Iragarkia

69. ALDIZKARIA - 2008ko ekainaren 4a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

342/2008 EBAZPENA, apirilaren 23koa, Arriskuen Prebentziorako eta Lanaren zuzendari nagusiak emana, Noaingo "Aspace-Centro Especial de Empleo" enpresaren lan hitzarmen kolektiboa erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 45/2008).

Departamentu honetan 2008ko apirilaren 16an sartu da "Aspace-Centro Especial de Empleo" enpresaren lan hitzarmen kolektiboaren testua, 43 artikuluz, azken 2 xedapenez, xedapen gehigarri batez eta 2 eranskinez (2008rako ordainsarien taula) osatua, enpresaren ordezkariek eta enpresa batzordeak (LAB, CCOO, ELA eta UGT) 2008ko martxoaren 28an sinatu eta onetsia.

Berrikuntza, Enpresa eta Enplegu Departamentua da Lan Hitzarmen Kolektiboaren testua erregistratu, gorde eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Horiek horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,

EBATZI DUT:

1. Noaingo "Aspace-Centro Especial de Empleo" enpresaren lan hitzarmen kolektiboa (kodea: 3107912) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jarri ahal dela Berrikuntza, Enpresa eta Enplegu kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2008ko apirilaren 23an.-Arriskuen Prebentziorako eta Lanaren zuzendari nagusia, Imelda Lorea Echavarren.

FUNDACION ASPACE NAVARRA PARA EL EMPLEO ERAKUNDEAREN ENPLEGU ZENTRO BEREZIKO III. HITZARMEN KOLEKTIBOA

I. TITULUA

Xedapen orokorrak

1. artikulua. Xedea.

Hitzarmen kolektibo honen bitartez, Fundación Aspace Navarra para el Empleo erakundeak bere Enplegu Zentro Berezian hitzarmen honen eraginpeko langileekin dituen harremanak arautuko dira.

2. artikulua. Lurralde eremua.

Hitzarmen kolektibo hau FANEren Enplegu Zentro Bereziak Nafarroako Foru Komunitatean dituen lantoki, brigada mugikor, kokagune eta zerbitzuetan lan egiten duten langileei aplikatuko zaie.

3. artikulua. Iraunaldia, amaieraren iragarpena eta indarraldia.

Hitzarmen kolektibo honek 2008ko urtarrilaren 1ean hartuko du indarra eta 2010eko abenduaren 31ra arte iraunen du.

Hitzarmenaren indarraldia bukatzean, beste hitzarmenik ezean, lehengoaren arauek segituko dute indarrean.

Langileen Estatutuaren Testu Bateginaren 86.2 artikuluan ezarritako ondorioetarako, hitzarmen kolektibo honen eragina hasieran erabakitako indarraldia bukatzean galtzen dela ulertuko da.

4. artikulua. Langileria.

Hitzarmen kolektibo honek behin-behineko edo bitarte baterako langileak nahiz langile finkoak hartzen ditu, honakoetan ezarritako edozein kontratazio mota dutenak: Langileen Estatutuan eta hura garatzeko gainerako legerian, batik bat uztailaren 427/85 Errege Dekretuaren bidez aldatutako uztailaren 17ko 1368/99 Errege Dekretuan (enplegu zentro berezietan lanean ari diren elbarrien lan harreman berezia arautzen duena). Hitzarmenaren aplikaziotik kanpo gelditzen dira gizarte boluntarioaren lana egiten dutenak edo prestakuntza praktiketan edo erlijio zerbitzuetan ari direnak, eta FANEren Enplegu Zentro Bereziarekin zerbitzuen errentamendu kontratuak hitzartuak dituzten enpresa edo entitateen plantilletakoak.

II. TITULUA

Lanbide sailkapena

5. artikulua. Langileen sailkapena.

Langileak, betetzen duten lanaren arabera, lanbide talde, kategoria edo maila hauetako batean sailkatuko dira:

.1. taldea.-Goi mailako teknikariak.

1.1. Zuzendari teknikoa.

1.2. Unitate eragileko zuzendaria, laguntza prozesuko zuzendaria, arloko arduraduna.

1.3. Fabrikazioko burua.

1.4. Terapeuta.

.2. taldea.-Erdi mailako teknikariak.

2.1. Ataleko arduraduna, erdi mailako teknikaria eta gobernantea.

2.2. LTZko arduraduna.

2.3. Prebentzioko teknikaria.

2.4. Administrari-ofiziala.

2.5. Ataleko arduraduna.

2.6. Lehen mailako gidaria.

2.7. Sukaldaria.

.3. taldea.-Produkzioko eta zerbitzuetako langileak.

3.1. Soroslea.

3.2. Lehen mailako ofiziala.

3.3. Bigarren mailako ofiziala.

3.4. Hirugarren mailako ofiziala.

3.5. Lehen mailako espezialista.

3.6. Espezialista.

Lanbide-taldeen sailkapena, artikulu honetan deskribatua, baita talde haietako bakoitzeko mailena ere, deskriptiboa da eta ez da nahitaezkoa talde eta kategoria horiek guztiak beteta egotea. Lanbide maila edo talde berriak sortu ahalko dira eta eginkizun zehatzak esleitu, betiere oraingoen berdinak ez badira.

Lanbide taldeen sailkapen hau egiteko zenbait faktore interpretatu, aplikatu eta haztatu dira batera: ezagutzak, esperientzia, ekimena, autonomia, erantzukizuna, agintea eta langileek egiten dituzten oinarrizko lan eta zeregin adierazgarrienen zailtasuna.

Enpresako langileak honako lanbide taldeetan daude sailkatuak:

6. artikulua. Kategorien definizioa eta eginbeharrak.

.1. taldea.-Goi mailako teknikariak.

Unibertsitate bateko edo maila bereko eskola tekniko bateko titulua daukate. Beren esperientzia edo prestakuntza teknikoa frogatu dute edo, hori ezean, kontratuaren xede diren erantzukizuneko eginkizunak egiten dituzte entitatean, eta beren arloaren erantzukizuna hartzen dute beren gain.

1.1. Zuzendari teknikoa: Enplegu Zentro Bereziko produkzioaren eta zerbitzuen arloko arduradun gorena da.

-Unitate eragileetako zuzendariak koordinatuko ditu.

-Zuzendaritza teknikoko lanak eginen ditu eta prozesuak gainbegiratuko ditu.

-Enplegu Zentro Bereziko jarduera guztietako produkzioa eta zerbitzuak planifikatuko ditu.

-Konplexutasun, autonomia eta ekimen handiko lanak eginen ditu, hala nola, kalitatea eta sistemak bermatzea, arriskuen prebentzioa eta lan osasuna, langileen kudeaketa, merkataritzako kudeaketa, unitate eragileen urteko aurrekontuaren kontrola eta jarraipena. Laguntza prozesuen zuzendariekin eta FANEko zuzendaritzarekin lankidetzan arituko da.

-FANEko zuzendaritza taldean parte hartuko du. Eta erakundea ordezkatuko du hala eskatzen zaionean.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

1.2. Unitate eragileko zuzendaria, laguntza prozesuko zuzendaria, arloko arduraduna: unitate eragileko, laguntza prozesuko edo arloko arduradun gorena da.

-Bere unitate, prozesu edo arloko gainerako arduradunak koordinatuko ditu.

-Bere unitate, prozesu edo arloari esleitutako prozesuen erantzukizun gorena izanen du eta haiek gainbegiratuko ditu.

-Bere unitate, prozesu edo arloko jarduera guztietako produkzioa eta zerbitzuak planifikatuko ditu.

-Bere unitate, prozesu edo arloan erantzukizun, autonomia eta ekimen handiko lanak eginen ditu, hala nola: kalitatea eta sistemak bermatzea, arriskuen prebentzioa eta lan osasuna, langileen kudeaketa, merkataritzako kudeaketa, unitate eragilearen, prozesuaren edo arloaren urteko aurrekontuaren kontrola eta jarraipena. Laguntza prozesuetako zuzendariekin, beste unitate eragile eta arlo batzuekin, Enplegu Zentro Bereziko zuzendaritza teknikoarekin eta FANEko zuzendaritzarekin lankidetzan arituko da.

-Laguntza prozesuetako eta unitate eragileetako zuzendariek zuzendaritza taldean parte hartuko dute, eta hura ordezkatuko dute hala eskatzen zaienean.

Unitate eragileetako zuzendariek FANEko zuzendaritza Batzordean parte hartuko dute.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

1.3. Fabrikazioko burua: fabrikazio eremuan (produkzioa, mantentze lanak, zerbitzu lagungarriak etab.) diharduten langileen gaineko ardura zuzena du, bere lantoki edo zerbitzuko arduradunak eta beste kargudun batzuk barne. Lanaren banaketaz, diziplinaz, pertsonen segurtasunaz, ingurumenaren errespetuaz eta hornitzaile eta bezeroekiko harremanez arduratzen da, bere arloan eta erantzukizun mailan.

-Produkzioa planifikatzen eta kontrolatzen du eta lantegia zuzentzen du.

-Lan zamak, produkzioari buruzko eta hobekuntzarako azterlanak, errendimenduak eta abarrekoak ere kontrolatu behar ditu.

