2. NAFARROAKO TOKI ADMINISTRAZIOA
2.2. XEDAPEN ETA IRAGARKIAK, HERRIEN ARABERA ANTOLATUAK
IRUNBERRI
Aldaketa, Ur horniduraren tasa arautzen duen ordenantza fiskalean. Behin betiko onespena
Irunberriko Udalak, 2009ko abenduaren 29ko osoko bilkuran, aldaketa hasiera batean onetsi zuen Ur horniduraren tasa arautzen duen ordenantza fiskalean. Hasierako onespenaren erabakia 2010eko 10. Nafarroako Aldizkari Ofizialean argitaratu zen, urtarrilaren 22an. Jendaurrean egoteko epean inork ez duenez alegaziorik aurkeztu, delako ordenantza behin betikoz onetsi da, 6/1990 Foru Legearen 325. artikuluari jarraikiz. Hortaz, osorik ematen da argitara.
Irunberrin, 2010eko martxoaren 17an.-Alkatea, Mauro Gogorcena Aoiz.
ORDENANTZA, UR HORNIDURAREN TASA ARAUTZEN DUENA
Oinarria
1. artikulua. Nafarroako Toki Ogasunen arauei buruzko martxoaren 10eko 2/1995 Foru Legearen 7, 52 eta 100. artikuluetan eta hurrengoetan xedatuaren babesean ezarri da ordenantza hau, kontuan hartuta tasei, prezio publikoei eta enbargaezintasunaren araubideari buruz martxoaren 2ko 4/1999 Foru Legeak egindako aldaketak, baita Nafarroako toki araubidea eguneratzen duen urriaren 29ko 11/2004 Foru Legearenak ere. Behar den azterketa ekonomikoa egin da, ordenantza honek ordainarazten dituen tarifen prezioa arrazoitzen duena.
Zergapeko egintza
2. artikulua. Hona hemen ordenantza fiskal honetako zergapeko egintza:
a) Edateko uraz hornitzeko zerbitzua eskuragarri izatea.
b) Edateko uraz hornitzeko zerbitzua erabiltzea. Prezioa aldatzen ahalko da uraren erabileraren edo helburuen arabera, eta tarifa konbinatuak ezarriko dira urari erabilera desberdinak eman eta neurgailua bakarra denean.
2.1. Ordenantza honi dagokionez, honela ulertuko da finka partikularrak ureztatzeko eta aisiarako erabilera: edateko ura igerileku partikularretan, lorategietan eta antzekoetan erabiltzen denean, betiere etxerako eta gainerako erabilera horietarako bi kontratu edo bi kontagailu desberdin baldin badaude.
Ez da erabilera horren gaineko saneamendu kanonik igorpenduko.
2.2. Erabilera konbinatuak.
-Etxekoa-ureztatzekoa. Ordenantza honi dagokionez, zergapeko egintza izanen da edateko ura eskuragarri izatea hala etxerako nola ureztaketarako edo antzeko erabilera partikular baterako, bi kontratu edo kontagailu desberdin ez daudenean.
Saneamendu kanonari begira, ulertuko da ezen 36 m3-tik goitiko kontsumoa dagoenean edateko ur hori ureztatzeko erabiltzen dela, eta ez da gehiegiko erabilera horren gainean kanonik igorriko.
2.3. Soberako ura.
Ordenantza honi dagokionez, zergapeko egintza izanen da hornidurako sare publikotik datorren ura eskuragarri izatea edo egiazki erabiltzea landalurrak ureztatzeko, ureztaketa metodoa zeinahi izanik.
c) Ur hoditeria erabiltzea, sartu gabe ez uraren tratamendua ez hoditeriaren mantentze-lana.
