Iragarkia

225. ALDIZKARIA - 2013ko azaroaren 21a

1. NAFARROAKO FORU KOMUNITATEA

1.5. ESTATUTUAK ETA LAN HITZARMEN KOLEKTIBOAK

EBAZPENA, 2013ko urriaren 22koa, Arriskuen Prebentziorako eta Lanaren zuzendari nagusiak emana, Tuterako Piher Sensors and Controls, S.A. entitatearen hitzarmen kolektiboa erregistratu, gorde eta Nafarroako Aldizkari Ofizialean argitaratzea erabakitzen duena.

Tuterako Piher Sensors and Controls, S.A. entitatearen hitzarmen kolektiboaren testua (kode zenbakia: 31005072011987) aztertu da, erregistro honetan 2013ko urriaren 17an sartu zena, enpresaren ordezkariek eta sindikatuen ordezkariek 2013ko urriaren 4an izenpetuta, Langileen Estatutuari buruzko Legearen Testu Bategina onetsi zuen martxoaren 24ko 1/1995 Legegintzako Errege Dekretuaren 90. artikuluaren 2. eta 3. idatz-zatietan eta Hitzarmen Kolektiboen Erregistro eta Gordailuei buruzko maiatzaren 28ko 713/2010 Errege Dekretuan ezarritakoaren arabera. Horrenbestez,

EBATZI DUT:

1. Nafarroako Lan Hitzarmen eta Akordio Kolektiboen Erregistroan inskribatzeko agintzea.

2. Ebazpen hau Negoziazio Batzordeari jakinaraztea, eta adieraztea ebazpenak ez duela administrazio bidea amaitzen eta haren aurka gora jotzeko errekurtsoa jartzen ahal dela, Ekonomia, Ogasun, Industria eta Enpleguko kontseilariari zuzendua, jakinarazi eta biharamunetik hilabeteko epean.

3. Nafarroako Aldizkari Ofizialean argitaratzeko agintzea, denek jakin dezaten.

Iruñean, 2013ko urriaren 22an.–Arriskuen Prebentziorako eta Lanaren zuzendari nagusia, Imelda Lorea Echavarren.

HITZARMEN KOLEKTIBOA

2012-2015 urteak

I. TITULUA

1. artikulua. Eremua.

Hitzarmen kolektibo honek Piher S&C, S.A.ko langile guztiei eta haren indarraldian sartzen direnei eragiten die, taldetik kanpoko postuetan ari direnei izan ezik (lehen eranskinean aipatzen dira).

2. artikulua. Indarraldia.

1. Hitzarmen honek lau urteko indarraldia izanen du, lan arloko agintaritzak hitzarmena erregistratzen duen eguna edozein dela ere, eta 2012ko urtarrilaren 1etik aurrera izanen ditu ondorioak eta urtez urte luzatuko da besterik gabe, non ez duen alderdietako batek salatzen indarraldiaren edo edozein luzapenen amaiera baino hilabete lehenago.

2. Hitzarmena salatuta, eta berariazko akordioa lortu bitarte, nahitaezko klausulek bakarrik galduko dute indarra, arauen edukiak indarra izaten segituko baitu.

3. Legearen araberako ondorio guztietarako, alderdiek salatutzat ematen dute hitzarmen hau, ondorioetarako data 2015ko abenduaren 31 izanik.

4. Langileren batek, urteko kopuruan eta orokorrean, hitzarmen honetan ezarritakoak baino lan-baldintza hobeak izanez gero, errespetatu eginen zaizkio.

II. TITULUA

3. artikulua. Lanaren antolaketa.

a) Lanaren antolaketari eta langileen mugigarritasunari dagokienez, hitzarmen honen 32. artikuluan ezarritakoari jarraituko zaio eta, hori izan ezean, Langileen Estatutuan ezarritakoari, eskubide ekonomiko eta profesionalak alde batera utzi gabe.

b) Erdiko txanda ukitzen duen txanda aldaketaren bat dagoenean, pertsona ukituak eskubidea izanen du txanda aldaketaren unera arte errekuperatutako denboraz gozatzeko.

c) Hilabeterako aurreikusitako programazioaren berri emanen zaio enpresa batzordeari, baita programazio hori gauzatzeko aurreikusi den langileen mugigarritasunaren berri ere. Hala ere, programazioan ezustekoren bat dagoenean eta horrek langileak mugitzea ekartzen duenean, ahalik eta lasterren jakinaraziko da.

d) Anomalien kodea 6. eranskinean azaltzen da.

4. artikulua. Errendimenduak.

1. Errendimendu hoberena jarduera hoberenari dagokiona izanen da; hots, Bedaux eskalako 80 puntu orduko.

2. Eskatzen ahal den gutxieneko errendimendua errendimendu hoberenaren %75ekoa izanen da, hots, 60 puntu orduko eskulanaren kasuan.

3. Bitartean, eta makinako lanaren ekoizpen-saria ordaintzearen ondorioetarako, gehieneko jarduera lortutzat joko da.

III. TITULUA

Lan denbora

5. artikulua. Urteko lanaldia.

1. Langileen Estatutuaren 34.2 artikuluarekin bat, benetan egin beharreko lanorduak honako hauek izanen dira urtean:

–1.720 ordu 2012. urterako.

–1.716 ordu, hitzarmenaren indarraldiko gainontzeko urte bakoitzean.

6. artikulua. Lan egutegia.

1. Enpresako zuzendaritza eta enpresa batzordea ados jarrita finkatuko dira, urte bakoitzerako, lan ordutegiak eta egutegiak.

2. Arau orokor gisa, laneko lau txanda ezarri dira: bat lanaldi zatitukoa, goiz eta arratsaldez, eta beste hirurak goiz, arratsalde eta gaueko txanda jarraitukoak.

3. General de Piher S&Cko egutegi orokorrean agertzen da lantegia gutxienez ere 218 egunez egonen dela irekita.

4. Fabrikazio beharrengatik, gutxienez ere bi hilabetez lan egin behar bada Piher S&Cren egutegi orokorrean jaiegun direnetan, egutegi bat adostuko da zuzendaritzaren eta enpresa batzordearen artean, eta horretan agertuko da hilean asteburu bat gutxienez jai izanen dela; orobat, legearen arabera ezarrita dauden atsedenaldiak lanaldien artean. Egutegi hori ezarriko den ataleko langileei aplikatuko zaie txandaka, eta gutxienez ere 15 egun lehenago jakinaraziko da.

Salbuespenez, zilegi izanen da egutegi orokorreko oporraldia lan denbora gisa hartuko duen egutegi bat prestatzea; horrelakoetan, egutegi horren eraginpean dauden langileek maiatzeko bigarren hamabostaldiaren eta urriko lehenengoaren artean hartuko dute oporraldia.

5. Arau orokor gisa, urteko egutegian lantokia itxita egonen da Pazko astean (Aste Santuaren ondorengoan), Tuterako jaietan eta abenduaren 3tik 8ra, baldin eta norberak hartzeko 3 egun gutxienez geratzen badira egutegia doitzeagatik.

Norberak hartzeko egunak bukatzen badira, ordaindu gabeko lizentziak eskatzen ahalko dira, bost egun gehienez urteko eta langile bakoitzeko, norberak hartzeko egunen eta ordaindu gabeko lizentzien kontzeptuak direla eta.

6. Adostasunik ez bada, Nafarroako Lan Auzitegiak erabakiko du.

7. artikulua. Lanaldiaren banaketa irregularra.

Eskaera handiko edo txikiko boladetan antolaketari ekiteko, enpresak urtean 48 orduko poltsa izanen duela erabaki da. Salbuespen gisa, 48 ordu horiek 80ra iristen ahal dira, gora edo behera, bi urtean; hau da, aurreko edo hurrengo urteko 32 ordu erabiltzen ahal dira eta urte horretako 48 orduko poltsatik kendu edo hari gehituko litzaizkioke. Ordu poltsa horrek edo lanaldiaren banaketa irregularrak baldintza hauek bete beharko ditu:

a) Aplikatzeko, enpresa batzordeari emanen zaio horren berri produkzio batzordearen bitartez, neurria zergatik aplikatzen den azaltzen duten datuak emanez. Gutxienez ere 15 egun lehenago, abisu emanen zaie egutegi aldaketak ukitutako langileei.

b) Ordu poltsaren aplikazioak ez du eraginik izanen hilabeteko nominan. Lanik egin gabe utzitako orduak edo gehiegi egindakoak enplegatu bakoitzaren ordu-saldoaren parte izanen dira.

c) Ordu-poltsa, aldekoa edo kontrakoa, txanda osoetan gauzatuko da eta, larunbatez eginez gero, goizeko, arratsaldeko edo gaueko txandatan.

d) Kontzeptu hau dela-eta langileek ezin dute bi larunbatetan baino gehiagotan lan egin hilabetean, ezta hiru larunbat jarraituetan ere.

e) Lanaldiaren banaketa irregular hau aplikatuta lan egindako ordu bakoitza langilearen ordu-poltsan sartuko da ordu positibo gisa. Larunbatez lan eginez gero, diru konpentsazio bat hartuko da gainetik, hau da, lan egindako orduen %50 hitzarmeneko orduaren ordainsariaz biderkatuta gehi prima eta gau lanaren saria, halakorik badagokio, baina hilabetetik gorako mugaeguna eta oporrak sartu gabe. Banaketa irregularra aplikatzen den hilabetean sorraraziko da konpentsazio hori.

f) Lanaldiaren banaketa irregularra ez da uztailean eta abuztuan aplikatuko.

g) Lanaldiaren banaketa irregularra aplikatzeagatik lan egin ez diren orduak lan egin balira bezala ordainduko dira hitzarmenaren indarraldiaren bukaeran, baina primarik gabe, hori lan egin zen unean ordainduta baitago.

h) Lanean gehiegi egindako orduak murrizketaren bidez konpentsatzen ez badira, ordu arruntak bezala ordainduko dira hitzarmenaren indarraldia bukatzean.

i) Ezin dira aukerako egunak erabili lanaldiaren banaketa irregularra aplikatzen denean.

