Iragarkia

58. ALDIZKARIA - 2007ko maiatzaren 9a

I. NAFARROAKO FORU KOMUNITATEA

1.3. BESTELAKO XEDAPENAK

1.3.4. Dirulaguntzak eta bekak

64/2007 FORU AGINDUA, martxoaren 16koa, Vianako Printzea Erakundea-Kultura eta Turismo Departamentuko kontseilariak emana, Museoen Zerbitzuan aritzeko prestakuntzako lau bekaren deialdia onetsi eta ebaluazio batzordea hautatzen duena.

Kultura Zuzendaritza Nagusiko Museoen Zerbitzuak txosten bat aurkeztu du eta bertan proposatu Museoen Zerbitzuan aritzeko prestakuntzako lau bekaren deialdia eta hura arautuko duten oinarriak onets daitezela.

Nafarroako Foru Komunitateko Administrazioan eta haren erakunde autonomoetan prestakuntza bekak emateko araubide orokorra ezartzen duen apirilaren 19ko 172/2004 Foru Dekretuak ematen dizkidan ahalmenak erabiliz,

AGINDU DUT:

1. Lau bekatarako deialdia egitea, lizentziadunek, Nafarroako Gobernuko Museoen Zerbitzuaren bidez, museoen antolaketaren eta funtzionamenduaren gaineko ezagutza teoriko eta praktikoa jaso eta prestakuntza akademikoa osa dezaten.

2. Deialdia arautuko duten oinarriak onestea.

3. Eskaerak baloratuko dituen batzordeko kideak izendatzea:

Batzordeburua: Carmen Valdés Sagüés, Kultura Zuzendaritza Nagusiko Museoen Zerbitzuko zuzendaria.

Mahaikidea: Miguel Angel Hurtado Alfaro, Nafarroako Museoaren Ataleko burua.

Mahaikidea: Francisco Javier Zubiaur Carreño, Museoetako goi mailako teknikaria, Nafarroako Museoaren Atalari atxikia.

Mahaikidea: Ana Elena Redín Armañanzas, goi mailako teknikaria, Nafarroako Museoaren Atalari atxikia.

4. Osotara 35.100 euroko gastua baimentzea. Horietatik, 20.475 euro, 2007ko ekainetik abendura bitarte erabiltzeko izanen dira eta 2007ko aurrekontuko "Bekadunak" izeneko A20003 A2300 4800 333100 kontusailaren bidez ordainduko dira. Gainerakoa, 14.625 euro, 2008ko urtarriletik maiatzera bitarte (maiatza barne) erabiltzeko, 2008ko kontusailaren kontura. Betiere, dagokion kontusailean hartarako behar adina diru izan beharko da.

5. Ebazpen hau Nafarroako ALDIZKARI OFIZIALean argitara dadila agintzea.

6. Foru agindu hau jakinaraztea Kultura Zuzendaritza Nagusiari, Ekonomia eta Ogasun Departamentuko kontu-hartzaile delegatuari, Museoen Zerbitzuari, Nafarroako Museoaren Atalari, Vianako Printzea Erakundea-Kultura eta Turismo Departamentuko Idazkaritza Tekniko Nagusiari, Kudeaketa Ekonomikoaren Bulegoari eta ebaluazio batzordeko kideei, eta adieraztea horren kontra gora jotzeko errekurtsoa jar daitekeela, Nafarroako Gobernuari zuzendua, hilabeteko epean, jakinarazi eta biharamunetik aurrera.

Iruñean, 2007ko martxoaren 16an._Vianako Printzea Erakundea-Kultura eta Turismo Departamentuko kontseilaria, Juan Ramón Corpas Mauleón.

ERANSKINA

Nafarroako Gobernuko Museoen Zerbitzuan aritzeko prestakuntzako lau beka emateko deialdiaren oinarriak. Deialdia honako arau hauen mende egonen da: apirilaren 19ko 172/2004 Foru Dekretua, 2004ko maiatzaren 12ko Nafarroako ALDIZKARI OFIZIALean argitaratua (57. zk.) eta Nafarroako Foru Komunitateko Administrazioaren eta haren erakunde autonomoen prestakuntza bekak emateko araubide orokorra ezartzen duena, eta Dirulaguntzei buruzko azaroaren 9ko 11/2005 Foru Legea, 2005eko azaroaren 14ko Nafarroako ALDIZKARI OFIZIALean argitaratua (136. zk.).

