Iragarkia

7. ALDIZKARIA - 2008ko urtarrilaren 16a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

989/2007 EBAZPENA, azaroaren 10ekoa, Arriskuen Prebentziorako eta Lanaren zuzendari nagusiak emana, Nafarroako "Nekazaritza eta abeltzaintza" sektoreko lan hitzarmen kolektiboa erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 82/2007).

2007ko azaroaren 28an sartu da departamentu honetan "Nekazaritza eta abeltzaintza" sektoreko lan hitzarmen kolektiboaren testua, 44 artikuluz eta bi eranskinez (2007ko ordainsarien taula) osatua, sektoreko enpresaburuen elkarteen (UAGN eta UCAN) eta sindikatuetako batzuen (UGT eta CCOO) ordezkariek osaturiko negoziazio batzordeak 2007ko azaroaren 23an izenpetu eta onetsia.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Horrenbestez, Berrikuntza, Enpresa eta Enplegu kontseilariak irailaren 27an emandako 285/2005 Foru Aginduarekin bat, horren bidez izendatu baitziren Berrikuntza, Enpresa eta Enplegu Departamentuko zuzendari nagusien eta idazkari nagusi teknikoaren aldi baterako ordezkoak, organo horretako titularra kanpoan dagoenez,

EBATZI DUT:

1. Nafarroako "Nekazaritza eta abeltzaintza" sektorerako lan hitzarmen kolektiboa (kodea: 3100155) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jarri ahal dela Berrikuntza, Enpresa eta Enplegu kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2007ko abenduaren 10ean.-Lan Zerbitzuko zuzendaria, Arriskuen Prebentziorako eta Lanaren zuzendari nagusiaren ordezkoa, José María Andueza Azcona.

NAFARROAKO NEKAZARITZA ETA ABELTZAINTZA SEKTOREKO HITZARMEN KOLEKTIBOA

I. KAPITULUA

Xedapen orokorrak

1. artikulua. Lurralde eremua.

Lan hitzarmen hau eta bere arauak Nafarroako Foru Komunitate osoan aplikatuko dira.

Finkaren zati bat Nafarroako Foru Komunitatean eta beste zati bat kanpoan egonez gero, ustiapenaren elementu teknikoa dagoen erkidegoko arauak aplikatuko dira.

2. artikulua. Eremu funtzionala.

Nafarroan diharduten nekazaritza, basogintza eta abeltzaintza enpresek bete behar dute hitzarmen hau.

3. artikulua. Langileria.

Hitzarmen honetako xedapenak Nafarroako Foru Komunitateko nekazaritza sektoreko enpresaburu eta langileen arteko lan harremanetan aplikatuko dira.

4. artikulua. Iraunaldia.

Hitzarmen honek 2007ko urtarrilaren 1ean hartuko du indarra ondorio guztietarako, ekonomikoak barne, Aldizkari Ofizialean argitaratzen den eguna edozein dela, eta 2010eko abenduaren 31ra arte izanen du indarra.

Indarraldiaren azken egun hori iristen denean hitzarmen hau berez urtebete luzatuko da eta horrela izanen da urtero, indarraldia edo luzapena amaitu baino bi hilabete lehenago alderen batek behar den moduan amaiera iragarri ezean.

Alderen batek hitzarmen honen amaiera behar diren moduan eta epean iragarrita ere, haren arau guztiek indarrean iraunen dute beste hitzarmen bat sinatzen den arte.

5. artikulua. Konpentsazioa eta irenspena.

Hitzarmen hau sinatu duten aldeek, konpentsazioa eta irenspena direla eta, Langileen Estatutuaren 26. artikuluko 5. zenbakian xedatutakoari jarraituko diote.

6. artikulua. Batzorde paritarioa.

Nafarroako nekazaritza eta abeltzaintza sektoreko hitzarmen kolektiboaren Batzorde Paritarioa sortuko da. Hitzarmen hau sinatu dutenek osatuko dute, bi aldeen aholkulariak tartean.

Batzorde paritarioaren eginkizunak

a) Haren esku jartzen diren banakako eta taldeko gatazketan bitartekari, arbitraje eta adiskidetze lana egitea.

b) Akordioak interpretatzea.

c) Akordioen jarraipena egitea.

-Akordioak Batzorde Paritarioak denen intereseko arloetan hartzen dituen akordioak oinarrizko hitzarmen honen partetzat joko dira eta horiek ere betebeharrekoak izanen dira. Halako akordioak lan arloko agintaritzari igorriko zaizkio, erregistra ditzan.

-Osaera: Hitzarmena sinatu duten sindikatuen 4 ordezkarik (UGTko 2 eta CCOOko 2) eta enpresaburuen 4 ordezkarik osatuko dute Batzordea.

Funtzionamenduko erregelamendua

-Bilerak: Batzorde paritarioa zeregin hauetarako bilduko da:

Aurreko artikuluko 1 a) eta b) atalean aipatu eginkizunak betetzeko, esku hartzeko eskatzen zaionean.

-Deialdiak: Batzorde Paritarioa biltzeko deia alderdi sinatzaileetako edozeinek eginen du, eta horretarako aski izanen da idatzizko komunikazio bat, eguneko gai zerrenda azalduko duena.

Batzorde Paritarioa bilduko da gaiaren garrantziaren arabera komeni den epearen barnean, baina deialdia egin eta hamabost eguneko tartean gehienez.

Epe hori bukatu eta batzordea bildu ez bada, ondorio hau izanen da: agortutzat joko da Batzorde Paritarioaren esku-hartzea, eta interesatuak egokiak diren ekintzak gauzatzen ahalko ditu.