8. artikulua. Aparteko orduak.

Bi aldeek adostu dute ahalik eta gehien murriztu behar direla aparteko orduak eta, hala, zuzendaritzaren nahia da ezinbestekoetara murriztea. Ordu horiek, borondatezkoak, 80 izanen dira gehienez urtean, langile bakoitzeko.

8. eranskinean ageri den ordainsaria izanen dute aparteko orduek.

Aukera izanen da, halaber, aparteko ordu bakoitzeko ordu bateko atseden denbora emateko gehi diru konpentsazio bat, hau da, aparteko orduaren prezioaren (8. eranskina) eta ordu arruntaren prezioaren (4. eranskina) arteko aldea. Salbuespen gisa, orduak atseden denborarekin konpentsatzen ahalko dira: aparteko ordu bakoitzeko 2 orduko atsedenaldia. Kasu horretan eta produkzio edo zerbitzu arazorik izan ez dadin, atseden orduak langilea eta Zuzendaritza ados jarrita hartuko dira.

Aparteko orduak eskatzen dituzten produkzio edo mantentze lanen berri emanen du enpresako Zuzendaritzak.

Hilabete bakoitzaren hasieran, aparteko orduak egin dituztenen zerrenda eta egin behar izatearen arrazoiak jakinaraziko zaizkio enpresa batzordeari.

Horien kopurua eta arrazoiak eta lan kargaren aurreikuspena ikusita, langileak kontratatu behar diren aztertuko dute hitzarmena sinatzen duten aldeek.

9. artikulua. Oporrak.

1. Oporrak 30 egun naturalekoak izanen dira, eta lan egoera bereziko aldiekin batera izaten ahal dira, hala nola konponketak, inbentarioak, tokiko festak eta antzekoak, enpresako zuzendaritzak, enpresa batzordearekin ados jarrita, komenigarria dela uste badu. Adostasunik ez bada, Nafarroako Lan Auzitegiak erabakiko du.

2. Lantegia ixten ez bada, oporrak banatzeko egunak gutxienez ere bi hilabete lehenago jakinaraziko zaizkie interesdunei, enpresako produkzioa ongi antola dadin eta langileek egunak aldatzeko eskaerak egin ditzaten, aldatu nahi izanez gero. Enpresako zuzendaritzak, alegatutako arrazoiak ikusi eta txandakatze irizpideak aplikaturik, bidezkoa dena ebatziko du, eta zilegi izanen du eskaerak onartzea ala ez; langileek aukera izanen dute, ados ez badaude, legezko organo eskudunaren aurrean dagokien egintza gauzatzeko.

3. Oporrak direla eta enpresa ixten bada, zuzendaritzak, kasuan kasuko langileekin ados, denbora horretan garbiketa lanak, mantentze lanak, beharrezkoak diren obrak, bezeroen harreraz edo premiez arduratzeko lanak, etab, eginen dituzten langileak hautatuko ditu. Langile horiek urteko oporraldia hartzeko modurik egokiena interesdunekin banan-banan adostuko du.

4. Edozein arrazoirengatik enpresan urte naturala osatzen ez duen langileak urtean egindako denboraren araberako egunak izanen ditu.

Azken kitatzea egiteko, kontuan hartuko da zer alde dagoen sortutakoaren eta kobratutakoaren artean, positiboa izan ala negatiboa izan.

10. artikulua. Oporretako ordainsariak.

Hitzarmeneko ordainsaria, prima eta plusak izanen dira oporrak ordaintzeko soldata kontzeptuak.

a) Opor egunak dauden hilabeteetan, hitzarmeneko ordainsariaren arabera ordainduko dira.

b) Prima kontzeptuarekin, eguneko 5.71 orduren arabera ordainduko dira opor egunak (eguneko 8 ordu bider 5 eta zati 7 eginda ateratzen den emaitza), hitzarmen honen indarraldia bukatu bitarte.

c) Kontzeptu horiei plus pertsonalak gehituko zaizkie, pertsona bakoitzaren kasuaren arabera; zenbateko hori aterako da plus horien urteko euro kopurua 12 hilabetez zatituta.

11. artikulua. Lizentzia ordainduak.

Hitzarmen honen eraginpeko langileek, aldez aurretik abisatuta (ahal denean) eta behar bezala justifikatzen badute, baimen ordaindu hauek lortzeko eskubidea izanen dute:

a) 17 egun natural ezkontzagatik, ezkondu eta gero enpresan lanean segituz gero. Egun horiek opor egunekin batu daitezke, biak batera izanez gero.

b) Ezkontidearen eta seme-alaben heriotza: 10 egun natural.

c) Gurasoen, anai-arreben, aitaginarrebaren edo amaginarrebaren eta suhi-errainen heriotza: 3 egun natural.

Egun horiei beste egun bat gehituko zaie hiru egun natural horietakoren bat igandea edo jaiegun ofiziala bada.

d) Gurasoen, aitaginarrebaren edo amaginarrebaren, seme-alaben eta ezkontidearen eritasun larria: 3 egun natural. Larritzat joko da ospitalean gutxienez ere hiru egun egin behar direnean, eta egunak eria ospitalean sartzen den egunetik hasita zenbatuko dira. Familiako kide beragatik urte batean bigarren edo hirugarren lizentzia hartu behar denean 2 egun izanen dira, eta egun bat hurrengo aldietan.

Interesdunek, eria ospitalean dagoen garaian, dagozkien lizentzia egunak egoki iruditzen zaienean hartzen ahalko dituzte. Larritasun handiko eritasunetan ere, nahiz eta ospitaleratzea bidezkotzat ez jo, lizentzia horiek hartzeko aukera izanen da.

e) Behar den denbora, lanaldian medikuarengana joateko. Gaueko txandako langileei, aurreko egunean atsedenik hartu ez badute, medikuaren kontsulta beren bizilekutik kanpo dagoenean, behar den denbora emanen zaie.

f) Seme edo alabaren jaiotza, harrera edo adopzioa: 2 lanegun.

g) Osaba-izeba propioen, lehengusu propioen, iloba propioen, aitona-amonen, biloben eta koinatu-koinaten heriotza: egun natural bat.

h) Gurasoen, seme-alaben, biloben, anai-arreben eta koinatu-koinaten ezkontza: egun natural bat.

i) Seme-alaben, ezkontidearen eta gurasoen ebakuntza kirurgikoa edo ospitaleratzea, hiru egun baino gutxiagokoa: egun natural bat.

j) Seme-alabei, ezkontideari eta gurasoei lanaldian medikuarengana laguntzeko, behar-beharrezkoa den denbora.

Gurasoen kasuan, lizentzia ordaindua izateko eskubidea izanen da langilea seme edo alaba bakarra denean edo gurasoen herrian bizi den seme edo alaba bakarra denean, edo gurasoak langilearen etxean bizi direnean. Gaueko txandako langileen kasuan, lizentzia hori izateko eskubidea izanen dute aurreko egunean atsedenik izan ez badute eta medikuaren kontsulta beren bizilekutik kanpo dagoenean.

k) Betebehar publiko saihestezin bat betetzeko behar-beharrezkoa den denbora. Zeregin hori betetzeko ordainsaria jasotzen bada, diferentzia baizik ez du ordaindu beharko enpresak.

l) Ohiko bizilekua aldatzeko: egun natural bat.

Kasu horietan guztietan ezkondutakoen eskubide berberak izanen dituzte ezkondu gabeko bikote egonkorrek, dagokion erakunde ofizialak behar bezala egiaztatuta baldin badaude.

Kasu horietan guztietan, langilea gaueko txandan ari bada, aurreko lanaldian hartzen ahalko du lizentzia.

Lizentzia horiei egun natural bat edo enpresari bidezkoa iruditzen zaiona gehituko zaie, lizentzia eskatzera behartzen duten gertaerek 250 km-ra baino urrunago joatea eskatzen dutenean.

Indarra duen legerian ezarritako lizentziak aplikatuko dira hitzarmen honek jasotzen ez dituen kasuetan.

12. artikulua. Lizentzia ordainduak pagatzea.

III. tituluaren 11. artikuluko lizentzia ordainduak hitzarmeneko ordainsaria kontzeptuaren arabera pagatuko dira (“k” letran daudenak izan ezik), eta horiei dagokienez honako hau beteko da:

a) Enpresaren kontra lan arloko epaiketaren bat izanez gero, epaiak enpresa zigortzen badu, auzi-jartzaileari ondoko egunetako soldaten zenbatekoa ordainduko zaio (pertsonalki agertu behar du): Lan arloko Epaitegian izan diren egintzen egunak eta Nafarroako Gobernuko Lan eta Gizarte Ongizate Departamentuan adiskidetzeko izandakoak, baita Nafarroako Lan arloko Auzitegikoak ere.

b) Langileak enpresaz kanpo bere bizitza partikularrean dituen interesengatik joan behar badu epaiketara, ez zaio deus ordainduko.

c) Langilea lekuko gisa agertzen denean epaiketa zibiletara, ez zaio deus ordainduko, deitu dutenei eskatzen ahal baitie ordaina langileak.

d) Langilea lekuko gisa agertzen denean epaiketa kriminaletan, ez da deus ordainduko, auzitegiari eskatzen ahal baitio kalte-ordaina langileak.