OINARRIAK

1._Prestakuntza bekaren xedea.

Deitutako lau beken xedea da lizentziadunek, Nafarroako Gobernuko Museoen Zerbitzuaren bidez, museoen antolaketaren eta funtzionamenduaren gaineko ezagutza teoriko eta praktikoa jasotzea, prestakuntza akademikoa osatzeko.

2._Beka kopurua.

Deialdian prestakuntzako lau beka eskaintzen dira.

3._Bekaren iraupena.

Prestakuntza beka bakoitza hamabi hilabete artekoa izan daiteke, ematen denetik hasita.

4._Bekaren dotazio ekonomikoa, ordaintzeko modua eta Administrazioarekiko harremana.

4.1. Prestakuntza beka bakoitzak 8.775 euro izanen ditu urtean.

Hamabi hilabetetan ordainduko da, 731,25 euro hilero.

4.2. Beka hilabetero ordainduko da, dagokion zatia, hilaren bukaeran.

4.3. Bekadunei ematen zaien dirua ez da soldata edo lansaritzat hartuko, dirulaguntza publikotzat baizik.

4.4. Beka erabiltzea eta bekaduna izatea ez da zerbitzuak ematea, eta egoera horrek ez dakar berarekin lan harremana, administratiboa edo estatutupekoa sortzea Nafarroako Foru Komunitateko Administrazioarekin edo haren erakunde autonomoekin, ez eta antzeko eskubiderik lortzea ere. Administrazioak ez du konpromisorik hartuko beka bukatutakoan bekaduna bere plantillan sartzeko.

4.5. Prestakuntza bekaren onuradunari agintzen zaizkion lan edo jarduerak, Museoen Zerbitzuko funtzionario edo kontratudunek gainbegiratuko dituzte, horiek izanen baitira lan horien erantzuleak. Bekadunak ezin izanen ditu funtzionario publikoen eginkizunak bete edo berarentzat hartu, ez eta hirugarrenen aurrean Administrazio Publikoaren kide, ordezkari edo agente gisa agertu ere.

4.6 Praktikaldiak iraun bitartean bekadunek hogeita hamar atseden-egun izanen dituzte, hilabete bakoitzeko 2,5 egun natural.

4.7. Halaber, bekadunak prestakuntzarako behar diren joan-etorriak eginen ditu.

5._Beka eskatzen dutenek bete behar dituzten baldintzak.

5.1. Beka bat lortu ahal izateko, betekizun hauek izanen dira:

a) Adinez nagusia izatea.

b) Espainiako herritarra izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko itunen arabera, langileen joan-etorri askea aplikatzen duen estaturen batekoa. Dena den, Espainiako nazionalitatea ez dutenek gaztelaniaz behar adina badakitela frogatu beharko dute.

c) Jarduteko gaitasun osoa izatea eta Nafarroako Foru Komunitatearen eta haren erakunde autonomoen laguntza eta dirulaguntza publikoak jasotzeko desgaitua ez egotea.

d) Bizitokia Nafarroan izatea, deialdiaren eguna baino urte bat lehenagotik gutxienez.

e) Unibertsitateko titulu ofiziala edo baliokidea izatea, Espainiako agintariek emana edo baliozkotua, arlo hauetakoren batean: Historia, Artearen Historia, Giza Zientziak, Pedagogia, Psikopedagogia, Hezkuntzaren Zientziak, Dokumentazioa eta Arte Ederrak.

f) Eskatutako titulu hori prestakuntza bekarako deialdiaren aurreko hiru urteetan eskuratua izatea.

6._Eskabidea, epeak eta aurkeztu beharreko agiriak.

6.1. Betekizun horiek egiaztagirien bidez eta idatziz frogatu beharko dira, prestakuntza beka jasotzeko eskabidea aurkeztearekin batera. Hori guztia Nafarroako Gobernuaren Erregistro Orokorreko bulegoetan edo Vianako Printzea Erakundea-Kultura eta Turismo Departamentuko erregistroan (Navarreria kalea, 39. zk., 31001 Iruña) aurkeztu beharko da, edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aipatutako bideetako bat erabiliz.

