34. ALDIZKARIA - 2012ko otsailaren 17a

1. NAFARROAKO FORU KOMUNITATEA

1.4. DIRU-LAGUNTZAK, LAGUNTZAK ETA BEKAK

18/2012 FORU AGINDUA, otsailaren 7koa, Vianako Printzea Erakundea-Kulturako, Turismoko eta Erakunde Harremanetako kontseilariak emana, Museoen Zerbitzuan (Nafarroako Museoaren Atalean) aritzeko bi prestakuntza bekaren deialdia onetsi, dagokion ebaluazio batzordea izendatu eta deialdi horretarako behar den gastua egiteko baimena ematen duena.

Vianako Printzea Erakundea-Kultura Zuzendaritza Nagusiko Museoen Zerbitzuak txostena aurkeztu du eta bertan proposatu Museoen Zerbitzuan (Nafarroako Museoaren Atalean) aritzeko bi prestakuntza bekaren deialdia egitea, hura arautuko duten oinarriak onestea eta behar den gastua egiteko baimena ematea.

Nafarroako Foru Komunitateko Administrazioan eta haren erakunde autonomoetan prestakuntza bekak emateko araubide orokorra ezartzen duen apirilaren 19ko 172/2004 Foru Dekretuak ematen dizkidan ahalmenak erabiliz,

AGINDU DUT:

1. Bi bekatarako deialdia egitea, lizentziadunek, Nafarroako Gobernuko Museoen Zerbitzuaren bidez (Nafarroako Museoaren Atala), museoen antolaketaren eta funtzionamenduaren gaineko ezagutza teoriko eta praktikoa jaso eta prestakuntza akademikoa osa dezaten.

2. Foru agindu honen xedeko bi prestakuntza bekak Museoen Zerbitzuan (Nafarroako Museoaren Atalean) aritzeko dira, 2012ko irailetik 2013ko abuztura bitarte, biak barne.

3. Deialdia arautuko duten oinarriak onestea.

4. Eskaerak baloratuko dituen batzordeko kideak izendatzea:

-Batzordeburua: Carmen Valdés Sagüés, Vianako Printzea Erakundea-Kultura Zuzendaritza Nagusiko Museoen Zerbitzuko zuzendaria.

-Batzordekidea: Mercedes Jover Hernando, Nafarroako Museoaren Ataleko burua.

-Batzordekidea: Francisco Javier Zubiaur Carreño, Museoetako goi mailako teknikaria, Nafarroako Museoaren Atalari atxikia.

-Batzordekidea: Ana Elena Redín Armañanzas, goi mailako teknikaria, Nafarroako Museoaren Atalari atxikia.

-Ordezko batzordekidea: Berta Balduz Azcárate, Zaharberritze lanetako goi mailako teknikaria, Nafarroako Museoaren Atalari atxikia.

5. Osotara 20.400,00 euroko gastua baimentzea. Horietatik, 6.800,00 euro, 2012ko irailetik abendura bitarte erabiltzeko izanen dira eta 2012ko aurrekontuko "Bekadunak" izeneko A20003 A2320 4800 333100 kontu-sailaren kargura ordainduko dira. Gainerakoa, 13.600,00 euro, 2013ko urtarriletik abuztura bitarte (hori barne) erabiltzeko, 2013ko kontu-sailaren kargura. Betiere, dagokion kontu-sailean behar adinako kreditua izan beharko da horretarako.

6. Deialdi hau Nafarroako Aldizkari Ofizialean eta Nafarroako Atarian argitara dadila agintzea.

Foru agindu hau jakinaraztea Vianako Printzea Erakundea-Kultura Zuzendaritza Nagusiari, Ekonomia eta Ogasun Departamentuak Zuzendaritza Nagusi horretan duen kontu-hartzaile delegatuari, Museoen Zerbitzuari, Nafarroako Museoaren Atalari, Vianako Printzea Erakundea-Kulturako, Turismoko eta Erakunde Harremanetako Departamentuko Idazkaritza Tekniko Nagusiari, Kudeaketa Ekonomikoaren Bulegoari eta ebaluazio batzordeko kideei, eta adieraztea horren kontra gora jotzeko errekurtsoa jar daitekeela, Nafarroako Gobernuari zuzendua, hilabeteko epean, argitaratu eta biharamunetik aurrera.

