Iragarkia

95. ALDIZKARIA - 2007ko abuztuaren 3a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

450/2007 EBAZPENA, ekainaren 6koa, Lan zuzendari nagusiak emana, Tuterako "Disnaco, S.L." enpresaren lan hitzarmen kolektiboa erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 56/2007).

Departamentu honetan 2007ko maiatzaren 15ean sartu da "Disnaco, S.L." enpresaren lan hitzarmen kolektiboaren testua, 44 artikuluz, xedapen gehigarri 1ez eta eranskin 1ez (2007rako lansarien taula) osatua, enpresaren ordezkaritzak eta langileen ordezkariak (UGT) 2007ko maiatzaren 8an izenpetu eta onetsia.

Industria eta Teknologia, Merkataritza eta Lan Departamentua da lan hitzarmen kolektiboaren testua erregistratzeko, gordetzeko eta argitaratzeko eskumena duena. Eginkizun horiek martxoaren 24ko 1/1995 Legegintzako Errege Dekretuaren 90. artikuluan ezarrita daude, Estatuaren lan arloko eginkizunak Nafarroako Foru Komunitateari eskualdatzeko arauak ezartzen dituen apirilaren 11ko 937/1986 Errege Dekretuan ezarritakoaren arabera, eta kontuan hartuta Hitzarmen kolektiboen erregistro eta gordailuei buruzko maiatzaren 22ko 1040/1981 Errege Dekretuan ezarritakoa.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz.

EBATZI DUT:

1. Tuterako "Disnaco, S.L." enpresaren lan hitzarmen kolektiboa erregistratzea (kodea: 3108742) Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Industria eta Teknologia, Merkataritza eta Lan kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2007ko ekainaren 6an._Lan zuzendari nagusia, José María Roig Aldasoro.

DISNACO, S.L. ENPRESAREN HITZARMEN KOLEKTIBOA

Bildurik:

Enpresaren aldetik: María del Carmen Mesa Belloso

Langileen ordezkaria (UGT): María Dolores Franco Puga

Erabaki dute:

Disnaco enpresaren 2007, 2008 eta 2009. urteetarako hitzarmen kolektiboaren testua onestea. Artikulu hauek ditu:

I. KAPITULUA

1. artikulua. Aplikazio eremua.

_Langileak eta lurraldea.

Hitzarmen kolektibo honek harreman juridiko eta lanekoaren bidez "Disnaco, S.L." enpresan diharduten langileen lan baldintzak arautzen ditu.

_Iraunaldia.

Hitzarmen honek Nafarroako ALDIZKARI OFIZIALean argitaratu eta biharamunean hartuko du indarra eta, atzera eraginez, 2007ko urtarrilaren 1etik aitzina aplikatuko da. 2009ko abenduaren 31ra arte izanen du indarra.

2. artikulua. Amaiera iragartzea eta indarraldia luzatzea.

Alderdi sinatzaileetako edozeinek iragartzen ahalko du hitzarmen honen amaiera, iraungi baino 60 egun lehenago, beste aldeari idatziz jakinaraziz.

Hitzarmenaren indarraldia amaitzean, beste hitzarmenik ezean, lehengoaren arauek segituko dute indarrean.

3. artikulua. Osotasunarekiko lotura.

Hitzarmen honetan itundutako baldintzek multzo organiko eta zatiezina osatzen dute eta, praktikan aplikatzerakoan, beren osotasunean hartuko dira.

Lan arloko agintaritzak edo ukiturikoetariko edozeinek eskaturik, lan arloko jurisdikzioaren arabera, hitzarmen honetako artikuluren bat ezabatzen baldin bada, artikulu horiek indargabetuko dira. Ukituriko aldeek negoziatzeari ekin beharko diote epaia irmo bilakatu eta gehienez ere bi hilabeteko epean, artikulu horien edukia berriro negoziatu ahal izateko.

4. artikulua. "Ad personam" bermea. Baldintza hoberena.

Plantillako langileen baldintzarik hoberenak eta onuragarrienak errespetatuko dira, banakakoak eta taldekakoak, bai enpresaren eta langileen arteko itunaren ondoriozkoak, bai, hobeak izanez gero, beste eremu funtzional bateko hitzarmen kolektiboaren ondoriozkoak.

Hitzarmen honek indarra hartzean urtean hitzarmenean ezartzen dena baino soldata handiagoa kobratzen duten langileei hitzarmen honetan onetsiriko lansari taulak aplikatuko zaizkie. Lansarien arteko aldea bermeko norberaren osagarri gisa agertuko da nominan. Ezin izanen da xurgatu, ez eta konpentsatu ere, baina birbaloratu bai. Osagarri horren zenbatekoa zehazteko, urteko soldatatik hitzarmen honetan ezarririko urteko soldata kenduko da. Hortik ateratzen den kopurua, hamabiz zatitua, izanen da norberaren osagarriaren zenbatekoa, hamabi hilabeteetan kobratuko dena.

II. KAPITULUA

5. artikulua. Lanaren antolaketa.

Enpresari dagokio lana antolatzea, hitzarmen honetan, Langileen Estatutuan eta aplikatzekoak diren beste legeetan xedaturikoa deusetan galarazi gabe.

Aurreko lerroaldean xedaturikoa galarazi gabe, talde bat edo langile batzuk ukitzen dituzten lan baldintzak sortu edo aldatzen direnean langileen legezko ordezkariei jakinarazi beharko zaie aldez aurretik.

6. artikulua. Lan egutegia.

Enpresek urtero abenduaren 31 baino lehen prestatuko dute lan egutegia. Lan ordutegiak finkatzea enpresari dagokio. Enpresak langileen ordezkari sindikalei galdetu ondoren ezarriko ditu. Ordezkari horiek hamabost egun natural izanen dituzte, enpresak prestaturiko egutegia jakinarazi eta biharamunetik hasita, hura aldatzeko komenigarritzat jotzen dituzten alegazio edo proposamenak aurkezteko.

