Iragarkia

34. ALDIZKARIA - 2011ko otsailaren 18a

1. NAFARROAKO FORU KOMUNITATEA

1.1. XEDAPEN OROKORRAK

1.1.3. Foru Aginduak

1/2011 FORU AGINDUA, urtarrilaren 24koa, Ekonomia eta Ogasuneko kontseilariak emana, ondare eskualdaketen eta egintza juridiko dokumentatuen gaineko zergaren autolikidazioko 620 eredua (zenbait garraiobide erabilien eskualdaketari buruzkoa) eta J-50 eta 630 ereduei dagozkien 743 eta 789 ordainketa gutunak, hurrenez hurren, onesten dituena.

Apirilaren 26ko 129/1999 Legegintzako Foru Dekretuak onetsitako ondare eskualdaketen eta egintza juridiko dokumentatuen gaineko zergaren xedapenen Testu Bateginaren 39.2 artikuluak xedatzen du subjektu pasiboek, zerga aitorpena aurkezten dutenean, dagokien zerga-zorra zehaztu beharko dutela autolikidazioa eginez eta araudiak ezarritako toki, modu eta epeetan horren diru-sarrera eginez.

Autolikidazioaren sistema benetan ezartzeko, Ekonomia eta Ogasuneko kontseilariak azaroaren 30ean emandako 247/2000 Foru Aginduak ondare eskualdaketen eta egintza juridiko dokumentatuen gaineko zergaren aitorpen-likidazioko 620 eredua (garraiobide erabilien eskualdaketari buruzkoa) onetsi zuen. Gero, azaroaren 9ko 278/2001 Foru Aginduak eurotan aurkeztu beharreko 620 eredua onetsi zuen, Europako moneta bakarra onartzearen ondorioz.

Nafarroako Foru Komunitateko Administrazioari buruzko abenduaren 3ko 15/2004 Foru Legearen 44.1 artikuluak dio administrazio espedienteak tramitatzean baliabide elektroniko, informatiko eta telematikoak erabili behar direla lagungarri gisa, betiere bermeak errespetatuz eta antolamendu juridikoak kasu bakoitzerako aurreikusten dituen baldintzak betez.

Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuak Nafarroako Zerga Ogasunaren esparruan tributuen aplikaziorako teknika elektroniko, informatiko eta telematikoak ugaritu eta hobetzen ditu. Horrela, alde batetik, tributudunek errazago bete ahal izanen dituzte tributu betebeharrak (bai materialak bai formalak), eta bestetik, errespetatu eginen dira haien eskubide eta bermeak; azkenik, tributuen aplikazioan Administrazioaren eraginkortasuna areagotu eginen da.

Nafarroako Zerga Ogasunean aitorpenak aurkeztean bitarteko elektronikoen erabilera orokorra izan dadin, eta helburu horretarantz aurrera egiteko, foru agindu honen bidez 620 eredua onetsi da; nahi izatera bide telematikoak erabiliz aurkez daiteke Internet bidez, salbu Ekonomia eta Ogasuneko kontseilariak uztailaren 3an emandako 132/2009 Foru Aginduan berariaz araututako kasuetan. Kasu horietan nahitaezkoa izanen da modalitate hori. Hirugarrenak ordezkatuz egin daiteke aurkezpen hori, Ekonomia eta Ogasuneko kontseilariaren ekainaren 29ko 130/2009 Foru Aginduan xedatutakoarekin bat. Agindu horren bidez, kanpoko laguntzarako akordioa onetsi zen hirugarren pertsonak ordezkatuz telematika bidez aurkezteko aitorpenak, jakinarazpenak eta zerga arloko beste agiri batzuk, eta telematika bidez tramitatzeko tributu zorren ordainketa.

Sartu beharreko autolikidazioen kasuan 620 eredua aurrez ordaintzekoa dela kontuan hartuta, aitorpena aurkeztu ahal izateko aurrez ordainketa hori tramitatu eta egiaztatu beharko da.

Ordainketa egin dela egiaztatzeko, kode bat (Erreferentzia Zenbaki Osoa) erabiltzea erabaki da. Nafarroako Zerga Ogasunaren telematika bidezko ordainketa sistemari atxikitako finantza entitateetako sistema informatikoek sortuko dute kode hori automatikoki, haietan diru-sarrera egindakoan. Sistema hau, azpiegitura kriptografiko batean oinarritua, fidagarria, segurua eta bizia da, eta erabilera oso zabaldua dago finantza entitateen artean. Nafarroako Zerga Ogasunak nahi du Nafarroako Foru Komunitatean diru-bilketaren kudeaketan laguntzaileak diren finantza entitate guztiak atxiki daitezela telematika bidezko ordainketen sistema honetara. Sistema hori aspalditik dago erabilgarri haren aplikazio telematikoetan. Hala, tributudunak edo haren ordezkariak, ez zerga bulegoetara ez bankukoetara joan beharrik gabe, tramite guztiak egin ditzake Nafarroako Zerga Ogasunak haren esku jartzen dituen web zerbitzuen bidez.