-Quoruma - Aholkulariak: Batzordea eratutzat joko da ordezkaritza bakoitzaren gehiengo soila bertaratzen denean. Aldeek bileratara joaten ahal dira bina aholkulari hartuta, gehienez.

-Akordioen baliozkotasuna: Batzordeak akordioak adosteko, edonola ere bi ordezkaritzetako bakoitzaren 100eko 60aren aldeko botoa beharko da.

Bilera bakoitzaren akta eginen da, eta idazkariek eta alderdi bakoitzeko ordezkari batek sinatuko dute.

-Helbidea: Jakinarazpen eta deialdietarako, Batzorde Paritarioak UAGNren bulegoetan izanen du helbidea (Zaragozako etorbidea, 21, 1. solairua, 31003 Iruña).

-Batzorde paritarioaren mende jarri beharra: Alderdiek batzorde paritarioaren mende jarri behar dituzte edozein ekintza judizial edo administratiboren aurretik sortzen diren interes orokorreko gai guztiak, nahiz horrek ez duen galarazten gero eskubide kolektiboak erabili ahal izatea. Nolanahi ere, onustearen printzipioari jarraituz negoziatu beharko da.

II. KAPITULUA

Sailkapen funtzionala

7. artikulua. Langileen sailkapena.

Langileak, eginkizunaren arabera, lanbide talde hauetan sailkatuko dira:

1-Teknikariak (1)

2.-Administrariak (3)

3.-Arduradunak eta langileburuak (8)

4.-Traktore-gidari eta makinistak (8)

5.-Espezialistak (8)

6.-Zaintzaileak (8)

7.-Etxezainak (8)

8.-Lanbide klasikoetakoak (8)

9.-Peoiak (9)

-Teknikariak goi mailako titulua edo eskola teknikoko titulua dute eta teknikari lanak, zuzendaritza lan espezializatuak edo aholkulari lanak egiten dituzte.

-Administrazioko langileak enpresan bulegoko lanak egiten dituzten langileak dira. Zehaztapenak:

a) Administrari-ofizialak: lanbidea ikasi eta hartan diharduten langileak dira.

b) Administrari laguntzaileak: bulegoko oinarrizko lanak egiten dituzten langileak dira.

-Arduradunak eta langileburuak (8) enpresan egiten diren lanak zuzenean zaindu eta zuzentzeko ardura dute.

-Traktore-gidari eta makinistak: behar diren ezagutza praktikoak izanik traktorea edo nekazaritzako antzeko makinaren bat gidatu eta erabiltzen dute, baita zaindu eta mantendu ere.

-Espezialistak: talde honetako langileak, praktika jarraitua dela bide, ezagutza kalifikatuak edo horien parekoak eskatzen dituzten lanetan ari dira; adibidez, artzainak, behizainak, inausleak, txertatzaileak, sulfatatzaileak eta motokultore- gidariak.

-Guardak: finka bat edo gehiago zaintzeko kontrataturiko langileak dira.

-Etxezainak talde honetako langileak finkan bizi dira. Beste langileen eginkizunez gain, eraikinak zaindu eta garbitzen dituzte eta abereak gobernatu eta elikatzen dituzte, ustiategia txikia izateagatik halako lanetarako langile berariazkorik ez dagoenean.

-Lanbide klasikoetakoak: industria eta zerbitzu arloetako lanbide klasikoren bat dute (igeltseroa, gidaria, mekanikaria etab.) eta beren lanbideko ohiko lanak egiteko kontratatzen dituzte, nekazaritzako ustiategiko oinarrizko lanen osagarri edo lagungarri gisa.

-Peoia: aurreko kategorietatik kanpoko langileak dira eta gehienbat indar fisikoa behar den lanetan ari dira.

Hitzarmen kolektibo honetako langileen sailkapena azalpen moduan jarri da eta ez du esan nahi kategoria berririk ezin sortu denik edo kategoria horiek guztiek beterik egon behar dutenik.

8. artikulua. Aldi baterako langileen eskubideak.

Behin-behineko langileek enpresaren plantillako gainerako langileek bezalako eskubideak izanen dituzte.

Merkatuaren egoerak, zereginen pilaketak edo eskari handiak hala eskatzen duenean, enpresaren ohiko jarduera izanik ere, enpresak berariazko kontratuak egiten ahalko ditu, gehienez zortzi hilabeterako, kausa horiek azaltzen diren unetik hasita.

9. artikulua. Eskubide sindikalak.

Hitzarmen honetan aurreikusita ez dauden gai guztietarako, legezko xedapen aplikagarriei jarraituko zaie.

10. artikulua. Osotasunarekiko lotura.

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira.

Lan administrazioko agintaritzak hitzarmenaren atalen bat indarra duten legeen kontrakoa dela irizten badio, hitzarmen osoa berriz aztertu beharko da.

11. artikulua. CLangileen sailkapena iraupenaren arabera.

a) Finkoak.

Enpresan epemugarik eta etenik gabe lan egiteko kontratatzen diren langileak dira.

b) Aldizkako finkoak.

Enpresaren jardueran ari diren langile finkoak baina aldizkakoak izanez gero, jarduera egin behar duten bakoitzean deitu beharko zaie eta lan ondorioetarako aldizkako langile finkoak izanen dira.

Antzinatasunaren araberako hurrenkera zehatzean deitu beharko zaie espezialitate bakoitzaren barrenean.

