Iragarkia

51. ALDIZKARIA - 2009ko apirilaren 29a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Publikoaren Eskaintza, oposizioak eta lehiaketak

DEIALDIA, udaltzain laguntzaile lanetan aritzeko izangaien zerrendak hautaproben bidez osatzeko, gero udaltzaingoa duten udaletan sortzen diren beharren arabera aldi baterako kontratatuak izateko

1.-Deialdiaren xedea.

Deialdi honen xedea da udaltzain laguntzaile lanetan aritzeko izangaien zerrendak hautaproben bidez osatzea, gero Udaltzaingoa duten eta hala eskatzen duten udaletan sortzen diren beharren arabera aldi baterako kontratatuak izateko, ekainaren 5eko 113/1985 Foru Dekretuaren bidez onetsi zen Nafarroako Administrazio Publikoetan Sartzeko Erregelamenduaren 42.2.c) artikuluan, Nafarroako poliziei buruzko martxoaren 23ko 8/2007 Foru Legearen 21.1 artikuluan, aplikatzekoak diren gainerako arauetan eta deialdiaren oinarrietan ezarritakoaren babesean.

1.1. Zerrenden indarraldia.

Zerrenden indarraldia 5 urtekoa izanen da, onesten direnetik hasita.

1.2. Udaltzain laguntzaileen definizioa eta eginkizunak.

Udaltzaingoa duten toki entitateek kidego horretako langileak ordezkatzeko administrazio araubidean aldi baterako kontratatzen dituzten langileak dira udaltzain laguntzaileak, hain zuzen, absentismoaren eraginez, plantilla organikoan hutsik dauden aldi baterako lanpostuak betetzeko edo segurtasun publikoaren arloan une jakin batzuetan gertatzen diren beharrei kasu egiteko, langile finko aski ez dutenean kontratatzen direnak.

Udaltzaingoko funtzionarioei laguntzeko lanak eginen dituzte, haien aginduei jarraituz:

a) Ondasun, zerbitzu, eraikin, instalazio eta bulego ofizialak gorde eta zaintzea.

b) Bide-zirkulazioa antolatzea, zirkulazio arauekin bat.

c) Herritarrarendako sorospen-lanetan eta babes zibilaren arlokoetan parte hartzea.

d) Administrazio arauak bete daitezen zaintzea. Eginkizun horietan, agintaritzaren agentetzat hartuko dira.

1.3. Udaltzain laguntzaileek behar bezala identifikatzeko moduko ezaugarriak eramanen dituzte aldean eta behar den dokumentazioaren bidez frogatuko dute udaltzain izaera. Ez dute sekula su-armarik eramanen.

1.4. Udaltzain laguntzaileei aplikatu beharreko araubidea Nafarroako Administrazio Publikoen zerbitzuko Langileriaren Estatutuan administrazio araubidean kontratatzen diren langileentzat ezarritakoa izanen da, Nafarroako Poliziei buruzko Foru Legean ezarritako salbuespenekin. Langile hauek estatutu horren D mailan sartuko dira, eta kasuan kasuko udalak lanpostu horretarako ezarrita dauzkan ordainsariak jasoko dituzte.

2.-Izangaiek bete beharreko baldintzak.

Hautaprobetan onartuak izateko, izangaiek eskaerak aurkezteko epea bukatzen den egunean honako baldintza hauek bete beharko dituzte:

a) Espainiako nazionalitatea izatea.

b) Hamasei urte beteta izatea eta erretiroa nahitaez hartzeko gehieneko adina gainditua ez izatea, eskaerak aurkezteko epea bukatu baino lehen.

c) Eskola Graduatuaren, DBHko Graduatuaren, Lehen Mailako Lanbide Hezkuntzaren edo haien baliokidetzat jotzen den titulu baten jabe izatea edo eskaerak aurkezteko epea bukatzen den egunean lortzeko moduan egotea.

Atzerrian lortutako tituluak badira, homologazioaren egiaztagiria eduki beharko da.

d) Beren egitekoa betetzeko behar diren gaitasun fisiko eta psikikoak izatea, eta deialdiaren III. eranskinean ageri diren bazterbide medikoetan ez egotea.

e) Gutxienez ere 1,60 metroko garaiera izatea.

f) Doluzko delitu bat dela kausa kondenatua ez izatea, ez eta administrazio publiko baten zerbitzutik baztertua ere, eta eginkizun publikoetan aritzeko desgaitua edo gabetua ez izatea, deusetan galarazi gabe errehabilitazioaren onura aplikatzea, zigor eta administrazio arloetako arauei jarraikiz.

f) Eginkizun publikoak betetzeko ezgaitua edo gabetua ez izatea, eta inongo administrazio publikoren zerbitzutik baztertua ez izatea.

g) Ibilgailuak gidatzeko B.T.P. eta A motako baimenak izatea.

