I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
93/2009 FORU AGINDUA, martxoaren 6koa, Landa Garapeneko eta Ingurumeneko kontseilariak emana. Honen bidez nekazaritza sektorean "de minimis" arauari lotutako laguntzen aldi baterako araubidea ezartzen da, Nekazaritzako Aseguru Konbinatuen Urteko Plan indardunean sartuak ez diren berotegien egitura eta instalazioetan izandako kalteetarako, 2009ko ekitaldian entitate pribatuekin izenpetutako asegurua kontratatzeko diru-laguntzak emateko.
Nekazaritzako finantzaketari buruzko lege-xedapenen Testu Bategina onesten duen otsailaren 16ko 54/1998 Legegintzako Foru Dekretuaren 1. eta 2. artikuluen arabera, Nafarroako Gobernuak laguntzak emanen ditu aseguratzen ahal diren nekazaritzako ekoizpenak eta arriskuak aseguratzeko, eta nekazaritzako ondasunen gaineko aseguruen kontratazioaren kostuan parte hartuko du. Legegintzako foru dekretu horren VI. tituluaren III. kapituluan laboreen eta abeltzaintzako ekoizpenen arriskuak aseguratzen dituzten Nekazaritzako Aseguru Konbinatuen Nafarroako Urteko Plan indardunean sartuak ez dauden entitate pribatuekin izenpetutako aseguruen kontratazio kostuaren konpentsazioa jorratzen da. Horretarako, bertan ezartzen da Landa Garapeneko eta Ingurumeneko kontseilariak lehen aipatutako konpentsazioetan aurreikusitako laguntzetara bildutako aseguru-lerroak onetsi eta argitaratuko dituela urtero.
Foru agindu honetan araututako laguntzak "minimis" araubidearen menpean daude (Batzordeak abenduaren 20an emandako 1535/2007 EE Erregelamendua, Europar Batasuna osatzeko Ituneko 87. eta 88. artikuluak nekazaritza produktuen ekoizpenaren sektorean "de minimis" laguntzei aplikatzeari buruzkoa).
Foru agindu honi Diru-laguntzei buruzko azaroaren 9ko 11/2005 Foru Legea aplikatuko zaio.
Horrenbestez, Nafarroako Gobernuari eta Lehendakariari buruzko abenduaren 3ko 14/2004 Foru Legearen 41. artikuluak ematen dizkidan eskumenak erabiliz,
AGINDU DUT:
1. Deialdia onestea Nekazaritzako Aseguru Konbinatuen Urteko Plan indardunean sartuak ez diren berotegien egitura eta instalazioetan izandako kalteetarako 2009ko ekitaldian entitate pribatuekin izenpetutako asegurua kontratatzeko diru-laguntzak emateko, "de minimis" araubideari lotuak badira.
2. Deialdiaren oinarri arautzaileak onestea. Oinarri horiek foru agindu honen eranskinean daude.
3. Foru agindu honen ondoriozko gastuak ordaintzeko 18.000 euroko gastua baimentzea, 2009ko gastuen aurrekontuetako "Aseguru-sarien konpentsazioa Agroseguro bitartez" izeneko 710001 71230 4700 414210 kontu-sailaren kargura.
4. Foru agindu hau eta eranskina Nafarroako Aldizkari Ofizialean argitaratzea.
5. Foru agindu honek Nafarroako Aldizkari Ofizialean argitaratu eta biharamunean hartuko du indarra.
Iruñean, 2009ko martxoaren 6an.-Landa Garapeneko eta Ingurumeneko kontseilaria, Begoña Sanzberro Iturriria.
ERANSKINA
Deialdiaren arauak, 2009. urtean aseguru etxe pribatuekin izenpetutako asegurua kontratatzeko diru-laguntzetarako, Nekazaritzako Aseguru Konbinatuen Urteko Plan indardunean sartuak ez diren berotegien egitura eta instalazioetan izandako kalteetarako
Lehenbizikoa.-Xedea.
Nafarroako Foru Komunitatean dauden nekazaritzako eta abelzaintzako ekoizpenen aseguruak sustatu eta bultzatzea du xede foru agindu honek. Aseguru horiek Nekazaritzako Aseguru Konbinatuen Plan indardunean sartuta ez dauden arriskuentzat dira.
Bigarrena.-Gastuak eta diru-laguntzaren zenbatekoa.