13. artikulua. Ordaindu gabeko lizentziak eta borondatezko eszedentziak lanpostua gordeta.

Kasu berezietan, behar bezala egiaztatzen bada, behar den denborarako lizentziak ematen ahalko dira, soldatarik gabe betiere.

Lizentzia horietan, erabilitako orduak deskontatuko dira, orduko prezioaren-hitzarmeneko ordainsariaren zenbatekoaz biderkatuta (4. eranskina). Primako orduetan ere eginen da deskontua.

Lizentzia horrek Gizarte Segurantzan ekar dezakeen baja, enpresaren eta interesdunaren artean adostuko da kasu bakoitzean.

Enpresan gutxienez ere urtebeteko antzinatasuna duten langileek sei hilabetetik gorako borondatezko eszedentzia eskatzen ahalko dute, eta bost urtekoa gehienez ere, lanpostua urtebetez gordetzeko eskubidearekin. Epe hori bukatuta, gordeko zaion lanpostua lanbide talde bereko bat izanen da. Lanera itzultzea eszedentziako azken hilabetearen barnean eskatu beharko da.

Banaka aztertzen ahalko da lanaldia eta dagokion soldata borondatez murrizteko edozein eskaera.

Borondatezko eszendentziak eta lizentzia ordaindu gabeak ez dira inolaz ere erabiliko Piher S&Crekin bidegabeko lehian aritzeko.

14. artikulua. Guardia lokalizatuak eta deien ondoriozko konpentsazioa.

a) Guardia lokalizatuetan, langileak, ados jarri ondoren, prest egon behar du fabrikara joateko bere eskumenekoak diren mantentze edo antolaketa lanez edo beste batzuez arduratzeko, Piher S&Cko egutegi orokorraren arabera fabrika itxita dagoen egunetan.

b) Ordutegia 08:00etatik 20:00ak artekoa izanen da.

c) Guardia lokalizatuen kasuetan ordaindu beharrekoa: bakoitzaren soldata mailako aparteko hiru orduren kostua guardiako 12 orduko, edo guardiako denborari proportzioz dagokiona.

d) Deia egin dela esanen da, langileari dei egiten zaionean, aldez aurretik abisatu gabe eta ezustean, bere eskumenekoak diren mantentze edo antolaketa lanez edo beste batzuez arduratzeko, bere lanalditik kanpo, lanegunetan eta Piher S&Cko egutegi orokorraren arabera jaiegunak diren egunetako 00:00etatik 24:00ak arte.

e) Ustekabeko deiak direla-eta hitzarmen honen 11. Eranskineko kopuruaz ordainduko dira kategoria guztiak.

f) Bi kasuetan, konpentsazioa bateragarria da lan denborari dagozkion aparteko orduen zenbatekoa jasotzearekin, edo konpentsaziozko atsedenaldiarekin.

IV. TITULUA

Ordainsariak

15. artikulua. Soldatak goratzea.

Hitzarmen honen indarraldian, soldata igoera hauek aplikatuko dira hitzarmen honetako kontzeptu guztien gainean:

–Finkagarriak:

• 2012. urterako: %0,75.
• 2013. urterako: %1.
• 2014. urterako: %1.
• 2015. urterako: %1.

–Ez-finkagarriak: Enpresako langile guztien urteko absentismoa %3,50etik azpikoa eta KPIa %1etik gorakoa denean aplikatuko dira.

• 2013: (Urteko KPIa-%1)-ren %50, eta %0,5 gehienez ere.
• 2014: (Urteko KPIa-%1)-ren %50, eta %0,5 gehienez ere.
• 2015: (Urteko KPIa-%1)-ren %50, eta %0,5 gehienez ere.

Absentismoa kalkulatzeko, legez ezarritako sindikatuen ordu-kreditua ez da kontuan hartuko.

Bi baldintzak emanez gero, kopuru ez-finkagarriak kalkulatuko dira, eta urtarrileko nominarekin batera ordainduko da.

16. artikulua. Soldata gordinaren urteko zenbateko osoaren banaketa.

Urteko ordainsari gordinen banaketaren portzentajeak berberak izanen dira soldata talde guztientzat, taula hauen arabera:

–Hitzarmeneko oinarria: %63.

–Hitzarmenaren plusa: %12.

–Hitzarmeneko ordainsaria: %75.

–Prima: %9.

–Aparteko pagak: %16.

Soldata taldeen zenbateko gordinak hitzarmen honen 3. eranskinean ageri dira.

Nomina langileen administrazio sailak eginen du hilabete bakoitzeko lehenengo egun baliodunean eta berehala ordainduko zaie hitzarmen honen eraginpean dauden langile guztiei, bankuko transferentziaren bidez.

Konpromiso hori bete ahal izateko, behar-beharrezkoa da hilabete bukaeran laneko ezintasun egoera bat hasten duten langileek berehala aditzera ematea Piher S&Cri. Gainera, gaixo-agiria 3 egun naturaleko epean aurkeztu beharko dute, erregelamenduz ezarrita dagoen bezala.

Nominaren agiria euskarri informatikoan ematen ahalko zaie hala eskatzen duten langileei.

17. artikulua. Bermatutako gutxienekoa.

1. Hitzarmen honetan itundutako kopuruak gordinak dira, hau da, ez dago deskontatuta ordaindu beharreko kontzeptu bakar bat ere, hala nola Gizarte Segurantzako kotizazioa eta Pertsona Fisikoen Errentaren gaineko Zergaren (PFEZ) atxikipena.

2. Nolanahi ere, enpresak soldata-kategoria edo -maila guztiei bermatzen dizkie, gutxienez, Nafarroako Metalaren Hitzarmen Probintzialeko gutxieneko soldata bermatuak urteko konputuan zehazten dituen kopuruak (41.B.2 artikulua), urtero eguneratu eta gero, baita hitzarmen honetako soldata tauletan itundutako soldata guztiak ere.

18. artikulua. Hitzarmeneko oinarria.

1. Hitzarmeneko oinarrizko soldata ordu bakoitzari dagozkion eurotan adierazita dago, eta 1. kodeko arazo orduak ordaintzeko aplikatuko da.

1.–1. kodeko arazo orduak 4. eranskineko 1. zutabeko euroez biderkatuko dira.

2. Halakotzat joko da 4. eranskineko 1. zutabean ageri den hitzarmeneko gutxienekoa.

Horrela kalkulatuko da: urteko soldata gordinaren %63a zati urteko lanordu guztiak, jaiegunetako orduak eta oporretako orduak batuta ateratzen den zenbatekoa.

19. artikulua. Hitzarmeneko plusa.

Horrela kalkulatuko da: urteko soldata gordinaren %12 zati urteko lanordu guztiak, jaiegunetako orduak eta oporretako orduak batuta ateratzen den zenbatekoa.

1. Halako kontzeptutzat joko da 4. eranskineko 2. zutabean soldata maila bakoitzerako ageri den kopurua, orduko eurotan adierazita dagoena.

2. Langileari egozten ahal zaizkion arrazoiengatik gutxieneko errendimendua edo jarduera lortzen ez denean, hitzarmeneko plus hori jasotzeari utziko zaio. 1. kodeko arazo orduak.

3. Hitzarmeneko plus horren zenbatekoa lan egindako ordu bakoitzeko ordainduko da, puntualtasun edo agertze hutsik izan ez bada behintzat.

4. Hitzarmeneko plus hori ez da ordainduko aparteko orduetan, zeren eta horien prezioa kalkulatzeko kontuan hartu baita kontzeptu hori.

5. Langile bat lanera joan ez edo berandu iristen bada edo lanaldi osoa egiten ez badu berari egozten ahal zaizkion arrazoiengatik, hitzarmeneko plusa jasotzeko eskubidea galduko du, honela:

a) Berandu iristeagatik edo lanaldi osoa ez egiteagatik, egun horretan hitzarmeneko plusaren %25 galduko du.

b) Artikulu honetan ezarritakoaren ondorioetarako, kasuan kasuko hilabeteak zenbat egun, horrenbeste egunetan zatituko da hitzarmeneko plusa, eguneko zatia kalkulatzeko.

c) 12. eranskinean ageri dira zenbatekoak.

20. artikulua. Hitzarmeneko ordainsaria.

1. Kontzeptu horretan batuta daude aurreko bi kontzeptuak, hitzarmeneko oinarria eta hitzarmeneko plusa, eta urteko soldata gordinaren %75 da.

2. Urteko soldata gordinaren %75 12 hilabeteko berberetan banatuta ateratzen den zenbatekoa da, eta 3. eranskineko 8. zutabean ageri da soldata maila bakoitzeko, hilabete bakoitzeko eurotan adierazia, kontuan hartu gabe hilabeteak zenbat lanegun, jaiegun, zubi edo opor dituen. Beraz, ez da jaiegunen aparteko ordainketarik izanen.

3. Gizarte Segurantzako alta egunen arabera kobratuko da.

4. Lanaldi partzialeko kontratua duten pertsonek urteko lanaldiaren arabera kobratuko dute.

21. artikulua. Urruntasun plusa.

1. Hitzarmen honen eraginpean dauden eta gaur egun Tuteratik kanpo bizi diren langileei urruntasun plusa ordainduko zaie; hots, 11 eranskinean ageri den zenbatekoa, egunean joan-etorri bat bakarrik.

2. Bizitzera beste herri batera joaten den edozein langilek herri horri dagokion urruntasun plusa jasoko du, lekualdaketaren egunetik hasita.

22. artikulua. Fideltasun edo antzinatasun plusa.

