I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
763/2007 EBAZPENA, martxoaren 14koa, Industria eta Merkataritza zuzendari nagusiak emana, 2007. eta 2008. urteetan teknologoak prestatzeko beken deialdia onesten duena.
Nafarroan kokatuta dauden enpresen lehia-gaitasuna bultzatzeko laguntza esparrua ezartzen duen maiatzaren 23ko 208/1991 Foru Dekretuak, 3. artikuluan, ezartzen du laguntzen xede diren programa eta jardueren artean teknikarien prestakuntza eta gaikuntza izanen direla.
Halaber, foru dekretu horren 4. artikuluko 1.2.a) idatz-zatian ezarria dago prestakuntza programetarako laguntzak teknikari graduatu berriak Nafarroako ikerketa zentro eta laborategietan prestatu eta espezializatzeko laguntzen deialdietan gauzatuko direla, Foru Komunitatearentzat interesgarriak diren alorretan.
2007ko ekitaldirako Nafarroako Aurrekontu Orokorrei buruzko abenduaren 27ko 17/2006 Foru Legearen 30. artikuluak ahalmena ematen dio Industria eta Teknologia, Merkataritza eta Lan Departamentuari ikertzaileak prestatu eta espezializatzeko gastu-konpromisoak hartzeko kasuko ekitaldiaren ondorengo aurrekontuen kargura, baldin eta konpromiso horiek gainditzen ez badituzte aurreko ekitaldian xede horretarako finkatutako zenbatekoak.
Teknologoak prestatzeko 2007ko eta 2008ko bekek Europar Batasuneko Europako Gizarte Funtsaren kofinantzazioa dute.
Adierazitakoarekin bat, eta Nafarroako Foru Komunitateko Administrazioari buruzko abenduaren 3ko 15/2004 Foru Legearen 22.1 artikuluak ematen dizkidan eskurantzak erabiliz,
EBATZI DUT:
1. Teknologoak 2007. eta 2008. urteetan prestatzeko deialdia onestea.
2. Deialdiko oinarriak onestea. Oinarri horiek ebazpen honen eranskinean ageri dira.
3. Ebazpen honetatik datozen konpromisoei aurre egiteko 1.958.000,00 euroko gastua onestea, honela banaturik:
Urtea: 2007. Gastuen aurrekontuko kontusaila: 840001 81200 4809 467300. Zenbatekoa: 660.000,00 euro.
Urtea: 2007. Gastuen aurrekontuko kontusaila: 840001 81200 4809 467302. Zenbatekoa: 319.000,00 euro.
Urtea: 2008. Gastuen aurrekontuko kontusaila: 840001 81200 4809 467300 edo horren baliokidea. Zenbatekoa: 660.000,00 euro.
Urtea: 2008. Gastuen aurrekontuko kontusaila: 840001 81200 4809 467302 edo horren baliokidea. Zenbatekoa: 319.000,00 euro.
4. Ebazpen hau Nafarroako ALDIZKARI OFIZIALean argitaratzea, orok jakin dezan.
5. Ebazpen honen aurka gora jotzeko errekurtsoa jar daiteke, Industria eta Teknologia, Merkataritza eta Lan kontseilariari zuzendua, argitaratu eta biharamunetik hilabeteko epean.
Iruñean, 2007ko martxoaren 14an._Industria eta Merkataritza zuzendari nagusia, Enrique Díaz Moreno.
ERANSKINA
Teknologoak prestatzeko 2007. eta 2008. urteetarako bekak arautzeko oinarriak
1. oinarria._Xedea.
Teknologoak prestatzeko beka hauek Nafarroako zentro teknologiko, unibertsitate eta enpresa jakin batzuetan aritzeko dira, berariaz egindako deialdian aurkeztutako I+G+b proiektua dela-eta hautatzen direnetan, hain zuzen. Beken helburua etorkizuneko profesionalen prestakuntza hobetzea da, Foru Komunitateko zenbait industria sektorerentzat interesgarriak diren ikerketa eta/edo espezializazio jarduerak eginez.