-Bere unitate eragileko zuzendaritzarekin lankidetzan arituko da helburuak lortzeko eta Enplegu Zentro Bereziko beste lantoki edo zerbitzu batzuekin koordinatzeko.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

1.4. Terapeuta: bere eginkizunetarako titulu ofizial egokia du; hezur-giharretako alterazioen prebentziorako eta errehabilitazioko tratamenduak ematen ditu, odolik gabeko bitarteko fisikoak erabiliz (fisioterapeutaren kasuan). Pedagogoak, berriz, etengabeko prestakuntzako edo errehabilitazioko lanak eginen ditu bere arloaren barnean.

-Bere jarduerak PASYP laguntza prozesuko zuzendariarekin koordinatuko ditu.

-Egin beharreko programak eta terapiak ezarriko ditu.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

.2. taldea.-Erdi mailako teknikariak.

2.1. Ataleko arduraduna, erdi mailako teknikaria eta gobernantea. Behar adinako ezagutzak dituelarik, unitate eragileko zuzendariaren, laguntza prozesuko zuzendariaren edo fabrikazioko buruaren agindupean, oinarrizko eginkizun hauek betetzen ditu:

-Bere produkzio ataleko, brigada mugikorreko, kokaguneko, lantokiko edo zerbitzu lagungarriko langileen lanak banatzea eta zuzentzea.

-Bere ataleko, lantokiko, brigada mugikorreko, kokaguneko edo zerbitzu lagungarriko lanaren banaketaz, diziplinaz, pertsonen segurtasunaz, ingurumenaren errespetuaz eta hornitzaile eta bezeroekiko harreman zuzenez arduratzea, unitate eragileko zuzendariak, laguntza prozesuko zuzendariak edo fabrikazioko buruak gainbegiraturik.

-Esleituta daukan arloaren ardura bere gain hartzea, prozesu eragileko zuzendaria, bere unitate eragileko zuzendaria edo fabrikazioko burua kanpoan denean.

-Produkzioa edo zerbitzua bermatzea, bezeroak eskatzen duen kalitatea, zerbitzua edo/eta kopurua kontuan izanik.

-Bere ardurapeko arloa etengabe hobetzeko lan egitea eta prestakuntzarako ekintzak, ekoizpena hobetzekoak edo zerbitzu eta antolaketa ekintzak proposatzea.

-Bere ardurapeko langileei emaitzarik hoberenak lortzen laguntzea eta haien beharrak eta arazoak atzeman eta bideratzea.

-Bere ardura diren makina, instalazio, material eta beste elementuak ongi mantentzea.

-Erremintak, tresnak, osagarriak eta bere ardurapeko pertsonek lanerako behar dituzten beste elementuak ongi ote dauden kontrolatzea.

-Unitate eragileko zuzendariarekin, laguntza prozesuko zuzendariarekin edo fabrikazioko buruarekin lankidetzan aritzea, bere atal, lantoki, brigada mugikor, kokagune edo zerbitzu lagungarriaren helburuak betetze aldera.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

2.2. LTZko arduraduna. Gaia behar bezala ezaguturik, unitate eragileko zuzendariaren agindupean, oinarrizko eginkizun hauek betetzen ditu:

-Bezeroei kasu egitea eta bere zerbitzuko merkataritza lanak egitea, kalitatearen eta kudeaketaren eremuetan ezarritako helburuak lortzeko.

-Hornitzaile eta bezeroekin zuzeneko harremanak izatea, unitate eragileko zuzendariak gainbegiraturik.

-Prozesu eragileko zuzendaria kanpoan denean, zerbitzuaren ardura bere gain hartzea.

-Saltzeko edo alokatzeko gaiak, makinak, instalazioak, materialak eta bere ardurapeko gainerako elementuak ongi mantentzea.

-Erremintak, tresnak, osagarriak eta lanerako behar diren beste elementuak ongi ote dauden kontrolatzea.

-Unitate eragileko zuzendariarekin eta errefortzuko langileekin lankidetzan aritzea, bezeroei etxean arreta eman behar zaienean.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

2.3. Prebentzioko teknikaria. Gaia behar bezala ezaguturik, unitate eragileko zuzendariaren agindupean, oinarrizko eginkizun hauek betetzen ditu:

-Arriskuen prebentzioari eta lan osasunari buruzko araudi eta erregelamenduak betetzen direla bermatzea.

-Bere lanerako behar dituen agiri, ekipo eta tresnak kontrolatu eta kudeatzea.

-Langileen agiriak eguneraturik edukitzea, bere jarduera eremuan.

-Unitate eragile eta laguntza prozesu guztiekin koordinatzea, pertsonen segurtasuna bermatuko duten sistemak ezartzeko.

-Kanpoko aholkulari eta profesionalekin koordinatzea, eskatzen zaizkion emaitzak lortzeko.

-Arriskuen Prebentziorako eta Lan Osasunerako Batzordea koordinatzea.

-Bere ardurapeko arloarekin zerikusi handia duten prozedura eta sistema guztiak kudeatzea. Besteak beste, langileen garraioa, "in itinere" istripuak saihesteko.

-Arriskuen prebentzioa eta lan osasuna etengabe hobetzen lan egitea eta prestakuntza eta antolaketa ekintzak proposatzea.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

2.4. Administrari-ofiziala. Gaia behar bezala ezaguturik, eta laguntza prozesuko zuzendariaren agindupean, administrazioko tramiteak antolatzen eta egiten ditu: fakturazioa, albaranak, kontabilitatea, txostenak, erosketen jarraipena eta ekonomia eta finantza arloko beste zeregin batzuk.

Gainera, bere ardurapeko kudeaketak egiten ditu Enplegu Zentro Bereziaren barnean eta kanpoan.

Laguntza pertsonaleko prozesuarekin lankidetzan aritzen da, telefonoari eta bisitariei jaramon egiten die, langileen asistentziaren erregistroa darama, eta laguntzaile lanak egiten ditu unitate eragileetako eta laguntza prozesuetako zuzendarientzat eta zuzendaritza teknikoarentzat.

Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

2.5. Ataleko arduraduna. Gaia behar bezala ezaguturik, unitate eragileko zuzendariaren edo/eta zuzendari teknikoaren agindupean, oinarrizko eginkizun hauek betetzen ditu:

-Lantokietan, brigada mugikorretan, kokaguneetan edo zerbitzu lagungarrietan bere ardurapeko araudi eta eskakizunak betetzen direla bermatzea.

-Bere lanerako dituen agiri, ekipo eta tresnak kontrolatu eta kudeatzea.

-Bere ataletik (mantentze lanak eta informatika) koordinaturik aritzea bere zerbitzuak eskatzen dituzten lantoki, brigada mugikor, kokagune edo zerbitzu lagungarriekin.

-Ataletako arduradunekin, erdi mailako teknikari eta gobernanteekin, LTZko arduradunarekin, prebentzioko teknikariekin, administrari-ofizialekin eta ataletako beste arduradun batzuekin lankidetzan aritzea, bere eremuko (mantentze lanetako eta informatikako zerbitzua) akatsak konpondu nahi dituztenean.

-Bere ardurapeko jarduerak hobetzen lan egitea eta hobekuntzak, prestakuntzako ekintzak eta antolamendu ekintzak proposatzea.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

2.6. Lehen mailako gidaria. C1 gidabaimena behar du, 3.500 kg-tik gorako ibilgailuei dagokiena. Enplegu Zentro Bereziko ibilgailuak gidatu, kargatu, deskargatu eta garbitzen ditu eta haien ohiko funtzionamendurako mantentze lanak egiten ditu.

Kudeaketak egiteko agindu ahalko zaio, bai enpresaren lantoki eta zerbitzuetan bai kanpokoetan.

Garraiatzen dituen gaien kontrolaren eta segurtasunaren erantzulea izanen da.

Segurtasun neurriez arduratuko da, bai salgaiak garraiatzen dituenean eta bai, askoz gehiago, pertsonak garraiatzen dituenean ere.

Trafikoaren erregelamenduan bere ardurari eta eginkizunei buruz dauden arau guztiak beteko ditu.

Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak izanen ditu.

2.7. Sukaldaria. Gaia behar bezala ezaguturik, gobernantearen agindupean, sukaldariek oinarrizko eginkizun hauek beteko dituzte:

-Menuak prestatuko dituzte.

-Ongi zaindu eta garbituko dituzte beren ardurapeko elementu guztiak: hozkailuak eta izozkailua, labea, estraktorea, frijigailuak, suak, apalak eta sukaldeko gainaldeak, biltegiak, aldagelak eta sukalde osoa, eta gainerako tresnak.

-Sukaldeko hornitzaileentzako eskariak prestatuko dituzte.

-Sukaldeko eta jantokiko tresna eta gune guztien garbiketa orokorra eginen dute egunero.

-Jantokiko eta sukaldeko hondakin eta zaborrak edukiontzietara aterako dituzte egunero, organikoak ez-organikoetatik bereizita, zaborra biltzeko zerbitzuetan tratamendu egokia emateko.

-Bezeroei janaria zerbitzatuko diete.