1. Fideltasun plusa hirurtekoa betetzen den egunean sorraraziko da eta ondoko urteetako egun berean. Plus hori hilero ordainduko da, urtarriletik abendura bitarte, eta banatzeko modua, berriz, kontzeptu horri urtean guztira dagokiona hamabiz zatituta ateratzen dena izanen da.

2. Fideltasun plus hori zehazteko, kontuan hartuko dira enpresan etenik gabe lan egindako urteak, hirunaka kontatuak. Urte horiek etenik gabeak izan direla esanen da kontratuen artean gure egutegi orokorreko 20 lanegun baino gehiago izan ez direnean.

Hitzarmen hau sinatzean, 10 hirurteko edo gehiago dituzten langileen eskubidea finkatuko da, eta gehitzen segituko du 10era iritsi arte hitzarmen honen indarraldia bukatzean horrenbeste hirurteko ez duten langileentzat.

3. Ondorio horietarako ez dira zenbatuko bi hilabetetik gorako soldata gabeko lizentzia aldiak, borondatezko eszedentzia eta antzeko beste edozein egoera.

4. Urtean ordaindu beharreko zenbatekoak 10. eranskinean ageri dira.

23. artikulua. Gaueko lanaren plusa.

11. eranskinean soldata maila bakoitzerako ageri den zenbatekoa izanen du gaueko lanaren plusa.

Gaueko 22:00etatik biharamuneko 06:00ak arte lanean egindako orduengatik emanen da gaueko lanaren plusa.

24. artikulua. Egutegi orokorrean lanekoa ez den egun batean lan egiteagatik ematen den plusa.

1. Piher Sensors & Controls-eko egutegi orokorrean lanekoa ez den egun batean lan egiten dutenek (egutegi berezi bat aplikatzearen ondorioz) 11. eranskinean ageri den plusa izanen dute lanekoak ez diren egunetan lan egin duten egun bakoitzeko; oporrei dagokien zati proportzionala sartuta dago kopuru horretan.

2. Adostutako egutegiaren arabera aldaketaren bat baldin badago oporraldian, hitzarmen honen 11. eranskinean ageri den konpentsazioa izanen da, bi zatitan ordaintzekoa, uztailean eta abuztuan. Kasu horretan, konpentsazio bat emanen da lanekoak ez diren egunetan lan egindako egun bakoitzeko, larunbata, igandea edo estatuko, autonomia erkidegoko edo herriko festa eguna izaten denean.

25. artikulua. Txandakako lanaren plusa.

Produkzio beharrengatik goiz, arratsalde eta gauez txandaka lan egiten bada, baldintza horietan ari diren langileek 16 ordu gutxiago izanen dituzte urtean, edo dagokien proportzioa murriztuko zaie, bigarren txandakatze ziklotik aurrera.

Astean behin. Ordu horiek norberak nahi duenean murriztuko zaizkie, baina ezin dira jaiegunetan hartu.

26. artikulua. Pizgarriak.

Pizgarriengatiko ordainsariak 4. eta 5. eranskinetan ageri dira soldata talde bakoitzarentzat, eta lanean egindako ordu bakoitzeko ordainduko dira, errendimenduaren edo jardueraren arabera.

Benetan lan egiten den aldietan aplikatuko da.

Oporraldian, hitzarmen kolektibo honen 8. artikuluan ezarritakoa aplikatuko da.

27. artikulua. Aparteko eskersariak.

Urteko soldata gordinaren %16 zati bi eginda ateratzen da.

1. Soldata maila bakoitzean ordainduko diren zenbatekoak 7. eranskinean azaltzen dira, hurrenez hurren.

2. Eskersariok uztailaren 15etik 20ra bitarte eta abenduaren 17tik 22ra bitarte ordainduko dira, hurrenez hurren.

3. Eskersari horien zenbatekoaren likidazioa, enpresan urtea osatu ez duten langileen kasuan, lanean egindako egunen araberakoa izanen da.

28. artikulua. Ikasketetarako laguntza.

1. Ikasketetarako laguntza emanen zaie ondoko kasuotan dauden langileei eta haien seme-alabei:

a) Langileen seme-alabei, hitzarmen honen indarraldiko ikasturte bakoitza hasten denean 4 urte eta gehienez 16 badituzte, 9. eranskineko “Jaso beharreko kopurua” izeneko zutabean ageri dena ordainduko zaie, ikasturtearen hasieratik.

b) Zenbait ikasketatan ari diren langileei, berriz, 9. eranskineko zutabe horretan ageri diren zenbatekoak ordainduko zaizkie.

2. Hilero emanen da diru hori, irailetik ekainera bitarte, edo kurtsoari dagozkion hilabeteetan, eta klaseetara agertu izanaren frogagiria aukeztu beharko da hilero, ikastetxeak sinatuta. Kasu bakoitzean izaten diren egoerak aztertuko dira.

3. Ematen diren diru zenbatekoak enpresak zehaztuko ditu hurrengo urteetan, urte bakoitzeko beharrak kontuan hartuta.

29. artikulua. Ordainsaria, eritasun edo istripu kasuan.

1. Eritasunaren ondoriozko ezintasun iragankorra izanez gero, ondokoa ordainduko zaie lantegiko langileei:

a) Kotizazioko soldataren %80, aldi baterako ezintasunaren lehen egunetik hasita, bajako partea urtean lehenengoa denean.

b) Kotizazioko soldataren %80, aldi baterako ezintasunaren hirugarren egunetik hasita, bajako partea urtean bigarrena denean.

c) Kotizazioko soldataren %80, aldi baterako ezintasunaren laugarren egunetik hasita, bajako partea hirugarrena edo hurrengoren bat denean.

d) Legez ezarritako gutxieneko aldian kotizatu ez izateagatik edo beste arrazoiren batengatik langileek eskubiderik ez badute Gizarte Segurantzako prestazioak jasotzeko aldi baterako ezintasuna edo eritasuneko baja dutenean, enpresak beren kotizazioko soldataren %80 ordainduko die bajako lehen hamabost egunetan, %20 15.etik 20.era bitarte, eta gero %5; portzentaje horiek aldi baterako ezintasunaren lehen egunetik ordainduko dira bajako partea urtean lehena denean, hirugarren egunetik hasita bajako partea urtean bigarrena denean eta laugarren egunetik hasita hirugarrenean eta hurrengoetan.

2. Lanerako ezintasun iragankorra istripu batengatik izanez gero, enpresak ordainsarirako falta dena osatuko du, bajaren lehen egunetik hasita eta egoera hori bukatu arte.

3. Artikulu honetako 1. eta 2. lerroaldeek berekin dituzten hobekuntzak eten egin ditzake enpresak abusua izan dela frogatzen bada.

30. artikulua. Dietak, bidaiak eta irteerak.

1. Lanaren ondorioz egin beharreko bidaiak gastuak ordainduta eginen dira, eta lanaldian luzatutako orduak berreskuratu eginen dira.

2. Bidaia horietarako garraiobidea enpresak jarriko du.

3. Lanaren beharrak direla eta, enpresak 50 euroko konpentsazioa ordainduko du fabrikatik kanpoko irteeretan gaua Espainiako lurretan norberaren etxetik kanpo eman behar denean.

4. Lanaren beharrak direla eta, nazioarteko bidaietan, enpresak eta langileak konpentsatzeko modua eta zenbatekoa adostuko dituzte; zenbatekoa ez da Espainia barreneko irteeretarako ezarritakoa baino txikiagoa izanen.

V. TITULUA

Lanbide sailkapena

31. artikulua. Lanbide-taldeak.

Piherko langileak sei lanbide-taldetan sailkatu dira, 1. eranskinean ageri diren moduan; batez ere, prestazioaren edukia eta konplexutasuna, lanbide-gaitasunak, tituluak, ezagutza, autonomia, agintea, eta abar hartu dira kontuan, eta hainbat zeregin, eginkizun eta lanbide espezialitate sartzen ahal dira talde bakoitzean.

Langileak lanbide-taldetan sailkatuko dira, eta haien barrenean eginen da mugikortasun funtzionala. Taldeak zenbaki ordinal baten bidez bereiziko dira, eta hainbat soldata mailatan banatuko dira ondorio ekonomikoetarako.

1. lanbide-taldea.

Irizpide orokorrak: talde honetako langileek zuzeneko erantzukizuna dute enpresaren arlo funtzional baten edo gehiagoren kudeaketan, edo zailtasun eta kualifikazio handieneko lan teknikoak egiten dituzte. Erabakiak hartzen dituzte edo haiek prestatzen parte hartzen dute, baita helburu zehatzak finkatzen ere. Autonomia, ekimen eta erantzukizun handiz burutzen dituzte beren eginkizunak.

Prestakuntza: goi mailako unibertsitate titulua edo pareko ezagupenak, enpresak onartuak, berariazko ikasketekin eta/edo lanbide esperientzia sendoarekin osatuta.

2. lanbide-taldea.

Irizpide orokorrak: autonomia, ekimen eta erantzukizun handiz, lan tekniko zailak egiten dituzten langileak dira, helburu orokor zehaztuak dituztela, edo eduki intelektual edo giza harreman handiko zereginetan dihardute. Orobat, eginkizunak integratu, koordinatu eta gainbegiratzeko zuzeneko ardura duten langileak, hain zuzen ere kolaboratzaile talde batek arlo funtzional berean betetzen dituen eginkizunak.

Prestakuntza.–Goi edo erdi mailako unibertsitate titulua edo pareko ezagupenak, enpresak onartuak, gehi esperientzia zabala bere sektore profesionalean.

3. lanbide-taldea.

