I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
80/2009 FORU AGINDUA, martxoaren 3koa, Familia, Gazteria, Kirol eta Gizarte Gaietako kontseilariak emana, kontsumitzaile eta erabiltzaileen elkarteei diru-laguntzak emateko 2009ko deialdia onesten duena.
Kontsumitzaileak eta Erabiltzaileak Babesteari buruzko ekainaren 20ko 7/2006 Foru Legeak hauxe xedatzen du 21. artikuluan: "Legez eratutako kontsumitzaile elkarteek kontsumitzaileen interesak defendatzea izanen dute helburu. Haien onura publikoa deklaratu ahal izanen da eta onesten diren laguntza publikoak eman ahal izanen zaizkie beren xedeak betetzeko. Halaber, kontsumoko arbitraje sisteman parte hartu ahal izanen dute."
Kontsumitzaile elkarteek Nafarroako kontsumitzaile eta erabiltzaileen eskubideei buruz informatu, prestatu eta babesteko burutzen dituzten jarduerak errazteko, 2009rako diru-laguntzen deialdia onetsi da, helburu horretarako Nafarroako Aurrekontu Orokorretan aipatzen den kontu-sailaren kargura.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen eta Familia, Gazteria, Kirol eta Gizarte Gaietako Departamentuaren egitura organikoa ezartzen duen irailaren 3ko 125/2007 Foru Dekretuaren bidez eskuratu ditudan eskudantzien arabera,
AGINDU DUT:
1. Kontsumitzaile eta erabiltzaileen elkarteei diru-laguntzak emateko 2009ko deialdia onestea. Oinarri arautzaileak ebazpen honen eranskinean ageri dira.
2. Foru agindu honen ondoriozko konpromisoei aurre egiteko 177.506 euroko gastua onestea, 2009ko gastuen aurrekontuetako 951001 92410 4819 492300 kontu-sailaren kargura.
3. Foru agindu hau eta eranskina Nafarroako Aldizkari Ofizialean argitaratzea.
4. Foru agindu hau Idazkaritza Tekniko Nagusiko Aurrekontuen Kudeaketarako Atalera eta Familiaren, Haurraren eta Kontsumoaren Zuzendaritza Nagusiko Kontsumo Zerbitzura igortzea, behar diren ondorioak izan ditzan.
Iruñean, 2009ko martxoaren 3an.-Familia, Gazteria, Kirol eta Gizarte Gaietako kontseilaria, María Isabel García Malo.
ERANSKINA
Nafarroako kontsumitzaile eta erabiltzaileen elkarteei diru-laguntzak emateko 2009ko deialdiaren oinarri arautzaileak
1. oinarria. Deialdiaren xedea.
Deialdiaren xedea da kontsumitzaile eta erabiltzaileen elkarteei 2009an diru-laguntzak emateko araubidea ezartzea, haien eginkizunak betetzeko.
2. oinarria. Modalitateak.
1. Deialdiaren ondorioetarako, diruz lagundutako proiektuetan modalitate hauek ezartzen dira:
a) Kontsumitzaile eta erabiltzaileen elkarteen funtzionamenduarekin eta langile teknikoekin lotutako gastuak.
b) Kontsumitzailearen babesarekin lotutako programak garatzea.
2. Bi diru-laguntza modalitate horiek elkarren osagarri eta bateragarriak dira.
3. oinarria. Diru-laguntza har dezaketen gastuak eta diru-zenbatekoa.
1. Aurreko oinarrian aipatzen den a) modalitateari dagokionez, gastu hauek diruz laguntzen ahalko dira:
a) Kontsumitzaileak eta erabiltzaileak babesteko jarduera garatzeko behar diren funtzionamendu gastuak, hala nola honako hauek:
-Jarduera garatzeko egoitza edo bulegoen -jendeari irekiak daudenak- alokairua, komunitate gastuak eta tributuak.
-Egoitza edo bulegoetako ur, argindar eta gas gastuak.
-Telefoniako eta Interneteko gastuak (gehienez ere 150 euro hilean).
-Bulegoko materialen gastuak eta informatikako suntsigarrienak.