Hala ere, kontuan hartuta gaur egun finantza entitate guztiak ez daudela Nafarroako Zerga Ogasunaren ordainketa telematikoko sistema horri atxikita, ordainketaren izapidea eta ordainketaren egiaztapena errazteko, Erreferentzia Zenbaki Osoa lortzeko bigarren modalitate bat gaituko da: aitorpenaren zirriborroa Nafarroako Zerga Ogasunaren web zerbitzuetan gordetzea, egin beharreko ordainketaren datuak eskuratzea eta finantza entitateak bere bezeroen eskura jartzen duen sistemaren bidez (bertaratuz edo entitatearen web zerbitzuen bidez), zergaren ordainketa eta Erreferentzia Zenbaki Osoa tramitatzea. Zenbaki hori lortu ondoren, Nafarroako Zerga Ogasunaren aplikazio informatikoari esker zirriborroa berreskuratzen, Erreferentzia Zenbaki Osorako atala betetzen eta aitorpena aurkezten ahal da.

Tributudunak papereko aurkezpenetatik tramitazio telematikora igarotzeko erraztasunak emate aldera, 2011ko ekainaren 30 arteko epea aurreikusi da. Epe horretan bi aukerak erabiltzen ahalko dira aldi berean, halako moduz non, epe horretan, 620 eredua paperean erabiltzen ahalko baitute aipatutako 132/2009 Foru Aginduaren arabera telematika bidez aurkezteko betebeharra dutenek ere.

Horrez gain, foru agindu honen bidez, J-50 eta 630 ereduei dagozkien 743 eta 789 ordainketa gutunak, hurrenez hurren, onesten dira.

Maiatzaren 17ko 165/1999 Foru Dekretuaren bidez onetsitako Ondare Eskualdaketen eta Egintza Juridiko Dokumentatuen gaineko zergaren erregelamenduaren 94.3 artikuluak Ekonomia eta Ogasuneko kontseilariari ahalmena ematen dio aipatutako zergaren autolikidazioko 620 eredua (zenbait garraiobide erabilien eskualdaketari buruzkoa) onesteko.

Halaber, Tributuei buruzko abenduaren 14ko 13/2000 Foru Lege Orokorraren zazpigarren xedapen gehigarrian baimena ematen zaio Ekonomia eta Ogasuneko kontseilariari, foru agindu bidez arautu dezan zergadunek eta entitateek zein kasu eta baldintzatan aurkezten ahal dituzten aitorpenak, jakinarazpenak, aitorpen-likidazioak, autolikidazioak edo tributuen arloko arautegiak eskatutako beste agiri guztiak, baliabide elektronikoak, informatikoak eta telematikoak erabiliz.

Horrenbestez,

AGINDU DUT:

1. artikulua. 620 eredua "Ondare eskualdaketen eta egintza juridiko dokumentatuen gaineko zerga. Zenbait garraiobide erabilien eskualdaketa" onestea.

1. 620 eredua "Ondare eskualdaketen eta egintza juridiko dokumentatuen gaineko zerga. Zenbait garraiobide erabilien eskualdaketa" onesten da, foru agindu honen I. eranskinean jasotzen dena.

2. 620 eredua paperean edo bide telematikoz aurkez daiteke, subjektu pasiboak aukeran duela, bide telematikoa nahitaez erabili behar duten subjektu pasiboen kasuan izan ezik. Aurkezpen hori baldintza orokorrekin bat eta 5. eta 6. artikuluetan, hurrenez hurren, aurreikusitako prozeduraren arabera eginen da.

2. artikulua. Aitortu beharra.

620 eredua "Ondare eskualdaketen eta egintza juridiko dokumentatuen gaineko zerga. Zenbait garraiobide erabilien eskualdaketa" aurkeztera beharturik daude Hitzarmen Ekonomikoaren 38. artikuluan xedatutakoarekin bat aipatutako zerga autolikidatzeko eta, kasua bada, Nafarroako Zerga Ogasunean sartzeko betebeharra duten subjektu pasiboak.

Eredu hori erabiliko da zenbait garraiobide erabilien eskualdaketengatik egiten diren autolikidazio guztietarako, salbu 600 eta 605 ereduak erabiltzea bidezkoa denean.

3. artikulua. Aurkezteko tokia eta ordaintzeko modua.

1. 620 autolikidazio eredua aurkezteko epea zerga sorrarazi den egunetik bi hilabetekoa izanen da.

