I. NAFARROAKO FORU KOMUNITATEA
1.1. XEDAPEN OROKORRAK
1.1.2. Foru Dekretuak
67/2006 FORU DEKRETUA, urriaren 2koa, Nekazaritzako Bermerako Europako Funtsa-FEAGA eta Nekazaritza Garatzeko Europako Funtsa-FEADERek finantzaturiko gastuak ordaintzen dituen erakundea Nafarroako Foru Komunitatean baimendu eta haren antolamendua eta funtzionamendua ezartzen duena.
ZIOEN AZALPENA
Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoaren 50.1 artikuluan Nafarroako Foru Komunitateak, bere foru antolamendu orokorraren indarrez, nekazaritzaren eta abeltzaintzaren inguruko gaietan duen eskumen esklusiboa onartzen da, ekonomiaren antolamendu orokorraren arabera. Bere foru araubidearen arabera, Nafarroak erabateko eskumena du foru erakundeen osaera, eskurantzak, antolamendua, funtzionamendua eta araubide juridikoa arautzeko eta Nafarroaren berezko antolamenduaren berezitasunaren ondoriozko administrazio prozedurako arauei eta bere Administrazioaren araubide juridikoari buruz, Hobekuntzako 49. artikuluko 1. idatz-zatiko a), c) eta e) letretan xedatu bezala.
Europar Kontseiluak, ekainaren 21eko 1290/2005 EE Erregelamenduak, Europar Batasuneko nekazaritzarako politikaren finantzabideari buruzkoak, bi funts sortu ditu FEOGA-Bermearen ordez: Nekazaritzako Bermerako Europako Funtsa, FEAGA, merkatuko neurriak finantzatzekoa, eta Nekazaritza Garatzeko Europako Funtsa, FEADER, nekazaritza garatzeko programak finantzatzekoa.
Europar Batzordeak, ekainaren 21eko 885/2006 EE Erregelamenduaren bidez, Kontseiluaren 1290/2005 EE Erregelamendua aplikatzeko xedapenak ezarri ziren erakunde ordaintzaileak eta beste organo batzuk baimentzeko eta FEAGA eta FEADER funtsetako kontuak likidatzeko. Erregelamendu hartan erakunde ordaintzaileak baimentzeko irizpideak ezarri dira.
Apirilaren 28ko 521/2006 Errege Dekretuaren bidez nekazaritzarako Europako funtsak ordaindu eta koordinatzeko erakundeen araubidea ezarri zen. Dekretu hartako 2. artikuluan xedatzen da autonomia erkidego bakoitzean erakunde ordaintzaile bakar bat izanen dela FEAGAren eta FEADERen ordainketak kudeatzeko eta erakunde hori baimendu beharko dela nekazaritzarako Europako funtsen konturako edozein gastu adierazi baino lehen baimendu beharko dela.
Kontseiluak irailaren 20an eman 1698/2005 EE Erregelamenduak, Nekazaritza Garatzeko Europako Funtsa-FEADERen bidez nekazaritza garatzeko eman beharreko laguntzari buruzkoak, 74. artikuluan xedatzen du nekazaritza garatzeko programa bakoitzerako Europar Batasuneko estatuek, erakunde ordaintzaileaz eta erakunde ziurtatzaileaz gain, agintaritza kudeatzaiea ere izendatuko dutela, kasuan kasuko programa kudeatzen arduratuko dena.
Nafarroako Gobernuak Nekazaritza, Abeltzaintza eta Elikadura Departamentua erakunde ordaintzaile izendatu nahi du, Foru Komunitatean FEAGAk eta FEADERek finantzaturiko ordainketak kudeatzeko eginkizunak bere gain har ditzan. Otsailaren 24ko 48/2005 Foru Dekretuaren bidez eskuratu zituen eskumenak kontuan hartuz baimentzekoa da horretarako. Foru dekretu horren bidez Nekazaritza, Abeltzaintza eta Elikadura Departamentuaren egitura organikoa ezarri zen.
