1. NAFARROAKO FORU KOMUNITATEA
1.4. DIRU-LAGUNTZAK, LAGUNTZAK ETA BEKAK
250/2015 FORU AGINDUA, apirilaren 22koa, Gizarte Politiketako kontseilariak emana, Kazetaritzan eta Ikus-entzunezko Komunikazioan lizentziadun diren unibertsitate-tituludunak prestatzeko beka bat emateko deialdia onesten duena, Idazkaritza Tekniko Nagusian aritzeko.
Idazkaritza Tekniko Nagusiak proposatu du Gizarte Politiketako Departamentuan unibertsitate-tituludunentzako beka bat sortzea eta hura emateko deialdia egitea, gazte tituludunen prestakuntzan modu eraginkorrean laguntzeko.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legeak eta Gizarte Politiketako Departamentuaren egitura organikoa ezartzen duen uztailaren 25eko 73/2012 Foru Dekretuak emandako eskumenak erabiliz,
AGINDU DUT:
1.–Kazetaritzan eta Ikus-entzunezko Komunikazioan lizentziadun diren unibertsitate- tituludunak prestatzeko beka baterako deialdiaren oinarriak onestea, Idazkaritza Tekniko Nagusian aritzeko.
2.–Zazpi mila hirurehun eta bat euro eta hogeita hamalau zentimoko (7.301,34) gastua baimentzea, 2015era luzatutako 2012ko gastuen aurrekontuko “Informazio eta Modernizazio Atalerako bekak” izeneko 900000 90200 4809 233103 kontu-sailaren kargura.
3.–Foru agindu hau Nafarroako Aldizkari Ofizialean argitaratzea, behar diren ondorioak izan ditzan.
4.–Foru agindu hau igortzea Idazkaritza Tekniko Nagusiari, Informazio eta Modernizazio Atalari, Koordinazio eta Kudeaketa Administratiboaren Ataleko Administrazio Aferetarako Bulegoari eta Idazkaritza Tekniko Nagusiko Aurrekontuen Kudeaketarako Ataleko Kontabilitate Zentroari.
Iruñean, 2015eko apirilaren 22an.–Gizarte Politiketako kontseilaria, Iñigo Alli Martínez.
ERANSKINA
Idazkaritza Tekniko Nagusian aritzeko prestakuntza
beka bat emateko deialdiaren oinarriak
1. oinarria.–Xedea.
Kazetaritzako eta Ikus-entzunezko Komunikazioko lizentzia edo gradua dutenak prestatzeko beka bat, norgehiagokako araubidean, ematea du xede deialdi honek, Gizarte Politiketako Departamentuko Idazkaritza Tekniko Nagusian aritzeko.
Unibertsitateko tituludunen prestakuntza bultzatzea du helburu deialdiak, departamentuan gauzatzen diren gizarte politiken gaineko informazioa, komunikazioa eta hedakuntza zuzenean ezagut ditzaten. Eginkizunak honako hauek dira:
–Web orria kudeatzea eta Gizarte Politiketako Departamentuaren atariko edukiak eguneratzea.
–Navarra.es web orriko Zerbitzuen Katalogoa eguneratzea.
–Lankidetza Kontseilaritzako Prentsa Bulegoarekin (hitzaldiak idaztea, prentsa oharrak egitea).
–Departamentuarekin zerikusia duten berrien eguneroko jarraipena.
–Zabalkunde-materialak prestatzea eta diseinatzea: memoriak, informazio liburuxkak, buletinak, kartelak.
–Tutoreak agindutako bestelako lanak.
2. oinarria.–Aurrekontuan dagoen dirua.
Deialdi honetarako diru-kopurua zazpi mila hirurehun eta bat euro eta hogeita hamalau zentimokoa da (7.301,34), 2015era luzatutako 2012ko gastuen aurrekontuko “Informazio eta Modernizazio Atalerako bekak” izeneko 900000 90200 4809 233103 kontu-sailaren kargura.
3. oinarria.–Iraupena.
Bekak iraunen du 2015eko ekainaren 14tik edo, hala balegokio, hori emateko ebazpenean adierazitako egunetik, 2015eko abenduaren 31ra arte.
Gizarte Politiketako Departamentuko Idazkaritza Tekniko Nagusiak beka luzatzen ahal du, gehienez ere hiru urtez, hasierako aldia eta luzapenak barne. Beka luzatzeko proiektuko tutorearen eskaera beharko da aldez aurretik.