Lan egutegiek honakoak bilduko dituzte: langile bakoitzaren urteroko lanegunak, asteko atsedenerako egunak edo hauek zehazteko irizpideak, oporrak hartzeko aldiak edo egun baliodunak eta pagatu beharreko jaiegunak eta ezin errekuperatu direnak, bai enpresa osorako, bai departamentuen edo atalen arabera.

7. artikulua. Eginkizunen edukia eta kokagune organikoa

Langileak egiten duten lanaren eta lan kontratuan xedatzen denaren arabera sailkatzen dira.

Artikulu honetan lanbide sailkapena zerrenda huts bat da, ez da zehatza, eta ez dakar berarekin lanbide kategoria guztiak betetzea. Sailkapena aldatzen ahal da, zerbitzuen eraginkortasunagatik eta antolaketaren arrazionalizazioagatik hala komeni denean.

a) Produkzioko arduraduna.

b) Kalitatearen arduraduna.

c) 1. mailako ofiziala.

d) 2. mailako ofiziala.

1. mailako ofizial bihurtuko da enpresan gutxienez urtebete egin eta lanpostu guztietako zereginak egiten dakien langilea: kroketak, ontziratzea, piperrak, laukitxoa, ogitan pasatzea, bola, tigrea (baldin eta postu horretan jarri badute) eta enpresak produkziorako jarritako gutxienekora iristen bada.

III. KAPITULUA

8. artikulua. Lanaldia

a) Hitzarmen honek diraueino, hauxe izanen da urteko lanaldia:

_2007an, 1.730 ordukoa.

_2008an, 1.730 ordukoa.

_2009an, 1.726 ordukoa.

Lanaldi hori egiazki eta egiatan egin beharrekoa da eta txanden egituren arabera burutuko da.

b) Lan denbora kontatzeko, langileak, hala eguneroko lanaldiaren hasieran nola bukaeran, lanpostuan egon behar du.

c) Sei ordu baino gehiago eten gabe lanean ematen duten langileendako 15 minutuko atsedenaldia izanen da, lan denboratzat joko dena.

d) Lan txandak ahalik eta gehien egokituko dira ezarririko lanaldira. Horrek esan nahi du gorabehera oso ordu gutxikoa izanen dela urteko ordu guztien aldean. Gehiegizko edo gutxiegizko ordu horiek urtean zehar erregulatuko dira, langileak nahi dituen jaiegunak hartuta, baina sei egun lehenago abisatuta betiere. Ezin izanen dituzte batera hartu txanda bakoitzeko bi langilek baino gehiagok.

9. artikulua. Asteko atsedenaldia.

Langile guztiek bi eguneko atsedenaldia izanen dute astean: larunbata eta igandea, ahal dela.

10. artikulua. Lanaldien arteko atsedena.

Lanaldien arteko atsedena hamabi ordukoa izanen da gutxienez.

11. artikulua. Oporrak.

a) Langileen oporrak 30 egun naturalekoak izanen dira urtean. Izenpeturiko itunen arabera banatu eta hartuko dira.

b) Amatasuneko baja izaten denean, langileek aukera izanen dute oporrak baja egun horiekin batzeko.

c) Oporrak hartzeko esleiturik edo programaturik zeuzkan egunetan langile bat laneko istripu batengatik ospitalean egonez gero, oporrak senda-agiria hartu arte atzeratuko dira eta enpresaren beharren arabera zuzendaritzarekin ituntzen diren egunetan hartuko ditu.

12. artikulua. Baimen eta lizentzia ordainduak.

Langileak, aurretik lehenbailehen abisatu eta justifikatuta, baimena izanen du lanera ez agertzeko, ordaindua izateko eskubidearekin, arrazoi hauetako bat dela medio eta honenbeste denborako:

1. Ezkontza: hamasei egun natural.

2. Odolkidetasuneko bigarren gradura arteko ahaideen eritasun larria, ospitaleratu beharra badakar: hiru egun natural. Arrazoi horregatik langilea lekuz aldatu beharrean bada, epea bost egun naturalekoa izanen da. "Leku aldatzea" ohiko lantokitik 99 km baino gehiago egitea da.

3. Odolkidetasuneko bigarren gradura arteko ahaideak hilez gero: bi egun natural. Arrazoi horregatik langilea lekuz aldatu beharrean bada, epea lau egun naturalekoa izanen da.

4. Ezkontidea edo seme-alabak hilez gero: bost egun natural. Arrazoi horregatik langilea lekuz aldatu beharrean bada, epea zazpi egun naturalekoa izanen da.

5. Seme edo alaba baten jaiotza: lau egun natural. Arrazoi horregatik langilea lekuz aldatu beharrean bada, bi egun gehiago izanen ditu.

6. Ohiko bizilekuz aldatzeko: egun natural bat.

7. Publikoa den betebehar saihestezina betetzeko behar-beharrezkoa den denbora. Betebehar hori ordaindua denean, erakunde publikoak esleitutako ordainsaria kenduz pagatuko zaio langileari. Aldi bat lege bidez edo hitzarmenen bidez ezarritako arau batean jasota dagoenean, absentziaren iraupenari eta ordainari dagokienez arau hartan xedatutakoari jarraituko zaio.

8. Goian aipatu den eginbehar hori betetzeagatik hiru hilabeteko tartean lanorduetako ehuneko 20 baino gehiagotan ezin izan bada egin beharreko lana bete, enpresak eszedentzia egoerara pasa dezake langilea, Langileen Estatutuaren 46. artikuluaren 1. idatz-zatian arautu bezala.

9. Langilearen seme-alaben, anai-arreben edo gurasoen ezkontza: egun natural bat.

a) Medikuarengana joatea:

1._Langileak urtean hamasei ordu izanen ditu Osasunbidea-Nafarroako Osasun Zerbitzuak jarritako familia medikuarengana joateko, kontsulta lanorduetan bada; urtean 20 ordura arte luzatzen ahal da haurrak pediatrarengana eramateko.

2._Osasunbidea-Nafarroako Osasun Zerbitzuko espezialisten kontsultara joateko beharrezkoak diren orduak izanen ditu langileak, kontsulta lanorduetan bada.

