Iragarkia

100. ALDIZKARIA - 2015eko maiatzaren 26a

1. NAFARROAKO FORU KOMUNITATEA

1.3. LURRALDEAREN ANTOLAMENDUA ETA HIRIGINTZA

ERABAKIA, Nafarroako Gobernuak 2015eko maiatzaren 13an hartua, “2011-2016ko Plan Eoliko Estrategikoa” izeneko proiektua, Eólica Navarra SLUk sustatua, Udalez gaindiko Proiektu Sektorial deklaratzen duena, Lurraldearen Antolamenduari eta Hirigintzari buruzko abenduaren 20ko 35/2002 Foru Legean aurreikusitako ondorioetarako.

I.–Proposamenaren xedea eta azalpena.

Eólica Navarrak aurkeztutako proiektuak guztira 87 aerosorgailu, 5 parke eolikotan (PE aurrerantzean) banatuta, instalatzea du xede Cabanillasko, Ablitasko, Cascanteko, Fustiñanako eta Zarrakazteluko udal mugapeetan.

Aukeratu diren makinak Gamesa G90 eta Gamesa G128 modeloetakoak dira; lehen modeloa 2 MWekoa eta 78 m garai da, eta 90 m-ko errotorea du; bigarrena 4,5 MWekoa eta 120 garai da, eta 128 m-ko errotorea du. Dena dela, gehitzen du sustatzaileak, bilakaera teknikoa oso azkarra denez energia eolikoaren eremuan, agian parke horietako eraikuntza proiektua aurkezten denean berriz definituko ditu aerosorgailu mota eta haren potentzia. Hala ere, sustatzailearen ustez, parke eolikoek ukituko duten azalera ez da aldatuko, aerosorgailuek izan dezaketen banaketa berria aurreproiektu honetan erreserbatutako lur zerrendan eginen delako.

PE bakoitza, azpiestazio elektriko batez gain, kontroleko eraikin batez hornituko da, eta handik zuzeneko bista izanen da aerosorgailuetara.

Ablitas II PEa ebakuatzeko, 2012an onetsi eta gaur egun gauzatu gabe dagoen Ablitas I parke eolikoaren azpiestazioa eta 66 kV-eko linea elektrikoa erabiliko dira.

Cascanteko PEak sortzen duen energia elektrikoa zirkuitu bikoitzeko 66 kV-eko 2. mailako garraio-linea baten bidez ebakuatzen da” egitekoa den Cortesko azpiest.-Tuterako azpiest.-La Sernako azpiest.” linea jo arte Ablitas I PEtik datorren zirkuituan.

Cabanillas II eta Fustiñanako PEen ebakuazioa zirkuitu bakuneko 66 kV-eko linea elektriko batzuen bidez egitea proposatzen da, egitekoa den Cabezo Moroko PEko azpiestazioraino, Tuteran, zeina La Sernako azpiestazioari lotuko baitzaio. Cabezo Moroko PEa, espediente honen sustatzaileak bultzatua, plan berezi gisa tramitatzen ari da gaur egun.

Azkenik, Zarrakazteluko PEaren ebakuazioa Erriberriko azpiestazioan egiten da, 66 kV-eko linea elektriko baten bidez, zirkuitu bakunean. Horretarako, Zarrakazteluko, Melidako eta Santakarako udalerrietatik abiatzen diren eta Erriberriko azpiestaziora iristen den lineari lotzen zaizkion lineen traza erabiliko da.

II.–Hirigintzari eta lurraldeari buruz kontuan hartu beharrekoak.

Proiektu honetan aurreikusten diren parke eolikoak lurzoru urbanizaezineko kategoria duten lurretan kokatzen dira, eta, 125/1996 Foru Dekretuaren 6. artikuluari jarraikiz, parke eolikoak ezartzeko kokapen egokitzat har daitezke.

Ebro ardatzeko Lurraldearen Antolamenduko Planak (LAP-5) araututako lurretan du eragina Cabanillas II, Ablitas II, Cascanteko, Fustiñanako eta Zarrakazteluko parke eolikoen lurralde eremuak. Plan horrek lurraldearen gaineko determinazio lotzaileak (VT), plangintzarako determinazio lotzaileak (VP) eta determinazio orientagarriak (O) ditu.