Eskaerak aurkezteko epea amaitzen denerako bete beharko dira aurreko baldintzak, g) letrakoa salbu, hori oinarrizko prestakuntzaren ikastarorako izangaien behin-behineko zerrenda jendaurrera ateratzen denerako bete beharko baita, deialdi honen 8. oinarrian ezarri bezala.

3.-Eskaerak.

Deialdian parte hartzeko eskaerak Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2009ko 33. Nafarroako Aldizkari Ofizialean argitaratu zen, martxoaren 18an, Lehendakaritza, Justizia eta Barne Departamentuaren "Bestelakoak" 1.3.6. atalean, "Ordutegia eta bulegoen kokagunea") aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan adierazitako bideren bat erabiliz, deialdia Nafarroako Aldizkari Ofizialean argitaratu eta biharamunetik hamabost egun naturaleko epean.

Eskaerak deialdi honen I. eranskinean dagoen ereduari lotu behar zaizkio eta, haietan, izangaiek adierazi beharko dute eskatutako baldintza guztiak betetzen dituztela. Eskaera eredua Nafarroako Gobernuko Erregistro Orokorrean dago eskuragarri. Interneten bidez ere lortzen ahal da, www.navarra.es helbidean, bai argitaratzen deneko Aldizkari Ofizialetik abiatuta, bai Zerbitzuen Katalogoko Enplegu Publikoan dagoen deialdiaren aiputik abiatuta.

3.2. Eskaerari, behar bezala bete ondoren, agiri hauek erantsiko zaizkio:

a) Izangaiak II. eranskinean agertzen diren proba fisikoak egiteko gaitasuna duela frogatzen duen ziurtagiri mediko ofiziala.

b) Nortasun agiri nazionalaren bi aldeen fotokopia konpultsatua.

c) Deialdi honetan eskatzen den titulu akademikoaren fotokopia egiaztatua.

4.-Eskaerak aurkezteko epea.

Eskaerak aurkezteko epea hogei egun naturalekoa izanen da, deialdia Nafarroako Aldizkari Ofizialean argitaratu eta biharamunetik hasita.

5.-Izangaien onarpena eta erreklamazioak.

5.1. Eskaerak aurkezteko epea bukatutakoan, Barneko zuzendari nagusiak ebazpena emanen du onartu eta baztertuen behin-behineko zerrenda onesteko, eta Nafarroako Gobernuko iragarki oholean eta web orrian argitara emateko aginduko du.

5.2. Izangai baztertuek bost egun balioduneko epea izanen dute, behin-behineko zerrenda Nafarroako Aldizkari Ofizialean argitaratzen denetik, erreklamazioak aurkezteko eta, akatsik egin badute, zuzentzeko.

6.-Behin betiko zerrenda.

Erreklamazioak aurkezteko epea amaitu eta haiei buruz ebatzi ondoren, Barneko zuzendari nagusiaren ebazpenaren bidez, izangai onartu eta baztertuen behin betiko zerrenda onetsi eta Nafarroako Gobernuaren iragarki oholean eta web orrian jarriko da jendaurrean, deialdi honen zortzigarren oinarrian aipatzen diren hautaprobak egiteko egunarekin eta tokiarekin batera.

7.-Epaimahaia.

7.1. Epaimahaiak kide hauek izanen ditu:

Batzordeburua: Ignacio Carrillo de Albornoz Alfaro jauna, Barne Zuzendaritza Nagusiko Nafarroako Segurtasun Publikoko Sistemaren Zerbitzuko zuzendaria.

Ordezkoa: Alfredo González Echarren jauna, Barne Zuzendaritza Nagusiko Segurtasun Politikak Garatzeko Zerbitzuko zuzendaria.

Batzordekidea: Enrique Bellostas Suescun jauna, Burlatako Udaltzaingoko burua.

Ordezkoa: José Antonio Cuesta Márquez jauna, Noaingo Udaltzaingoko burua.

Batzordekidea: Pilar Zapico Revuelta andrea, Barne Zuzendaritza Nagusiko Araubide Juridikoaren eta Langileriaren Zerbitzuko zuzendaria.

Ordezkoa: Margarita De Pablo Contreras andrea, Lehendakaritza, Justizia eta Barne Departamentuko Idazkaritza Tekniko Nagusiko Araubide Juridikoaren Ataleko burua.

Batzordekidea: Nafarroako Udal eta Kontzejuen Federazioak hautaturiko ordezkari bat.

Ordezkoa: Nafarroako Udal eta Kontzejuen Federazioak hautaturiko ordezkari bat.

Batzordekidea: Administrazio Erroko Langileen Batzordearen ordezkari bat, batzordeak berak proposatua.

Ordezkoa: Administrazio Erroko Langileen Batzordearen ordezkari bat, batzordeak berak proposatua.

Mahaikide idazkaria: José María Canales Arana jauna, Barne Zuzendaritza Nagusiko Giza Baliabideen Ataleko burua.

Ordezkoa: Juan José Lanciego Balda jauna, Barne Zuzendaritza Nagusiko Araubide Juridikoaren eta Langileriaren Zerbitzuko administraria.