Irizpide orokorrak: agintzeko erantzukizunarekin edo gabe, tarteko jarduera intelektuala eta giza harremanak eskatzen dituzten zereginak burutzen dituzten langileak dira, zailtasun tekniko ertaineko jarraibide zehatzen esparruan, prozesuan autonomia izanik. Zeregin homogeneoak integratu, koordinatu eta gainbegiratzera behartzen duten eginkizunak dituzte, hain zuzen ere kolaboratzaile talde batek antolaketa maila txikiagoan betetzen dituzten eginkizunak.

Prestakuntza. Goi edo erdi mailako unibertsitate titulua edo pareko ezagupenak, enpresak onartuak, edo lantokiko prestakuntza edo lanbidean arituta lortutako ezagupenak.

4. lanbide-taldea.

Irizpide orokorrak: lan autonomoak egiten dituzten langileak dira, ekimena izatera eta arrazoitzera beharturik, baita erantzukizunez jokatzera ere, beste norbaitek gainbegiratuta.

Prestakuntza.–Erdi mailako unibertsitate titulua, goi mailako heziketa zikloa, batxilergoa edo pareko ezagupenak, enpresak onartuak, edo/eta lantokiko prestakuntza edo lanbidean arituta lortutako ezagupenak.

5. lanbide-taldea.

Irizpide orokorrak: enpresaren eskeman, kualifikazio gehiagoko profesionalen mende edo haien aginduz egiten diren lanak, gainbegiratze handiarekin eskuarki eta egokitze aldi ertain baten ondotik.

Prestakuntza.–Goi mailako heziketa zikloaren balio bereko titulua edo pareko ezagupenak, enpresak onartuak, edo/eta lantokiko prestakuntza edo lanbidean arituta lortutako ezagupenak.

6. lanbide-taldea.

Irizpide orokorrak: menpekotasun maila handiarekin gauzatzen diren zereginak dira, argi ezarririk daudenak, jarraibide zehatzekin. Lanak batez ere esfortzu fisikoa eska dezake, eta prestakuntza urria edo ezagutza oso oinarrizkoa; noiz edo noiz, egokitzeko denbora labur bat behar izaten da.

Prestakuntza: erdi mailaren balio bereko prestakuntza, baita lanbidean arituta lortutako ezagupenak ere.

32. artikulua. Soldata mailak - Zuzeneko eskulana.

1. Kontzeptuak eta definizioa.

6. lanbide-taldeko lanpostu guztiak lantegi txiki zehatz bati atxikita daude, eta zenbakizko kode baten eta izen baten bidez identifikatuta. Horietako bakoitza organikoki eta funtzionalki zehaztu da jarduera normal garatzeko, lanpostu guztiak adostutako baremoaren eta ratioaren arabera baloratuko dira eta bakoitza bere soldata mailan sartuko da. 14 eranskina.

Zuzeneko eskulana baloratzeko sistema hau aplikatzeak berarekin dakar lanaren antolaketan eta erabiltzen diren baliabideetan aldaketa bat egin behar izatea, emaitza onak lortzearren bai enpresarentzat bai langileentzat, horrela soldatak eta motibazio profesionala hobetzeko bidea zabalagoa izan dadin.

Langileen atxikipena martxoan eta irailean berraztertuko da urtero.

2. Aintzat hartzen diren kontzeptuak:

Lanpostuaren deskribapeneko kontzeptuak 0 puntutik 10era bitarte baloratuko dira lanpostu bakoitzean. Lanpostuaren kontzeptu bakoitzean lortutako puntuazioaren emaitza bere koefizienteaz biderkatuko da.

Kontzeptu hauek baloratuko dira lanpostu bakoitzaren barnean:

a) Oinarrizko prestakuntza:

Pertsona normal batek lanpostuko zereginak ongi betetzeko beharrezkoak dituen ezagupen teorikoak dira, lanpostu horretan arituko den pertsonak zer maila akademiko edo kultural duen alde batera utzita.

Kontzeptu horren koefizientea “1” da.

b) Ikastaldia.

Lanpostuen deskribapen guztietan datu hau eman behar da: pertsona normal batek, eskatzen den oinarrizko prestakuntza duenak, lanpostua ezagutzeko eta kantitate eta kalitate nahikoa eskainiz eta segurtasun neurriak betez lan egiteko zenbat denbora behar duen normalean.

Kontzeptu horren koefizientea “1.5” da.

c) Erabakiak hartzea.

Langileek, beren lanpostuko zereginetan arazoak sortzen direnean, horiek konpontzeko ahaleginean duten askatasuna.

Kontzeptu honetan gainbegiratzearen eta lan motaren maila ere baloratzen da: alegia, bakuna edo konplexua, ohikoa edo noizbehinkakoa den.

Kontzeptu horren koefizientea “1.25” da.

d) Akatsak eta horien ondorioak.

Langileek beren lanean egiten dituzten akatsek eta/edo izaten dituzten hutsegiteek enpresarentzat dirutan edo izen onean zer ondorio izan dezaketen kontuan hartu eta baloratzea.

Kontzeptu horren koefizientea “1.25” da.

e) Ahalegin fisikoa.

Lanpostuko eginkizun normalek eskatzen duten ahalegin fisikoaren garrantzia eta jarraitasuna baloratzen da, kontuan hartuz ahaleginak lanaldian zenbat denbora hartzen duen eta zer intentsitate duen.

Lanpostu batzuetako ahalegin fisikoa bereziki nabarmendu behar da, batez ere eskulana eskatzen dutenetan, eta kontuan hartzekoak dira gorputzaren jarrera, lanpostuan zenbat denbora egiten den, biraketa mekanikoak, ergonomia, monotonia eta lanak behin eta berriz egitea, etab.

Kontzeptu horren koefizientea “1.25” da.

f) Buruko ahalegina.

Beharrezkoa den atentzioa jartzea eta beharrezkoa den informazioa erabiltzea egiten den lana eraginkorra izan dadin kalitateari zein kantitateari dagokionez. Intentsitatea eta iraupena faktore erabakigarriak dira kontzeptu honen baloraziorako.

Koefizientea “1,25” da.

g) Lan baldintzak.

Lantokia zer egoera edo baldintzak egiten duten nekagarri eta/edo desatsegin baloratzen da: hotsek, dardarek, tenperaturak, kanpoan aritzeak, hezetasunak, hautsak, koipeek, gasek, keak, usainek...

Kontuan hartu behar da halako faktorerik baden, zein den horien kopuru erlatiboa edo langileak zenbat denbora jasan behar dituen.

Kontzeptu horren koefizientea “1.50” da.

h) Zeregin osagarriak.

Lanpostuaren balorazio orokorrean kontuan hartzen dira bilatzen den kalitate eta kantitatea zorrotz lortzeko beharrezkoak diren zeregin osagarriak.

Esate baterako, honako hauek aipa daitezke: tresneria aldatzea, kontrol eta egiaztapenerako ohikoak ez diren aparatuak erabiltzea, mantentze lanak, talde lana, eta abar.

3. Balorazio Batzordea.

Lantegiko zuzeneko eskulaneko lanpostuen soldata mailaren balorazioan eta aplikazioan homogeneotasuna mantentzearren, lanpostuaren deskribapena eta balorazioa eta langile bakoitzaren atxikipena zein den jakinaraziko dio enpresako zuzendaritzak batzorde bati. Batzorde horretan zuzendaritzaren eta enpresa batzordearen ordezkariak egonen dira eta haren helburua izanen da langile bakoitzaren soldata mailaren balorazioa eta aplikazioa adostu eta gauzaraztea.

4. Puntuazioa.

Baloratu ondoren eta lortutako puntuazioaren arabera, soldata maila hauek aplikatuko dira:

–8. soldata maila, 81 puntutik gorako lanpostuentzat.

–9. soldata maila, 75 puntutik 81era bitarteko lanpostuentzat.

–10. soldata maila, 67 puntutik 75era bitarteko lanpostuentzat.

–11. soldata maila, 60 puntutik 67ra bitarteko lanpostuentzat.

–12. soldata maila, 60 puntutik beherako lanpostuentzat.

5. Xedapen osagarriak.

a) Edozein modutan ere, onartutako kategoriaren edo zuzendaritzarekin adostu edo itundutakoaren arabera finkatuta dituzten eskubide guztiak bermatzen zaizkie langileei (balorazio sistema berriaren eta 6. lanbide-taldearen soldata sailkapenaren aplikazio praktikotik gorakoak diren eskubideak).

b) Ez da mugarik izanen edozein lanpostu lortzeko langile batzuek izan ditzaketen berariazko tituluak direla-eta; betiere, beharrezko baldintzak bete beharko dituzte.

c) Lanpostuaren baldintzak aldatzen direnean eginkizunak eransteagatik edo metodoa aldatzeagatik edo lantegi txikietan edo unitate eragilean lanpostu berriak gehitzen direnean, balorazio bat eginen da 3 hilabeteko epean, eta balorazio horren emaitzak kontuan hartuko dira aldaketak izan zirenetik.

d) Pertsona bakoitzak bere lanpostuaren eginkizunen edukia ezagutuko du, baita hartan esku hartzen duten kontzeptuak eta haren balorazioa ere. Lanpostuaren eginkizunak, balorazioa eta soldata taldea berrikusteko eskatzen ahalko dio Balorazio Batzordeari.

e) Ahal den neurrian, hala enpresaren helburuak (osagaiak fabrikatu eta merkaturatzea) lortzen laguntzeko nola langileei aukera profesionalak irekitzeko, ona izanen litzateke balioaniztasunerako maila altua txandaka eta aldizka lortzeko beharrezkoak diren baldintzak sustatzea lantegi txiki eta unitate eragile bakoitzean.

f) 6. lanbide-taldeko langileak. Lanpostuari dagokion soldata mailako ordainsariak jasoko dituzte, lan horretan ari direnean. Beste lanpostu bateko eginkizunak egiten hasten badira, lanpostu berrikoak jasoko dituzte hurrengo baldintzetan, mugitzearen ondorioz soldata maila aldatzen bada:

1. Goragoko maila bateko lanpostura joanez gero, egokitzapen aldian (15 egun gehienez) aurreko soldata maila izanen du. Egokitzapen aldiaren ondoren, lanpostu berriko ordainsariak jasoko ditu.

