxa.

B) Osatu gabeko barrutiak sartzen badira, krokis bornatu bat erantsi beharko da, planean berregituratzeko edo moldatzeko sartutako azalera non dagoen jakin ahal izateko.

C) Planean parte hartzen duten mahastizainen artean izenpeturiko akordioa.

D) Planean parte hartzen duten eskatzaileen NANaren edo IFKaren fotokopia eta haien datu pertsonalak.

E) Nekazari gaztea izanez gero, plana aurkeztu baino lehen Beren Konturako Langileen edo Autonomoen Araubide Berezian afiliaturik dagoela frogatzen duen agiria. Lehen instalazioaren kasuan, hori frogatzen duten agiriak.

F) Ogibide nagusia nekazaritza duenaren kasuan, lehentasunezko ustiategi baten titularra edo titulartasun partekatuko ustiategi batena denean, bere ustiategia Nafarroako Nekazaritza Ustiategien Erregistroaz besteko erregistro batean inskribatuta badago, horren ziurtagiria, dagokion Nekazaritza Ustiategien Erregistroak luzatua.

G) Elkarteen kasuan, laguntza hauetarako prozesuan elkartearen ordezkari aritzeko baimena duen pertsonaren identifikazioa agertzen duen dokumentazioa.

H) Eskaturiko lurzatien egiaztagiria:

h.1) Lurzatiak eskatzailearenak baldin badira, Landalurreko Ondasunen Katastroko orrialdea aurkeztuko da, gaurkotua, edo bestela, jabetzaren eskritura publikoa. Berriki lurzatien berrantolamendua egin duten udalak izanez gero, berrantolamenduan esleitutako lurren orrialdea aurkeztuko da, eta, lurzatiak berrantolatzeko prozesuan lurzatien jabetzan aldaketak izaten badira gero, organo eskudunak emandako dokumentazioa aurkeztuko da, lurzatiaren titularra nor den jakiteko.

h.2) Lurzatiak eskatzailearenak ez badira, haiek erabiltzeko eskubidea modu hauetakoren batean frogatu beharko da:

–Errentamenduko kontratua, plana aurkeztu baino lehenagokoa, eredu ofizialaren arabera betea, Landalurreko Errentamenduen Erregistroan inskribatua. Haren indarraldia 2026ko uztailaren 31 artekoa izanen da, gutxienez ere, eta erauzteko unean landaketa eskubideen hartzailea nor den jasoko da.

–Lurzatiaren gaineko gozamen eskubidea badela agiriz frogatzea.

–Herrilurrak izanez gero, udalaren ziurtagiria, non esleipen-hartzailea, esleipenaren eguna eta iraupena jasoko baitira.

I) Planari birlandatze eskubideak ekarriz gero, erauzteko justifikazioa azalduko da, eskubideak norberarenak badira, eta transferentziaren justifikazioaren fotokopia, eskubideak transferentzia bidez eskuratu badira.

J) Berrezartze neurri guztietan, lurzati bakoitzean landatzeko baimenaren (behar bezala betea) eskabidearen fotokopia.

Mahastia laguntza eskatu ondoren kentzeko asmoa baldin bada, erauzketaren deklarazio orriaren fotokopia gehitu beharko da (plana aurkezten denerako jada betea egonen da orri hori).

K) Birmoldatzeko eta ontzi itxuratik besora pasatzeko neurrietan, Mahastien Erregistroan aldaketa egiteko behar bezala betetako eskabidearen fotokopia.

L) Lurzatiak berrantolatzeko prozesuan dauden eremuetako lurzatien kasuan, oraindik horri buruzko akordiorik ez badago, Landa Garapeneko, Ingurumeneko eta Toki Administrazioko Departamentuaren Nekazaritzako Azpiegituren Zerbitzuaren baimena.

Seigarrena.–Plan kolektiboen baldintzak.

1.–Mahastiak berregituratzeko eta birmoldatzeko plan bakoitzaren esparruan guztira berregituratzen edo birmoldatzen den azalera 10 hektareakoa izanen da gutxienez.

