Iragarkia

147. ALDIZKARIA - 2006ko abenduaren 8a

I. NAFARROAKO FORU KOMUNITATEA

1.2. AGINTARIAK ETA LANGILEAK

1.2.2. Plantilla Organikoa, Lan Eskaintza Publikoa, oposizioak eta lehiaketak

DEIALDIA, Funtzio Publikoaren zuzendari nagusiak azaroaren 13an emandako 2775/2006 Ebazpenaren bidez onetsia, Nafarroako Foru Komunitateko Administrazioaren eta haren erakunde autonomoen zerbitzuko psikologo izateko 5 lanpostu oposizio bidez betetzekoa.

Funtzio Publikoaren zuzendari nagusiak martxoaren 13an emandako 2775/2006 Ebazpenaren bidez, Nafarroako Foru Komunitateko Administrazioaren eta haren erakunde autonomoen zerbitzuko psikologo izateko 5 lanpostu oposizio bidez betetzeko deialdia onetsi zuen.

Hautapen prozesua ondoko hauetan xedatutakoari jarraikiz eginen da: Nafarroako Administrazio Publikoen zerbitzuko Langileen Estatutuaren Testu Bategina, abuztuaren 30eko 251/1993 Legegintzako Foru Dekretuaren bidez onetsi zena, aipatu estatutua garatu eta burutzeko Sarrera Erregelamendua, gainerako aplikazio arauak eta deialdi honetako arauak.

1._Deialdiaren xedea.

1.1. Deialdi honen xedea da psikologo izateko 5 lanpostu oposizio bidez betetzea, funtzionarioen araubidekoak eta A mailakoak, Iruñean aritzekoak, txanda hauetan banatuak:

_2 lanpostu txanda irekian.

_3 lanpostu igoera txandan.

1.2. Hauek dira eskaintzen diren lanpostu hutsak:

_3 Nafarroako Administrazio Publikoaren Institutuan. Plantilla organikoko zenbakiak: 3760, 7451 eta 7452, Iruñean aritzekoak.

_2 Nafarroako Gizarte Ongizatearen Institutuan. Plantilla-zenbakiak: 3263 eta 7539. Destinoa Iruñean.

1.3. Igoera txandako lanpostuak hutsik geldituz gero, izangaiek hautapen probak gainditzeko behar den gutxieneko puntuazioa atera ez dutelako, txanda irekikoei gehituko zaizkie.

Bestaldetik, igoera txandan hutsik dauden lanpostuak baino izangai gehiagok gainditzen badute, txanda horretan lanpostuak eskuratzen ez dituztenek aukera izanen dute txanda irekiko lanpostu hutsak eskuratzeko, txanda horretako izangaiekin lehian eta eskuratutako azken puntuazioaren arabera.

Era berean, txanda irekiko lanpostuak eskuratzeko aukera izanen dute, aurreko lerroaldean adierazitako moduan, 7.2 atalean agiriak aurkezteko ezartzen den epea bukatzen denean deialdiko 2.1.2 arauko eskakizun berariazkoak betetzen ez dituzten igoera txandako izangaiek.

1.4. Lanpostuek A mailako lansariak izanen dituzte, uztailaren 4ko 158/1984 Foru Dekretuaren bidez onetsitako Lansarien Behin-behineko Erregelamenduan eta, kasuan kasu, aplikatu beharreko gainerako xedapenetan ezarritakoari jarraikiz.

1.5. Halaber, deialdi honen bidez hautaprobak gainditu bai baina lanposturik lortzen ez duten izangaiekin aldi baterako kontratatuak izateko izangaien zerrenda bat osatu nahi da, deialdi honetako 3., 10., 11. eta 12. arauetan xedaturikoarekin bat.

2._Betebeharrak.

2.1. Oposizio honetan onartuak izateko, izangaiek, eskabideak aurkezteko epea amaitzen den egunean eta agiriak aurkezteko epea amaitzen denetik (deialdiaren 7.2 atalean adierazia) lanpostuaren jabetza hartu arte, baldintza hauek bete beharko dituzte:

2.1.1. Izangai guztiek bete beharreko baldintzak:

a) Espainiarra izatea, edo Europar Batasuneko beste estatu batekoa, edo, Europar Batasunak izenpetu eta Espainiak berretsitako nazioarteko itunak direla medio, langileen zirkulazio librea aplikatzen den eremuko estatu batekoa.

Orobat, espainiarren eta Europar Batasuneko beste Estatuetako edo aipatu nazioarteko itunek ukitutako Estatuetako herritarren ezkontideek hartzen ahal dute parte, zuzenbidez bereizita ez badaude; halaber, haien ondorengoek eta ezkontidearenek, zuzenbidez bereizita ez badaude, 21 urtetik beherakoak badira, edo gorakoak, haien kontura biziz gero.

b) Adin nagusikoa izatea eta erretiroko adina ez izatea.

c) Psikologiako lizentziatura edo baliokidea izatea, edo eskaerak aurkezteko epea bukatzen den egunean titulu hori eskuratzeko moduan egotea.

Atzerrian lorturiko tituluak badira, homologazioaren egiaztagiria eduki beharko da.

d) Bete behar dituen eginkizunetan aritzeko adinako gaitasun fisiko eta psikikoa izatea.

e) Eginkizun publikoetan aritzeko desgaitu edo gabetua ez egotea eta administrazio publikoren baten zerbitzutik bereizia ez izatea.

Espainiako nazionalitatea ez duten izangaiek frogatu beharko dute beren estatuko funtzio publikoan sartzea eragozten dien diziplina zehapenik edo zigor penalik ez dutela.

2.1.2. Igoera txandako izangaiek bete beharreko baldintza berariazkoak.

Igoera txandako izangaiek, aurreko atalean adierazitako betebeharrez gain, hauek bete beharko dituzte:

a) Nafarroako edozein Administrazio Publikotako langile finkoa izatea, edo Nafarroako Foru Komunitateko Administrazioari transferitutako Justizia Administrazioaren zerbitzuei atxikitako langile finkoa, eta jatorrizko lanpostuan borondatezko edo nahitaezko eszedentzian ez egotea.

b) Deialdiko lanpostu hutsen maila berekoa edo apalagokoa izatea.

c) Administrazio Publikoetan bost urteko antzinatasun onartua izatea, Nafarroako Polizia Kidegoetako kideen kasuan izan ezik, horiek frogatu beharko baitute zortzi urtez eman dituztela zerbitzuak kidego horietan.

Nafarroako Administrazio Publikoetan lan egiten duten langileen Estatutuaren zortzigarren xedapen gehigarrian ezarri dena aplikatuz, igoera txandan esku hartzeko baldintzak betetzen dituzten Nafarroako Parlamentuko funtzionarioek ere txanda horretan parte hartzen ahalko dute.

2.2. Deialdiko 3.3 arauaren bigarren puntuan aipatzen den salbuespena salbuespen, izendatuak izateko proposatzen diren izangaiek deialdiko 7.2 atalean ezarritako epean eta moduan frogatu beharko dituzte betebehar horiek.

3._Eskabideak.