-Arduradunarekin batera, menuak prestatuko dituzte, zentroan dauden pertsonen beharrak asetzeko. (Dieta bereziak ere prestatuko dituzte zeliakoentzat, begetarianoentzat, kirolarientzat, haurrentzat...).

-Sukaldeko zerbitzua itxita dagoenean, lankideei lagunduko diete.

-Enplegu Zentro Berezia kudeatzeko sisteman ezarririko eginkizun eta erantzukizunak eta beren karguagatik eta beren erantzukizunagatik dagozkien besteak izanen dituzte.

.3. taldea.-Produkzioko eta zerbitzuetako langileak.

3.1. Soroslea. Igerilekuko soroslearen titulua behar du gutxienez, eta oinarrizko eginkizun hauek ditu:

-Igerilekua zaintzea eta, behar izanez gero, oinarrizko bizi-euskarria mantentzeko laguntzak ematea, funtsean, inprobisatutako bitartekoekin.

-Igerilekuko mantentze lanak egitea: pH-aren kontrola, makineriaren, hondoa garbitzeko makinaren, igerilekuko zabalgunearen eta bere ardurapeko beste edozein instalazioren berrikuspena.

-Aldagelak, komunak, dutxak, botikategia eta bere ardurapeko beste lokal guztiak ongi mantentzea.

-Bere atal edo zerbitzuko langileei laguntzea, behar denean eta goian azaldutako lanetan ari ez denean.

-Enplegu Zentro Berezia kudeatzeko sisteman ezarririko eginkizun eta erantzukizunak eta bere karguagatik eta bere erantzukizunagatik dagozkion besteak betetzea.

3.2. Lehen mailako ofiziala. Gaia behar bezala ezaguturik, jarduera jakinen ardura hartzen du bere gain, eta, arduradunak edo gobernanteak gainbegiraturik, lan autonomoak egiten ditu, ekimenez eta akabera eta perfekzio maila handiarekin.

Gaur egun Fundación Aspace Navarra para el Empleo erakundean zenbait lantoki daude eta bakoitzak bere ezaugarri bereziak ditu. Hona hemen lanbide kategoria honetako langileek lantoki horietako bakoitzean dituzten eginkizunetako batzuk:

Agoitz.

-Fabrikazioko buruari laguntzea agiriak artxibatzen eta material, ibilgailu eta pertsonen sarrera-irteeren oharrak egiten.

-Estatistika orriak eguneratzea eta produkzioari buruzko dokumentazioak osatzea.

-Fundazioko zentroen eta kanpoko entitateen arteko kudeaketak egiteko ardura izatea.

-Zentrora doazen pertsonei harrera egitea.

-Ibilgailuak zaindu eta garbitzea. Gainera, eskorga gidatzea, fabrikazioko buruari laguntzea, eta besteren ibilgailuak kargatzeko lanak gainbegiratzea.

Lekaroz- Doneztebe - Kirol eremua - Baztango Udala.

-Jantokiko lanak egitea (janari-manipulatzailearen txartela behar dute).

-Bezero eta hornitzaileei kobratu eta ordaintzea (kafetegia eta harrera-tokia).

-Jendeari kasu egitea.

-Bere ardurapeko instalazio, makina eta tresnak zaindu eta garbitzea.

-Besteren instalazioak garbitu eta zaintzeko lanen ardura hartzea, autonomia maila handiarekin, bezeroaren solaskidea izanik.

Noain.

-Materialen bilketa kudeatzea produkzio atal batean, ekintza horiek dokumentatzea eta materiala birbanatzea. Biltegiko langileei salgai horiek biltegiratzen laguntzea, bai AMP bai APT. Produkzioko jarduerak egitea.

R.C.A.

-Bezeroei kasu egitea kanpoko zentroetan eta administrazio arloekin lankidetzan jardutea, arduradun batek zuzenean gainbegiraturik.

-Besteren zerbitzu baten ardura hartzea, autonomia maila handiarekin eta makina eta ekipoak mantentzeko eta egoera onean edukitzeko ardura bere gain hartuz.

-Besteren instalazioak eta makinak mantentzea.

Brigadak-Kokaguneak.

-Brigada mugikor edo atal bat (gehienez bost pertsona) koordinatzea, ataleko edo brigadako arduradunak zuzenean gainbegiraturik, eta zentroko edo zerbitzuko ohiko produkzio jarduerak egitea.

-Entitateko nahiz kanpoko pertsonak edo salgaiak garraiatzea entitatearen nahiz besteren ibilgailuetan. Pertsona edo salgai horien segurtasunaren erantzulea eta bezeroen solaskidea izanen da. B motako gidabaimena eduki behar du.

Pertsona horiek guztiek Enplegu Zentro Berezia kudeatzeko sisteman ezarririko eginkizun eta erantzukizunak eta beren karguagatik eta beren erantzukizunagatik dagozkien besteak izanen dituzte.

3.3. Bigarren mailako ofiziala. Behar adinako ezagutzak dituela, arduradunak edo gobernanteak gainbegiraturik, langile honek autonomia osoz bete ditzake bere lanaren fase batzuk.

Gaur egun Fundación Aspace Navarra para el Empleo erakundean zenbait lantoki daude eta bakoitzak bere ezaugarri bereziak ditu. Hona hemen lanbide kategoria honetako langileek lantoki horietako bakoitzean dituzten eginkizunetako batzuk:

Agoitz.

-Eskorga gidariak: ibilgailuak kargatu eta deskargatzea, linearako hornidurak, hondakinak biltegiratzea, makina eta erremintak mantentzeko oinarrizko lanak, fabrikazioko langileei laguntzea.

-Xehamakinako kontrolatzailea. Mantentze lanetako langileei laguntzea bere arloko zereginetan. Fabrikazioko langileei laguntzea produkzio lanetan.

Lesaka, Noain eta kokaguneak.

-Produkzio lanak egiten ditu, lan metodoari jarraituz, eta ataleko lanaren kalitatea kontrolatzen du. Arduradunari lan gaztiguak, albaranak eta etiketak egiten laguntzen dio eta kalitate sistemako orriak betetzen ditu, produkzio mailan. Bere lanpostuaren ardura hartzen du bere gain, jarraibide argiei loturik, ibilbide orrien edo antzeko agirien bitartez, arduradunak gainbegiraturik.

R.C.A.

-Garbiketa lanak egiteko ardura bere gain hartzea, idatzizko jarraibideei loturik, ibilbide orriaren edo antzeko agirien bitartez eta arduradunak gainbegiraturik.

Pertsona horien guztien ardura da makinak eta erremintak egoera onean edukitzea, ematen zaizkien jarraibideen arabera. Enplegu Zentro Bereziaren kudeaketa sisteman ezarritako eginkizun eta ardurak eta beren karguarengatik eta erantzukizunagatik dagozkien beste batzuk izanen dituzte.

3.4. Hirugarren mailako ofiziala. Behar adinako ezagutzak izanik, eta goragoko kategoria duen pertsona batek zuzenean gainbegiraturik, langile honek bere kabuz bete ditzake bere lanaren fase batzuk, eta eginkizun hauetakoren bat betetzen du, zentro edo zerbitzuaren arabera:

-Produkzio lerroko langileak, zerbitzua ematea, lantegia eta jantokia garbitzea edo zerbitzu lagungarriak. Lanak metodo zehatz bati jarraituz egiten dituzte, goragoko kategoria duten langileek gainbegiraturik, eta ahalegina egin edo/eta arreta jarri behar dute. Lan horiek egiteko behar adinako gaikuntza eta espezializazio maila behar dute.

3.5. Lehen mailako espezialista. Mendekotasun maila handiarekin eta jarraibide oso zehatzen arabera egiten ditu lanak. Batzuetan lan fisikoa egin behar du. Oinarri-oinarrizko prestakuntza behar du, eta moldatzeko aldi labur bat; bere kategoriako lanpostu askotan aritzen ahal da.

3.6. Espezialista. Mendekotasun maila handiarekin eta jarraibide oso zehatzen arabera egiten ditu lanak. Batzuetan lan fisikoa egin behar du. Behe mailako prestakuntza edo oinarri-oinarrizko ezagutzak behar ditu, eta aldi labur bat behar du moldatzeko.

Hirugarren taldeko pertsona horiek guztiek Enplegu Zentro Berezia kudeatzeko sisteman ezarririko eginkizun eta erantzukizunak eta beren karguagatik eta beren erantzukizunagatik dagozkien besteak izanen dituzte.

Artikulu honetan lanbide sailkapen bakoitzarentzat adierazi diren eginkizun eta lanak adibide moduan jarri dira. Hortaz, langile guztiak gainean dituzten nagusiek agintzen dizkieten bestelako lan eta eginkizunak egitera behartuta daude, hemen adierazi ez badira ere, betiere beren eskumen eta kategoriaren barrenekoak baldin badira.

7. artikulua. Lanbide sustapena.

Enplegu Zentro Berezian hutsik dauden lanpostuak, zuzendaritzak erabakirik, bete edo amortizatzen ahalko dira, hala baderitzo, lanaren, garapen teknologikoaren, jarduera aldaketen eta komenigarri egiten duten bestelako inguruabarren arabera.