2.–Planean sartutako mahasti bakoitzak, behin berregituratuta edo birmoldatuta, gutxienez 0,5 hektarea izan behar du. Dena dela, berregituratze eta birmoldatze plana egin ondoren gelditzen diren lurzatien kopurua hasierako kopuruaren %80 baino txikiagoa baldin bada, muga hori txikiagoa izaten ahalko da. Mahastiak titular beraren beste lurzati batekin egiten badu muga, orduan ere 0,5 hektarea baino txikiagoa izan liteke.

Ondorio horietarako, hauxe hartuko da mahasti-lurzatitzat: mahastizain bakar batek mahatsondoak lantzeko duen azalera etenik gabea, barruti bakar batek edo erreferentzia alfanumeriko bat edo gehiago dituzten barruti puskek osatua, Nekazaritzako Lurzatien Informazio Geografikorako Sisteman grafikoki irudikatua (hemendik aurrera NELIGS).

Mahats barietatea aldatzeko edo ontzi itxuratik besora aldatzeko lana besterik ez bada, gutxieneko azalera hasierakoa izanen da.

3.–Diru-laguntza jasoko duen azalera, gehienez, zortzi hektarea izanen da mahastizain bakoitzeko. Inguruabar tekniko edo ekonomikoek eskatzen dutenean, gehieneko muga hori aldatzen ahalko da, Landa Garapeneko, Ingurumeneko eta Toki Administrazioko Departamentuak proposaturik.

4.–Planetan ezin izanen dira sartu Mahastien Erregistroa eguneratzean esleitutako landaketa berrien eskubideak edo birlandaketen eskubideak.

5.–Eskualdeko erreserbatik lortutako landaketa eskubideak sartzen ahalko dira planetan, ezartzen den araudiari jarraikiz.

6.–Landaketa guztietan nahitaezkoa izanen da txertaka ziurtatuak erabiltzea. Erabiltzen diren landaregaien horniketa legez baimendurik eta mahatsondo mintegizainen Erregistro Ofizialean izena emanak dauden mintegizainek egin beharko dute. Diru-laguntza jasotzeko, baimendutako merkatariaren edo mintegizainaren faktura eta ordainagiria aurkeztu behar dira nahitaez.

7.–Mahastia berrezartzeko eskatutako barrutiak ezin izanen ditu NELIGSen erabilera hauek: zuhaixka-larreak, larreak edo larre zuhaiztunak.

Zazpigarrena.–Planak onestea eta funtsak esleitzea.

1.–Eskabideak ezarri diren betebeharrak betetzen ez baditu, eskatzaileari 10 eguneko epean akatsak zuzentzeko eskatuko zaio, edo behar diren dokumentuak aurkezteko. Hala egin ezean, eskaera bertan behera utzi duela ulertuko da.

2.–Nekazaritza eta Abeltzaintzako zuzendari nagusiak ebatziko du planen onespena, baina onespen horrek ez dio Administrazioari ekarriko etorkizunean gasturik egiteko bestelako konpromisorik.

3.–Eskaera osoa aurkezten denetik sei hilabeteko epea ebazpenik jakinarazi gabe iraganik, eskaera ezetsi egin dela ulertzen ahalko da.

4.–2016ko ekitaldian NBEUFetik Nafarroako Foru Komunitatearen esku utzitako diru kopuruak, lehenik eta behin, aurreko ekitaldietan egin baino ordaindu gabeko berregituratze eta birmoldatze planetan erabiliko dira, zaharrenetik hasita, eta gero, 2015-2016 kanpainan ebazpen honen arabera aurkeztutako planetan, NBEUFk Nafarroaren esku utzitako aurrekontuaren zenbatekoa agortu arte.

5.–Urriaren 4ko 35/2011 Legearen arabera, titulartasun partekatuko ustiategi gehien dituzten planek izanen dute lehentasuna laguntzak hartzeko.

6.–Aurrekontuan dagoen diru erabilgarria ez bada aski 2015-2016ko kanpainan aurkeztutako planei arreta emateko, lehentasunaren irizpide hauek hartuko dira kontuan:

a) Titulartasun partekatuko ustiategiak.

b) Nekazari gaztea.

c) Ogibide nagusia nekazaritza duena.

d) Lehentasunezkotzat jotzen diren ustiategiak.

e) Upategi elaboratzaileak.

f) Nafarroako Nekazaritzako Ustiategien Erregistroan inskribatuta dauden bestelako nekazaritza ustiategiak.

g) Gainerako parte-hartzaileak.