3.1. Deialdian parte hartzeko eskabideak Lehendakaritza, Justizia eta Barne Departamentuko Erregistro Orokorrean (Karlos III.aren etorbidea, 2, atalondoa, 31002 Iruña) edo erregistro horretako beste edozein bulegotan (zerrenda 2006ko 65. Nafarroako ALDIZKARI OFIZIALean argitaratu zen, maiatzaren 31n) aurkeztu beharko dira, edo, bestela, Herri Administrazioen Araubide Juridikoari eta Administrazio Prozedura Erkideari buruzko azaroaren 20ko 30/1992 Legeko 38.4 artikuluan adierazitako bideren bat erabiliz, deialdia Nafarroako ALDIZKARI OFIZIALean argitaratu eta biharamunetik 30 egun naturaleko epean.

Eskabidea posta bulego batean aurkeztuz gero, kartazal irekian eginen da, postako langileek, ziurtatu aurretik, data eta zigilua jar ditzaten.

Aipatu eskabideak deialdian argitaratutako ereduari lotuko zaizkio, eta bertan izangaiek deialdian eskatzen diren baldintza guztiak betetzen dituztela adierazi beharko dute. Eredua Nafarroako Gobernuaren Argibide Bulegoan eskuratu ahalko da edo interneteko www.navarra.es helbidean, dela deialdia argitaratu zen aldizkari ofizialetik abiatuta, dela Zerbitzuen Katalogoan, Lan Publikoaren atalean, deialdiaren aipamenetik abiatuta.

3.2. Ezgaitasun aitortua duten lehiatzaileek, ariketak egin ahal izateko denbora edo baliabideetan egokitzapenik behar badute, zilegi izanen dute eskabidean eskatzea, eta hartarako, aparteko orri batean adierazi beharko dute nolako ezgaitasuna duten eta zer egokitzapen eskatzen duten. Horrekin batera, legeen arabera ezgaitasunen bat dutela frogatzeko agiriaren kopia konpultsatua ere aurkeztu beharko dute, organo eskudunak emana.

3.3. Hautapen prozesuko ariketa guztiak gainditzen ez dituzten hautagaiekin zerrenda batzuk osatuko dira, ondoren aldi baterako kontratazioak egiteko. Horretarako, parte hartzaileek deialdiko eskabidean berean adierazi beharko dute kontratazio zerrendetatik zeinetan nahi duten sartu.

Xede horrekin, parte hartzaileek eskabidean agertzen diren kudeaketa esparruetako bakarra hautatu beharko dute, Nafarroako Osasun Zerbitzuko zerrendetan, Nafarroako Gizarte Ongizatearen Institutukoetan edo Nafarroako Foru Komunitateko Administrazioaren gainerako departamentu (Administrazio erroa) eta erakunde autonomokoetan sartuak izateko, Osasunbidea-Nafarroako Osasun Zerbitzuan izan ezik. Kudeaketa-esparru bat baino gehiago hautatzen bada, edo parte-hartzeko eskabidean ez bada atal hori betetzen, Administrazio-Erroko esparruko zerrenda bakarrik hautatzen dutela ulertuko da.

3.4. Eskabideari, behar bezala bete ondoren, agiri hauek erantsiko zaizkio:

Bat._Espedientea irekitzeko eta azterketa egiteko eskubidea izateko tasa, 25 eurokoa, pagatu dela frogatzen duen agiria. Azterketa egiteko eskubidea izateko tasa pagatu ezean, izangaia baztertuko da.

Prozedura hauetako bat erabiliz ordaintzen ahalko da tasa hori:

_Behar bezala betetako ordainketa gutuna erabiliz; Foru Komunitateko Administrazioak Nafarroako finantza entitateetan dituen kontuetako batean dirua sartu dela frogatuko da. Arestian aipatutako webgunean, deialdiaren iragarkian, ordainketa gutunaren eredua ageri da.

_Sarrera eskudirutan edo bankuko transferentzia bidez eginez, Banestoko (Banco Español de Crédito) 00308124 87 0870002271 kontuan; horrelakoetan ordainagirian datu hauek jarri beharko dira nahitaez:

-Izangaiaren izen-deiturak.

-NAN/IFZ.

-Ordainketa zein kontutan egiten den, haren zenbakia.

-Kontzeptua: oposizioak.

-Deialdiaren xede den lanpostua.

Honako hauek ez dute tasarik ordaindu beharko:

a) %33ko edo gehiagoko ezgaitasun aitortua dutela frogatzen duten pertsonek, organo eskudunak luzaturiko jatorrizko agiriaren edo behar bezala konpultsaturiko fotokopiaren bidez.

b) Hautaproben deialdia egin aurretik hilabete batez edo luzaroago lan-eskatzaile gisa inskribaturik egon diren pertsonak. Salbuespen hori aplikatzeko baldintza izanen da inskribaturik egon diren bitartean eskainitako inolako lan egokiri uko egin ez izana eta lanbide sustapen, prestakuntza edo aldaketarako ekintzetan parte hartzeari uko egin ez izana, justifikaturiko kasuetan izan ezik, eta, horrez gainera, lanbide arteko gutxieneko soldatatik gorakoa den dirusarrerarik ez izatea hilabetero.

Lan-eskatzailea dela frogatzeko, Enplegu Bulegoak emandako agiria aurkeztu beharko da. Bertan, lan-eskatzaile gisa inskribatu zeneko data agertuko da eta, orobat, adieraziko da inskribaturik egon den bitartean ez diola uko egin handik eskainitako inolako lan egokiri, ez eta lanbide sustapen, prestakuntza edo aldaketarako ekintzetan parte hartzeari ere, justifikaturiko kasuetan izan ezik.

Hilero lanbide arteko gutxieneko lansaritik gorako errentarik ez duela interesatuaren adierazpenaren bidez frogatuko da. Adierazpenaren eredua Nafarroako Gobernuko Informazio Bulegoan eskuratzen ahalko da, edo bestela Interneten, arestian emandako webgunean.

Bi._Deialdian igoera txandan parte hartu nahi duten izangaiek, Nafarroako Foru Komunitateko Administrazioa ez den Nafarroako beste Administrazio Publiko bateko langile finkoak badira, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finkoak, lehengoaz gainera, deialdi honetako 2.1.2 arauan jasotzen diren eskakizunak betetzen dituztela frogatzen duen agiria gehitu beharko diote eskabideari.

3.5. Eskabideak aurkezteko epea ezin izanen da luzatu.

3.6. Eskabidean atzematen diren akats materialak edo egitezkoak ofizioz edo interesatuak eskaturik zuzentzen ahalko dira, noiznahi ere.

4._Izangaien onarpena eta erreklamazioak.

4.1. Eskaerak aurkezteko epea bukaturik, Funtzio Publikoaren zuzendari nagusiak ebazpena emanen du izangai onartu eta baztertuen behin-behineko zerrenda onesteko, eta Nafarroako ALDIZKARI OFIZIALean argitara dadila aginduko du.

4.2. Izangai baztertuek hamar egun balioduneko epea izanen dute, behin-behineko zerrenda Nafarroako ALDIZKARI OFIZIALean argitaratzen denetik, erreklamazioak aurkezteko eta, akatsik egin badute, zuzentzeko.

4.3. Erreklamazioetarako epea bukatutakoan eta horiek ebatzita, Funtzio Publikoaren zuzendari nagusiak onartu eta baztertuen behin betiko zerrenda onesten duen ebazpena emanen du, eta Nafarroako ALDIZKARI OFIZIALean argitara dadila aginduko.