Betetzekotan, eta oro har, zentroak bere lantoki guztietako iragarki oholetan argitara emanen du lanpostu hutsen deialdia, bai ordezkapenekoena bai sortu berriena, honako gorabehera hauek adieraziz bertan: lanpostua, lanbide taldea, kategoria, lanpostuaren profila, beharrezko prestakuntza, hautapen sistema, eskabideak aurkezteko epea eta prozesuaren ebazpena.

Izangaien hautapena irizpide edo proba objektiboei lotuko zaie, merezimendu eta gaitasun irizpideei alegia, eta halaber zentroak ezartzen dituen probei, eta betiere enplegu zentro bereziko esperientzia kontuan hartuko da.

Plantillako langileen lanbide igoera indartzeko, enplegu zentro berezitik kanpoko eta plantillako izangaiak elkarrekin lehiatzen direnean lanpostu hutsak betetzeko, baldintza berdinetan, plantillakoek izanen dute lehentasuna.

Hala ere, agintea edo konfiantza eta erantzukizun berezia behar duten lanpostuak, Enplegu Zentro Bereziaren egituraren edozein mailatan, izendapen libreen edo, zuzendaritzak egoki baderitzo, kontratazio berrien bidez beteko dira.

Hitzarmen honen indarraldian, Enplegu Zentro Bereziko langileak mailaz igo eta lan merkatu arruntean sar daitezen sustatuko da, gure Fundazioaren "Enplegua laguntzarekin" izeneko programaren bitartez.

III. TITULUA

Lana: kontratuaren hasiera eta bukaera, probaldia

8. artikulua. Kontratuak.

Ezgaitasunaren ziurtagiria duten pertsonentzat edo parekoentzat, kontratu guztiak idatziz formalizatuko dira, ezgaitasuna izan eta Enplegurako Zentro Berezietan lanean ari diren pertsonen lan harreman berezia arautzen duen uztailaren 17ko 1368/1985 Errege Dekretuan, martxoaren 12ko 427/1999 Errege Dekretuak aldatu zuen hartan, ezarritakoari men eginez.

Kontratuen iraupenari eta motei dagokienez, 1368/1985 Errege Dekretuaren 7. eta 10. artikuluetan, 427/1999 Errege Dekretuaren bidez eman zaion testuan, agindu bezala eginen da.

Gainerako langileentzat, Langileen Estatutuko arauak aplikatuko dira.

9. artikulua. ABLEak.

Zuzendaritzak, oro har, aldi baterako laneko enpresez ez baliatzeko hitza ematen du. Horregatik, bakarrik aparteko kasuetan, Enpresa Batzordearen kide gehienak ados daudela, izenpetzen ahalko dira kontratuak aldi baterako lan enpresekin langileak atzemateko.

10. artikulua. Probaldia.

Langileak enpresan lanean hastean proba gisan arituko direla ulertuko da, idatziz horrela agertzen bada. Probaldiaren iraupena aldakorra izanen da, bete beharreko lanpostuen eta gainerako gorabeheren arabera. Hala ere, behin ere ez da izanen sei hilabete baino luzeagoa, halaxe xedatzen baita 1368/1985 Errege Dekretuaren 10.2 artikuluan, 427/1999 Errege Dekretuaren bidez eman zaion idazketan.

11. artikulua. Enpresa nahita uztea.

Bere borondatez Enplegu Zentro Berezia utzi nahi duen langileak gutxienez 15 egun aurretik horren berri eman beharko du. Aurre-ohar horren epea ez betetzeak azken likidazioan eta finikitoan kenketa bat ekarriko du, eta haren balioa aurre-oharra egin behar zuenetik egin duenera bitarteko egunei dagokien soldata adinakoa izanen da.

Zentroak garaiz eta behar bezala jasotzen badu, beharturik dago lan-harremanari bukaera ematera, langileari dagokiokeen bukaerako likidazioa eta finikitoa eman beharko dizkio. Eginbehar hori bete ezik, langileak eskubidea izanen du ordain bat hartzeko. Honelaxe kalkulatuko da: atzeratu den egun bakoitzeko bi eguneko lansaria pagatuko zaio, gehienez ere 15 eguneko ordaina.

IV. TITULUA

Lan osasuna

12. artikulua. Laneko segurtasuna eta osasuna.

Arlo honetan une bakoitzean indarra duen araudiak agintzen duenari jarraituko zaio, eta, bereziki, Laneko arriskuei aurrea hartzeari buruzko Legeak eta hura garatzen duten arauek ezarritakoari.

13. artikulua. Laneko arropa eta babes-janzkiak.

Langileei laneko arropa emanen zaie urtean bi aldiz (behar izanez gero, neguan eta udan), eta baita segurtasuneko oinetakoak edo babeserako bestelako ekipamenduak ere, legez erabaki bada horiek beharrezkoak direla. Segurtasun ekipamendu horiek jasotzen dituzten langileak beharturik egonen dira haiek erabiltzera eta ongi zaintzera.

Aurreko paragrafoan adierazitakoa ezertan eragotzi gabe, janzki eta ekipo horiek guztiak zentzuz erabili eta hondatzen diren heinean berritu beharko dira. Horri dagokionez, espresuki ezartzen da zuzendaritzak edo haren ordezkariak janzki eta ekipo erabiliak itzultzeko eska dezakeela berriak eman baino lehen, bai urteko emanaldietan zein ordezpenetan eta langilearen eta zentroaren arteko lan harremana bukatzen denean.

Arlo honetaz sor daitezkeen gorabeherak, hala nola janzkiak aldatzeko datak eta maiztasuna, arropa mota eta haren ezaugarriak eta abar, Enpresa Batzordeak eta zentroko zuzendaritzak elkarrekin eztabaidatu ondoren erabakiko dira.

V. TITULUA

Lanaldia, oporrak, lizentziak eta eszedentziak

14. artikulua. Lanaldia.

Urteko lanaldi baliozko eta benetakoa 1.593 ordukoa izanen da langile bakoitzarentzat.

"Valle de Baztán" Gazteentzako Aterpetxean, 15 minutuko atsedenaldia benetako lanaldian sartuko da bai goizeko txandan (08:00etatik 15:30era) bai arratsaldekoan (15:30etik 23:00etara).

Lantokiko fisioterapia zerbitzuan errehabilitazioan ematen den denbora ere lanaldian sartuko da.

15. artikulua. Atsedenaldiak.

Lanaldi jarraitua duten langileentzat nahiz lanaldi zatitua dutenentzat 15 minutuko atsedenaldia ezartzen da ogitartekorako. Oro har, 15 minutuko atsedenaldi hori ez da benetako lan denboratzat hartuko, baina "Valle de Baztán" Gazteentzako Aterpetxean, salbuespenez, benetako lanalditzat hartuko da.

Zentroek atsedenaldi gehiago edota luzeagoak ezarri ahalko dituzte, komenigarritzat jotzen badute, antolaketaren edo produkzioaren inguruko arrazoiengatik.

Halaber, zuzendaritzak zentro eta zerbitzuen berariazko ordutegietako atsedenaldiak zehaztuko ditu. Atsedenaldi horiek, hala komeni denean, aldatzen ahalko dira antolaketaren edo produkzioaren arabera.

Lanaldien arteko eta asteko atsedenaldiei dagokienez, zuzendaritzak prestaturiko ordutegi eta egutegietan xedatu bezala egingo da. Horiek, betiere, legeak kasu bakoitzean ezarririko gutxieneko iraupenak errespetatu beharko dituzte.

16. artikulua. Lan egutegia.

Urtero, bezeroen beharren arabera, enpresak lan egutegi bat osatuko du, non zentroaren egiturako atal, zerbitzu eta zentroetako txanda, ordutegi eta lanegunak zehaztuko baitira.

Lan egutegi horretan benetako lanaldia 1.593 ordukoa izanen da.

Halaber, egutegi horretan oporraldiak ere paratuko dira eta, urtean-urtean, ondoko artikuluko azken paragrafoan ezartzen den prozedura hitzartuan zehaztuko dira.

17. artikulua. Oporrak.

Hitzarmen honen eraginpeko langile guztiek urtean 30 egun naturaleko opor ordainduak izanen dituzte, 22 lanegunen parekoak.

Urteko opor horiek, urte naturalean hartu beharko direnak, ezin izanen dira eskudirutan ordaindu, salbu eta lan harremana hautsiz gero edo eszedentzia hartuz gero.

Urte naturalean kontratatutako langileek lan egiten duten denborari proportzioan dagozkion opor egunak izanen dituzte.

Oporrak horiek hartzean langileak kobratzen duen indarreko egiazko lansariaren arabera ordainduko dira.

Oporretarako txandak urtero zehaztuko dira, urteko lehen hiruhilekoan, zuzendaritzaren eta Enpresa Batzordearen arteko adostasunaren bidez. Bezeroen zerbitzu beharrak kontuan hartuko dira.

Hori horrela, zentro edo zerbitzuetan zerbitzu beharrak ezagutu ahala, zuzendaritza eta Enpresa Batzordea, Hitzarmena Interpretatu eta Aplikatzeko Batzorde Mistoan, bulego, atal, brigada edo zentro bakoitzerako oporrak hartzeko egunak zehaztuz joanen dira. Data hauek ezartzean, posible bada aukera batzuen artean hautatzea, ahalik eta lasterren jakinaraziko zaie langileei, ezarritako txanden edo har daitezkeen egunen artean hautatu ahal dezaten. Kasu horietan, langileak hautatu ondoren, ezarririko egunak ezin aldatuko dira, salbu eta langilea eta zuzendaritza espresuki ados badaude.

