Iragarkia

65. ALDIZKARIA - 2013ko apirilaren 8a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

460/2013 EBAZPENA, martxoaren 15ekoa, Nafarroako Unibertsitate Publikoko errektoreak emana, Nafarroako Unibertsitate Publikoa Ikerketa Sarietarako deialdia onetsi eta dagokion gastua baimentzen duena.

Ikerketa Batzordeak, 2013ko urtarrilaren 24ko bileran, erabaki zuen 2013ko Ikerketa sarietarako deialdia errektoreari igortzea.

Ikerketarako errektoreordeak egindako proposamena ikusirik.

Ikusirik errektoreak 2013ko urtarrilaren 15ean emandako ebazpena, Nafarroako Unibertsitate Publikoaren 2013ko aurrekontuko gastuaren exekuzioa diru-sarreren ezagutzara eta altxortegiaren egoerara egokitzea onesten duena.

Unibertsitatearen Aholkularitza Juridikoak egindako txostena ikusirik.

Tratamendu fiskalari buruzko txostena ikusirik.

Kontabilitate Atalak kreditua badela ziurtatzeko emandako egiaztagiria ikusirik.

Kontuak ikuskatuta eta aldeko fiskalizazioa eginda.

Nafarroako Unibertsitate Publikoko Estatutuen 40. artikuluan esleituta dauzkadan eskumenak betez,

EBATZI DUT:

Lehena.–Baimentzea ebazpen honek ekarritako gastua, 7.250 eurokoa osotara. 2013ko gastuen aurrekontuko 31.30.00.482.08 Ikerketa sariak izeneko kontu-sailaren kargura 4.250 euro ordainduko dira –kopuru hori handiagotzeko aukera dago, aurrekontuaren baliabideen arabera– eta 31.30.00.230.06 Epaimahaien dietak kontu-sailaren kargura 3.000 euro ordainduko dira. Sari bakoitzak, beren modalitate bakoitzean, 2.800 euro izango ditu, gehienez ere.

Bigarrena.–Nafarroako Unibertsitate Publikoa Ikerketa Sarietarako 2013ko deialdia onestea, saritzeko Unibertsitateko irakaskidegoetako irakasleen ikerketa-jardueraren ibilbide osoa, 2011. eta 2012. urteetan Unibertsitateko irakaskidegoetako irakasleek egindako ekarpen zientifiko hoberenak, eta teknologia eta ezagutza bestetaratzeko emaitzarik hoberena, ebazpen honen eranskinean dauden oinarriekin bat.

Hirugarrena.–Ebazpen hau Nafarroako Aldizkari Ofizialean argitara dadila agintzea.

Laugarrena.–Ebazpen hau igortzea Ikerketarako errektoreordeari, Aurrekontuen eta Ekonomia Plangintzaren Atalari, Kontabilitate Atalari eta Kontu-hartzailetzari.

Bosgarrena.–Ebazpen honen aurka zilegi da berraztertzeko errekurtsoa jartzea Nafarroako Unibertsitate Publikoko errektorearen aurrean, hilabeteko epean, edo, bestela, administrazioarekiko auzi-errekurtsoa maila bereko Nafarroako Auzitegietan, bi hilabeteko epean, Nafarroako Aldizkari Ofizialean argitaratzen den egunaren biharamunetik kontatzen hasita.

Iruñean, 2013ko martxoaren 15ean.–Errektorea, Julio Lafuente López.

BOST IKERKETA SARI EMATEKO OINARRIAK, NAFARROAKO UNIBERTSITATE PUBLIKOA-2013ko DEIALDIA

2013ko martxoaren 15eko 460/2013 Ebazpenaren eranskina

Nafarroako Unibertsitate Publikoak ikerketa sustatu eta bultzatzeko aurrera daraman politikaren barnean, Ikerketarako Errektoreordetzak beharrezkoa ikusten du saritzea unibertsitateko irakasleen eta ikertzaileen ikerketa-jardueraren ibilbidea edo emaitza aipagarriak. Aurreko ekitaldietan egin dira xede horretako sarietarako deialdiak, finantza entitateekin egindako hitzarmenei esker ordaindu direnak, neurri batean edo osorik. Hitzarmen horiek agortu direlarik, Unibertsitate honetako zuzendaritza taldea, Ikerketa Batzordearen laguntzarekin, ziur dago honelako deialdiak mantendu eta sustatu behar direla ahal den neurrian, baita oraingoa bezalako aurrekontu-murrizketa garaietan ere. Errektoretza honek horregatik proposatu du deialdi hau.

