74. ALDIZKARIA - 2007ko ekainaren 15a

I. NAFARROAKO FORU KOMUNITATEA

1.3. BESTELAKO XEDAPENAK

1.3.5. Estatutuak eta lan hitzarmen kolektiboak

274/2007 EBAZPENA, martxoaren 27koa, Lan zuzendari nagusiak emana, "Fundación Bidean Laboral" enpresaren lan hitzarmen kolektiboaren testua erregistratu, gorde eta Nafarroako ALDIZKARI OFIZIALean argitaratzea erabakitzen duena (espediente zenbakia: 40/2007).

Departamentu honetan 2007ko martxoaren 16an sartu da "Fundación Bidean Laboral" enpresaren lan hitzarmen kolektiboaren testua, 38 artikuluz, xedapen gehigarri batez, 3 azken xedapenez eta eranskin batez (2006 eta 2007erako lansarien taula) osatua, enpresaren eta langileen ordezkariek (UGT) 2007ko otsailaren 14an izenpetu eta onetsia.

Industria eta Teknologia, Merkataritza eta Lan Departamentuak bere esku du martxoaren 24ko 1/1995 Legegintzako Errege Dekretuaren 90. artikuluan aipatzen diren lan hitzarmen kolektiboak erregistratu, gorde eta argitaratzea, Lan zerbitzuak Estatuko Administraziotik Nafarroako Foru Komunitatera eskualdatzen dituen apirilaren 11ko 937/1986 Errege Dekretuaren arabera, eta kontuan izanik Hitzarmen kolektiboak erregistratu eta gordetzeari buruzko maiatzaren 22ko 1040/1981 Errege Dekretuan xedatutakoa.

Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz.

EBATZI DUT:

1. Berriozarko "Fundación Bidean Laboral" enpresaren lan hitzarmen kolektiboa (kodea: 3108612) erregistratzea, Lan Hitzarmen eta Akordio Kolektiboak Erregistratu eta Gordetzeko Bulegoan horretarako bereziki prestaturik dagoen liburuan, eta bertako administrazio unitatean testua eta dokumentazioa gordetzea.

2. Ebazpen honen berri ematea negoziazio batzordeari eta adieraztea ebazpenak ez duela administrazio bidea agortzen eta honen aurka gora jotzeko errekurtsoa jartzen ahal duela Industria eta Teknologia, Merkataritza eta Lan kontseilariari zuzendua, jakinarazi eta biharamunetik hilabeteko epean.

3. Ebazpen hau Nafarroako ALDIZKARI OFIZIALean argitaratzea, orok jakin dezan.

Iruñean, 2007ko martxoaren 27an._Lan zuzendari nagusia, José María Roig Aldasoro.

FUNDACION BIDEAN LABORAL (ENPLEGURAKO ZENTRO BEREZIA) ENPRESAREN II. HITZARMEN KOLEKTIBOA

I. TITULUA

Xedapen orokorrak

1. artikulua. Xedea.

Lan hitzarmen honek Fundación Bidean Laboral enpresaren eta haren langileri eremuaren barrenean dauden langileen arteko harremanak arautzen ditu.

2. artikulua. Iraunaldia eta indarraldia.

Hitzarmen honek 2007ko urtarrilaren 1ean hartuko du indarra, eta 2010eko abenduaren 31 arte iraunen du.

Hitzarmen honetako lansarien egitura osatzen duten kontzeptuen ondorioak 22. artikulutik 26. artikulura bitarte zehazten dira, biak barne.

Langileen Estatutuaren 86. artikuluko 2. idatz-zatian ezarritakoaren ondorioetarako, hitzarmen kolektibo hau hitzartzen den hasierako amaiera-egunean iragartzen da, eta haren arau-edukiak indarra izanen du berri batek ordezten ez duen bitartean.

3. artikulua. Aplikazio eremua.

Lan hitzarmen kolektibo honek langile finkoak, behin-behineko langileak eta bitartekoak hartzen ditu, Fundación Bidean Laboral enpresan ari direnak, honakoetan ezarritako edozein kontratazio mota dutenak: Langileen Estatutuan eta hura garatzeko gainerako legerian, batik bat 427/1999 Errege Dekretuaren bidez aldatutako uztailaren 17ko 1368/1985 Errege Dekretuan (Enplegurako Zentro Berezietan lanean ari diren minusbaliatuen lan harreman berezia arautzen duena). Hitzarmenaren aplikaziotik kanpo gelditzen dira gizarte boluntarioaren lana egiten dutenak edo prestakuntza praktiketan edo erlijio zereginetan ari direnak, eta Fundación Bidean Laboral entitatearekin zerbitzuen errentamendu kontratuak hitzartuak dituzten enpresen plantilletakoak.

3. bis artikulua. Berme pertsonalak.

Langileren batek, urteko zenbaketan eta orokorrean, hitzarmen honetan ezarritakoak baino lan baldintza hobeak izanez gero, errespetatu eginen zaizkio.

II. TITULUA

Lanbide sailkapena

4. artikulua. Langileen sailkapena.

Langileak, betetzen duten lanaren arabera, lanbide talde edo kategoria hauetan sailkatuko dira:

1. taldea: Goi mailako teknikariak.

_Fabrikazioko burua.

2. taldea: Erdi mailako teknikariak.

_Fisioterapeuta.

_Logopeda-Pedagogoa.

_Lantegiaren arduraduna.

_Tailerraren arduraduna.

_Administrari laguntzailea.

_Auto-gidaria

_Atalaren arduraduna

_Ataleko nagusia.

3. taldea: Produkzioko eta Zerbitzu Orokorretako langileak.

_Egiaztatzailea.

_Biltegizaina.

_Prebentzioko mantentze-lanetarako langileak.

_Produkzioko langilea.

Artikulu honek biltzen dituen talde, kategoria eta mailak zerrenda hutsa dira eta ez dira lanpostu guztiak zertan beterik egon. Orobat, eginkizunen atxikimendu zehatza egin eta talde, kategoria eta maila berriak sartzen ahal dira.

5. artikulua. Kategorien definizioa eta eginbeharrak.

1. taldea: Goi mailako teknikariak.

Unibertsitate bateko edo maila bereko eskola tekniko bateko titulua daukate. Beren esperientzia edo prestakuntza teknikoa frogatu dute. Kontratuaren xede diren erantzukizuneko eginkizunak egiten dituzte. Zuzendariarekin batera bere arloaren erantzukizun osoa hartzen dute euren gain.

Fabrikazioko burua: Produkzioko langileen zuzeneko ardura du, beren arloko nagusiak eta bestelako agintariak barne. Laneko erantzukizuna, diziplina, langileen segurtasuna eta saltzaile eta bezeroekiko zuzeneko harremanak dagozkio bere arloan eta bere erantzukizuneko mailan. Ekoizpena planifikatzen eta kontrolatzen eta lantegia zuzentzen arduratzen da. Laneko zamak, ekoizpenaren ikerlanak eta etekinak ere kontrolatuko ditu. Zuzendaritzarekin batera, Fundación Bidean Laboral enpresako beste arloak koordinatuko ditu. Kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak eginen ditu.

2. taldea: Erdi mailako teknikariak.

Unibertsitate bateko edo maila bereko eskola tekniko bateko titulua daukate. Beren esperientzia edo prestakuntza teknikoa frogatu dute edo, hori ezean, kontratuaren xede diren erantzukizuneko eginkizunak egiten dituzte Fundación Bidean Laboral enpresan. Zuzendariarekin edo arloko nagusiarekin batera beren arloaren erantzukizun osoa hartzen dute beren gain.