6.1.–Orobat, eskatzaile kategoria bakoitzaren barrenean, taldekako plan berrientzat ezartzen den lehentasun ordenari jarraituko zaio, puntuazio honen arabera:

a) 10 puntu Beren Konturako Langileen edo Langile Autonomoen Araubide Berezian alta emanda dagoen nekazari gazte bakoitzeko.

b) 7 puntu, ogibide nagusia nekazaritza duen nekazari bakoitzeko.

c) 7 puntu, lehentasunezkotzat jotzen den ustiategi bakoitzeko.

d) 5 puntu, Nafarroako Nekazaritzako Elikagai Industrien Erregistroan inskribatutako upategi elaboratzaile bakoitzeko.

e) 2 puntu, Nafarroako Nekazaritzako Ustiategien Erregistroan inskribatuta dagoen bestelako nekazaritza ustiategi bakoitzeko.

f) Puntu bat, gainerako parte-hartzaile bakoitzeko.

6.2.–Plan berrietako eskaeretan parte hartzen dutenen artean berdinketa badago, ordena hau hartuko da kontuan lehentasuna emateko:

–Eskabidean gomendatutzat sailkatutako barietate kopuru handiena onetsia duten parte-hartzaileak.

–Lur gutxien berregituratu edo moldatzen duten parte-hartzaileak.

Zortzigarrena.–Laguntzaren kalkulua.

1.–Laguntzak kalkulatzeko, ebazpen honen II. eranskinean aipatzen diren eragiketak eta kostuak hartuko dira kontuan, honelaxe:

a) Mahasti barietatea aldatzeko laguntzarako, oraingo barietatearen gainetik txertatzeagatik izandako kostuak hartuko dira kontuan (kostu jakin bat txertaketa unitate bakoitzeko). Mahatsondo batean egiten dena hartzen da txertaketa unitatetzat, edozein delarik ere mahatsondo horretan sartu beharreko zirien kopurua.

b) Mahastia berrezartzeko laguntzarako, ekintza hauek hartuko dira kontuan: Zaharrak ateratzea (mahatsondoak biltzea barne), lurra prestatzea, desinfekzioa, lurra berdintzea, landarea eta landatze-lana, landatzeko momenturako untxien kontrako babes indibiduala (jartzeko lana barne) eta besorako euskarria (jartzeko lana barne).

Ondorio horietarako, lurraren nibelazioa diruz laguntzeko modukoa izanen da, soilik, lurrak mugitzearen helburua denean lurrak denboraldiko ureztaketak uholdeka egiteko mailan uztea.

Ez da mahatsondoak kentzeko kostua finantzatuko baldin eta berriro landatzeko erabiltzen diren eskubideak ez badira sortu moldatzeko planaren aplikazioan, eta mahatsondoak plana eskatu aurretik atera badira.

c) Ontzi itxurako mahatsondoa besorako bihurtzeko laguntzaren kasuan, ontzi itxurako mahatsondoa besorako bihurtzeko operazioa hartuko da kontuan, hirugarren oinarriko 2c puntuan xedatuarekin bat.

2.–Mahasti baten azalera berregituratu eta birmoldatzeagatik, mahastizainak jaso dezakeen laguntzaren zenbatekoa zehazteko, berregituratutako edo mahatsondoak kendutako mahastiaren azalera neurtuko da, Kontseiluaren ekainaren 27ko 555/2008 (EE) Erregelamenduaren 75. artikuluan ezarritako metodoari jarraikiz.

3.–Diru-sarreren galera konpentsatzeko laguntza Nafarroako Foru Komunitatean 2015-2016 kanpainarako izanen da, onesten diren plan berrietarako. Honako hauek:

–450,00 euro hektareako, “Nafarroa” jatorrizko deiturarako, “3 Erribera” adierazpen geografiko babesturako eta “Queilesko Erribera” adierazpen geografiko babesturako.

–820,00 euro hektareako, “Errioxa” Jatorrizko Deitura Kalifikaturako.

4.–Errenta galtzeagatiko laguntza bi kanpainatan emanen da, mahastien berrezartze neurrietarako, inguruabar hauek izaten direnean:

–Berrezarri beharreko lurzatiko mahatsondoak plana eskatu ondoren eta 2015eko azaroaren 15a baino lehen kendu direnean.