2. Lanpostu apalago batera joanez gero, zeukan mailari dagozkion ordainsariak kobratuko ditu lehen hiru hilabeteetan. Hiru hilabete horiek iraganik, betetzen duen lanpostuko ordainsariak kobratuko ditu, bederatzi hilabete egin arte; denbora horretan, enpresak aldaketa aurretik zuen soldata mailako lanpostu bat bilatzeko konpromisoa du. Bederatzi hilabete horietan enpresak ezin izan badu langilea egokitu aldaketa aurreko mailako lanpostu batean, maila handiago hori kobratuko du, nahiz eginkizun berekin segitu.

g) Hitzarmena sinatu duten alderdiak ados jarri dira gaur egungo zuzeneko eskulaneko lanpostuen soldata mailen balorazio eta aplikazioan, 16. eranskinean azaltzen den bezala.

h) Enpresan zuzeneko eskulaneko 6. lanbide-taldeko lanpostuan sartzen diren langileek, lehen 9 hilabetean, atxikita dauden lanpostuari dagokion soldataren %80 kobratuko dute. Enpresan lehen aldiz kontratatutako langileak, bere kontratuaren iraupena dela eta, ezin izan badu soldataren %80 kobratzeko aldia osatu, egin duen denbora hurrengo kontratazioei gehituko zaie aipatu aldia bete arte. Aldi hori osatutakoan, langileak betetzen duen lanpostuaren soldata mailari dagokionaren %100 jasoko du.

i) Zuzeneko eskulaneko lanpostuei lan konplexuagoak esleitzearen edo langileen balioaniztasunaren ondorioz, hitzarmen hau sinatu dutenek erabaki dute zuzeneko eskulaneko lanpostuak dituzten langileek edozein soldata mailatara iristeko aukera dutela. Horretarako, enpresako zuzendaritzak lan berrien eta langileen balioaniztasunaren definizioa eta hedadura ezarriko ditu, eta soldata mailak aztertzen dituen batzordeak erabakiko ditu kasuan kasuko atxikipen berriak.

j) Bi alderdiek lantalde bat osatzeko konpromisoa hartzen dute, hitzarmen honen indarraldia bukatu aurretik aplikatuko den araudi bat presta dezan lanpostuen definizioari, erregulazioari eta balioaniztasunaren ordainketari buruz.

6. Mugigarritasuna.

a) Piher S&Cn eskabide irmoei buruz ezarrita dagoen lan sisteman ohikoa baita lanpostuz aldatzea, 6. lanbide-taldeko lanpostuetan batik bat, mugimendu horiek akordio honetan ezartzen den esparruan egin beharko dira.

b) Fabrikazioaren edo Eskaera-Entrega Prozesuaren Departamentua 2 lantegi txikik (elementu erresistiboak eta osagaiak eta muntaiak) eta 2 unitate eragilek (logistika eta mantentze-lana eta hobekuntza) osatuko dute. Lantegi txiki bakoitzak lanpostu kopuru jakin bat izanen du (14. eranskinean azaldu bezala) eta haiei atxikitako langile kopuru jakin bat. Era berean, Kalitatearen edo Kudeaketa Sistemen Prozesuaren Departamentuak eranskin hartan berean agertzen diren lanpostuak izanen ditu.

c) Aurreikusitako programazioaren berri aldez aurretik emanen zaio enpresa batzordeari, baita programazio horren ondorioz langileak mugitu behar direnean ere. Batzordeak horri buruzko beste proposamen batzuk egin ditzake.

d) Lanpostu bakoitzak zeregin bat izanen du esleitua, eta langileak bere gain hartuko du, bere duintasunaren kontrakoa ez bada behintzat. Osasun arazoak dituzten pertsonei ahalik eta lanik egokiena ematen saiatuko da zuzendaritza, mediku zerbitzuaren aholkua aditu ondoren.

e) Baliabideak ahalik eta hobekien aprobetxatu nahian, lantegi txiki edo unitate eragile bakoitzaren barrenean lanpostuen arteko mugigarritasuna erabiltzen ahalko da antzinatasuna kontuan hartu gabe; betiere, legeak eta langile bakoitzaren baldintzek ezarritako mugak gainditu gabe. Aldaketa hori eragin duten arrazoiak desagertu ondoren, langilea jatorrizko lanpostura itzuliko da. Hori hala izanik ere, hiru hilabeteren buruan lanpostu berriaren atxikipena finkatutzat hartuko da. Lantegi txiki bakoitzeko lanpostuen artean txandakatzea izatea komeniko litzateke, errendimendua hobetzeko, balioaniztasun handiagoa lortzeko eta aldaketa ergonomikoak eskaintzeko. Txandakatzea langileek eskatuta ezarriko da, eta kontuan hartuko dira produkzio aldiko arrazoiak, bai eta lanpostu berrian egokitu eta zereginak ikasteko aldia ere.

f) Lantegi txikien artean aldaketak egiteko kontuan hartu beharrekoak:

i) Bete beharreko lanpostuetara joateko langile boluntariorik bada, antzinatasun handiena duenak izanen du lehentasuna.

ii. Beste lanpostu batera mugitzeko langile boluntariorik ez badago, soberako lanpostuetako langileen artetik enpresan antzinatasun txikiena duena hautatuko da mugitzeko.

iii. Hala mugitu behar duen langileak lehentasunezko eskubidea izanen du bere arloko lanpostu batera itzultzeko. Hori hala izanik ere, hiru hilabeteren buruan lanpostu berriaren atxikipena finkatutzat hartuko da.

iv. Produktu berriak fabrikatzeagatik edo beste arrazoi batzuengatik lanpostu berriak sortzen direnean, honela beteko dira:

v Lanpostu berria zein lantegi txikiri atxikitzen zaion, hango langileekin, han soberako lanposturik baldin badago eta langileak lanpostu berrian aritzeko behar diren baldintza betetzen baditu.

vi. Lanpostu horretan aritzeko baldintzak betetzen dituzten langile boluntarioekin. Antzinatasunik handiena duenak izanen du lehentasuna.

vii. Arau hau aplikatzearen ondorioz gatazkaren bat sortzen bada, zuzendaritzak eta batzordeak aztertuko dute.

g) Lanpostuak murriztu edo kentzen badira, horren ondorioak jasaten dituztenek lehentasuna izanen dute lanpostu huts edo berriak enpresako antzinatasunaren arabera betetzeko, lanpostu horretan aritzeko beharrezkoak diren baldintzak betetzen badituzte betiere.

33. artikulua. Soldata mailak - Zeharkako eskulana.

Hurrengo baremoan lortutako puntuazioaren arabera definituko da 6. lanbide-taldeaz bestelako bati dagokion sailkapena, soldata maila baten barrenean.

Puntuazioa ezartzeko parte hartzen duten kontzeptuak:

A.–Erantzukizuna.

B.–Gaitasuna.

C.–Jarduna edo gauzatzea.

D.–Prestakuntza.

E.–Balioaniztasuna.

Kontzeptuen definizioa:

A.–Erantzukizuna:

Horretan sartzen da bai esleitutako lanak duen erantzukizun maila bai lana egitean erakusten den interesa. Horretaz gainera, alde batetik ahalegin handiagoa eskatzen duten egoeraren aurrean erantzuna emateko gaitasuna eta, bestetik, erabiltzen diren datuen konfidentzialtasunarekiko zuhurtzia.

B.–Gaitasuna:

Lanak modu autonomoan eta aldi berean talde batean ongi integratuta egiteko gaitasuna, eta ordura arteko ekimenak, soluzioak, metodoak etab. hobetzeko ekarpenak egitea.

C.–Jarduna edo gauzatzea:

Esleitutako lanak egunero-egunero nola egiten dituen, lan horien bolumenari eta kalitateari begiratuta.

D.–Prestakuntza:

Bere lanaren inguruan dituen ezagupen teorikoak, eta horiek zabaltzeko interesik baduen.

E.–Balioaniztasuna:

Ezagupen praktiko eta teoriko desberdinak eskatzen dituzten lanak egiteko zer-nolako gaitasuna erakusten duen.

Prozedura:

–Piher S&Cko Zuzendaritzak soldata talde eta mailak berrikusiko dituzten pertsonak izendatuko ditu, eta horien zeregina izanen da aztertu eta kalifikazio berria egin behar den ala ez zehaztea.

–Kalifikatu behar diren langileen arduradunek zuzenean parte hartuko dute puntuazioan.

–Kontzeptu bakoitza 0 puntutik 10era bitarte baloratuko da, eta zuzenketa faktore hauez biderkatuko:

• A-ko puntuak × 4.
• B-ko puntuak × 2,5.
• C-ko puntuak × 1,5.
• D-ko puntuak × 1.
• E-ko puntuak × 1.

–Lortutako puntuazioaren eta dagokion soldata mailako atxikipenaren emaitza interesdunari jakinaraziko zaio, eta puntuazioarekin ados ez badago, bere nagusiei azalpenak eskatu ahalko dizkie, izan diren arrazoien gainean.

–Ematen zaizkion azalpenekin ados ez badago, langileak bere kasua berrikusteko eska diezaioke Kategorien Batzordeari.

–Pertsona batek ez badu bere soldata mailari dagokion puntuazioa lortzen, ordura artekoa izaten segituko du.

