1. NAFARROAKO FORU KOMUNITATEA
1.7. BESTELAKOAK
449/2011 EBAZPENA, martxoaren 17koa, Ingurumenaren eta Uraren zuzendari nagusiak emana, Ingurumen baimen integratua berritzen duena Iruñeko udal mugapeko hiltegi baterako. Titularra La Protectora, S.A. da.
Espediente mota: Ingurumen baimen integratua berritzea.
Espedientearen kodea: 1108/06.
Aplikatu beharreko araua: Ingurumena Babesteko Esku-hartzeari buruzko 4/2005 Foru Legea.
Eranskina eta epigrafea: 2B - 9.2.
Instalazioa: hiltegia.
Titularra/k: La Protectora, S.A.
Kokalekua: Orkoiengo errepidea, zk.g.
UTM koordenatuak (Huso 30N, Datum ED50): X = 607.930;
Y = 4.741.924.
Udalerria: Iruña.
Eskaeraren data: 2010/11/25.
Ingurumenaren eta Uraren zuzendari nagusiaren azaroaren 5eko 231/2007 Ebazpenaren bidez, Ingurumen baimen integratua eman zen Iruñeko udal mugapeko hiltegi baterako. Jardueraren titularra La Protectora, S.A. da.
Ingurumen baimen integratuaren indarraldia 2010eko abenduaren 31n bukatu zen, titularrak aurreikusia baitzuen egungo instalazioen funtzionamendua etetea eta jarduera instalazio berri batzuetara eramatea.
2010eko azaroaren 25ean, titularrak aditzera eman du aurreikuspen hori ezin izan dela gauzatu, Izarbeibarko jarduera ekonomikoetarako eremuaren Udalez gaindiko Plan Sektoriala onesteko eta gauzatzeko izandako atzerapenak direla-eta. Horren ondorioz, Haragiaren Hiriaren proiektua geldiarazirik dago. Hortxe gauzatuko du La Protectora, S.A.k bere jarduera. Gaur egun, Ingurumen baimen integratuaren prozedura tramitatzen ari da instalazio berri horretarako (aipatu eremuan, Legardako udal mugapean), eta aurreikusten da 2013. urte amaierarako ezartzea eta abian jartzea.
Hortaz, beharrezkoa denez hiltegiko jarduerarekin gaur egungo instalazioetan jarraitzea, titularrak eskaera egin du gaur egungo Ingurumen baimen integratua berritzeko 2013. urteko abenduaren 31 arte.
Nafarroako Gobernuko Ingurumen Kalitatearen Zerbitzuak 2010eko abuztuaren 26an egindako azken ikuskapenean, ez zuen inolako ez betetzerik hauteman gaur egun duen Ingurumen baimen integratuan ezarritako baldintzei dagokienez, eta instalazioaren funtzionamendua bateragarritzat jotzen da tokiko ingurumenaren egoera egokiarekin.
Halaber, berritzearen indarraldia hiru urtekoa izanen denez gehienez, ez da bideragarritzat jotzen beste inbertsio batzuk egitea instalazioak ingurumenaren aldetik egokitu eta hobetzeko.
Industria establezimendua ez dago ekainaren 16ko 1254/1999 Errege Dekretuaren aplikazio eremuan. Dekretu horrek istripu larriek sortzen dituzten arriskuak kontrolatzeko neurriak onetsi zituen, gai arriskugarriak tarteko diren kasuetarako.
Ingurumenaren arloko eskumenak Ingurumenaren eta Uraren zuzendariari, Ingurumen Kalitatearen Zerbitzuko zuzendariari eta Biodibertsitatea Zaintzeko Zerbitzuko zuzendariari eskuordetzen dizkien urriaren 10eko 426/2007 Foru Aginduaren bidez eskuratu ditudan ahalmenak erabiliz,
EBATZI DUT:
1. La Protectora, S.A. titular duen hiltegiari Ingurumen baimen integratua berritzea. Iruñeko udal mugapean dago.
2. Jarduera hori ingurumen baimen integratuaren eskaeraren oinarrizko proiektuan eta 1108/06 espediente administratiboko gainerako agirietan aipatzen diren baldintzei jarraikiz garatu beharko da, betiere ebazpen honen II., III. eta IV. eranskinetako neurriak betez.
3. Baimen honen indarraldia 2013ko abenduaren 31n bukatuko da.
4. Jarduera edonola ere aldatzeko, titularrak aldez aurretik Landa Garapeneko eta Ingurumeneko Departamentuari jakinarazi beharko dio. Arrazoiak emanda, adierazi beharko du aldaketa funtsezkoa, nabarmena edo garrantzirik gabea den, Ingurumena Babesteko Esku-hartzeari buruzko martxoaren 22ko 4/2005 Foru Legea garatzen duen Erregelamenduan xedatutakoarekin bat. Erregelamendu hori abenduaren 28ko 93/2006 Foru Dekretuak onetsi zuen.
5. Instalazioa Nafarroako hondakin arriskugarrien sortzaile txikien erregistroan mantentzea (PP/673/NA/2005 zenbakia), urriaren 13ko 312/1993 Foru Dekretuan ezarritakoarekin bat. Sortzen ahal dituen hondakin arriskugarriak Ingurumen baimen integratuaren III. eranskinean ageri dira. Hondakin arriskugarrien sorreran egiten diren aldaketak jakinarazi egin beharko dira, erregistratzeko eta, bidezkoa bada, aipatutako III. eranskin horretan sartzeko.
6. Ebazpen hau Nafarroako Aldizkari Ofizialean argitaratzea.
7. Ebazpen honek ez du administrazio bidea amaitzen eta espedientean interesa dutenek, administrazio publikoek izan ezik, haren kontra gora jotzeko errekurtsoa jartzen ahal dute, Nafarroako Gobernuari zuzendua, hilabeteko epean. Administrazio publikoek zilegi dute administrazioarekiko auzi-errekurtsoa jartzea, Nafarroako Justizia Auzitegi Nagusiko Administrazioarekiko Auzien Salari zuzendua, bi hilabeteko epean. Horrek ez du galarazten Nafarroako Gobernuan aldez aurreko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan ezarritako moduan eta epean. Epe horiek ebazpen honen jakinarazpena egin edo, bestela, Nafarroako Aldizkari Ofizialean argitaratu eta biharamunetik aurrera hasiko dira kontatzen.
8. Ebazpen hau La Protectora, S.A.ri, Iruñeko Udalari, Nafarroako Larrialdietako Agentziaren Babes Zibilerako Zuzendaritzari, Abeltzaintza Zerbitzuari eta Ingurumen Kalitatearen Zerbitzuari jakinaraztea, behar diren ondorioak izan ditzan.
Iruñean, 2011ko martxoaren 18an.-Ingurumenaren eta Uraren zuzendari nagusia, Andrés Eciolaza Carballo.
Oharra: ebazpen honetan aipatzen diren eranskinak interesdunen eskura daude Ingurumenaren eta Uraren Zuzendaritza Nagusiaren bulegoetan (González Tablas, 9-behea), Ingurumen Kalitatearen Zerbitzuan, eta Nafarroako Gobernuaren web atarian, hain zuzen ere Landa Garapeneko eta Ingurumeneko Departamentuaren sailean, "Ingurumen baimenak" kontsulten atalean.
Iragarkiaren kodea: F1105662