3._Langileak beharrezkoak diren orduak izanen ditu bere etxean bizi diren adin txikiko haurrak Osasunbidea-Nafarroako Osasun Zerbitzuko espezialisten kontsultara eramateko (famili medikuaren edo pediatraren kontsulta-orria behar da).

b) Baimen horiek guztiak egun naturaletarako emanen dira, gertaera eragilea bukatu bitarte. Baimena, diraueino, hori eskatzeko zergatikoa desagertuz gero, bukatutzat emanen da.

c) Lizentziak edo baimenak eskatzeko eskubidea ematen duten kasuak asmatzea oso hutsegite larria da.

d) Artikulu honetan xedaturiko ondorioetarako, izatezko bikotekideei ezkontideek dituzten eskubide berak aitortzen zaizkie. Horretarako, langileek frogatu beharko dute izatezko bikote bat osatzen dutela, udaletxeko Izatezko Bikoteen Erregistroko ziurtagiriaren bidez.

e) Ezkontidearen edo odolkidetasuneko lehen graduko ahaideen kirurgia anbulatorioagatik: egun natural bat.

13. artikulua. Ordaindu gabeko baimenak.

Ikastetxe ofizial batean azterketak edo azken ebaluazioak egiteko urtean behar diren egunak.

14. artikulua. Borondatezko eszedentzia.

Enpresan gutxienez ere urtebeteko antzinatasuna duten langileek borondatezko eszedentzia eska dezakete urte baterako, lanpostua gordetzeko eskubidearekin, sektore bereko beste enpresa batean lan egiteko ez bada.

Eszedentzia gutxienez bi urterako eta gehienez bosterako eskatzen bada, Langileen Estatutuan ezarritakoari jarraituko zaio.

Eskubide horretaz berriro balia daiteke langile bera, aurreko eszedentzia bukatu eta lau urte igaro eta gero.

15. artikulua. Seme-alabak edo ahaideak zaintzeko eszedentzia.

Langileek eskubidea izanen dute gehienez ere bi urteko eszedentzia eskatzeko, kasu hauetan:

_Bigarren gradura arteko ahaide bat (odolkidea edo ezkontza bidezkoa) zaintzeko, baldin eta ezgaitua bada, lan ordaindurik egiten ez badu eta langilearen kargura badago. Osasun ziurtagiria aurkeztu beharko da.

Langileek eskubidea izanen dute gehienez ere hiru urteko eszedentzia eskatzeko, kasu hauetan:

_Hiru urtetik beheitiko haur bat (norberak izandakoa edo adoptatua) zaintzeko. Norberak izandako haurra bada jaiotza egunetik hasiko da eszedentzia, eta adoptatua bada, berriz, ebazpen judizial edo administratiboaren egunetik.

Langileen banakako eskubide bat da, bai gizonena bai emakumeena.

Eszedentzian dagoen langileak lehen urtean lanpostua gordetzeko eskubidea izanen du, eta lanbide kategoria gordetzeko hurrengo bi urteetan.

Eszedentziarako beste arrazoi bat sortuz gero, eszendentzia izateko eskubidea izanen da berriz.

Eszedentzia aldiak kontuan hartzen dira antzinatasunerako.

16. artikulua. Lanaldia murriztea.

a) Lanaldiaren murrizketa legepeko zaintzarengatik.

Legepeko zaintza dela eta, langileren batek zortzi urtetik beherako haurra edo ordaindutako lanik egiten ez duen ezindu fisiko nahiz psikikoren bat bere kargu izanez gero, eskubidea izanen du lanaldia murrizteko, heren bat gutxienez eta erdia gehienez ere, lansaria ere hein berean murriztuta.

b) Adinagatik, istripuengatik edo eritasunengatik bakarrik ezin baliatu diren eta lan pagaturik ez duten bigarren gradura arteko odol-ahaidetasun edo ezkontza-ahaidetasuneko ahaideak zuzenean zaintzeko ardura dutenek eskubidea izanen dute lanaldia murrizteko, lansaria hein berean murrizturik, gutxienez ere lanaldiaren iraupenaren heren bat eta gehienez ere erdia.

a) eta b) kasuetan:

_Lanaldi murrizketa langile bakoitzaren eskubidea da, norberarena, gizonezkoa izan edo emakumezkoa izan. Hala ere, pertsona bera zaintzeko eskubidea enpresa bateko bi langilek edo gehiagok izaten badute, enpresak aukera izanen du aldi berean erabili nahi den eskubidea mugatzeko, funtzionamenduarekin lotutako bidezko arrazoirik baldin badago.

_Lanaldi murrizketaren orduak eta iraupena zehaztea langileari dagokio, eta hamabost egun lehenago jakinarazi beharko dio enpresaburuari lanaldi arruntaren barnean, bai murrizketa hasteari bai itzulerari dagokionez.

_Enpresaren eta langilearen artean ordu zehaztapenari buruz sortzen diren desadostasunak dagokion jurisdikzioak ebatziko ditu prozedura berezi baten bidez, eta hogei egun izanen dira erreklamazioa egiteko.

17. artikulua. Haurrari esnea emateko baimena.

Langileek, bederatzi hilabetetik beheitiko haurrei esnea emateko, baimena izanen dute lantokitik ordu batez ateratzeko. Denbora hori bi zatitan banatzeko edo eskubide horren ordez eguneroko lanaldia ordu erdi murrizteko aukera izanen dute. Denbora hori aitak eta amak hartzen ahalko dute, baina ez biek batera. Aukera izanen da, halaber, aldi bakar batean pilatu eta amatasuneko bajari lotzeko.

18. artikulua. Aldi baterako ezintasuna.

Eritasunaren edo istripuaren ondoriozko aldi baterako ezintasunen bat gertatuz gero, lehenbailehen jakinaraziko zaio zentroko zuzendaritzari, lana antolatu eta zentroak jardun ahal izateko.