Kontu-hartzailetza nagusiak jakinarazi duenez, foru dekretu hori bat dator erakunde ordaintzaileak baimentzeko irizpidearekin, Batzordeak ekainaren 21ean eman 885/2006 EE Erregelamenduko 1. artikuluko 3. idatz-zatian xedaturikoaren arabera.
Horiek horrela, Nekazaritza, Abeltzaintza eta Elikadura kontseilariak proposaturik, eta Nafarroako Gobernuak 2006ko urriaren 2ko bilkuran hartutako Erabakiarekin bat,
DEKRETATU DUT:
1. artikulua. Xedea.
Foru dekretu honen xedea Nekazaritzako Bermerako Europako Funtsa-FEAGA eta Nekazaritza Garatzeko Europako Funtsa-FEADERek finantzaturiko gastuak ordaintzen dituen erakundea Nafarroako Foru Komunitatean baimendu eta haren antolamendua eta funtzionamendua ezartzea da.
2. artikulua. Agintaritza eskuduna.
Nafarroako Gobernua izanen da Batzordeak ekainaren 21ean 885/2006 EE Erregelamenduko 1. artikuluko 2. idatz-zatian aipatzen den agintaritza eskuduna. Erregelamendu horren bidez Kontseiluaren 1290/2005 EE Erregelamendua aplikatzeko xedapenak ezarri ziren.
3. artikulua. Erakunde ordaintzailea baimentzea.
Baimena ematen zaio Nekazaritza, Abeltzaintza eta Elikadura Departamentuari, Nekazaritzako Bermerako Europako Funtsa-FEAGA eta Nekazaritza Garatzeko Europako Funtsa-FEADERek finantzaturiko gastuak Nafarroako Foru Komunitatean ordaintzen dituen erakundea izan dadin. Funts horiek Europar Batasuneko nekazaritzarako politikaren finantzabideari buruz Kontseiluak ekainaren 21ean eman 1290/2005 EE Erregelamenduko 3. eta 4. artikuluetan aipatzen dira, hurrenez hurren.
4. artikulua. Erakunde ordaintzailearen eginkizunak.
1. Erakunde ordaintzailearen eginkizunak.
a) Ordainketak baimendu eta kontrolatu beharko ditu, eskatzaileari pagatu behar zaion zenbatekoa Europar Batasuneko arautegiarekin bat datorren zehazteko, eta kontrol administratiboan eta tokian berean egin ere egin beharko ditu. Arloagatik eskudun diren zuzendari nagusiek ebazpen egokiak emanen dituzte. Kudeatu eta kontrolatzeko eginkizunak eta kontrol administratiboak eta tokikoak berekoak kasuan kasuko laguntza lerroak beretu dituzten unitateek eginen dituzte.
b) Eskatzaileari edo haren lagapen-hartzaileari baimenduriko zenbatekoak pagatzeko ordainketak egin beharko dituzte edo, nekazaritzaren garatzekoak, Europar Batasunaren kofinantzaketa, FEAGA eta FEADER funtsen ordainketak burutzeko Nekazaritza, Abeltzaintza eta Elikadura Departamentuan dagoen atalak eginen duena.
c) Nekazaritza, Abeltzaintza eta Elikadura Departamentuko FEAGAren eta FEADERen Kontabilitate Atalak eginen du ordainketen kontabilitatea, ordainketa guztiak erakundearen kontuetan erregistratzeko. Kontabilitatea gastuak laburtzen dituzten kontuak jakinarazi eta prestatzeko sistema baten bidez eginen da, bereziki Batzordera hilean behin, hiru hilabetean behin eta urtean behin igortzen diren adierazpenen bidez. Kontuek funtsen bidez finantzaturiko aktiboak ere erregistratuko dituzte, bereziki, kontu-hartzailetzako izakiei, likidatu gabeko aurrerakinei eta zordunei buruzkoak.
d) Eguneroko eragiketen eta kontrol jarduerak eten gabe begiratu eta eginiko prozedurak Europar Batasuneko arautegiarekin bat egiaztatzen direla bermatzeko egoki direla begiratu beharko dituzte eta kontabilitatea zehatz eta egokia dela eta osorik dagoela ere bai. Nekazaritza, Abeltzaintza eta Elikadura Departamentuko Barne Kontrolerako Atala izanen da erakunde ordaintzaileko barne kontrolerako zerbitzua.
