I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
208/2008 EBAZPENA, apirilaren 30ekoa, Antolamenduaren, Kalitatearen eta Berrikuntzaren zuzendari nagusiak emana, Nafarroako Foru Komunitateko ikastetxe publikoetan kultura arteko hezkuntzako esperientziak eta proiektuak garatzeko 2008-2009 ikasturterako diru-laguntzen deialdia onesten duena.
Kultura aniztasuna gero eta handiagoa da Nafarroako Foru Komunitatean; horrek bultzatu du Hezkuntza Sistemari buruzko neurri zehatzak hartzeko gogoeta, eta aitortu da eskolan bizitzen eta transmititzen den kultura aldatzeko premia dagoela. Testuinguru horretan, bereziki garrantzitsua da kultura aniztasunean bizitzeko balioetan oinarrituriko heziketa sustatzea hezkuntza komunitate osoan.
Horregatik, beharrezkoa izanen da hezkuntza lanetan zuzenean edo zeharka parte hartzen duten agente guztiengan kultura arteko gaitasunak bultzatzea, gure eta besteen jarrera baldintzatzen duten estereotipo eta aurreiritziak baztertzeko. Gauzak horrela, komenigarria litzateke arauen, balioen, sinesmenen eta estiloen trukaketarako eta elkarreraginerako jarrera eta gaitasunak garatzea, bizikidetza harmoniatsua izan dezagun, denok konpartitzen ditugun funtsezko balio batzuen esparruan.
Kultura arteko hezkuntza ikasleek kultur aniztasuna ulertu eta onartzeko bidea izan dadin, gizabanakoen, taldeen eta komunitateen heziketaren oinarrizko elementu gisa hartu behar da.
Ikastetxeetan kultura arteko hezkuntza errazteko esperientziak sustatzeko asmoz, bidezkoa da deialdi honen xede diren hezkuntza esperientziak ikastetxe publikoetan garatzeko baliabide ekonomikoak emateko irizpideak, baldintzak eta betebeharrak ezartzea.
Aniztasunaren, Orientazioaren eta Kultura-aniztasunaren Zerbitzuko zuzendariak aldeko txostena aurkeztu du, Nafarroako Foru Komunitateko ikastetxe publikoetan kultura arteko hezkuntzako esperientziak eta proiektuak finantzatzeko 2008-2009 ikasturterako deialdia onets dadin.
Hori horrela, Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 d) artikuluak ematen dizkidan ahalmenak erabiliz,
EBATZI DUT:
1. 2008-2009 ikasturtean ikastetxe publikoetan kultura arteko hezkuntza bultzatzeko eskola proiektuak finantzatzeko deialdia eta eranskinak onestea, horretarako aurrekontuan dauden mugen barrenean.
2. Deialdiaren xede diren proiektuak finantzatzeko 34.000 euroko gastua onestea. Horietarik 17.000 euro 2008rako aurrekontuko "Gizarte nahiz hezkuntza integraziorako jardueren finantzaketa" izeneko 423003 42230 2269 322000 kontu-sailetik emanen dira.
Gainerakoa, 17.000 euro, 2009ko gastuen aurrekontuan izen horrekin prestatzen diren kontu-sailen kargura.
3. Deialdia ebazpen honen eranskinean azaltzen diren oinarriek arautuko dute.
4. Ebazpen hau jakinaraztea Aniztasunaren, Orientazioaren eta Kultura-aniztasunaren Zerbitzuari, Zerbitzuak Ikuskatzeko eta Ikuskapen Teknikorako Zerbitzuari, Kultura-aniztasunaren Atalari, Kudeaketa Ekonomikoaren Bulegoari eta Ekonomia eta Ogasun Departamentuak Hezkuntza Departamentuan duen kontu-hartzaile delegatuari, eta ebazpena eta eranskinak Nafarroako ALDIZKARI OFIZIALean argitara daitezela agintzea.
Iruñean, 2008ko apirilaren 30ean.-Antolamenduaren, Kalitatearen eta Berrikuntzaren zuzendari nagusia, Teresa Aranaz Jiménez.