Azken kasu hauetan lortu nahi den helburua oporrak zentro, brigada edo zerbitzu batzuetan gutxieneko lanari eta bezeroendako zerbitzuari eutsiz hartzea denez, espresuki esku ematen zaio Hitzarmena Interpretatzeko Batzorde Mistoari gutxieneko lana bermatu, oporrak hartzeko lehentasunezko irizpideak eta metodoak ezartzeko, helburu hori ahalik eta hobekien erdiesteko. Lan maila eta lehentasunezko irizpide horiek ukituriko langileei jakinaraziko zaizkie, horiei lotuz norberak bere oporrak hartu ahal ditzan.

Aurrekoaz gain, enpresan 18 urteko antzinatasuna daukaten langile guztiek opor egun bat gehiago hartu ahal izanen dutela ezarri da.

Opor egun gehigarri hori hartu ahal izateko, langileak ahalik eta lasterren jakinarazi beharko du noiz hartu nahi duen, eta bere ataleko arduradunaren onarpena beharko du.

Onarpenik ezean, baimen hori ezin hartuko da egun horietan. Ukoa, baina, zergatiko objektibo eta frogagarrietan oinarritzen ahalko da bakarrik, hala nola, egun berean beste eskaera batzuk aurkezteagatik, beste langile batzuk gaixo edo oporretan egoteagatik edo baimena hartuak izateagatik eta, oro har, antolamenduagatik edo ekoizpenagatik.

Ildo berean, Hitzarmena Interpretatzeko Batzorde Mistoak ahalmena izanen du, kasuak banaka azterturik, oporrei buruz egokitzat jotzen dituen erabakiak hartzeko; esate baterako, atal edo/eta lanpostu bakoitzean ehuneko zenbat langile geratu behar diren, eskaeren arteko lehentasunak ezartzeko irizpideak, aurretiazko abisuak, etab.

18. artikulua. Aldi baterako ezintasun egoera oporretan.

Ezarritako oporraldiak bat egiten badu langile baten haurdunaldiaren edo erditzearen ondoriozko edo bularra emateko aldi baterako ezintasun egoera batekin edo amatasun zein aitatasun bajarekin, langileak eskubidea izanen du oporrak beste egun batzuetan hartzeko, urte naturala bukatu bada ere.

Larritzat edo oso larritzat jotzen den lan istripu baten ondorioz, langile batek opor egun guztietan edo batzuetan aldi baterako ezintasuna badu, lanera itzuli ondoren eskubidea izanen du oporraldian bajan egon den bezainbeste opor egun izateko.

Halaber, langile batek, gaixotasun arrunt baten edo lanez kanpoko istripu baten ondorioz, ospitaleratuz gero, lanera itzuli ondoren, ospitaleratze aldia frogaturik eta kasuan kasuko gaixo-agiria tramitaturik, eskubidea izanen du ospitalean emaniko opor egun berak izateko.

Bi kasuetan, oporrak hartzeko egun berriak ukitua eta zuzendaritza ados daudela zehaztuko dira.

Halaber, bi kasuetan, abenduaren 31n langileak, gaixo edo ospitalean badirau, ez du eskubiderik izanen oporrik berriro hartzeko.

Artikulu honetan aipatzen diren kasu hauek mugatzeko, interpretazio irizpide hauek hartuko dira kontuan:

a) Larritzat edo oso larritzat jotzen den lan istripuaren ondoriozko aldi baterako ezintasuna gertatzen den erabakitzeko, gaixo-agirian berean zauriaren kalifikazioaren arabera eginen da. Gaixo-agirian gorabehera hori zehaztu ezik, kasu bakoitzean azterketa bat eginen da, bana-banakoa. Betiere kontuan hartuko da salbuespenezko kasu bat den, zauriaren nolakoagatik, oporrak hartzea eragozteko modukoa.

b) Gaixotasun arrunt baten edo lanez kanpoko istripu baten ondorioz, oporretan ospitaleratuz gero, irizpide bakarra gaua ospitalean eman beharra da. Alegia, arau honetatik kanpo gelditzen dira ospitalean egiten diren ebakuntza anbulatorioak, kontsultak, tratamenduak eta abar, ospitalean gaua eman beharrik ez badakarte.

19. artikulua. Baimen ordainduak.

Langileek, aldez aurretik lehenbailehen ohartemanik eta ondoren justifikatu beharrarekin, zilegi dute lanpostuan ez egotea, benetako soldata indarduna eskuratzeko eskubidea galdu gabe, honako arrazoi hauetakoren bat tartean denean, eta kasu bakoitzean adierazten den denboraz:

a) Ezkontza: 15 egun natural.

b) Seme-alaben jaiotza: 4 egun natural.

c) Ondokoen heriotza, istripua, gaixotasun larria edo ospitaleratzea:

-Ezkontidea eta seme-alabak: 4 egun natural.

-Gurasoak: 3 egun natural.

-Anai-arrebak, aitona-amonak eta bilobak: 2 egun natural.

-Ezkontza bidezko ahaideak, bigarren graduraino: 2 egun natural.

d) Bigarren gradura arteko odol bereko edo ezkontza bidezko ahaide bat ospitaleratu beharrik ez baina etxean atseden hartzera behartzen duen ebakuntza kirurgikoa: 2 egun natural.

c) eta d) ataletako kasuetan baimenak hartzeari begira, ebakuntza eta horretarako prestatzeko aurretik behar litezkeen ospitaleratzeak kasu bakartzat hartuko dira. Halaber, espresuki ezarri da baimena ezin dela ospitaleko egonaldia baino luzeagoa izan.

Ospitaleratze kasuan, egoerak irauten duen denbora guztian izanen da baimena hartzeko aukera. Langileak, gozamen geroratuaren sistema berri honen bidez, ezin izanen du inola ere hartu egun gehiago baimena sortzen duen gertakaritik aurrera hartu izan balitu baino.

Arrazoi horiek (c eta d) direla-eta langileak Foru Komunitatetik kanpora joan behar badu, lizentziari egun natural bat gehituko zaio probintzia mugakideen kasuan eta 2 egun natural gainerakoetan.

e) Ohiko bizilekua aldatzeko (ezkontzaren ondorioz ez bada): egun natural bat.

f) Guraso, seme-alaba edo anai-arreben ezkontza: egun natural bat.

g) Behar den denbora hartzen ahal da Gizarte Segurantzan familiaren medikuari eta sendagile espezialistei egin beharreko kontsulta medikoen kasuetan eta errehabilitaziorako tratamendu mediko-funtzionaletan eta lanbidearen arloko orientazio, prestakuntza eta egokitzapen jardueretan parte hartzeko, lanalditik kanpoko orduetan joaterik ez dagoenean eta seihilekoan hamar egun baino gehiago ez direnean.

h) Publikoa edo pribatua den eginbehar saihestezina betetzeko behar-beharrezkoa den denbora.

i) Titulu akademikoren bat lortzeko asmoz ikastaro ofizialetan edo Hezkuntza eta Zientzia Ministerioak edota Nafarroako Gobernuak onartutako ikastaroetan izena ematen duten langileek edo lanposturen bat eskuratzeko oposizioa egiten dutenek azterketetara eta gaitasun eta ebaluazio probetara joan ahal izateko behar-beharrezkoa den denbora hartuko dute.

j) Eginkizun sindikaletan edo langileen ordezkaritza lanetan aritzeko denbora, legeetan ezarritakoari jarraikiz.

k) Erditu aurreko azterketa medikoak egiteko eta erditzeko prestatzeko tekniketan trebatzeko, behar-beharrezkoa den denbora, lanorduetan egin behar badira.

l) Norberaren kontuetarako: egun natural bat.

"a)" eta "f)" bitarteko ataletako lizentziak, biak barne, egun naturaletan kontatuko dira, eta, "c)" ataleko ospitaleratzeetarako egindako oharraren kasuan salbu, gertaera eragilea sortu den unetik beretik hartuko dira.

Ezkontideaz egiten diren aipamen guztiak langilearekin bikotekide egonkor gisa bizi diren eta beren udalak emandako bizikidetza-ziurtagiriaren bidez egoera hori frogatzen duten pertsonei ere aplikatuko zaizkie.

20. artikulua. Eszedentziak.

20.1. Borondatezko eszedentzia norberaren aferetarako.

Zentroan urtebeteko antzinatasuna, bederen, daukan langile orok aukera izanen du hiru hilabetetik urtebetera bitarteko borondatezko eszedentzia hartzeko, lanpostua gorderik. Lanpostua gordetzeko denbora bukaturik, langileak, zentrora itzuli ez bada, eskatzen ahalko du eszedentzia urtebete luzatu dakiola, lanpostua gorde gabe, baina kategoria berean edo parekoan dauden lanpostu hutsak betetzeko lehentasunezko eskubideari eutsiz. Betiere, langilearen eskubide horrek ez dio zentroari eragotzi behar enplegu zentro berezi gisa langile baten ezintasunarengatik dagozkion diru-laguntzak hartzea; beraz, eszedentzian dagoen langilea egoera hori amaitutakoan itzuliko da.