1. Aseguru etxe pribatuekin berotegien egitura eta instalazioetako kalteen asegurua kontratatzeko 2009ko ekitaldian egindako gastuetarako jaso daiteke diru-laguntza, 2008ko abenduaren 1etik 2009ko azaroaren 30 arte izenpetu badira Nekazaritzako Aseguru Konbinatuen eremutik kanpo.
2. Aseguruak kontratatzeko eman beharreko diru-laguntzaren zenbatekoa kalkulatzeko, ondoren azaltzen diren ehunekoak aplikatuko zaizkio asegurua kontratatzeko kostuari. Gehieneko kopuruak ere azaltzen dira.
Berotegien egitura eta instalazioetarako kalte aseguruak:
-Aseguratu guztiei aplikatzeko oinarrizko diru-laguntza: %15, eta gehienez ere 0,036 euro, aseguratutako berotegiaren metro koadroko, "estaldura malgukoen" kasuan, edo 0,054 euro metro koadroko "estaldura zurrunekoenean".
-Diru-laguntza gehigarria, ogibide nagusia nekazaritza duten aseguratuei aplikatzekoa: %15, eta gehienez ere 0,036 euro, aseguratutako berotegiaren metro koadroko, "estaldura malgukoen" kasuan, edo 0,054 euro metro koadroko "estaldura zurrunekoenean".
-Nekazari gazteak diren aseguratuei aplikatuko zaien diru-laguntza gehigarria, baldin eta 5 urte baino gutxiago eman badituzte nekazaritzan eta irailaren 28ko 297/1992 Foru Dekretuaren eta apirilaren 17ko 162/2000 Foru Dekretuaren aplikaziotik sortutako diru-laguntzak eman bazaizkie: %20, eta gehienez ere 0,048 euro, aseguratutako berotegiaren metro koadroko, "estaldura malgukoen" kasuan, edo 0,072 euro, metro koadroko "estaldura zurrunekoenean".
2. Oinarrizko diru-laguntza eta gehigarriak bateragarriak dira eta bidezkoa denean aplikatuko dira, ehunekoei gehieneko diru-laguntzak erantsita.
3. Laguntza hau "minimis" araubidearen menpean dago (Batzordeak abenduaren 20an emandako 1535/2007 EE Erregelamendua, Europar Batasuna osatzeko Ituneko 87. eta 88. artikuluak nekazaritza produktuen ekoizpenaren sektorean "de minimis" laguntzei aplikatzeari buruzkoa). (AO L 337, 2008-12-21, 35. or.)
4. Onuradunak, horrelako laguntzen bidez, gehienez ere 7.500 euro jasotzen ahalko du hiru zergaldiko epean.
Hirugarrena.-Onuradunak eta eskatzen diren baldintzak.
Nafarroako Nekazaritzako Ustiategien Erregistroan inskribatuta dagoen nekazaritzako ustiategiaren titularra laguntzen onuradun izanen da eskabidea eta honako agiri hauek aurkezten baditu:
-Izenpetutako polizaren fotokopia eta asegurua ordaindu izanaren frogagiria.
-Zer laguntza eskatu diren adieraztea, baita zein jaso ere. Gainera, eskatzaileek azken hiru urteetan " de minimis" araubidean jasotako bestelako diru-laguntzen eta haien zenbatekoaren berri emanen dute.
-Diru-laguntzei buruzko azaroaren 9ko 11/2005 Foru Legearen 13. artikuluan onuradun izateko ezarritako debekurik ez dutela dioen aitorpena.
-Aipatutako agiriren bat Foru Komunitateko Administrazioak baldin badu, interesdunak eskabidean azaldu beharko du, zein agiri den eta zein artxibotan dagoen zehaztuta. Agiriak datu pertsonalak baldin baditu, Landa Garapeneko eta Ingurumeneko Departamentuak eskatzailearen baimena beharko du datuak aztertzeko.
Laugarrena.-Eskaerak aurkezteko epea eta eskatutako baldintzak frogatzeko modua:
1. Laguntza-eskabidea eta aipatu agiriak aurkezteko epea hilabetekoa izanen da, poliza izenpetu edo berritzen denetik hasita, foru agindu hau argitaratu ondokoa bada, eta argitaratzen denetik hasita, data hori baino lehen izenpetu bada.
