Iragarkia

47. ALDIZKARIA - 2010eko apirilaren 16a

1. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Oposizioak eta lehiaketak. Lan publikoaren eskaintza

DEIALDIA, Nafarroako Administrazio Publikoaren Institutuko zuzendari kudeatzaileak martxoaren 31n emandako 63/2010 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko basozain izateko 23 lanpostu oposizio bidez betetzeko.

Nafarroako Administrazio Publikoaren Institutuko zuzendari kudeatzaileak martxoaren 31n emandako 63/2010 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko basozain izateko 23 lanpostu oposizio bidez betetzeko deialdia onetsi da.

Hautaketa-prozesua honako hauetan xedatutakoari jarraikiz eginen da: Landa Garapeneko eta Ingurumeneko Departamentuari atxikirik dauden basozainen berariazko araubidea erregulatzen duen azaroaren 3ko 132/2005 Foru Dekretuaren 7.3. artikulua; Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsia; aipatu estatutua garatu eta betetzeko sarrera prozeduraren gainean emandako Erregelamendua; eta gainerako aplikazio arauak eta deialdi honetako oinarriak.

1.-Deialdiaren xedea.

1.1. Deialdi honen xedea da Nafarroako Foru Komunitateko Administrazioaren eta haren erakunde autonomoen zerbitzuko basozain izateko 23 lanpostu oposizio bidez betetzea. Lanpostuak funtzionarioen araubidekoak dira eta C mailakoak, eta Landa Garapeneko eta Ingurumeneko Departamentuko Ingurumenaren eta Uraren Zuzendaritza Nagusiari atxikita daude. Hona lanpostu horien zenbakiak, atxikipenak eta txandak:

-11 lanpostu, txanda irekian.

-12 lanpostu, igoera txandan.

1.2. Deialdiko lanpostu hutsak hauek dira:

-23 lanpostu Landa Garapeneko eta Ingurumeneko Departamentuan, Ingurumenaren eta Uraren Zuzendaritza Nagusiari atxikiak. Hona hemen lanpostuen destinoak eta plantilla organikoan dituzten identifikazio-zenbakiak:

• 1475, 2340, 2371, 2403, 7954, 8185 eta 8448, Lizarran aritzeko.
• 2355, 2361, 2362, 2444 eta 7956, Irurtzunen aritzeko.
• 1507, 1510, 2376, 2393 eta 8132, Tuteran aritzeko.
• 2336, 2343, 2408 eta 8129, Ezkarozen aritzeko.
• 1459, Iruñean aritzeko.
• 8131, Tafallan aritzeko.

1.3. Igoera txandako lanpostuak hutsik geldituz gero, izangaiek ez dutelako hautaprobak gainditzeko behar den gutxieneko puntuazioa lortu, txanda irekikoei gehituko zaizkie.

Bestaldetik, igoera txandan, hutsik dauden lanpostuak baino izangai gehiagok gainditzen badute, txanda horretan lanpostuak eskuratzen ez dituztenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, deialdiaren 7.2 oinarrian agiriak aurkezteko ezarritako epea bukatzen denean, deialdiaren 2.2 oinarriko betebehar berariazkoak betetzen ez dituzten igoera txandako izangaiek txanda irekiko lanpostuak eskuratzeko aukera izanen dute, aurreko lerroaldean adierazitako modu berean.

1.4. Lanpostuaren ordainsariak hauek izanen dira: uztailaren 4ko 158/1984 Foru Dekretuaren bidez onetsitako Ordainsarien Behin-behineko Erregelamenduan C mailarentzat oro har ezarritakoak eta aplikatu beharreko gainerako xedapenetan kasu bakoitzerako ezartzen direnak.

1.5. Halaber, deialdi honen bidez, hautaketa-prozesuan parte hartu eta lanposturik lortzen ez duten izangaiekin Administrazio Erroan aldi baterako kontratatuak izateko izangai zerrenda hauek osatu nahi dira:

-Probak gainditu arren lanposturik lortu ez duten izangaien zerrenda.

-Lehen ariketa gainditu dutenen zerrenda, Administrazio Erroan aldi baterako kontratatzeko.

Izangaien zerrenda horiek deialdi honen 9. oinarrian xedatutakoaren arabera onetsi eta kudeatuko dira.

2.-Izangaiek bete beharreko baldintzak.

2.1. Oposizioan onartuak izateko, izangaiek, eskabideak aurkezteko epea amaitzen den egunean eta agiriak aurkezteko epea amaitzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak.

a) Espainiako nazionalitatea izatea.

b) Hamasei urte beteta izatea eta erretiroa nahitaez hartzeko gehieneko adina gainditua ez izatea.

c) Natur eta paisaia baliabideen kudeaketa eta antolaketa arloko goi mailako teknikari titulua, 2. mailako Lanbide Heziketako titulua (nekazaritza adarra, espezialitatea: basozaina) edo horien baliokidea izatea, edo deialdian parte hartzeko eskabideak aurkezteko epea bukatzen den egunean lortzeko moduan egotea.

Atzerrian lortutako tituluak badira, homologazioaren frogagiria eduki beharko da.

d) B motako ibilgailuak gidatzeko baimena izatea.

e) Bete behar dituen eginkizunetan aritzeko adinako gaitasun fisikoa eta psikikoa izatea.

f) Eginkizun publikoetan aritzeko ezgaitua edo gabetua ez egotea eta administrazio publikoren baten zerbitzutik bereizia ez izatea.

2.1.2. Igoera txandako izangaiek bete beharreko baldintzak.

Igoera txandako izangaiek, 2.1.1 atalean adierazitako betebeharrez gain, hauek ere bete beharko dituzte:

a) Nafarroako edozein administrazio publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta abiapuntuko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

Nafarroako Administrazio Publikoen Zerbitzuko Langileen Estatutuaren zortzigarren xedapen gehigarrian ezarri dena aplikatuz, igoera txandan parte hartzeko gainerako baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Izendatua izateko proposatzen den izangaiak deialdiaren 7.2 atalean ezarritako epean eta moduan frogatu beharko ditu betebehar horiek.

3.-Eskabideak.