20.2. Borondatezko eszedentzia lanpostu bat eskuratzeagatik.

Ezgaitasuna izan eta zentroan lan egiten duten pertsonei lan munduan sartzeko erraztasunak ematearren, ezgaitasuna duen langile orok, ohiko enpresa batean (enplegurako zentro berezia ez den batean) zerbitzu ordainduetan hasiko dela frogatuz gero, eskubidea izanen du, hori dela eta, borondatezko eszedentzia hartzeko, gehienez ere bost urtez, lanpostua gorderik. Betiere, langilearen eskubide horrek ez dio zentroari eragotzi behar enplegu zentro berezi gisa langile baten ezintasunarengatik dagozkion diru-laguntzak hartzea; beraz, eszedentzian dagoen langilea egoera hori amaitutakoan itzuliko da.

20.3. Seme-alabak eta lehen graduko ahaideak zaintzeko eszedentzia.

Langile guztiek eskubidea dute hiru urteko eszedentzia hartzeko, gehienez, seme-alaba bakoitza zaintzeko. Hiru urte horiek haurra jaiotzen denetik edo, bestela, epailearen edo administrazioaren ebazpenaren egunetik aurrera kontatuko dira. Hiru urte horietan lanpostua gordeko da.

Era berean, langile guztiek eszedentzia hartzeko eskubidea izanen dute, lanpostua gorderik, behar bezala frogatutako mendekotasuna duten lehen graduko ahaideak zaintzeko, egoera horrek irauten duen bitartean eta gehienez ere hiru urtean.

Aurreko atalean arautu gabeko kasuetan, ahaideak zaintzeari dagokionez, Langileen Estatutuaren 46.3 artikuluan ezarritakoari jarraituko zaio.

Langileak, 20.2 eta 20.3 ataletako kasuetan, egoera frogatu beharko du, eta egoera aldatuz gero (enpresaren edo zaindutako pertsonaren/pertsonen aldaketa), hamabost eguneko epean jakinaraziko dio zentroari. Zentroak aldaketa horien agiria igorriko du. Bestela, eszedentzia bukatu dela ulertuko da aurrean hitzartutakoa amaitzean.

20.4. Gainerako kasuak.

Eszedentzia kasu guztietan, aurreko atalean aurreikusitakoetan izan ezik, aplikatzekoak diren legezko arau indardunetan eta Langileen Estatutuko 46. artikuluan ezarritakoari jarraikiko zaio, zehazki Familiako bizitza eta lana batera eramateari buruzko azaroaren 5eko 39/1999 Legeak emandako testuak dioenari.

21. artikulua. Amatasuna.

Gai hauei guztiei dagokienez, Langileen Estatutuaren 37. artikuluko 4., 5. eta 6. idatz-zatietan, 45. artikuluko 1. idatz-zatiko d) letran, 48. artikuluko 4. eta 5. idatz-zatietan eta 48 bis artikuluan eta aplikatzekoak diren legezko arau indardunetan ezarritakoari jarraituko zaio.

Familia arduren banaketa orekatuagoa izan dadin, aitek eskubidea izanen dute aitatasun baimena eta aitatasun prestazioa hartzeko, lan arloko eta Gizarte Segurantzari buruzko arauetan ezarritako eran.

22. artikulua. Lanaldia murriztea haurrari esnea emateko.

Emakumezko langileek Langileen Estatutuaren 37.4 artikuluan arautzen den baimena hartu ahalko dute haurrari esnea emateko, edo bestela, baimen horretako ordu guztiak metaturik, hiru aste hartu ahal izanen dituzte. Haurrak bederatzi hilabete egin arte emakumezko langileak noiznahi hartu ahal izanen ditu hiru aste horiek, etenik gabe.

Haurrari esnea emateko orduak hiru asteko aldian metatu nahi izanez gero, emakumezko langileek prozedura hau bete behar dute: amatasunagatiko kontratu-etenaldia amaitzen denean, emakumezko langileak haurrari esnea emateko orduak metatu nahi baditu, zuzendaritzari idatziz jakinarazi behar dio hogeita lau orduko epean. Idazki horretan adieraziko du noiz hartu nahi dituen hiru asteak.

Haurrari esnea emateko orduak hiru asteko aldian metatzea aukeratuz gero, emakumezko langileak ondoren ezin izanen du eskatu Langileen Estatutuaren 37.4 artikuluan haurrari esnea emateko aurreikusten den baimena, metaturik hartzea aukeratu duelako.

Haurrari esnea emateko baimen metatu hori amak nahiz aitak hartzen ahal du, beren nahierara, biak lanean ari badira. Gogoratu behar da, ordea, haurrari esnea emateko baimena, dela Langileen Estatutuaren 37.4 artikuluan arautzen den moduan dela artikulu honetan arautzen den moduan, gurasoetako batek bakarrik har dezakeela. Beraz, guraso batek, zentroko langilea nahiz beste enpresa bateko langilea izan, haurrari esnea emateko baimena hartzen badu goian azaldutako modalitateetako edozeinetan, besteak ezin izanen du haurrari esnea emateko inolako baimenik hartu.

Halaber, 12 urte arteko haurren bat beren kargu duten langileek eskubidea izanen dute lanaldia murrizteko, zortziren bat gutxienez eta erdia gehienez, lansaria ere hein berean murriztuta.

23. artikulua. Legezko zaintza.

Legezko zaintza dela-eta, langileren batek hamabi urtez beherako haurra edo ordaindutako lanik egiten ez duen ezindu fisiko, psikiko nahiz zentzumenezkoren bat bere kargu izanez gero, eskubidea izanen du lanaldia murrizteko, zortziren bat gutxienez eta erdia gehienez ere, lansaria ere hein berean murriztuta.

Adinagatik edo istripu edo eritasun baten ondorioz bere kasa bizitzeko gauza ez den eta lan ordaindurik egiten ez duen familiartekoren bat -odol-ahaidetasuneko edo ezkontza-ahaidetasuneko bigarren mailara artekoa- zaindu behar duen langileak ere eskubide bera izanen du.

Artikulu honetan ezartzen den lanaldi-murrizketa langile bakoitzaren eskubidea da, gizonezkoa izan edo emakumezkoa izan. Hala ere, pertsona bera zaintzeko eskubidea enpresa bateko bi langilek edo gehiagok izaten badute, enpresak aukera izanen du aldi berean erabili nahi den eskubidea mugatzeko, funtzionamenduarekin lotutako bidezko arrazoirik baldin badago.

VI. TITULUA

Baldintza ekonomikoak

24. artikulua. Lansariaren egitura.

Lansariaren egiturak kategoria bakoitzeko oinarrizko soldata, denbora edo lan unitateko sari finkoa den aldetik, eta kasu bakoitzean bidezko diren osagarriak bilduko ditu.

Kategoria bakoitzeko oinarrizko lansariaren bidez egiazko lanaldia eta hitzarmen honetan ezarririko atsedenaldiak pagatzen dira. 2008ko oinarrizko lansariaren hileko zenbatekoak hitzarmen honetako "Lansari taulak" izenburuko eranskinean ageri dira.

Langileen Estatutuaren 26.4 artikuluan xedatutakoari jarraikiz, hitzarmen honetan ezarrita dauden ordainsari-kontzeptu guztiak gordinak dira. Ohartarazi beharra dago, halaber, lansari taulen eranskinean ageri diren zenbateko guztiak lanaldi osoari dagozkiola.

25. artikulua. Gaueko lanaren plusa.

"Valle de Baztán" gazteentzako aterpetxean gauez lan egiten duten bi langileentzat gaueko lanaren plus hau ezarri da: 115,34 euro gordin hilean, hamalau hilekotan banatua, 2008rako.

26. artikulua. Harreman luzearen saria.

Finkatu ezin den eskersari berezi bat ezarri da, "Harreman luzearen saria" izenekoa. Behin bakarrik ordainduko da, langileak enpresan 21 urteko antzinatasuna betetzen duenean.

Sari horren zenbatekoa hilabeteko oinarrizko lansaria izanen da.

27. artikulua. Aparteko eskersariak.

Zentroko langile guztientzako bi aparteko eskersari izanen dira, bata udan bestea eguberrietan. Haietariko bakoitzaren zenbatekoa, osorik kobratzeko eskubiderik izanez gero, hilabeteko oinarrizko lansaria izanen da, gaueko lanaren plusa gehiturik, horrelakorik baldin bada.

Aparteko ordainketa horiek urtean urteko ekainaren 30ean eta abenduaren 22an pagatuko dira, egun horretan indarra duten zenbatekoen arabera.

Udako eta eguberrietako eskersarien sorrarazpena seihileko naturalekoa izanen da bi kasuetan, eta ordainketa, kontaketa edo likidaziorako banaketa proportzionala, hasiera edo bukaera ezartzeko, urtarrilaren 1etik ekainaren 30era bitarteko tartea hartuko da lehen kasuan eta uztailaren 1etik abenduaren 31ra bitartekoa bigarrenean.