4. oinarria.–Bekaren zenbatekoa eta ordainketa.
Beka zazpi mila hirurehun eta bat euro eta hogeita hamalau zentimokoa (7.301,34) izanen da; horietatik, zazpi mila eta laurogeita hamabi euro (7.092), 1.080 euroko (beka) hilabeteko aldiei dagozkie, eta 209,34 euro, Gizarte Segurantzaren kuota patronalari.
5. oinarria.–Bateraezintasunak.
Prestakuntza beka bateraezina izanen da administrazio beraren eta beste administrazio publiko batzuen bekekin.
6. oinarria.–Eskatzaileen betebeharrak.
Betebehar hauek guztiak betetzen dituzten pertsona fisikoak soilik izan daitezke onuradunak:
a) Adinez nagusia izatea.
b) Espainiako herritarra izatea edo Europar Batasuneko estatu batekoa edo, Europar Batasunak izenpetu eta Espainiako estatuak berretsitako nazioarteko itunen arabera, langileen joan-etorri askea aplikatzen den estaturen batekoa. Nolanahi ere, Espainiako nazionalitatea ez duenak gaztelaniaz behar adina badakiela frogatu beharko du.
c) Jarduteko gaitasun osoa izatea eta Nafarroako Foru Komunitateko Administrazioaren eta haren erakunde autonomoen laguntza eta diru-laguntza publikoak jasotzeko desgaitua ez egotea, Diru-laguntzei buruzko azaroaren 9ko 11/2005 Foru Legearen 13.2 artikuluarekin bat.
d) Bizitokia Nafarroan izatea, deialdia argitaratu baino urte bat lehenagotik gutxienez.
e) Lehenbiziko oinarrian azaldu den unibertsitateko titulu ofiziala izatea, Espainiako agintariek emana edo homologatua, eta deialdi hau argitaratu baino lehenagoko hiru urtean lortua.
f) Bekaren xede den prestakuntza jardueran aritzea galaraz diezaiokeen desgaitasun fisikorik edo gaixotasunik ez izatea.
7. oinarria.–Balorazio baremoa.
1. Eskaerak baloratzeko, merezimenduak honako baremo honen arabera kalifikatuko dira:
a) Ikasketa-espedientea.
Espedienteko batez besteko nota gehienez ere 3 punturekin baloratuko da. Kontuan hartuko dira karrera osoan zehar lorturiko kalifikazioak. Izangai bakoitzari modu proportzionalean banatuko zaizkio hiru puntuak; batez beste 5eko nota frogatzen dutenei 0 puntu esleituko zaie, eta batez beste 10eko nota frogatzen dutenei 3 puntu esleituko zaizkie.
b) Euskaraz jakitea.
Hizkuntza eskola ofizial batek luzaturiko gaitasun agiriarengatik edo ofizialki baliokidea den tituluarengatik, 1 puntu. B2 mailako titulazioa edo ofizialki baliokidea den beste titulu bat baloratuko da 0,5 punturekin
c) Beste ikasketa titulu edo prestakuntza ikastaro batzuk, honako honekin lotura dutenak:
i. Web orrien diseinua.
ii. Ikus-entzunezko formatuko dibulgazio dokumentuen prestaketa.
iii. Sare sozialak.
iv. Datu estatistikoen azterketa eta zabalkundearen gaineko ezagutza.
v. Komunikazio planak egitea.
20 ordutik beherako ikastaroak ez dira kontuan hartuko. 0,5 puntu emanen dira 20 ikastorduko, eta gehienez ere 5 puntu.
d) 7.1.e puntuan adierazitako arloetako erakunde eta entitateetan gizarte boluntariotzako jarduerak; gehienez ere puntu 1.
30 orduko edo hortik beherako jarduerak ez dira kontuan hartuko. 200 ordu edo gehiago frogatzen dituen izangaiak gehieneko puntuazioa lortuko du. Iraupen laburragoa denean, banaketa proportzionala eginen da.
Boluntariotzako jarduerak unibertsitateko ikasketak egin bitartean edo ondoren eginak izan behar dira.
8. oinarria.–Eskabideak.
8.1. Prestakuntza beka bat jasotzeko interesa dutenek eskaera aurkeztu beharko dute Gizarte Politiketako Departamentuko Erregistroan (González Tablas kalea, 7, Iruñea) edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatzen diren tokietako edozeinetan, 20 egun naturaleko epean, Nafarroako Aldizkari Ofizialean argitaratu eta biharamunetik hasita.