Iruñean, 2012ko otsailaren 7an.-Kulturako, Turismoko eta Erakunde Harremanetako kontseilaria, Juan Luis Sánchez de Muniáin Lacasia.

ERANSKINA

Nafarroako Gobernuko Museoen Zerbitzuan (Nafarroako Museoaren Atalean) aritzeko prestakuntzako bi beka emateko deialdiaren oinarriak, Nafarroako Foru Komunitateko Administrazioaren eta haren erakunde autonomoen prestakuntza bekak emateko araubide orokorra ezartzen duen apirilaren 19ko 172/2004 Foru Dekretuaren arabera (2004ko 57. Nafarroako Aldizkari Ofiziala, maiatzaren 12koa) eta Diru-laguntzei buruzko azaroaren 9ko 11/2005 Foru Legeari jarraituz (2005eko 136. Nafarroako Aldizkari Ofiziala, azaroaren 14koa).

OINARRIAK

1.-Prestakuntza bekaren xedea.

Deialdiko prestakuntza beken xedea da lizentziadunek, Nafarroako Gobernuko Museoen Zerbitzuaren bidez, museoen antolaketaren eta funtzionamenduaren gaineko ezagutza teoriko eta praktikoa jasotzea, prestakuntza akademikoa osatzeko.

2.-Beka kopurua.

Deialdian bi prestakuntza beka eskaintzen dira.

3.-Bekaren iraupena.

Prestakuntza beka bakoitza hamabi hilabete artekoa izanen da, bekak erabiltzen hasten direnetik hasita, oinarri hauetako 10.1 puntuan zehazten den bezala.

4.-Bekaren zuzkidura ekonomikoa, ordaintzeko modua eta Administrazioarekiko harremana.

4.1.-Prestakuntza beka bakoitzak 10.200,00 euro izanen ditu urtean.

4.2.-Hamabi hilabetetan ordainduko da, 850,00 euro gordin hilero, hilabetea bukatutakoan.

Aipatutako diru kopuru horri pertsona fisikoen errentaren gaineko zergari dagokion konturako atxikipena eginen zaio, indarra duten arauei jarraikiz hala egin behar baldin bada.

Halaber, bekaren hilabeteko kopurutik 6,05 kenduko dira, Gizarte Segurantzaren araubide orokorreko kotizazioko kontingentzia arrunt gisa, etorkizunean pentsioa kalkulatzearen ondorioetarako, prestakuntza bekaren1 aldiaren zatiari dagokionez, 2011ko urriaren 21eko Errege Dekretuarekin bat. Errege dekretu haren bidez, Gizarte Segurantzan sartu ziren unibertsitateko prestakuntza zuten bekadunak, praktikak enpresa eta entitateetan egin eta horren truke edonolako kontraprestazio ekonomikoa hartzen dutenak.

4.3.-Bekadunei ematen zaien dirua ez da soldata edo lansaritzat hartuko, diru-laguntza publikotzat baizik.

4.4.-Beka erabiltzea eta bekaduna izatea ez da zerbitzuak ematea, eta egoera horrek ez dakar berarekin lan harremana, administratiboa edo estatutupekoa, sortzea Nafarroako Foru Komunitateko Administrazioarekin edo haren erakunde autonomoekin, ez eta antzeko eskubiderik lortzea ere. Administrazioak ez du konpromisorik hartuko beka bukatutakoan bekaduna bere plantillan sartzeko.

4.5.-Prestakuntza bekaren onuradunari agintzen zaizkion lan edo jarduerak Museoen Zerbitzuko funtzionario edo kontratudunek gainbegiratuko dituzte, horiek izanen baitira lan horien erantzuleak. Bekadunak ezin izanen ditu funtzionario publikoen eginkizunak bete edo berarentzat hartu, ez eta hirugarrenen aurrean Administrazio Publikoaren kide, ordezkari edo agente gisa agertu ere.

4.6.-Praktikaldiak iraun bitartean bekadunek hogeita hamar atseden egun izanen dituzte, hilabete bakoitzeko 2,5 egun natural.

4.7.-Halaber, prestakuntzarako behar diren joan-etorriak egin beharko ditu bekadunak.

5.-Beka eskatzen dutenek bete behar dituzten baldintzak.