Jarduera zikliko edo aldizkakoak amaitu ahala, aldizkako langile finkoek lanpostua utziko dute antzinatasunaren araberako alderantzizko hurrenkera zehatzean, hau da, enpresan denbora gutxien daramatenak utziko dute lanpostua lehenik eta horrela hurrenez hurren, jarduera zikliko edo aldizkakoa bukatu arte.

Aldizkako langile finkotzat hartuko dira bost urtean bi aldiz kontratatuak izan direnak behin-behinekoz jarduera zikliko edo aldizkakoak egiteko.

c) Aldi baterakoak.

Aldi mugatu baterako kontrataturiko langileak dira. Haien araudiari dagokionez, Langileen Estatutuan eta hura garatzen duten arau osagarrietan xedatutakoari jarraituko zaio.

d) Behin-behinekoak.

Merkatuaren unean uneko eskakizunei, lan pilaketari edo eskari handiari erantzuteko kontrataturiko langileak dira, baita enpresaren ohiko jarduera egiten dutenean ere; haien kontratuaren iraupena zehaztu behar da eta kontratua osorik bete behar da.

12. artikulua. -Lan kontratuak.

Langileen kontratuak idatziz eginen dira, indarra duen legeriak hala eskatzen duenean. Kontratua Nafarroako Enplegu Zerbitzuan inskribatu ondoren langileari kopia emanen zaio.

Urtarrilaren 7ko 2/1991 Legea aplikatu behar den kasuetan, langileak sinatutako kontratuaren kopia bat emanen zaie langileen legezko ordezkariei.

III. KAPITULUA

Lanaldia, oporrak eta lizentziak

13. artikulua. Lanaldia eta lan egutegia.

Urtean 1.758 lanordu eginen dira eta astean 39 ordu eta 20 minutu. Lanorduak astelehenetik larunbateko 14:00etara bitartean banatuko dira, eta gutxienez 6 lanordu jarraian egiten badira, ogitartekorako eguneko 20 minutuak benetan egindako lan denboratzat hartuko dira.

Langile bakoitzak egun baterako eskubidea izanen du bere aferetarako eta egun hori benetan egindako lan denboratzat hartuko da. Egun hori 2007. urtetik hasita hartu ahal izanen da.

Lanaldiari buruz lehendik ezarrita dauden arauak beteko dira.

Hala ere, enpresek artisautza erako jarduera berezia egiten dutela eta produkzioa aldizkakoa eta eguraldiaren mendekoa dela kontuan hartuta, langileen legezko ordezkariekin urteko lanaldi malguak adostu ahalko dira eta enpresa bakoitzak bere beharren arabera banatu ahal izanen du lanaldia, lan gutxi dagoen garaiak lan handiko garaiekin konpentsatuz. Betiere urteko lanaldia 1.758 ordukoa izanen da 2007., 2008., 2009. eta 2010. urteetan, eta indarra duten legezko xedapenak beteko dira.

Enpresek urteko egutegia eginen dute arestian aipatutako asteko lanaldiaren arabera. Urtearen hasieran egutegi hori langileen ordezkariei jakinaraziko diete eta haiekin negoziatuko dute.

Eguneko lanaldia maiatzaren 2tik abuztuaren 31ra bitartean jarraitua izanen da, enpresan egin beharreko jarduerak aukera ematen duen guztietan.

14. artikulua. Oporrak.

Hitzarmen honen eraginpeko langileek, enpresan urtebetez lan eginez gero, urtean 30 egun naturaleko oporrak hartzeko eskubidea izanen dute, hitzarmeneko lansariaz ordainduak. Gainerako langileek lan egindako denboraren araberako opor egunetarako eskubidea izanen dute.

Opor egunak jarraian hartuko dira eta oporrak bi zatitan banatu ahal izanen dira gehienez, langileak besterik adierazi ezean.

Enpresa edo ugazaba eta langileak ados jarriko dira oporrak noiz hartu erabakitzeko, kontuan izanik hitzarmen honetan araututako lanak noiz diren urrienak.

Maiatzaren 15a berreskuratu ezin den jaieguna izanen da, eta lan egutegiko beste 14 jaiegunei gehituko zaie.

15. artikulua. Ordaindudatko lizentziak eta baimenak.

Enpresaburuak honako kasu hauetan lizentzia emanen die eskatzen duten langileei, ordainsari eta guzti:

a) Anai-arreben eta odoleko edo ezkontza bidezko lehen mailako ahaideen heriotzagatik, eritasun larriagatik edo ospitaleratzeagatik, 3 lanegun.

b) Aitona-amonen, biloben eta koinatu-koinaten heriotzagatik, bi egun natural.

c) Semea edo alaba jaiotzeagatik, hiru egun natural, horietatik bi haurra jaiotzen denetik aurrera eta hirugarrena hurrengo hamar egunen barrenean.

d) Ezkontzeagatik, 15 egun.

e) Guraso edo seme-alaben ezkontzagatik eta seme-alaben bataioagatik, bi egun natural.

f) Bizilekuz aldatzeagatik bi egun natural, edo hiru egun Foru Komunitatetik kanpora aldatuz gero.

g) Sei langile baino gehiago dituzten enpresetan, sindikatu sinatzaileek antolatzen dituzten prestakuntza sindikaleko ikastaroetara joateko, bost egun natural, ikastaroa lanorduetan ematen bada, eta betiere lan hauek egiten diren garaietatik kanpo: uzta biltzea, ereitea, abereen erditzea, ureztapena, izurriak deuseztatzea, produktu galkorrak atondu eta prestatzea.

Hona hemen zenbat langilek har dezaketen aldi berean horrelako baimena:

-Gehienez hogeita hamar langile dituzten enpresetan, batek.