7.2. Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean aipatzen diren abstentzio arrazoietako bat gertatzen denean, epaimahaiko kideek ezin izanen dute epaimahaian parte hartu, eta Barne Zuzendaritza Nagusiari jakinarazi beharko diote.

Izangaiek, halaber, zilegi izanen dute mahaikideak errefusatzea, arrazoi horietako bat izaten denean.

Mahaikideek parte ez hartzeko eta haiek errefusatzeko legez ezarritako kasuak direla-eta epaimahaia aldatzen bada, jakinarazi eginen da, izangai onartu eta baztertuen zerrendekin batera.

7.3. Hautaprobak hasi baino lehen eratuko da epaimahaia.

Epaimahaia ezin izanen da eratu, ezta jardun ere, kideen gehiengo osoa bildu gabe.

Halaber, epaimahaiaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

7.4. Epaimahaiak gehiengoz ebatziko ditu deialdiaren oinarriak interpretatu eta aplikatzeko moduari buruz sor daitezkeen gorabehera guztiak.

7.5. Epaimahaiak aholkulari adituen laguntza eska dezake probarako. Aipatu aholkulariak beren espezialitate teknikoetan baizik ez dira ariko eta haietan oinarriturik bakarrik emanen diote laguntza epaimahaiari.

8.-Hautaproben azalpena eta balorazioa.

Hautapen prozesuak fase hauek izanen ditu:

1. fasea.-Hautapenaldia, honako proba hauek izanen dituena:

A) Lehenbiziko proba.

Hiru aukera dituzten 100 galderari erantzun beharko zaie, erantzun zuzena bakarra izanik, hizkuntzarako, zenbakietarako, bulego-antolaketarako eta ortografiarako gaitasuna neurtzeko. Zuzen erantzundako galdera bakoitzeko 0,50 puntu eskuratuko dira eta gaizki erantzundako bakoitzeko 0,25 puntu kenduko dira.

Proba hau egiteko ez da inongo testurik erabiltzen ahalko, ez eta hiztegirik, kalkulagailurik edo bestelako materialik ere, mutur lodiko bolaluma beltza ez bada.

0tik 50 puntura bitarte kalifikatuko da. Baztertuak izanen dira gutxienez 25 puntu lortzen ez dituztenak.

B) Bigarren proba.

II. eranskinean ageri diren ariketa fisikoak egin beharko dira, eta haietako bakoitzak balioko du jendea baztertzeko, egiten den markaren arabera. Epaimahaiak finkatuko du probak egiteko ordena eta erabakiko du egun bakarrean edo gehiagotan egin behar diren.

Proba fisikoei hasiera eman aurretik, 2.e) oinarrian aipatzen den baldintza betetzen dela ziurtatzeko, izangaien altuera egiaztatuko da.

Izangai guztiak antidopin kontrola egitera behartuta egonen dira, ariketak egin bitartean edo beste noiznahi, epaimahaiak hala eskatuz gero. Praktika debekatuak atzeman edo egiaztatzeko analisiak dagokion organo espezializatuak eginen ditu. Horrenbestez, debekatuta daude Kiroletako Kontseilu Gorenak 2008ko abenduaren 19an emandako Ebazpenaren I. eranskinean ageri diren substantzia, gai farmakologiko, dopin metodo eta manipulazioak (kirolean debekatutako substantzien eta metodoen zerrenda, 2009ko 1. Estatuko Aldizkari Ofizialean, urtarrilaren 1ean, argitaratua) eta, bestalde, indarra dute Kiroletako Kontseilu Goreneko Lehendakaritzak kirolean debekatuta dauden metodo eta substantzien zerrenda onesteko 2006ko abenduaren 21ean emandako Ebazpenaren IV. eta V. eranskinek (animaliengan, galgoengan eta lehiaketa hipikoetan debekaturik dauden substantzien eta metodoen zerrendak dituztenak, hurrenez hurren), Osasuna Babesteari eta Kiroleko Dopinaren kontra borrokatzeari buruzko azaroaren 21eko 7/2006 Lege Organikoaren lehen xedapen gehigarrian xedatutakoaren babesean. VI. eranskinak ere indarrean segituko du, kirolean dopina erabiltzearen kontrako UNESCOren Nazioarteko Konbentzioaren II. Eranskinari aurka egiten ez dion guztian. Bazterturik geldituko dira kontrol horretan emaitza positiboa ateratzen duten izangaiak eta, orobat, kontrola egitea onartzen ez dutenak.

Proba hau ehun eta hogeitik gora izangaik gainditzen badute, hirugarren probara lehenengo ehun eta hogeiak baino ez dira pasako. Ehun eta hogeigarren postuan puntuazio berarekin izangai bat baino gehiago egonez gero, denak pasako dira hurrengo probara. Gainerako izangaiak deialditik baztertuak izanen dira.

C) Hirugarren proba.