Kuotaren oinarria
3. artikulua. Honako hauek dira ordenantzako 2. artikuluan zerrendatzen diren zergapeko egintzei dagozkien kuotak kalkulatzeko oinarriak:
a) Ordenantzako 2. artikuluko a) atalean aipaturiko zerbitzua: kuota finkoa.
b) Ordenantzako 2. artikuluko b) atalean aipaturiko zerbitzua: kontsumitutako uraren metro kubiko kopurua, kontagailuaren bidez edo bertze bide teknikoki onargarri batzuen bitartez zenbatetsita.
Salbuespenak
4. artikulua. Ez da salbuespenik eginen ordainarazpen honi dagokionez.
Subjektu pasiboak
5. artikulua. Zergadun diren aldetik, ordainarazpen honen subjektu pasiboak dira pertsona fisiko eta juridikoak eta izaera juridikorik gabeko entitateak, unitate ekonomiko bat izan edo ondare bereizia eduki eta edateko uraren etxeko hornidura zerbitzua eskatu dutenak edo hartaz baliatzen direnak.
Kasuan kasuko etxeko jabeak hartuko dira zergadunaren ordezkotzat. Horiek onuradunei kobratzen ahalko dizkiete kuotak, halakorik bada.
Tarifak
6. artikulua. Zerbitzuaren tarifak honako kontzeptuengatik izanen dira:
A) Kuota finkoa, ordenantza honetako 2.a) artikuluan aurreikusia: 6,40 euro/hiruhilekoa.
B) Hornidura, ordenantza honetako 2.b) artikuluan aurreikusia:
-Etxerako:
48 m3 arte: 0,39 euro/m3.
49 m3-tik 68 m3 arte: 0,53 euro/m3.
69tik 88 m3 arte: 0,65 euro/m3.
89tik 108 m3 arte: 0,79 euro/m3.
109 m3-tik goiti: 0,91 euro/m3.
-Industriarako: 0,56 euro/m3.
-Finka partikularretan ureztatzeko eta aisiarako erabilera: 1,05 euro/m3.
-Erabilera konbinatuak:
a) Etxerako-ureztatzeko:
48 m3 arte: 0,39 euro/m3 48 m3-tik goiti: 1,05 euro/m3.
-Lanbide Eskola Teknikoa:
Hiruhilekoan, gutienez ere: 210 m3: 0,39 euro/m3.
Gutienekotik goiti: 0,53 euro/m³.
-Lanbide Eskola teknikoaren egoitza:
Hiruhilekoan, gutienez ere: 1.000 m3: 0,39 euro/m3.
Gutienekotik goiti: 0,53 euro/m3.
-San Isidro zahar-etxea:
Hiruhilekoan, gutienez ere: 1.500 m3 0,39 euro/m3.
Gutienekotik goiti, 0,53 euro/m³.
C) Soberako ura:
1,05 euro/m3/hiruhilekoa.
Sarera lotzeko eskubidea, hiruhilekoa: 38,33 euro.
D) Hargunea: 350 euro.
E) Estoldak: 17,43 euro/urtea.
F) Goiko ur horniduraren sarea erabiltzea (etxebizitza bakoitza):
48 m3 arte: 0,35 euro/m3.
49 m3-tik 68 m3 arte: 0,49 euro/m3.
69 m3-tik 88 m3 arte: 0,61 euro/m3.
89 m3-tik 108 m3 arte: 0,75 euro/m3.
109 m3-tik goiti: 0,87 euro/m3.
Likidatu beharreko kuota
7. artikulua. Likidatu beharreko kuota aurreko artikuluko tarifak aplikatuz ateratzen dena izanen da, aipatzen diren kontzeptuen arabera.
Sorrarazpena
8. artikulua. Tasa eta, beraz, ordaindu beharra sortzen dira:
a) Zerbitzua eskura izan eta mantentzeagatik, hornidura sarearekin lotura ezartzen denetik hasita.
b) Kontsumoagatik, ura erabiltzen hasten denetik.
c) Harguneagatik, haren irekiera, lizentzia edo baimena ematen denean sorrarazi eta ordainaraziko da.