Beka bat lortu ahal izateko, betebehar hauek izanen dira:

a) Adinez nagusia izatea.

b) Espainiako herritarra izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko itunen arabera, langileen joan-etorri askea aplikatzen duen estaturen batekoa. Dena den, Espainiako nazionalitatea ez duenak gaztelaniaz behar adina badakiela frogatu beharko du.

c) Jarduteko gaitasun osoa izatea eta Nafarroako Foru Komunitatearen eta haren erakunde autonomoen laguntza eta diru-laguntza publikoak jasotzeko desgaitua ez egotea.

d) Bizitokia Nafarroan izatea, deialdiaren eguna baino urte bat lehenagotik gutxienez.

e) Unibertsitateko titulu ofiziala edo baliokidea izatea, Espainiako agintariek emana edo baliozkotua, arlo hauetakoren batean: Historia, Artearen Historia, Arte Ederrak, Giza Zientziak, Bibliotekonomia eta Dokumentazioa.

f) Eskatutako titulu hori prestakuntza bekarako deialdia egin aurreko hiru urteen barrenean eskuratua izatea.

g) Bekaren prestakuntza jardueran aritzeko gaitasun fisikoa izatea eta horretan jardutea galaraz diezaiokeen gaixotasunik ez izatea.

h) Museo, liburutegi eta agiritegietan aritzeko Nafarroako Gobernuak emandako prestakuntza bekez inoiz baliatu direnek ezin dituzte beka hauek eskatu.

6.-Eskaera, epeak eta aurkeztu beharreko agiriak.

6.1.-Betebehar horiek egiaztagirien bidez eta idatziz frogatu daitezke, prestakuntza beka jasotzeko eskabidea aurkeztearekin batera. Hori guztia Nafarroako Gobernuaren Erregistro Orokorreko bulegoetan edo Kulturako, Turismoko eta Erakunde Harremanetako Departamentuko erregistroan (Navarreria kalea, 39. zk., 31001 Iruña) aurkeztu beharko da, telematika bidez tramitatuz Nafarroako Foru Komunitateko Erregistro Orokor Elektronikoan (ekainaren 23ko 70/2008 Foru Dekretu bidez sortua), edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatutako bideetako bat erabiliz.

Hauek dira aurkeztu beharreko agiriak:

a) Eskabidea, http://www.navarra.es/home_es/Servicios/Recursos/Impresos+generales.htm helbidean edo Nafarroako Gobernuko erregistroetan eskura egonen den eskabide orokorreko ereduari jarraikiz, 6.2 puntuan ezarritako epean eta moduan aurkeztu beharrekoa.

b) Nortasun Agiri Nazionala edo izangaiaren nazionalitatea eta identitatea frogatzen dituen beste agiri baliokideren bat, eta udalaren errolda ziurtagiria, eskabidea aurkeztu aurreko urtean Nafarroan bizi izan dela egiaztatzeko.

c) Ikasketa espedientearen ziurtagiria, kurtso bakoitzeko irakasgai guztien kalifikazioekin, zein deialditan gainditu zituen espresuki aipatuta.

d) Izangaiaren "curriculum vitae-a", ikasketa osagarriak, ikastaroak, argitalpenak, lortutako bekak, egindako ikerlanak eta izangaiari egokiak iruditzen zaizkion gainerako jarduera edo merezimendu guztiak adierazten dituena.

e) Nafarroako Ogasun Publikoko zergaduna bada, zerga betebeharrak eguneraturik dituela egiaztatzen duen ziurtagiria.

f) Zinpeko aitorpena, horren bidez jakinarazteko prestakuntza beka hauen xede bereko beste bekarik edo laguntzarik eskatu den edo jasotzen ari den beste departamentu, administrazio edo erakunde publiko edo pribatu batzuen eskutik.

Hori dena jatorrizko edo ofizialki konpultsatutako agiri egokien bidez frogatu behar da, eta Nafarroako Gobernuaren Erregistro Orokor Elektronikoan aurkeztu behar badira, dokumentuak behar bezala egiaztaturik eta eskatzaileak identifikaturik eta baimendurik (Foru Komunitateko Administrazioaren erregistro orokor elektronikoari buruzko 70/2008 Foru Dekretuak agintzen duenarekin bat).