Proba psikoteknikoak egin beharko dira, izangaiak udaltzain laguntzaileen eginkizunen profil profesiografikoaren eskakizunei noraino egokitzen zaizkien neurtzeko. Proba hori Nafarroako Administrazio Publikoaren Institutuko Psikologia Atalak eginen du.

Gehienez ere 15 puntu emanen dira eta 7,5 puntura iristen ez diren izangaiak baztertuko dira.

Proba horren emaitzak epaimahaiaren idazkariari igorri beharko zaizkio.

Hautapenaldiko proba guztiak dei bakarraren bidez eginen dira, eta bazterturik geldituko dira adierazten diren egun, ordu eta tokietan agertzen ez diren izangaiak, arrazoia edozein delarik ere.

Proba psikoteknikoak egiteko onartutako izangaiek, proba horren emaitzak Nafarroako Gobernuko iragarki oholean jendaurrean jarri eta hurrengo egun baliodunean, frogatu beharko dute deialdiaren 2.1 oinarriaren f) eta g) baldintzak betetzen dituztela. Horretarako, honako dokumentazio hau aurkeztu beharko dute, Nafarroako Gobernuko Erregistro Orokorrean, epaimahaiko idazkariari zuzendua:

a) Deialdian eskatutako gidabaimenen aurreko eta atzeko aldeen fotokopia konpultsatuak.

b) Erantzukizuneko aitorpena, adierazteko ez dela doluzko delitu bat dela kausa kondenatua izan, ez eta administrazio publiko baten zerbitzutik baztertua, eta eginkizun publikoetan aritzeko desgaitua edo gabetua ez dagoela, deusetan galarazi gabe errehabilitazioaren onura aplikatzea, zigor eta administrazio arloetako arauei jarraikiz.

Barne Zuzendaritza Nagusiak Justizia Ministerioaren Zigortu eta Auzi-iheslarien Erregistro Nagusiari eskatuko dio izangaiek aurrekari penalik ez dutela edo horiek deuseztu direla frogatzen duen agiria, eta ofizioz erantsiko dio espedienteari.

c) Nafarroako Foru Eraentza errespetatu, Konstituzioari eta legeei men egin eta karguari dagozkion eginkizunak zuzen beteko dituela zin egin edo hitz emateko aitorpena.

d) Gizarte Segurantzaren txartelaren fotokopia konpultsatua.

e) Nomina kobratu nahi dueneko bankuko edo aurrezki kutxako kartillaren fotokopia konpultsatua.

D) Laugarren proba.

Izangaiak baztertzeko deialdi honen III. eranskinean aurreikusitako kasuetan ez daudela egiaztatzeko osasun probak eginen dira. Proba horiek Laneko Arriskuei Aurrea Hartzeko Zerbitzuak eginen ditu edo, hala behar bada, behar bezalako kreditazioa duen kanpoko entitate batek.

Lehenengo eta behin amaierako kalifikazio onena duten hirurogei izangaiei eginen zaie deia proba egiteko, eta aurrerago ikastaro gehiago egiten badira, zerrendan hurrengo direnei deituko zaie.

Proba honen emaitzak epaimahai kalifikatzailearen idazkariari igorri beharko zaizkio.

2. fasea.-Udaltzain laguntzaile izateko gaikuntza ikastaroa:

Udaltzain laguntzaileak gaitzeko ikastaroa Nafarroako Segurtasun Eskolak emanen du, gainditu egin beharko da eta gobernatuko dute Nafarroako Segurtasun Eskolaren antolamendu eta funtzionamendurako Erregelamendua onesten duen irailaren 12ko 113/2005 Foru Dekretuak horren gainean ezarritako aginduek eta aplikagarriak diren gainerako xedapenek.

Gaikuntzak bost urterako balioko du.

Gaikuntza ikastaroa 160 ordukoa izanen da gutxienez, eta harengatik gehienez 100 puntu emanen dira. Bazterturik geldituko dira gutxienez 50 puntura iristen ez direnak.

Hautapenaldia bukatuta, epaimahaiak argitara emanen du probak gainditu dituzten izangaien zerrenda, ikastaroan behin-behinekoz onartu direnena alegia. Lehenengo ikastaroan 60 izangaik hartuko dute parte, gehienez, eta hurrengoetan gainerakoek, baldin badaude.

Epaimahaiak, ikusirik izangaiek aurkeztutako dokumentazioa eta proba medikoen emaitzak, hautapen prozesuan sortutako bajak jakinaraziko ditu eta baja horiek bazterturik gelditu ez diren beste izangai batzuekin beteko ditu, betiere proba medikoak gainditu badituzte. Hori egindakoan, gaikuntza ikastaroan onartutako izangaien behin betiko zerrenda argitaratuko da.

Aurreko izapideak eginda, epaimahaiak jendaurrera aterako du lehenengo ikastaroan onartuak izan direnen behin betiko zerrenda. Behin-behinekoz onartutako izangairen batek eskatzen zaion dokumentazioa aurkezten ez badu edo osasun azterketa gainditzen ez badu, probak gainditu eta puntuazio handiena duen hurrengo izangaiarekin ordeztuko da behin betiko zerrendan, eskatzen diren dokumentazioa aurkeztu eta osasun azterketa gainditu ondotik.