Laneko istripuaren edo lanbide eritasunaren ondoriozko aldi baterako ezintasunetan, Gizarte Segurantzak langileari eskubidea aitortzen badio aldi baterako ezintasunerako prestazioak hartzeko, enpresak osagarri bat pagatu beharko dio, Gizarte Segurantzatik aldi baterako ezintasunaren prestazioagatik kobratzen duena kontaturik kotizatzeko legezko soldataren %100 egiteko moduan.

Lanetik kanpoko istripu edo eritasunaren ondoriozko aldi baterako ezintasunetan, Gizarte Segurantzak langileari aitortu badio ezintasunaren ondoriozko prestazio ekonomikoak hartzeko eskubidea, adibidez, gutxienez ere kotizazioko 180 egun, baita beste edozein baldintza edo zergatiko ere, enpresak eriari edo istripua izan duenari ondoren adierazten diren osagarriak pagatu beharko dizkio:

_Erialdiko 1. egunetik 10. egunera bitarte: kotizazioko egiazko soldataren %80.

_Erialdiko 11. egunetik aurrera: kotizazioko egiazko soldataren %100 arte.

Arau horien indarraldia hitzarmen hau izenpetu ondorengoa bada, eta Gizarte Segurantzak edo istripu mutuek aldi baterako ezinduriko langileei pagatzen dizkien prestazio ekonomikoak gutxitu edo murrizten dituzten arauak aldatuz gero, alderdi sinatzaileek konpromisoa hartzen dute artikulu honetan ezarririkoa egokitzeko modua negoziatzeko.

19. artikulua. Haurdunaldiko arriskua.

Haurdunaldian arriskurik gertatuz gero, Laneko Arriskuei Hartzeko azaroaren 8ko 31/1995 Legeko 26. artikuluko 2. eta 3. idatz-zatietan aipatzen diren baldintzetan, aukera izanen da kontratua eteteko, lanpostua gorderik.

Etenaldia bukatuko da kontratua amatasun biologikoagatik eteten hasten den egunean, edo emakumezko langileak aurreko lanpostura edo bere egoerarekin bat datorren beste batera itzultzeko duen ezintasuna desagertzen denean.

Haurdunaldiko arriskuagatiko prestazio ekonomikoa oinarri arautzailearen %100era arte osatuko da, eta kontratua eteten den egunean hasi eta enpresara itzuli aurreko egunean bukatuko da.

IV. KAPITULUA

Baldintza ekonomikoak

20. artikulua. Soldata kontzeptuak.

Ordainsarien kontzeptu guztiak hitzarmen kolektibo honetan erabakitzen den berrikuspenaren menpe egonen dira eta lanaldia bukatzean hein berean pagatuko dira.

Soldata kontzeptuak

Hona hemen soldata kontzeptuak:

_Oinarrizko soldata: eranskineko taulen arabera.

_Antzinatasuna: antzinatasun finkatua duten langileek, osagarri pertsonal gisa, 2006ko abenduaren 31n jasotzen zuten ordainsaria izanen dute. Data horretan laurteko finkaturik ez zuten langileek, osagarri pertsonal gisa, data horretan zuten antzinatasunaren zati proportzionala jasoko dute.

_Gaueko lanaren plusa: 22:00etatik 6:00ak bitarte lanean diharduten langileek osagarri bat kobratuko dute gauez lan egiteagatik. Eranskineko taulen arabera.

_Sukaldeko plusa: sukaldean oreak egiten aritzen diren langileek 6 euroko plusa izanen dute lanean aritutako lanegun bakoitzeko.

_Izozte-kameretako plusa: lanaldiaren barrenean, izozte-kameretan gutxienez ere bi ordu egoten diren langileek, 2007. urtean eta lehen ordutik hasita, 2.00 euroko plusa jasoko dute izozte-kameren barrenean aritzen diren orduko.

21. artikulua. Aparteko eskersariak.

Langile guztiek bina aparteko eskersari kobratuko dituzte, eta ordainsari horietan oinarrizko soldatarekin batera antzintasun finkatua edo osagarri pertsonala sartuko da. Ordainsari horiek nomina bakoitzean hainbanatuta ordainduko dira.

22. artikulua. Aparteko orduak.

Ordu horiek, langileak borondatez egitekoak, diruz ordainduko dira %25 gehituta edo, bestela, atsedenaren bidez (ordu bat eta hamabost minutu).

Langileek ez dituzte aparteko berrogei ordu baino gehiago eginen urtean.

Aparteko ordua egunez edo gauez den, horren araberakoa izanen da zenbatekoa, baina ez da inoiz ere ordu arruntaren zenbatekotik beherakoa izanen.

23. artikulua. Igoerak.

Soldata kontzeptu guztiek igoera izan dezakete.

_2007. urtea: eranskineko taulen arabera.

_2008. urtea: Estatuan aurreikusitako KPIa + 3 puntu.

_2009. urtea: Estatuan aurreikusitako KPIa + 3 puntu.

V. KAPITULUA

Kontratazioa

24. artikulua. Probaldia.

Honako probaldiak izanen dira:

_Produkzioko arduraduna: sei hilabete bitarte.

_Kalitatearen arduraduna: sei hilabete bitarte.

_Langileak: hiru hilabete bitarte.

Probaldia idatziz itunduko da. Indarrean dagoeino alde kontratatzaile bakoitzak bere aldetik lan harremana bukatutzat ematen ahalko du, askatasun osoz, aldez aurretik jakinarazi beharrik gabe eta inolako ordainik gabe.

25. artikulua. Kontratazio mugagabea.

Hitzarmen hau sinatzen den egunetik aurrera, 2006ko abenduaren 31n urte batetik gorako antzinatasuna zuten langile guztiak plantillako langile finko izatera pasatuko dira, beren kontratuak mugabekoak bihurtuz.

26. artikulua. Aldizkako langile finkoak.

a) Definizioa eta edukia.