-Hogeita hamaika langiletik berrogeita bederatzira bitarteko enpresetan, hiruk.

-Berrogeita hamar langiletik ehunera bitarteko enpresetan, bostek.

--Ehun langiletik aurrerako enpresetan, bi langilek ehun langileko edo zatikiko.

h) Bederatzi hilabetetik beheitiko seme edo alabari esnea ematen dioten langileek eskubidea dute lanetik ordu betez lekutzeko. Denbora hori bi zatitan bana dezakete. Emakumezko langileek eskubide hori ohiko lanaldiaren ordu erdiko murrizketarekin ordezkatzen ahal dute, helburu berbererako, edo haurrari esnea emateko ordubeteko baimena lanaldi osoetan metatzen ahal dute. Baimen hori amak nahiz aitak hartzen ahal dute, beren nahierara, biak lanean ari badira.

i) Zortzi urtetik beherako haurra edo ordaindutako lanik egiten ez duen eta ezgaitasunen bat duen norbait zaindu behar izanez gero, edo bigarren gradura arteko odol-ahaidetasun edo ezkontza-ahaidetasuneko familiakoren bat zaindu behar izanez gero, bere kasa bizitzeko gauza ez bada eta inolako lan ordaindurik ez badu, lanaldia murrizten ahalko da, soldata proportzioz murriztuta, zortziren bat gutxienez eta erdia gehienez ere.

j) Lehen graduko odol-ahaidetasun edo ezkontza-ahaidetasuneko familiakoen kirurgia anbulatorioagatik, 2 egun.

k) Haurdunaldiko ariketak egitera eta erditzeko teknikak ikastera joateko, behar den denbora.

l) Genero indarkeriaren biktimentzat, behar adina denbora legezko ekintzak eta poliziarekiko kudeaketak egiteko eta medikuen kontsultetara joateko, tratamendu psikologikoa eta taldeko terapiak barne.

m) Langileek bakarka edo taldean lehendik onartuta dituzten gainerako baimen ordainduak.

n) Berdintasun Legean gai honi buruz ezarritakoa zehatz-mehatz beteko da.

Ezkondu gabeko bikoteak, beren egoera behar bezala frogatuz gero, ezkondutako bikoteekin parekatuko dira artikulu honetan aipatutako eskubideei dagokienez.

16. artikulua. Osasun kontsultategietara joatea.

Lanorduetan klinikara eta medikuaren kontsultara joaten direnei hitzarmeneko lansaria ordainduko zaie, lanorduetatik kanpoko kontsulta ordutegirik ez badago.

Langileek behar bezala justifikatu beharko dituzte arrazoi horiengatiko absentziak.

17. artikulua. Eguraldi txarra.

Eguraldi txarragatik lanik egiten ez den egunak ere besteak bezala ordainduko dira, langilea lantokira agertzen bada ohiko orduan eta bertan egoten bada enpresaburuaren esanetara.

Hitzarmen honen eraginpeko langile ez-finkoen kasuan, lanaldi zatitua dutenak eta lanaldi jarraitua dutenak bereiziko dira.

Lehenbizikoei, lanaldiaren lehen zatian eteten bada lana, lanaldi erdia ordainduko zaie. Lanaldiaren bigarren zatian eteten bada lana, lanaldi osoa ordainduko zaie.

Lanaldi jarraitua dutenei, lehenbiziko hiru orduetan eteten bada lana, lanaldi erdia ordainduko zaie. Hirugarren lanordutik aurrera eteten bada lana, lanaldi osoa ordainduko zaie.

IV. KAPITULUA

Ordainsariak

18. artikulua. Oinarrizko soldata.

-2007. urterako lansariak %5 igoko dira.

-2008. urterako lansariak %5 igoko dira.

-2009. urterako lansariak %5 igoko dira.

-2010. urterako lansariak %5 igoko dira.

Urte bakoitzaren hasieran lansarien taulak eginen dira itundutako %5eko igoera aplikatuz; behar izanez gero igoera berrikusi eginen da, benetako KPIa itundutako %5a baino handiagoa bada, eta atzerakinak ordainduko dira.

19. artikulua. Antzinatasuna.

Iraupenaren sari gisa, hitzarmen honen eraginpeko langileek kopuru hauek jasoko dituzte:

Lanean hasi zen egunetik lehenbiziko hirurtekoa bete eta gero langileak hitzarmeneko bost eguneko lansaria jasoko du.

-Hamabost urteko antzinatasuna bete arte (hau da, 4., 5., 6., 7., 8., 9., 10., 11., 12., 13., 14. eta 15. urteetan) antzinatasun plusari hitzarmeneko hiru egun eta erdiko lansaria gehituko zaio urte bakoitzean.

-15 urteko antzinatasuna betetzen denetik 20 urtekoa bete arte (hau da, 16., 17., 18., 19. eta 20. urteetan), plus horri hitzarmeneko bi egun eta erdiko lansaria gehituko zaio urte bakoitzean.

20. artikulua. Igande eta jaiegunetako lana.

Zenbait lan (uzta biltzea, abereen erditzeak, ureztatzea, produktu galkorrak atondu eta prestatzea) geroraezinak dira eta langileek nahitaez egin beharko dituzte igande eta jaiegunetan ere.

Horrelakoetan langileek baldintza hauen arabera jasoko dute ordaina:

-Igandean lanaldi erdia egiteagatik atseden egun oso bat hartuko da, gehi 31,5 euro 2007. urtean, 33,08 euro 2008. urtean, 34,73 euro 2009. urtean eta 36,47 euro 2010. urtean.