Ikastaroa utziz gero, izangaia deialditik baztertuta geldituko da.

Ikastaroa egin bitartean, izangaiek 900 euroko beka jasoko dute, betiere ikastaroko eskola ordu guztietara joan direla frogatzen badute, behar bezala justifikatuta huts egiten dutenean salbu. Beka jasoz gero, ezin izanen da bestelako ordainsari edo sorospenik eskuratu ikastaroak dirauen bitartean.

Prestakuntza-ikastaroa amaituta, Nafarroako Segurtasun Eskolako zuzendariak ebazpen bat emanen du, izangaien kalifikazioak onesteko, eta epaimahaiko idazkariari igorriko dio.

9.-Gainditzen dutenen zerrendak.

9.1. Ikastaroaren kalifikazioa eginik, epaimahaiak jendaurrean jarriko du Nafarroako Gobernuaren iragarki oholean eta web orrian probak gainditu dituzten izangaien zerrenda, lortutako azken puntuazioaren hurrenkeran, eta Barneko zuzendari nagusiari zerrenda igorriko dio, bai eta hautapen prozesuaren espediente osoa ere, onets dezan.

9.2. Prozedura hori bera erabiliko da gaikuntza ikastaro guztietan.

10.-Deia.

10.1. Deialdian parte hartzen dutenei dagozkien lanpostuen esleipena interesdunen eskaeren arabera eginen da, egindako ikastaroaren ordenaren arabera eta deialdian lortutako puntuazio altuenetik txikienera.

10.2. Gainditzen duten izangaiei deitzen ahalko zaie udaltzaingoa duten udaletan sortzen diren beharren arabera, udalek eskaturik, deialdi honen oinarrietan ezarritakoari eta aplikatzekoak diren gainerako arauei jarraikiz.

10.3. Udaltzain laguntzaile baten kontratazioa plantilla organikoan udaltzain lanpostu bat hutsik dagoelako egiten denean, toki entitateak lanpostu hori behin betiko betetzeko deialdia kontratazioa egin eta gehienez urtebeteko epean egin beharko du. Bestela, urtebeteko epea betetzen den egun berean administrazio kontratua iraungiko da zuzenean, eta toki entitateak behar den likidazioa egin beharko dio langileari.

10.4. Bestela, urtebeteko epea betetzen den egun berean administrazio kontratua iraungiko da zuzenean, eta toki entitateak behar den likidazioa egin beharko dio langileari.

10.5. Izangaiek harremanetarako zenbait telefono edo fax-zenbaki ematen ahalko dituzte, azkar lokalizatu ahal izateko, eta eguneraturik izan beharko dituzte.

Kontratua izangai bakoitzari eskaintzeko, hiru saio, bederen, eginen dira norberak adierazten dituen komunikazio bideak erabiliz, ordubeteko aldian, lehenbiziko saiotik hasita.

Dei bakoitzaren idatzizko oharra eginen da, gorabeherak, eguna eta ordua aipaturik.

Izangai batekin harremanetan jartzerik ez bada, zerrendan hurrengoa denari deituko zaio, harik eta eskaintzen diren lanpostu guztiak bete arte.

Harremanetan jartzerik izan ez duten izangaiek zerrendan zuten postuari eutsiko diote.

10.6. Deietarako orokorrean ezarritakoa deusetan ukitu gabe, izangai bat aldi baterako kontratu bat dela bide, lanean ari edo aritu denean eta, kontratua bukatu eta hurrengo 15 egunetan zerbitzu berean lanpostu berdina bete behar baldin bada, Administrazioak izangai berari eskainiko dio kontratua, betiere dei egiten zaionean zerrendan libre baldin badago.

10.7. Hasierako aurreikuspenen arabera hiru hilabetekoak edo iraupen txikiagokoak diren kontratazioak berehala eskainiko zaizkio, horretarako baimena erdietsi ondotik, deitu eta, harekin harremanetan jarrita, lanean berehala hastea onartzen duen lehenbiziko izangaiari.

Harremanetan jartzerik izan ez duten izangaiek zerrendan zuten postuari eutsiko diote.

10.8. Kontratazio zerrenda batetik dei egin eta kontratua onartzen duten izangaiei ez zaie beste lanposturik eskainiko.

11.-Ukoak.

11.1. Izangairen batek eskaini zaion lanpostuari uko egiten baldin badio, zerrendatik at geratuko da, salbu eta honako egoera hauetakoren batean dagoela frogatzen badu:

1. Indarrean dagoen izendapen, kontratu administratibo edo lan kontratu batengatik horretara behartua egotea.

2. Aldi baterako ezintasun egoeran egotea edo umea izan edo adoptatzeagatik lizentzia izatea.

3. 3 urte baino gutxiagoko semea edo alaba, berezkoa zein adoptatua, zaindu beharrean egotea. Arrazoi honengatik kontratuari uko egiten diotenei ez zaie berriz deituko hilabete bat iragan arte, uko egin dutenetik hasita.