3.1. Deialdian parte hartzeko eskabideak Nafarroako Gobernuko Erregistro Orokorrean (Karlos III.aren etorbidea, 2, 31002 Iruña) edo Nafarroako Gobernuaren gainerako erregistro bulegoetako edozeinetan (zerrenda 2008ko 14. Nafarroako Aldizkari Ofizialean argitaratu zen, urtarrilaren 30ean) aurkeztuko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazi diren bideetakoren bat erabiliz, deialdia Nafarroako Aldizkari Ofizialean argitaratu eta biharamunetik hogeita hamar egun naturaleko epean.

Eskabidea posta bulego batean aurkeztuz gero, gutun-azal irekian eginen da, postako langileek data eta zigilua jar ditzaten, ziurtatu aurretik.

Eskabideak deialdi honen eranskineko ereduari lotu behar zaizkio eta, horietan, izangaiek adierazi beharko dute eskatutako baldintza guztiak betetzen dituztela. Eredu hori Nafarroako Gobernuaren edozein erregistro bulegotan dago eskuragarri. Interneten bidez ere lortzen ahal da, www.navarra.es helbidean, bai argitaratzen den aldizkari ofizialetik abiatuta, bai atal honetatik abiatuta: "Zerbitzuak", "Enplegu Publikoa".

3.2. Eskabideari, behar bezala bete ondoren, agiri hauek erantsiko zaizkio:

A) Izangai guztiek aurkeztu beharreko agiriak:

Bat.-Nortasun agiri nazionalaren fotokopia, edo izangaiaren nortasuna frogatzen duen beste agiri baliokideren batena.

Bi.-Espedientea formalizatzeko eta azterketa eskubideetarako 25 euro ordaindu izanaren jatorrizko ziurtagiria. Azterketa eskubideen tasa ordaintzen ez bada, baztertu eginen da izangaia.

Sistema hauetako bat erabiliz ordaintzen ahalko da tasa hori:

-Behar den bezala betetako ordainketa gutunaren bidez (Nafarroako Foru Komunitateko banku entitateetan ordaintzeko). Interneten, deialdiaren iragarkian, agertzen da ordainketa gutunaren eredua, arestian aipatutako helbidean.

-Banestoko (Banco Español de Crédito) 0030 8124 87 0870002271 kontuan eskudirutan edo bankuko transferentzia bidez ordainduz; horrelakoetan, ordainagirian datu hauek jarri beharko dira nahitaez:

• Izangaiaren izen-deiturak.
• NAN-IFZ.
• Ordainketa zein kontutan egiten den, haren zenbakia.
• Kontzeptua: oposizioak.
• Deialdiaren xedeko lanpostua.

Honako hauek ez dute tasarik ordaindu beharko:

a) %33ko edo hortik gorako desgaitasuna duten pertsonak, hala onartu bazaie.

b) Deialdia argitaratu aurretik hilabetez edo luzaroago lan eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskaini zaizkien lan egokiei uko egin ez izatea eta lanbide sustapen, prestakuntza edo aldaketarako ekintzetan parte hartzeari uko egin ez izatea, justifikatutako kasuetan izan ezik, eta, horrez gainera, lanbide arteko gutxieneko soldatatik gorakoa den diru-sarrerarik ez izatea hilabetero.

Lan eskatzailea dela frogatzeko, enplegu bulegoak emandako agiria aurkeztu beharko du. Bertan, lan eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ezta lanbide sustapen, prestakuntza edo aldaketarako ekintzetan parte hartzeari ere, justifikatutako kasuetan izan ezik.

Interesdunaren aitorpenaren bidez frogatuko da ez duela hilabetero lanbide arteko gutxieneko soldatatik gorako diru-sarrerarik. Aitorpen eredua Nafarroako Gobernuko Informazio Bulegoan eskuratzen ahalko da, edo bestela Interneten bidez, arestian emandako helbidean.

B) Desgaitasuna duten izangaiak:

3.2 oinarriaren A) atalean (tasak ordaindu beharrik ez izatea) xedatutakoari dagokionez, eta denborak eta baliabideak egokitzea eskatzeko, %33ko edo hortik gorako desgaitasuna duten izangaiek hori frogatu beharko dute, jatorrizko agiri hauetako baten bidez edo kopia konpultsatuaren bidez:

-Imsersok edo autonomia erkidegoan eskumena duen organoak luzatutako ziurtagiria.

-Gizarte Segurantzako Institutu Nazionalaren ebazpena, prestazio bat jasotzeko eskubidea onartzen diona hauetakoren bat izateagatik: ezintasun iraunkor osoa, erabateko ezintasun iraunkorra edo baliaezintasun handia.

Desgaitasuna duten izangaiek ariketak egiteko denboren eta baliabideen egokitzapenak eskatzeko, hala adierazi beharko dute eskabidean, eta aparteko orri batean azaldu beharko dute nolako desgaitasuna duten eta zein egokitzapen eskatzen duten. Egokitzapenak eskatzeko bada eredu bat interesdunen eskura www.navarra.es web orrian, "Zerbitzuak", "Enplegu Publikoa" atalean, deialdiaren aipuan.

3.3. Eskabideak aurkezteko epea ezin izanen da luzatu.

3.4. Eskabidean atzematen diren akats materialak edo egitezkoak ofizioz edo interesdunak eskaturik zuzentzen ahalko dira, noiznahi ere.

4.-Izangaien onarpena eta erreklamazioak.

4.1. Eskabideak aurkezteko epea bukatuta, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa), ebazpena emanen du izangai onartuen eta baztertuen behin-behineko zerrenda onesteko, eta Nafarroako Aldizkari Ofizialean argitara dadila aginduko.

4.2. Behin-behineko zerrenda Nafarroako Aldizkari Ofizialean argitaratu eta biharamunetik hasita, izangai baztertuek hamar egun balioduneko epea izanen dute erreklamazioak aurkezteko eta, akatsik egin badute, haiek zuzentzeko.

