1. NAFARROAKO FORU KOMUNITATEA
1.7. BESTELAKOAK
274E/2014 EBAZPENA, ekainaren 9koa, Ingurumen Kalitatearen Zerbitzuko zuzendariak emana, Urdazubiko udal mugapean Alkerdi auzoko hondakin urak garraiatzeko proiektuari Ingurumen ukipenetarako baimena ematen diona. Sustatzailea Nafarroako Toki Azpiegiturak, S.A. da.
Xedea: ebazpena.
Erreferentzia: 0001-0015-2014-000009.
Unitate kudeatzailea: Ingurumenaren eta Uraren Zuzendaritza Nagusia.
Ingurumen Kalitatearen Zerbitzua.
Ingurumenaren gaineko Eragina Aztertzeko Atala.
González Tablas kalea, 9. 31005 Iruña.
Telefonoa: 848 427625. Faxa: 848 421495.
Posta elektronikoa: secevamb@cfnavarra.es
Espedientea:
Ingurumen ukipenetarako baimena.
Jarduera: Urdazubiko Alkerdi auzoko hondakin uren garraioa.
Ingurumena Babesteko Esku-hartzeari buruzko Foru Legearen Erregelamenduaren eranskina: 2C-Ingurumen ukipenetarako baimenaren mende dauden jarduerak eta proiektuak.
Udalerria: Urdazubi.
Sustatzailea: Nafarroako Toki Azpiegiturak, S.A.
Eskaeraren data: 2014/01/24.
2014ko urtarrilaren 24an Ingurumen Kalitatearen Zerbitzuan sartu zen goian aipatutako espedienteari dagokion Ingurumen ukipenetarako baimena lortzeko eskaera. Espediente hori abenduaren 28ko 93/2006 Foru Dekretuaren 2C eranskineko N) epigrafean sartua dago (Uraren goi hornidurarako eta saneamendurako hoditeriak, beste eranskin batzuetan jaso ez direnak, lurzoru urbanizaezinean paratzen direnean). Foru dekretu horrek Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamendua onetsi zuen.
Abenduaren 28ko 93/2006 Foru Dekretuaren 36. artikuluak ezartzen du Ingurumen, Lurraldearen Antolamendu eta Etxebizitzako kontseilariak arrazoituz ebatziko duela Ingurumen ukipenetarako baimena ematea edo ukatzea.
Foru dekretu horren 31.2 artikuluak ezartzen du Ingurumen ukipenetarako baimenak lurzoru urbanizaezinean baimentzen ahal diren jardueretarakoa ere bilduko duela, eta horrek Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezarritako ondorioak izanen dituela.
Proiektaturiko jarduketaren helburua da Urdazubiko Alkerdi auzoko hondakin urak Zugarramurdiko araztegira eramatea. Proiektua Urdazubiko eta Zugarramurdiko udal mugapeetan gauzatuko da, katastroko 21 landa-lurzatitan eta 5 hiri-lurzatitan barna.
Hondakin urak inpultsio bidez eramanen dira ponkaketa-estaziotik Zugarramurdiko araztegira doan hustubideraino. Ponpaketa-estazioan tanga bat jarriko da, solidoak dekantatzeko, eta ponpaketa-ekipamendua. Estazioa zolatuko da, eta harainoko konexio elektrikoa eta ur hornidura zanga batetik eramanen dira, sarbidearekin paralelo, estazioa kokatuko den lurzatiaren eta han dagoen bide baten artetik.
Inpultsio bidezko hoditeria 1.449 metro luze izanen da, eta gehienbat larreak gurutzatuko ditu, baita Zorribenta erreka eta izei gorrien baso berri txiki bat ere. Hoditeria sartzeko zanga handik bertatik ateratzen diren lurrekin beteko da. Ponpaketa-estazioaren aldean egiten diren lur-erauzketetatik ateratzen diren lurren soberakina legeztaturiko hondakindegi batera eramanen da.