6.2.-Prestakuntza bekak deialdi hau Nafarroako Aldizkari Ofizialean argitara eman eta biharamunetik hogei egun naturaleko epean eskatzen ahalko dira.

6.3.-Prestakuntza beka jasotzeko eskaera aurkezteak berarekin dakar eskatzaileak deialdiaren oinarriak onartzea.

7.-Eskatzaileek adierazten dituzten merezimenduak baloratzeko modua eta irizpideak.

7.1.-Izangaiek alegatutako merezimenduak Kulturako, Turismoko eta Erakunde Harremanetako kontseilariak izendatuko duen ebaluazio batzorde batek baloratuko ditu. Kide hauek osatuko dute: batzordeburua: Carmen Valdés Sagüés, Kultura Zuzendaritza Nagusiko Museoen Zerbitzuko zuzendaria. Batzordekideak: Mercedes Jover Hernando, Nafarroako Museoaren Ataleko burua; Francisco Javier Zubiaur Carreño, Museoetako goi mailako teknikaria, Nafarroako Museoaren Atalari atxikia; Ana Elena Redín Armañanzas, goi mailako teknikaria, Nafarroako Museoaren Atalari atxikia; eta, ordezko, Berta Balduz Azcárate, Zaharberritze lanetako goi mailako teknikaria, Nafarroako Museoaren Atalari atxikia.

Merezimenduak aztertu eta baloratzeko, ebaluazio batzorde horrek beharrezkotzat jotzen dituen txostenak eskatzen ahalko ditu, eta prestakuntza bekak puntu gehien ateratzen dutenei ematea proposatuko du, ondoko baremoan oinarrituz:

-Ikasketa espedientea: 10 puntu, gehienez.

-Ikastaroetan, biltzarretan, jardunaldietan, sinposioetan, mintegietan eta antzekoetan parte hartu izana: 5 puntu, gehienez.

-Argitalpenak, hitzaldiak, lankidetza bekak, ikerkuntzarako bekak, etab.: 5 puntu, gehienez.

Azken bi ataletan aipatutako ikasketak, ikastaroak, argitalpenak, bekak, etab. baloratuko dira, bakar-bakarrik, ondoko arloei buruzkoak direnean, horiexek baitira Nafarroako Museoan aplikatzen diren arloak: Historia, Arkeologia, Numismatika, Kultur Ondarea, Argazkigintza eta Ikus-entzunezko Baliabideak, Bibliotekonomia, Dokumentazioa, Museologia eta Kultur Ondasunen Zaharberritzea.

Eranskinean agiri hau agertzen da: "Nafarroako Gobernuko Museoen Zerbitzuan aritzeko prestakuntza beketarako izangaien merezimenduak baloratzeko aplika daitezkeen puntuazioak". Alderdi hori zehaztasun handiagoz azaltzen du.

7.2.-Prestakuntza bekak Kulturako, Turismoko eta Erakunde Harremanetako kontseilariaren foru agindu bidez emanen dira.

8.-Ebazpena jakinarazteko modua eta epea.

8.1.-Bekadunak hautatzeko prozeduraren ebazpena interesdunei jakinaraziko zaie administrazio prozedura erkideari buruzko legerian ezarritako moduan, eta jendaurrean jarriko da Nafarroako Museoko eta Vianako Printzea Erakundea-Kulturako, Turismoko eta Erakunde Harremanetako Departamentuko iragarki oholean eta Nafarroako Atariko (http://www.navarra.es) Zerbitzuen atalean (Diru-laguntzak, laguntzak eta bekak).

8.2.-Prestakuntza beka jaso ahal izateko, interesdunak hura onartzen duela adierazi beharko du, idatziz, gutun bidez modu ofizialean komunikatu eta hilabeteko epean. Hala egiten ez badu, onuradunak bekarako eskubidea galduko du, eta lortutako puntuen ordenan ondoren dagoena izendatuko da onuradun. Onarpena Museoen Zerbitzuko Zuzendaritzan (Nafarroako Museoaren Atalean) aurkeztu beharko da.

8.3.-Hautaketa prozedura hiru hilabeteko epean ebatzi ez bada, eta horri buruzko administrazio ebazpenik espresuki jakinarazi edo argitaratu ez bada, interesdunen eskaera administrazioaren isiltasunaren bidez ezetsi dela ulertzen ahalko da.