Aldizkako lan kontratu finkoa, enpresa honetan izaera propioa duena, barazki kontserben sektore guztian bezala, enpresan ohiko jardueran aldizkako lan finkoetan (ez beti data beretan) aritzeko deitzen den langileari egiten zaiona da, urteko lanegun guztietan zerbitzuan aritzerik ez badago ere.

Ez da hala ere eskatzen urtean zehar lanegunak diren egun guztietan zerbitzuan aritzea.

Kontratu mota horretan enpresaren interesak eta langileenak biltzen dira; enpresarenak, jarduerak eskatzen duen malgutasuna eskaintzen duelako eta lan gutxiago dagoenean plantilla arindu daitekeelako, eta langileenak, berriz, kontratu mugagabea delako.

Aldizkako lan finkoaren kontratuan aipamen hauek bilduko dira:

_Kontratuaren izaera.

_Kontratuaren xedeko zerbitzuak zein jarduera zikliko edo aldizkakotan emanen diren.

_Laneratzeko deia egiteko modua eta hurrenkera, hitzarmen kolektiboan ezarri bezala.

_Urteko lanaldiaren gehieneko iraupena eta ordutegia, enpresako hitzarmenean edo egutegian ezarritako baldintzen arabera.

B) Deitzea eta erroldak.

Aldizkako langile finkoa bere kontratuko jarduera egin behar den orotan deituko dute; une bakoitzean lan kopuruak sortzen dituen beharren arabera eginen da deia.

Antzintasunaren hurrenkerari jarraikiz deituko dira langileak kategoria bakoitzean, enpresaren produkzio beharren arabera. Antzinatasunaren alderantzizko hurrenkerari segituz emanen zaio amaiera lan aldiari kategoria bakoitzean, langileari idatziz jakinarazi ondoren.

Langilea enpresak finkatzen duen egunean hasiko da lanean. Langile bati hiru eguneko epe hori errespetatu gabe lanean hasteko deitzen bazaio, eta jakinarazi eta ondoko hiru egunetan hasterik ez badu, ez da ukotzat hartuko. Harremanetan jarri ahal izateko, langileak Espainiako helbide bat jakinarazi beharko dio enpresari.

Langile bati deitu eta esaten zaion egunean enpresan hasten ez bada, aldizkako langile finkoaren izaera galduko du, eta egoera hori enpresako borondatezko bajarekin parekatuko da.

Deia egin eta lanean ez hasteak ez du ekarriko antzinatasun erroldan langileak duen hurrenkera galtzea, honako egoera hauetan dagoenean: aldi baterako ezintasuna, haurra izan, adoptatu edo familian hartu ondorengo atseden aldia, eszedentzia, lizentzia edo justifikatutako beste arrazoi batzuk. Lanean ez hastea justifikatzen duen arrazoia behar bezala frogatu beharko da. Behin laneratuz gero, berriro lotuko zaio lan harremanari.

Enpresak, urte bakoitzeko urtarrilean, errolda prestatu eta gutxienez ere hamabost egun naturalez iragarki oholean jarri beharko du, langileek horren berri izan dezaten. Ale bat eman beharko die langileen ordezkariei. Kalte egin zaiela uste duten langileek erreklamazioa egiten ahalko diote idatziz enpresari, jendaurren jarri eta hamabost egun naturaleko epean. Enpresak ezetza ematen badio eskaerari edo beste hamabost egun naturaleko epean erantzuten ez badu, bidezkoak diren legezko ekintzak gauzatzen ahalko ditu langileak.

Deialdia betetzen ez bada, hurrengo bi lerroaldeetako kasuetan izan ezik, langileak kaleratze-prozedura eskatzen ahalko du jurisdikzio eskudunaren aurrean. Epea hasiko da deialdirik egin ez dela jakin eta egun berean.

Ez da kaleratzetzat joko aldizkako langile finko guztiak hartzeko behar adinako lan kopururik ez izatearen ondorioz deirik ez izatea. Egoera horrek kontratuaren etetearen jarraipena ekarriko du, baldin eta ez badira sartzen egindako erroldaren arabera deien hurrenkeran beherago dauden aldizkako langile finkoak.

Ondokoak kontratua eteteko arrazoi izanen dira eta, horren ondorioz, lan egiteko eta lana pagatzeko elkarrekiko betebeharretik askatuko dira eta lanerako deitua ez izatea ez da kaleratzetzat hartuko: gorabehera atmosferikoak, banaketarako garraioak edo baliabideak gelditzea, indar eragilea moztea edo lehengairik ez izatea, enpresari egozten ahal ez zaion arrazoiren batengatik. Holakoetan, enpresek gertaera eragilearen berri emanen diete langileen ordezkariei, eta hori nahikoa izanen da prozesua aurrera eramateko.

c) Beste gai batzuk.

Enpresak egiazki lan egindako egunen egiaztagiria emanen dio langile bakoitzari edo lege-ordezkariei, zerbitzuak emateko aldiaren bukaeran.

Aldizkako kontratu finkoko langileek aparteko ordainsariak eta oporrei dagokiena jasoko dute, lanean egiazki egindako denboraren proportzioan.

Hitzarmenean eta Legean ezarritako prozeduren arabera goragoko kategoria batera igarotzen diren langileek eskubidea izanen dute antzinatasun hurrenkeraren zenbakia gordetzeko aurreko kategorian deituak izateari begira, enpresako aldizkako langile finkoen sustapena ez galarazteko. Kasuan kasu benetan egindako zereginari dagokion soldata jasoko da.

Ondorio guztietarako, aldizkako langile finko bat amatasun bajan dagoenean, zerrendako hurrengo langileak ordeztuko du bere lanpostuan. Beharrezkoa izanez gero, edozein egiaztapen administratibotarako, dagokion kontratua egitea, bi alderdiek adostuko dute.

27. artikulua. Produkzioaren inguruabarrak.