Espedienteari Lurraldearen Antolamenduko Zerbitzuaren 2014ko maiatzaren 28ko aldeko txostena erantsi zaio, Ingurumen Kalitatearen Zerbitzuaren erregistroan ekainaren 9an sartu zena. Txosten horretan irizten da jarduketa lurzoru urbanizaezinean kokatuko dela eta bateragarria dela Lurraldearen Antolamenduko Planarekin (2. LAP, “Nafarroa Atlantikoa”, 44/2011 F.D., 2011/07/21eko Nafarroako Aldizkari Ofiziala), baita udaleko hirigintza planeamenduan lurzoru urbanizaezina babesteko jasota dagoen araubidearekin ere (1999ko 85. Nafarroako Aldizkari Ofiziala, uztailaren 9koa). Dena dela, Udalak bere eskumeneko determinazioak bete daitezela begiratu beharko du, eta, ingurunean integratzeari dagokionez, lurzatiaren ezaugarriak eta azken egoera behatuko dira, paisaiako inpaktua murrizteko. Ingurumenaren gaineko Eragina Aztertzeko Atalak aldeko txostena eman du.
Espedientean dauden txostenak ikusirik eta Ingurumenaren eta Uraren zuzendari nagusiaren abenduaren 31ko 1158/2013 Ebazpenaren bidez eskuordetutako eskumenak erabiliz.
EBATZI DUT:
1. Ingurumen ukipenetarako baimena ematea Urdazubiko udal mugapean Alkerdi auzoko hondakin urak garraiatzeko proiektuari. Sustatzailea Nafarroako Toki Azpiegiturak, S.A. da.
2. Baimena neurri hauek aplikatzearen baldintzapean ematen da:
–Zangak ireki, ponpaketa-estazioa eraiki eta sarbidea egiteko, behar diren aldi baterako okupazio zerrendak mugatuko dira.
–Zorribenta erreka gurutzatzean obratik hurbil dauden erreka bazterreko landareak babestuko dira. Erreka bazterrak egonkortzeko harri-lubetak egin behar izanez gero, ez da hormigoia erabiliko, landareak berriz sortu ahal izateko.
–Ahalegin berezia eginen da hormigoi arrastorik eta beste material batzuen hondakinik ez botatzeko Zorribenta errekaren ibilguan eta bazterretan.
–Zorribenta errekaren bazterrak berriz landareztatuko dira sahats-aldaxkak sartuz, proiektuarekin batera aurkeztu den Ingurumen ukipenen azterlanean adierazi bezala.
–Ponpaketa-estazioak okupatzen duen eremuaren inguru osoan hurritz-zuhaixkak landatuko dira.
–Obrak bukatutakoan, larreak lehengoratuko dira lehenago ateratako landare-lurra destrinkotuz eta berriz aplikatuz.
–Obrak hasi baino 48 ordu lehenago, Bidasoa aldeko Basozaintzari abisatuko zaio. Abisatzeko, e-mail bat bidali beharko da helbide honetara: ogfobida@navarra.es.
3. Baimen honek, gainera, Lurraldearen Antolamenduari eta Hirigintzari buruzko abenduaren 20ko 35/2002 Foru Legearen 117. artikuluan ezartzen diren ondorioak izanen ditu, izan ere, artikulu horretan, lurzoru urbanizaezinean egin behar diren jarduerak baimentzeko prozedura ezartzen da.
4. Ebazpen honek ez du administrazio bidea amaitzen, eta espedientean interesa dutenek, administrazio publikoek izan ezik, gora jotzeko errekurtsoa jar dezakete, Landa Garapeneko, Ingurumeneko eta Toki Administrazioko kontseilariari zuzendua, hilabeteko epean.
Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean.
Ebazpen hau jakinarazi eta biharamunetik hasita kontatuko dira epeak.
5. Ebazpen hau Nafarroako Aldizkari Ofizialean argitaratzea.
6. Ebazpen hau Lurraldearen Antolamendu eta Hirigintza Zerbitzuari, Urdazubiko Udalari, Zugarramurdiko Udalari eta Bidasoa aldeko Basozaintzari eta interesdunari igortzea, behar diren ondorioak izan ditzan.
Iruñean, 2014ko ekainaren 9an.–Ingurumen Kalitatearen Zerbitzuko zuzendaria, Pedro Zuazo Onagoitia.
Iragarkiaren kodea: F1408471