4.3. Erreklamazioak aurkezteko epea bukaturik eta haien gaineko ebazpena eman ondoren, Sarrerarako Hautapenaren Zerbitzuko zuzendariak, Nafarroako Administrazio Publikoaren Institutuko zuzendari kudeatzaileak eskuordetuta (103/2008 Ebazpena, ekainaren 26koa) ebazpena emanen du, izangai onartuen eta baztertuen behin betiko zerrenda onesteko, eta Nafarroako Aldizkari Ofizialean argitara dadila aginduko.

4.4. Izangaiei ez zaizkie azterketa egiteko eskubideak itzuliko, baldin eta beraiei egotzitako arrazoiengatik baztertzen badira.

5.-Epaimahaia.

5.1. Epaimahaia honako kide hauek osatuko dute:

Epaimahaia honako kide hauek osatuko dute:

-Mahaiburua: Salvador del Pino López jauna, Landa Garapeneko eta Ingurumeneko Departamentuko Ehiza eta Arrantza Ataleko burua.

-Ordezkoa: Enrique Eraso Centelles jauna, Landa Garapeneko eta Ingurumeneko Departamentuko Biodibertsitatea Zaintzeko Zerbitzuko zuzendaria.

-Mahaikidea: Enrique Castién Arriazu jauna, Landa Garapeneko eta Ingurumeneko Departamentuko Ehiza Kudeatzeko Bulegoko burua.

-Ordezkoa: Ana Palacios Arellano andrea, Landa Garapeneko eta Ingurumeneko Departamentuko biologoa.

-Mahaikidea: Gregorio Oyaregui Arriada jauna, Landa Garapeneko eta Ingurumeneko Departamentuko Pirinioaldeko Bulegoko burua.

-Ordezkoa: María Eugenia Hernando Pascual andrea, Landa Garapeneko eta Ingurumeneko Departamentuko basogintzako ingeniaria.

-Mahaikidea: Nafarroako Foru Komunitateko Administrazioko Langileen Batzordeak izendatutako ordezkari bat.

-Ordezkoa: Nafarroako Foru Komunitateko Administrazioko Langileen Batzordeak izendatutako ordezkari bat.

-Mahaikide idazkaria: Cristina Cía Barrio andrea, Landa Garapeneko eta Ingurumeneko Departamentuko Administrazio Publikoko teknikaria (arlo juridikoa).

-Ordezkoa: Félix Armendáriz Martínez jauna, Landa Garapeneko eta Ingurumeneko Departamentuko Ingurumeneko Araubide Juridikoaren Ataleko burua.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Kide anitzeko organoaren eraketak eta jardunak balio izateko, mahaiburuak eta mahaikide idazkariak edo haien ordezkoek egon beharko dute bertan.

5.3. Epaimahaiko kideek ez dute parte hartuko, baldin eta Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretako batean badaude, eta organo dei egileari hala jakinaraziko diote.

Izangaiek, halaber, zilegi dute epaimahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren gainean sortzen diren arazo guztiak.

5.5. Epaimahaiak aholkulari adituen laguntza izan dezake, proba batzuetan nahiz guztietan. Aholkulari horiek beren espezialitate teknikoetan baizik ez dira ariko eta haietan bakarrik emanen diote laguntza epaimahaiari.

6.-Oposizioa nola eginen den.

6.1. Oposizioa 2010eko irailean hasiko da. Onartu eta baztertuen behin betiko zerrenda onesten duen ebazpenean bertan finkatuko dira probak hasteko tokia, eguna eta ordua.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

-Lehen zatia: proba fisikoak.

-Bigarren zatia: 2 ariketa.

Proba fisikoak: III. eranskinean jasota dauden egoera fisikoaren ariketak egin beharko dira eta horiek gaindituta izangaiek frogatuko dute gaitasun fisiko nahikoa dutela lanpostuaren eginkizunak betetzeko. Ariketaren kalifikazioa ''gai'' edo ''ez gai'' izanen da.

Lehenbiziko ariketa: teorikoa, gai zerrendako gaiei buruzko 25 galderari erantzun laburra eman beharko zaie. Ariketa horretan, izangaiei emanen zaizkien galderak erantzun beharko dituztenak baino %25 gehiago izanen dira, horien artean aukera dezaten. Oposizio egileek hiru ordu izanen dituzte ariketa egiteko.

Bigarren ariketa: praktikoa, gai zerrendako gaiei buruzko kasu bat ebatzi beharko dute, kanpoan edo gelan.

Epaimahaiak adieraziko du, ariketa hasi baino lehen, zenbat denbora izanen duten izangaiek azterketa egiteko.

6.3. Oposizioko ariketen balorazioan 100 puntu eman daitezke gehienez, honela banatuak:

Lehenbiziko ariketa: gehienez ere 50 puntu.

Bigarren ariketa: gehienez ere 50 puntu.

6.4. Ariketak baztergarriak izanen dira. Baztertuta geldituko dira ariketa bakoitzean kalifikaziorik onena lortzen duen izangaiaren puntuazioaren erdia gutxienez lortzen ez dutenak; betiere, kalifikaziorik onena ariketaren gehieneko puntuazioaren 1/3 edo handiagoa bada.

6.5. Lehenengo ariketa plika sistemaren bidez eginen da.

6.6. Ariketa bakoitzaren kalifikazioa amaitutakoan, epaimahaiak jendaurrean jarriko du, ariketa egin den lekuan eta Nafarroako Gobernuaren iragarki oholean, probak gainditu dituzten izangaien zerrenda, bakoitzaren kalifikazioekin. Horrez gainera, oposizioko hurrengo proba non, zein egunetan eta zer ordutan eginen den adierazten duen oharra argitaratuko du, gutxienez hura hasi baino 48 ordu lehenago. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

6.7. Ariketa bakoitzerako deialdi bakarra eginen da. Izangaiek aldean izan beharko dute nortasun agiri nazionala, pasaportea, gidabaimena edo epaimahaiaren iritziz identifikaziorako balio duen beste agiriren bat. Azterketara agertzen ez direnak edo arestian aipatutako agirietako baten bidez beren nortasuna frogatzen ez dutenak oposiziotik baztertuko dira.

6.8. Hautaprobak egiteko, onartutako desgaitasunen bat dutenentzat beharrezkoak diren denbora eta baliabide egokitzapenak ezarriko dira, eskabidean azaldutakoaren arabera.