–Laguntza eskatu duen mahastizainak lurzatiaren jabetza eta titulartasuna frogatzen dituenean Landa Garapeneko, Ingurumeneko eta Toki Administrazioko Departamentuko Mahastien Erregistro Ofizialean, eta mahastiak berak kendu dituenean, berriro landatzeko eskubideak bere izenean adierazita; edo, laguntza eskatu duen mahastizainak Landa Garapeneko, Ingurumeneko eta Toki Administrazioko Departamentuko Mahastien Erregistro Ofizialean titulartasuna bakarrik frogatzen duenean, jabetza izan gabe, eskatzaileak berak kenduak izanen dira mahatsondoak, jabea ados dagoela, berriro landatzeko eskubideak bere izenean adierazita.

5.–Berregituratutako azalerek ez dute diru-sarrerak galtzeagatiko kalte-ordainik jasotzeko eskubiderik izanen baldin eta berriz landatzeko erabiltzen diren eskubideak ez badira sortu moldatzeko planaren aplikazioan, eta mahatsondoak plana eskatu aurretik atera badira.

6.–Barietateak aldatzeko eta ontzi itxurako mahatsondoko lurzatia besorako mahasti bihurtzeko neurrietan, kanpaina bakar batean emanen da laguntza errenta galtzeagatik, eta laguntza eskatzen duen mahastizainak honako hauek frogatu beharko ditu:

–Mahastiaren jabetza eta titulartasuna, Landa Garapeneko, Ingurumeneko eta Toki Administrazioko Departamentuko Mahastien Erregistro Ofizialean, edo

–Mahastiaren titulartasuna Landa Garapeneko, Ingurumeneko eta Toki Administrazioko Departamentuko Mahastien Erregistro Ofizialean baizik frogatzen ez badu, jabetza izan gabe, aldaketa egiteko eskaera aurkeztu beharko du Landa Garapeneko, Ingurumeneko eta Toki Administrazioko Departamentuko Nekazaritzako Erregistroen Atalean, jabeak baimendurik egin beharreko hobekuntza adierazita.

7.–Harriak kentzeko operazioak, lurrak desinfektatzekoak eta lurrak nibelatzekoak, mahastizainak aldez aurretik eskatu behar ditu, eta ondoko baldintza hauek bete behar dituzte:

a) Lurra desinfektatzeko lanetarako laguntzak ematen ahalko dira, betiere mahatsondoak 2011ko abuztuaren 1etik aurrera kendu diren lurzatian egiten bada landaketa berria.

b) Harriak kentzeko eta lurra berdintzeko laguntzak ematen ahalko dira, betiere lan horiek egin egin direlako dudarik ez badago. Laguntza emateko ezinbesteko baldintza izanen da lanak hasiko direla jakinaraztea, hasi baino 10 egun lehenago gutxienez, Landa Garapeneko, Ingurumeneko eta Toki Administrazioko Departamentuko Merkatuen Erregulaziorako Atalean. Epe horretan ez bada egiten aldez aurreko jakinarazpena, operazioa ezin izanen da aukeratu laguntza ordaintzeko.

8.–Mahastia berregituratu eta birmoldatzeko kostuetako parte-hartzea ebazpen honen II. eranskinean bildutako lanetarako baizik ezin izanen da egin. Bakarka ezin izanen da finantzatu lanik, salbu eta gainetik txertatzeko lana edo ontzi itxuratik besora aldatzekoa. Bigarren eskuko materialagatik ere ezin da laguntzarik jaso.

Ebazpen honen II. eranskinean bildutako gehieneko zenbatekoen %50 da berregituratze eta birmoldatze plan bakoitzari gehienez emanen zaion laguntza. Jasotako diru kopuruak ezin izanen du inola ere gainditu portzentaje hori onuradunak berak egin gabeko lanen gastu egin eta egiaztatuaren gainean aplikatuta ateratzen den kopurua (gastuak, nahitaez, faktura eta ordainagirien bidez egiaztatuak).

Mahastizainak berak egin dituen operazioen kasuan, eta, hori dela eta, gastuaren ordainagiririk ez badago, laguntzen kostuak justifikatzeko, kontuan hartuko da Nafarroako Foru Komunitatean mahastiak berregituratu eta birmoldatzeko neurri bakoitzean sartuta dauden operazioak burutzeko egiten diren lanen kostuei buruzko azterlana, Nekazaritza Zerbitzuak egindakoa, III. eranskinaren arabera.