Fisioterapeuta: ebakuntzarik gabeko baliabide fisikoen bidez giharrak eta hezurdura errehabilitatu eta haien alterazioei aurrea hartzeko tratamenduak burutzen dituen profesionala da. Enpresako kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak eginen ditu.

Logopeda-Pedagogoa: enplegurako zentro bereziko langileentzako prestakuntza iraunkorreko terapiak eta terapia errehabilitatzaileak egiten dituen profesionala da, langileek beren arloaren barruan hala eskatuta. Enpresako kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak eginen ditu.

Lantegiaren arduraduna: bere arloko langileen zuzeneko erantzukizuna du. Laneko erantzukizuna, diziplina, langileen segurtasuna eta saltzaile eta bezeroekiko zuzeneko harremanak dagozkio bere arloan eta bere erantzukizuneko mailan. Ekintzetarako plana, fabrikazioarekin elkarlanean aritu, bere arloko etekinak kontrolatu eta hobetzeko ikerlanak eginen ditu. Kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak eginen ditu.

Tailerreko arduraduna: gaia behar bezala ezaguturik, fabrikazioko buruak edo zuzendaritzak agindurik, oinarrizko eginkizun hauek ditu:

_Zuzentzen duen taldea dinamizatzea eta langileen gaitasunen arabera haien lanak banatzea.

_Ezarritako ekoizpena eta bere menpe dituen langileek egiten dituzten arloetarako kalitatearen betebeharrak bermatzea.

_Bere sekzioa eten gabe hobetzen jardutea eta prestakuntzarako ekintzak, ekoizpena hobetzekoak eta antolamendurakoak proposatzea.

_Etekinik hoberenak lortzeko langileei laguntzea eta bere menpe dituen langileen betebehar eta arazoak atzeman eta bideratzea.

_Bere ardura diren makina, instalazio, material, etab. ongi mantentzea.

_Bere lanak egiteko behar diren tresna, lanabes eta bestelako osagaiak kontrolatzea.

_Fabrikazioko buruarekin eta beste arloetako arduradunekin elkarlanean aritzea, bere erantzukizuneko sekzioko etekinen datu eta adierazleak kudeatzeko.

_Kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak egitea.

Administrari laguntzailea: beste batzuek gainbegiraturik, bere arloko langile eta baliabideen tramitazio administratiboa antolatu eta burutzen du, zentroan berean eta hortik kanpo. Harrera kudeatu, txostenak prestatu eta kalitate sisteman ezarritako beste eginkizun eta erantzukizun batzuk eta bere karguagatik eta erantzunkizunagatik dagozkionak egiten ditu.

Auto-gidaria: erabili behar duen ibilgailuari dagokion gidabaimena du. Baimendurik dauzkan ibilgailuak gidatzen eta horien funtzionamendua eta garbiketa mantentzen arduratzen da. Mandatuak agintzen ahalko zaizkio Fundación Bidean Laboral enpresaren edo besteren tokietan. Garraiatu beharreko mandatuak kontrolatu eta kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion beste batzuk eginen ditu.

Sekzioaren arduraduna: gaia behar bezala ezaguturik, fabrikazioko buruak edo zuzendaritzak agindurik, oinarrizko eginkizun hauek ditu:

_Zuzentzen duen taldea, gehienez ere 25 pertsonakoa, dinamizatzea eta langileen gaitasunen arabera haien lanak banatzea.

_ezarritako ekoizpena eta bere menpe dituen langileek egiten dituzten eginkizunetarako kalitatearen betebeharrak bermatzea.

_Bere sekzioa eten gabe hobetzen jardutea eta prestakuntzarako ekintzak, ekoizpena hobetzekoak eta antolamendurakoak proposatzea.

_Etekinik hoberenak lortzeko langileei laguntzea eta bere menpe dituen langileen betebehar eta arazoak atzeman eta bideratzea.

_Bere ardura diren makina, instalazio eta materialak ongi mantentzea.

_Bere lanak egiteko behar diren tresna, lanabes eta bestelako osagaiak kontrolatzea.

_Fabrikazioko buruarekin eta beste arloetako arduradunekin elkarlanean aritzea, bere erantzukizuneko sekzioko etekinen datu eta adierazleak kudeatzeko.

_Kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak egitea.

Sekzioeko arduraduna: gaia behar bezala ezaguturik, arloko arduradunek edo zuzendaritzak agindurik, oinarrizko eginkizun hauek ditu:

_Bere sekzioko arau eta betebeharrak betearaztea.

_Bere lanerako dituen agiri, ekipo eta tresnak kontrolatu eta kudeatzea.

_Bere sekzioa Fundación Bidean Laboral enpresako beste sekzio eta arloekin koordinatzea.

_Jakinarazten zaizkion helburuak lortzeko prozedurak garatzea.

_Enpresaz kanpoko aholkulari eta profesionalei kasu egitea, bere sekzioeko eginkizunetako argibideak eta lankidetza eskatzen dizkiotenean.

_Bere sekzioa etengabe hobetzen jardutea eta prestakuntzarako ekintzak eta antolamendurakoak proposatzea.

_Arloetako arduradunekin elkarlanean aritzea, bere erantzukizuneko atalaren etekinen datu eta adierazleak kudeatzeko.

_Kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak egitea.

Oharra: Fundación Bidean Laboral enpresaren gaur egungo tamaina dela eta, posible da pertsona bakar batek bere gain hartzea tailerreko arduradunen, sekzioko arduradunen eta sekzioko nagusien kategoriei dagozkien eginkizunak. Pertsona horri eskuarki aurreko definizioetara hobekien egokitzen denari loturiko lanbide kategoria esleituko zaio.

3. taldea: Produkzioko eta Zerbitzu Orokorretako langileak.

Egiaztatzailea: kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak egiten dituen pertsona da.

Biltegizaina: materiala hartzeaz eta biltzeaz arduratzen da. Barruko eta kanpoko igorpenak prestatu, enpresaren eta besteren ibilgailuetan zama-lanak egin eta unean-unean hartzen dituen jarraibideen arabera salgaiak plantan banatzen ditu. Kalitate sisteman ezarritako eginkizun eta erantzukizunak eta bere karguagatik eta bere erantzukizunagatik dagozkion besteak eginen ditu.

Prebentzioko mantentze-lanetako langileak: ingeniaritzaren eta mantentze-lanen arduradunaren menpe, makina eta instalazio nagusien funtzionamendu eta garbiketa egokia bermatzeko behar diren lanak egiten dituzte. Prebentzioko plana garatzen dute. Zuzenketa txikiak egiten dituzte. Ekoizpen eta segurtasun ekipoak abian jartzen dituzte. Kalitate sisteman ezarritako eginkizun eta erantzukizunak eta beren karguagatik eta beren erantzukizunagatik dagozkien besteak egiten dituzte.

Produkzioko langilea: produkzio arloetan eta zerbitzu orokorretan, lan metodo zehatz baten arabera, zehazki gainbegiraturik, lanak egiten ditu, ahalegin fisikoa edo arreta behar dutenak. Aldian-aldian oinarrizko lanbide ezagutza ere beharko du, baita egokitzeko epe bat ere.

Artikulu honetan lanbide sailkapen bakoitzarentzat adierazi diren eginkizun eta lanak adibide moduan jarri dira. Hortaz, langile guztiak gainean dituzten agintariek agintzen dizkieten bestelako lan eta eginkizunak egitera behartuta daude, hemen adierazi ez badira ere, betiere beren eskumen eta kategoriaren barnekoak baldin badira.

6. artikulua. Lanbide sustapena.

Fundación Bidean Laboral enpresan hutsik dauden lanpostuak, hark erabikirik, bete edo amortizatzen ahalko dira, hala baderitzo, lanaren, garapen teknologikoaren eta komenigarri egiten duten bestelako inguruabarren arabera.