Aurkeztu den proiektuak ez du aipatu antolamendu tresnarekiko koherentzia frogatzen; hortaz, zuzendu eta osatu beharko da alde horretatik.

Dena dela, ikusten da Zarrakazteluko udalerrian kokatzen diren aerosorgailuetako bik eragina izan dezaketela LAP-5ean Babes Bereziko Eremutzat jotako lurzoruetan (interes bereziko landaredia), non, kontuan hartuta PN3 eranskinean eremu horietarako jasotako babes araubidea, energia sortzen duten instalazioak jarduera debekatuak diren. Alde horretatik, ona da gogoratzea LAP-5eko araudiaren 21. artikuluan ezarritakoa aintzat hartuta, Udalez gaindiko Plan edo Proiektu Sektorialek ahalmena dutela lurzoru horien (Babes Bereziko Eremuak, LAPean identifikatuak) mugak zehazteko eta ezartzeko.

Dokumentuak badu araudia jasotzen duen atal bat “Erabilera eta jardueren araudia” izeneko proiektu sektorialak ukitutako lurzoruentzat, eta zuzendu beharrekoa da, hurrengo arrazoibidea aintzat hartuta:

–1. artikuluak lurzoru urbanizaezinaren sailkapena ematen dio UPrSaren eremu osoari, eta zaintza kategorian sartzen du. LAHFLaren 94. artikuluan xedatutakoa kontuan hartuta, udal planeamenduarentzat bermatu edo zaindu beharrekoak direla justifikatzen dituen lurzoru urbanizaezinak zaintza kategorian sartzen dira. Artikulu horren arabera, lurraldearen antolamenduko tresnek prozesu urbanizatzailetik baztertzen dituzten lurrak babes kategorian identifikatu behar dira.

–6. artikuluan, erabilera baimendu, baimengarri eta debekatuei buruzkoan, aditzera ematen da “zein den parkea, plan berezia aldatzeko espedientea tramitatuko dela hari buruz, baldin eta funtsezko aldaketak egin nahi badira lerrokaduretan edo/eta aerosorgailuen kopuruan, proposatutako sarbide eta linea elektrikoen trazaduran edo parkerako ezarritako araudian”. Atal honek udalez gaindiko proiektu sektorial hau izan behar du kontuan, eta ez plan berezi bat.

Bestetik, Cascanteko PEko 11., 12. eta 13. aerosorgailuak eta Ablitas II PEko 1., 2., 11. eta 19.ak Nafarroako Ubidearen eta eremu ureztagarrien eraldaketaren udalez gaindiko proiektu sektorialeko “II. faseko eremu ureztagarrietan” kokatzea proposatzen dira. Nafarroako Gobernuak 1999ko ekainaren 7an hartutako Erabakiaren bidez onetsi zen proiektu hori. Aipatu UPSean eremu ureztagarrientzat ezarritako babes iragankorreko araubidea kontuan izanda, sustatzaileak Landa Garapeneko, Ingurumeneko eta Toki Administrazioko Departamentuaren baimen espresa eskuratu beharko du, harik eta ureztaketa abian dela adierazi arte.

2014ko urtarrileko errekerimenduan, Lurraldearen Antolamendu eta Hirigintza Zerbitzuak hurrengo kontzeptuak zehazteko eskatu zion sustatzaileari:

“–Lurralde eremuen mugaketa. Parke eolikoen ezarpena arautzen duen otsailaren 26ko 125/1996 Foru Dekretuaren 2.c) artikuluan adierazitakoa kontuan izanda, UPrSaren ezarpen eremuaz gain, azterlanaren edo analisiaren eremua zehaztu behar da dokumentuan, hau da, lurraldea, behar bezain zabala, haren barrenean izan daitezkeen kokalekuak ebaluatu eta aztertzeko; izan ere, beharrezkoa da arrazoien gainean zehaztu eta justifikatu ahal izateko egin den aukera; alegia, zein den lurralde eta ingurumen eragin txikieneko kokalekua.

Behin eremu horien mugapena justifikaturik, azterketa eremuan eta ezarpen eremuan bat ez datozen lurrak parke eolikoak ezartzeko baztertuko dira.”