Igandean lanaldi osoa egiteagatik bi atseden egun oso hartuko dira, gehi 63 euro 2007. urtean, 66,15 euro 2008. urtean, 69,46 euro 2009. urtean eta 72,93 euro 2010. urtean.

21. artikulua. Aparteko ordainsariak.

Hitzarmen honetara bildutako langile guztiek aparteko hiru paga jasoko dituzte; hitzarmeneko hogeita hamar eguneko lansaria kobratuko dute bakoitzean.

Honela ordainduko dira ordainsari horiek: Lehenbizikoa uztailean ordainduko da, eta bigarrena abenduaren 22an.

Mozkinetan partea izatea: Hitzarmen honen eraginpeko langileek "mozkinen paga" deitzen den aparteko paga bat jasoko dute urtean, hitzarmeneko lansaria adinakoa.

Mozkinen paga maiatzaren 15ean ordainduko da.

22. artikulua. Ordu estrak.

Bi alderdi negoziatzaileek konpromisoa hartu dute ez dela aparteko ordurik eginen, salbu eta ustekabekoengatik ezinbestez egin behar direnean. Aparteko orduengatik, ohiko lanorduaren balioa baino %75 gehiago ordainduko da, edo langileak nahi badu atseden denbora baliokidea hartuko du.

23. artikulua. Urruntasun plusa.

Ustiapenaren elementu teknikotik lan egiten den tokira 2 kilometro baino gehiago badaude, enpresek langileei kilometro bakoitzeko 0,23 euro ordainduko diete hirugarren kilometrotik aurrera, bai haranzko bidean bai itzulerakoan.

Enpresaburuak langileei garraiobide egokiak jartzen badizkie, ez da kopuru hori ordainduko.

24. artikulua. Gaueko lana.

Egunez egin ohi diren jarduera edo zereginetako langileek 22:00etatik 06:00etara bitartean lan egin behar izanez gero, beren oinarrizko lansariaren %25eko osagarria jasoko dute.

Lanaldiaren zati bat gauez eta bestea egunez eginez gero, gaueko orduei dagokien osagarria ordainduko da.

25. artikulua. Dietak.

Langileren batek bidaia egin behar badu lanen bat egiteko eta gaua bere ohiko bizilekua duen herritik kanpo eman behar badu, eguneroko dieta ordainduko zaio, bere eguneko lansaria adinakoa, joaneko eta itzulerako egunak barne.

Egun berean joan eta bere bizilekura itzultzerik badu, langileari dieta erdia ordainduko zaio.

Aurreko lerroaldean xedatutakoa ez zaie aplikatuko Bardeako artzaintza lanei eta antzekoei.

26. artikulua. Aldi baterako ezintasuna.

Lanbide eritasunak edo lan istripuak eragindako aldi baterako ezintasuna dagoenean, enpresak langilearen prestazioa osatuko du egiazko lansariaren %100era ailegatu arte. Osagarri hori ezintasun egoera hasten den egunetik ordainduko da, gehienez hemezortzi hilabete igaro arte. Horrek guztiak ez du galaraziko lehendik ezarrita dauden baldintza hobeak aplikatzea.

Eritasun arruntak edo lanetik kanpoko istripuak eragindako aldi baterako ezintasuna dagoenean, enpresak langilearen prestazioa osatuko du kotizazio oinarriaren %100era ailegatu arte. Ezintasun egoera hasi eta zortzigarren egunetik aurrera ordainduko da osagarri hori, gehienez hamabi hilabete igaro arte. Horrek guztiak ez du galaraziko lehendik ezarrita dauden baldintza hobeak aplikatzea.

27. artikulua. Istripu asegurua.

Hitzarmen honetako langile guztiek aseguru kolektibo baten estaldura izanen dute, hura kontratatzen duen enpresaren kargura, gertaera hauetarako:

a) Lan istripuz edo lanbide eritasunez hiltzea:

-2007an: 34.392,45 euro.

-2008an: 36.112,39 euro.

-2009an: 37.918,01 euro.

-2010ean: 39.813,91 euro.

b) Guztizko edo erabateko baliaezintasun iraunkorra edo baliaezintasun handia, lan istripu edo lanbide eritasunaren ondorioz:

-2007an: 43.852,50 euro.

-2008an: 46.051,43 euro.

-2009an: 48.354,00 euro.

-2010ean: 50.771,50 euro.

Enpresek poliza horren kopia aurkeztuko dute hitzarmen honetan itundutako baldintzak betez, eta poliza horrek estaliko ditu arriskuak zuzenean.

Aurreko lerroaldeetan aipatutako poliza hilabeteko epean sinatu behar da, hitzarmen hau aldizkari ofizialean argitaratzen denetik hasita. Ordura arte indarra izanen du 2006ko hitzarmen kolektiboaren 27. artikuluak, eta bera aplikatuko da.

28. artikulua. Erremintak.

Enpresak jarriko ditu lanerako tresnak.

Enpresaburuak jartzen ez baditu edo langileak ekarri behar baditu, biak ados jarriko dira langileari plus bat ordaintzeko tresnen higaduragatik.

V. KAPITULUA

Lan segurtasuna eta higienea

29. artikulua. Osasun azterketa.

Langileek eskatuz gero, enpresek prebentziozko osasun azterketa antolatu beharko dute urtean behin, gutxienez. Azterketa hori lanorduetan eginen da.

30. artikulua. Higiene neurriak.

Enpresaburuak lanaren ordainetan langileari edo langilearen familia osoari bizilekua ematen badio, baldintza egokiak beteko dira, pertsonen egoera eta sexua kontuan hartuz eta moraltasuna, garbitasuna eta pertsonen duintasuna zainduz.