-Banku eta finantzaketa gastuak.
b) Diruz lagundutako jardueran lan egiten duten elkarteko langileen kostuak: soldatak eta Gizarte Segurantzarekiko kotizazio gastuak.
c) Jarduerarako kontratatutako kanpo aholkulariekin, baita aholkulari juridikoekin ere, lotutako gastuak.
d) Diru-laguntzaren zenbatekoak ez du diruz laguntzen ahal diren gastuen %80 gaindituko. Elkarteak bere funtsekin estaliko du diruz lagundu ez den zenbatekoa.
e) Elkarte batek kontsumitzaileentzako argibideetarako udal bulego baten ardura esleitua baldin badu, haren gastuak deialditik kanpo gelditzen dira, bai eta erakundeei egiten dizkien zerbitzu ordainduak ere.
f) Deialditik kanpo gelditzen dira, halaber, aktibo finko materialetan eginiko inbertsioen ondoriozko gastuak.
2. Aurreko oinarrian aipatzen den b) modalitateari dagokionez, kontsumitzaileak eta erabiltzaileak babesteko egiten diren jarduera espezifiko hauen ondoriozko defizitari dagozkion gastuak diruz laguntzen ahalko dira:
a) Eduki nagusia kontsumo arloa duten aldizkari, liburuxka, argitalpen edo bestelako materialak argitaratzea.
b) Kontsumo gaiei buruzko azterlan berariazkoak egitea, gero argitaratzen badira edo zabalkunde irekia ematen bazaie.
c) Kontsumitzaile eta erabiltzaileak informatu eta prestatzeko jardunaldiak, ikastaroak, mintzaldiak edo beste edozein jarduera antolatzea.
d) Komunikabideetan esku-hartzea, jarduera espezifikoei dagokienez.
e) Erakunde, topagune eta abarretan kontsumitzaile eta erabiltzaileen izenean parte hartzeko gastuak, ordainsaririk ez bada. Urtean 3.000 euro gehienez.
4. oinarria. Onuradun izateko baldintzak.
Kontsumitzaile eta erabiltzaileen elkarteek Diru-laguntzei buruzko azaroaren 9ko 11/2005 Foru Legearen 13. artikuluan aipatzen diren orotariko betebeharrez gain, honako hauek ere bete beharko dituzte:
a) Legez eratuak eta inskribatuak egotea Nafarroako Kontsumitzaile eta Erabiltzaileen Elkarteen Erregistroan, diru-laguntza eskaera aurkezteko epea amaitzen den egunean.
b) Jendeari arreta egiteko bulegoa izatea. Bulegoa egunero egonen da zabalik, asteburu, jaiegun eta arauzko oporraldietan izan ezik.
c) Irabazi-asmorik ez izatea.
5. oinarria. Baldintzak frogatzeko modua eta noiz arte bete behar diren.
1. Diru-laguntzei buruzko Foru Legearen 13. artikuluan onuradun izateko adierazita dauden debekuetatik bat ere ez dutela frogatzeko, eskatzaileek "erantzukizuneko aitorpena" egin beharko dute, deusetan galarazi gabe administrazioak aurkezten diren aitorpenak edo justifikazioak egiazkoak ote diren ikertzeko duen ahalmena.
2. Aurreko oinarrian adierazitako berariazko baldintzak egiaztatzeko, elkarteko idazkariaren edo, bestela, buruaren ziurtagiria aurkeztu beharko da.
3. Baldintza horiek 2009. urte osoan bete beharko dira.
6. oinarria. Eskabideak eta agiriak aurkeztea.
1. Eskaerak elkarteburuak izenpetu beharko ditu, eta horiek aurkezteko epea 15 egun naturalekoa izanen da, deialdia Nafarroako Aldizkari Ofizialean argitaratu eta biharamunetik hasita.
2. Eskaerak Familia, Gazteria, Kirol eta Gizarte Gaietako Departamentuko erregistroan (González Tablas kalea, zk.g., Iruña) edo Herri Administrazioen Araubide Juridikoari eta Administrazio Prozedura Erkideari buruzko 38.4 artikuluan ezarritako tokietakoren batean aurkezten ahalko dira.