Hiru modu izanen dira lanpostu hutsak betetzeko: izendapen librea, merezimendu bidezko barne igoera eta kontratazio berriak.

Arlo teknikoetako eta administrazioko lanpostuak eta, eskuarki, agintaritza edo konfiantza eta erantzukizun berezia behar duten lanpostuak, Fundación Bidean Laboral enpresaren egituraren edozein mailatan, izendapen libreen edo kontratazio berrien bidez beteko dira.

Beste lanpostuak merezimendu eta gaitasunaren araberako irizpide eta proba objektiboei jarraituz beteko dira eta halaxe izanen dira lanbide-mailen arteko igoerak. Irizpide eta proba horiek zuzendaritzak ezarriko ditu, langileen ordezkariei galdeturik.

Fundación Bidean Laboral enpresak urtero aztertuko du langile bakoitzaren egoera bere lanbide mailarekin alderatuta, egokitzearren bidezkoa bada.

III. TITULUA

Lanean hastea eta lana uztea, probaldia

7. artikulua. Kontratuak.

Kontratu guztiak idatziz formalizatuko dira. Kontratuen iraupenari eta modalitateei dagokienez, indarra duen legerian xedatutakoari lotuko zaio.

8. artikulua. A.L.E.

Fundación Bidean Laboral enpresak, oro har, Aldi baterako Lan Enpresez ez baliatzeko hitza ematen du. Beraz, Aldi baterako Lan Enpresekin salbuespenezko kasuetan baizik ez dira kontratuak eginen.

9. artikulua. Probaldia.

Langileak enpresan lanean hastean proba gisan arituko direla ulertuko da, idatziz horrela agertzen bada. Probaldiaren iraupena aldakorra izanen da, bete beharreko lanpostuen eta gainerako gorabeheren arabera. Hala ere, behin ere ez da izanen sei hilabete baino luzeagoa tituludunentzat ez eta bi hilabete baino luzeagoa gainerako langileentzat, halaxe xedatzen baita Langileen Estatutuaren 14. artikuluan.

10. artikulua. Enpresa nahita uztea.

Bere borondatez Fundación Bidean Laboral enpresa utzi nahi duen langileak gutxienez 15 egun lehenago horren berri eman beharko du.

Aurreabisu horren epea ez betetzeak azken likidazioan eta finikitoan kenketa bat ekarriko du, eta haren balioa aurreabisua egin behar zuenetik egin duenera bitarteko egunei dagokien soldata adinakoa izanen da.

Zentroak garaiz eta behar bezala jasotzen badu, beharturik dago lan-harremanari bukaera ematera, eta langileari dagokiokeen bukaerako likidazioa eta finikitoa eman beharko dizkio.

Eginbehar hori bete ezik, langileak eskubidea izanen du kalte-ordain bat hartzeko. Honelaxe kalkulatuko da: atzeratu den egun bakoitzeko bi eguneko lansaria pagatuko zaio, gehienez ere 15 egunekoa.

IV. TITULUA

Lan osasuna

11. artikulua. Laneko segurtasuna eta osasuna.

Une bakoitzean indarra duen legeriak agintzen duenari jarraituko zaio, eta, bereziki, Laneko Arriskuen Prebentzioari buruzko Legeak eta hura garatzen duten arauek ezarritakoari.

12. artikulua. Laneko arropa eta babes-jantziak.

Egiten den lanaren arabera behar diren jantzi eta ekipoak banatuko dira. Horiek guztiak zentzuz erabili eta hondatzen diren heinean berritu beharko dira. Horri dagokionez, espresuki ezartzen da Fundación Bidean Laboral enpresak janzki eta ekipo erabiliak itzultzea eska dezakeela berriak eman baino lehen.

Nahitaezkoa da laneko jantziak eta bestelako babes elementuak erabiltzea, bai eta behar bezala tratatzea.

V. TITULUA

Lanaldia, oporrak, lizentziak eta eszedentziak

13. artikulua. Lanaldia.

Urteko lanaldia 1.744 ordukoa izanen da, hau da, 218 laneguneko egutegia.

14. artikulua. Atsedenaldiak.

Lanaldi jarraitua eta lanaldi zatitua duten langileendako 15 minutuko atsedenaldia ezartzen da. Hori benetako lanalditzat joko da.

Halaber, Fundación Bidean Laboral enpresak sekzioen eta langile taldeen berariazko ordutegietako atsedenaldiak zehaztuko ditu. Atsedenaldi horiek, hala komeni denean, aldatzen ahalko dira antolaketaren edo ekoizpenaren arabera.

Lanaldien arteko eta asteko atsedenaldiei dagokienez, Fundación Bidean Laboral enpresak prestaturiko ordutegi eta egutegietan xedatu bezala eginen da. Horiek, betiere, legeak unean-unean aurreikusiriko gutxieneko iraupenak errespetatu beharko dituzte.

15. artikulua. Lan egutegia.

Lan egutegia eta lanorduak finkatzea enpresako zuzendaritzaren eskumena izanen da, langileen ordezkariei aurrez jakinarazita.

Urtero, urteko lehen hiruhilekoan, bezeroen beharren arabera, Fundación Bidean Laboral enpresak lan egutegi bat osatuko du, non bere egiturako sekzio eta bulegoetako txanda, ordutegi eta lanegunak zehaztuko baitira.

Zentroko sekzio eta bulegoetako lan egutegia zehaztu ondoren, Fundación Bidean Laboral enpresak aldaketak egiten ahalko ditu. Horien arabera, zentro osoak edo sekzio batzuek hasiera batean egutegian laneguntzat jotzen ez ziren egunetan lan egitea erabaki daiteke.

Laneguntzat jotzen dira lan egutegian jaiegun (oporrak barne) ez diren egun guztiak.

Oporraldia behin hasita, Fundación Bidean Laboral enpresak ezin izanen du aldaketarik egin ordurako oporretan egonen diren pertsonen oporraldian.

16. artikulua. Oporrak.

Hitzarmen honen eraginpeko langile guztiek urtean 30 egun naturaleko oporrak izanen dituzte, pagatuak.

Urteko opor horiek, urte bakoitzean zehar hartu beharko direnak, ezin izanen dira eskudirutan ordaindu, salbu eta lan harremana hautsiz gero edo eszedentzia hartuz gero.

Urte naturalean zehar kontratatutako langileek lan egiten duten denborari proportzioan dagozkion opor egunak izanen dituzte.

Oporrak, hauek hartzean langileak kobratzen duen egiazko soldata indardunaren arabera pagatuko dira.

17. artikulua. Aldi baterako ezintasun egoera oporretan.

Oporraldiaren hasieran lanerako aldi baterako ezintasun egoeran dauden langileek ez dute beste oporraldi bat hartzeko eskubiderik izanen.

Larritzat edo oso larritzat jotzen den lan istripu baten ondorioz, langile batek opor guztietan edo batzuetan aldi baterako ezintasuna badu, lanera itzuli ondoren eskubidea izanen du oporraldian bajan egon den bezainbeste opor egun izateko.

Halaber, langile batek, eritasun arruntaren edo lanetik kanpoko istripuaren ondorioz, ospitaleratuz gero, lanera itzuli ondoren, ospitaleratze aldia frogaturik eta kasuan kasuko baja-agiria tramitaturik, eskubidea izanen du ospitalean emaniko opor egun berak izateko.

Bi kasuetan, oporrak hartzeko egun berriak ukitua eta Fundación Bidean Laboral enpresa ados daudela zehaztuko dira.

Halaber, bi kasuetan, urteko abenduaren 31n langileak, eri edo ospitalean badirau, ez du eskubiderik izanen oporrik berriro hartzeko.