Laguntza guztira kalkulatzeko, II. eranskinean finkatutako gehieneko mugak hartuko dira aintzat, egin diren eragiketen gastu eta ordainketaren ordainagiriak aurkeztu ondoren. Nolanahi ere, fakturatutako zenbatekoa, edo fakturatutako zenbatekoa gehi eskulanaren kosturako kalkulatutakoa II. eranskinean ezarritako gehieneko zenbatekoa baino txikiagoa bada, laguntza zenbateko justifikatuaren arabera likidatuko da.

9.–Baldintza hauek gertatzen direnean, planaren onespenaren ondoriozko eskubide eta betebeharrak subrogatzeko baimena ematen ahalko da:

a) Lurzatia aldatzean.

a.1) Lurzati berrian ez da onartuko jatorrizkoan eskatu eta onetsi gabeko lanik.

a.2) Lan guztiak lurzati berriaren gainean ordainduko dira.

b) Mahastizain berri bati subrogazioa baimentzen bazaio, horrek bere gain hartu beharko ditu subrogatutako lurzatietarako onetsitako planean mahastizainak hartutako konpromisoak.

10.–Eskatzailearen edo diru-laguntzaren xede diren lurzatien aldaketaren bat izaten bada, aldaketa egin aurretik jakinarazi beharko da, eta betiere Merkatuen Erregulaziorako Atalak eman behar du baimena.

11.–Europako Parlamentuaren eta Kontseiluaren 2013ko abenduaren 17ko 1306/2013 (EE) Erregelamenduaren 2. artikuluan aipatutako ezinbesteko kasuetan edo salbuespenezko egoeretan edo desjabetzeetan izan ezik, planetan sartzen diren azalerek gutxienez hamar urtez egon beharko dute landaturik ordainketa eskatu eta hurrengo kanpainatik hasita.

Lurzatian nekazaritzako azpiegituretarako jarduerak egin behar izateagatik edo interes orokorreko herri lanen exekuzio batengatik laguntza hauek jaso dituen onuradunak ezin badio eutsi hartutako konpromisoari, espresuki eskatu beharko dio organo kudeatzaileari hartutako konpromisotik salbuesteko, hori justifikatzen duen dokumentazioa aurkeztuta. Dokumentazio hori azterturik ezintasun hori ondorioztatzen bada, onuraduna salbuetsia egonen da. Beraz, konpromisoa bukatutzat jo, eta ez da exijituko jasotako laguntza itzultzea.

12.–Planetan sarturiko azalerak gutxienez ere hamar kanpainatan landatuta eduki beharra betetzen ez bada, jasotako laguntza gehi legez dagokion interesak itzuli beharko ditu onuradunak.

13.–Egiaztatzen bada onuradunak, mahastia berregituratu eta birmoldatzeagatik lehen laguntza jaso eta urte natural horretako urtarrilaren 1etik hurrengo hiru urtean, ez dituela errespetatu bere ustiaketan kudeaketarako legezko betekizunak eta nekazaritzarako zein ingurumenerako baldintza egokiak, Europako Parlamentuaren eta Kontseiluaren 2013ko abenduaren 17ko 1306/2013 (EE) Erregelamenduaren 91., 92., 93., 94. eta 95. artikuluetan aipatuak, laguntzaren zenbatekoa, onuradunari zuzenean leporatzen ahal zaion ekintza edo omisioagatik bete ez bada, hein batean edo erabat murriztuko edo deuseztatuko da, zein den hutsegitearen larritasuna, hedadura, iraupena eta errepikapena, eta onuradunak, bidezkoa bada, itzuli egin beharko du, aipatu xedapenen arabera. Baldintza horiek betetzen direla kontrolatzeko, informazio eguneratua izan beharko da, onuradunaren ustiategiaren parte diren lurzati guztien NELIGSeko erreferentzia alfazenbakikoei buruz.

Bederatzigarrena.–Aurrerakinak.