7.-Probak gainditzen dituztenen zerrenda, izendapen proposamena eta agirien aurkezpena.

7.1. Hautaprobak bukatuta, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean eta ariketak egiten diren tokian. Gero, zerrenda hori Nafarroako Administrazio Publikoaren Institutuko zuzendari kudeatzaileari igorriko dio, hautaprobak puntuazio altuenarekin gainditu dituen izangaia izendatzeko proposamenarekin eta espediente osoarekin batera. Proposamena Nafarroako Aldizkari Ofizialean argitaratuko da. Zerrenda Interneten bidez ere kontsultatzen ahalko da, www.navarra.es helbidean, Zerbitzuen Katalogoan, Enplegu Publikoaren atalean, deialdiari buruz dagoen aiputik abiatuta.

Berdinketa izanez gero, kasu praktikoan puntuazio altuena erdietsi duenaren alde jokatuko da.

7.2. Izendapen proposamena Nafarroako Aldizkari Ofizialean argitaratu ondoko 30 egun naturaleko epean, proposatutako izangaiak inprimaki berariazko batzuk jaso eta honako agiri hauek aurkeztu beharko ditu Nafarroako Administrazio Publikoaren Institutuko Sarrerarako Hautapenaren Zerbitzuan:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiek:

a) Nortasun agiri nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen agiri baliokideren batenak.

b) Deialdiaren 2. oinarrian eskatzen den tituluaren fotokopia konpultsatua edo hura lortzeko eskubideak pagatu direla frogatzen duen gordekinarena; bestela, eskabideak aurkezteko epean titulua eskuratzeko moduan dagoela frogatzen duen ziurtagiria.

c) B motako ibilgailuak gidatzeko baimenaren fotokopia konpultsatua.

d) Laneko Arriskuei Aurrea Hartzeko Atalak emandako txostena, interesdunak karguan aritzea eragozten dion eritasun edo akats fisiko edo psikikorik ez duela frogatzeko.

Desgaitasunen bat alegatu duten izangaiek, gainera, desgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

e) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

f) Zin egin edo hitz ematea Nafarroako Foru Araubidea errespetatuko duela, Konstituzioari eta legeei men eginen diela eta karguari dagozkion eginkizunak zuzen beteko dituela.

Deialdi hau egin ez duen Nafarroako beste administrazio publikoren bateko langile finko edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiek:

a) Deialdiaren 2. oinarrian eskatzen den tituluaren fotokopia konpultsatua edo hura lortzeko eskubideak pagatu direla frogatzen duen gordekinarena; bestela, eskabideak aurkezteko epean titulua eskuratzeko moduan dagoela frogatzen duen ziurtagiria.

b) B motako ibilgailuak gidatzeko baimenaren fotokopia konpultsatua.

Desgaitasunen bat alegatu duten izangaiek, gainera, desgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barnean, eta aski justifikaturik dauden ezinbesteko kasuetan izan ezik, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, beren eskabidearen faltsukeria dela-eta legokiekeen erantzukizuna galarazi gabe.

7.4. Aurreko atalean ezarritakoa gertatuz gero, Nafarroako Administrazio Publikoaren Institutuko zuzendari kudeatzaileak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du hutsunea, eta horrekin ere aurreko ataletan adierazitako moduan jokatuko da.

7.5. Nahitaezko betebehar eta baldintzen frogagiriez gain, Funtzio Publikoaren Zuzendaritza Nagusiak, bere eskudantziak erabiltzeko, beste edozein agiri eska diezaioke izangaiari, eta horrek deialdi honen 7.2 oinarrian ezarritako moduan aurkeztu beharko du.

8.-Izendapena, lanpostuen esleipena eta jabetza hartzea.

8.1. Funtzio Publikoaren zuzendari nagusiak, ebazpen baten bitartez, aurreko oinarrietan ezarritakoa betetzen duen izangaia Nafarroako Foru Komunitatearen Administrazioko funtzionario izendatuko du, basozainaren lanposturako, eta dagokion lanpostu hutsa esleituko dio.

8.2. Izendapenak eta lanpostuaren jabetza hartzeak nomina eta plantillako funtzionario bilakatuko du izendatua, Nafarroako Foru Komunitateko Administrazioaren funtzionarioen arloan indarra duten xedapenek ezartzen dituzten eskubide eta betebehar guztiak dituela. Gizarte Segurantzako araubide orokorrean inskribatu eta kidetuko da, araubide horretan ezarritakoaren babesean.

Aurrekoa gorabehera, Nafarroako Administrazio Publikoen zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako Administrazio Publikoen edozein montepiotako eskubide pasiboen araubidekoak direnek bi aukera izanen dituzte: Nafarroako Foru Komunitateko Administrazioaren montepioan segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

8.3. Funtzionarioek bizilekua destinoko herrian ez izateak ez du alde batera uzten lantokira puntual iritsi beharra eta lanaldia eta lanpostuko eginkizunak zuzen bete beharra, eta, gainera, ez da inolako konpentsaziorik jasoko lantokirako joan-etorriengatik.

Behar bezala justifikatutako kasu batzuetan, administrazio publikoek zilegi izanen dute funtzionarioei destinoko herrian bizi daitezela eskatzea, lanpostuko eginkizunengatik eta eskatzen den dedikazioagatik bidezkoa denean.

8.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

8.5. Izendapena Nafarroako Aldizkari Ofizialean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Aipatutako epean eta ezinbesteko kasuetan izan ezik, izangairen bat lanpostuaren jabe egiten ez bada, Foru Komunitateko Administrazioaren funtzionario izateko eskubide guztiak galduko ditu. Hala gertatzen bada, deialdiaren 7.4 atalean ezarritakoari jarraikiko zaio.

8.6. Izangai bat funtzionario bihurtu eta lanpostuan batere aritu gabe, zuzenean eta berak eskatuta, borondatezko eszedentzia ematen bazaio jabetza hartzearen egunetik beretik, data horretan beste administrazio publiko batean ari delako, kasuko lanpostu hutsa ere deialdiaren 7.4 atalak agintzen duen moduan beteko da.