Artikulu honetan aipatzen diren kasu hauek mugatzeko, irizpide hauek hartuko dira kontuan:

a) Lan istripuaren ondorioz aldi baterako ezintasuna larria edo oso larria den erabakitzeko, baja-agirian berean lesioaren kalifikazioa hartuko da kontuan. Baja-agirian gorabehera hori zehaztu ezik, kasu bakoitzean azterketa bat eginen da, banan banakakoa. Betiere kontuan hartuko da salbuespenezko kasu bat den, lesioaren larritasunagatik, oporrak hartzea eragozteko modukoa.

b) Eritasun arruntaren edo lanez kanpoko istripu baten ondorioz, oporretan ospitaleratuz gero, irizpide bakarra gaua ospitalean eman beharra da. Alegia, arau honetatik kanpo gelditzen dira ebakuntza anbulatorioak, kontsultak, tratamenduak eta abar egiteko ospitaleetan sartu beharra, ospitale horietan gaua eman beharrik ez badaukate.

18. artikulua. Baimen ordainduak.

18.1. Langileek, ahalik eta denbora gehienarekin aldez aurretik ohartemanik eta ondoren justifikatu beharrarekin, baimena dute lanera ez agertzeko, benetako soldata indarduna eskuratzeko eskubidea galdu gabe, honako arrazoi hauetakoren bat tartean denean, eta kasu bakoitzean adierazten den denboraz:

a) Ezkontza: 15 egun naturaleko lizentzia ordaindua, zeina luza baitaiteke, gehienez ere, ordaindu gabeko beste 7 egun naturaleko lizentziarekin.

b) Haur baten jaiotza edo adopzioa: 3 egun (horietarik 2 gutxienez, lanegunak) eta 2 egun gehiago izan daitezke, horiek ere pagatuak, zesarea bidezko erditze kasuan.

c) Ondokoen heriotza, eritasun larria, ospitaleratzea edo prozesu larri baten ondoriozko ebakuntza:

Ezkontidea eta seme-alabak: 3 egun natural.

Gurasoak: 3 egun natural.

Senideak: 2 egun natural heriotza kasuan eta egun bat beste kasuetan.

Beste ahaideak, odol bereko edo ezkontza bidezko bigarren graduko ahaidetasuna arte (koinatu-koinatak izan ezik): egun bat.

c) bis Prozesu ez larri batek edo kirurgia anbulatorio batek edo/eta pertsona baten laguntza behar duten diagnosiko probek ekarritako ospitaleratze edo ebakuntzarengatik, bigarren graduko ahaidetasuna arte: egun natural 1.

c) eta c) bis letretako kasuetan baimenak hartzeari begira, ebakuntza eta horretarako prestatzeko aurretik behar litezkeen ospitaleratzeak kasu bakartzat hartuko dira.

Halaber, espresuki ezarri da baimena ezin dela ospitaleratze aldia baino luzeagoa izan.

Ospitaleratzearen kasuan, egoerak irauten duen denbora guztian izanen da baimena hartzeko aukera.

Langileak, gozamen gerokotuaren sistema berri honen bidez, ezin izanen du inola ere hartu egun gehiago baimena sortzen duen gertakaritik aurrera hartu izan balitu baino.

c) eta c) bis sekzioetako kasuetan arrazoi horiek direla-eta langileak Foru Komunitatetik kanpora joan behar badu, lizentzia hori egun natural bat luzatuko da alboko probintzien kasuan eta 2 egun natural gainerakoetan.

d) Ohiko bizilekua aldatzeagatik: egun bat.

e) Gurasoen, seme-alaben edo anai-arreben ezkontza: egun natural bat.

f) Behar den denbora hartzen ahal da Gizarte Segurantzan familiaren medikuari eta sendagile espezialistei egin beharreko kontsulta medikoen kasuetan eta errehabilitaziorako tratamendu mediko-funtzionaletan eta lanbidearen arloko orientazio, prestakuntza eta berregokitzapen ekitaldietan parte hartzeko, lanaldiz kanpo joaterik ez dagoenean eta seihilabetekoan hamar egun baino gehiago ez direnean.

g) Publikoa edo pertsonala den eginbehar saihestezina betetzeko: behar-beharrezkoa den denbora.

h) Titulu akademiko bat lortzeko edo lanpostu bat eskuratzeko oposizio bat lortzeko asmoz HZMak edota Nafarroako Gobernuak antolatutako ikastaroetan, ofizial edo onartuetan, izena eman duten langileek, azterketetara eta gaitasun eta ebaluazio probetara joan ahal izateko behar-beharrezkoa den denbora.

i) Eginkizun sindikaletan edo langileen ordezkaritza lanetan aritzeko, legeetan ezarritakoari jarraikiz.

j) Erditu aurreko azterketa medikoak egiteko eta erditzeko prestatzeko tekniketan trebatzeko, behar-beharrezkoa den denbora, lanorduetan egin behar badira.

k) Norberaren aferetarako: bi lan egun, gutxienez bi egun lehenago jakinarazi beharko direnak eta inolaz ere ez direnak izango zubietan edo oporraldiko egunen luzapena.

Egun horiek ez dira opor eguntzat hartzen eta artikulu honetako aurreko idatz-zatietan aipatzen ez diren beharretarako erabiliko dira.

Baimen ordaindu hori hartzeko, langileak, gutxienez bi egun lehenago jakinarazi beharko du noiz hartu nahi dituen egun horiek, denak edo haietakoren bat. Arduradunak onartu beharko ditu egun horiek.

Onartu ezik, baimen hori ezin hartuko da egun horietan. Ukoa, baina, zergatiko objektibo eta frogagarrietan oinarritzen ahalko da bakarrik, hala nola, egun berean beste eskaera batzuk aurkezteagatik, beste langile batzuk gaixo edo oporretan egoteagatik edo baimena hartuak izateagatik eta, oro har, antolamenduagatik edo ekoizpenagatik.

a) eta e) bitarteko epigrafeetako lizentziak, biak barne, egun naturaletan kontatuko dira eta, c) epigrafeko ospitalizazioetarako egindako oharraren kasuan salbu, gertaera eragilea sortu den unetik beretik hartuko dira.

Ezkontideaz egiten diren aipamen guztiak langilearekin bikotekide gisa bizi diren eta beren udalaren ziurtagiriaren bidez egoera hori egiaztatzen duten pertsonei ere aplikatuko zaizkie.

Lizentzia eskaera guztiak Zentroko arduradunaren edo nagusiaren bidez bideratuko dira.

Baimen guztiak ahalik eta aurrerapen handienarekin eskatuko dira. Kasu guztietan baimena sortzen duen arrazoiaren frogak eman behar dira.

Baimenak hartzeari begira ez da desberdintasunik egonen odol bereko nahiz ezkontza bidezko ahaideekin.

BAIMEN ORDAINDUEN TAULA

Ezkontza

15 egun natural

Langilea

Jaiotzea/adopzioa

3 egun natural, horietako 2 lan egunak

Langilea

Ezkontidea

1.a

Heriotza

Eritasun larria

Ospitaleratzea

Ebakuntza

3 egun natural

Ezkontidea eta seme-alabak

1.a

3 egun natural

Gurasoak

1.a

2 egun natural

Senideak

2.a

egun natural bat.

Aitona-amonak, koinatu/koinatak eta bilobak

2.a

Kirurgia anbulatorioa edo laguntza behar duten probak

egun natural bat

Ezkontideak, seme-alabak, gurasoak, guraso politikoa, senideak, senide politikoak, aitona-amonak eta bilobak

2.a

19. artikulua. Ordaindu gabeko baimenak.