2. Subjektu pasiboak, aurreko idatz-zatian aipatzen den epearen barrenean, behartuta egonen dira autolikidaziotik ateratako zerga zorra Nafarroako Ogasun Publikoaren laguntzaile den edozein finantza entitatetan ordaintzera. 620 ereduari dagokion diru-sarrera egiteko, "740 ordainketa gutuna" erabiliko dute. Foru agindu honen I. eranskinean ageri da. Gainera, ordaintzeko onartuta dagoen beste edozein bide erabiliz egin dezakete diru-sarrera.

4. artikulua. 620 eredua paperezko euskarrian aurkezteko lekua.

620 eredua paperezko euskarrian Nafarroako Trafikoko Burutza Probintzialean aurkeztuko da, edo Nafarroako Foru Komunitateko Administrazioaren Ekonomia eta Ogasun Departamentuan, baldin eta eskualdatzen den garraiobide erabilia itasontzia bada.

5. artikulua. 620 ereduari dagozkion aitorpenen Internet bidezko aurkezpen telematikoa egiteko baldintza orokorrak.

1. 620 ereduari dagozkion aitorpenen aurkezpen telematikoa baldintza hauei jarraikiz eginen da:

a) Aitortzaileak identifikazio fiskaleko zenbakia (IFZ) eduki behar du.

b) Aitortzaileak ziurtagiri elektronikoa eduki beharko du, Nafarroako Zerga Ogasunak onartua, Nafarroako Zerga Ogasunaren esparruan baliabide elektroniko, informatiko eta telematikoen (EIT) erabilera arautzen duen uztailaren 17ko 50/2006 Foru Dekretuan ezarrita dagoenari jarraikiz.

Baimenduta dauden ziurtagiri elektronikoak eta ziurtapen zerbitzuak ematen dituztenen zerrenda Interneteko http://www.hacienda.navarra.es helbidetik abiatuta kontsulta daitezke.

c) Aitorpenak, jakinarazpenak eta zerga arloko beste agiri batzuk hirugarren pertsonen izenean telematika bidez aurkezteko eta tributu zorren ordainketa telematika bidez tramitatzeko kanpo-lankidetzarako akordioa onesten duen Ekonomia eta Ogasuneko kontseilariaren ekainaren 29ko 130/2009 Foru Aginduan xedatutakoarekin bat, aurkezleak, aitorpenak hirugarrenen izenean egiteko baimendutako pertsona edo entitate bat baldin bada, Nafarroako Zerga Ogasunak onartutako ziurtagiri elektronikoa, aurreko b) letran aipatzen dena, eduki beharko du.

d) 620 ereduaren aurkezpen telematikoa egiteko, aitortzaileak edo, hala bada, baimendutako aurkezleak Nafarroako atarian eskuragarri dagoen inprimakia erabili beharko dute.

e) Aitortzaileek aurkezpen telematikoa egiteko eskatzen diren arau teknikoak bete beharko dituzte. Arau horiek Nafarroako Zerga Ogasunaren web orrian daude ikusgai: http://www.hacienda.navarra.es.

2. Telematika bidez igortzen diren aitorpenetan akats formalak atzematen direnean, sistemak berak emanen dio horren berri aitortzaileari akatsak azaltzeko mezuen bitartez, behar den zuzenketa egin dezan.

6. artikulua. 620 ereduari dagozkion aitorpenen Internet bidezko aurkezpen telematikoa egiteko prozedura.

Aitorpenen Internet bidezko aurkezpen telematikoa egiteko, prozedura hau erabiliko da:

1. Nafarroako Ataritik, Ogasunarekiko izapideen atalean sartu.

2. Egin nahi den aitorpenaren eredua hautatu, eta aitorpena aurkeztu ahal izateko datu guztiak bete.

3. Aitorpenaren emaitza diru kopururen bat sartzea denean, ordainketa tramitatzea aitorpena aurkeztu baino lehenagoko baldintza izanen da.

Ordainketa egin izana egiaztatzeko, ordainketa horri dagokion Erreferentzia Zenbaki Osoa Nafarroako Zerga Ogasunari jakinarazi beharko zaio.

a) Ordainketa, dela norberaren izenean, dela hirugarrenen izenean ekainaren 29ko 130/2009 Foru Aginduan aurreikusita dauden bi modalitateetako edozeinetan, Nafarroako Zerga Ogasunaren ordainketa telematikoko sistemari atxikitako finantza entitate batean irekitako kontu batean zordunduz tramitatzen bada, aitorpena aurkezteko aplikazio telematikoak berak bideratuko du tramite hori, formularioan beharrezkoak diren datuak betez eta Erreferentzia Zenbaki Osoa lortuz.