1.–Hamargarren oinarrian xedatua gorabehera, planetan parte hartzen dutenek aurrerakina eskatzen ahalko dute, onetsitako laguntzaren %70era bitarte, betiere baldintza hauek betetzen badituzte:

a) Aurrerakina zein neurritarako eskatzen den, horren exekuzioa abian dagoenean, eta 2016ko maiatzaren 20an bukatuta ez badago. Ondorio horietarako, exekuzioa abian dagoela ulertuko da baldin eta landaketak erauzi badira, landarea erosi izanaren faktura eta ordainketaren bankuko egiaztagiria eman badira edo bestelako eragiketa atzeraezin bat behar bezala frogatzen edo egiaztatzen bada.

b) Berme bat eratuta dagoenean, laguntzaren aurrerakinaren %120ren berdina.

2.–Aurrerakinak ematen direnean, nahitaez bete behar da neurria, eta bukatu dela idatziz jakinarazi 2016ko ekainaren 30a baino lehen. Ezarritako epeetan neurria gauzatzen ez bada, mahastizainak jaso duen aurrerakina osorik itzuliko du, baita hura eman zitzaion unetik aurrera dagozkion legezko interesak ere, non ez dauden azalera horiek agintari eskudunek onartutako hondamendi natural bat jasan duen eremu batean, edo non ezin diren eragiketa aurreikusiak gauzatu, erakunde baimendu batek egiaztatuta dituen arazo fitosanitarioen ondorioz. Kasu horietan, neurria gauzatzeko epea egokitzen ahalko da aurrerakina itzuli behar ez izateko, eta neurria 2018ko uztailaren 31 baina lehen gauzatuz gero, saldoa ordainduko da.

Laguntzarako eskubidea izateko, aurrerakina zein azalerarako kobratu zen, haren exekuzioa %80an bete behar du mahastizainak. Ezarritako portzentajea lortu ezik, emandako aurrerakina itzuliko du, gehi aurrerakina ordaintzen den unetik hasita sortutako legezko interesak, ezinbesteko kasuetan edo salbuespenezko egoeretan izan ezik.

Aurrerakina mahastia berregituratu eta birmoldatzeko zein neurritarako eman zen, hura bete ondoren, mahastizainak jaso dezakeen behin betiko laguntza zehaztuko da. Horretarako, berregituratu edo birmoldatutako azalerak neurtuko dira Batzordearen ekainaren 27ko 555/2008 (EE) Erregelamenduaren 75. artikuluan ezarritako metodoari jarraikiz. Jasotako aurrerakina eskubidearena baino handiagoa bada, mahastizainak jaso duenaren eta dagokionaren arteko aldea itzuliko du, gehi aurrerakina ordaintzen den unetik hasita sortutako legezko interesak, ezinbesteko kasuetan edo salbuespenezko egoeretan izan ezik.

Jasotako aurrerakina eskubidearena baino txikiagoa bada, mahastizainak aldea kobratzeko eskubidea izanen du. Dena dela, laguntza, guztira, ezin da hasieran eskatu zena baino handiagoa izan.

3.–Aurrerakinaren xedeko eragiketak gauzatzeko eginbeharra betetzen ez bada, arau-hauste arintzat joko da Mahastiei eta Ardoari buruzko uztailaren 10eko 24/2003 Legearen 38.1.g) artikuluan ezarritakoaren arabera, eta aipatu legearen 42.1 artikuluan ezarritakoari jarraikiz zehatuko dira.

4.–Mahastiak berregituratu eta birmoldatzeko neurrirako ematen diren aurrerakinen kasuan, 33. artikuluaren arabera, onuradunek urtero, urriaren 31 baino lehen, jakinarazi beharko diote erakunde ordaintzaileari urte bakoitzeko urriaren 15a arte erabilitako aurrerakinak egiaztatzen dituzten gastuen aitorpena, eta urriaren 15a arte erabili gabeko aurrerakinetatik gelditzen den saldoa berretsiko dute. Gastuen aitorpen hori 2015eko urriaren 31 baino lehen egin beharko da lehen aldiz.

Hamargarrena.–Laguntza onuradunei ordaintzea.

1.–Aurrera eramandako neurriak bukatu direla idatzita jakinarazi beharko da 2016ko maiatzaren 20a baino lehen. Bederatzigarren oinarrian zehazten den laguntzaren aurrerakina eskatuz gero, 2016ko ekainaren 30a bitarte egiten ahalko da.

a) Onuradunak, jakinarazpenarekin batera, laguntza jasotzeko eskaera aurkeztu beharko du, eta, horrekin batera, onuradunak egindako gastuen frogagiriak eta fakturak.