8.7. Aurreko bi ataletan aipatutako kasuetan, egoera horren ondoriozko lanpostua zuzenean esleituko zaio funtzionario berriari.

9.-Aldi baterako kontratuetarako izangaien zerrenda.

9.1. Nafarroako Administrazio Publikoetan sartzeko Erregelamenduaren 42. artikuluan, Lehendakaritza, Justizia eta Barneko kontseilariaren azaroaren 14ko 146/2005 Foru Aginduan (lanpostuak aldi baterako betetzeko kudeaketa arauak onesten dituena) eta oinarri honetan ezarritako prozedurarekin bat, aldi baterako kontratazioetarako zerrenda hauek prestatuko dira hautaketa-prozesuan parte hartu eta lanposturik lortzen ez duten izangaiekin:

a) Probak gainditu arren lanposturik lortu ez duten izangaien zerrenda.

b) Lehen ariketa gainditu dutenen zerrenda, Administrazio Erroan aldi baterako kontratatzeko.

9.2. Probak gainditu arren lanposturik lortzen ez dutenen zerrenda eta lehen ariketa gainditzen dutenen zerrenda.

Nafarroako Administrazio Publikoaren Institutuko Sarrerarako Hautapenaren Zerbitzuak espedientea igorri ondoren, Funtzio Publikoaren zuzendari nagusiaren ebazpen bidez onetsiko dira probak gainditu arren lanposturik lortzen ez duten izangaien zerrenda eta lehen ariketa gainditzen dutenena, une horretan indarra duten kudeaketa arauekin bat, eta jarriko dira Nafarroako Gobernuko iragarki oholean (Karlos III.aren etorbidea, 2, atalondoa, Iruña) eta www.navarra.es web orrian, deialdiak "Zerbitzuak", "Enplegu Publikoa" atalean duen aiputik abiatuta.

Honako hau izanen da aldi baterako kontratazioen zerrendetako hurrenkera: probak gainditu arren lanposturik lortzen ez dutenen kasuan, sarrerako hautaketa-prozesuan lortutako puntuaziorik handienaren arabera; eta gainerako izangaien kasuan, gainditutako ariketan lortutako puntuazioaren arabera. Berdinketa dagoenean, nor nagusitzen den erabakitzeko, deialdi honetan kasu horietarako ezarritako irizpideak hartuko dira kontuan.

Aldi baterako kontrataziorako izangaien zerrendan agertzeak ez du esan nahi interesdunei onartzen zaienik 2. oinarrian ezarritako betebeharrak betetzen dituztela; izan ere, horiek oinarri honetan adierazten den bezala frogatu beharko dituzte.

Izangaiei deitu eta, kasua bada, haiek kontratatzerakoan, Administrazio Erroan, honako hauetan xedatutakoari jarraikiz jokatuko da: Nafarroako Administrazio Publikoen zerbitzuko Langileen Estatutuaren Testu Bategina onesten duen abuztuaren 30eko 251/1993 Legegintzako Foru Dekretuaren 88.b) artikulua eta hurrengoak; lanpostuak aldi baterako betetzeko arauak ematen dituen Lehendakaritza, Justizia eta Barneko kontseilariaren azaroaren 14ko 146/2005 Foru Agindua (144. Nafarroako Aldizkari Ofizialean argitaratua, abenduaren 2an); eta aplikatzekoak diren gainerako arauak.

Deia egiterakoan, kontuan hartuko da Nafarroako Foru Komunitateko Administrazioaren zerbitzuko Langileen Estatutuaren Testu Bateginaren zazpigarren xedapen gehigarriaren 4. atalean ezarritakoa.

Kontratatuak izateko deia jasotzen duten izangaiek baizik ez dituzte aurkeztu beharko deialdiko titulazioaren gaineko baldintzak betetzen dituztela eta B motako ibilgailuak gidatzeko baimena badutela frogatzeko agiriak, 2. oinarriarekin bat, kontratua formalizatzen denean, jatorrizko agirien edo behar bezala konpultsatutako kopien bitartez.

Eskatzen diren agiriak aipatu epean aurkezten ez dituzten izangaiek, aski justifikatutako ezinbesteko kasuetan izan ezik, eta eskatutako baldintzak betetzen ez dituztenek deialdian parte hartzetik eratorritako eskubide guztiak galduko dituzte; betiere, parte hartzeko eskabidea faltsutzeagatik legokiekeen erantzukizuna galarazi gabe.

Sarrera prozesuko eskaerak aurkezteko epea bukatzen den egunerako bete beharko dira beharkizunak eta, orobat, hautaprobak egin bitartean eta kontratazioaldiak iraun bitartean.

10.-Errekurtsoak.

Epaimahaiaren egintzen eta ebazpenen kontra gora jotzeko errekurtsoa jartzen ahalko da, Nafarroako Administrazio Publikoaren Institutuko zuzendari kudeatzaileari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdiaren, oinarrien eta horiek aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, errekurtsoaren xede den egintza argitaratu edo jakinarazi eta biharamunetik hasita hilabeteko epean.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluan eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluetan xedatutakoari jarraikiz.

Iruñean, 2010eko martxoaren 31n.-Nafarroako Administrazio Publikoaren Institutuko zuzendari kudeatzailea, Gregorio Eguilaz Gogorza.

I. ERANSKINA

Hautaprobetan onartua izateko eskabidea

Deialdiaren datuak:

Sartzeko txanda:

Datu pertsonalak:

Aurkeztutako agiriak:

Ondoko hauen proba eskatzen du:

Sinatzaileak ESKAERA egiten du eskabide honetan adierazitako prozesuan onartua izan dadin eta ADIERAZTEN DU, erantzukizuna berea izanik, bertan agertzen diren datu guztiak egiazkoak direla, eta deialdiaren oinarrian eskatutako betebehar guztiak betetzen dituela, eta datu horiek guztiak agirien bidez frogatzeko konpromisoa hartzen duela.

(Sinadura)

.........(e)n, 20....(e)ko ......aren ....(e)an.

NAFARROAKO ADMINISTRAZIO PUBLIKOAREN INSTITUTUKO ZUZENDARI KUDEATZAILEA.