Langile guztiek eskubidea izanen dute urtero gehienez ere 15 eguneko baimena eskatzeko. 20 egun lehenago gutxienez eskatuz gero eta zentroan egoera berean bi langile baino gehiago egon ezik, eman egin beharko zaizkie.

Behar bezala justifikaturiko salbuespenezko kasuetan, Fundación Bidean Laboral enpresak, langilearekin edo haren legezko tutorearekin ados dagoela, baimen ordaindugabe luzeagoak ematen ahalko dizkio.

20. artikulua. Eszedentziak.

20.1.A. Borondatezko eszedentzia norberaren aferetarako.

Urtebeteko gutxieneko antzinatasuna duten langileek eskubidea izanen dute borondatezko eszedentzia egoeran egoteko aukera, gutxienez sei hilabetetik urtebetera bitarte, eta lehentasunezko eskubidea izanen dute halaber zentroan une horretan egon daitezkeen pareko nahiz antzeko lanpostu hutsak betetzeko.

Lanpostua gordetzeko denbora bukaturik, langileak, Fundación Bidean Laboral enpresara itzuli ez bada, eskatzen ahalko du eszedentzia luzatu dakiola, lanpostua gorde gabe, baina zentroan une horretan kategoria berean edo antzekoan dauden lanpostu hutsak betetzeko lehentasunezko eskubideari eutsiz.

Eskubide horretaz berriro balia daiteke langile bera, aurreko eszedentzia bukatu eta bi urte igaro eta gero.

20.1.B. Borondatezko eszedentzia, ikasketengatik, prestakuntzagatik edo justifikatutako familia-arrazoiengatik.

Zentroan urtebeteko antzinatasuna, bederen, daukan langile orok aukera izanen du urtebetetik bi urtera bitarteko borondatezko eszedentzia hartzeko, lanpostua gorderik.

Lanpostua gordetzeko denbora bukaturik, langileak, Fundación Bidean Laboral enpresara itzuli ez bada, eskatzen ahalko du eszedentzia luzatu dakiola, lanpostua gorde gabe, baina zentroan une horretan kategoria berean edo antzekoan dauden lanpostu hutsak betetzeko lehentasunezko eskubideari eutsiz.

Eskubide horretaz berriro balia daiteke langile bera, aurreko eszedentzia bukatu eta bi urte igaro eta gero.

20.2. Borondatezko eszedentzia lan munduan sartzeko.

Zentroko langile minusbaliatuei lan munduan sartzeko erraztasunak emateko, ohiko enpresa batean (enplegurako zentro berezia ez den batean) zerbitzu ordainduetan hasiko dela frogatzen duen langile minusbaliatu orok eskubidea izanen du, hori dela eta, borondatezko eszedentzia hartzeko, gehienez ere hiru urtez, lanpostua gorderik. Lanera itzultzea eskatu ondoren, hilabeteko epean itzuli beharko du.

20.3. Seme-alabak zaintzeko eszedentzia eta ahaideak zaintzeko eszedentzia.

a) Langile guztiek, enpresan duten antzinatasuna edozein dela ere, eskubidea dute eszedentzia hartzeko gehienez ere hiru urtez, odol bereko edo ezkontza bidezko lehen graduko ahaidea zaintzeko, etengabeko zainketa beharrak baditu edo baliaezintasun handian dagoena bada, Gizarte Segurantzaren iritziz.

b) Amatasun kasuan, langileak (emakumezko zein gizonezko) eskubidea izanen du lau urteko eszedentzia hartzeko, seme edo alaba bakoitza zaintzeko eta hezteko, atsedenaldia bukatzen denetik kontatzen hasita.

Atal honetan adierazitako eszedentzia aldiak bukaturik, eszedentzian dauden langileak, lanera itzultzeko hilabete lehenago eskatu ondoren, besterik gabe itzuliko dira eszedentzia eskatu zutenean zeukaten lanpostura.

Eszedentzia emateko xedearekin zerikusirik ez duen beste helburu baterako erabiliz gero, lanpostura berriro itzultzeko eskubidea galduko da.

c) Ezkontidea edo izatezko bikotekidea hil eta 14 urtetik beherako semea edo alaba uzten badu, langileak (emakumezko zein gizonezko) eskubidea izanen du ordaindu gabeko eszedentzia berezia hartzeko. Eszedentzia hori, justifikatua izan beharko baitu, gehienez ere hirurogei egun naturalekoa izanen da, heriotzagatiko lizentziatik kontatzen hasita. Onuradunak idatziz eskatu beharko dio zentroari eta bertan agerraraziko da lanera itzuliko den eguna, zeina automatikoa izanen baita.

20.4. Gainerako kasuak.

Aurreko ataletan ezarri ez diren eszedentzia kasuetarako, Langileen Estatutuko 46. artikuluan xedatutakoari jarraituko zaio, bai eta aplikatzekoak diren indarrezko beste edozein legezko arauri ere.

21. artikulua. Lanaldi-laburtzeak, haurrei esne emateak, amatasuna eta haurdunaldiko arriskua.

Haurrari esnea emateko baimenean, Langileen Estatutuaren 37.4 artikuluan ezarritakoan, emakumezko langileak aukera izanen du lizentzia artikulu horretan adierazi bezala hartzeko edo amatasun baimena beste hamabi lanegun gehiago luzatzeko.

Langileen Estatutuaren 37.5 artikuluak aipatzen duen legepeko zaintza dela-eta, langileren batek sei urtetik beherako haurra zaindu behar baldin badu, lanaldi murrizketa haurrak 7 urte bete bitarte luzatuko da.

Ahaideak edo seme-alabak zaintzeko lanaldi murrizketa horietan, langileak eskubidea du murrizketa horren ordutegia berak finkatzeko eta txandaka lan eginez gero, ordutegia txanda bakar batean ezartzeko.

Kaleratze kasuan, bidegabekoa edo/eta objektiboa, kalte-ordainak kalkulatzeko kontuan hartuko den soldata lanaldi osoko soldata izanen da.

Gainerako gai guztietan, Langileen Estatutuan xedatutakoari jarraituko zaio, zehazki Familiako bizitza eta lana batera eramateari buruzko azaroaren 5eko 39/1999 Legeak emandako idazketak dioenari, bai eta aplikatzekoak diren legezko arau indardunetan ezarritakoari ere.

VI. TITULUA

Baldintza ekonomikoak

22. artikulua. Soldaten egitura.

Soldaten egiturak kategoria bakoitzeko oinarrizko soldata, denbora edo lan unitateko sari finkoa den aldetik, eta, hala bada, kasuan-kasuan bidezko diren soldata osagarriak, hurrengo artikuluetan zehazten direnak, bilduko ditu.

Kategoria bakoitzeko oinarrizko soldataren bidez egiazko lanaldia eta hitzarmen honetan edo legeetan ezarritako atsedenaldiak pagatzen dira. 2007rako oinarrizko soldataren hileroko balioak hitzarmen honetako lansarien tauletako eranskinean ageri dira.

Uztailaren 17ko 1368/85 Errege Dekretuaren arabera kontratatutako langileen oinarrizko soldata gobernuak urtean-urtean finkatzen duen lanbideen arteko gutxieneko soldatarekin bat etorriko da. Errege dekretu hori 427/99 Errege Dekretuaren bidez aldatu zen. Horren bitartez enplegurako zentro berezietan diharduten minusbaliatuen lan harreman berezia arautzen da.

Hitzarmen honetan ezarrita dauden lansari guztiak gordinak dira.

23. artikulua. Jarduera plusa.