Lehena.–Deialdiaren xedea.

Deialdi honen helburua da ikerketa jardueraren hainbat alderdi saritzea, ikerketa sariak emateko xedez, eta prozedura arautzea, publizitate, objektibotasun eta lehiakortasun printzipioen arabera. Horien artean, sarituko dira ikerketan garatutako ibilbide pertsonala, 2011n eta 2012an egindako ekarpen zientifiko hoberenak, eta 2011n edo 2012an bukatutako kontratu edo proiektu batetik eratorritako jakintza edo teknologia besteenganatzeko emaitzarik hoberena, betiere Nafarroako Unibertsitate Publikoko irakasleek eta ikertzaileek eginak.

Ekarpen zientifikotzat hartuko dira jakintza arlo bakoitzaren eremuko komunikabideetan egiten direnak, esaterako, artikuluak aldizkari indexatuetan, liburuak, liburuetako kapituluak, monografiak, errezentsioak, etab.

Bestetaratze emaitzatzat hartuko dira honako hauek: ustiatze patenteak, enpresaren batek merkaturaturiko zerbitzuak zein produktuak, eta frogaturiko eraginari buruzko azterlanak edo txostenak. Betiere, Nafarroako Unibertsitate Publikoan egindako kontratu edo proiektu baten emaitza gisa sortu badira.

Bigarrena.–Finantzaketa.

Deialdi honek 4.250 euroko aurrekontua du osotara, eta kopuru hori handiagotzeko aukera dago, aurrekontuaren baliabideen arabera. 2013ko gastuen aurrekontuko 31.30.00.482.08 Ikerketa sariak izeneko kontu-sailaren kargura ordainduko dira eta dauden modalitateko sariak ordaintzeko erabiliko dira.

Hirugarrena.–Sari modalitateak.

Bost sari emateko deialdia egin da, ondoko sail hauetan:

A) Zientzia Zehatzen eta Biologia, Medikuntza eta Teknologia Zientzien arloetako Ikerketa Saria ikerketako ibilbide pertsonal osoari. Saria gehienez ere 2.800 euroz hornitua dago.

B) Giza eta Gizarte Zientzien, Zientzia Juridikoen eta Ekonomikoen arloetako Ikerketa Saria ikerketako ibilbide pertsonal osoari. Saria gehienez ere 2.800 euroz hornitua dago.

C) Zientzia Zehatzen eta Biologia, Medikuntza eta Teknologia Zientzien arloetako Ikerketa Saria 2011. eta 2012. urteetan egindako ekarpen zientifiko hoberenari. Saria gehienez ere 2.800 euroz hornitua dago.

D) Giza eta Gizarte Zientzien, Zientzia Juridikoen eta Ekonomikoen arloetako Ikerketa Saria 2011. eta 2012. urteetan egindako ekarpen zientifiko hoberenari. Saria gehienez ere 2.800 euroz hornitua dago.

E) Saria 2011n edo 2012an bukatutako kontratu edo proiektu batetik eratorritako jakintza edo teknologia bestetaratzeko emaitzarik hoberenari. Saria gehienez ere 2.800 euroz hornitua dago.

Laugarrena.–Hautagaiek bete beharrekoak.

Sailetako edozeinetan parte hartzeko, Nafarroako Unibertsitate Publikoan lanaldi osoko arduraldian eta zerbitzu aktiboan dagoen Nafarroako Unibertsitate Publikoko irakaskidegoetako edozein irakasle edo ikertzaile izan daiteke hautagai, betiere ikerketa-talde batean erroldatuta badago eskaerak aurkezteko epea amaitzen den unean eta aurkezten den sariaren saileko eskakizunak betetzen baditu.