9.-Prestakuntza jarduerak egiteko tokia, haien zuzendaritzaz arduratuko den unitate administratiboa eta tutoretza.

9.1.-Prestakuntza praktikak Kulturako, Turismoko eta Erakunde Harremanetako Departamentuko Vianako Printzea Erakundea-Kultura Zuzendaritza Nagusiko Museoen Zerbitzuari atxikita egonen dira, eta Nafarroako Museoan bertan eginen dira (Iruñeko Santo Domingo kaleko 47. zk.).

9.2.-Bekadunek jarraian adierazten diren funtzionamendu arloetako bat hautatuko dute praktikaldia egiteko. Jaso dituzten puntuazioen arabera (handienetik txikienera) eginen dute hautaketa.

Arloak:

-Bildumak eta kontserbazioa.

-Jarduera didaktikoa eta kultur zabalkundea.

9.3.-Eskatutako titulazioa edo goragokoa duen tutore batek zuzendu eta gainbegiratuko du bekadunen jarduera. Tutore hori Museoen Zerbitzuak izendatuko du bertan ari diren langileen artetik.

9.4.-Tutoreak egin beharreko lanak agindu eta ordutegiak programatuko ditu, eta bekadunek beren eginbehar orokor eta berariazkoak betetzen dituzten begiratuko du.

10.-Prestakuntza praktiken hasiera eta iraupena. Prestakuntza bekari uko egitea.

10.1.-Prestakuntza bekaren onuraduna 2012ko irailaren 1ean hasiko da jarduerak egiten eta 2013ko abuztuaren 31n bukatuko ditu, bi egunak barne. Horrela egiten ez badu, onuradunak bekari behin betiko uko egiten diola ulertuko da, non eta organo eskudunak ezinbesteko arrazoiak edo behar bezala justifikatutako beste edozein gorabehera ikusten ez dituen.

10.2.-Bekadunak hogeita hamar orduko jardunaldia (08:00etatik 14:00ak arte) izanen du astean, astelehenetik ostiralera, biak barne, jaiegun ofizialetan izan ezik.

10.3.-Edozein arrazoi dela-eta, emandako prestakuntza bekari uko egiten bazaio, Nafarroako Gobernuko Vianako Printzea Erakundea-Kultura Zuzendaritza Nagusiko Museoen Zerbitzuari jakinarazi beharko zaio, idatziz.

10.4.-Horrelako kasuetan, ebaluazio batzordeak prestaturiko puntuazioaren araberako zerrendan hurrengo denari deituko zaio, bekaldia bukatu bitartean jardun dezan. Bigarren onuradun horrek oinarri hauetako 8. eta 10. puntuetan ezarritako moduan onartu beharko du beka, eta bekaduntzat hartuko da ondorio guztietarako, deusetan galarazi gabe lehenbiziko bekadunak uko egin arte zituen betebeharrak.

11.-Bekadunaren berariazko betebeharrak, eskubideak eta administrazio erantzukizuna.

11.1.-Honako hauek dira bekadunak prestakuntzaldian dituen betebehar orokorrak:

a) Beka emateko arrazoitzat jo den prestakuntza jarduera egitea eta hori frogatzea. Prestakuntzaz arduratzen den administrazio unitateak lan eta txostenak aurkezteko eskatzen ahalko du, bekadunaren errendimendu mailaren jarraipena eta ebaluazioa egiteko.

b) Beka emateko betebehar eta baldintzak betetzea.

c) Eskumena duten organoek eman den bekaren inguruan egin ditzaketen egiaztapen lan guztiak onartzea.

d) Museoen Zerbitzuari (Nafarroako Museoaren Atalari) jakinaraztea harturiko bekari espresuki uko egiten diola, jarduerak utzi baino hamabost egun natural lehenago gutxienez.

e) Beka dela-eta eginiko jardueraren zuzeneko ondorioa den edozein argitalpenetan bekaduna dela adieraztea.

f) Zein erakundetan jarduten duen, bertako barne edo funtzionamendu araubidea betetzea.

g) Prestakuntzaldia bukaturik, gehienez ere hilabeteko epean, eginiko lanen memoria igorri beharko du Museoen Zerbitzura, baita lorturiko ezagutza teknikoari buruzko balorazioa ere.