Arau honetako lansarien tauletako eranskinean zehazten diren kategorietarako, 2007rako kasuan-kasuan zehazten diren hileroko zenbatekoekin, lansari osagarri bat ezartzen da lanaren kalitate eta kopuruagatik. Osagarri horri produktibitate plusa deritzo eta urteko hamabi hilabeteetan eta aparteko bi pagatan ordainduko da. Langile bakoitzaren maila zehazteko, faktore hauek ebaluatuko dira:

_Produktibitatea.

_Balioaniztasuna.

_Kalitatea eta akabera maila lanean.

_Prestasuna.

_Absentismoa

Betiere, produktibitatea giltzarria izanen da maila bati edo besteri atxikitzeko.

23. bis artikulua. Irteera osagarria kanpoko zerbitzuengatik.

3. taldeko langileek (Produkzioko zerbitzu orokorretako langileak), jarduera kanpoan betetzen dutena (buzoietako propaganda, garbiketa, lorazaintza etab.), euro bateko osagarria jasotzeko eskubidea izanen dute lan horiek betetzen dituzten eguneko.

_Irteera osagarri hori ondotik ageri diren absentismo indizeen menpean egonen da.

_Hilabete bakoitzeko lan egunetan banakako absentismoa %5etik beherakoa izateak eguneko irteera osagarria osorik jasotzea ekarriko luke.

_Hileko absentismoa %5etik %14ra bitartekoa izateak eguneko irteera osagarria osorik jasotzea ekarriko luke, %50 gutxituta.

_Hileko absentismoa %15etik %25era bitartekoa izateak eguneko irteera osagarria osorik jasotzea ekarriko luke, %75 gutxituta.

_Hileko absentismoa %25etik gorakoa izanez gero, hil horretan irteera osagarria jasotzeko eskubidea galtzea ekarriko luke.

Edozein kasutan, osagarri honetarako, absentismo indizea kalkulatzeko ez da kontuan hartuko langileak arrazoi hauengatik ez etortzea lanera:

_Laneko istripua edo eritasuna.

_Amatasuna edo arriskua haurdunaldian.

_Erabilera libreko egunak.

_Oporrak.

_Baimen ordainduak.

_Ordu sindikalak.

Osagarri hau absentismo indizearen menpean dago, bai eta horrekin batera epeei, ekoizpenari, kalitateari eta talde lana egoki betetzeari dagokionez enpresak edozein lan arlotan ezartzen dituen guxtxienekoak betetzearen menpe ere.

Osagarri hori hurrengo hilabeteko nominan jasoko da.

24. artikulua. Kilometrajea.

Langile batek bere autoa zentroaren edo Fundación Bidean Laboral enpresaren beharren bat betetzeko edo eginkizunen bat egiteko erabili behar baldin badu, 0,27 euro kobratuko ditu eginiko kilometro bakoitzeko.

Zenbateko hori Nafarroako Foru Administrazioko langileek kontzeptu beragatik hartzen dutenarekin berdinduko da urtero.

25. artikulua. Aparteko orduak.

Fundación Bidean Laboral enpresak erabaki du aparteko orduak ezinbesteko kasuetan baino ez direla eginen. Eginez gero, gehienbat atsedenaldiekin ordainduko dira, honelaxe: lanegunetan, astelehenetik ostiralera, eginiko aparteko ordu bakoitza ordu bateko atsedenaldia eta larunbatetan, igandeetan, jaiegunetan edo gauaz (22:00etatik 6:00ak arte) eginiko aparteko ordu bakoitzeko, ordu eta erdiko atsedenaldia.

Langileak edo haren legezko tutoreak dirutan kobratzea aukeratzen badu, ordu arruntaren %200 kobratuko du egindako aparteko ordu bakoitzeko.

Beste langileentzako, aparteko orduaren prezioa honelaxe kalkulatuko da: urteko lansaria zati urtean eginiko lanorduak. Ordu arruntetatik kanpo eginez gero, dagokion koefizientea gaineratuko zaio.

26. artikulua. Aparteko eskersariak.

Langile guztientzako bi aparteko eskersari izanen dira, bata udan bestea eguberrietan. Haietariko bakoitzaren zenbatekoa, osorik kobratzeko eskubiderik izanez gero, hilabeteko oinarrizko soldata izanen da, ekoizpen-osagarria edo bestelako pizgarria gehiturik, horrelakorik baldin bada.

Aparteko paga horiek urtean urteko uztailaren 5ean eta abenduaren 22an ordainduko dira, egun horietan indarra duten zenbatekoen arabera.

Udako eta eguberrietako eskersarien sorrarazpena seihileko naturalekoa izanen da bi kasuetan, eta ordainketa, kontaketa edo likidaziorako hainbanaketa, hasiera edo bukaera ezartzeko, urtarrilaren 1etik ekainaren 30era bitarteko tartea hartuko da lehen kasuan eta uztailaren 1etik abenduaren 31 bitartekoa bigarrenean.

Ohartarazi beharra dago, halaber, soldaten taulen eranskinean ageri diren zenbateko guztiak lanaldi osoari dagozkiola.

VII. TITULUA

Hobekuntza sozialak

27. artikulua. Lanerako aldi baterako ezintasuna eta haurdunaldiko arrisku egoera.

Gorabera bakoitzerako legez xedaturikoaren arabera langile bakoitzari dagokiozko prestazioak osatuko ditu Fundación Bidean Laboral enpresak, zehaztapen hauei jarraikiz:

_Lan istripuen ondorioz ("in itinere" istripuak barne) ondoriozko aldi baterako ezintasunetarako eta lanbide eritasunetarako, %100eko osagarria izanen da soldata kontzeptu guztietan.

Ospitaleratu beharreko aldi baterako ezintasunean, enpresak soldata osatzeko falta dena jarriko du, ospitaleratzeak dirauen bitartean.

_Eritasun arruntaren edo lanez kanpoko istripuaren ondoriozko urteko lehenbiziko bajan oinarrizko soldataren eta produktibitate plusaren %50eko osagarria emanen da lehenbiziko hiru egunetan Hurrengo bajetan, langileak legez ezarririk dagoena kobratuko du.

_Halaber, egoera horrek diraueino, %100era arteko osagarria emanen da, legez xedaturikoarekin bat haurdunaldian arriskuak dituzten langileei dagozkien prestazioetarako. Hobekuntza lehen egunetik aurrera ordainduko da eta, aldi baterako ezintasunak diraueino, ordainketa delegatuaren bidez.

27. bis artikulua. Erretiro aurreratua.

64 urte betetzen dituztenean, langileek erretiro aurreratua eskatzen ahal dute indarra duen legeriaren babesean (1194/85 Errege Dekretua, uztailaren 17koa) (1985 E., 1791 eta 1975-85, 12.753 idatz-zatia).

60 urte beteak dituzten langileek, erretiro partziala lortzeko indarra duen araudiak eskatzen dituen baldintzak betetzen badituzte, eskubidea dute erretiroa eskatzeko eta egoera horretan jartzeko, eta enpresak ez du aukera hori ukatzen ahal. Erretiro partziala hartu duen langileak osatzen ez duen lanaldia betetzeko eta erretiro osoa hartzeko falta zaion denborarako errelebo kontratua sinatu baldin bada, kontratu hori bukatzean edo erretiro erabatekoa gertatzen den urtea amaitzean, langile ordezlea enpresako langile finko bihurtuko da.

Aurreko lerroaldean aipatutako lanaldi partzialeko kontratuen kasuetan, enpresaburuek eta langileek ados jarririk, urtean zehar egin beharreko lanordu guztiak urte sasoi jakin batzuetan egitea itundu dezakete. Horrelakoetan, urteko ordainsari guztiak, edo urtetik beherako aldiari dagozkionak, itundutako urte sasoi horietan kobratuko lirateke.

VIII. TITULUA

Hutsegiteen eta zehapenen diziplina araubidea

28. artikulua. Zehapenak jartzeko gaitasuna.