–Akordio hau sinatzen den egunetik hasita bi urtean behin, ekainean, soldata mailak aztertu eta berrikusi eginen dira, beharrezkoa izanez gero.

–Soldata mailako atxikipena aldatzen bada, hurrengo aurrekontu ekitaldiko urtarrilaren 1etik aurrera hasiko dira ondorio ekonomikoak.

Zuzeneko eskulaneko 1. lanbide-taldetik 5.era bitarteko lanpostuak betetzeko, enpresan lehen aldiz sartzen direnek, lehen urtean, haien lanbide-taldeko soldata mailari dagokion soldataren %80 kobratuko dute. Enpresan lehen aldiz kontratatutako langileak, bere kontratuaren iraupena dela eta, ezin izan badu soldataren %80 kobratzeko aldia osatu, egin duen denbora hurrengo kontratazioei gehituko zaie aipatu aldia bete arte. Aldi hori osatutakoan, langileak betetzen duen lanpostuaren soldata mailari dagokionaren %100 jasoko du.

34. artikulua. Mailaz igotzea.

Ahal dela, lantegiko langileek beteko dituzte enpresaren hitzarmeneko 6. lanbide-taldetik gorako lanbide-taldeko lanpostuak, plantilla handitzeko edo sei hilabetetik gora hutsik daraman lanpostua betetzeko; horretarako, eskatzen zaizkien baldintzak bete beharko dituzte eta bi urteko antzinatasuna, gutxienez ere, izan beharko dute. Baldintza horien deialdia eta gaitasun probena, halakorik egin behar bada, garaiz jarriko dira ikusgai iragarki oholetan, nahi dutenek gaitasun probetan parte hartzerik izan dezaten. Maila eta erantzukizun guztietara jo dezakete denek, beharrezkoak diren baldintzak betetzen badituzte.

Lanpostu horiek betetzerakoan lehentasuna izanen dute lehenago antzeko lan bat egin eta lan baldintzetan funtsezko aldaketaren bat izan duten langileek.

35. artikulua. Gaitasunak kalifikatzeko batzordea.

Administrazioko lanpostuak eta ofizialen lanpostuak bete behar direnean, ondokoek osatuko duten kalifikazio batzordea eratuko da:

–Enpresan giza baliabideen ardura duen pertsona.

–Bete beharreko espezialitateko teknikari bat.

–Kasu bakoitzean enpresa batzordeak izendatuko dituen bi pertsona.

Batzorde horrek zeregin hauek izanen ditu:

a) Lanpostuetarako izangaiek egin beharreko proba mota hautatzea, aztertu beharreko arloak zehaztu gabe, baina proba horien metodoa eta gaiak zehaztuta.

b) Batzorde kalifikatzailearen zeregina da gaitasun probetara joatea, behar bezala egiten diren begiratzea eta horien ondorengo kalifikazioa egitea.

c) Probak kalifikatutakoan, lanposturako emaitza onenak (puntuazio handienetik txikienera) lortu dituztenek beteko dituzte lanpostu hutsak. Proba horiek urtebeterako izanen dute indarra.

d) Kasu berezietan, lanpostuak berariazko ezaugarriak dituenean eta horiek ezin direnean proba normalekin neurtu eta kanpoko aholkua izatea beharrezkoa denean (adibidez: isilpeko datuak erabiltzea, teknikaren bateko berariazko ezagutza, hori ikasteko moldagarritasuna, hizkuntzak ikasteko erraztasuna, eta abar), aholku hori eskatuko da eta horren emaitzak batzorde kalifikatzaileari jakinaraziko zaizkio, kontuan izanik, betiere, isilpeko emaitzak direla.

36. artikulua. Prestakuntza.

1. Enpresa batzordeak zuzenean hartuko du parte prestakuntza planak prestatu eta ebaluatzeko lanetan. Enpresaren eta bere plantillaren aurrerapenerako beharrezkoak diren ezagupen, trebetasun eta jarrerak garatzeko asmoz ezarriko dira plan horiek.

Nahitaez egin beharreko prestakuntza ikastaroak lanorduetan izanen dira. Ikastaroak langilearen txandatik kanpoko orduetan izanez gero, borondatezkoa izanen da haien parte-hartzea. Langileak parte-hartzea erabakitzen badu, dagokion soldata mailako ordu arruntaren prezioarekin emanen zaio ordaina.

2. Urtebetetik gorako kontratuak dituzten langileek, baldin eta enpresan egiten ari diren edo aurreikuspenen arabera eginen dituzten lanen inguruko titulu ofizialak lortzera bideratutako ikasketak egiten ari badira, urteko matrikula kostuen %50 adinako laguntza izanen dute.

3. Ikasketa ofizialak (Batxilergoa, Lanbide Heziketako zikloak edo Unibertsitateko ikasketak) egiten ari direnek lehentasuna izanen dute lantegiko txanda eta ordutegiak aukeratzeko, baldin eta lanpostu hutsik badago edo posible bada. Azterketak egitera joateko baimenak ere izanen dituzte.

VI. TITULUA

Klausula gehigarriak

37. artikulua. Gizarte, aisia eta kultur funtsa.

–2012tik aurrera, enpresak 35 euro jarriko ditu urtean plantillan altan dagoen lagun bakoitzeko. Martxoaren, ekainaren, irailaren eta abenduaren 15ean eginen da ordainketa.

–Ordainketaren aurreko hilabetean alta emanda dauden lagun kopuruaren arabera eginen da kalkulua.

–Zenbatekoa urtero igoko da, hitzarmen kolektiboan urte horretarako itundutako soldata igoeraren arabera.

–Enpresa batzordeak administratuko du gizarte, aisia eta kultur funtsa, araudiari jarraituz, eta batez ere eritasun luzeko deskontuak konpentsatzeko, interesik gabeko maileguetarako (muga jakin bat arte), liburutegia mantentzeko, josteta eta kultur jardueretarako eta plantillaren onura sozial eta kulturaleko beste jarduera batzuetarako izanen da.

–Ongintza eta kulturako jardueretarako baizik ez da izanen funts hori, eta enpresa batzordeak izendatzen dituen kideek osaturiko batzorde batek izanen du horren gaineko ardura.

38. artikulua. Bizi asegurua.

Hitzarmen honen eraginpeko langileentzat bizi eta istripu aseguru bat ezarri da. Hauek dira kalte-ordainak:

Bizi asegurua:

–14.092,65 euro, edozein arrazoi dela-eta hilez gero.

–14.092,65 euro, edozein arrazoi dela-eta erabateko baliaezintasun iraunkorraren kasuan.

Istripuak:

–12.844, 78 euro, istripuaren ondoriozko heriotzaren kasuan.

–21.367,29 euro, istripuaren ondoriozko erabateko baliaezintasunagatik.

–34.212,08 euro, istripuaren ondoriozko baliaezintasun iraunkorragatik.

Istripuaren ondoriozko baliaezintasun iraunkor partzialaren kasuan, aseguru konpainiak ezarritako baremoa aplikatuko da, gehieneko oinarri edo %100 gisa 34.212,08 euro hartuz.

Diru kopuru horiek hitzarmenaren indarraldia bukatutakoan eguneratuko dira, hitzarmeneko eta indarra duen polizako irizpide orokorrei jarraikiz.

39. artikulua. Praktiken eta ezagupenen plana.

Alderdi sinatzaileek lanaren mundua eta bertako aukerak modu praktikoan eta zuzenean ezagutzea nahi dute, baita ikasitakoaren araberako lan praktikak egitea ere.

Horretarako, Zuzendaritzak erraztasunak emanen ditu praktikak egiteko, erakunde laguntzaileen esparrukoak badira (Enpresen eta Unibertsitateen arteko Fundazioak, Lanbide Eskolak, Merkataritza Ganberak eta abar), tutoreak izendatzen badituzte eta eskolako asegurua edo antzekoa badute.

40. artikulua. Lan osasuna eta ingurumena.

Zuzendaritzak adierazi du laneko segurtasun eta higienearen arloan indarra duten Estatuko eta Europar Batasuneko araudiak zorrotz beteko dituela.

Enpresako Zuzendaritzak eta sindikatuetako ordezkariek konpromisoa hartzen dute laneko segurtasun eta osasunaren kudeaketa sistema, enpresak prestatua, osorik aplikatu eta garatzeko.

Enpresa Batzordeak bere kideetako bat Ingurumeneko ordezkari izendatuko du eta horrek enpresako Ingurumen Kudeaketako Batzordean parte hartuko du.

41. artikulua. Laneko arropa.

Hitzarmen kolektibo honen eraginpeko langileei laneko jantzien sorta bana emanen die enpresak urtero. Urtarrilean izanen da.

Lanaren ezaugarri bereziengatik, aparteko inguruabar puntualak direla-eta gehiegi hondatuz gero, jantzi sorta gehiago behar badira, enpresak emanen ditu, atal bakoitzeko arduradunak eskatuta.

42. artikulua. Lanpostuaren ordezko kontratazioa.

Hitzarmen honen eraginpeko langileek zilegi izanen dute borondatezko baja proposatzea Zuzendaritzari, beren lanpostua seme edo alaba batek har dezan. Zuzendariaren esku egonen da eskari hori onartzea ala ez, eta enpresa batzordeari erabakiaren berri eman beharko dio.

43. artikulua. Borondatezkoa ez den lanpostu hutsagatik kontratatzea.

Hitzarmen honek ukitzen duen norbaiti enpresan baja ematen bazaio hil delako edo ezintasun iraunkor osoa duelako, bere lanpostua senarrak edo emazteak edo semeak edo alabak borondatez beteko du, baldin eta:

–Lanpostuan aritzeko behar besteko gaitasuna badute eta lanean ongi aritzen badira.

