II. NAFARROAKO TOKI ADMINISTRAZIOA
2.1. ORDENANTZAK ETA BESTELAKO XEDAPEN OROKORRAK
EULATE
Ordenantza fiskala behin betiko onetsirik
Nafarroako Toki Administrazioari buruzko Foru Legeko 326. artikuluari jarraikiz, argitara ematen da Eulateko Udalaren Hirigintzako eta ingurumeneko txostenak egiteagatik ordaindu beharreko tasak arautzen dituen ordenantzaren testu osoa, 2005eko azaroaren 24ko osoko bilkuran hasiera batez onetsi zena. Legeak agintzen duenari jarraikiz, iragarki oholean eta 2006ko 3. Nafarroako ALDIZKARI OFIZIALean, urtarrilaren 6koan, argitaratu ondoren, haren aurkako inolako erreklamaziorik jaso ez denez, aipatu erabakiari jarraikiz, hasiera bateko onespena behin betikotzat jo eta 2006ko otsailaren 8ko osoko bilkuran onetsi da.
Eulaten, 2006ko otsailaren 20an._Alkatea, Angel María Martínez Remiro.
HIRIGINTZAKO ETA INGURUMENEKO TXOSTENAK EGITEAGATIK ORDAINDU BEHARREKO TASAK ARAUTZEN DITUEN ORDENANTZA FISKALA
1. artikulua. Txostenak tramitatu eta luzatzeko zerbitzua emateagatik ordaindu beharreko tasa arautzen du ordenantza honek, Nafarroako Toki Ogasunei buruzko martxoaren 10eko 2/1995 Foru Legeko 100. artikuluan xedatuarekin bat.
Izaera eta zergapeko egintza
2. artikulua. Tasa honen zergapeko egintza da hirigintzako eta ingurumeneko txostenak tramitatu eta luzatzeko zerbitzuak ematea, txostenak beharrezkoak direnean arlo horietako espedienteak ebazteko.
Subjektu pasiboa
3. artikulua. Eulateko Udalak aurreko artikuluarekin bat emandako zerbitzuak eskatzen edo zerbitzu horien onura edo ukipena jasotzen duten pertsona fisiko edo juridikoak dira tasen subjektu pasiboak.
Zenbatekoa eta sortzapena
4. artikulua. Ordenantza honek arautzen dituen tasen zenbatekoa izanen da, hain zuzen, txostenek Udalari ekartzen dizkioten gastuak, gehi prentsan nahitaez egin beharreko argitalpenen kostua.
5. artikulua. Udalak txosten eta argitalpen horien kostuak ezagutzen dituenean izanen da tasen sortzapena.
Iragarkiaren kodea: L0603189