NAFARROAKO FORU KOMUNITATEKO IKASTETXE PUBLIKOETAN KULTURA ARTEKO HEZKUNTZAKO PROIEKTUAK ETA ESPERIENTZIAK GARATZEKO DIRU-LAGUNTZEN DEIALDIA
Arauak
Lehena.-Deialdiaren xedea.
Deialdi honen xedea da ikastetxe publikoei baliabide ekonomikoak ematea, kultura arteko hezkuntza erraztu eta sustatzeko proiektuak presta ditzaten, honako hauek landuz:
1. Kultura arteko hezkuntzaren balioak garatzea, hezkuntza esperientzien bitartez.
2. Ikasleak sistematikoki prestatzea, gizartearen kultura aniztasunaz jabe daitezen.
3. Kultura ezberdinetako gizarte harremanetarako onuragarriak diren jarrerak bultzatzea.
4. Irakasleei eta hezkuntza komunitateko gainerako partaideei prestakuntza ematea.
Bigarrena.-Parte har dezaketen ikastetxeak.
Deialdi honetara Haur, Lehen eta Bigarren Hezkuntzako Nafarroako ikastetxe publiko guztiak aurkez daitezke.
Hirugarrena.-Proiektuaren ezaugarriak.
1. Ikastetxe batek eta/edo eskualde bereko ikastetxe multzo batek kultura arteko hezkuntza eta kultura aniztasuna onartu eta ulertzeko asmoz ikasleentzat eta hezkuntza komunitatearentzat 2008-2009 ikasturtean egiten dituen programak, proiektuak eta esperientziak sartzen dira deialdian. Ikastetxeko edo ikastetxeetako Aniztasunari Erantzuteko Planean aipatuko dira.
2. Proiektu edo esperientziak arlo hauek landu beharko ditu:
a) Curriculumeko arlo bakoitzean, kultura arteko hezkuntzari loturiko curriculum materialak prestatu, bildu eta erabiltzea.
b) Ikasle atzerritarren irakas-hizkuntzaren irakaskuntza eta ikaskuntza: esparru horretan egiten diren aurrerapausoak erakusten dituzten materialak prestatzea, curriculumak bereiziz.
c) Hezkuntza sisteman berandu sartu diren ikasleak hartzeko prozesuak, curriculumak egokitzeko ahalegin bereziak eginez, beharrezkoa denean: edukiak, horien ikuspuntuak, metodologia eta antolaketa, erreferentziako curriculum materialak, etab.
d) Ohiko irakaskuntza eskolaz kanpoko jardueren bidez indartu eta orientatzea, hala nola ikaskuntza bideratuaren bidez, arlo instrumentalak sendotuz, gurasoak heziz, etab.
e) Ikastetxea beste entitate eta elkarte batzuekin elkarlanean aritzea, ikasle horiek gizarteratu eta hezkuntzaren aldetik indartzeko programak bultzatzearren.
f) Elkarreragina eta lankidetza bultzatzen duten metodologiak ikasgelan lantzea eta horien ebaluazioa egitea.
Laugarrena.-Agiriak.
Deialdi honetan parte hartu nahi duten ikastetxeek agiri hauek aurkeztu beharko dituzte:
a) Eskabidea, 1. eranskinaren araberakoa.
b) Ikastetxearen datuak, 2. eranskinaren arabera.
c) Ikastetxeko zuzendaritza taldearen oniritzia edo Koordinazio Pedagogikorako Batzordearen adostasuna. Proiektua ikastetxe batzuek egiten badute batera, eskabidea ikastetxe guztietako zuzendariek sinatu beharko dute.
Bosgarrena.-Aurkezteko epea.
Diru-laguntza eskaera eta laugarren arauan aipatzen diren agiriak 2008ko urriaren 15erako aurkeztuko dira Hezkuntza Departamentuko Erregistro Orokorraren bidez, Iruñeko Santo Domingo aldapan, zk.g., 31001 posta kodean, edo azaroaren 26ko 30/1992 Legeko 38. artikuluko 4. idatz-zatian aipatzen diren tokietan, Kultura-Aniztasunaren Atalera igorririk.
Eskaerak aurkezteko epea bukatuta, ikastetxeek zazpi egun naturaleko epea izanen dute dokumentazioan egindako akatsak zuzentzeko.
Seigarrena.-Proiektuen esleipena eta balorazio irizpideak.