Alde horretatik, aurkeztu den dokumentua igortzen da 2011ko azaroan aurkeztu Ingurumen eraginaren azterlanean jasotako lurralde eremuak mugatzeko. Eremu horiek hartara eraman eta bertan txertatu behar dira, baita UPrSaren dokumentuan ere.

Aurrekoa gorabehera, gabezia bat atzeman da Cascanteko PEaren dokumentazioan (txosten idatzia): 3.etik 9.era bitarteko aerosorgailuen koordenatuak falta dira. Espedientea ebatzi aurretik konpondu beharko da gabezia hori.

Azkenik, bidezko da adieraztea Cabeza Moroko parke eolikoa abian jarri behar dela Fustiñanako eta Cabanillas II parke eolikoetara ebakuazioa egiteko eta, horregatik, lehendabizikoa onetsi beharko da haiek abian jartzeko edo, bestela, proiektu hau aldatu beharko da La Sernako azpiestaziora ebakuatzeko.

III.–Departamentuen txostenak.

Ondoren aipatzen diren sektoreko txostenak espedientean jasota daude. Dena dela, sustatzaileak aurkeztu duen azken dokumentazioaren edukia eta ondorioak ikusita, txosten hauek eskatu dira berriro: Energiaren, Meatzaritzaren eta Industria Segurtasunaren Zerbitzuari, Nekazaritzako Azpiegituren Zerbitzuari, Babes Zibilerako Zuzendaritza Nagusiari eta Sustapen Ministerioko Abiazio Zibilaren Zuzendaritza Nagusiari.

III.1 Ondare historikoa.

2012ko abenduaren 12an, Ondare Arkitektonikoaren Atalak txosten batean adierazi zuen ezen, Nafarroako inbentario arkeologikoa berrikusi ondoren, bideragarria izaten ahal dela Cabanillas II, Zarrakazteluko eta Fustiñanako parke eolikoen proiektuak abian jartzea ondare aldetik. Orobat, eransten du ezen, aurreikusita dauden lanak egitean lehendik ezezaguna den aztarna arkeologikoren bat agertzen bada, legezko betebeharra dagoela lanak gelditu eta aurkikuntzaren berri emateko Arkeologia Atalari, ondare historikoaren alorrean indarrean dagoen legeriarekin bat. Hala egin ezean, eginbehar hori ez betetzeagatik ondare historikoari eragiten zaizkion ukipen guztiak arau-hauste larritzat hartuko dira, indarra duen legeriaren arabera.

Ablitas II eta Cascanteko parke eolikoei dagokienez, parke eoliko horien ezarpenak ukitzen dituen aztarnategi arkeologiko inbentariatuak aipatzen ditu, eta zenbait neurri zuzentzaile zehazten, lur mugimenduak egiten diren eraikuntza faseetako jarraipen arkeologikoari buruz, instalazioak bideragarriak izan daitezen ondare aldetik eta kalte edo galerarik izan ez dadin ondare arkeologikoan; bestetik, identifikatuta ez dauden ukitu gabeko egitura edo aztarna arkeologikoak agertuz gero, hartu beharreko neurriak zehazten ditu. Neurri horiek arkeologo batek edo sektoreko enpresa espezializatu batek hartuko ditu, proiektuko sustatzailearen kargura.

III.2 Herri lanak.

2012ko azaroaren 19an, Herri Lan Zuzendaritza Nagusiak txosten bat egin zuen, eta bertan esaten da Azterlan eta Proiektuen Zerbitzuaren iritziz, aldaketak izan daitezkeela parkeetako sarbideetan, Zarrakazteluko NA-128an eta Cascanteko NA-6900an aurreikusitako hobekuntzetan eta zabalguneetan esku hartzen bada; NA-3042tik Ablitas II PErako sarbidea zehaztu behar dela adierazten da, eta sarbideek bete beharreko ezaugarriak aipatzen dira, distantziei, ikuspenari, maldei eta sestrei buruz.

Bestetik, txosten horretan, Kontserbazio Zerbitzuak zenbait determinazio orokor ezartzen ditu sarbideak egiteko kostuei, haien ezaugarriei, instalazioen kokalekuari, errepide-gurutzei eta obrak gauzatu aurreko baimen prozedurari buruz.