Hauek dira aurkeztu beharreko agiriak:

a) Eskabidea, http://www.navarra.es/home_es/Catalogo +de+servicios/Todos+los+servicios/Asistentes/default.htm webgunean edo Nafarroako Gobernuko erregistroetan eskura egonen den eskabide orokorreko ereduari jarraikiz, 6.2 puntuan ezarritako epean eta moduan aurkeztu beharrekoa.

b) Nortasun Agiri Nazionala edo izangaiaren nazionalitatea eta identitatea frogatzen dituen beste agiri baliokideren bat, eta udalaren errolda ziurtagiria, eskabidea aurkeztu aurreko urte osoan Nafarroan bizi izan dela egiaztatzeko.

c) Espediente akademikoaren ziurtagiria, maila bakoitzeko gai guztien kalifikazioekin, zein deialditan gainditu zituen espresuki aipatzen duena.

d) Izangaiaren "curriculum vitae-a", ikasketa osagarriak edo/eta egindako ikastaroak, argitalpenak, lortutako bekak, egindako ikerlanak eta izangaiari egokiak iruditzen zaizkion gainerako jarduera edo merezimendu guztiak adierazten dituena.

e) Nafarroako Ogasun Publikoko zergaduna bada, zerga betebeharrak eguneraturik dituela egiaztatzen duen ziurtagiria.

f) Zinpeko aitorpena, jakinaraziz prestakuntza beken xede bereko beste bekarik edo laguntzarik eskatu den edo jasotzen ari den departamentu, administrazio edo erakunde publiko edo pribatuen eskutik.

Hori guztia jatorrizko edo ofizialki konpultsatutako agiri egokien bidez egiaztatu beharko da.

6.2. Deialdi honetako prestakuntza bekak deialdi hau Nafarroako ALDIZKARI OFIZIALean argitara eman ondoko hogei egun naturaleko epean eskatzen ahalko dira.

6.3. Prestakuntza beka jasotzeko eskabidea aurkezteak berarekin dakar eskatzaileak deialdiaren oinarriak onartzea.

7._Eskatzaileek adierazten dituzten merezimenduak baloratzeko modua eta irizpideak.

7.1. Vianako Printzea Erakundea-Kultura eta Turismo Departamentuko kontseilariak izendatu beharreko ebaluazio batzordea kide hauek osatuko dute. Batzordeko burua: Carmen Valdés Sagüés, Kultura Zuzendaritza Nagusiko Museoen Zerbitzuko zuzendaria. Batzordeko kideak: Miguel Angel Hurtado Alfaro, Nafarroako Museoaren Ataleko burua; Francisco Javier Zubiaur Carreño, Museoetako goi mailako teknikaria, Nafarroako Museoaren Atalari atxikia, eta Ana Elena Redín Armañanzas, goi mailako teknikaria, Nafarroako Museoaren Atalari atxikia.

Merezimenduak aztertu eta baloratzeko, ebaluazio batzorde horrek beharrezkotzat jotzen dituen txostenak eskatu ahalko ditu, eta prestakuntza bekak puntu gehien ateratzen dutenei ematea proposatuko du, ondoko baremoan oinarrituz:

_Espediente akademikoa: 10 puntu gehienez.

_Ikastaroetan, biltzarretan, jardunaldietan, sinposioetan, mintegietan eta antzekoetan parte hartu izana: 5 puntu gehienez.

_Argitalpenak, hitzaldiak, lankidetza bekak, ikerkuntzarako bekak, etab.: 5 puntu gehienez.

Azken bi ataletan aipatutako ikasketak, ikastaroak, argitalpenak, bekak, etab., Historiaz, Arkeologiaz, Numismatikaz, Artearen Historiaz, Argazkigintzaz eta ikus-entzunezko baliabideez, Bibliotekonomiaz, Dokumentazioaz, Pedagogiaz, Museologiaz edo Zaharberritzeaz direnean soilik baloratuko dira, horiexek baitira Nafarroako Museoan aplikatzen diren arloak.

Eranskinean, agiri hau agertzen da: "Nafarroako Gobernuko Museoen Zerbitzuan aritzeko prestakuntza beken izangaien merezimenduak baloratzeko aplika daitezkeen puntuazioak". Agiri horrek zehaztasun handiagoz adierazten du alderdi hori.

7.2. Prestakuntza beken banaketa Vianako Printzea Erakundea-Kultura eta Turismo Departamentuko kontseilariak onetsiko du, foru agindu bidez.