4. Bigarren gradura arteko odol- edo ezkontza-ahaide bat, adina, istripua edo eritasuna dela kausa bere burua ezin gobernatu duena, zaindu behar izatea.

5. Izangaia ezkondu berria edo, bikote egonkorrentzako berdintasun juridikoari buruzko uztailaren 3ko 6/2000 Legearen arabera, balio bereko egoeran sartu berria izatea, hori gertatu ondoko edo gertatu aurreko hamabost egun naturaletan egiten bazaio uko lanpostuari.

6. Eskainitako kontratua izangaia bizi den herritik 20 kilometro baino gehiagora dagoen herri baterako izatea.

11.2. Aurreko atalean adierazitako egoeretako batean edo Barne Zuzendaritza Nagusiak baloratuko dituen antzeko egoeretan dauden izangaiek hilabeteko epea izanen dute, uko egiten dioten lanpostua eskaintzen zaien egunetik, hori agiriekin eta modu frogagarrian egiaztatzeko. Hala bada, zerrendan zuten toki berean jarraituko dute.

11.3. Oinarri honetako lehenengo atalean aipatutako kasu guztietan izangaiek jakinaraziko dute noiz dauden berriz lanerako prest. Horretarako, uko egitea ekarri zuen egoera noiz bukatu den adierazten duten agiriak aurkeztuko dituzte. Jakinarazpen hori egin arte, ez zaio lanposturik eskainiko.

11.4. Eskaeran lanaldi partzialeko lanpostuak ere hartzeko asmoa adierazten den kasuetan, horrelako kontratu bati uko egitea ez da justifikatutako arrazoitzat hartuko. Hortaz, dei egiteko erabiltzen den zerrendatik kanporatuko da izangai hori.

12.-Baztertzeko arrazoiak.

Honako kasuotan izangaiak zerrendatik baztertuta geldituko dira:

a) Eskainitako lanpostuari arrazoirik gabe uko egitea.

b) Izenpetutako kontratuari uko egitea.

c) Dei egin eta lanpostua onartu ondotik, kontratua ez izenpetzea.

d) Doluzko delitu bat dela kausa kondenatua izatea, edo administrazio publiko baten zerbitzutik baztertua, eta eginkizun publikoetan aritzeko desgaitua edo gabetua izatea, deusetan galarazi gabe errehabilitazioaren onura aplikatzea, zigor eta administrazio arloetako arauei jarraikiz.

13.-Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da, Barneko zuzendari nagusiari zuzendua, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdi honen arauen kontra eta bera aplikatzeko egintzen kontra, epaimahaiak hartutakoak izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barneko kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean, 2009ko apirilaren 15ean.-Barneko zuzendari nagusia, ordezkoa, Ignacio Carrillo de Albornoz Alfaro.

I. ERANSKINA

Eskaera

Izen-abizenak: ............................................., adinez nagusia, NAN zenbakia: ......................., jaioteguna: .............................., jaioterria: ..........................., probintzia: ............................, helbidea (herria): ....................................., probintzia: ................, kalea: ......................................, zenbakia: ......, solairua: ......, letra: ...., posta kodea: ............ etxeko telefonoa: ..................., lantokiko telefonoa: ........................., sakelako telefonoa: ...................., faxa: .........................

AZALTZEN DUT:

Onartua izatea eskatzen dudala udaltzain laguntzaile izateko zerrendak osatzeko deialdian, .........(e)ko .... zenbakiko Nafarroako ALDIZKARI OFIZIALean argitaratu zen hartan.

Ez dudala karguan aritzea galarazten didan eritasunik edo akats fisikorik nahiz psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik bereizia izan eta ez nagoela desgaitua eginkizun publikoak betetzeko.

Deialdian eskatzen den tituluaren jabe naizela.

Eskaerak aurkezteko epearen azken egunean beharkizun guztiak betetzen ditudala.

Nafarroako Gobernuaren Barne Zuzendaritza Nagusiari berariazko baimena ematen diodala deialdiaren 8. oinarrian aurreikusitako egiaztagiria eskatzeko.

Horrenbestez,

Eskaera hau ontzat har dezatela eta aipatu deialdian onar nazatela eskatzen dut.

Iruñean, 2009ko .............aren ............(e)an.

(Sinadura)

Nafarroako Gobernua. Lehendakaritza, Justizia eta Barne Departamentua. Barne Zuzendaritza Nagusia.

II. ERANSKINA

Bigarren probari dagozkion ariketak

Erresistentzia lasterketa:

Abiatzeko jarrera: zutik, abiatze lerrotik atzera, bi oinak atzean direla (ez da zilegi izanen iltzedun oinetakoak erabiltzea).

Nola egin: lasterka, oinez, nahiz bi moduak tartekatuz, 12 minutuan albait tarterik luzeena egitea.