Eskatzaileek ezin izango dute aldi berean aurkeztu A eta B modalitateetara, ez eta C eta D modalitateetara ere aldi berean. Bestalde, ekarpen zientifiko hoberenaren C eta D modalitateetan, eskatzaile bakoitzak eskaera bakarra aurkeztuko du.

C eta D sailen kasuan, ekarpenean lagundu duten kide guztiek ontzat emana izan beharko da eskabidea, arrazoituriko ezintasun kasuetan salbu. Saria jasotzeko ebazpenaren onuraduntzat hartuko dira ekarpenaren kide guztiak. Hala ere, ondorio ekonomikoak soilik aplikatuko zaizkie eskabideak aurkezteko egunean Nafarroako Unibertsitate Publikoan zerbitzu aktiboan jarduten duten egileei.

E modalitatearen kasuan, eskaeraren helburu den ekarpenerako bidea eman duen proiektu edo kontratuaren ikertzaile arduraduna izan beharko da hautagaia. Ebazpenaren onuraduntzat hartuko dira proiektuko ikertzaile guztiak, ekarpenak zalantzarik gabe beste egile talde bat finkatzen duela ez bada (esaterako, Patentea). Ondorio ekonomikoak aplikatuko zaizkie eskabideak aurkezteko egunean Nafarroako Unibertsitate Publikoan zerbitzu aktiboan jarduten duten ikertzaileei, ez besteei.

Bosgarrena.–Hautagaitzak aurkeztea.

Hautagaitzak Ikerketa Zerbitzuan aurkeztuko dira, horretarako emango den inprimakia erabiliz, eta bertan argi azalduko da zein sari sailetara aurkezten den hautagaitza. Hogei egun balioduneko epea dago hautagaitzak aurkezteko, deialdia Nafarroako Aldizkari Ofizialean argitara eman eta biharamunetik kontatzen hasita.

A eta B modalitateen kasuan, hautagaiek beren curriculum vitaea aurkeztu beharko dute CVN formatua edo Zientzia eta Berrikuntza Ministerioak Plan Nazionaleko proiektuetarako deialdietan erabiltzen duen formatua erabiliz, ahal dela.

C eta D sailen kasuan, eta hautagaitza nork aurkezten duen alde batera utzita, hautagaitzak ekarpenaren egile guztien baimena izan beharko du. Hautagaitzaren xede den ekarpenaren kopia erantsi beharko da.

E sailaren kasuan, zehaztasunez deskribatu beharko da zertan datzan ekarpena edo emaitza, hura sorrarazi duen proiektua edo kontratua, eta egindako bestetaratzearen eragina eta garrantzia balioesteko modukotzat hartzen diren datu guztiak eman beharko dira.

Sarietara aurkezteak esan nahi du onartzen direla deialdiaren oinarriak.

Seigarrena.–Sarituen betebeharrak.

1. Saridunek jasotzen duten diru kopurua nahi bezala erabiliko dute, eta interesdunei 2013ko abenduaren 31 baino lehen ordainduko zaie.

2. C eta D modalitateen kasuan, Nafarroako Unibertsitate Publikoan lan egiten duten eta unibertsitatean erroldatutako ikerketa taldeetako kideak diren irakasle edo ikertzaile bat baino gehiago badira saritutako ekarpen zientifikoaren egileak, egileek sariaren ondorio ekonomikoak proportzioan banatuko dituzte.

3. Unibertsitateak sarien diru-kopuruaren zati bat atxikiko du zerga modura, araudi indardunaren arabera.

4. Deialdiko oinarriak betetzen ez badira, edo datuak ezkutatu, aldatu edo haietan iruzur egiten bada, saria kenduko da. Hala gertatzen denean, doakionak sariagatik hartuko duen dirua itzuli beharko du.

Zazpigarrena.–Sarien epaimahaia.