8._Ebazpena jakinarazteko modua eta epea.

8.1. Bekadunak hautatzeko prozeduraren ebazpena interesatuei jakinaraziko zaie administrazio prozedura erkideari buruzko legerian ezarritako moduan, eta jendaurrean jarriko da Nafarroako Museoko eta Vianako Printzea Erakundea-Kultura eta Turismo Departamentuko iragarki oholetan.

8.2. Prestakuntza beka jaso ahal izateko, interesatuak hura onartzen duela adierazi beharko du, idatziz, beka hasi baino lehen. Onarpena Museoen Zerbitzuko Zuzendaritzan aurkeztu beharko da.

8.3. Hautaketa prozedura hiru hilabeteko epean ebatzi ez bada, eta horri buruzko administrazio ebazpenik espresuki jakinarazi edo argitaratu ez bada, interesatuen eskaera administrazioaren isiltasunaren bidez ezetsi dela ulertu ahalko da.

9._Prestakuntza jarduerak eta haien tutoretza egiteko lokalak eta zuzendaritza emanen dituen unitate administratiboa.

9.1. Prestakuntza praktikak Vianako Printzea Erakundea-Kultura eta Turismo Departamentuko Kultura Zuzendaritza Nagusiko Museoen Zerbitzuari atxikita egonen dira, eta Nafarroako Museoan bertan eginen dira (Iruñeko Santo Domingo kaleko 47. zk.).

9.2. Bekadunek jarraian adierazten diren funtzionamendu eremuetan egin beharko dute praktikaldia. Haien hautaketa jaso dituzten puntuazioen araberakoa (altuenetik baxuenera) izanen da.

.Eremuak:

_Museoen Zerbitzuko Zuzendaritza.

_Nafarroako Museoa, bilduma eremua.

_Nafarroako Museoa, erakusketa eta jarduera eremua.

_Nafarroako Museoa, eremu didaktikoa.

9.3. Eskatutako titulazioa edo goragokoa duen tutore batek zuzendu eta gainbegiratuko du bekadunen jarduera. Tutore hori Museoen Zerbitzuak izendatuko du bertan ari diren langileen artetik.

9.4. Tutoreak egin beharreko lanak agindu eta ordutegiak programatuko ditu, eta bekadunek beren eginbehar orokor eta berariazkoak betetzen dituzten begiratuko du.

10._Prestakuntza praktiken hasiera eta iraupena. Prestakuntza bekari uko egitea.

10.1. Prestakuntza bekaren onuradunak Nafarroako Museoen Zerbitzuko Zuzendaritzak adierazten duen egunean hasi beharko du jardunean. Horrela egiten ez badu, onuradunak bekari behin betikoz uko egiten diola ulertuko da, non eta organo eskudunak ezinbesteko arrazoiak edo behar bezala justifikatutako beste edozein gorabehera ikusten ez dituen.

10.2. Bekadunak hogeita hamar orduko jardunaldia (8:00etatik 14:00etara) izanen du astean, astelehenetik ostiralera, biak barne, jaiegun ofizialetan izan ezik.

10.3. Edozein arrazoi dela-eta, onetsitako bekari uko egiten bazaio, Nafarroako Gobernuko Kultura Zuzendaritza Nagusiko Museoen Zerbitzuari jakinarazi behar zaio, idatziz.

10.4. Horrelako kasuetan, ebaluazio batzordeak prestaturiko puntuazioaren araberako zerrendan hurrengo denari deituko zaio, bekaldia bukatu bitartean jardun dezan. Bigarren onuradun hori bekaduntzat hartuko da ondorio guztietarako, deusetan galarazi gabe lehenengo bekadunak uko egin arte zituen betebeharrak.

11._Bekadunaren berariazko betebeharrak, eskubideak eta administrazio erantzukizuna.