8.2. Eskaerak telematika bidez aurkez ere daitezke, Nafarroako Gobernuak Interneten duen Atariko zerbitzuen katalogoko fitxa erabiliz: http://www.navarra.es/home_es/Servicios/. Fitxa horretan, Nafarroako Foru Komunitatearen Administrazioko Erregistro Orokor Elektronikoan sartzeko esteka izanen da. Identifikatzeko, ziurtagiri digitala beharko da.
8.3. Eskaera aurkezteko honako dokumentu hauek erantsi behar dira:
a) Eskabide orokorra, behar bezala beteta. Eskabide hori Gizarte Politiketako Departamentuan eskuratzen ahal da (González Tablas kalea, 7) edo Gobernuaren edozein erregistro bulegotan, baita Nafarroako Gobernuaren web orrian ere (Inprimaki orokorren atalean).
b) Deialdiaren xedeko tituluaren fotokopia.
c) Eskatzailearen curriculum vitae-a, non jasoko baitira, zehatz-mehatz, aipatutako merezimendu guztiak eta dagozkien frogagiriak.
d) Ikasketa-espedientearen ziurtagiria. Bertan, gutxienez, batez besteko nota agertu behar da.
e) Alegatutako gainerako merezimenduak, jatorrizko agiriaren bidez edo fotokopiaren bidez justifikatu beharrekoak; jardueren iraupena, orduetan, jaso beharko da.
f) Nortasun agiri nazionalaren fotokopia.
g) Nafarroan erroldatuta egotearen ziurtagiria, deialdi hau argitaratu ondoren emana.
h) Eskatzailearen erantzukizuneko aitorpena, azaroaren 9ko 11/2005 Foru Legearen 13.2 artikuluari jarraikiz, onuradun izatea galarazten dioten egoeretako bakar batean ere ez dagoela adierazten duena.
8.3. Epearen barrenean aurkeztutako eskaerak aurreko zenbakietan finkatutako baldintzak betetzen ez baditu, organo eskudunak interesdunari eskatuko dio hamar egun balioduneko epean zuzen dezala, eta adieraziko dio ezen, zuzendu ezean, eskaerari uko egiten diola ondorioztatuko dela eta espedientea artxibatzeko ebazpena emanen dela, eta hori jakinaraziko zaiola.
Deialdian ezarritako merezimenduei buruzko agiriak aurkezten ez badira, ezin izanen da zuzenketarik egin.
8.4. Prestakuntza beka jasotzeko eskaera aurkezteak berarekin dakar eskatzaileak deialdiaren oinarriak onartzea.
9. oinarria.–Ebaluazio Batzordearen osaera eta beka emateko prozedura.
9.1. Ebaluazio Batzordea arduratuko da betebeharrak egiaztatzen, bekak eskatzen dituztenek alegaturiko merezimenduak ebaluatzen eta ebazpen proposamena prestatzen, non izangai onartuari guztira emaniko puntuak adieraziko baitira.
–Ebaluazio Batzordeak kide hauek izanen ditu:
Batzordeburua: Ana Suescun Oset andrea, Idazkaritza Tekniko Nagusiko Informazio eta Modernizazio Ataleko burua.
Ordezko batzordeburua: Carlos Arana Aicua jauna, Gizarte Politikako Araubide Juridiko-administratiboaren Ataleko burua.
Batzordekidea: Rafael Sopelana González jauna, Idazkaritza Tekniko Nagusiko Informazio eta Modernizazio Ataleko antolaketako teknikaria.
Ordezko batzordekidea: Beatriz Segura Ibañez, Informazio eta Modernizazio Ataleko Argibide, Erregistro eta Agiritegi Bulegoko burua.
Idazkaria: M.ª Luz Munárriz Desojo, Gizarte Politikako Araubide Juridiko-administratiboaren Ataleko goi mailako tituluduna.
Ordezko idazkaria: Sara Ayerbe Ostiza, Gizarte Politikako Araubide Juridiko-administratiboaren Ataleko APT (arlo juridikoa).
9.2. Prozedura ofizioz hasiko da interesdunaren eskaera jasotakoan.
9.3. Ebaluazio Batzordea instrukzio organoa da eta eskaerak ebaluatuko ditu, deialdi honetan ezarritako irizpideen arabera.