Honako hauek osatutako batzordeak baloratuko ditu aurkezten diren eskaerak:
-Aniztasunaren, Orientazioaren eta Kultura-aniztasunaren Zerbitzuko zuzendaria edo hark eskuordetzen duena.
-Zerbitzuak Ikuskatzeko eta Ikuskapen Teknikorako Zerbitzuko zuzendaria edo hark eskuordetzen duena.
-Kultura-aniztasunaren Ataleko burua.
-Kultura-aniztasunaren Ataleko bi teknikari.
Batzordeak irizpide eta baremo hauek kontuan hartuz baloratuko ditu proiektuak eta esperientziak:
1. %30, proiektuaren eragin onuragarria ikastetxean eta gizarte ingurunean.
2. %20, proiektu edo esperientziaren originaltasuna eta sormena eta hezkuntzaren testuinguruan aplikatzeko aukera.
3. %20, proiektuaren edo esperientziaren edukien eta hezkuntza eta curriculum proiektuaren arteko harremana, arlo guztietan gauzatua.
4. %20, proiektuaren erreferentzia, ikastetxeko ikasle etorkinei edo gizarte eta kulturaren aldetik egoera ahulean dauden ikasleei dagokienez.
5. %10, aurrekontuaren eta proiektuaren helburuen arteko erlazioa.
Batzordeak finantzaketaren xede diren proiektuen puntuazio ordena ezarri eta gero, laguntzak banatuko ditu, lortutako puntuazioaren arabera eta justifikatutako gastuen arabera.
Balorazio prozesua bukatuta, Aniztasunaren, Orientazioaren eta Kultura-aniztasunaren Zerbitzuko zuzendariak ebazpen proposamena igorriko dio Antolamenduaren, Kalitatearen eta Berrikuntzaren zuzendari nagusiari. Azken horrek hilabeteko epean emanen du ebazpena. Gero, ebazpena ikastetxeetara igorriko da eta finantzaketa onartu ote zaien adieraziko.
Ebazpena eman eta jakinarazteko epea hiru hilabetekoa izanen da, gehienez. Epe horretan jakinarazpen espresurik ez bada, eskaera ezetsi egin dela ulertuko da.
Zazpigarrena.-Gastua eta ordainketa frogatzea.
Hautatzen diren proiektu edo esperientzien talde egileak, ikastetxearen bidez, hauexek igorri beharko ditu Hezkuntza Departamentuko Kultura-Aniztasunaren Atalera, 2009ko ekainaren 10a baino lehen: bukaerako memoria, 3. eranskinaren araberakoa, paperean eta euskarri informatikoan (word, arial letra mota, 12 tamaina, lerroarte bikoitza), eta prestaturiko materialak, halakorik bada.
Horrekin batera, proiektuan edo esperientzian izandako gastu finantzagarrien fakturak erantsiko ditu.
Hezkuntza Departamentuak beretzat gordetzen du proiektuak eta esperientziak argitara emateko eskubidea, baina parte-hartzaileak nortzuk izan diren aipatuko du beti.
Zortzigarrena.-Aurrekontuko diru-zuzkidura.
Ikastetxe publikoetako kultura arteko hezkuntzako proiektu eta esperientzietarako laguntzek, deialdi honen xede direnek, 2008-2009 ikasturterako 34.000 euroko kreditua izanen dute aurrekontuetan. Horietarik 17.000 euro 2008rako aurrekontuko "Gizarte nahiz hezkuntza integraziorako jardueren finantzaketa" izeneko 423003 42230 2269 322000 kontu-sailetik emanen dira.
Gainerakoa, 17.000 euro, 2009ko gastuen aurrekontuan izen horrekin prestatzen diren kontu-sailen kargura.
Bederatzigarrena.-Finantzaketaren ordainketa.
Batzorde ebaluatzaileak erabakitako baliabide ekonomikoak bitan pagatuko zaizkie ikastetxe publikoei: lehenbizi, diruaren %50, deialdiaren gaineko ebazpena eman ondoren.