Kudeaketa arauak
9. artikulua. Bai kontagailua erosteko gastuak bai instalaziorako eta hornitzeko behar diren materialei eta eskulanari dagozkien gastuak sarera lotzeko edo hornidura emateko eskatzen duenaren bizkar joanen dira.
10. artikulua. Aurreneurri moduan, etxe edo instalazio barrenean ur-galera dakarten matxurak dituen hargunearen titularrari ur-hornidura mozten ahalko zaio.
11. artikulua. Erabiltzaileak behin ere ez dio urik ematen ahalko bertze pertsona bati, eta ez die erabiltzen utziko horretarako eskubiderik ez dutenei. Utzikeriagatik izan litekeen iruzur oro saihestu beharko du. Horrelakorik gertatuz gero, erabiltzailea izanen da errudun bakarra.
12. artikulua. Erabiltzaileak behartuak daude ura banatzeko sare nagusiko aberia baten ondorioz gertatzen direnak Irunberriko Udalari lehenbailehen jakinaraztera.
13. artikulua. Erabiltzaileari dagokio kontagailua eta paso-giltza dauden tokia behar bezala zaintzea eta Udalak ematen dituen jarraibideak betetzea.
14. artikulua. Ordenantza honetan aipatzen diren ordainarazpenetako bat ordaindu beharra duten zergadunak behartuak daude kontagailua dagoen tokira sartzen uztera irakurketa egiten duen langile kreditatuari edo bertzelako udal langileei, baldin eta zerbitzuko beharrengatik edo gisako zerbaitengatik zergadunaren etxera edo lokalera sartu beharrean badaude.
Kontagailuaren hiruhilekoko irakurketa egitea posible ez bada hura irakurgarri ez izateagatik edo hartara iristeko maneran ez egoteagatik, irakurketa orria utziko da subjektu pasiboaren eskura, udal bulegoetara bidal dezan.
Behar den tasa igortzeko tenorean halakorik eskura ez bada, ulertuko da hiruhileko horretan kontsumoa zero izan dela.
Nolanahi ere, gutienez ere irakurketa zenbatetsi bat eginen da urtean, ekitaldia burutzean, azken ekitaldian egiazki irakurritakoaren banaz bertzeko haztatua kalkulatuz eta %20 gehituz.
Irakurketa egiten ahal den puntuan, tasa erregularizatuko da egiazko kontsumoaren arabera.
Diru-bilketa
15. artikulua. 1. 5. artikuluko a), b) eta c) atalean aipatzen diren ordainarazpenak hiruhilean behin ordainduko dira.
2. Artikulu bereko d) atalean aipatzen den tasa sortzen den unean ordainduko da.
Arau-hausteak eta zehapenak
16. artikulua. Honako hauek iruzurtzat hartuko dira:
a) Udal langile behar bezala kreditatuek egiten dituzten bisitak oztopatzea.
b) Kontagailuen irakurketa edo ordenantza honetan araututako zerbitzuekin ikustekoa duten frogapenak eragoztea.
c) Prezintu, sarraila eta kontsumoa neurtzeko Udalak jarritako aparatuak aldatzea.
d) Kontsumoa neurtzeko aparatuak aldatzeko Udalak ematen dituen jarraibideak ez betetzea.
e) Kontagailuaren irakurketa maltzurkeriaz aldatzeko asmoz, baimenik gabeko mekanismoak ezartzea.
17. artikulua. Arau-hauste edo zehapenen gainerako kontuetarako, Ordenantza Fiskal Orokorrean xedatutakoari jarraituko zaio, bai eta Nafarroako Toki Ogasunei buruzko martxoaren 10eko 2/1995 Foru Legean eta horrekin bat datozen gainerako arauetan xedatutakoari ere.
AZKEN XEDAPENAK
Ordenantza honek testu osoa Nafarroako Aldizkari Ofizialean argitaratu ondoan hartuko du indarra eta sortuko ditu erabateko ondorio juridikoak.
Iragarkiaren kodea: L1005190