Ebaluatzen hasi aurretik, eskatzaileek laguntzak jasotzeko baldintza guztiak betetzen dituzten ala ez adieraziko duen txostena prestatuko du. 6. oinarrian ezarritako baldintzak betetzen ez dituzten eskaerak ez dira baloratuko.
9.4. Ebaluazio batzordeak aurkeztutako eskaerak aztertu eta baloratuko ditu, eta dagokien puntuazioa emanen die. Puntuazioaren arabera ordenatuko ditu eta beka puntu gehien lortu duen izangaiari emateko proposatuko du.
Beka eman aurretik, puntuaziorik altuena lortu duen izangaiari eskatuko zaio jakinarazi eta 10 eguneko epean 8.2 b, c, d, f eta g puntuetan aipatutako jatorrizko agiriak aurkez ditzala.
Horrela egiten ez badu, bekari uko egiten diola ulertuko da, non eta organo eskudunak ez dituen ikusten ezinbesteko arrazoiak edo behar bezala justifikatutako beste edozein gorabehera.
9.5. Gizarte Politiketako Departamentuko Idazkaritza Tekniko Nagusiaren ebazpenaren bidez emanen da beka, instrukzio organoak proposamena egin ondotik. Ebazpena Departamentuko iragarki oholean jarriko da (Gónzalez Tablas kalea, 7), instrukzio organoak emandako puntuazioaren arabera eskatzaileek duten lehentasun hurrenkeran egindako zerrendarekin batera.
Ebazpenean, gutxienez, beka nori eman zaion jaso beharko da eta, espresuki adieraziko da gainerako eskaerak ezetsi direla, halakorik baldin bada.
Puntuaziorik altuena lortzeagatik beka jasoko duen interesdunari jakinaraziko zaio ebazpena; gainera, Nafarroako Aldizkari Ofizialean argitaratuko da, azaroaren 9ko 11/2005 Foru Legearen 22. artikuluan ezarritakoarekin bat.
Eskaerak ezetsitzat joko dira, baldin eta eskaerak aurkezteko epea amaitu eta hiru hilabeteko epean berariazko ebazpenik jakinarazten ez bada.
10. oinarria.–Tutoretzak.
10.1. Kasuan kasuko administrazio unitateak tutore bat, bekaren onuradunari eskatutako titulazioa edo goragokoa duena, izendatuko du bekadunaren jarduerak zuzendu eta gainbegiratzeko.
10.2. Tutoreak egin beharreko lanak agindu eta ordutegiak finkatuko ditu, eta bekadunen eginbehar orokor eta berariazkoak betetzen dituzten begiratuko du.
11. oinarria.–Justifikatzeko epea eta modua.
Beka amaitu eta hurrengo hilabetean, prestakuntza jardueraren amaierako memoria aurkeztu beharko du onuradunak.
Memoriak tutorearen adostasuna izan beharko du, eta, horretarako, beka emateko baldintzak eta aurreikusitako eginkizunak noraino bete diren baloratu eta azaldu beharko du.
12. oinarria.–Onuradunen betebeharrak.
a) Bekaren xedeko prestakuntza jarduera betetzea.
b) Organo emaileari frogatzea betekizunak eta baldintzak betetzen dituela eta, orobat, beka jasotzeko arrazoi izan diren jarduerak egin dituela eta helburuak bete direla.
c) Eskumena duten organoek eman den bekaren inguruan egin ditzaketen egiaztapen lan guztiak onartzea.
d) Xede berarekin eskatu edo jaso dituen bestelako beka edo diru-laguntzen berri ematea beka eman duen organoari.
e) Jarduerak hasten direnean frogatzea, hala behar denean, zerga guztiak eta Gizarte Segurantzarekiko betebeharrak eguneratuak dituela.
f) Organo eskudunari adieraztea hartutako bekari espresuki uko egiten diola, jarduerak utzi baino hamabost egun natural lehenago gutxienez.
g) Beka dela-eta egindako jardueraren zuzeneko ondorio den edozein argitalpenetan bekadun gisa aritu dela adieraztea.
h) Prestakuntza jardueran ezagutzen den eta isilpekotzat jo daitekeen informazio tekniko edo administratiboaren gainean sekretua eta isilpekotasuna gordetzea.
i) Zein erakundetan jarduten duen, bertako barne edo funtzionamendu araubidea betetzea.
13. oinarria.–Prestakuntza jardueraren hasiera eta uko egitea.