4.4. Izangaiei egotziriko arrazoiengatik baztertzen direnei ez zaizkie azterketa egiteko eskubideak itzuliko.

5._Epaimahaia.

5.1. Epaimahaiak kide hauek izanen ditu:

_Mahaiburua: Ramón Loitegui Aldaz jauna, Nafarroako Administrazio Publikoaren Institutuko Prestakuntza eta Psikologia Zerbitzuko zuzendaria.

_Ordezkoa: Jesús Menéndez Barrero jauna, Nafarroako Administrazio Publikoaren Institutuko Prestakuntza Ataleko burua.

_Mahaikidea: Miguel Echániz Goñi jauna, Gizarte Ongizate, Kirol eta Gazteria Departamentuari atxikitako psikologoa.

_Ordezkoa: José Manuel Nava jauna, Gizarte Ongizate, Kirol eta Gazteria Departamentuari atxikitako psikologoa.

_Mahaikidea: Joseba Cerrillo Bilbao jauna, Nafarroako Gizarte Ongizate Zerbitzuari atxikitako psikologoa.

_Ordezkoa: María José Olite Merino andrea, Nafarroako Gizarte Ongizatearen Institutuari atxikitako psikologoa.

_Mahaikidea: Administrazio Erroko Langileen Batzordearen ordezkari bat, batzordeak berak proposatua.

_Ordezkoa: Administrazio Erroko Langileen Batzordearen ordezkari bat, batzordeak berak proposatua.

_Mahaikide idazkaria: Alvaro Martínez Fernández jauna, Nafarroako Administrazio Publikoaren Institutuko Prestakuntza eta Hobekuntza Ataleko burua.

_Ordezkoa: Emilia Carrascosa Martín andrea, Nafarroako Administrazio Publikoaren Institutuari atxikitako psikologoa.

Epaimahaia hautaprobak hasi baino lehen eratuko da.

5.2. Epaimahaia ezin izanen da eratu, ezta aritu ere, kideen gehiengo osoa bertan izan gabe.

Organo kolegiatuaren eraketak eta jardunak balio izateko, mahaiburuak eta mahaikide idazkariak edo haien ordezkoek bertan egon beharko dute.

5.3. Epaimahaiko kideek ez dute parte hartuko, eta organo dei egileari horren berri emanen diote, Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legean parte ez hartzeko aipatzen diren egoeretakoren batean baldin badaude.

Izangaiek, halaber, zilegi dute mahaikideak errefusatzea, egoera horietako bat gertatzen denean.

5.4. Epaimahaiak gehiengoz erabakiko ditu deialdiaren oinarriak ulertu eta aplikatzeko moduaren inguruan sortzen diren arazo guztiak.

5.5. Epaimahaiak aholkulari adituen laguntza eskatzen ahalko du proba batzuetarako edo guztietarako. Aholkulari horiek beren espezialitate teknikoan aritzera mugatuko dira eta haietan soilik emanen diote laguntza epaimahaiari.

6._Oposizioaren nondik norakoak.

6.1. Oposizioa 2007ko irailean hasiko da. Onartu eta baztertuen behin betiko zerrenda onesten duen ebazpenean berean zehaztuko da ariketak non, noiz eta zer ordutan hasiko diren.

Ondoren, epaimahaiak gainerako probak egiteko iragarkiak jakinaraziko ditu, arauz egin behar den moduan.

6.2. Oposizioak ariketa hauek izanen ditu:

Lehena._Teorikoa. Deialdiko gai zerrendako gaiei buruzko 50 galdera (II. eranskina) idatziz erantzutea. Galdera bakoitzarentzat erantzun batzuk emanen dira aukeran, baina bat bakarra izanen da egokia. Ariketa hau egiteko, 2 ordu utziko dira gehienez.

Bigarrena._Praktikoa, non ebatzi beharko dira idatziz gai zerrendaren bigarren zatiko gaiez epaimahaiak proposatuko dituen kasu praktiko bat edo gehiago.

Hirugarrena._Psikoteknikoa: zenbait proba eginen dira neurtzeko oposiziogileak noraino egokitzen diren deialdi honetako helburu diren lanpostuen profil profesiografikora. Proba Nafarroako Administrazio Publikoaren Institutuak eginen du, eta emaitzak lotesleak izanen dira epaimahai kalifikatzailearentzat.

6.3. Oposizioko ariketen balorazioan 50 puntu eman daitezke gehienez ere, honela banatuak:

Lehena: Gehienez 25 puntu.

Bigarrena: Gehienez 15 puntu.

Hirugarrena: Gehienez 10 puntu.

Bigarren ariketa plika sistemaren bidez eginen da.

6.4. Oposizioko ariketak baztertzaileak izanen dira, eta prozesutik kanpo geldituko dira ariketa bakoitzean puntuen erdiak lortzen ez dituzten izangaiak.

6.5. Ariketak zuzendu ondoren, epaimahaiak jendaurrean jarriko du, Nafarroako Gobernuaren iragarki oholean eta ariketa egin den tokian, gainditu duten izangaien zerrenda, lortutako kalifikazioekin eta, halaber, oposizioaren hurrengo proba edo ariketa egiteko tokia, eguna eta ordua, gutxienez 48 ordu lehenago.

6.6. Ariketa bakoitzerako dei bakarra eginen da. Izangaiek Nortasun Agiri Nazionala, gidabaimena edo pasaportea eraman beharko dute. Oposiziotik kanpo geldituko dira agertzen ez direnak edo nortasuna aipatutako agirien bidez frogatzen ez dutenak.

6.7. Hautaprobak egiteko, ezgaitasun aitorturen bat dutenentzat bidezkoak diren denbora eta baliabide egokitzapenak eginen dira, eskabidean azaldutakoaren arabera.

7._Probak gainditu dituztenen zerrenda, izendapen proposamena eta agirien aurkezpena.

7.1. Hautaprobak amaiturik, epaimahaiak jendaurrean jarriko du probak gainditu dituztenen zerrenda, oposizioan lortutako kalifikazioekin, Nafarroako Gobernuaren iragarki oholean. Gero, zerrenda hori Funtzio Publikoaren zuzendari nagusiari igorriko dio, deialdiko lanpostuen kopuruaren barruan sartzen diren eta probak puntuazio altuenekin gainditu dituzten izangaiak izendatzeko proposamenarekin eta espediente osoarekin batera. Proposamena Nafarroako ALDIZKARI OFIZIALean argitaratuko da.

Berdinketarik gertatuz gero, lehen ariketan puntu gehien lortu dutenen alde ebatziko da. Eta hala ere berdinduta segitzen badute, bigarren ariketan lortutako puntuazioa hartuko da kontuan.