VII. TITULUA

Hobekuntza sozialak

28. artikulua. Lansariaren egitura.

Enpresak bere kargura kontratatuko du banakako istripu aseguruaren poliza, langile bakoitzarentzat, laneko edo "in itinere" istripuaren ondoriozko heriotzaren kontingentzia estaliko duena.

Hitzarmen hau sinatu eta 20 egunera, poliza horrek aseguratzen duen kapitala 50.000 eurora igoko da, eta maila horri eutsiko dio hitzarmenaren indarraldia amaitu arte.

29. artikulua. Aldi baterako ezintasuna, arrisku egoera haurdunaldian, eta arrisku egoera haurrari bularra ematen zaion bitartean.

Laneko istripuen ondoriozko aldi baterako ezintasun egoeretan, zentroak osatuko ditu Lan Istripuetarako Ugazaben Mutualitateak kontingentzia horrengatik ordaintzen dituen prestazioak, langileak, egoera horretan dagoen bitartean, hileko ordainsari osoa eskura dezan.

Lanetik kanpoko istripua edo eritasun arrunta dela-eta lanerako aldi baterako ezintasuna dagoenean, zentroak osatuko du legez ezarritako prestazioa, lehenbiziko 20 egunetan, langilearen hileko ordainsariaren %75eraino. 21. egunetik aurrera, langileak legez dagokion prestazio ekonomikoa jasoko du, hau da, baja hartu aurreko hilean izandako kotizazio-oinarriaren %75.

Ondoko kasu hauetan, hala ere, zentroak eritasun arruntaren edo lanetik kanpoko istripuaren ondoriozko prestazioak osatuko ditu, langileak hileko ordainsari osoa eskura dezan:

-Kontingentzia arrunten ondoriozko aldi baterako ezintasun kasuak, ospitalean gaua eman behar denean, betiere mediku espezialistak behar bezala egiaztaturik, eta ospitaleko egonaldiak dirauen denboran.

-Larritzat jotzen diren eritasunak, hitzarmen honen 1. eranskineko zerrendan ageri direnak, betiere mediku espezialistak behar bezala egiaztatuak.

Emakumezko langileen prestazioa ere ordainsariaren %100era bitarte osatuko da, emakumea arrisku egoeran badago haurdunaldian edo haurrari bularra ematen dion bitartean.

30. artikulua. Fisioterapia zerbitzua.

Zentroak, bere langileen egoera fisikoa hobetzearren, fisioterapia zerbitzua jarriko du langileen eskura. Zerbitzu horren funtzionamendua Egokitzapen Sozial eta Pertsonaleko Programaren bidez arautuko da.

31. artikulua. Prestakuntza.

Zentroko zuzendaritzak konpromisoa hartzen du bere langileen prestakuntza etengabeaz arduratzeko.

Horretarako, urtero prestakuntza plan bat eginen da, barneko prestakuntza jarduerak eskainiko dituena zentroko langile guztientzat.

Plan hori urtero egiteko, zuzendaritzak aldez aurretik langileen prestakuntza beharrak aztertuko ditu, azterketaren emaitzak Enpresa Batzordeari jakinaraziko dizkio eta haren ekarpenak planean jasoko ditu.

Zuzendaritzak plana diseinatuko du, Enpresa Batzordeari aurkeztuko dio onets dezan, eta hiru hilean behin planaren egoeraren berri emanen dio.

32. artikulua. Aurre-erretiroa.

Zentroko zuzendaritzak, unean uneko lege indardunei jarraikiz, aurre-erretiroa hartzeko aukera emanen die egoera horretara igaro daitezkeen langileei, betiere egoera horretara igarotzea enplegu zentro bereziak arautzen dituen legeriarekin bateragarria denean.

33. artikulua. Garraioa.

Gaur egungo sistemaren iraupena bermatuko da. Hitzarmena interpretatu eta aplikatzeko batzorde misto bat sortuko da, eta berak zehaztuko du, zuzendaritzaren proposamenez eta Enpresa Batzordearekin ados, sisteman zein aldaketa egin behar diren zentro edo zerbitzu berrietara egokitzeko, haietako bakoitzeko plantillaren arabera.

VIII. TITULUA

Diziplina araubidea, hutsegiteak eta zehapenak

34. artikulua. Zehapenak.

Zentroko zuzendaritzak zehatu ahal izanen ditu langileak, lanari huts egiteagatik, artikulu honetan hutsegiteak eta zehapenak mailakatzeko xedatzen denarekin bat.

35. artikulua. Hutsegiteen mailaketa.

Langileek lanean edo lanaren ondorioz egiten dituzten diziplina hutsegiteak honelakoak izan daitezke: arinak, larriak eta oso larriak.

A.-Hauek hutsegite arinak dira:

A. 1. Lankideenganako errespetu edo begiramendu falta.

A. 2. Hilabetean behin lanera ez joatea, bidezko arrazoirik gabe. Langilea lanaldia hasi eta ordubete pasa badoa lanpostura, ez balihoa bezala joko da. Honek ez du esan nahi egun horretako lansari osoa galduko duenik, lanetik kanpo emaniko denborari dagokiona baizik.

A. 3. Lanera berandu joatea, bidezko arrazoirik gabe, zentroan edo zerbitzuan ezarririko ordutegiaren arabera, gehienez ere hiru egunean hilean. Langilea lanaldia hasi eta ordu bat pasatu baino lehen berandu ailegatzea hartuko da puntualtasun faltatzat.

A. 4. Lanean sartzean edo ateratzean ez fitxatzea, langilea agertzen ez den kasuetan izan ezik, puntualtasun faltatzat joko da.

A. 5. Gorputz-higienerik eza.

A. 6. Mugikorra kontu pribatuetarako erabiltzea, baimenik gabe.

A. 7. Aldi baterako ezintasun kasuan, baja agiriak edo baja berresteko agiriak horretarako ezarritako epean ez jakinaraztea, ez eta helbide aldaketak eta, oro har, egoera zibilari eta familia egoerari buruz zergen eta Gizarte Segurantzaren ondorioetarako garrantzitsuak izan daitezkeen datuak ere.

B.-Hauek hutsegite larriak dira:

B. 1. Hilabete berean lau aldiz berandu iristea lanera, bidezko arrazoirik izan gabe.

B. 2. Hilabetean bi egunetan lanera huts egitea, bidezko arrazoirik izan gabe.

B. 3. Lantokitik ateratzea, bidezko arrazoirik izan gabe.

B. 4. Noizean behin mozkortzea edo bestelako drogak hartzea.

B. 5. Lanpostuan edo baimendu gabeko tokietan erretzea, edo lanpostutik alde egitea erretzeko.

B. 8. Beste langile baten laneratzea simulatzea, haren ordez fitxatuz.

B. 9. Diziplinarik edo obedientziarik eza lanean.

B. 10. Hutsegite arinak errepikatzea.

C.-Hauek hutsegite oso larriak dira:

C. 1. Lantokian diziplinarik edo obedientziarik eza agertzea, behin eta berriro, langilea lehen ere horrexegatik zehatua izan denean.

C. 2. Lanera behin eta berriz berandu iristea, bidezko arrazoirik izan gabe, hamar aldiz baino gehiago hilabetean edo hogei aldiz baino gehiago hiru hilabetean.

C. 3. Lanera hiru egun jarraian huts egitea edo bost egun tartekatutan hilabete batean, bidezko arrazoirik gabe.

C. 4. Bajan dagoen bitartean langileak bere kontura zein besteren kontura lan egitea, bai eta baja lortu edo luzatze aldera egindako edozer ere.

C. 5. Lankideak hitzez larriki iraintzea.

C. 6. Lankideei eraso fisikoa egitea.

C. 7. Sexu jazarpena.

C. 8. Lantokian mozkorturik edo bestelako drogen eraginpean egotea behin eta berriro, langileak lehenago ere arrazoi horrengatik zehapena jaso duenean.

C. 9. Agintekeria.

C. 10. Leialtasunik eza eta, eskuarki, kontratuko fede ona urratzen duen beste edozein portaera.

C. 11. Zentroaren edo lankideen ondasunak lapurtu edo ebastea.

C. 12. Banakako babes ekipoak erabiltzeari uko egitea behin eta berriz.

C. 13. Sei hilabetean hutsegite larri bat baino gehiago egitea, desberdinak izanagatik, langileak lehenago ere arrazoi horrengatik zehapena jaso duenean.

36. artikulua. Zehapenak.

Hutsegiteen kalifikazioaren arabera ezartzen ahal diren zehapenak hauek dira:

A.-Hutsegite arinak:

-Ahozko kargu-hartzea.

-Idatzizko kargu-hartzea.

-Gehienez bi eguneko enplegu-lansarien etenaldia.

B.-Hutsegite larriak:

-Hiru egunetik hogeira bitarteko enplegu-lansarien etenaldia.

C.-Hutsegite oso larriak:

-21 egunetik 60ra bitarteko enplegu-lansarien etenaldia.

-Kaleratzea.

37. artikulua. Zehapenetarako prozedura.

Zehapen ororen berri, ahozko kargu-hartzea salbu, idatziz emanen zaio langileari. Jakinarazpen horretan zehatz-mehatz esanen zaio zein eta noiz egin zuen hutsegitea, nolako kalifikazioa duen hutsegiteak eta zer zigor jartzen zaion.