Langileentzako bizilekua denean, Laneko Arriskuen Prebentzioari buruzko Legean eta horrekin bat datozen gainerako xedapenetan ezarritako neurriak izanen ditu, langileen kopuruaren araberakoak. Argindarra, ur hotza eta beroa eta edukiaren araberako aireztapen nahikoa eta zuzenekoa izanen ditu. Bizileku horiek ukuilu eta zabortegietatik urrun egonen dira; hormak karez edo zementuz estalita izanen dituzte bederen, eta zoru sendoa eta iragazgaitza izanen dute, garbitu ahal izateko modukoa. Jangela izanen dute, baita komunak eta abarrekoak ere.

31. artikulua. Laneko arropa.

Enpresak lan guztietarako arropa egokiak jarriko ditu: sufreztatzekoak, sulfatatzekoak etab. Laneko arropa horiek laster higatu edo hondatzen dira eta behar adina emanen zaizkie langileei.

Halaber, uretan edo lokatzetan egin behar diren lan guztietarako, langileei oinetako iragazgaitz egokiak emanen zaizkie.

Bustitako landare edo zuhaitzen artean egin behar diren lanetarako ere langileei jantzi iragazgaitzak emanen zaizkie.

VI. KAPITULUA

Hutsegiteak eta zehapenak

32. artikulua. Hutsegiteak.

Hutsegitetzat hartuko dira indarra duten legezko xedapenek eta, oro har, oinarrizko hitzarmen honek ezarritako betebeharren kontrako ekintzak edo ez-egiteak.

Garrantziaren arabera, hutsegiteak honela sailkatuko dira: arinak, larriak eta oso larriak.

33. artikulua. Hutsegite arinen sailkapena.

Ondokoak joko dira hutsegite arintzat:

1.-Hilabete baten barnean lanera behin, bitan edo hirutan berandu iristea, bidezko arrazoirik gabe.

2.-Lanerako ezintasun iragankorreko baja edo lanera ez agertzearen bidezko arrazoiak bi egun balioduneko epean ez jakinaraztea, hori egiterik ez dela izan frogatu ezean.

3.-Lanetik denbora gutxirako alde egitea, bidezko arrazoirik gabe.

4.-Norberaren garbitasun eta txukuntasun eza, noizbehinkakoa denean.

5.-Egun batez lanera ez agertzea, bidezko arrazoirik gabe.

6.-Noizean behin mozkortuta agertzea.

34. artikulua. Hutsegite larrien sailkapena.

Honako hauek dira hutsegite larriak:

1.-Lautik zortzira bitarteko hutsegiteak, lanera berandu iristeagatik, 30 egun naturaleko epearen barnean.

2.-Lanera bi egunez ez agertzea 30 eguneko epean, bidezko arrazoirik izan gabe.

3.-Lanorduetan edozein motatako jokoetan ibiltzea.

4.-Beste langile bat lanean agertu dela simulatzea, haren sinadura, fitxa edo lantokiko txartela erabiliz.

5.-Lanean zuhurtziarik gabe jokatzea. Jokabide hori hutsegite oso larritzat jo daiteke, baldin eta langilea bera edo lankideak istripua izateko arriskuan jartzen badira edota instalazioak edo salgaiak hondatzeko edo su hartzeko arriskuan.

6.-Lanorduetan norberaren lanak egitea, bai eta enpresaren tresnak norberarentzat erabiltzea ere, lanalditik kanpo izan arren, horretarako baimenik izan gabe (hutsegite arina izan liteke).

7.-Langileak ikusitako egintzak edo hutsegiteak ezkutatzea, horrek kalte larriak sortzen baditu, eta instalazioetan ikusten den edozein arazo garrantzitsuren berri buruei berehala ez ematea.

8.-Norberaren akatsak nahita ezkutatzea, enpresari kalteak sortzen ahal dizkioten arren.

35. artikulua. Hutsegite oso larrien sailkapena.

Hutsegite oso larriak honako hauek dira:

1.-Lanera maiz berandu iristea eta ez joatea, inolako justifikaziorik gabe.

A.-Lanera zortzi aldiz baino gehiagotan berandu iristea arrazoirik gabe, hogeita hamar egun naturaleko epean, eta lanera hamasei aldiz berandu iristea arrazoirik gabe, 180 egun naturaleko epean.

B.-Lanera ez joateagatiko hutsegitea: lanera hiru egunez ez agertzea, arrazoirik eman gabe, hiru hilabeteko epean.

2-Agindutako kudeaketetan iruzur egitea eta enpresari, lankideei edo beste edozeini lantoki barnean nahiz lanean beste edozein lekutan aritzean ebastea edo lapurtzea.

3.-Enpresaren lanabes, makineria, aparatu, instalazio, eraikin, altzari edo agiriak desagerrarazi, ezdeus bihurtu edo hondatzea.

4.-Enpresaren edo langileen isilpeko eskutitzen edo agirien sekretua haustea.

5.-Enpresakoa ez den norbaiti nahitaez isilpean eduki beharreko datuak ezagutaraztea.

6.-Nagusi, mendeko edo lankideak jotzea edo iraintzea, norberaren defentsarako ez bada.

7.-Istripu larriak eragitea, zabarkeria edo zuhurtziagabekeria desenkusaezinagatik.

8.-Lankideekin liskarrak eta iskanbilak maiz sortzea, arrazoirik gabe.

9.-Segurtasun eta higieneagatik debekatuta dagoen tokietan erretzea. Debeku hori argi azaldu beharko da halako tokietan, kartelen, banderen edo beste edozein sistema egokiren bidez.