11.1. Honako hauek dira bekadunak prestakuntzaldian dituen betebehar orokorrak:

a) Beka emateko oinarritzat jo den prestakuntza jarduera egitea eta hori frogatzea. Prestakuntzaz arduratzen den administrazio unitateak lan eta txostenak aurkezteko eskatu ahalko du, bekadunaren errendimendu mailaren jarraipena eta ebaluazioa egiteko.

b) Beka emateko betebehar eta baldintzak betetzea.

c) Eskumena duten organoek eman den bekaren inguruan egin ditzaketen egiaztapen lan guztiak onartzea.

d) Museoen Zerbitzuari jakinaraztea harturiko bekari espresuki uko egiten diola, jarduerak utzi baino hamabost egun natural lehenago gutxienez.

e) Beka dela-eta eginiko jardueraren zuzeneko ondorioa den edozein argitalpenetan bekaduna dela adieraztea.

f) Zein erakundetan jarduten duen, bertako barne edo funtzionamendu araubidea betetzea.

g) Prestakuntzaldia bukaturik, gehienez ere hilabeteko epean, eginiko lanen memoria igorri beharko du Museoen Zerbitzura, baita lorturiko ezagutza teknikoari buruzko balorazioa ere.

11.2. Bekadunen eskubideak:

a) Bekadunek, Nafarroako Foru Komunitateko Administrazioarekin duten harreman juridikoa ezertan aldatu gabe, eskubidea izanen dute zerbitzu eta bidaien arabera izaten dituzten gastuengatik funtzionarioei dagozkien ordain berberak jasotzeko.

b) Orobat, bekadunek Nafarroako Foru Komunitateko Administrazioaren kalte-ordaina jasotzeko eskubidea izanen dute, zerbitzu publikoen funtzionamenduaren ondorioz kalteak edo lesioak dituztenean, ezinbesteko kasuetan izan ezik. Administrazioaren ondare erantzukizuna administrazio bidetik eskatuko da.

c) Nafarroako Foru Komunitateko Administrazioa izanen da prestakuntza jardueran bekadunak hirugarrenei sortzen dizkien kalteen erantzulea, baina administrazio horrek zilegi izanen du iruzur, erru edo zabarkeria larriagatik bekadunak izan dezakeen erantzukizuna eskatzea.

d) Asistentzia eta aprobetxamenduaren ziurtagiria jasotzeko eskubidea izanen dute, Musoen Zerbitzuan egindako prestakuntzaldian jasotako jakintza eta ezagutzaren araberakoa. Vianako Printzea Erakundea-Kultura eta Turismo Departamentuko Idazkaritza Tekniko Nagusiak eginen du ziurtagiri hori.

12._Bateraezintasunak.

Prestakuntza beka jasotzeak bateraezintasun hauek izanen ditu:

a) Bekaren prestakuntza jardueran aritzea galaraz dezakeen ezgaitasun fisikoa edo bestelako gaixotasunen bat izatea.

b) Museo, Liburutegi eta Agiritegietan lanbide praktikak egiteko Nafarroako Gobernuak emandako bekez inoiz baliatu direnek ezin dituzte beka hauek eskatu.

c) Onuraduna prestakuntzarako jarduera berbera egiteko beste beka edo dirulaguntza bat jasotzen ari denean, guztira jasotako zenbatekoa ezin izanen da 13.000 eurotik gorakoa izan, dela bakarka dela Nafarroako Foru Komunitateko Administrazioaren, beste administrazio publiko baten, beste erakunde publiko edo pribatu baten edo Espainiako nahiz atzerriko partikular baten beste beka edo dirulaguntzekin baturik.

Aipatu zenbatekoa gainditzen bada, Vianako Printzea Erakundea-Kultura eta Turismo Departamentuak bekaren zenbatekoa eta iraupena dagokienean murriztuko ditu. Halakoetan, departamentuak gainerako izangaiei beste beka bat eskaini ahalko die, lortutako puntuen hurrenkerari jarraituz, hasierako bekaren iraupenaren eta zenbatekoaren osagarri gisa.

d) Prestakuntza beka emateko kontuan hartu diren baldintzak ezertan aldatzen badira eta betiere aldi berean hauekin ezin bateratu den beste dirulaguntzarik eskuratzen bada, deuseztatu edo aldatu eginen da kontzesiorako ebazpena.

13._Ez-betetzeak.

Bekadunak bere gain hartutako betebehar eta eginkizunak betetzen ez baditu, haiek egiten ardurarik jartzen ez badu, errendimendu eta aprobetxamendu eskasa badu edo lanak kalitate gabekoak badira, beka aldi bateko edo betiko kentzea erabakiko du organo eskudunak, dagokion administrazio unitateak proposaturik eta interesatuari entzunaldia eman ondoren; horrekin batera dotazio ekonomikoaren zati proportzionala ere galduko du, eska daitezkeen diru-itzulketen, berandutza interesen eta ezar litezkeen zehapenen kalterik gabe.