Zentroko zuzendaritzak zehapenak jartzen ahal dizkie langileei, lanean hutsegiteak egiteagatik, ondoko artikuluetan ezarritako hutsegiteen eta zehapenen mailaketari jarraikiz.

29. artikulua. Hutsegiteen mailaketa.

Langileek lanean edo lanaren ondorioz egiten dituzten diziplina hutsegiteak. Honelakoak izan daitezke: arinak, larriak eta oso larriak.

A) Hutsegite arinak:

A.1) Lankideenganako errespetu edo begiramendu falta.

A.2) Hilean behin lanera ez joatea, bidezko arrazoirik gabe. Langilea lanaldia hasi eta ordubete pasatuta iristen bada lanera, lanera ez joatea bezala joko da.

Honek ez du esan nahi egun horretako lansari osoa galduko duenik, lanetik kanpo emaniko denborari dagokiona baizik.

A.3) Lanera berandu iristea, bidezko arrazoirik izan gabe, Fundación Bidean Laboral (Enplegurako Zentro Berezia) enpresak ezarritako ordutegiaren arabera, gehienez ere hiru egunetan hilean.

Langilea lanaldia hasi eta ordu bat pasatu baino lehen berandu ailegatzea hartuko da puntualitate faltatzat.

A.4) Gorputz-higienerik eza.

A.5) Aldi baterako ezintasun kasuan, baja-agiriak edo baja berresteko agiriak horretarako ezarritako epean ez jakinaraztea, ez eta helbide aldaketak eta, oro har, egoera zibilari eta familiarrari buruz zergen eta Gizarte Segurantzaren ondorioetarako garrantzitsuak izan daitezkeen datuak ere.

A.6) Zuhurtziarik gabeko axolagabekeria materiala eta produktuak tratatu eta zaintzeko orduan.

A.7) Laneko jantziak edo babeserako bestelako bitartekoak ez erabiltzea edo gaizki erabiltzea.

B) Hutsegite larriak:

B.1) Hilabete berean lau aldiz berandu iristea lanera, bidezko arrazoirik izan gabe.

B.2) Hilabetean bi egunetan lanera huts egitea, bidezko arrazoirik izan gabe.

B.3) Lantokitik ateratzea, bidezko arrazoirik izan gabe.

B.4) Noizean behin mozkortzea edo bestelako drogak hartzea.

B.4 bis) Zentroan alkolohola, tabakoa edo beste gai toxiko batzuk kontsumitzea.

B.5) Aldi baterako ezintasun kasuan, baja-agiriak edo baja berresteko agiriak horretarako ezarritako epean ez jakinaraztea, ez eta helbide aldaketak eta, oro har, egoera zibilari eta familiarrari buruz zergen eta Gizarte Segurantzaren ondorioetarako garrantzitsuak izan daitezkeen datuak ere, langileak lehenago ere arrazoi horrengatik zehapena jaso duenean.

B.6) Gorputz-higienerik eza, behin eta berriro, langilea lehen ere horrexegatik zehatua izan denean.

B.7) Beste langile baten laneratzea simulatzea, haren ordez fitxatuz.

B.8) Diziplinarik edo obedientziarik eza lanean.

B.9) Lankideen arteko liskarrak, iskanbilak edo eztabaida larriak.

B.10) Hiru hutsegite arin egitea, desberdinak izanagatik, hiruhileko berean, tartean hutsegite haien idatzizko zehapena izan denean.

C) Hutsegite oso larriak:

C.1) Lantokian diziplinarik edo obedientziarik eza, behin eta berriro, langilea lehen ere horrexegatik zehatua izan denean.

C.2) Lanera behin eta berriz berandu iristea, bidezko arrazoirik izan gabe, hamar aldiz baino gehiago hilean edo hogei aldiz baino gehiago hiru hilabetean.

C.3) Lanera hiru egun jarraian huts egitea edo bost egun tartekatutan hilabete batean, bidezko arrazoirik eman gabe.

C.4) Bajan dagoen bitartean langileak norbere zein besteren kontura lan egitea, bai eta baja lortu edo luzatze aldera egindako edozer ere.

C.5) Lantokiko buruak edo lankideak hitzez nahiz idatziz larriki iraintzea.

C.6) Lankideei eraso egitea.

C.7) Sexu jazarpena.

C.8) Lanean mozkortu edo drogak hartzea, langilea lehen ere horrexegatik zehatua izan denean.

C.9) Agintekeria.

C.10) Irainak maiz egitea.

C.11) Leialtasunik eza eta, eskuarki, kontratuko fede ona urratzen duen beste edozein portaera.

C.12) Fundación Bidean Laboral (Enplegurako Zentro Berezia) enpresaren edo beste lankideen ondasunak lapurtzea, ebastea edo irurzur egitea.

C.13) Sei hilabetean hutsegite larri bat baino gehiago egitea, nahiz eta mota desberdinetakoak izan, baldin eta langileari, haien ondorioz, zehapenik jarri bazaio.

30. artikulua. Zehapenak.

Hutsegiteen kalifikazioaren arabera ezartzen ahal diren zehapenak hauek dira:

A) Hutsegite arinak izanez gero:

_Hitzezko kargu-hartzea.

_Kargu-hartze idatzia.

_Gehienez bi eguneko enplegu-soldaten etenaldia.

Lanera arrazoirik izan gabe berandu iristeagatik egiten diren hutsegiteak gehiago zehaztuz, zehapen hauek ezarriko dira:

_Lehenbiziz eta bigarrengoz berandu iristea: hitzezko kargu-hartzea.

_Hilabete berean hirugarrenez berandu iristea: idatzizko kargu-hartzea.

Berandu iritsi aurreko hilabetean bitan edo gehiagotan berandu iritsiz gero, zehapen hauek ezarriko dira:

_Lehenbiziz eta bigarrengoz berandu iristea: egun bateko enplegu-soldaten etenaldia.

_Hilabete berean hirugarrenez berandu iristea: bi eguneko enplegu-soldaten etenaldia.

B) Hutsegite larriak izanez gero:

_Hiru egunetik hogeira bitarteko enplegu-soldaten etenaldia.

C) Hutsegite oso larriak izanez gero:

_21-60 eguneko enplegu-soldaten etenaldia.

31. artikulua. Zehapenetarako prozedura.

Zehapen ororen berri, hitzezko kargu-hartzea salbu, idatziz emanen zaio langileari. Jakinarazpen horretan zehatz-mehatz esanen zaio zein hutsegite egin duen eta noiz, hutsegitearen kalifikazioa eta zer zehapen jarriko zaion.

32. artikulua. Hutsegiteen preskripzioa.

Hutsegite arinak hamar egunen buruan preskribatuko dira, larriak hogei egunen buruan eta oso larriak hirurogeiren buruan, Fundación Bidean Laboral enpresak hutsegiteaz jakitun egindako egunetik aitzina eta, nolanahi ere, hutsegitea egin eta sei hilabeteren buruan.

IX. TITULUA

Eskubide sindikalak

33. artikulua. Ordu sindikalak eta haien metaketa.

Enpresa Batzordeko kideetako bakoitzak zenbait ordu izanen ditu bere eginkizunak betetzeko. Langileen Estatutuaren 68. artikuluan xedatutakoa aplikatuz dagokion ordu kopurua izanen du bakoitzak.

Kopuru horretako orduez baliatzeko, beharrezkoa izanen da aurretik abisatzea, ahalik lasterren, tailerraren edo zerbitzuaren arduradunari. Arau gisa orduak hartu behar diren baino gutxienez 24 ordu lehenago abisatu beharra dago. Zenbat ordu hartzen diren ere esan beharko da.