A, B, C eta D sailetako sariak bi epaimahaik emango dituzte, bat saritzen den ikerketa-arlo bakoitzerako. Epaimahai bakoitza 3 kidek osatuko dute, dagokion ikerketa-arloan ospe handikoak, eta errektoreak ebazpen baten bidez izendatuta, Ikerketarako errektoreordeak proposaturik.

E saileko sariari dagokionez, epaimahaia 3 kidek osatuko dute, eta, halaber, errektoreak ebazpen baten bidez izendatuko ditu, Ikerketarako errektoreordeak proposatuta, eta nahitaezkoa izango da enpresa eremuko ospe handiko kide bat egotea.

Epaimahaia Ikerketarako errektoreordeak eskatuta osatuko da, eta horretarako deialdia egingo du. Halaber, Ikerketarako errektoreordeak behar diren kudeaketak egingo ditu epaimahaiaren jarduna errazteko.

Zortzigarrena.–Sariak ematea.

1. A, B, C eta D modalitateetarako, Nafarroako Unibertsitate Publikoko Liburutegiko teknikariek egindako txosten bibliometriko bat edukiko du epaimahaiak.

2. Epaimahaiek txosten arrazoitu batean oinarrituta egingo dute sariak emateko proposamena, ikerketa-jardueraren kalitatearen eta eraginaren arabera.

3. Epaimahaiek unibertsitateko errektoreari bidaliko diote sariak emateko proposamena. Errektoreak behin betiko ebazpena emango du Nafarroako Unibertsitate Publikoa Ikerketa Sariak emateko erabakia hartzen duena. Ebazpen honetan saritutako hautagaien zerrenda baino ez da agertuko, eta gainontzeko hautagaitzak atzera bota direla ulertuko da. Zilegi da sariren bat eman gabe uztea epaimahaien balioespenekin bat etorriz, edo hautagairik ez dagoelako. Era berean, C eta D sailen kasuan, 2011. eta 2012. urte bakoitzean egindako ekarpenei ex-aequo saria emateko aukera izango dute epaimahaiek, kalitatea baliokidetzeko modukoa dela uste badute. Saria emateko behin betiko ebazpenaren aurka zilegi da berraztertzeko errekurtsoa errektorearen aurrean hilabeteko epean edo administrazioarekiko auzi-errekurtsoa Nafarroako Epaitegietan 2 hilabeteko epean, ebazpena argitaratzen den egunaren biharamunetik kontatzen hasita.

4. Sariak emateko ekitaldi publikoa 2013. urtean egingo da.

5. Ikerketarako Errektoreordetzak jakinaraziko du errektorearen behin betiko ebazpena, sari emakidarena, sariak emateko ekitaldi publikoaren aurretik.

Bederatzigarrena.–Sarien bateraezintasuna.

Unibertsitate honetako antzeko sari-deialdietan Ikerketako Senior saria edo ikerketa ibilbidearen saria erdietsi dutenak ezingo dira aurkeztu deialdi honen xedea diren banako ikerketa sarietako A eta B modalitateetara.

Hamargarrena.–Argitaratzea.

Deialdi honen oinarriak Nafarroako Aldizkari Ofizialean argitaratuko dira, eta unibertsitateko baliabide elektronikoen bidez hedatuko dira. Ikerketarako Errektoreordetza arduratuko da zabalkundeaz.

Hamaikagarrena.–Errekurtsoak.

Deialdi honen eta deialdi honetako oinarrien aurka, eta deialdi honen ondorio diren ekintzen aurka interesdunek zilegi dute berraztertzeko errekurtsoa, Nafarroako Unibertsitate Publikoko errektorearen aurrean, hilabeteko epean, edo administrazioarekiko auzi-errekurtsoa maila bereko Nafarroako Auzitegietan, bi hilabeteko epean; epeok deialdi hau Nafarroako Aldizkari Ofizialean argitaratzen den egunaren biharamunetik kontatzen hasiko dira.

Iragarkiaren kodea: F1304338