Ordainketa frogatzeko, banku bidezko mugimendua azaltzen duten fakturak eta ordainketa agiriak aurkeztuko dira. Dena dela, eskudirutan egindako ordainketak onartuko dira 2.500 eurotik beherako fakturetarako, urriaren 29ko 7/2012 Legearen 7. artikulua aplikatuta; lege horren bidez, tributuen eta aurrekontuen gaineko araudia aldatu eta finantza-araudia egokitzen da iruzurraren kontrako prebentzio-ekintzak eta iruzurraren kontra borrokatzeko ekintzak areagotzearren. 2.500 eurotik beherako fakturak eskudirutan ordaintzen direnean, ordainketa eguna eta enpresaren zigilua eta sinadura identifikatzailea daramatzan hartu-agiri baten bidez egiaztatuko da fakturaren justifikazioa.

Mahastizainak berak zenbait eragiketa burutu baditu, espres adierazi beharko da ordainketaren eskaeran, baita egindako lan bakoitzaren deskripzio zehatza ere, eta hura burutzeko behar den makineria egokia izatearen justifikazioa erantsiko da.

b) Eragiketa bakoitzeko faktura bat aurkeztu behar da, edo, bestela, fakturan eragiketa bakoitzari dagokion zenbatekoa zehaztu.

c) Laguntza eskatzen duen mahastizainaren izenean eginen dira faktura guztiak, eta haietan, eragiketa zein lurzatitan egiten den, haien NELIGS erreferentziak zehaztuko dira.

Dagokion erregistro ofizialean inskribatuta dagoen merkatari baimendu edo mintegizain batenak izan beharko dute landarearen fakturek, eta haietan, zer landare material den (txertaka eta barietatea) adierazi behar da.

2.–Lurzatietan neurriak guztiz hartu direla eta onetsitako planei lotzen zaizkiela frogatutakoan ordainduko dira laguntzak, zortzigarren oinarrian ezarritako kalkuluaren arabera.

3.–Mahastizainak, planean laguntza lortu zuen azaleraren %80an gutxienez ez badu gauzatu berregituraketa eta/edo birmoldaketa, ez du laguntzarako eskubiderik izanen. Era berean, gauzatu ez diren neurriengatik ez da ordainduko. Mahastizainak laguntzaren xedeko ekintzak gauzatzen ez baditu, arau-hauste arintzat joko da Mahatsondoei eta Ardoari buruzko uztailaren 10eko 24/2003 Legearen 38.1.g) artikuluan ezarritakoaren arabera, eta aipatu legearen 42.1 artikuluan ezarritakoari jarraikiz zehatuko dira.

4.–Nekazaritza eta Abeltzaintzako zuzendari nagusiak emanen du laguntzak eman eta ordaintzeko ebazpena.

Hamaikagarrena.–Oinarri arautzaileen kontrako errekurtsoa.

Deialdiaren eta oinarri arautzaileen aurka gora jotzeko errekurtsoa jar daiteke, Landa Garapeneko, Ingurumeneko eta Toki Administrazioko kontseilariari zuzendua, argitaratu eta biharamunetik hilabeteko epean.

II. ERANSKINA

Mahastia berregituratu eta birmoldatzeko gehieneko kostuak

a) Mahastia berrezartzea:

Erauzketa (mahats-orpoak biltzea barne): 430 euro/ha.

Lurra prestatzea: 1.400 euro/ha.

Desinfekzioa: 2.000 euro/ha.

Harriak kentzea: 400 euro/ha.

Lurra berdintzea: 800 euro/ha.

Landarea eta landaketa: 1,69 euro unitate bakoitzeko.

Landaketa egiten den momentuan landarea banan-banan babestea untxien kontra (jartzea barne): 0,50 euro unitate bakoitzeko.

Besorakoa (jartzea barne): 3.400 euro/ha.

b) Mahastiak birmoldatzea:

Oraingo barietatearen gainetik txertatzea: 0,90 euro unitate bakoitzeko.

c) Mahastiak kudeatzeko teknikak hobetzea:

Ontzi itxurako mahatsondoa besora aldatzea: 600 euro/ha + besorako euskarria.

Iragarkiaren kodea: F1506911