2. oinarria._Beken zenbatekoa eta iraupena.
Teknologoak Nafarroako zentro teknologiko, unibertsitate eta enpresetan prestatzeko beken dotazio ekonomikoa, 2007. urtean, 850,00 eurokoa izanen da hilean, eta 2008. urtean diru-kopuru hori berrikusi ahalko da.
Beken iraupena esleipenaren ebazpenean finkatuko da. Hasiera eguna bekaduna lantokian lanean hasten den eguna izanen da.
Beken aprobetxamendua ona bada eta aurrekontuetan horretarako diru aski baldin badago, bekaldia luzatu ahalko da, gehienez ere 24 hilabete egin arte.
3. oinarria._Prestakuntza bekak lortzeko betebeharrak.
Teknologoak prestatzeko beken eskatzaileek berariazko betebehar hauek bete beharko dituzte:
1. Espainiako herritarra izatea edo Europar Batasuneko estaturen batekoa edo, Europar Batasunak izenpetu eta Espainiako Estatuak berretsitako nazioarteko itunen arabera, langileen joan-etorri askea aplikatzen duen estaturen batekoa, eta Nafarroan erroldaturik egotea.
2. Eskatutako titulua edukitzea. Salbuespen gisa, unibertsitateko azken kurtsoan dauden ikasleen eskaerak onar daitezke, titulazioa lortzeko 35 kreditu baino gutxiago falta bazaie.
3. Ikasketak bukatuak badituzte, azken 4 urteotan bukatuak izatea.
4. Aurreko urteetan, kasuan kasu eskaturiko titulaziorako ikasketak bukatu ziren egunetik kontatzen hasita, hemezortzi hilabete baino denbora gehiago administrazio publikoren batek prestakuntza edo espezializaziorako emandako beken onuradun ez izana.
Interesatuek, orobat, Dirulaguntzei buruzko azaroaren 9ko 11/2005 Foru Legearen 13. artikuluan eskatutako betebehar orokorrak bete beharko dituzte. Horiek frogatzeko, erantzukizuneko aitorpena aurkez dezake eskatzaileak, eskabidearekin batera eskuragai jarriko den ereduaren araberakoa.
4. oinarria._Eskabideen aurkezpena eta eskaturiko agiriak.
1. Eskabideak aurkezteko epea deialdi hau Nafarroako ALDIZKARI OFIZIALean argitaratu eta biharamunean hasi eta 2008ko abenduaren 31n bukatuko da, egun hori barne.
Eskabideak Industria eta Teknologia, Merkataritza eta Lan Departamentuko erregistroan aurkeztuko dira (Iruñeko Tomás Caballero parkea, 1, 31005 posta kodea), edo Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 38.4 artikuluan aurreikusitako lekuetako batean.
Eskabidea posta bulego batean aurkezten bada, gutunazal ireki batean egin beharko da, lehenengo orriko goiko aldean bulegoaren izena, eguna, tokia eta ordua (minutu eta guzti) adierazi ahal izateko. Datu horiek guztiak gordekinean ere azaldu beharko dira.
2. Interesatuek dokumentazio hau aurkeztu beharko dute:
_Eskabidea; eskabide-orriaren eredua Berriztapen eta Teknologia Zerbitzuan eta Nafarroako Gobernuko argibide bulegoetan (Karlos III.aren etorbidea, 2, Iruña) jaso daiteke, edo Interneten, ondoko helbideetan: http://www.navarra.es/industria (Berriztapena eta Teknologia), http://www.plantecnologico.com eta bekak kudeatzeko entitate laguntzaileen web-orrietan.
Eskabidean interesatuek lehenesten dituzten bekak adierazi ahalko dituzte, betegabe daudenetatik hautatuz. Eskura dauden beken zerrenda Departamentuaren web-orrian ikus daiteke.
Lehentasunik adierazi ezean, interesatuek bekak banatzeko hautapen prozesu guztietan parte hartuko dute, proiektuaren arduradunek eskatutakoaren araberako profil profesionala izanez gero betiere.
_Nortasun Agiri Nazionalaren fotokopia.