–Behar besteko lana badago.

44. artikulua. Praktikaldiko kontratua.

Zuzendaritzari egokia iruditzen bazaio praktikaldiko kontratuak hitzartzea, indarra duen legerian ezarritakoari jarraikiz eginen du.

45. artikulua. Azpikontratazioak.

Enpresako Zuzendaritzak uste badu beharrezkoa dela Aldi Baterako Laneko Enpresen zerbitzuak erabiltzea lan zehatz batzuk egin behar direnean, lan pilaketetan, lanerako ezintasun iragankorra dutenak ordezteko, oporretan..., izaera sozialeko enpresek –ohiko laguntzaileek– beren gain hartu ezin dituztelako, ABLEen Estatuko Hitzarmen Kolektiboa sinatu dutenekin eginen da.

Kontratazioaren aurretik, Zuzendaritzak erabilera horren arrazoiak emanen dizkio enpresa batzordeari bilera batean.

46. artikulua. Erretiro partzialak eta errelebo kontratuak.

Zuzendaritzaren eta enpresa batzordearen ustez, garatzeko eta aurrera egiteko planteatzen diren erronka garrantzitsuei aurre egiteko, funtsezkoa da erretiro partzialaren alde egitea, plantilla berritu eta indartzeko modua baita; horrenbestez, bi alderdiek adostu dute langileek 61 urtera iristean erretiro mota hori hartuko dutela, abenduaren 4ko 40/2007 Legean eta aplikazioko araudian finkatu diren legezko eta arauzko aurreikuspenen arabera.

Akordio horretan eremu funtzionala, iraunaldia, langile eremua eta lurraldekoa ezarri dira, baita une bakoitzean jokatzeko modua ere. Guztira, plantillako 88 langileengan du eragina. Edonola ere 88 errelebo-kontratu egin behar direnez, urteko lanaldiaren %100ekoak izanen dira, zein den ere erretiratu partzialari murriztu zaion lanaldia, eta egun dauden emakume langileen kopuruari eutsiko zaio, gutxienez ere.

Urtero hartzen diren erretiro partzialen kopurutik, erreleboa hartzen duten langileen %50ek, gutxienez ere, mugagabeko kontratua izanen dute, hitzarmena sinatzen denetik haren indarraldia bukatu arte, plantillaren berrikuntza eta indartzea benetakoa eta eraginkorra izan dadin. Mugagabetzat hartzeko, gutxienez errelebo kontratu bat osatu duten errelebo hartzaileek izanen dute lehentasuna.

Aldi baterako errelebo kontratua bukatu eta ez berritzea erabakitzen bada, halako kontratua izan duen langileak kalte-ordaina jasotzeko eskubidea izanen du, hain zuzen ere zerbitzu urte bakoitzeko 15 eguneko soldata ordainduz gero legokiokeen dirua.

47. artikulua. Emakumeen eta gizonen arteko berdintasuna.

Hitzarmen hau sinatu duten alderdiek konpromisoa hartu dute lantokian aukera berdintasunaren printzipioa bultzatzeko eta lan giroan genero diskriminaziorik izan ez dadin begiratzeko.

Tratu eta aukera berdintasuna lortze aldera, bi alderdiek helburu garrantzitsutzat jotzen dituzte honako hauek:

–Tratu eta aukera berdintasuna lanean, zuzeneko eta zeharkako diskriminazioa baztertuz.

–Soldatetan sexuarengatiko bereizkeriarik ez izatea.

–Aukera eta tratu berdintasuna laneratzean.

–Lanean sexu jazarpenik ez izatea, ezta sexuaren ziozko jazarpenik ere.

–Lanbide prestakuntzarako eta mailaz igotzeko berdintasuna.

48. artikulua. Jazarpena prebenitzea.

Oharturik pertsonaren funtsezko eskubideak eta, bereziki, duintasuna babestu behar direla lan eremuan, jazarpen arloko printzipioen deklarazioari jarraituz (2006ko maiatzaren 25ean onetsia), baita enpresako zuzendaritzak 2010eko maiatzaren 10ean jazarpen arloan egindako printzipio deklarazioari ere, hitzarmen kolektibo hau sinatzen duten alderdiek lan eremuan jazarpena erakusten duten portaera eta antolaketa faktore guztiak prebenitu eta kendu beharra onartzen dute, eta bi alderdiek jazarpen arloan esku hartzeko adostutako protokoloa aplikatzea erabaki dute.

49. artikulua. Nafarroako Lan Auzitegia.

Sinatzaileek erabaki dute hitzarmen honen interpretazio eta aplikazioko gatazken konponbidea, interpretazio batzordea bildu ondotik, Nafarroako Lan Gatazkak Konpontzeko Auzitegiaren esku jartzea. Halaxe jokatuko da hitzarmenaren aplikazio eremuko enpresaburuak eta langileak ukitzen dituen beste edozein gatazkatan.

Era berean, sinatzaileek hitz eman dute ahaleginak eginen dituztela hitzarmen honen aplikazio eremuko langileen eta Piher S&Cko enpresaburuen artean sortzen diren banakako gatazkak Auzitegi horretako adiskidetze eta bitartekotza prozeduren mendean borondatez eta espresuki jartzeko, Nafarroako Lan Gatazkak Konpontzeko Auzitegiaren eskumenekoak diren gaietan.

50. artikulua. Interpretazio batzordea.

Lan arloko Agintaritzari aitortzen zaizkion ahalmenak ukatu gabe, Hitzarmena Interpretatzeko Batzorde Misto bat eratu da, ondoko hauek osatuta:

–Zuzendaritzaren aldetik:

Rafael Fernández-Ladreda, Enrique Catalán eta F.J. Gambra Caminos.

–UGTren atal sindikaletik:

Javier Pardo eta Cristóbal Martínez.

–SOLIDARIren atal sindikaletik:

Milagros González eta Pedro Sanz.

–Independenteen ataletik:

Juan José Gómez eta Jaime Gascón.

–CCOOren aldetik:

Luis Humánez.

51. artikulua. Xedapen osagarria.

Hitzarmen honek aurreikusten ez duen hartan, Nafarroako Industria Siderometalurgikoaren gaur egungo hitzarmen kolektiboak eta nahitaez bete beharreko legeek, erregelamenduek eta gainerako xedapenek izanen dute indarra.

1. ERANSKINA

Lanpostuak eta lanbide-taldeak

6. ERANSKINA

Arazoen kodea

1.–Hitzarmeneko oinarriaren arabera ordainduko da:

–Makinaren bat langileari egozten ahal zaion arrazoiren batengatik hausten denean, Zuzendaritzak bere esku du indarra duen araudiak kasu bakoitzean ezartzen dituen eskubideak erabiltzea.

2.–Jarduera arrunt gisa ordainduko da, hau da: oinarria + hitzarmen plusa:

Langileari egozteko modukoak ez diren geldialdi edo gorabeherak izaten direnean, hala nola:

–Eskaeren krisia edo lanik eza.

–Kanpoko osasun laguntza eta erizaintza.

–Lanpostutik alde egitea langilearen interesekoak diren arrazoiengatik, baldin eta baimena aldez aurretik eskatu eta ematen bada.

3.–Hitzarmeneko oinarria + hitzarmen plusa + 70 jarduera ordainduko da kasu hauetan:

–Erratza pasatzea eta garbitzea kronometrajean sartzerik ez dagoenean.

–Bakarrik edo baterian dauden makinak hautsi edo hondatzea.

4.–Hitzarmeneko oinarria + hitzarmen plusa + 78 jarduera ordainduko da kasu hauetan:

–Kronometratu gabeko konponketak.

5.–Aurreko hilabetean jasotzen ari zen batez besteko jardueraren arabera ordainduko da kasu hauetan:

–Materialez ez hornitzea enpresari egozten ahal zaion arrazoi batengatik.

–Langileari baldintza txarretan dagoen materiala ematea, betiere behin-behineko kronometrajean zehazten den errendimendu normalera iristen bada, emandako materialaren akatsak kontuan hartuta horretarako.

–Lanpostutik alde egitea, nagusiek eskatuta izan bada.

–Erakusgaiak prestatzea.

–Materialak itzultzeagatik egindako lanak, langilearen zereginaren ondoriozko akatsengatik itzuli ez badira behintzat.

–Makina berriak probatzea kronometrajea egin baino lehen.

–Metodoak eta kronometrajea aldatzen direnean, egokitzapen aldian.

–Lanpostua aldatzen denean, egokitzapen aldian.

–Makinak baldintza txarretan daudenean.

7. ERANSKINA

Aparteko paga

2012ko soldatak.

9. ERANSKINA

Ikasketetarako laguntza

10. ERANSKINA

Antzinatasun plusa

11. ERANSKINA

Gaueko lanaren plusa

2012ko soldatak.

2012ko plusen laburpena.

Gizarte, aisia eta kultur funtsa: Ikusi 33. artikulua.

Jaieguneko eta gaueko deiak: 25,66726.

Bidaia eta irteeren dietak: Ikusi 30. artikulua.

Urruntasun plusa: 0,04511.

Zaintza: aparteko 3 orduren zenbatekoa

Koord. arduraduna, asteburua: 77,65596.

Gaueko ordezpenaren osagarria: 12,61816.

Laneguna ez den egun batean lan egitea: 55,18459.

Oporraldia aldatzea: 1.090,85832.

12. ERANSKINA

Hitzarmeneko pluseko deskontua

2012ko soldatak.

13. ERANSKINA

Aparteko pagaren zati proportzionala

2012ko soldatak.

Iragarkiaren kodea: F1314768