LEHENDAKARITZA, JUSTIZIA ETA BARNE DEPARTAMENTUA.

(*) Deialdiaren oinarrietan xedatutakoari jarraikiz.

II. ERANSKINA

Gai zerrenda

I. zatia.-Araudi orokorra eta ingurumen arlokoa

1. gaia.-Espainiako 1978ko Konstituzioa: printzipio orokorrak. Oinarrizko eskubide eta betebeharrak. Botere Judiziala. Koroa. Gorte Nagusiak. Gobernua eta Estatuko Administrazioa.

2. gaia.-Europar Batasuna. Parlamentua. Kontseilu Europarra. Europako Batzordea. Kontseilua (ministroena). Justizia Auzitegia. Beste erakunde batzuk.

3. gaia.-Europar Batasuneko antolamendu juridikoaren iturriak: jatorrizko zuzenbidea eta zuzenbide eratorria.

4. gaia.-Nafarroako Foru Eraentza Berrezarri eta Hobetzeari buruzko Lege Organikoa: izaera eta esanahia. Atariko titulua.

5. gaia.-Nafarroako Parlamentua edo Gorteak. Nafarroako Comptos Ganbera. Arartekoa.

6. gaia.-Nafarroako Gobernua: eginkizunak. Osaera, izendapena, eratzea eta kargu-uztea. Eskumenak. Funtzionamendua. Nafarroako Gobernuko lehendakaria: eginkizunak.

7. gaia.-Nafarroako Foru Komunitateko Administrazioa. Nafarroako Foru Komunitateko Administrazioari buruzko abenduaren 3ko 15/2004 Foru Legean ezarritako printzipio orokorrak. Herritarren eskubideak Nafarroako Foru Komunitateko Administrazioarekiko harremanetan.

8. gaia.-Administrazioaren xedapenak eta egintzak. Egintza administratiboen betebeharrak. Egintzen eraginkortasuna. Deuseztasuna eta deusezgarritasuna.

9. gaia.-Prozedura administratiboen xedapen orokorrak: prozeduraren abiaraztea, antolamendua, instrukzioa eta amaiera. Bide administratiboko egintzen berrikuspena: ofiziozko berrikuspena eta administrazio errekurtsoak.

10. gaia.-Nafarroako Administrazio Publikoen Zerbitzuko Langileen Estatutua. Langile motak. Funtzionario publikoak hautatzea. Administrazio egoerak. Funtzionarioen eskubideak, betebeharrak eta bateraezintasunak. Ordainsariak.

11. gaia.-Nafarroako Lurraldearen Antolamenduari eta Hirigintzari buruzko abenduaren 20ko 35/2002 Foru Legea: lurzoru urbanizaezinaren araubidea.

12. gaia.-2/1993 Foru Legea, martxoaren 5ekoa, Basa Fauna eta Haren Habitatak Babestu eta Kudeatzeari buruzkoa: egitura eta sistematika.

13. gaia.-Nafarroako Naturguneei buruzko ekainaren 17ko 9/1996 Foru Legea. Egitura eta sistematika. Legezkotasunaren babesa naturguneetan.

14. gaia.-Nafarroako Oihan Ondarea Babestu eta Garatzeari buruzko abenduaren 31ko 13/1990 Foru Legea. Egitura eta sistematika. Mendiak zaindu, babestu eta aprobetxatzea. Zehapenen araubidea.

15. gaia.-Nafarroako Ehizari eta Arrantzari buruzko abenduaren 22ko 17/2005 Foru Legea. Egitura eta sistematika. Zehapenen araubidea.

16. gaia.-4/2005 Foru Legea, martxoaren 22koa, Ingurumena Babesteko Esku-hartzeari buruzkoa. Egitura eta sistematika. Zehapenen araubidea.

II. zatia.-Natur ingurunea. Zainketa eta lehengoratzea

1. gaia.-Natur ingurunea. Ekologiaren terminologia eta oinarrizko kontzeptuak. Sistema naturalak. Ekosistemen egitura, osaera eta funtzionamendua. Oreka ekologikoa.

2. gaia.-Naturgune baten eta haren ekosistemen azterketa. Eskualde ekologikoak. Formazio naturalen eta ekosistemen sailkapena eta motak. Formazio edo ekosistema nagusiak: garrantzia eta banaketa, ingurune fisikoa, landaretza eta flora, fauna, erabilerak eta aprobetxamenduak, zainketa.

3. gaia.-Biodibertsitatea zaintzea. Dibertsitate biologikoaren kontzeptua eta oinarriak. Produkzioa eta erabilera iraunkorra. Garapen iraunkorra. Zainketarako estrategia eta tresnak. Ingurumenaren integrazioa.

4. gaia.-Lurraldearen eta baliabideen plangintza eta antolamendua. Lurzoruaren eta lurraldearen sailkapena. Plangintzarako eta antolamendurako eskumenak eta tresnak. Baliabide naturalak antolatzeko planak.

5. gaia.-Naturgune babestuak. Oinarriak, xedeak eta joerak. Motak, ezaugarriak (erreserbak, parkeak, jostetaguneak, etab.). Hautapenerako irizpideak. Deklarazioa. Europaren, estatuaren eta autonomiaren mailako sareak. Kudeaketa. Erabilerako eta kudeaketako plan zuzentzaileak. Korridore biologikoak.

6. gaia.-Natur ingurunea lehengoratzea. Aldaketak edo nahasketak jotako naturgune baten azterketa. Lehengoratze teknikak.

7. gaia.-Flora eta fauna zaintzea. Espezie katalogatuak. Biologia, katalogatutako animalia eta landare espezieen banaketa. Berreskuratzeko planak. Habitataren babesa. Babes eremuak. Flora eta landaretza zaintzea. Fauna kudeatzeko teknikak: behaketa, jarraipena, populazioen kalkulua, patologiak, berreskuratzea, berriro sartzea. Laginak hartzea.

8. gaia.-Nafarroako ugaldeetako eremu ekologikoak eta arrainen eremuak. Landaretza eta fauna. Ugaldeetako ekosistemen eta ingurukoen ezaugarriak. Zaintzeko dauden arazoak. Neurri zuzentzaileak. Ur-emari ekologikoak.