Merkatuaren egoera, lanen ugaritasuna edo eskaeren pilaketa dela-eta beharrezkoa denean, enpresaren ohiko jarduera izanik ere (adibidez, Eguberri bezperan edo herriko jaien bezperan, langileen oporretan edo eskaintzen ondorioz lan ugari dagoen aldietan), berariazko kontratuak egiten ahalko dira, jardueraren inguruabarrengatik, gehienez ere 12 hilabeterako 18 hilabeteko tartean. Baldin eta 12 hilabetetik beherako eperako ituntzen bada, luzatzen ahal da aldeak ados jarrita, baina kontratuak ez du gehieneko muga hori baino gehiago iraunen.

28. artikulua. Erretiro berezia 64 urte betetzean.

Uztailaren 17ko 1194/1985 Errege Dekretuan eta 64/97 Legean erretiro berezia aurreikusten da 64 urte betetzean. Halaxe aplikatuko da langileek eskatuz gero.

Betiere, enpresak behartuak daude 64 urte betetzean erretiroa eskatzen duten langileak ordezteko kontratuak izenpetzera.

29. artikulua. Erretiro partziala, errelebo kontratua.

Halaber, langileak hala eskatu eta horretarako betebeharrak betetzen dituztenean, ordezteko kontratuak izenpetuko dira, enpresak ordezko langilerik atzemanez gero.

Ordezturiko langileari ohiko erretiroko pentsioa kobratu ahal izateko behar den adinera iristeko falta zaion denborarako izanen da. Lanaldia osoa edo partziala izan daiteke. Betiere, ordezturiko langileei lanaldia zenbat ordu murrizten zaien eta gutxienez ere horixe iraun beharko du. Ordeztuek lanbide talde bereko edo baliokidea den kategoriako lanak egin beharko dituzte.

30. artikulua. Langileen igoera.

Lanpostu hutsak edo sortu berriak barne deialdi baten bidez beteko dira lehenbiziko saioan. Enpresa bereko langileek izanen dute lehentasunezko eskubidea lanpostu horiek betetzeko, lanpostuan aritzeko behar diren baldintzak betetzen badituzte. Langile guztiek eskubidea izanen dute lanpostu horietara baldintza beretan aurkezteko.

Lanpostuak aurreko prozeduraren bidez bete ezik, kanpo deialdi baten bidez beteko dira. Hautagaiek egin beharreko lanerako gaitasun proba batzuk gainditu beharko dituzte. Proba horiek lanpostuaren ezaugarrietara eta langileen tituluetara egokituko dira.

Barne eta kanpo deialdiko prozeduretan langileen ordezkari batek hartuko du parte, sindikatuen ordezkariak, hain zuzen ere, horrelakorik baldin bada.

31. artikulua. Ikastaroetan parte hartzea.

Enpresak, berak edo langileek eskaturik, komenigarritzat jotzen duenean langileek beren lanari loturiko ikastaro, biltzar, jardunaldi eta abarretan parte hartzea, behar bezala frogaturiko gastuak pagatuko dizkie, aldez aurretik onarturiko aurrekontuarekin bat.

Halaber, ikastaroak enpresak sustatzen ez dituenean, gastuak erdibanatuko dira, alegia, erdia enpresaren kontu eta beste erdia langileen kontu. Horretarako, langileek nahitaez egin beharko dituzte ikastaroak.

32. artikulua. Laneko arropa.

Egin beharreko lanen araberako arropak emanen dizkie enpresak langileei:

_Bata, prakak, elastikoa.

_Segurtasuneko oinetakoak.

_Txanoa.

_Mantalak.

_Eskularru termikoak.

_Txalekoa eta berokia.

Jantziak ordezteko, langileek jantzi erabiliak itzuli beharko dituzte. Enpresa utziz gero, harturiko jantzi guztiak itzuli beharko dituzte.

33. artikulua. Lan osasuna.

Enpresak eta langileek Laneko Arriskuen Ebaluazioan azaltzen dena bete beharko dute.

34. artikulua. Istripu asegurua.

Enpresa behartuta dago aseguruen poliza kolektibo bat ituntzera, kasu hauek aseguratzeko:

a) 27.000 euroko kalte-ordaina, lan istripuaren ondoriozko erabateko ezintasun kasuetan.

b) 24.000 euroko kalte-ordaina, lan istripuaren ondoriozko heriotza kasuetan.

Aurreko lerroaldeetan finkatutako kalte-ordainak ordaindu beharrak hitzarmen honek indarra hartu eta hurrengo hilabeteko lehengo egunean hartuko du indarra.

VII. KAPITULUA

35. artikulua. Sindikatuen ordezkarien eginkizunak.

Ordezkaritzarako eta bilerarako eskubideak Langileen Estatutuan, Askatasun Sindikalari buruzko Lege Organikoan eta indarra duten beste legeetan aipatzen direnak izanen dira.

Ordu kreditu ordaindua hiruhilekoetan pilatzen ahalko da, langileen legezko ordezkariek nahi duten moduan. Pilaketa hori, gauzatu ahal izateko, enpresari jakinarazi beharko zaio aurretik.

VIII. KAPITULUA

Hutsegiteak eta zehapenak

36. artikulua. Hutsegite motak.

Sektoreko enpresen zerbitzuko langileen hutsegiteak, garrantziaren arabera eta, hala gertatzen denean, berriro egin izanaren arabera, honela sailkatuko dira: arinak, larriak eta oso larriak, hurrengo artikuluetan xedatzen denarekin bat.

37. artikulua. Hutsegite arinak:

Honako hauek hutsegite arinak dira:

1._Lanera berandu iristea, batuketa eginik hilean hamabost minutu baino gehiago egiten badute.

2._Baja dagokion garaian ez aurkeztea, zentzuzko motiboa dela medio lanera huts egiten denean, non eta frogatzen ez den ezinezkoa izan dela.

3._Lantokitik edo lanpostutik alde egitea, nahiz eta denbora laburrean izan, bidezko zergatiko edo arrazoirik gabe, baina alde egite horrek kalterik ez dakarrenean enpresaren jarduerarako, edo lankideei kalte edo istripurik eragiten ez dienean; izan ere, horrelakoetan hutsegite larritzat edo oso larritzat joko bailitzateke.

4._Egun batean lanera huts egitea behar den baimenik edo zentzuzko motiborik gabe.