7.2. Izendapen proposamena Nafarroako ALDIZKARI OFIZIALean argitaratu ondoko 30 egun naturaleko epean, proposatutako izangaiek inprimaki berariazko batzuk jaso eta honako agiri hauek aurkeztu behar dituzte Funtzio Publikoaren Zuzendaritza Nagusian:

7.2.1. Nafarroako Foru Komunitateko Administrazioaren eta haren erakunde autonomoen zerbitzuko langile finko ez diren izangaiak:

a) Nortasun Agiri Nazionalaren bi fotokopia konpultsatu, edo izangaiaren nazionalitatea eta nortasuna frogatzen dituen beste agiri baliokideren batenak.

b) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

c) Laneko Arriskuei Aurrea hartzeko Atalak emandako txostena, interesatuak karguan aritzea eragotziko liokeen eritasun edo akats fisiko edo psikikorik ez duela frogatzeko.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

d) Eginkizun publikoetarako ezgaitua edo gabetua ez izatearen eta inongo administrazio publikoren zerbitzutik bereizia ez izanaren zinpeko aitorpena.

Izangaiek Espainiako nazionalitatea ez badute, agiria aurkeztu beharko dute, beren Estatuko Funtzio Publikoan sartzea eragozten dien diziplina zehapenik edo zigor penalik ez dutela adierazteko.

e) Zin egin edo hitz ematea, Nafarroako Foru Eraentza errespetatu, Konstituzioari eta legeei men egin eta karguari dagozkion eginkizunak zuzen beteko dituela.

f) Funtzio Publikoaren Zuzendaritza Nagusiak eskatzen dizkion gainerako agiriak.

Deialdi hau egin ez duen Nafarroako beste Administrazio Publikoren bateko langile finko, edo Nafarroako Foru Komunitateari eskualdatutako Justizia Administrazioko zerbitzuei atxikitako langile finko diren izangaiek, gainera, aurreko administrazioko espediente pertsonalean ageri diren inguruabar eta aurrekari guztiak frogatzen dituen ziurtagiria aurkeztu beharko dute, hots, sarrerari, antzinatasunari, mailari, egoera administratiboari eta abarrei buruzkoa.

7.2.2. Nafarroako Foru Komunitateko Administrazioaren edo haren erakunde autonomoen zerbitzuko langile finkoak diren izangaiak:

a) Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, eskabideak aurkezteko epean titulua eskuratzeko moduan dagoela frogatzen duen ziurtagiria.

b) Funtzio Publikoaren Zuzendaritza Nagusiak eskatzen dizkion gainerako agiriak.

Ezgaitasunen bat alegatu duten izangaiek, gainera, ezgaitasuna deialdiko lanpostuarekin bateragarria dela dioen frogagiria aurkeztu beharko dute, balorazio eta orientazio talde eskudunek emana.

7.3. Aipatu epearen barrenean, eta aski justifikaturik dauden ezinbertzeko kasuak salbuetsiz, arestiko agiriak aurkezten ez dituztenak ezin izanen dira izendatu, eta ordura arteko egintza guztiak baliorik gabe geldituko dira, euren eskabidearen faltsukeria dela eta, legokiekeen erantzunbeharra galarazi gabe.

7.4. Aurreko atalean aurreikusitakoa gertatuz gero, Funtzio Publikoaren zuzendari nagusiak probak gainditu dituztenen zerrendan, 7.1 atalean aipatutakoan, hurrengoa den izangaiarekin beteko du baja, eta horrekin ere aurreko ataletan adierazitako moduan jokatuko da.

8._Lanpostu hutsak hautatzea.

8.1. Aurreko arauan xedatu dena betetzen duten lehiatzaileek Funtzio Publikoaren Zuzendaritza Nagusiak hartarako jartzen dien epean aditzera eman beharko dute eskaintzen zaizkien lanpostuetatik zein hautatzen duten. Aukeratu beharreko lanpostuak hasieran deitutakoak izanen dira, edo beste batzuk, zerbitzuaren beharrei jarraikiz horiek aldatzea erabakitzen bada.

8.2. Hautaprobak igoera txandaren bidez gainditzen dituzten izangaiek, 8.3 ataleko bigarren lerroaldean aipatutako kasuan izan ezik, lehentasuna izanen dute deialdiko lanpostu hutsak aukeratzerakoan, txanda horretakoak ez diren izangaien aurretik.

8.3. Lanpostu hutsak aukeratzeko orduan, %33ko ezgaitasun aitortua edo handiagoa duten izangaiek lehentasuna izanen dute txanda irekiko izangaien aurretik.

Ezgaitasuna duen izangairik bada, eta horrek eragina badu lanpostu bat edo bestea hautatzeko, aukeratzen hasi aurretik, ezgaitasunarekin hobekien egokitzen direnak esleituko zaizkie, horren gainean balorazio eta orientazio talde eskudunek egindako txostenaren arabera.

9._Izendapena, lanpostuen esleipena eta jabetza hartzea.

9.1. Funtzio Publikoaren zuzendari nagusiak, ebazpen baten bitartez, aurreko arauetan ezarritakoa betetzen duten izangaiak Nafarroako Foru Komunitatearen Administrazioko funtzionario izendatuko ditu, psikologo lanetan aritzeko. Ebazpen horren bidez lanpostuen esleipena ere eginen da.

9.2. Izendapenak eta lanpostuaren jabetza hartzeak nomina eta plantillako funtzionario bilakatuko dituzte izendatuak, indarra duten xedapenek ezartzen dituzten eskubide eta betebehar guztiak dituztela. Gizarte Segurantzako araubide orokorrean inskribatu eta kidetuko dira, araubide horretan aurreikusitakoaren babesean.

Aurrekoa gorabehera, Nafarroako Administrazio Publikoen Zerbitzuko Langileen Estatutua onetsi zuen abuztuaren 30eko 251/1993 Legegintzako Foru Dekretuaren bederatzigarren xedapen gehigarriaren 3. puntuan xedatutakoa aplikatzearen ondorioz, Nafarroako administrazio publikoen edozein mutualitatetako eskubide pasiboen araubidekoak direnen kasuan, bi aukera izanen dituzte: Nafarroako Foru Komunitateko Administrazioko mutualitatean segitzea, martxoaren 5eko 10/2003 Foru Legearen bidez arauturiko eskubide pasiboen araubideak babesturik, edo Gizarte Segurantzaren Araubide Orokorrean sartzea.

9.3. Izendatutako izangaiek lanlekua duten herrian bertan bizi beharra dute, eta hori betetzeko udalerri horretan finkatuko dute beren bizilekua. Administrazio organo eskudunek destinoa aldatzen ahalko dute, aplikatzekoa den arautegian ezarritakoarekin bat.

9.4. Lanaldia zerbitzuaren beharretara egokituko da eta noiznahi aldatzen ahalko dute administrazio organo eskudunek, aplikatzekoa den araudian ezarritakoarekin bat.

9.5. Izendapena Nafarroako ALDIZKARI OFIZIALean argitaratuko da eta izangai izendatuak hilabeteko epean jabetu beharko du bere lanpostuaz, izendapenaren jakinarazpenetik kontatzen hasita.

Epe horretan, eta ezinbesteko kausarik ezean, lanpostuaz jabetzen ez badira, Foru Komunitateko Administrazioko funtzionario izateko eskubide oro galduko dute, eta 7.4 atalean azaldu dena eginen da.

9.6. Izangai bat funtzionario bihurtu eta lanpostuan batere aritu gabe zuzenean eta berak eskatuta borondatezko eszedentzia ematen bazaio jabetza hartzearen egunetik bertatik, data horretan beste Administrazio Publiko batean ari delako, kasuko lanpostu hutsa ere beteko da deialdiko 7.4 atalak agintzen duen moduan.