Agiriak posta bulego batean aurkezten badira, gutun-azal ireki batean egin beharko da, lehenengo orriko goiko aldean bulegoaren izena, eguna, tokia eta ordua (minutu eta guzti) adierazi ahal izateko. Datu horiek guztiak gordekinean ere azaldu beharko dira.
3. Eskabidearekin batera honako agiri hauek aurkeztu behar dira:
a) Diru-laguntzei buruzko Foru Legearen 13. artikuluan onuradun izateko adierazitako edozein debekutan sarturik ez dagoela frogatzen duen agiria.
b) Elkarteko idazkariaren ziurtagiria, edo, bestela, buruarena, datu hauek azaltzen dituena:
-Zuzendaritza batzordeak laguntza eskatzeko hartutako erabakia.
-Deialdiaren 4. oinarrian ezartzen diren baldintzak betetzen dituela.
-Elkartearen bulegoen zerrenda, posta helbidea, jendearentzako orduak eta haien ardura duten pertsonen identifikazioa.
-Elkartean diru-laguntza zein jardueratarako eskatzen den, jarduera horietan lan egiten duten eta horietaz arduratzen diren pertsonen izenen zerrenda.
Zerrendan kontratu mota, lanbide kategoria eta lanaldia adierazi beharko dira. Ekartean egiten den lanaldia %100 ez bada, deialdian diruz laguntzen diren jardueretan benetan egiten den lan portzentajea adierazi beharko da.
c) 2008ko abenduaren 31ko egoeraren balantzea, urte horretako galera eta irabazien kontua, 2009rako aurrekontua, 2008ko galera eta irabazien kontuan adierazi bezala sailkatua.
Bai 2008ko aurrekontuko bai 2009rako aurreikusitako aurrekontuko diru-sarrerak honelaxe bananduko dira: bazkideen kuotak, erakundeei egindako zerbitzuengatik jasotako dirua, Nafarroako Gobernuaren diru-laguntza, bestelako diru-laguntzak edo dohaintzak eta abar. 2008ko aurrekontuko nahiz 2009rako aurreikusitako aurrekontuko gastuen banantzea diru-laguntza jaso dezaketen gastuen araberakoa izanen da.
d) Elkartean diru-laguntza zein jardueratarako eskatzen den, jarduera horietan lan egiten duten langileen kontratuak, nominak eta Gizarte Segurantzarekiko kotizazio buletina.
e) Zerga eginbeharrak eta Gizarte Segurantzarekikoak eguneratuak izatea, eskaera aurkezten denean.
7. oinarria. Diru-laguntza emateko irizpide objektiboak.
1. Diru-laguntzak banatzeko erabiliko diren irizpideak hauexek dira:
a) Bazkide kopurua, Elkarteen Erregistroko datu eguneratuen araberakoa izanen dena, 80 puntuz ponderatuko da gehienez.
b) Elkartearen bulegoetan jendeari arreta egiten emandako benetako denbora (orduak/urtea) 20 puntuz ponderatuko da gehienez.
2. Diru-laguntzak emateko prozedura norgehiagokako araubidearen bidez tramitatuko da. Hala ere, aurrekontuetako dirua aski ez bada, diru-laguntzaren gehieneko zenbateko osoa onuradunen artean hainbanatuko da.
8. oinarria. Ebazteko organo eskudunak eta gehieneko epeak.
1. Batzorde batek baloratuko ditu aurkezten diren eskaerak. Batzorde horrek kide hauek izanen ditu:
-Kontsumo Zerbitzuko zuzendaria.
-Kontsumo Ataleko burua.
-Familiaren, Haurraren eta Kontsumoaren zuzendari nagusiak izendatutako teknikari bat.
Instrukzio organoak bereziki begiratuko du eskatzaileak deialdian eskatzen diren agiriak aurkeztu dituztela eta unitate organiko horrek antolatu eta instruitzeko eginiko prozedura eta balorazioa harekin bat datorrela.
2. Batzorde horrek organo eskudunari ebazpen proposamena igorriko dio, non adieraziko baita onuradunek diru-laguntza lortzeko betebehar guztiak betetzen dituztela.
3. Familiaren, Haurraren eta Kontsumoaren zuzendari nagusiak du deialdia ebazteko eskumena.
4. Gehieneko epea eskaerak aurkezteko epea amaitu eta bi hilabetekoa da. Epe horretan ez bada ebazpen espresurik aurkeztu, eskaera ezetsitzat joko da.