Halaber, zuzendaritzak hutsegite larri edo oso larriengatik jartzen diren zehapen guztien berri emanen dio Enpresa Batzordeari. Zehapena ezarririk, haren datatik bi hilabete arte luzatzen ahal da bete gabe.

38. artikulua. Hutsegiteen preskripzioa.

Hutsegite arinak hamar egunen buruan preskribatuko dira, larriak hogei egunen buruan eta oso larriak hirurogeiren buruan, zuzendaritza hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan.

IX. TITULUA

Eskubide sindikalak

39. artikulua. Ordu sindikalak eta haien metaketa.

Enpresa Batzordeko kideetako bakoitzak zenbait ordu izanen ditu bere eginkizunak betetzeko. Langileen Estatutuaren 68. artikuluan xedatutakoa aplikatuz dagokion ordu kopurua izanen du bakoitzak. Kreditu hau erabili ahal izateko, aski da ahalik eta lasterren zuzendaritzari noiz hartu nahi diren ordu horiek eta zenbat denbora jakinaraztea eta gero justifikatzea.

Lan sindikala lan orduetatik kanpo egiten denean, ordu haiek konpentsatuko dira, denbora hori behar bezala justifikatu eta gero. Ordu haien ordez atsedenaldi ordaindua hartzen ahalko du ordezkari sindikalak, ordu haien ondoko bi lanegunetan. Hala ere, ordu horiek ondorengo beste batzuei metatzen ahalko zaizkie, hilabeteko epean, lehenbiziko ziurtagiria aurkezten denetik hasita.

Langileen Estatutuaren 68. artikuluko e) ataleko azken lerroaldean xedaturikoarekin bat, posible izanen da Enpresa Batzordeko kide bakoitzari dagozkion orduak metatzea, guztira gehienekoa gainditu gabe, osorik edo hein batean kide bakar batek edo batzuek hartuta.

Horretarako, orduak metatzea erabakiz gero, Enpresa Batzordeko buruak edo idazkariak zuzendaritzari jakinaraziko dio, hiru egun lehenagotik bederen, nork hartuko dituen orduak, zer baldintzatan eta zer epetan.

40. artikulua. Lan osasuna.

Lan Osasuneko Batzordeko ordezkari bakoitzari hilean zazpi ordu emanen zaizkio arlo horretako prestakuntzarako.

Bakoitzari bere lansari gordinaren arabera ordainduko zaizkio ordu horiek.

Ordu kreditu horretarako eskubidea izateko, ordezkariek hiru egun lehenago eman behar diote abisua zuzendaritzari, eta gero absentzia justifikatu behar dute.

41. artikulua. Iragarki ohola eta artxiboa.

Enpresa Batzordeari bere ordezkaritza lana erraztearren, sindikatuentzako iragarki ohola jarriko da, eta gutun ontzi bat, proposamenak eta iradokizunak jasotzeko. Halaber, zentroak artxibategi giltzadun bat emanen dio Enpresa Batzordeari, behar den bulego-material xehearekin batera.

42. artikulua. Biltzeko eskubidea.

Langileen Estatutuaren 4. artikuluan, 77. artikuluan eta hurrengoetan xedatutakoari jarraikiz, errespetatu eginen da langileek biltzeko duten eskubidea.

Batzarrak egitekotan, 48 ordu lehenago jakinarazi behar zaio zentroko zuzendaritzari, betiere adieraziz zein diren jorratu beharreko gaiak eta zentrotik kanpoko zer pertsona joanen diren bileretara, halakorik baldin badago. Lanorduetatik kanpo eginen dira, zuzendaritza espresuki ados dagoenean izan ezik.

43. artikulua. Enpresa Batzordearentzako informazioa.

Langileen Estatutuaren 64. artikuluan ezarritakoa betetzeko, zuzendaritzak informazioa emanen dio Enpresa Batzordeari zentroaren bilakaera ekonomikoaz eta produkzioaz, baita kontratazioez eta legean aurreikusten diren gainerako gaiez ere.

X. TITULUA

Azken xedapenak

Azken xedapenetariko lehena.-Arau subsidiarioak.

Hitzarmen honetan arauturik ez dagoen orotarako, Langileen Estatutuan eta hura garatzen duten xedapenetan, bereziki enplegu zentro berezietan lanean ari diren minusbaliatuen lan harreman berezia arautzen duen uztailaren 17ko 1368/1985 Errege Dekretuan, martxoaren 12ko 427/1999 Errege Dekretuak aldatu zuen hartan, xedatu bezala eginen da.

Azken xedapenetariko bigarrena.-Interpretazio Batzorde Mistoa.

Hitzarmen hau interpretatu eta betetzerakoan sor litezkeen zalantzen gainean ebazteko, Interpretazio Batzorde Mistoa sortuko da, zeinetan bi aldeek hartuko baitute parte. Lehen mailan, hitzarmena ulertu eta betetzean sor litezkeen liskarrak hortxe konponduko dira.

Batzorde horrek lau kide izanen ditu. Zuzendaritzak bi izendatuko ditu, eta beste biak hitzarmen hau sinatu duten Enpresa Batzordeko kideen artetik izendatuko dira.

Aholkulariek laguntzen ahalko diete bi aldeen ordezkariei. Eztabaidetan parte hartuko dute. Hizpidea izanen dute, baina botorik ez.

XI. TITULUA

Xedapen gehigarriak

Lehen xedapen gehigarria.-Lansari igoerak 2009an eta 2010ean.

.2009an.

"Espezialista" kategoriarako, hileko lansari gordina 2009an 750 eurokoa izanen da (urtean 10.500 euro).

Gainerako kategorietarako, 2009an, hitzarmenaren bigarren urtean, lansari igoera Nafarroako Foru Komunitateko benetako KPIa %0,75 izanen da. 2008ko abenduan zuzendaritzak eta Enpresa Batzordeak konturako igoera negoziatuko dute 2009rako. Nolanahi ere, goian aipatutako bermea ematearren, Nafarroako Foru Komunitateko 2009ko benetako KPIa ezagutzen denean, konturako igoera berme hori betetzeko nahikoa ez bada, lansariak Nafarroako Foru Komunitateko 2009ko benetako KPIa bermatzeko adina igoko dira.

.2010ean.

2010ean, hitzarmenaren hirugarren urtean, lansari igoera Nafarroako Foru Komunitateko benetako KPIa + %0,75 izanen da. 2009ko abenduan zuzendaritzak eta Enpresa Batzordeak konturako igoera negoziatuko dute 2010erako. Nolanahi ere, goian aipatutako bermea ematearren, Nafarroako Foru Komunitateko 2010eko benetako KPIa ezagutzen denean, konturako igoera berme hori betetzeko nahikoa ez bada, lansariak Nafarroako Foru Komunitateko 2010eko benetako KPIa bermatzeko adina igoko dira.

2008KO LANSARI TAULAK

ZUZENDARI TEKNIKOA 2.440,66 34.169,18

UNITATE ERAGILEKO ZUZENDARIA 1.997,14 27.959,95

LAGUNTZA PROZESUKO ZUZENDARIA

ARLOKO ARDURADUNA

FABRIKAZIOKO BURUA 1.740,41 24.365,68

TERAPEUTA

ATALEKO ARDURADUNA 1.458,29 20.416,12

ERDI MAILAKO TEKNIKARIA

GOBERNANTEA

LTZKO ARDURADUNA 1.305,29 18.274,12

PREBENTZIOKO TEKNIKARIA

ADMINISTRARI-OFIZIALA 1.213,83 16.993,63

ATALEKO ARDURADUNA

1. MAILAKO GIDARIA

SUKALDARIA

1. MAILAKO OFIZIALA 1.012,73 14.178,18

SOROSLEA 115,34 1.614,78

1. MAILAKO OFIZIALA, GAUEKOA, LEKAROZ

2. MAILAKO OFIZIALA 920,91 12.892,70

3. MAILAKO OFIZIALA 840,68 11.769,58

1. MAILAKO ESPEZIALISTA 765,86 10.722,00

ESPEZIALISTA 714,29 10.000,06

I. ERANSKINA

Larritzat jotzen diren eritasunak, hitzarmen honen 29. artikuluan aipatuak.

-Kimioterapiaz edo erradioterapiaz tratatu beharreko eritasun larriak.

-Miokardioko infartuak. Bypass-ak.

-Kirurgiaz tratatu beharreko eritasun koronarioak.

-Giltzurruneko gutxiegitasun kronikoa.

-Garuneko hodietako istripuak.

Rafael Olleta: FANEko zuzendaria. Eva Jáuregui: Langileriaren zuzendaria. Javier Adiego: aholkularia.

Martin Irigaray: Batzordeko burua. Pablo Segura. José Antonio Crespo.

M. Jesús Carriquiri. Javier Liaño: Aholkularia. M. Carmen Urtea.

Miguel Angel Domínguez. Roberto Segura. Villar Catalán: aholkularia.

Javier Tirapu. Sera Fernández: aholkularia. Clementina Fernandes.

Josetxo Mandado: aholkularia.

Iragarkiaren kodea: F0806517