9.7. Aurreko bi ataletan aipatutako kasuetan, izendapena egin aurretik hautaturiko lanpostua ez da aldatuko. Beraz, funtzionario berriei, zuzenean, egoera horien ondoriozko lanpostuak esleituko zaizkie.

10._Aldi baterako kontratuetarako izangaien zerrenda.

10.1. Nafarroako Administrazio Publikoan sartzeko Erregelamenduaren 42. artikuluan, lanpostuak aldi baterako betetzeko kudeaketa arauak onetsi zituen Lehendakaritza, Justizia eta Barne kontseilariaren azaroaren 14ko 146/2005 Foru Aginduan eta arau honexetan ezarritako prozedurari jarraikiz, aldi baterako kontrataziorako izangaien zerrenda hauek sortuko dira:

_Probak gainditu bai baina lanposturik lortu ez duten izangaien zerrenda, bat bera Foru Komunitateko Administrazioko departamentu eta erakunde autonomo guztientzat.

_Hautapen prozesuko ariketa guztiak gainditu ez dituzten izangaien zerrenda, parte hartzeko eskabidean aukeratutako esparruaren arabera.

10.2. Probak gainditu bai baina lanposturik lortu ez duten izangaien zerrendak.

Probak gainditu arren lanposturik lortu ez duten izangaiekin Funtzio Publikoaren Zuzendaritza Nagusiak zerrenda bat osatuko du, ondoren aldi baterako kontratazioak egiteko, deialdi honetako 11. arauan ezarritako prozedurari jarraikiz. Lehendakaritza, Justizia eta Barne kontseilariaren azaroaren 14ko 146/2005 Foru Aginduan xedatutako arauen arabera kudeatuko du.

Halaber, zerrenda hori Nafarroako Gizarte Ongizatearen Institutuko organo eskudunei igorriko die, erakunde autonomo horretako arauei jarraikiz kudea dezaten.

10.3. Hautapen prozesuko ariketa guztiak gainditzen ez dituzten izangaiak.

Deialdiko hamaikagarren arauan ezarritako prozedurarekin bat, Funtzio Publikoaren Zuzendaritza Nagusiak aldi baterako kontratazioak egiteko izangaien zerrenda bat osatuko du, deialdiko azken-aurreko ariketa gainditu eta Administrazio Erroko zerrenda hautatu duten izangaiekin.

Era berean, Nafarroako Gizarte Ongizatearen Institutuak Osasunbidea-Nafarroako Osasun Zerbitzuko organo eskudunei igorriko die hautapen prozesuko ariketa guztiak gainditu ez eta esparru horretako kontratazio-zerrendak aukeratu dituztenen zerrenda, aldi baterako kontratazioetarako, deialdi honetako 12. arauan ezarritako prozedurari jarraikiz.

11._Administrazio-erroan aldi baterako kontratatzeko izangaien zerrendak osatzeko prozedura.

11.1. Epaimahaiaren espedientea jasota, Funtzio Publikoaren zuzendari nagusiaren ebazpen baten bidez, hautapen prozesua gaindituta ere lanposturik gabe gelditu diren izangaiei eta deialdian ezarritako azken-aurreko ariketa gainditu eta Administrazio Erroko kontratazio zerrenda aukeratu dutenei hamar egun balioduneko epea emanen zaie, ebazpena argitaratu eta biharamunetik hasita, ondoko dokumentazio hau aurkezteko:

Deialdiko 2. arauan eskatzen den tituluaren fotokopia konpultsatua, lortzeko eskubideak pagatu direla frogatzen duen gordekinarena edo, hala bada, sartzeko prozesuan parte hartzeko eskabideak aurkezteko epean titulua eskuratzeko moduan egoten dela frogatzen duen ziurtagiria.

Ebazpen hau Nafarroako ALDIZKARI OFIZIALean argitaratuko da, eta langileen zerrendak Nafarroako Gobernuko iragarki-oholean (Karlos III.aren etorbidea, 2, atalondoa, Iruña).

Eskatzen diren agiriak aipatu epean aurkezten ez dituztenak (aski justifikatutako ezinbesteko kasuetan izan ezik) eta eskatutako baldintzak betetzen ez dituztenak ez dira sartuko aldi baterako kontratuetarako izangaien zerrendan, eta deialdian parte hartzeagatiko eskubide guztiak galduko dituzte, deusetan ukatu gabe, betiere, parte hartzeko eskabidea faltsutzeagatik legokiekeen erantzukizuna.

11.2. Sarrera prozedurako eskabideak aurkezteko epea bukatzen den egunerako bete beharko dira baldintzak, eta hautaprobek dirauteino eta kontratazioaldiak iraun bitarte bete beharko dira.

11.3. Dokumentazioa aurkezteko epea bukaturik, Funtzio Publikoaren zuzendari nagusiaren ebazpen baten bidez, aldi baterako kontratuetarako izangaien zerrenda hauek onetsiko dira eta Nafarroako Gobernuaren iragarki-oholean argitaratuko (Karlos III.aren etorbidea, 2, atalondoa, Iruña):

a) Probak gainditu bai baina lanposturik lortu ez duten izangaien zerrenda.

b) Deialdiaren azken-aurreko ariketa gainditu bai baina lanposturik gabeko gaindituen artean ez daudenen eta Administrazio Erroko kontratazio zerrendak hautatu dituztenen zerrenda.

11.4. Aldi baterako kontratuetarako zerrendetan, izangaien hurrenkera hauxe izanen da: gainditu bai baina lanposturik lortu ez dutenen kasuan, hauta-probetan lortutako puntuazioaren araberakoa, eta gainerakoen kasuan, gainditutako ariketetako puntuazioen batuketaren araberakoa.

12._Nafarroako Gizarte Ongizatearen Institutuan aldi baterako kontratatzeko izangaien zerrendak osatzeko prozedura.

Funtzio Publikoaren Zuzendaritza Nagusiak probak gainditu bai baino lanposturik lortu ez dutenen zerrendak eta hautapen prozesuko ariketa guztiak gainditu ez eta esparru horretako kontratazio-zerrendak aukeratu dituztenenak igorri ondoren, Nafarroako Gizarte Ongizatearen Institutuko organo eskudunek beren kudeaketa esparruko aldi baterako kontratazioetarako izangaien zerrendak onetsiko dituzte, erakunde autonomo horretan 2000ko urtarrilaren 17ko Akordioan aldi baterako kontratazioetarako langile zerrenden kudeaketari buruz ezarritakoarekin bat.

Horretarako, Nafarroako Gizarte Ongizatearen Institutuak hamar egun balioduneko epea emanen die interesatuei, zentroa edo eskualdea hautatu eta aipatu erakunde autonomoak zehazten dituen gainerako inguruabarrak betetzeko.

Arau horren arabera osatzen diren zerrendak Nafarroako Gizarte Ongizatearen Institutuak kudeatuko ditu, aldi baterako langileen zerrendak kudeatzeko 2000ko urtarrilaren 17ko Akordioan ezarritakoari jarraikiz.

13._Errekurtsoak.