5. Aurkeztutako eskaeraren berariazko edo ustezko ezespenaren aurka interesdunek zilegi izanen dute gora jotzeko errekurtsoa jartzea, Familia, Gazteria, Kirol eta Gizarte Gaietako kontseilariari zuzendua, administrazio prozedura erkideari buruzko legeriari jarraikiz.
9. oinarria. Onuradunek bete beharrekoak eta ez-betetzearen ondorioak.
1. Diru-laguntza jasoko duten kontsumitzaile eta erabiltzaileen elkarteek betebehar hauek izanen dituzte:
a) Kontsumitzaileei eta erabiltzaileei informazio orokorra eta oinarrizkoa ematea beren eskubideez eta eskubide horiek defendatzeko moduaz.
b) Familia, Gazteria, Kirol eta Gizarte Gaietako Departamentuarekin elkarlanean aritzea, kontsumitzaileak eta erabiltzaileak babesteko ekintzetan. Bereziki, argitaratzen duten eta diruz laguntzen diren argitalpen, esku-orri edo argibide guztien hiru ale gutxienez bidali beharko dituzte departamentu horretara.
c) Emandako diru-laguntzen jarraipena eta kontrola behar bezala egiteko beharrezkotzat jotzen diren datuak, dokumentazioa eta frogagiriak bidaltzea departamentu horretara.
d) Programen, jardueren, inbertsioen edo jarduketen finantzaketa publikoa dela aski den moduan iragartzea.
e) Oinarrietan aipatutako frogagiriak Kontsumo Zerbitzura igortzea.
f) Lagundutako jarduera finantzatzeko eskatutako edo lortutako beste laguntza, diru-laguntza, diru-sarrera edo baliabideen berri ematea diru-laguntza eman duen organoari. Egoera hori jakin bezain laster jakinarazi behar da eta, betiere, jasotako dirua zertan erabili den justifikatu baino lehen.
2. Halaber, onuradunek Diru-laguntzei buruzko Foru Legearen 9. artikuluan ezarritako baldintza orokorrak bete beharko dituzte.
3. Diru-laguntza emateko ebazpenean, oinarriotan edo Diru-laguntzei buruzko Foru Legean ezarritako betebeharrak osorik bete ezik, onartutako diru-laguntza kobratzeko eskubidea galduko da edo diru hori itzuli egin beharko da, foru lege horren 35. artikuluan xedatutakoarekin bat.
Halaber, aurreko betebeharrak hein batean bete ezik, emandako diru-laguntzaren zenbatekoa berriro ere zehaztuko da, proportzionaltasun printzipioari jarraikiz edo, hala badagokio, dagokion zenbatekoa itzuliko.
10. oinarria. Onuradunek eginiko gastuak eta ordainketak justifikatu beharra.
1. Hala gastuak nola ordainketak 2009. urtea bukatu baino lehen egin beharko dira.
2. Gastuen eta haien ordainketen frogagiriak jatorrizkoak edo administrazioak konpultsaturiko fotokopiak izanen dira eta betebehar hauek bete beharko dituzte:
Diru-laguntza zein kontzepturengatik eman zen, haien arabera taldekatuta aurkeztuko dira, bakoitzak bere zenbakia duela. Gainera, kontzeptu bakoitzeko agirien zerrenda bat erantsiko da, non azalduko baitira emandako zenbaki korrelatiboa, hornitzailea, agirian ageri den kontzeptua, diru-zenbatekoa eta ordainketaren eguna.
Gastuak justifikatzeko, fakturak erabiliko dira, baldin eta legeak haiek ematera behartzen badu, baita haien ordainagiriak ere, hala nola gordekinak eta bankuko letrak eta karguak.
Langileen gastuak justifikatzeko, nominak eta Gizarte Segurantzarekiko kotizazio orriak aurkeztuko dira.
Fakturak edo nominak ez diren frogagirietan argi eta garbi azalduko da zer ordaintzen den, hartzailea nor den, IFZ edo IFK barne, dagozkien atxikimendu fiskalak eta, behar baldin bada, BEZa.