Beste erdia, finantzatutako proiektua egin dela frogatu, bukaerako memoria baloratu eta gastuen fakturak jaso ondoren pagatuko da. Agiriak Kultura-Aniztasunaren Atalera igorriko dira, Hezkuntza Departamentuko Erregistro Orokorrean, Iruñeko Santo Domingo aldapan, zk.g., 31001 posta kodean, edo azaroaren 26ko 30/1992 Legeko 38. artikuluko 4. idatz-zatian zehazten diren tokietan aurkezturik, 2009ko ekainaren 10a baino lehen.
Hamargarrena.-Finantzatuko diren kontzeptuak.
Kontzeptu hauek finantzatuko dira: beharrezkoa den bibliografia, materialen prestatzea, proiektuari loturiko material osagarria eta berariazkoa, prestakuntza jarduerak eta hizlarien sariak.
Hamaikagarrena.-Jarraipena eta babesa.
Hezkuntza Departamentuko Kultura-aniztasunaren Ataleko teknikariek begiratu eta baloratuko dituzte proiektu eta esperientzia guztiak.
Hamabigarrena.-Onuradunen betebeharrak.
Hautatu eta finantzatutako ikastetxe publikoek baldintza hauek bete beharko dituzte:
a) Proposatzen den esperientzia Kultura arteko hezkuntza proiektuan ezarri bezala egitea 2008-2009 ikasturtean. Aldaketaren bat egin nahi izanez gero, Kultura-Aniztasunaren Atalaren baimen berariazkoa beharko da, baina aurrekontua ezin izanen da inolaz ere handitu.
b) Bukaerako memoria aurkeztea, 3. eranskina abiapuntu harturik, eta, orobat, finantzatzen ahal diren gastuen zerrenda.
I. ERANSKINA
Eskabide eredua
Izena:............................, helbidea: ..................., kalea edo plaza: ...................., zenbakia: .............., telefonoa: ......., NAN zk.: ................, ........................ikastetxe publikoaren izenean.
Zure aurrean,
Honako hau azaltzen dut:
2008ko ...... zenbakiko Nafarroako ALDIZKARI OFIZIALean, ....aren .......... (e)koan, kultura arteko hezkuntzako proiektuetarako deialdia ikusirik eta baldintza guztiak betetzen ditudalarik, deialdi horren oinarri guzti-guztiak onartzen ditut eta eskatutako agiri guztiak aurkeztu ditut.
Horregatik,
Eskatzen dut:
Eskabide hau ontzat har dezazula, erantsita duen proiektuaren edo esperientziaren eskema eta guzti.
..............(e)n, 2007ko ..........aren ....(e)an.
II. ERANSKINA
1.-Proiektuaren deskribapena:
-Proiektuaren izena eta titulua.
-Justifikazioa eta testuinguruaren azterketa:
.Abiapuntuko egoera.
.Landu beharreko maila/k eta arloa/k.
.Lanerako proiektuaren xede diren gizarte taldeak.
.Hezkuntza arloan gizarteratzeko neurri zuzentzaileak.
.Kultura aniztasuna hobeki tratatzeko eskolan berean edo eskolatik kanpo egin beharreko lanak.
.Bestelakoak...
-Proiektuaren helburuak.
.Lortu nahi diren helburuen arabera garatu beharreko ekintzak.
-Metodologia: egutegia eta erabiliko diren giza baliabideak eta baliabide materialak.
-Ebaluazioa.
-Aurrekontua eta aurreikusitako gastuen kontzeptuak.
2.-Parte-hartzaileak:
-Deiturak eta izena.
-Parte-hartzaileek proiektua edo esperientzia prestatu nahiz garatzeko beren gain hartzen dituzten eginkizunak.
-Proiektuaren koordinatzailea.
III. ERANSKINA
Memoria
-Proiektuaren deskribapena.
-Helburuak zenbateraino bete diren.
-Emaitzen ebaluazioa.
-Esperientziaren ebaluazioa, hezkuntzari, gizarteratzeari, parte-hartzaileen eta ikastetxeen esku-hartzeari eta abarri dagokienez...
-Gelan eta ikastetxean abian jartzeko aukerak.
-Ikastetxeko hezkuntza komunitatean proiektuarekin jarraitzeko aukera.
-Hobetzeko proposamenak.
-Gastuen justifikazioa.
Iragarkiaren kodea: F0807272