Epaimahaiak ematen dituen egintza eta ebazpenen kontra gora jotzeko errekurtsoa paratzen ahal da Funtzio Publikoaren zuzendari nagusiari zuzenduta, errekurtsoaren xede den egintza argitaratu edo jakinarazi eta biharamunetik hilabeteko epean.

Deialdi honen eta bere arauen kontra eta arauak aplikatzeko egintzen kontra, epaimahaiak hartutakoen kontra izan ezik, zilegi izanen da gora jotzeko errekurtsoa jartzea, Lehendakaritza, Justizia eta Barne kontseilariari zuzendua, hilabeteko epean, errekurritu nahi den egintza argitaratu edo jakinarazi eta biharamunetik kontatuta.

Hori guztia Nafarroako Foru Komunitateko Administrazioari buruzko abenduaren 3ko 15/2004 Foru Legearen 57. artikuluarekin bat, eta urtarrilaren 13ko 4/1999 Legeak aldatutako Herri Administrazioen Araubide Juridikoari eta Administrazio Prozedura Erkideari buruzko azaroaren 26ko 30/1992 Legearen 114. eta 115. artikuluei jarraikiz.

Iruñean 2006ko azaroaren 13an. Funtzio Publikoaren zuzendari nagusia, Alberto Andérez González.

I. ERANSKINA

Eskabidea

........................ jaun/andrea, adin nagusikoa, ...... Nortasun Agiri Nazionalaren (edo baliokidea den nortasun agiriaren) jabe, ..........(e)n (............) ......(e)ko ............aren ......(e)an jaioa, .........(e)ko nazionalitatea duena, helbidea ...........(e)ko (........) ......... kalean, ........... posta kodea, eta etxean ....... telefonoa eta lantokian ....... telefonoa dituena,

Honako hau azaltzen dut:

Nafarroako Foru Komunitateko Administrazioaren ea haren erakunde autonomoen zerbitzuko .............. izateko ................. lanpostu ....................bidez betetzeko deialdian parte hartzeko onartua izatea eskatzen duela, aipatu txandan (deialdia ...... zenbakiko Nafarroako ALDIZKARI OFIZIALean argitaratu zen, .........(e)an).

f Txanda irekia.

f Igoera txanda*

f Ezgaitasunen bat dutenendako txanda*

Hautaprobak gainditzen ez baditut, lanpostuak behin-behinekoz betetzeko aukeraz baliatu nahi dudala, honako esparruotako batean:

f Administrazio erroa*

f Osasunbidea-Nafarroako Osasun Zerbitzua*

f Nafarroako Gizarte Ongizatearen Institutua*

(Esparruetako bakar bat aukeratu daiteke)

Ez dudala karguan aritzea galarazten didan eritasunik edo akats fisikorik nahiz psikikorik.

Indarra duten xedapenetan ezarritako ezintasunik ez dudala.

Ez naizela diziplinako espediente bidez ezein administrazio publikoren zerbitzutik kanpo utzia izan eta ez nautela eginkizun publikoak betetzeko gaitasunik gabe utzi.

Deialdian eskatzen den titulazioaren jabe naizela.

Azterketa eskubideak ordaindu ditudala deialdian ezarritako moduan eta horren gordekina erantsi dudala, edo erantsitako agirien bidez frogatzen dudala tasa ordaintzetik salbuetsita nagoela.

Eskabideak aurkezteko epearen azken egunean beharkizun guztiak betetzen ditudala.

Ezgaitasuna dudala eta, beraz, azaltzen den egokitzapena eskatzen dudala, adierazten diren arrazoiengatik (beste orri batean azaldu behar dira eskatzen diren egokitzapenak eta haietarako arrazoiak).

Ezgaitasuna frogatzen duen agiria aurkezten dudala, erakunde eskudun batek emana.

Euskararen gaitasunaren agiria edo ofizialki baliokidea den beste titulu bat aurkezten dudala*

Euskara maila jakiteko proba egitea eskatzen dudala*

Frantseseko eta ingeleseko nahikotasun frogak egitea eskatzen dudala.*

Horrenbestez,

Eskabide hau ontzat hartu eta aipatu deialdian onartua izatea eskatzen dut.

Iruñean, 200..ko .............aren ............(e)an.

(Sinadura)

NAFARROAKO GOBERNUA. LEHENDAKARITZA, JUSTIZIA ETA BARNE DEPARTAMENTUA. FUNTZIO PUBLIKOAREN ZUZENDARITZA NAGUSIA.

(*) Bidezkoa bada.

Datu Pertsonalak Babesteko abenduaren 13ko 15/99 Lege Organikoan xedatutakoa betez, jakinarazten da agiri honetan ageri diren datuak eta administrazioarekin etorkizunean izan daitekeen zerbitzu harremena kudeatzeko beharrezkoak diren gainerako guztiak datuen fitxategi automatizatu batean sartuko direla. Nafarroako Gobernuko Funtzio Publikoaren Zuzendaritza Nagusia da fitxategi horren erantzulea, eta datuen konfidentzialtasuna bermatzen du. Datuen titularrari jakinarazten zaio datu pertsonalen tratamendua eskuratu, zuzendu, ezabatu eta haren aurka jotzeko eskubidea erabiltzen ahal duela, datuak babesteko indarra duen araudiarekin bat.

II. ERANSKINA

Gai zerrenda

Lehen zatia.

1. gaia._Espainiako 1978ko Konstituzioa. Estatuko aginteak. Koroa. Gorte Nagusiak. Gobernua eta Administrazioa. Botere judiziala Konstituzioan.

2. gaia._Zuzenbide Publikoaren iturburuak: legeak eta horien motak. Lege-Dekretuak. Legegintzako Foru Dekretuak. Nazioarteko itunak.

3. gaia._Administrazio Zuzenbidearen iturburuak: erregelamendua eta erregelamendu-ahalmena. Erregelamendu motak. Erregelamendu-ahalmenaren mugak eta haren kontrola.

4. gaia._Administrazio egintza (I): kontzeptua, motak eta osagaiak.

5. gaia._Administrazio egintza (II): administrazio egintzen baldintzak, eraginkortasuna, deuseztasuna eta deuseztagarritasuna.

6. gaia._Administrazio prozedura erkidea (I): kontzeptua eta izaera. Hasiera, antolamendua, instrukzioa eta bukaera.

7 gaia._Administrazio prozedura erkidea (II): Administrazioarekiko errekurtsoak: printzipio orokorrak eta motak.

8. gaia._Nafarroako Parlamentua edo Gorteak. Osaera, antolakuntza eta eginkizunak.

9. gaia._Nafarroako Gobernuari eta lehendakariari buruzko Foru Legea.

10. gaia._Nafarroako Foru Komunitateko Administrazioari buruzko Foru Legea.

11. gaia._Nafarroako Foru Komunitateko Arartekoa. Comptos Ganbera. Nafarroako Kontseilua.

12. gaia._Nafarroako Administrazio Publikoen zerbitzuko Langileen Estatutua (I): langile motak. Funtzionario publikoen hautapena. Funtzionario izaera eskuratu eta galtzea.

13. gaia._Nafarroako Administrazio Publikoen zerbitzuko Langileen Estatutua (II): karrera administratiboa. Egoera administratiboak. Lanpostuak betetzea. Ordainsariak.