11.2.-Bekadunen eskubideak:

a) Bekadunek, Nafarroako Foru Komunitateko Administrazioarekin duten harreman juridikoa ezertan aldatu gabe, eskubidea izanen dute zerbitzu eta bidaien arabera izaten dituzten gastuengatik funtzionarioei dagozkien ordain berberak jasotzeko.

b) Nafarroako Foru Komunitatearen Administrazioan prestakuntzako bekadun gisa aritzean sor daitezkeen istripuek aseguru kontratu bat izanen dute Mapfre Seguros Generales aseguru etxearekin, hala baimenduta baitago Funtzio Publikoaren zuzendari nagusiaren ekainaren 4ko 1811/2007 Ebazpenaren bidez, eta gaur arte luzaturik. Orobat, bekadunek Nafarroako Foru Komunitateko Administrazioaren kalte-ordaina jasotzeko eskubidea izanen dute, zerbitzu publikoen funtzionamenduaren ondorioz kalteak edo lesioak dituztenean, ezinbesteko kasuetan izan ezik. Administrazioaren ondare erantzukizuna administrazio bidetik eskatuko da.

c) Nafarroako Foru Komunitateko Administrazioa izanen da prestakuntza jardueran bekadunak hirugarrenei sortzen dizkien kalteen erantzulea, baina administrazio horrek zilegi izanen du iruzur, erru edo zabarkeria larriagatik bekadunak izan dezakeen erantzukizuna eskatzea.

d) Asistentzia eta aprobetxamenduaren ziurtagiria jasotzeko eskubidea izanen dute, Museoen Zerbitzuan (Nafarroako Museoaren Atalean) egindako prestakuntzaldian jasotako jakintza eta ezagutzaren araberakoa. Vianako Printzea Erakundea-Kulturako, Turismoko eta Erakunde Harremanetako Departamentuko Idazkaritza Tekniko Nagusiak eginen du ziurtagiri hori.

12.-Bateraezintasunak.

a) Onuraduna prestakuntzarako jarduera berbera egiteko beste beka edo diru-laguntza bat jasotzen ari denean, guztira jasotako zenbatekoa ezin izanen da 13.000 eurotik gorakoa izan, dela bakarka dela Nafarroako Foru Komunitateko Administrazioaren, beste administrazio publiko baten edo erakunde publiko nahiz pribatuen edo partikularren, Espainiakoen nahiz atzerrikoen, beste beka edo diru-laguntza batzuekin baturik.

Aipatu zenbatekoa gainditzen bada, Vianako Printzea Erakundea-Kulturako, Turismoko eta Erakunde Harremanetako Departamentuak bekaren zenbatekoa eta iraupena dagokien proportzioan murriztuko ditu. Halakoetan, departamentuak gainerako izangaiei beste beka bat eskaintzen ahalko die, lortutako puntuen hurrenkerari jarraituz, hasierako bekaren iraupenaren eta zenbatekoaren osagarri gisa.

b) Prestakuntza beka emateko kontuan hartu diren baldintzak ezertan aldatzen badira eta betiere aldi berean hauekin ezin bateratu den beste diru-laguntzarik eskuratzen bada, deuseztatu edo aldatu eginen da kontzesiorako ebazpena.

13.-Baldintzak ez betetzea.

Bekadunak bere gain hartutako betebehar eta eginkizunak betetzen ez baditu, haiek egitean ardurarik jartzen ez badu, errendimendu eta aprobetxamendu eskasa badu edo lanak kalitate gabekoak badira, beka aldi baterako edo betiko kentzea erabakiko du organo eskudunak, dagokion administrazio unitateak proposaturik eta interesdunari entzunaldia eman ondoren; horrekin batera zuzkidura ekonomikoaren zati proportzionala ere galduko du, eska daitezkeen diru-itzulketak, berandutza interesak eta ezar litezkeen zehapenak galarazi gabe.

14.-Behar diren aurrekontu kredituak.

Museoen Zerbitzurako bi prestakuntza beka emateak guztira sortuko duen 20.400,00 euroko gastutik 6.800,00 euro 2012ko gastuen aurrekontuko "Bekadunak" izeneko A20003 A2320 4800 333100 kontu-sailaren kargura ordaintzen ahalko dira, eta gainerakoa, 13.600,00 euro, 2013ko urtarriletik abuztura bitarteko aldiari dagozkionak (biak barne), 2013ko ekitaldiko kontu-sailaren kargura, betiere kontu-sail horretan hartarako behar adinako krediturik badago.