Sistema horren bidez Erreferentzia Zenbaki Osoa lortu eta txertatutakoan, aitortzaileak bidaliko du aitorpena, eta ez da bestelako tramiterik egin beharko.

Nafarroako Zerga Ogasunaren ordainketa telematikoko sistemari atxikitako finantza entitateak zerga honen aurkezpeneko aplikazio telematikoan bertan agertzen dira.

b) Ordainketa Nafarroako Zerga Ogasunaren ordainketa telematikoko sistemari atxikitako finantza entitate batean irekitako kontu batean zordunduz tramitatzen ez bada, Erreferentzia Zenbaki Osoa diru-bilketaren kudeaketan laguntzaile aritzen den gordailuko finantza entitateak eman beharko du, dela bertaratuta, dela entitate horrek bere bezeroen eskura jartzen duen bitartekoa erabiliz. Erreferentzia Zenbaki Osoa lortutakoan, ondare eskualdaketen eta egintza juridiko dokumentatuen gaineko zergaren aitorpenean (620 ereduan) agerrarazi beharko da Nafarroako Zerga Ogasunari aurkeztu baino lehen.

Bigarren modalitate honetan Erreferentzia Zenbaki Osoa errazago lortu ahal izateko, zerga telematika bidez aurkezteko aplikazio informatikoari esker behar bezala betetako datuak biltzen dituen zirriborroa gordetzen ahalko da, eta zirriborroaren zenbatekoa agertzen duen ordainagiria lortzen ahalko da. Ordainketa egin ondoren, zirriborro hori berreskuratzen ahalko da, eta gero aitorpen gisa tramitatu, Erreferentzia Zenbaki Osoa txertatu ondoren.

4. Aitorpena bidali. Aitorpena bete ondoren, igortzeko aukera erabili. Sistemak aitorpena baliozkotu eginen du; zuzena bada, sistemak aurkeztu den aitorpenari esleitutako zenbakia jakinaraziko du, eta Eskualdaketaren Kode Elektronikoa (EKE) emanez ikus-onespen elektronikoa eman izanaren berri ere emanen du.

Onetsitako eta dagokion kode elektronikoarekin baliozkotutako aitorpena aurkezleak inprimatu beharko du, eta Trafiko Burutzari edo eskualdaketa erregistratzeko eskumena duen organoari entregatu beharko dio, aitorpena aurkeztu izanaren frogagiri gisa.

5. Kasu jakin batzuetan ikus-onespen elektronikoaren ordez Nafarroako Zerga Ogasunaren bulegoetan bertan emandako ikus-onespena erabiltzen ahalko da. Aplikazio informatikoak azalduko du aitorpenaren aurkezleak noiz egiten ahal duen hori.

Xedapen iragankor bakarra.-Telematika bidezko aurkezpena aukeran.

Foru agindu honek indarra hartu eta 2011ko ekainaren 30a artean, 620 eredua telematika bidez aurkeztera behartutako subjektu pasiboek aukera izanen dute, nahierara, bai telematika bidez bai paperean aurkezteko.

Lehen xedapen gehigarria.-743 ordainketa gutuna.

J-50 ereduari (Zozketen, tonbolen, apustuen eta ausazko konbinazioen gaineko zerga tasaren aitorpen-likidazioari buruzkoa, apustuen modalitatean) dagokion 743 ordainketa gutuna onesten da. Foru agindu honen II. eranskinean ageri da eredu hori.

Bigarren xedapen gehigarria.-789 ordainketa gutuna.

630 ereduari (Ondare eskualdaketen eta egintza juridiko dokumentatuen gaineko zerga. Merkataritzako dokumentuak" dagokion 789 ordainketa gutuna onesten da. Foru agindu honen III. eranskinean ageri da eredu hori.

Xedapen indargabetzaile bakarra.-Arauak indargabetzea.

A partir de la entrada en vigor de esta Orden Foral, queda derogada, en lo que se refiere al modelo 620, la Orden Foral 278/2001, de 9 de noviembre, del Consejero de Economía y Hacienda, por la que se aprueban los modelos F-67, F-69, J-10, J-20, J-30, CAT-06, CAT-08, FR-2, 038, 181, 182, 190, 199, 211, 212, 213, 214, 308, 309, 318, 319, 345, 480, 565, 600, 605, 610, 620 y 630 en euros.

Azken xedapen bakarra.-Indarra hartzea.

Foru agindu honek Nafarroako Aldizkari Ofizialean argitaratu eta biharamunean hartuko du indarra.

Iruñean, 2011ko urtarrilaren 24an.-Ekonomia eta Ogasuneko kontseilaria, Álvaro Miranda Simavilla.

1. eranskina

F1101241_0.pdf