14. gaia._Nafarroako Ogasun Publikoaren Araubidea: Nafarroako Ogasun Publikoa: eskubide eta betebeharrak. Nafarroako aurrekontu orokorrak: edukia eta onespena; gastuen sailkapen ekonomikoa; betearaztea eta likidazioa.

15. gaia._Kontratu publikoei buruzko Foru Legea. Aplikazio eremua. Nafarroako Administrazio Publikoen kontratuei buruzko arau orokor eta komunak. Kontratazio organoak. Kontratuak esleitu, betearazi eta berrikusteko arau orokorrak. Kontratu motak eta haien definizioak.

16. gaia._Datu pertsonalak babesteko Lege Organikoa; datuak babesteko printzipioak; pertsonen eskubideak.

Bigarren zatia.

1. Gaia._Ikerketa psikologikoaren eredu orokorra. Maila teoriko-kontzeptuala. Maila metodologikoa. Maila analitiko-estatistikoa.

2. gaia _Metodologia kuantitatiboak ikerketa psikologikoan. Zorroztasun zientifikoa ikerketa kualitatiboan.

3. gaia._Ikerketa-metodoak psikologia sozialean. Teknika kuantitatibo eta kualitatiboak.

4. gaia._Estatistika. Kontzeptu nagusiak. Estatistika deskriptiboa. Estatistika inferentziala. Metodo estatistikoak.

5. gaia._Inkesta. Posibilitateak eta mugak datu-bilketarako teknika gisa. Aplikazio eremuak. Galde-sorta prestatzea. Galde-sortaren gidagarritasuna eta baliozkotasuna.

6. gaia._Hiriko soziologia. Hiriko bizimoduak eta gizarte mugimenduak.

7. gaia._Talde portaerak eta gizarte gatazkak.

8. gaia._Talde portaerak. Masentzako hedapena: propaganda, iritzi publikoa, zurrumurruak.

9. gaia._Portaera bortitzak masa-fenomenoetan. Kausak eta jardunbideak.

10. gaia_Gizarte talde baztertuak. Etorkinak, etxegabeak, beste batzuk.

11. gaia._Psikologia soziala eta gizartearen adimen osasuna. Teoria eta praktika.

12. gaia._Nafarroako Gizarte Zerbitzuetako Laguntza Komunitarioaren Planerako Oinarrien Agiria.

13. gaia._Talde multidisziplinarra Gizarte Zerbitzuen laguntzan.

14. gaia._Gizarte zerbitzuetan esku-hartzeko programetarako informazio, plangintza eta ebaluazio sistemak.

15. gaia._Gizarterako trebetasunen eta autoestimaren garapena.

16. gaia.-Sentiberatze eta prebentzio programak prestatzea.

17. gaia._Psikologoaren eginkizuna zuzeneko laguntzako profesional / ez-profesionalekin.

18. gaia_Familia, haurren eta nerabeen garapena, sozializazio prozesuak. esku-hrtze psikologikoa.

19. gaia._Gizarteratze prozesuak eta gizartetik baztertzekoak. Esku-hartze psikologikoa.

20. gaia._Hirugarren adina, ezgaitasuna eta menpekotasuna. Esku-hartze psikologikoa.

21. gaia._Ebaluazio psikologikoa adingabeei egindako sexu-abusuen prozeduretan.

22. gaia._Haurrei emandako tratu txarrak eta babesgabetasuna. Haurren babesgabetasunaren tipologiak. Haurren babesgabetasun egoeren arrisku-eragileen azalpen etiologikoak. Esku-hartze ereduak.

23. gaia._Familia-abegia. Motak esa sailkapena. Irizpideak eta aholkuak. Ondorio psikologikoak eta sozialak adingabearengan. Adopzioa: egungo joerak adopzioan. Ondorio psikologikoak eta sozialak adingabearengan. Haurraren egokitzapena. Egokitzapenaren jarraipena eta arazoak. Etenaren arriskuak eta haien prebentzioa.

24. gaia._Substantzien kontsumoa. Arrisku-eragileak eta babes-eragileak. Sustrai psikosozialak. Ebaluazioa eta esku-hartzea.

25. gaia._Alkoholismoa eta tabakismoa. Alderdi klinikoak. Tratamendua.

26. gaia_Ludopatia. Menpekotasuna eta teknologia berriak. Kirola egin beharrarekiko menpekotasuna. Esku-hartze ereduak.

27. gaia._Auzitegi-psikologiako metodologia orokorra. Tutoretza edukitzeko gaitasuna erabakitzeko peritaje psikologikoa.

28. gaia._Bitartekotza. Alderdi orokorrak eta aplikazio eremuak.

29. gaia._Auzitegiko psikologoaren lan-teknikak: auzitegi-formulazioa.

30. gaia._Lekukotzaren psikologia. Estresa poliziaren lanean.

31. gaia_Biktimen eta abusatzaileentzako esku-hartze programak.

32. gaia._Genero-indarkeriari aurrez igartzeko faktoreak. Genero-tratu txarren ondorio psikologikoak.

33. gaia._Esku-hartze psikologikoa naturako krisi eta hondamendiek sortutako egoeretan.

34. gaia._Persona erasokor edo indarkeriazalearen tratabidea.

35. gaia._Zirkulazio/ arma/ animalia arriskutsuak edukitzeko baimenak eskuratu/berritzeko gai ez diren pertsonei nola igarri.

36. gaia._Prebentzio primario, sekundario eta tertziarioa. Osasunaren sustapena. Psikohezkuntzako programak prestatzea.

37. gaia._Ebaluazio psikologikorako teknikak. Testak eta eskalak. Elkarrizketa psikologikoa. Harreman terapeutikoa.

38. gaia._Jokabidea aldatzeko terapiak. Ereduak eta teknikak.

39. gaia._Sistemen teoria. Ereduak eta teknikak.

40. gaia._Teoria psikoanalitikoak: Psicoanalisia, joera psikoanalitikoko psikoterapiak.

41. gaia._Diagnostikoa eta familiekiko esku-hartzea. Familiarekiko elkarrizketa.

42. gaia._Normaltasuna eta patologia: Arazo nagusiak. Normaltasun psikokoaren kontzeptua eta irizpide desberdinak.

43. gaia_.Gogamen-nahasteen sailkapena.

44. gaia._Tratamenduak eta aurre-egite berariazkoak gogamen- osasunean. Psikoterapiak: banakoarena, bikotearena, taldearena eta familiarena.

45. gaia._Psikosiak (eskizofreniak, afektiboak, erreaktiboak, egoera paranoideak), hurbilketa teorikoak eta aurre-egite posibleak.

46. gaia._Neurosiak. Hurbilketa teorikoak eta aurre-egiteko moduak.

47. gaia._Nortasunaren nahasteak. Hurbilketa teorikoak eta aurre-egiteko moduak.

48. gaia._Gogameneko nahaste organikoak. Ebaluazioa eta tratamendua.

49. gaia._Nahaste psikosomatikoak. Ebaluazioa eta tratamendua.

50. gaia._Gizakiaren sexu erantzuna. Disfuntzioak eta tratamenduak. Parafiliak, ebaluazioa eta tratamendua.

51. gaia._Loaren alterazioak haurtzaroan. Ebaluazioa eta tratamendua.