Lan sindikala lan orduetatik kanpo egiten denean, ordu haiek konpentsatuko dira, denbora hori behar bezala justifikatu eta gero. Ordu haien ordez atsedenaldi ordaindua hartzen ahalko du ordezkari sindikalak, ordu haien ondo-ondoko lanegunean.

Langileen Estatutuari buruzko 68. artikuluko e) idatz-zatiko azken lerroaldean xedaturikoarekin bat, posible izanen da langileen ordezkari bakoitzari dagozkion orduak metatzea, guztira gehienekoa gainditu gabe, osorik edo hein batean kide bakar batek hartuta.

Horretarako, orduak metatzea erabakiz gero, langileen ordezkariek zuzendaritzari jakinaraziko diote nork hartuko dituen orduak, zer baldintzatan eta zer epetan.

34. artikulua. Iragarki ohola eta artxiboa.

Langileen ordezkarien lana erraztearren, sindikatuendako iragarki ohola eta gutunontziak jarriko dira, proposamenak eta iradokizunak jasotzeko.

35. artikulua. Biltzeko eskubidea.

Langileen Estatutuko 4., 77. eta hurrengo artikuluetan xedatutakoari jarraikiz, errespetatu eginen da langileek biltzeko duten eskubidea.

Batzarrak egitekotan, 48 ordu lehenago jakinarazi behar zaio Zentroko Zuzendaritzari, betiere adieraziz zein diren jorratu beharreko gaiak eta zentrotik kanpoko zer pertsona joanen diren bileretara, halakorik baldin badago. Lan orduetatik kanpo eginen dira, non ez den espresuki adosten Fundación Bidean Laboral enpresarekin.

38. artikulua. Langileen ordezkariei informazioa ematea.

Fundación Bidean Laboral enpresak Langileen Estatutuko 64. artikuluaren arabera, informazioa emanen die langileen ordezkariei zentroaren bilakaera ekonomiko eta produktiboari buruz, baita kontratazioei buruz eta legez aurreikusten diren gainerako gaiei buruz ere.

X. TITULUA

Xedapen gehigarriak eta azken xedapenak

Lehen xedapen gehigarria._2008an, 2009an eta 2010ean lansariak gehitzea.

Lanbide arteko gutxieneko soldatari dagokiona izan ezik, gainerako lansari kontzeptuak (beste kategorietako oinarrizko lansaria, ekoizpen-osagarria, kilometrajea, aparteko orduak eta beste) ehuneko hauetan gehituko dira:

2008rako: Nafarroako KPI 2007ko abenduaren 31n, gehi 0,5 puntu.

2009rako: Nafarroako KPI 2008ko abenduaren 31n, gehi 0,5 puntu.

2010erako: Nafarroako KPI 2009ko abenduaren 31n, gehi 0,5 puntu.

Betiere, lanbide arteko gutxieneko soldataren igoera urte bakoitzeko KPIaren ehunekoei dagozkien zenbatekoa baino gehiago izanez gero, oinarrizko lansariak urte bakoitzeko lanbide arteko gutxieneko soldata gehitzen dena handituko dira.

Azken xedapenetariko lehena._Arau subsidiarioak.

Hitzarmen honetan arauturik ez dagoen orotarako, Langileen Estatutuan eta hura garatzen duten xedapenetan, bereziki enplegurako zentro berezietan lanean ari diren minusbaliatuen lan harreman berezia arautzen duen uztailaren 17ko 1368/19885 Errege Dekretuan, martxoaren 12ko 427/1999 Errege Dekretuak aldatu zuen hartan, xedatu bezala eginen da.

Azken xedapenetariko bigarrena._Interpretatzeko Batzorde Mistoa.

Hitzarmen honen ondorioz interpretatu eta betetzerakoan sor litezkeen zalantzen gainean ebazteko, interpretatzeko bitariko batzorde bat sortuko da, zeinetan bi aldeek hartuko baitute parte. Lehen mailan, hitzarmen ulertu eta betetzean sor litezkeen liskarrak hortxe konponduko dira.

Batzorde horrek lau kide izanen ditu. Zuzendaritzak bi izendatuko ditu. Beste biak langileen ordezkarien artetik hautatuko dira.

Aholkulariek laguntzen ahalko diete bi aldeen ordezkariei. Eztabaidetan parte hartuko dute. Hizpidea izanen dute, baina botorik ez.

Azken xedapenetariko hirugarrena._Nafarroako Laneko Liskarrak Konpontzeko Auzitegiaren onarpena.

1.a) Bi aldeek erabaki dute lan hitzarmen hau interpretatu eta aplikatzerakoan sortzen diren liskarrak konpontzeko, adiskidetze eta bitartekotza aldietan, Nafarroako Lan Gatazkak Konpontzeko Auzitegiaren iritziaren menpe jarriko direla. Era berean, adierazi dute ahaleginak eginen dituztela ukituriko alderdiak aipatu auzitegiaren prozedura arbitralaren esanetara jar daitezen.

Artikulu hau, beraz, alderdien atxikimendu espresua da gatazken konponbiderako arbitraje organoarekiko, eraginkortasun orokor gisa eta, ondorioz, itunak behartzen ditu "Bidean" enpresa, ordezkari sindikalak eta langileak beren desadostasunak epaiketara jo aitzin aipatu organoaren bitartekotza eta adiskidetze prozeduretan azaltzera. Hartaz, ez da nahitaezkoa alderdien desadostasun edo gatazka bakoitzerako atxikimendu espresua eta banakakoa egitea, arbitrajera lotzeko ez bada, zeina bultzatzeko eta sustatzeko konpromisoa hartu baitute lan hitzarmen honen sinatzaileek.

2.a) Era berean, lan hitzarmen honen sinatzaileek hitzeman dute ahaleginak eginen dituztela langileen eta "Bidean" enpresaren artean sor daitezkeen banakako liskarrak Nafarroako Lan Gatazkak Konpontzeko Auzitegiaren aurrean Adiskidetze, Bitartekotza eta Arbitraje prozeduren mendean borondatez eta era espresuan jar daitezen, Nafarroako Foru Komunitateko lan gatazkak auzibidetik kanpo ebazteko Lanbide arteko Akordioaren 2. xedapen gehigarrian adierazten diren gaietan.

ERANSKINA 2006KO LANSARIEN TAULAK

A: E. C D E F G H I. J

K O N T Z E P T U A KLGS Kat. E. Kat. C Kat. D Kat. E Sekz. nag. Sekz. ard. Auto-gidaria Tailerreko nag. Tailerreko ard.

Oinarrizko lansaria 540,90 540,90 540,90 540,90 540,90 540,90 540,90 540,90 540,90 540,90

Laneratze plusa 12,00 30,00 48,50 24,00 24,65 51,60 172,00 33,10

Produktibitate plusa 34,00 80,00 85,50 54,00 259,00 359,10

Arratsaldeetako plusa

Bestelakoak 100,00

Guztira, gordinik 540,90 552,90 570,90 589,40 598,90 645,55 678,00 766,90 833,00 1.000,00

2007KO LANSARIEN TAULAK

A: E. C D E F G H I. J

K O N T Z E P T U A KLGS Kat. E. Kat. C Kat. D Kat. E Sekz. nag. Sekz. ard. Auto-gidaria Tailerreko nag. Tailerreko ard.

Oinarrizko soldata 570,60 570,60 570,60 570,60 570,60 570,60 570,60 570,60 570,60 570,60

Jarduera plusa. 0,00 7,18 25,99 45,32 55,25 104,00 137,91 230,81 299,89 474,40

Guztira, gordinik 570,60 577,78 596,59 615,92 625,85 674,60 708,51 801,41 870,49 1.045,00

Iragarkiaren kodea: F0705757