14._Behar diren aurrekontu-kredituak.

Museoen Zerbitzurako prestakuntzako lau beka emateak guztira sortuko duen 35.100 euroko gastutik 20.475 euro 2007ko aurrekontuko "Bekadunak" izeneko A20003 A2300 4800 333100 kontusailaren kontura ordaindu ahalko dira, eta gainerakoa, 14.625 euro, 2008ko aurrekontuetan xede berberarako ezarriko den kontusailaren kontura. Betiere, dagokion kontusailean hartarako behar adina diru izan beharko da.

15._Deialdiko oinarrien kontra jar daitezkeen administrazio errekurtsoak.

15.1. Deialdi honen, bere oinarrien eta horiek aplikatzeko egintzen kontra gora jotzeko errekurtsoa jarri ahalko da, Nafarroako Gobernuari zuzendua, hilabeteko epean, deialdia jakinarazi edo argitaratu eta biharamunetik hasita.

15.2. Oinarri hauetan ezarrita ez dagoen orotan, Nafarroako Foru Komunitateko Administrazioaren eta haren erakunde autonomoen prestakuntza bekak emateko araubide orokorra ezartzen duen apirilaren 19ko 172/2004 Foru Dekretuan xedatutakoa aplikatuko da (2004ko 57. Nafarroako ALDIZKARI OFIZIALa, maiatzaren 12koa).

ERANSKINA

Nafarroako Gobernuko Museoen Zerbitzuan aritzeko prestakuntza beken izangaien merezimenduak baloratzeko aplika daitezkeen puntuazioak

Lehendabiziko multzoa._Espediente akademikoa: 10 puntu gehienez.

_Espedientea:

-Nahiko: 1.

-Oso ongi: 2.

-Bikain: 3.

-Ohorezko matrikula: 4.

_Eskatzen den arloko beste lizentziaturarik: 2.

_Unibertsitateko beste diplomaturarik: 1.

_Doktoretza tesiak: 1.

_Ikasketa aurreratuen agiria: 1.

_Masterrak eta antzeko agiriak*: 0,7.

_Irakasgaitasun ziurtagiria: 0,3.

Bigarren multzoa._Ikastaroak, biltzarrak, praktikak: 5 puntu gehienez.

_Ikastaroak* (puntu 1 gehienez).

-25 ordu baino gutxiagokoak: 0,1

-25 ordu edo gehiagokoak: 0,2.

_Biltzarrak, sinposio jardunaldiak eta mintegiak* (0,5 puntu gehienez): 0,1.

_Erakusketaren komisariotza (puntu 1 gehienez): 0,2.

_Banakako erakusketa (0,5 puntu gehienez): 0,2.

_Arkeologia arloko esku-hartzeak (puntu 1 gehienez).

-6 hilabete baino gutxiagokoak: 0,1.

-6 hilabete edo gehiagokoak: 0,2.

_Lanbide/lan praktikaldiak*: puntu 1 gehienez.

-6 hilabete baino gutxiagokoak: 0,1.

-6 hilabete edo gehiagokoak: 0,2.

(kanpo gelditzen dira unibertsitateko titulu bat lortzera bideratutako derrigorrezko praktikaldiak).

Hirugarren multzoa._Argitalpenak, hitzaldiak, lankidetza zientifikoko bekak: 5 puntu gehienez.

_Aldizkariko artikulua*: 0,2.

-Txosten laburra: 0,1.

_Monografia*: 2.

_Emandako hitzaldia*: 0,2.

-Komunikazioa: 0,1.

_Lankidetza/ikerkuntzarako beka: 0,1.

-Beka uniibertsitateko departamentuko barne ikasle gisa.

Merezimendu horiek prestakuntza bekak jasotzeko eskatzen diren arloekin lotuta egonez gero baizik ez dira kontuan hartuko, deialdi hau arautzen duten oinarrietako 7.1 puntuari jarraikiz. Bibliotekonimiari, artxiboen kudeaketari eta dokumentazioari buruzko ikastaroak sartzen dira. Ikastaroen/praktikaldien iraupena jakinarazten ez bada, gutxieneko puntuazioa emanen zaie.

Iragarkiaren kodea: F0704841