9. gaia.-Nafarroako arrainak eta karramarroak: biologia, banaketa, ekologia, zainketa.

10. gaia.-Nafarroako anfibioak eta narrastiak: biologia, banaketa, ekologia eta zainketa.

11. gaia.-Falkoniforme eta estrigiforme habiagileak Nafarroan: banaketa, egungo egoera, eremu garrantzitsuenak, zaintzeko arazoak.

12. gaia.-Basoilarra, basoiloa, basoilo txikia, atalarra, ganga azpizuria, ganga azpibeltza eta uretako hegaztiak Nafarroan. Banaketa, egungo egoera, eremu garrantzitsuenak, zaintzeko arazoak.

13. gaia.-Nafarroako ugaztun ungulatuak. Banaketa, egungo egoera, eremu garrantzitsuenak, zaintzeko arazoak.

III. zatia.-Oihan-kudeaketa. Basoen babesa

1. gaia.-Nafarroako pinudi autoktonoak. Ezaugarriak. Ekologia eta banaketa. Bertan gehien dagoen flora eta fauna. Pinus sylvestris, Pinus uncinata eta Pinus halepensis espezieen ezaugarri botaniko eta kulturalak. Dituzten gaitzak eta izurriak.

2. gaia.-Nafarroako pagadiak. Ezaugarriak. Ekologia eta banaketa. Bertan gehien dagoen flora eta fauna. Fagus sylvatica espeziearen ezaugarri botaniko eta kulturalak. Dituzten gaitzak eta izurriak.

3. gaia.-Nafarroako hariztiak, erkameztiak, karraskadiak eta artadiak. Ekologia eta banaketa. Bertan gehien dagoen flora eta fauna. Quercus robur, Quercus petraea, Quercus humilis, Quercus faginea eta Quercus ilex espezieen ezaugarri botaniko eta kulturalak. Dituzten gaitzak eta izurriak.

4. gaia.-Espezie hauen eskakizun ekologikoak eta ezaugarri botaniko eta kulturalak: Abies alba, Castanea sativa, Betula alba, Juglans regia, Fraxinus excelsior, Prunus avium eta Populus. Dituzten gaitzak eta izurriak.

5. gaia.-Espezie hauen eskakizun ekologikoak eta ezaugarri botaniko eta kulturalak: Robinia pseudoacacia, Quercus rubra, Pinus nigra austriaca, Pinus nigra corsicana, Pseudotsuga menziesii, Pinus radiata eta Picea abies. Dituzten gaitzak eta izurriak.

6. gaia.-Oihangintza. Zuhaiztien forma nagusiak. Zuhaiztien egitura: definizioa eta motak. Zuhaizti nagusia eta osagarria. Txandaren, birsortzeko aldiaren, heldutasunaren eta mozteko diametroaren kontzeptuak. Adin naturalaren eta artifizialaren motak. Eremu basimetrikoaren kontzeptua.

7. gaia.-Oihangintza. Etengabeko motzaldiak: behin edo bi alditan egindako motzaldiak, elkarren segidako bakanketa uniformeen bidezko motzaldiak. Abantailak eta arazoak. Zein espezieri aplikatzen zaizkien.

8. gaia.-Oihangintza. Motzaldi erdi-etenak: arboladi txikiak eta zerrendak uzten dituztenak. Motzaldi etenak: entresaka. Abantailak eta arazoak. Zein espezieri aplikatzen zaizkien.

9. gaia.-Oihangintza. Bakantzea: definizioa, motak eta xedeak. Bakantzeetako pisua, intentsitatea eta errotazioa. Kimaketak. Zuhaitzak seinalatu, taldea egin eta motzaldirako markatze eta begiratze lanak egitea.

10. gaia.-Mendien antolamendua. Kontzeptua eta helburuak. Mendiek ematen dituzten erabilerak. Antolamendu proiektuak: inbentarioaldia eta plangintzaldia. Mendiak antolatzeko metodoak.

11. gaia.-Dasometria. Zuhaitzaren neurketak zutik dagoela eta bota ondokoak. Zutik dauden zuhaitzen kubikazioa. Koefiziente morfikoa. Kubikazio taulak. Botatako zuhaitzen kubikazioa. Zuhaitz baten adina zehaztea. Eremu basimetrikoa. Batez besteko hazkundearen, hazkunde arruntaren eta Pressler-en hazkundearen kontzeptua.

12. gaia.-Oihana inbentariatzea. Zerrenda osoaren araberako inbentarioa. Lagin estatistikoaren araberako inbentarioa. Ereduko zuhaitza: hautaketa eta bildu beharreko datuak, kubikazio taulak eta produkzio taulak.

13. gaia.-Oihantzea eta lehengoratze hidrologikoa eta oihanaren arlokoa. Lurra prestatzea. Ereinketa eta landaketa. Zuzenketa hidrologikoaren lanak eta eginbeharrak. Landaregaia. Erabiltzen diren espezieak. Erabiltzen diren makineria, tresnak eta baliabideak.

14. gaia.-Baso suteak. Prebentzioa eta itzalketa. Natur ingurunea antolatzea sua zabaltzea zaila izan dadin. Sua ebakitzeko eremuak eta zerrendak. Zaintzarako postuak eta sareak. Oihaneko suteak itzaltzeko ekipoen koordinazioa. Kalteen balorazioa.

15. gaia.-Oihaneko gaien aprobetxamendua antolatu eta planifikatzea. Erabiltzen diren tresnak, makineria, ekipoak eta materialak. Oihaneko gaien aprobetxamendu lanetan gerta daitezkeen ingurumenaren gaineko eragina eta kalte ekologikoak.

16. gaia.-Ehiza espezieak. Ehiza debekualdiei buruzko xedapen orokorra.

17. gaia.-Ur kontinentaletako arrantza espezieak. Arrantza debekualdiei buruzko xedapen orokorra.

18. gaia.-Ehiza eta arrantza espezieen populazioak. Populazioen errolda eta jarraipena. Ehiza eta arrantza espezieek erangidako kalteak. Gaitzak, harrapariak eta lehiatzaileak.