Gutxieneko distantzien taulak, metrotan eta bakoitzagatik eman beharreko puntuazioa:

Izangaiaren adina:

30 urte edo hortik behera. 2.600 metro: gai.

31 urtetik 40 urtera. 2.400 metro: gai.

41 urte edo hortik gora. 2.200 metro: gai.

Baloi medizinala jaurtitzeko testa (3 kg):

Abiatzeko jarrera: zutik, hankak irekita eta oinak simetrikoki jarrita marraren atzean, baloia buruaren atzean, bi eskuekin helduta.

Nola egin: baloia ahalik eta urrutien bota behar da. Eta jaurtiketak simetrikoa behar du izan. Jaurtitzeko prozesuan, baloiak lurra ukitu bitarte, ezin dira oinak mugitu, ezta lurretik altxatu ere, nahiz eta orpoak altxatzen ahal diren.

Distantzia neurtuko da jaurtitzeko marratik baloiak lurrean utzitako arrastoetatik marratik hurbilen dagoeneraino.

Bi saio egin daitezke; lehenbizikoa balioduna bada, ez da bigarrenik eginen.

Gutxieneko distantzien taulak, metrotan, eta bakoitzagatik eman beharreko puntuazioa.

Izangaiaren adina:

30 urte edo hortik behera. 6,5 metro: gai.

31 urtetik 40 urtera. 6 metro: gai.

41 urte edo hortik gora. 5,5 metro: gai.

III. ERANSKINA

Bazterbide medikoak

1. Ikusmena. Begien sistema.

-Zuzendu gabeko begi zolitasuna:

-4/10 bi begietan, edo

-3/10 begirik okerrenean eta 5/10 onenean, edo

-2/10 begirik okerrenean eta 6/10 onenean.

-Ikuseremu monokularra: ezin izanen da plano horizontalean 120º-tik beherakoa izan, eta murrizketa nabarmenik gabekoa izanen da ikuseremuko meridiano batetik bestera.

-Diplopia.

-Diskromatopsia larriak.

-Estereopsi falta.

-Keratotomia erradiala.

2. Entzutea. Entzuteko sistema.

-500tik 3.000 Hz bitarteko frekuentzietan belarriren batean 45 dB-ko edo gehiagoko galera.

-Orekari loturiko alterazioak, edozein etiologiatakoak.

3. Mintzamena.

-Afasiak, disfoniak, disfemiak (hitz toteltasuna), disartria eta diglosia iraunkorrak, polizia lanetan aritzea zaildu edo galarazten dutenak.

4. Giharren eta eskeletoaren aparatua.

-Artikulazioren baten galera anatomikoa edo ankilosia, eginkizunetarako duen eraginaren arabera.

-Prozesu artikularrak, eginkizunetarako duten eraginaren arabera, zeinahi etiologiaren ondorio direla ere.

-Eskoliosiak, 20º baino handiagoak.

-Zifosiak, 30º baino handiagoak.

-Espondilolisia, espondilolistesia, ornoen bategiteak eta ornoarteko diskoaren arazoak.

-Espondilitis ankilosantea.

-Paget-en eritasuna.

-Osteoporosia eta osteomalazia (eginkizunetarako duen eraginaren arabera).

-Fibromialgia.

-Deformazio anatomikoak, eginkizunetarako duten eraginaren arabera.

5. Digestio aparatua.

-Crohn-en eritasuna eta kolitis ultzeraduna.

-B eta C hepatitisa aktiboa izatea edo birusaren eramailea izatea.

-Gibeleko gutxiegitasuna, ebaluazio mahaiak baloratu beharrekoa.

-Gibeleko zirrosia.

-Behazun-zirrosi primarioa.

-Pankreatitis kronikoa.

-Fibrosi kistikoa.

-Sabelaldeko paretako etena, ebaluazio mahaiak baloratu beharrekoa.

-Hesteetako jarioa.

6. Zirkulazio aparatua:

-Bihotzeko gutxiegitasuna, maila guztietan.

-Arritmia eta blokeoak: aurre-eszitazio sindromea eta bihotzaren erritmoaren edo kondukzioaren alterazio mota guztiak, salbu eta arritmia sinusala, BGE edo BE solteak, 1. mailako blokeo AB, Eskuineko Adarraren Blokeo Osoa eta Ezkerreko Adarraren hemiblokeoak.

-Kardiopatia iskemikoa, maila guztietan.

-Balbulopatiak.

-Miokardiopatiak.

-Perikardiopatia kronikoak.

-Biriketako hipertentsio primarioa eta sekundarioa.

-Arterietako iskemia kronikoaren sindromea.

-Arterietako hipertentsioa (TAS > 140 eta TAD > 90).

-Arterietako hipotentsioa (TAS < 90 eta TAD < 45).

-Zainen eta baso linfatikoen gutxiegitasuna.

7. Arnas aparatua.

-Arnas aparatuaren afekzio kronikoak (Bronkitis kronikoa, BBEK, Enfisema, Bronkiektasiak).