10.-Kontratuko onustea haustea, eta laneko konfiantza-abusua.

11.-Ohiko edota itundutako errendimendua luzaroan eta nahita gutxitzea.

36. artikulua. Zehapenak.

Hutsegiteen arabera, zehapen hauek ezarriko dira:

1.-Hutsegite arinengatik:

-Hitzezko kargu-hartzea.

-Idatzizko kargu-hartzea.

-Egun bateko edo bi eguneko enplegu-soldaten etenaldia.

2.-Hutsegite larriengatik:

-Hurrengo oporraldiko txanda hautatzeko eskubidea galtzea.

-Hiru egunetik hamabostera bitarteko enplegu-soldaten etenaldia.

-Goragoko kategoria batera pasatzeko gaitasuna kentzea hiru urterako gehienez.

3.-Hutsegite oso larriengatik:

-Hamasei egunetik hirurogeira bitarteko enplegu-soldaten etenaldia.

-Goragoko kategoria batera pasatzeko gaitasuna kentzea bost urterako gehienez.

-Oporraldiko txanda hautatzeko eskubidea galtzea.

-Lanetik bidaltzea.

37. artikulua. Zehapenak betetzea.

Zehapen guztiak ematen diren unetik beretik hasita betearaziko dira; horrek ez du alde batera uzten zehapena jasotzen duenak jurisdikzio eskudunean erreklamazioak egiteko duen eskubidea.

38. artikulua. Preskripzioa.

Hutsegite arinak hamar egunen buruan preskribatuko dira, larriak hogei egunen buruan eta oso larriak hirurogeiren buruan, enpresa hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan.

39. artikulua. Prozedura.

1.-Enpresako zuzendaritzari edo haren ordezkariari dagokio sariak eman edo zehapenak ezartzeko ahalmena.

2.-Enpresak langileen legezko ordezkariei eta ordezkari sindikalari, hala denean, jakinaraziko die hutsegite larrien eta oso larrien ondorioz langileei ezartzen zaizkien zehapenak.

3.-Hutsegiteak arinak direnean ez da espedientea ireki beharko. Hutsegite larrien edo oso larrien ondoriozko zehapenak ezartzeko ere ez da espedienterik instruitu beharko. Nolanahi ere, horiek idatziz jakinaraziko dira, eta idazkian zehatz azalduko da zer egitatek sortu duen hutsegitea eta nolako zehapena ezarriko den, non ez den hitzezko kargu-hartzea.

Gertaerak argitzearren, enpresak erabakitzen badu espedientea irekitzea zehapenak ezartzeko, interesatuak eskubidea izanen du deskargu plegua aurkezteko eta proposatzen dituen eta instruktorearen ustez bidezkoak diren frogak gauzatzeko, eginbideak hasten direnetik hilabeteko epean gehienez.

4.-Hutsegite larri edo oso larri baten ondoriozko zehapena ezartzen zaienean karguetan dauden langileen legezko ordezkariei edo agintaldia bukatu eta urtebetea pasatua ez dutenei, aginduzkoa izanen da espedientea irekitzea, arau hauei jarraikiz:

a) Enpresak espedientea ireki dela jakinaraziko dio langileari eta, horrekin batera, espedientean azaltzen diren gertaerak biltzen dituen kargu orriaren berri emanen dio.

b) Enpresak idazkari bat eta insktruktore bat, inpartzialak, izendatuko ditu, eta horien izenak espedientea irekitzeko idazkian berean azalduko dira.

c) Instruktoreak idazki hori interesatuari igorriko dio, alegazioak egin eta bidezkoak iruditzen zaizkion frogak gauza ditzan bost eguneko epean.

d) Espediente irekitzea bukaturik, enpresak ondokoak jakinaraziko dizkio langileari, idatziz: ezarritako zehapena, zein egunetatik hasita izanen dituen ondorioak eta zehapenaren oinarri diren gertaerak.

40. artikulua. Enpresaburuen lan arloko arau-hausteak.

Apirilaren 7ko 8/1988 Legean eta indarra duten gainerako legezko xedapenetan ezarritakoa aplikatuko da.

VII. KAPITULUA

Eskubide sindikalak

41. artikulua. Eskubide sindikalak.

Langileek nahi duten sindikatuan sartzeko eskubidea dute eta enpresek eskubide hori errespetatuko diete; ezin izanen dute enplegua baliatu langilea sindikatu batetik irtetera edo ez afiliatzera behartzeko.

Enpresek ezin izanen dute inor kaleratu edo beste modu batera zigortu bere afiliazio edo jarduera sindikalarengatik.

Enpresek onartzen dute sindikatuetan afiliatuta dauden langileek badutela eskubidea bilerak egiteko, kuotak biltzeko eta sindikatuaren informazioa banatzeko, lanorduetatik kanpo eta enpresen ohiko jarduera eragotzi gabe. Sindikatuek informazioa bidali ahalko dute afiliatu multzo nahiko handia eta nabarmena duten enpresetara, banatu dadin, betiere lanorduetatik kanpo eta produkzio prozesua eten gabe.

42. artikulua. Langileen legezko ordezkarien bermeak.

Langileen ordezkaririk ezin izanen dute kaleratu ezta zigortu ere, bere eginkizunetan ari den bitartean eta kargua utzi ondoko urtean, salbu eta kargu uztea berritzearen edo dimisioaren ondorioz izan bada eta kaleratzea edo zehapena langilea bere ordezkotza lanetan aritzearen ondorioa bada. Kaleratzea edo hutsegite larri eta oso larriengatiko beste edozein zehapen kontraesaneko espedientean tramitatu behar da. Espedientearen interesdunari eta langileen legezko ordezkariei entzunen zaie.