III.3 Abiazio Zibilaren Zuzendaritza Nagusia.

Abiazio Zibilaren Zuzendaritza Nagusiak, zortasun aeronautikoei dagokienez, txosten bat egin zuen 2012ko abenduaren 20an, eta hartan adierazi aerosorgailuek ukitutako udal mugapeak ez daudela sartuta interes orokorreko aireportuei dagozkien legezko zortasun aeronautikoen eremuetan, eta ez dituela ukitzen Sustapen Ministerioaren eskumeneko aire nabigazioko instalazio erradioelektriko aeronautikoak.

Orobat, txosten horretan adierazten da ezen, aerosorgailu horientzat aurreikusitako altuera 100 metrotik gorakoa denez, UPrSaren araudiak berariaz jaso beharko duela Aire Segurtasunerako Estatuko Agentziak (AESA) aldez aurretik hartu beharko duela erabakia aireko eragiketetako segurtasunean duten eraginari buruz, 584/72 Dekretuaren 8. artikuluaren gaur egungo testuaren arabera; eta hori, edozein eraikuntza edo egitura (zutabeak, antenak, aerosorgailuak –palak barne– eta abar) jartzeko eta haiek eraikitzeko beharrezko baliabideak (eraikuntzako garabiak eta antzekoak barne) instalatzeko, lurretik gora (edo itsas mailatik gora, ur jurisdikzionalen barrenean) 100 metro baino gehiago altxatuz gero.

Horrenbestez, Zuzendaritza Nagusi horrek aditzera ematen du, zuzendaritza zentro honek Cabanillasko, Ablitasko, Cascanteko, Fustiñanako eta Zarrakazteluko (Nafarroako Foru Komunitatea) udal mugapeetako 2011-2016rako plan eolikoari buruz erabakia hartu baino lehen, Nafarroako Gobernuak egiaztatu beharko duela behar bezala sartu dela bere araudian aurreko lerroaldean adierazitako klausula.

Hori helburu, Ministerio horrek txostenean adierazten du berriz igorri beharko dela “Cabanillasko, Ablitasko, Cascanteko, Fustiñanako eta Zarrakazteluko udal mugapeetako 2011-2016rako plan eolikoaren” dokumentu aldatua eta, beraz, ezin izanen dela aipatu planeamendua behin betiko onetsi, harik eta Abiazio Zibilaren Zuzendaritza Nagusiak haren alde propio emandako txostena lortu arte.

III.4 Industriaren, Energiaren eta Berrikuntzaren Zuzendaritza Nagusia.

Energiaren, Meatzaritzaren eta Industria Segurtasunaren Zerbitzuak, 2015eko martxoaren 17an, bere txostenean adierazten du “proiektua sartuta dagoela Energiaren, Meatzaritzaren eta Industria Segurtasunaren Zuzendaritza Nagusiak lan egiten duen plangintzan”, sustatzaileak aurkeztu duen azken dokumentazioari buruz.

III.5 Ebroko Ur Konfederazioaren (CHE) txostena.

2014ko martxoaren 12an, CHEko ingurumen kudeaketaren alorrak txosten bat egin zuen eta, bertan, hainbat gogoetaren ondoren, dio, oro har, egokitzat jotzen direla Ablitas II, Cabanillas II, Zarrakazteluko, Cascanteko eta Fustiñanako Ingurumen eraginaren azterlanak eta haien ebakuazioko linea elektrikoak; hala ere, haietan jasotako prebentzio eta zuzenketa neurriak bete beharko direla, eta jarduketa eremuan ur inguruneak jasan dezakeen ukipena gutxitzeko beharrezko diren neurriak hartuko direla, ez dadin kutsatu edo narriatu, eskualdeko ubideen zirkulazioan eta uren kalitatean ahalik eta eragin txikiena izaten saiatuko dela eta eskualdeko dinamika hidrologikoan aldaketa garrantzitsurik ez egitea bermatuko dela.

IV.–Ingurumen arloko tramitazioa.