_Nafarroan erroldaturik daudela frogatzen duen agiria.
_Eskatutako titulazioaren eta ikasketa espedientearen ziurtagiriaren fotokopia.
_Curriculum vitaea. Edonoiz, Berriztapen eta Teknologia Zerbitzuak edo bekak kudeatzen dituzten entitateetatik edozeinek izangaiek alegatutako merezimenduen gaineko egiaztagiriak eska ditzake.
5. oinarria._Dirulaguntzak emateko irizpideak.
Berriztapen eta Teknologia Zerbitzuak eskabide guztiak jaso eta bekak kudeatzeko entitate laguntzaileei igorriko dizkie, "Bekadunen Erregistroa" izeneko atalean deialdiko 3. oinarrian adierazitako betebeharrak betetzen dituzten eskatzaileak adierazita.
Hona hemen bekadunak hautatzeko erabiliko diren balorazio irizpideak:
_Aurkeztutako titulazioa zenbateraino egokitzen zaion hautatu den I+G+b proiektuaren ardura duen zentro teknologikoak, unibertsitateak edo enpresak eskatutakoari.
_Ikasketa espedientearen batez besteko nota, eta egindako irakasgaiak nola egokitzen zaizkion proiektuaren ardura duen entitateak eskatutako profilari.
_Eskatzailearen curriculum vitaea.
Balorazioa eginda, entitate laguntzaileek izangaien lehenengo hautapena eginen dute. Hautatzen diren izangaiei kasuan kasuko zentroak, unibertsitateak edo enpresak izendatzen duen tutorearekin egin beharreko buruz buruko elkarrizketa batera joateko deituko zaie.
Hautapen prozesua bukaturik, entitate laguntzaileak puntuazio altuena lortzen duen izangaiaren aldeko txostena prestatu eta Berriztapen eta Teknologia Zerbitzuari igorriko dio.
6. oinarria._Prestakuntza bekak ematea.
Berriztapen eta Teknologia Zerbitzuak bekak adjudikatzeko ebazpen proposamena eginen du, bekak kudeatzeko entitate laguntzaileak egindako txostena aintzat harturik. Ebazpen proposamenean adierazi beharko da onuradunek prestakuntza bekak emateko eskatutako betebehar guztiak betetzen dituztela.
Bekak emateari buruz ebazteko eskumena Industria eta Merkataritza zuzendari nagusiari dagokio.
Ebazpena gehienez ere sei hilabeteko epean emanen da, eskabidea aurkezten denetik hasita. Epe hori beka ematearen gaineko berariazko ebazpenik jakinarazi gabe bukatuz gero, ulertuko da eskaera ezetsi dela.
Aurkeztutako eskaeraren berariazko edo ustezko ezespenaren aurka interesatuek zilegi izanen dute gora jotzeko errekurtsoa jartzea, Industria eta Teknologia, Merkataritza eta Lan kontseilariari zuzendua, Administrazio prozedura erkideari buruzko legeriari jarraikiz.
Bekak emanen dira aurrekontuetan horretarako dirua izanez gero. Dena dela, urtean zehar 2007ko aurrekontuetako kontusailetara diru gehiago bideratuz gero, deialdi honen ondoriozko gastu konpromisoei aurre egiteko baimendutako diru kopurua handitu ahalko dira.
Era berean, deialdi honen ondoriozko konpromisoei aurre egiteko baimendutako diru kopurua handituko da 2008ko ekitaldietako aurrekontuetan horretarako diru aski baldin badago.
7. oinarria._Onuradunek egindako jarduerak frogatu beharra.
Bekadunek prestakuntza beka dela-eta egiten dituzten jardueren gaineko azken txostena aurkeztu beharko dute, tutorearen ikus-onespenarekin. Gero, zentroak beka kudeatzen duen entitate kudeatzaileari igorriko dio.
Txosten hori aurkeztu ezean, emandako bekaren dirua jasotzeko eskubidea galduko du bekadunak, eta dirua kobratua izanez gero, itzuli beharko du.
8. oinarria._Beka ordaintzeko modua eta epeak.