15.-Deialdiaren oinarrien aurka jar daitezkeen administrazio errekurtsoak.

15.1.-Deialdi honen, bere oinarrien eta horiek aplikatzeko egintzen kontra gora jotzeko errekurtsoa jartzen ahalko da, Nafarroako Gobernuari zuzendua, hilabeteko epean, deialdia jakinarazi edo argitaratu eta biharamunetik hasita.

15.2.-Oinarri hauetan ezarrita ez dagoen orotan, Nafarroako Foru Komunitateko Administrazioaren eta haren erakunde autonomoen prestakuntza bekak emateko araubide orokorra ezartzen duen apirilaren 19ko 172/2004 Foru Dekretuan xedatutakoa aplikatuko da (2004ko 57. Nafarroako Aldizkari Ofiziala, maiatzaren 12koa).

ERANSKINA

Nafarroako Gobernuko Museoen Zerbitzuan (Nafarroako Museoaren Atalean) aritzeko prestakuntza beken izangaien merezimenduak baloratzeko aplikatuko diren puntuazioak

Lehen multzoa. Ikasketa espedientea: 10 puntu gehienez.

-Espedientea.

  • Nahikoa: 1.
  • Oso ongi: 2.
  • Bikain: 3.
  • Ohorezko matrikula: 4.

-Beste lizentzia batzuk: 2.

-Unibertsitateko beste diplomatura batzuk: 1.

-Doktorego tesia: 1,5.

-Ikasketa aurreratuen diploma: 0,5.

-Masterrak eta antzeko diplomak*: 0,7.

-Irakasgaitasunaren ziurtagiria: 0,3.

Bigarren multzoa. Ikastaroak, biltzarrak, praktikak: 5 puntu gehienez.

-Ikastaroak* (puntu bat gehienez)

  • 25 ordu baino gutxiagokoak: 0,1.
  • 25 ordukoak edo gehiagokoak: 0,2.

-Biltzarrak, jardunaldiak.

  • Sinposioak eta mintegiak* (0,5 puntu gehienez): 0,1.

-Erakusketaren komisario lana (puntu bat gehienez): 0,2.

-Banakako erakusketa (0,5 puntu gehienez): 0,2.

  • Erakusketa kolektiboa 0,1.

-Arkeologia arloko esku-hartzeak (puntu bat gehienez).

  • 6 hilabete baino gutxiagokoak: 0,1.
  • 6 hilabetekoak edo gehiagokoak: 0,2.

-Lanbide/lan praktikak*: puntu bat gehienez.

  • 6 hilabete baino gutxiagokoak: 0,1.
  • 6 hilabetekoak edo gehiagokoak: 0,2.

(Honetatik kanpo gelditzen dira unibertsitateko titulu bat lortzera bideratutako nahitaezko praktikaldiak).

Hirugarren multzoa: argitalpenak, hitzaldiak, lankidetza zientifikoko bekak: 5 puntu gehienez.

-Aldizkariko artikulua*: 0,2.

  • Liburu errezentsioa: 0,1.

-Argitalpen diseinua: 0,1.

-Monografia*: 2.

-Emandako hitzaldia*: 0,2.

  • Komunikazioa 0,1

-Lankidetza/ikerkuntzarako beka: 0,1.

  • Beka, unibertsitateko departamentuko barne ikasle gisa.

(1) Bestalde, enpresari kuota hau dagokio: 30,34 euro kontingentzia arruntengatik + 4,17 euro kontingentzia profesionalengatik; hau da, 34,51 euro hilabete eta beka bakoitzeko.

* Merezimendu horiek prestakuntza bekak jasotzeko eskatzen diren arloekin lotuta egonez gero baizik ez dira kontuan hartuko, deialdi hau arautzen duten oinarrietako 7.1 puntuari jarraikiz. Bibliotekonomiari, artxiboen kudeaketari eta dokumentazioari buruzko ikastaroak sartzen dira. Ikastaroen/praktikaldien iraupena jakinarazten ez bada, gutxieneko puntuazioa emanen da.

Iragarkiaren kodea: F1202163