52. gaia._Elikaduraren alterazioak: anorexia, bulimia, obesitatea. Ebaluazioak eta tratamenduak.

53. gaia._.Depresioa eta uzkurtasuna haurrengan. Teoriak. Ebaluazioa eta tratamenduak.

54. gaia._Egokitzapen nahasteak helduengan eta haurrengan. Ebaluazioa eta tratamendua.

55. gaia._Loaren alterazioak haurtzaroan. Ebaluazioa eta tratamendua.

56. gaia._Esfinterren kontrolaren alterazioak haurtzaroan. Ebaluazioa eta tratamendua.

57. gaia._Haurtzaroko psikosi bereziak. Ebaluazioa eta tratamendu posibleak.

58. gaia._Nahaste eta eritasun psikosomatikoak haurtzaroan. Ebaluazioa eta tratamendua.

59. gaia._Psikologiako profesionalaren kode deontologikoa.

60. gaia._Ikas-prozesuak: baldintzapena, obserbazioaren bidezko ikaspena, goi mailako ikaspenak, informazioaren prozesatzea, arretaren eta memoriaren eginkizuna, trebetasun metakognitiboak.

61. gaia._Ikas eta irakas prozesua eraikuntza eta interakzio prozesutzat hartua: pertsonarteko elementuak eta elementu didaktikoak. Irakaslearen bitartekari eginkizuna.

62. gaia_Ikas eta irakas prozesuko printzipio didaktikoak. Ikasketa esanguratsua. Aurreko trebetasun eta ezagupenen eginkizuna. Ikas-irakas prozesuen pertsonalizazioa.

63. gaia._Lehen haurtzaroa. Haurraren garapen fisikoa eta psikomotorea. Oinarrizko prozesu kognitiboak. Garapen sozial eta afektiboa. Garapenean eta heldutasunera bidean eragina duten faktoreak eta mekanismoei buruzko teoriak.

64. gaia._Tarteko haurtzaroa: garapen kognitiboa, afektibo-emozionalal eta soziala. Nortasunaren garapena. Teoria. Arazo eta zailtasun ohikoenak etapa honetan.

65. gaia._Pubertaroa eta nerabezaroa. Aldaketa anatomofisiologikoak. Garapen kognitiboa eta morala. Nortasuna. Ikasketa sozialaren garapena. Sexualitatearen garapena. Nerabezaroari buruzko teoriak. Nerabeen teoria. Babesa garapenaren etapa honetan. Epealdi honetako arazo eta gatazka potentzialak.

66. gaia._Hizkuntzaren alterazioak haurtzaroan. Ebaluazioa eta tratamendua.

67. gaia._Haurra eta eskolarako egokitzapena. Hezkuntza berezia. Hezkuntza integrazioa. Eskola-porrota, fobia eta eskola-absentismoa.

68. gaia._Haurren portaera nahasmen-sortzaileak: negatibismoa, agresibitatea, hiperaktibitatea.

69. gaia._Lanaren eta erakundeen psikologia; bilakaera historikoa.

70. gaia._Lanpostuen analisia, deskripzioa eta balorazioa.

71. gaia._Motibazioari buruzko teoriak. Lan errendimenduan eragina duten erakunde-faktoreak.

72. gaia._Erakunde-giroa.

73. gaia._Boterea, autoritatea eta hierarkia. Erakundean duten eragina.

74. gaia._Agintearen eginkizun funtsezkoak.

75. gaia._Giza baliabideen kudeaketa. Helburu estrategikoak.

76. gaia._Erakunde barneko gatazka. Sorrera eta agerpena. Negoziazio ereduak. Gatazkak konpontzeko teknikak eta prozesua.

77. gaia._Bizi kalitatea lanean. Erakundeko aldaketetara egokitzea.

78. gaia._Komunikazioa erakundeetan. Erakunde barneko komunikazio prozesuetako oztopoak.

79. gaia._Arauak eta talde-kultura erakunde barnean. Taldearen eragina partaideengan.

80. gaia._Sozializazio prozesua. Sozializazio eragileak.

81. gaia._Lan antolamenduen problema sozialak.

82. gaia._Prestakuntza eta aldaketa erakundean.

83. gaia._Taldeak eta erakundeak. Lidergoa, botere harremanak taldeetan.

84. gaia._Talde lanaren kontzeptua. Paperak, eginkizunak eta talde-dinamiken kudeaketa.

85. gaia._Langileen hautaketa. Langileak hautatzeko teknikak.

86. gaia._Ergonomia eta psikosoziologia aplikatua. Kontzeptu oinarrizkoak. Irismena. Metodologia. Esku-hartze ergonomikoa eta psikosoziala.

87. gaia._Lanaren gogamen-zama. Definizioa. Osagai kognitiboa eta psikikoa. Ebaluazio metodoak. Gogamen-nekeari aurrea hartzea.

88. gaia._Lanaldia. Atsedenaldiak eta etenaldiak. Txandaka lan egitea. Gaueko lana. Pertsonarengan dituen eragin psikologikoak. Ebaluazio metodoak. Aurre-hartze eta esku-hartze psikosoziala.

89. gaia._Laneko arrisku psikosozialaren faktoreak; erakundearen egitura. Testuinguru dimentsioak eta egitura-aldagaiak. Lanpostuaren eta lanaren faktoreak. Pertsonaren faktoreak.

90. gaia._Ebaluazio metodoak. Aurre-hartze eta esku-hartze psikosoziala arrisku faktoreen aurrean.

91. gaia._Lan estresa. Lan estresaren modulu teknikoak. Erreakzioak eta ondorio kronikoak. "Burnout" edo erreta egotearen sindromea. Ebaluatzeko metodoak. Aurre-hartze eta esku-hartze psikosoziala.

92. gaia._"Mobbing"a. Definizioa eta ezaugarriak. Garapenaren faseak. Biktima. Pertsona jazartzailea. Ebaluatzeko metodoak. Aurre-hartze eta esku-hartze psikosoziala. Banakako esku-hartzea.

93. gaia._"Bullying"a. Definizioa eta ezaugarriak. Garapenaren faseak. Biktima. Pertsona jazartzailea. Ebaluatzeko metodoak. Aurre-hartze eta esku-hartze psikosoziala. Banakako esku-hartzea. Aurre egiteko estrategia kognitibo-emozionalak.

94. gaia._Lan psikopatologia. Oinarrizko kontzeptuak. Sailkapena. Ebaluazioa. Gogameneko eritasunen ondorioak lanerako ahalmenaren gainean.

95. gaia._Langile bereziki sentiberak. Lanpostu egokitzapena. Berrorientazio sozio-laboraleko programak eta birkokapena.

96. gaia._Helduen prestakuntza. Estrategia didaktikoak: prozedurak, artikulazio eskemak, modu sozialak eta ekintza-moduak.

97. gaia._Laneko psikodiagnostikoa egiteko teknikak.

Ohorra._Gai guztiak Nafarroako Nafarroako ALDIZKARI OFIZIALean deialdia argitaratzen denean indarrean den legeriaren arabera eskatuko dira, baina hori ez da eragozpen izanen epaimahaiak kontuan har ditzan data horretatik aurera onartuak izan diren arau-aldaketei buruzko ekarpenak, halakorik izan bada.

Iragarkiaren kodea: F0618630