2015eko martxoaren 10ean, Ingurumen Kalitatearen Zerbitzuak txostena eman zuen, eta hartan adierazi Zarrakazteluko, Cabanillas II, Ablitas II, Fustiñanako eta Cascanteko parke eolikoen proiektuen Ingurumen eraginaren azterlanak nahikoak direla eta jendaurrean jartzen ahal direla 30 egunean UPrSaren gainerakoarekin batera, Ingurumenaren gaineko eraginaren ebaluazio prozeduraren tramitazioarekin jarraitu ahal izateko.

Horrenbestez, Lurraldearen Antolamenduko Batzordearen 2015eko martxoaren 31ko txostenarekin bat, eta Lurraldearen Antolamenduari eta Hirigintzari buruzko abenduaren 20ko 35/2002 Foru Legeari eta aplikatu beharreko gainerako arauei jarraikiz, Nafarroako Gobernuak, Sustapeneko kontseilariak proposaturik,

ERABAKI DA:

1. “2011-2016rako Plan Eolikoa”, “Eólica Navarra SLUk” sustatua, Udalez gaindiko Proiektu Sektorial deklaratzea, Lurraldearen Antolamenduari eta Hirigintzari buruzko abenduaren 20ko 35/2002 Foru Legean ezarritakoaren ondorioetarako.

2. Enpresa sustatzaileari adieraztea, espedientea ebatzi baino lehen, hura osatu egin beharko duela, erabaki honetan eta sektoreko txostenetan egindako oharrak kontuan hartuta.

3. Proiektua onesteko, Arkeologia Atalaren eta Abiazio Zibilaren Zuzendaritza Nagusiaren haren aldeko txostenak beharko dira.

4. Adieraztea deklarazio honek ez dituela deusetan galaraziko proiektua gauzatzeko behar diren baimen guztiak.

5. Udalez gaindiko proiektu sektoriala jendaurrean jartzea hogeita hamar egunean eta, aldi berean, entzutea ematea ukitutako udalei.

Horretarako, espedientea ikusgai egonen da interesdunen eskura, Sustapen Departamentuaren bulegoetan (Iruñeko Alhondiga kalea, 1, 1. solairua –31002–), eta epe horretan zilegi izanen da idatziz nahi adina alegazio aurkeztea.

Era berean, agiria Sustapen Departamentuko web orriaren “Jendaurreko epea eta parte-hartze publikoa” izeneko atalean: http://www.navarra.es/home_es/Gobierno+de+Navarra/Organigrama/Los+departamentos/Vivienda+y+Ordenacion+del+Territorio/Acciones/.

6. Era berean, espedientea jendaurrean jartzea epe berean, ingurumen ebaluazio estrategikoaren prozeduraren ondorioetarako, indarra duten legezko zehaztapenekin bat.

Horretarako, Ingurumen eraginaren azterlana interesdunen eskura egonen da Landa Garapeneko, Ingurumeneko eta Toki Administrazioko Departamentuaren bulegoetan (González Tablas kalea, 7 - 31005 Iruña).

7. Beharrezko ondorioak izan ditzan, erabaki hau Nafarroako Aldizkari Ofizialean argitaratzea, Ingurumen Kalitatearen Zerbitzura, Ondare Historikoaren Zerbitzura, Nekazaritzako Azpiegituren Zerbitzura, Energiaren, Meatzaritzaren eta Industria Segurtasunaren Zerbitzura, Lurraldearen Antolamendu eta Hirigintza Zerbitzura, Herri Lanen Zuzendaritza Nagusira, Babes Zibilaren Zuzendaritza Nagusira eta Lurraldearen Antolamenduaren, Mugikortasunaren eta Etxebizitzaren Zuzendaritza Nagusira igortzea, eta Ebroko Ur Konfederazioari, Sustapen Ministerioko Abiazio Zibilaren Zuzendaritza Nagusiari, Cabanillasko, Tuterako, Ablitasko, Ribaforadako, Fontellasko, Cascanteko, Tulebrasko, Fustiñanako, Zarrakazteluko, Melidako, Santakarako, Murillo el Cuendeko, Caparrosoko eta Erriberriko udalei eta sustatzaileari jakinaraztea.

Iruñean, 2015eko maiatzaren 13an.–Nafarroako Gobernuko kontseilari eta idazkaria, F. Javier Morrás Iturmendi.

Iragarkiaren kodea: F1507441