Bekak kudeatzeko entitate laguntzaileek hilabetero ordainduko diete onuradunei, entitateek eta Industria eta Teknologia, Merkataritza eta Lan Departamentuak sinatu beharreko lankidetza hitzarmenean ezartzen den bezala.
9. oinarria._Onuradunen betebeharrak eta haiek ez betetzearen ondorioak.
1. Bekaren onuradunek honako betebehar berezi hauek izanen dituzte:
a) Kasuan kasuko zentroa teknologikoan, unibertsitatean edo enpresan hasi direla frogatzea. Horretarako "Sarreren, ukoen eta ordezkapenen jakinarazpena" izeneko inprimakia sinatu beharko dute.
b) Prestakuntza planaren etapa guztiak betetzea eta beka dela-eta egin dituzten jardueren gaineko txostena prestatzea urte bukaeran.
c) Halaber, jabetza intelektual edo industrialari buruzko arautegiarekin bat babestu beharreko edozein emaitza berehalaxe jakin beharko diote bekadunek zentroari, zuzendariaren edo tutorearen bidez.
d) Prestakuntza beka zein zentrotan egiten den, hango ordutegia, arauak eta diziplina betetzea.
2. Halaber, onuradunek Dirulaguntzei buruzko Foru Legearen 9. artikuluan ezarritako baldintza orokorrak bete beharko dituzte.
Zerga arloko eta Gizarte Segurantzarekiko betebeharren ordainketan egunean dagoela egiaztatzeko, eskabide-ereduan berean baimena eman beharko zaio departamentuari behar diren datuak kontsulta ditzan, laguntza emateko ebazpenaren proposamena egiten den unean onuradunak betebehar horiek egunean dituela egiaztatzeko.
3. Dirulaguntza emateko ebazpenean, arau hauetan edo Dirulaguntzei buruzko Foru Legean ezarritako betebeharrak osorik bete ezik, behar bezala aprobetxatu ezik eta, orobat, proiektuaren ardura duen zentroak desadostasun txostena emanez gero, onartutako dirulaguntza kobratzeko eskubidea galduko da edo diru hori itzuli egin beharko da, foru lege hartako 35. artikuluan xedatutakoarekin bat.
Halaber, aurreko betebeharrak hein batean bete ezik, emandako dirulaguntzaren zenbatekoa berriro ere finkatu ahalko da, proportzionaltasun printzipioari jarraikiz edo, hala badagokio, dagokion zenbatekoa itzultzeko agindu.
Kobratzeko eskubidea galduz gero, beka horietara bideratutako dirua liberalizatu ahalko da eta hasiera batean aurrekontuetan dirurik ez izateagatik ezetsitako beste beka batzuetarako konprometitu.
10. oinarria._Bekaren bateraezintasuna eta zentroarekiko loturarik eza.
Deialdi honen dirulaguntzak bateraezinak dira Foru Komunitateko Administrazioak, beste administrazio publiko batzuek, beste erakunde publiko nahiz pribatuek edo Espainiako nahiz atzerriko partikularrek emandako beste laguntza batzuekin.
Beka prestakuntzarako denez gero, ez du inolako lan edo administrazio harremanik sortuko bekadunaren eta tutoretza lana egiten duen zentroaren artean, eta ez du ekarriko bekaduna Gizarte Segurantzaren araubidean sartzea.
11. oinarria._Oinarrien aurkako errekurtsoa.
Oinarri hauen aurka gora jotzeko errekurtsoa jar dezakete interesatuek, Industria eta Teknologia, Merkataritza eta Lan kontseilariari zuzendua, argitaratu eta biharamunetik hilabeteko epean.
12. oinarria._Emandako dirulaguntzen publizitatea.
Dirulaguntzei buruzko Foru Legearen 15. artikuluan xedatutakoarekin bat, Berrikuntza eta Teknologia Zerbitzuak Industria eta Teknologia, Merkataritza eta Lan Departamentuaren web-orrian jarriko du ikusgai teknologoak prestatzeko emandako beken zerrenda.
Iragarkiaren kodea: F0704754