11. oinarria. Diru-laguntza justifikatu eta ordaintzeko epeak.
1. Lehen lauhilekoan pagaturiko gastuei dagozkien frogagiriak 2009ko maiatzaren 15eko 14:30 baino lehen aurkeztuko dira, eta apirilaren 30era bitarte eginiko jardueren memoria, egun hori barne, gehituko da.
Aurkezturiko agiriak aztertu ondoren, pagatzeko ebazpena emanen da.
2. Bigarren eta azken ordainketa, bigarren aldian, hots, 2009ko abenduaren maiatza bitarte, pagaturiko gastuei dagokiena, aurkezturiko agiriak aztertu ondoren eginen da.
Bigarren aldian pagaturiko gastuei dagozkien frogagiriak 2009ko abenduaren 4ko 14:30 baino lehen aurkeztuko dira, eta aldi horretan eginiko jardueren memoria gehituko da.
12. oinarria. Diru-laguntzaren bateragarritasuna.
1. Deialdiaren xede den diru-laguntza bateragarria izanen da helburu berarako emandako beste laguntza batzuekin, indarra duen araudiak ezartzen duenarekin bat.
2. Aurrekoa galarazi gabe, bestelako diru-laguntzak jaso ondoren, diru-laguntzak emateko deialdiaren xede diren jarduera eta gastuen kostua gainditzen bada, soberakina Nafarroako Foru Komunitateko Administrazioari itzuli beharko zaio.
13. oinarria. Hornitzaileen kontratazioa.
1. Diru-laguntzei buruzko Foru Legearen 28. artikuluko 3. idatz-zatian xedaturikoarekin bat, ekipamendu ondasunak edo zerbitzuak aholkularitza edo laguntza enpresek ematen dituztenean, diruz laguntzen ahal den gastuaren zenbatekoa 12.000,00 euro baino handiagoa bada, onuradunak frogatu beharko du organo emailearen aurrean hornitzailea eragimen eta ekonomia irizpideei jarraituz hautatu dela.
Kasu horietan, entitate onuradunak helburua lortzeko gai diren hiru enpresarekin edo gehiagorekin kontsultatu eta negoziatu beharko ditu kontratuaren baldintzak, eta eskaintzarik hoberena egiten duenarekin izenpetuko du. Entitate onuradunak kontsultatzeko izapidearen gaineko dokumentazioa eta eskaintzak gorde beharko ditu. Kontu horiek agirien bidez frogatu beharko ditu, diru-laguntza ematen duen organoaren aurrean, kontratua izenpetu bezain laster. Agiri horiekin batera, enpresa hautatzeko arrazoiei buruzko txosten labur bat aurkeztuko da.
2. Zenbait enpresari kontsulta egitea ez da beharrezkoa izanen, diru-laguntzaren xede diren gastuen ezaugarrien berezitasunagatik, merkatuan hornidura edo zerbitzua ematen duten enpresak behar adina ez direnean.
14. oinarria. Administrazio errekurtsoak.
1. Deialdi honen eta oinarri arautzaileen aurka gora jotzeko errekurtsoa jartzen ahal da, Nafarroako Gobernuari zuzendua, hilabeteko epean, Nafarroako Aldizkari Ofizialean argitaratu eta biharamunetik hasita.
2. Deialdi hau aplikatzeko egintzen kontra gora jotzeko errekurtsoa aurkezten ahalko da, Familia, Gazteria, Kirol eta Gizarte Gaietako kontseilariari zuzendua, jakinarazten denetik hilabeteko epean.
15. oinarria. Emandako diru-laguntzen publizitatea.
Diru-laguntzei buruzko Foru Legearen 15. artikuluan xedatutakoarekin bat, Kontsumo Zerbitzuak jendaurrean paratuko ditu emandako diru-laguntzak, eta bertan azalduko dira deialdia, aurrekontuko zein programari eta kredituri egotzi zaizkien, onuraduna, zenbatekoa eta diru-laguntzaren helburua.
16. oinarria. Ordezko arautegia.
Deialdi honetan ezarrita ez dagoen guztian Diru-laguntzei buruzko azaroaren 9ko 11/2005 Foru Legean xedatutakoari jarraituko zaio.
Iragarkiaren kodea: F0914427