Onuradunak beka emateko ebazpenean adierazten den egunean hasi beharko du lanean. Horrela egiten ez badu, onuradunak bekari behin betiko uko egiten diola ulertuko da, non eta organo eskudunak ez dituen ikusten ezinbesteko arrazoiak edo behar bezala justifikatutako beste edozein gorabehera.
Bekari uko eginez gero, Gizarte Politiketako Departamentuko Idazkaritza Tekniko Nagusiari horren berri eman beharko zaio, jarduera utzi eta gutxienez hamabost egun natural lehenago.
Eskuratutako bekari edozein arrazoirengatik uko eginez gero, zilegi izanen da beka instrukzio organoak ezarritako zerrendan hurrengo dagoenari ematea, deusetan galarazi gabe onuradunak uko egin arte dituen betebeharrak.
Onuradun berriak oinarri hauetako 9.4 puntuan adierazitako baldintza bete beharko du.
14. oinarria.–Prestakuntza jarduera egitea.
Bekaren xede diren jarduerak Gizarte Politiketako Departamentuko Idazkaritza Tekniko Nagusiaren egoitzan eginen dira, astean gehienez ere 30 orduz.
Bekaldiaren hilabete bakoitzeko, 2,5 egun naturaleko oporraldia emanen zaio bekadunari.
15. oinarria.–Jabetza intelektuala.
Bekadunek jabetza intelektualerako dituzten eskubideak, bekaldian egindako jardueraren ondorioz eskuratzen dituztenak, eskubide horiek erregulatzen dituzten Estatuko arauetan ezarritakoari jarraikiz arautuko dira. Horri dagokionez, Administrazio Publikoak ez dio uko egiten agirien, azterlanen, ikerlanen, lanen, eskubideen, emaitza zientifikoen eta izan litezkeen asmakuntzen gainean legokiokeen jabetzari.
16. oinarria.–Lan edo administrazio harremanik eza.
16.1. Beka jasotzea eta bekaduna izatea ez da zerbitzuak ematea, eta egoera horrek ez dakar berarekin lan harremanik, administratiborik edo estatutupekorik Nafarroako Foru Komunitateko Administrazioarekin edo haren erakunde autonomoekin, ez eta bestelako antzeko eskubiderik ere. Administrazioak ez du konpromisorik hartuko beka bukatutakoan bekaduna bere plantillan sartzeko.
16.2. Prestakuntzako bekadunari agintzen zaizkion lan edo jarduerak, kasuan kasuko departamentuko edo erakunde autonomoko funtzionario edo kontratudunek gainbegiratuko dituzte. Bekadunak ezin izanen ditu funtzionario publikoen eginkizunak bete edo berarentzat hartu, ezta hirugarrenen aurrean Administrazio Publikoaren kide, ordezkari edo agente gisa agertu ere.
17. oinarria.–Kalte-ordainak jasotzeko eskubidea.
Bekadunak, zein administrazio publikotan egiten duen prestakuntza, harekiko harreman juridikoa ezertan aldatu gabe, eskubidea izanen du zerbitzuak eta bidaiek sortzen dizkioten gastuengatik funtzionarioei dagozkien ordain berberak jasotzeko.
18. oinarria.–Ez-betetzeak.
Jasotako dirua itzultzeko prozedurak azaroaren 9ko 11/2005 Foru Legearen 35. artikuluan ezarritakoari jarraituko dio. Zehazki, honako hauek izanen dira jasotako dirua itzultzeko arrazoiak:
a) Bekadunak bere gain hartutako betebehar eta eginkizunak ez betetzea, jarduerak egiten ardurarik ez jartzea, errendimendu eta aprobetxamendu eskasa izatea eta lanak kalitate gabekoak izatea.
b) Amaierako memoria ez aurkeztea eta/edo tutorearen adostasuna ez jasotzea.
c) Prestakuntza beka emateko kontuan hartu diren baldintzak aldatzea, aldez aurretik administrazio baimena lortu gabe. Horretaz gain, aldi berean jasotzea horrekin bateratu ezin den beste beka edo diru-laguntza bat.
19. oinarria.–Errekurtsoak.
Deialdi honen oinarrien eta hori aplikatzeko egintzen kontra gora jotzeko errekurtsoa jar daiteke, Nafarroako Gobernuari zuzendua, argitaratu edo jakinarazi eta biharamunetik hasita hilabeteko epean gehienez, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 115. artikuluan ezarritakoari jarraikiz.
Iragarkiaren kodea: F1506369