Arrazoi teknologiko edo ekonomikoen ondoriozko etenaldi edo amaitze kasuetan enpresan edo lantokian gelditzeko lehentasuna dute gainerako langileekin alderatuta.

Ezin izanen dira diskriminatu promozio ekonomikoan ez profesionalean ere, euren ordezkaritza eginkizunetan aritzeagatik.

43. artikulua. Ordu sindikalen kreditua.

Halaber, ez dira Legeak ezarritako gehieneko ordu kopuruaren barnean zenbatuko langileen ordezkariak hitzarmen kolektiboetako negoziazio batzordeetako kide izendatzen dituztenean kopuru horren gainetik hartzen diren orduak, ezta negoziazio horietarako bilkura ofizialak egiteko orduak ere, dena delako enpresa negoziazio-eremukoa denean.

Legezko gehieneko muga gainditu gabe, langileen legezko ordezkariek dituzten ordu ordainduak hartu ahal izanen dira sindikatuek, prestakuntza institutuek eta beste entitate batzuek antolatutako prestakuntza ikastaroetara joan ahal izan daitezen.

Enpresa batzordeetako kideek eta langileen ordezkariek egungo legerian ematen diren orduak baino 4 gehiago izanen dituzte, beren jarduera sindikalerako kreditu gisa.

-6 langiletik 100era bitartean: 19 ordu hilean.

-101 langiletik 250era bitartean: 24 ordu hilean.

-251 langiletik 500era bitartean: 34 ordu hilean.

-501 langiletik 750era bitartean: 39 ordu hilean.

-Ordu sindikalak metatzea. Enpresa batzordeko kideek eta langileen ordezkariek hitzarmen honetan ezarritako ordu ordainduak izanen dituzte hilean beren ordezkaritza lanak egiteko, segurtasun eta osasun arloko prebentziorako orduak barne.

Hileko ordu ordainduen metaketari dagokionez, batzordeko kideek eta langileen ordezkariek bakoitzari dagozkion orduen %100era bitarte laga diezaiokete beren sindikatuko langile bati. Lagako diren orduak hilean hilekoak izanen dira, eta orduak laga baino hilabete lehenago, gutxienez, esan behar zaio enpresako zuzendaritzari.

Beren sindikatuetan probintziako idazkari kargua edo nazioko edozein kargu duten langileek eszedentzia eskatzen ahal dute. Kargua duten bitartean eszedentzian jarraituko dute, eta kargua amaitu eta hilabeteko epean eskatuz gero enpresara itzuliko dira.

VIII. KAPITULUA

Lanbide prestakuntza

44. artikulua. Etengabeko prestakuntza.

Hitzarmen honen sinatzaileek konpromisoa hartu dute sektoreko prestakuntza beharrak aztertzeko eta behar horiek asetzeko Nekazaritza, Basogintza eta Abeltzaintza sektoreko Etengabeko Prestakuntzarako Akordio Nazionalean oinarrituta.

Prestakuntza lanorduetan izanen da, enpresak eskatutakoa baldin bada.

LEHEN ERANSKINA

Laneko gatazkak konpontzea

Hitzarmen hau sinatu duten aldeek erabaki dute hitzarmen hau interpretatzean sortzen diren desadostasun eta gatazka guztiak, bai taldekoak bai banakakoak, Nafarroako Lan Gatazkak Konpontzeko Auzitegiaren esku jartzea, bitartekotza eta adiskidetze faseetan. Beren konpromisoa agertu dute ahaleginak egiteko ukituriko alderdiak Lan Gatazkak Konpontzeko Auzitegiaren prozedura arbitralaren esanetara jar daitezen.

Klausula hau, beraz, alderdiak Lan Gatazkak Konpontzeko Auzitegiari atxikitzearen adierazpena da, Langileen Estatutuaren 83. artikuluak arautzen duen eraginkortasuna du eta, horren ondorioz, itunak enpresaburuak, ordezkari sindikalak eta langileak behartzen ditu beren desadostasunak epaiketara jo aitzin aipatu auzitegiaren bitartekotza eta adiskidetze prozeduretan azaltzera. Hori horrela, ez da nahitaezkoa atxikimendu espresa eta banakakoa egitea, arbitrajera borondatez lotzeko ez bada, zeina bultzatzeko eta sustatzeko konpromisoa hartu baitute lan hitzarmen honen sinatzaileek.

BIGARREN ERANSKINA

Nafarroako nekazaritza eta abeltzaintza sektoreko hitzarmenaren behin-behineko lansari taula, 2007ko urtarrilaren 1etik 2007ko abenduaren 31ra bitartean aplikatzekoa

LANBIDE KATEGORIA OINARRIZKO LANSARIA HILEAN

TEKNIKARIAK 1.090,53

ADMINISTRARI-OFIZIALAK 851,26

ADMINISTRARI LAGUNTZAILEAK 753,40

ARDURADUNAK 905,67

TRAKTORE-GIDARI ETA MAKINISTAK 856,47

ESPEZIALISTAK 774,19

ZAINTZAILEAK 772,95

ETXEZAINAK 772,95

LANBIDE KLASIKOETAKOAK 927,37

PEOIAK 742,50

2007. urterako behin-behineko lansari igoera kalkulatzeko, 2006ko lansarien taulei hitzarmenean itundutako %5a aplikatu zaie.

Iragarkiaren kodea: F0719175