-Pleurako isuri berrituak.

-Berezko pneumotorax berrituak.

-Eritasun interstizialak eta/edo biriketako fibrosia.

-Asma eta bronkioetako hipererreaktibotasuna.

8. Nerbio sistema.

-Epilepsia.

-Esklerosi anizkoitza eta bestelako eritasun desmielinizanteak.

-Neurona motorearen eritasunak.

-Ataxiak.

-Buruko eta integrazioko funtzioen alterazioak (arrazoitze abstraktoa, oroimena, adimena eta funtzio betearazleak).

-Parkinson-en eritasuna eta bestelako alterazio estrapiramidalak.

-Odol-hodien afekzio iskemikoak, hemorragikoak edo malformazioren baten ondoriozkoak.

-Miastenia larria eta juntura neuromuskularraren bestelako arazoak.

-Bertigoak.

-Siringomielia.

-Hidrozefalia.

-Miopatiak.

-Nerbio-sistema zentralaren lesioaren ondoriozko perlesia.

-Perlesia periferikoak, funtzioetan duten eraginaren arabera.

-Nerbio-sistema periferikoaren eritasunak, funtzioetan duten eraginaren arabera.

-Neke kronikoaren sindromea.

-Anosmia.

-Beste alterazio motore batzuk (tikak, estereotipia motoreak, loaren alterazioak), giza harremanetan eta lanean izan dezaketen eraginaren arabera.

9. Nahaste psikiatrikoak.

-Buruko alterazio organikoak, prozesu automugatuak eta itzulgarriak kenduta.

-Buruaren eta jokabidearen alterazioak, substantzia psikotropikoen kontsumoaren ondoriozkoak (alkohola barne).

-Eskizofrenia eta bestelako alterazio psikotikoak.

-Gogo-aldartearen nahasteak (jokabide bipolarrak, nahaste depresibo errepikariak, depresioaldi handia, nahaste distimikoak).

-Antsietate-alterazioak, ondorio kliniko nabarmena baldin badute.

-Barne-bultzaden kontrolaren eta izaeraren nahasteak, giza harremanetan eta lanean eragina dutenak.

10. Ugaltze eta gernu aparatua.

-Giltzurruneko gutxiegitasuna, bilakaera eta pronostikoaren arabera.

-Gernu jarioa.

-Giltzurruneko polikistosia.

11. Sistema endokrinologikoa.

-Ardatz hipotalamo-hipofisarioaren alterazioak.

-Hipertiroidismoa eta hipotiroidismoa, bilakaeraren eta pronostikoaren arabera.

-Addison, Cushing, feokromozitoma eta giltzurrunen gaineko guruinen bestelako alterazioak.

-Hipoaldosteronismo primarioa eta sekundarioa.

-Mellitus diabetesa.

-Adenomatosi endokrino anizkoitza.

-Hipoparatiroidismoa eta hiperparatiroidismoa, bilakaeraren eta pronostikoaren arabera.

12. Larrua, fanerak eta guruin exokrinoak.

-Orbainak eta azalaren prozesu kronikoak, baldin eta haien hedadura, funtzioetan izan dezaketen eragina eta kokapena ikusirik, udaltzain laguntzaile lanetan aritzea eragozten baldin badute.

13. Odola eta organo hematopoietikoak.

-Muineko aplasia, gaueko hemoglobinuria paroxistikoa, sindrome mieloproliferatiboak, anemia hemolitiko kronikoak, ß-talasemia anemiadunak.

-Linfomak, bilakaeraren eta pronostikoaren arabera.

-Sindrome linfoproliferatibo kronikoak, bilakaeraren eta pronostikoaren arabera.

-Mieloma anizkoitza eta Waldeström-en eritasuna.

-Hemofiliak eta hemostasiaren bestelako alterazioak.

-Immunoeskasiak.

-Esplenektomia.

-Antikoagulatzaileak (Heparinak, Sintrom), Interferon, kortikoideak edo EPO erabiltzen dituzten tratamendu kronikoak.

14. Bestelakoak.

-GIB birusaren antigorputzen eramailea.

-Amiloidosia.

-Kolagenosia.

-Lupus eritematoso sistemikoa.

-Artritis erreumatoidea.

-Esklerodermia.

-Sjögren-en sindromea.

-Baskulitisa, ebaluazio mahaiak baloratu beharrekoa.

-Obesitatea (GMI > 25).

15. Orokortasunak.

-Baztertzeko moduko patologiak ebaluazio mahaiak baloratuko ditu funtzioetan duten ondorioen arabera eta polizia lanetan aritzeko pronostikoaren arabera.

-Prozesu neoplasikoetan eta organoen transplanteen kasuetan, ebaluazio mahaiak gaitasuna baloratuko du, bilakaeraren eta pronostikoaren arabera.

-Funtzioetan eragina duten beste aparatu edo sistema bateko afekzioak, balorazio mahaiaren iritziz, polizia lanetan aritzea eragozten baldin badute.

Iragarkiaren kodea: F0913872