19. gaia.-Ehiza antolatzeko planak. Populazioen erabilera eta kudeaketa. Habitata babestu eta zaintzea. Hobekuntza teknikak. Kalteen prebentzioa. Lanak programatu, antolatu, segurtasunez egin eta kontrolatzea.

20. gaia.-Arrain haztegiak. Birpopulatzeko eta ustiatzeko piszikultura. Salmonidoen haztegiak. Arrain birpopulazioak. Ehizagaien haztegiak: mendi eperren eta untxien haztegiak. Ehiza espezieen birpopulatzea barruti intentsiboetan.

Oharra: gai guztiak bat etorriko dira deialdi hau Nafarroako Aldizkari Ofizialean argitaratzen den egunean indarra duen legeriarekin.

III. ERANSKINA

Proba fisikoak

1.-Erresistentzia proba: Course Navette-ren testa.

Izangaiek laster egin beharko dute, joan eta etorri, 20 metroko bide puska batean, magnetofoi bateko seinaleen bidez agintzen zaien erritmoan.

Izangaiek, seinalea entzutean, ibilbidearen bi muturrak seinalatzen dituzten marrak zapaldu beharko dituzte, lehenik bat eta gero bestea. Buelta emanen da oin baten gainean bermatuz eta marra zapalduz. Zintak soinua emanen du tarte erregularren arabera; probaren hasieran abiadura motela izanen da, baina gero eta azkarragoa bilakatuko da.

Testaren xedea da magnetofoiak markatzen duen erritmoari eustea.

Ondokoak izanen dira izangaiak kanporatzeko arrazoiak:

a) Izangaia gelditzea.

b) Izangaia bere kaletik ateratzea.

c) Izangaiak ibilbide bat bukatzeko haren muturreko marra ez zapaltzea.

d) Seinale akustikoa entzutean marra ez zapaltzea hiru aldiz jarraian (seinalea entzuten denean, marratik metro bateko tartea onartuko da).

Kalifikazioa: bide puska zenbat aldiz egiten den kontuan harturik kalifikatzen da.

Gizonezkoak: 8 baino gutxiago. Emakumezkoak: 7 baino gutxiago. Kalifikazioa: ez gai.

Gizonezkoak: 8 edo gehiago. Emakumezkoak: 7 edo gehiago. Kalifikazioa: gai.

2.-Bi besoetako indarraren testa.

Abiatzeko jarrera: barratik zintzilik egonen da izangaia, besoak flexionatuta, esku ahurrak gibelera begira, zangoak luze-luze eta oinak lurra ukitzen ez dutela. Soina ez da mugitu behar. Kokotsa barraren gainetik, barra eta eskuak ukitzeke.

Nola egin: helburua da hasierako posizioari eustea eskatutako denboran, gutxienez. Kronometroa martxan jarriko da izangaia hasierako posizioan modu egokian jarri bezain laster.

Ondokoak izanen dira izangaiak kanporatzeko arrazoiak:

a) Izangaiak barra zein eskuak kokotsarekin ukitu edo kokotsa barra baino beherago jaistea.

b) Izangaiak zangoak flexionatzea.

c) Izangaiak gorputza kulunkatzea.

Kalifikazioa: proba bukatutzat ematen den arte, izangai bakoitza hasierako posizioan egondako denboraren eta ondoko eskalaren arabera:

Gizonezkoak: 30" baino gutxiago. Emakumezkoak: 20" baino gutxiago. Kalifikazioa: ez gai.

Gizonezkoak: 30" edo gehiago. Emakumezkoak: 20" edo gehiago. Kalifikazioa: gai.

Denbora neurtuko da hamarrenak kontuan hartu gabe.

3. Uretan aritzeko gaitasunari buruzko testa.

Abiatzeko jarrera: zutik, igerilekuaren kanpo-ertzean. Ezin izanen da erabili urpean igeri egiteko betaurrekorik, ezta beste baliabiderik ere, baina bai igeri egiteko betaurrekoak.

Nola egin: ateratzeko seinalea entzun ondoan, izangaia uretan murgildu eta 50 metro eginen ditu igerian, ur azalean nahiz urpean, ahalik eta denbora laburrenean. Irteeratik 10 metrora urpean eginen du igeri, bi metro, horretarako propio jarritako tartean, eta gero kontrako paretaraino segituko du, han buelta eman eta irteerara itzuliko da. Arestian aipatu tartera iristean berriz ere urpean eginen ditu bi metro, eta paretaraino segituko du gero.

Ez da onartzen eta baztertzeko arrazoia izanen da:

a) Kortxoei edo igerilekuaren ertzei heltzea.

b) Igerilekuaren hondoan bultzada hartzea.

c) Kalez aldatzea.

d) Urpean igeri egiteko eremuan burua ur gainera ateratzea.

Kanporatuak geldituko dira, halaber, baliorik gabeko bi irteera egiten dituztenak (ateratzeko seinalea eman baino lehen).

Puntuazioa: erabilitako denboraren arabera, eskala honi atxikiz:

Gizonezkoak: 1' baino gehiago. Emakumezkoak: 1'03'' baino gehiago. Ez gai.

Gizonezkoak: 1' edo gutxiago. Emakumezkoak: 1'03'' edo gutxiago. Gai.

Denbora neurtuko da ehunenak kontuan hartu gabe.

4. Oreka haga batean mugitzea.

Deskribapena: hiru oreka hagatan mugitzea. Hagak atletismoko oztopoen probetakoak dira: 4 bat metro luze, 0,12 metro zabal eta lurretik 0,90 metrora. Hagek Z baten itxura hartuko dute.

Nola egin: joan-etorriko ibilbide osoa zutik eginen da hagetan zehar, ibiliz edo korrika. Sarrera haga muturretik egin behar da eta ibilbideak, gehienez ere, 25 segundu iraunen du.

Ez da onartzen eta baztertzeko arrazoia izanen da:

a) Oinak ez beste gorputz atal bat erabiltzea.

b) Hiru hagen muturretan paratutako markak ez zanpatzea.

c) Ibilbidea 25 segundu baino denbora gutxiagotan ez egitea.

Bi saio egiten ahal dira, gehienez ere.

Iragarkiaren kodea: F1005959