2. Betiere, 2009ko azaroaren 30ean bukatuko da eskaerak aurkezteko epea.
3. Eskabideak Landa Garapeneko eta Ingurumeneko Departamentuaren erregistroan aurkeztuko dira edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38. artikuluan aurreikusitako lekuetako batean.
4. Eskabidea horretarako ezarritako ereduan aurkeztuko da. Eredu hori Landa Garapeneko eta Ingurumeneko Departamentuko Erregistroan, nekazaritza bulegoetan eta Nafarroako Gobernuaren www.navarra.es web guneko zerbitzuen katalogoan eskuratzen ahal da.
5. Eskatzaileak laguntzak lehenbizikoz hartu behar dituenean edo laguntzak kobratzeko kontua aldatu nahi duenean, laguntzaren eskaerarekin batera transferentzia bidez kobratzeko eskaera aurkeztu beharko du, behar bezala beterik.
Bosgarrena.-Diru-laguntza emateko modua.
Deialdi honen xedeko diru-laguntzak banakako ebaluazio prozeduraren bidez emanen dira.
Seigarrena.-Ebaluazio organoa.
Nekazaritza Zerbitzuak ebaluatuko ditu eskabideak.
Zazpigarrena.-Deialdiaren antolamendua, instrukzioa eta ebazpena.
1. Eskaera hartuta, hirugarren arauan ezarritako baldintzak betetzen dituen egiaztatuko da. Agiri guztiak ez badaude, gehienez ere hamar eguneko epean zuzendu ditzala eskatuko zaio interesdunari, eta adieraziko, hala egin ezean, eskaerari uko egiten diola ondorioztatuko dela eta espedientea artxibatu eginen dela. Halaxe jakinaraziko zaio.
2. Eskabidea ebaluatu ondoren, Nekazaritza Zerbitzuak ebazpena proposatuko du.
3. Nekazaritza eta Abeltzaintza zuzendari nagusiak emanen du diru-laguntza.
4. Prozeduraren gainean ebazteko epea sei hilabetekoa izanen da. Epea ebazpenik eman gabe bukatzen bada, eskaera ezetsitzat joko da.
Zortzigarrena.-Onuradunaren betebeharrak.
Onuradunak Diru-laguntzei buruzko azaroaren 9ko 11/2005 Foru Legearen 9. artikuluan ezarritako eginbeharrak bete beharko ditu.
Bederatzigarrena.-Ordaintzeko modua eta epeak.
Ordainaldi bakar bat eginen da urtean, laguntza ematea ebatzi eta gero.
Hamargarrena.-Diru-laguntzaren bateragarritasuna.
Foru agindu honetako laguntzak bateraezinak dira administrazio berak, beste administrazio publiko batzuek, beste erakunde publiko nahiz pribatu batzuek edo partikularrek helburu bererako emandako beste laguntza batzuekin.
Hamaikagarrena.-Kontzesioaren aldaketa, ezarritako baldintzak ez betetzeagatik.
Laguntza emateko ebazpena aldatu eginen da asegurua osorik edo hein batean bertan behera uzten denean; dagokion zatia kenduko da diru-laguntzatik, eta onuradunak hura itzuli egin beharko du.
Hamabigarrena.-Ezarritako baldintzak ez betetzearen ondorioak.
1. Foru agindu honetan eskatutako betebeharrak eta hartutako konpromisoak bete ezean, diru-laguntza itzuli egin beharko da eta, bidezkoa denean, behar diren zehapenak jarriko dira.
2. Diru-itzulketa, arau-hauste eta zehapenen arloan, Diru-laguntzei buruzko azaroaren 9ko 11/2005 Foru Legearen 35., 42. eta 43. artikuluetan xedatutakoari jarraituko zaio.
Hamahirugarrena.-Deialdiaren aurkako errekurtso administratiboak.
Deialdiaren eta oinarri arautzaileen kontra gora jotzeko errekurtsoa jar daiteke, Nafarroako Gobernuari zuzendua, hura argitaratu eta biharamunetik hasita hilabeteko epean.
Hamalaugarrena.-Emandako diru-laguntzen publizitatea.
Deialdi honetako laguntzak hartzen dituztenen zerrenda Landa Garapeneko eta Ingurumeneko Departamentuko iragarki oholean argitaratuko da, Iruñeko Tutera kaleko 20an.
Iragarkiaren kodea: F0911730