5._Enpresaren hornidurak edo materiala zaintzerakoan arreta gabezia txikiak.

6._Enpresari ez jakinaraztea lan arloan eragina izan dezakeen edozein egoera aldaketa, adibidez ohiko bizileku aldaketa.

7._Norberaren garbitasun eta txukuntasunik eza, enpresaren produkzio prozesuan edo irudian eraginik izan dezakeenean.

8._Beste langileekin enpresaren esparruan eztabaidan aritzea, jendaurrean gertatu ez bada.

9._Laneko arriskuen prebentzioaren arloko arauak ez betetzea, langilearentzat, lankideentzat edo hirugarrenentzat arrisku larririk ez denean.

10._Jendea behar den adeitasunez eta arretaz ez atenditzea.

11._Enpresa barnean higiene arauak ez betetzea.

38. artikulua. Hutsegite larriak: hutsegite larriak honako hauek dira:

1. Lanera berandu iristeak, batuketa eginik hilean hogeita hamar minutu baino gehiago egiten badute.

2._Behar den baimenik edo zentzuzko motiborik gabe lanera ez agertzea bi egunez sei hilabetean.

3._Laneko arriskuen prebentziorako arauak edo aginduak ez betetzea, langilearentzat, lankideentzat edo hirugarrenentzat arrisku larria eraginez, hala nola enpresak emandako segurtasun baliabideak erabili nahi ez izatea.

4._Nagusiek emandako lan arloko aginduren bat ez betetzea, betiere agindua langilearentzat iraingarria ez bada edo langilearen edo beste batzuen bizitzarako edo osasunerako arriskugarria ez bada. Ez-betetzea errepikatua bada, edo laneko diziplina nabarmen haustea badakar, edo enpresarentzat edo pertsonentzat kalterik sortzen badu, oso larritzat har daiteke.

5._Beste langile baten laneratzea simulatzea, haren ordez sinatuz edo fitxatuz.

6._Beste langileekin eztabaidan aritzea, jendaurrean edo jendearengana hotsa iristeko moduan.

7._Behar den baimena izan gabe, norberarentzako lanak egitea lanaldian zehar.

8._Enpresaren gauzak edo janzkiak norberarentzat erabiltzea edo enpresaren instalazioetatik edo esparrutik ateratzea, baimenik gabe.

9._Enpresaren hornidurak edo materiala zaintzerakoan utzikeria handia.

10._Hiru hutsegite arin egitea hiruhileko epean, are mota desberdinekoak izanda ere, tartean idatzizko zehapena izan denean.

39. artikulua. Hutsegite oso larriak:

Hutsegite oso larriak honako hauek dira:

1._Lanera bi egun baino gehiagoz huts egitea urtebetean, zentzuzko arrazoi edo motiborik gabe.

2._Aldi baterako ezintasuna edo istripua simulatzea.

3._Iruzurra, leialtasun eza edo konfiantza-abusua, dela agindutako lanean edo kudeaketan, dela lan orduetan lankideekin edo beste edozein pertsonarekin diren harremanetan; enpresaren baimen espresurik gabe merkataritza edo industria arloko negoziazioak egitea bere kontura edo beste norbaitentzat, hala nola enpresari bidegabeko lehia egitea bere jardueran.

4._Enpresari edo lankideei lapurtzea, ebastea edo iruzur egitea, bai eta beste edozein pertsonari ere, lantokian denean edo lan orduetan beste edozein lekutan zerbitzua ematen aritzean.

5._Enpresaren edo lantokiaren materiala, lanabesak, makineria, instalazioak, eraikinak, aparatuak, tresnak, agiriak, liburuak edo ibilgailuak desagerrarazi, hondatu, suntsitu edo matxuratzea.

6._Ohiko mozkorkeria edo drogamenpekotasuna lanaldian zehar eta norberaren lanpostuan. Mozkorturik egotea edo sorgorkariak hartu izana, behin bakarrik izan bada ere, hutsegite larria izanen da.

7._Enpresaren korrespondentzia edo isilpeko dokumentuen sekretua haustea edo enpresakoa ez den bati nahitaez isilpean eduki beharreko datuak ezagutaraztea.

8._Hitzezko eta egitezko tratu txarrak ematea edo errespetu edo begirune falta larria erakustea nagusiei edo haien ahaideei, bai eta lankide eta menpekoei ere.

9._Lankideekin liskarrak eta iskanbilak maiz sortzea.

10._Laneko arriskuen prebentzioaren arloko arauak ez betetzea, lan istripu larria eragiten denean, lankideentzako edo hirugarrenentzako arrisku larria edo enpresarentzat kalte larria.

11._Nagusi batek legeak onarturiko langilearen eskubide bat urratzea dakarren egintza arbitrario bat burutzea, horrek menpekoari kalte larria dakarkionean.

12._Ohiko lan-errendimendua nahita eta luzaroan gutxitzea, legeek onartutako eskubide bat erabiltzearen ondorioz ez bada.

13._Agindutako lanean arduragabekeria edo utzikeria erakustea, edo lana enpresaren instalazioetan edo makinerian matxura larriak edo istripuren bat eragiteko moduan egitea.

14._Bezeroenganako begirune edo adeitasun falta nabarmena.

15._Norbere garbitasun eta txukuntasunik eza, jarraitu eta ohikoa, enpresaren produkzio prozesuan edo enpresaren irudian eragina izan dezakeenean.

16._Lan esparruko edozein portaera, hierarkiako goragoko egoera bat baliatuz beste langile baten intimitatearen eta duintasunaren begiruneari eraso larria egiten diona, sexuarekin loturiko edozein irain hitzezko nahiz fisikoren bitartez. Jokabide hori hierarkia-egoeraz baliatuz gauzatzen bada, hartarako inguruabar astungarria izanen da.

17._Lantokian langile baten moralari eraso egiteko helburu duten jokabide sistematiko guztiak, behin eta berriz, sarritan eta luzaro egiten badira, jokabide horren asmoa edo ondorioa haren eskubideak edo duintasuna degradatzea, haren osasun fisikoa edo mentala hondatzea edo haren etorkizun profesionala baldintzatzea baldin bada.

18._Hutsegite larriak behin eta berriz egitea, mota desberdinetakoak izan arren, lehenbizikoa egin ondoko sei hilabeteren barnean egiten bada, betiere.

40. artikulua. Zehapenak. Aplikazioa:

1. Enpresek, egindako hutsegiteen larria eta inguruabarrak kontuan hartuta, zehapen hauek jartzen ahal dituzte:

1. Hutsegite arinak:

I._Hitzezko kargu-hartzea.

II._Idatzizko kargu-hartzea.

III._3 egunera bitarteko enplegu-soldaten etenaldia.

2. Hutsegite larriak:

IV._3 egunetik 15era arteko enplegu-soldaten etenaldia.

3. Hutsegite oso larriak:

V._16 egunetik 60ra arteko enplegu-soldaten etenaldia.

VI._Lan-kontratua desegitea, hutsegiteari kalifikaziorik altuena ematen bazaio.

2. Aurreko 1. puntuko zehapenak aplikatzeko eta mailakatzeko, kontuan hartuko da:

a) Huts egin duenaren erantzukizun maila handia ala txikia den.

b) Langilearen lanbide kategoria.

c) Egintza horrek gainerako langileengan eta enpresan duen eragina.

3. Legezko ordezkari bati edo sindikatuetako ordezkari bati hutsegite larrien edo oso larrien zehapena jarri aurretik, enpresak aldebiko espedientea irekiko dio. Horren barrenean entzunaldia emanen zaio interesdunari eta ordezkatzen duen taldeko gainerako kideei, horrelakorik baldin badago.

Aldebiko espediente hori instruitu beharrak ordezkaritza kargua utzi eta hurrengo urtera arte iraunen du.

4. Enpresak sindikatu batean afiliatua dagoen langile bati zehapena jarri nahi baldin badio, neurri hori hartu baino lehen, ordezkari sindikalei entzunaldia emanen die, horrelakorik baldin badago.

41. artikulua. Hutsegiteen preskripzioa:

Enpresako zuzendaritzak zehapenak jartzeko duen ahalmenak hamar egunen buruan preskribituko du hutsegite arinetan, hogei egunen buruan hutsegite larrietan eta hirurogei egunen buruan hutsegite oso larrietan, egitearen berri izandako egunetik kontatzen hasita, eta edozein modutan ere, hutsegitea egin eta hurrengo sei hilabeteren buruan.

42. artikulua. Zehapenek dakartzaten beste ondorio batzuk:

Enpresek hutsegite larriengatik edo oso larriengatik langileei ezartzen zaizkien zehapenak lan espedienteetan adieraziko dituzte. Hutsegite arinetan berregileak badira, horren berri ere jasoko da.

IX. KAPITULUA

Azken xedapenak

43. artikulua. Batzorde paritarioa.

A._Eraketa: hitzarmen hau izenpetu eta hilabeteko epean, Bitariko Batzorde bat sortuko da, aldeen bina ordezkarik osatuko dutena.

B._Eginkizunak:

1._Batzorde honi esleitzen zaizkio hitzarmena interpretatu, begiratu eta ikuskatzea eta ondorengo berariazko negoziazio baterako ireki eta ikertzeke gelditzen diren gaiak garatzea, sortzen diren liskarrei buruzko aldez aurreko azterketa eta erabakia, arazoei irtenbidea emateko prozeduretan, eta, premiazkoa denean, hitzarmenaren edukia osatzea, hitzarmenean bertan ezarritakoari jarraikiz.

2._Hitzarmen honetan xedatutakoaren interpretazioaz edo aplikazioaz edozein banakako edo taldeko liskar agertu aitzin, hala aurretiazko erreklamaziokoa lan administrazioko agintaritza eskudunari, nola organo jurisdikzional eskudunari zuzendua, auzia Batzorde Paritarioaren esku jarriko da.

3._Langileen Estatutuko III. tituluan xedaturikoarekin bat, Batzordeak hitzarmen honen xede diren gaiei buruz eta gai horiek interpretatu eta garatzeko hartzen dituen erabakiak hitzarmenari erantsiko zaizkio eta balio juridiko bera izanen dute.

C._Erregelamendua:

1._Batzorde paritarioak bere funtzionamendurako egokia den erregelamendua prestatu eta onetsi dezake.

2._Batzorde paritarioa edozein aldek eskaturik bilduko da, deialdia eskatzen denetik hamabost eguneko epean, salbu eta presa dela-eta, bilera bi aldeen eskubideak zaintzeko moduko epe batean egitea komeni denean.

3._Batzordeak erabakiak hartzeko, kideen hiru laurdenen botoak beharko dira.

44. artikulua. Lege osagarriak.

Hitzarmen honetan espresuki aurreikusirik ez dagoen guztian, Langileen Estatutua eta lan arloan indarra duten xedapen orokorrak izanen dira betetzekoak.

Lehenbiziko xedapen gehigarria._Lan arloko Auzitegia.

Bi aldeek Nafarroako Lan Auzitegiaren bitartekotza onartzen dute.

2007KO LANSARIEN TAULAK

PRODUKZIOKO ARDURADUNA 1. M. OFIZIALA 2. M. OFIZIALA KALITATEAREN ARDURADUNA

OINARRIZKO SOLDATA 1.228,18 + 188,95 = 1.417,13 euro 1.010,57 + 168,43 = 1.179 euro 974,61 + 162,44 = 1.137,05 euro 1.025'88 + 170'97 = 1.196'85 euro

GAUEKO LANAREN PLUSA 1 euro x h 1 euro x h 1 euro x h 1 euro x h

IZOZTE-KAMERETAKO PLUSA - 2 euro x h 2 euro x h -

ANTZINTASUN FINKATUA Langile bakoitzarena Langile bakoitzarena Langile bakoitzarena Langile bakoitzarena

Iragarkiaren kodea: F0709980