2. Goragoko unitateko buruak gainbegiratuko ditu baimenaz, ordainketaz eta kontabilitateaz arduratzen diren unitate administratiboen lanak.
5. artikulua. Erakunde ordaintzailearen zuzendaritza.
1. Nekazaritza eta Abeltzaintza zuzendari nagusiari dagokio erakunde ordaintzailea zuzentzea. Eginkizun hauek izanen ditu:
a) Erakunde ordaintzailea ordezkatzea.
b) FEAGA eta FEADER funtsei egozten ahal zaizkien ordainketen betetze-mailari, kontabilitateari, kontu-errendatzeari eta barneko eta kanpoko kontrolari buruzko argibide guztiak hartu eta igortzea.
c) Erakunde ordaintzaileko organoak koordinatzea FEAGA eta FEADER funtsen konturako laguntzak kudeatzeko. Horretarako, aldian-aldian dei egiten ahalko die erakunde ordaintzaileari buruz eginkizunak egiten dituzten organo eta unitateei. Beren eginkizunetan haren zuzendaritzaren pean arituko dira. Halaber, prozeduren legezkotasuna, eraginkortasuna eta homogeneotasuna bermatzeko jarraibideak ematen ahalko ditu.
d) Barne auditoriako plana onestea, esparru garrantzitsu guztiak gutxienez ere bost urtean behin auditatzen direla bermatzeko.
e) Oker pagaturiko laguntzak berreskuratzeko prozedurak eta, bidezko bada, zehapen espedienteak, ireki eta ixtea. Halaber, ordainketak eta, bidezko bada, korrituak kobratu, kontabilizatu eta berreskuratzeko ebazpenak emanen ditu.
2. Nekazaritza, Abeltzaintza eta Elikadura Departamentuko Informazio eta Kudeaketa Ekonomikoaren Zerbitzuko zuzendariak ordeztuko du erakunde ordaintzaileko zuzendaria kargu hori hutsik dagoenean edo hura kanpoan edo gaixo dagoenean.
6. artikulua. Eginkizunak beste norbaiten esku uztea.
1. Erakunde ordaintzaileari dagozkion eginkizunak beste organo batzuen esku uzten ahalko dira, Europar Batasunaren laguntzak pagatzekoak izan ezik.
2. Eginkizunak inoren esku utzi ahal izateko, Batzordeak ekainaren 21ean eman 885/2006 EE Erregelamenduaren I. eranskinean ezarririko baldintzak bete beharko dira.
3. Eranskin hartako 1.C)i) idatz-zatian aipatzen den erabaki idatzia erakunde ordaintzaileko zuzendariak eta eginkizuna bere gain hartu duen organoko zuzendari nagusiak edo antzeko arduradunak izenpetuko dute.
4. Eginkizunak inoren esku uzteak esan nahi du organo delegatuak bere gain hartzen duela erantzukizun finantzarioa, organo hura Nafarroako Foru Komunitateko Administraziokoa ez bada.
5. Eginkizunak inoren esku uzteko erabakiek nekazaritzarako Europar Batasuneko funtsetako baliabideak ongi kudeatzen direla bermatu beharko dute.
7. artikulua. Informazio sistemetako segurtasuna.
Nekazaritza, Abeltzaintza eta Elikadura Departamentuko Informazioa Kudeatzeko Atalak begiratuko du erakunde ordaintzaileko informazio sistemetako segurtasuna, hori dena Ekonomia eta Ogasun Departamentuko Informazioaren Gizarterako Zuzendaritza Nagusiaren eskumenak galarazi gabe.
8. artikulua. Erakunde ziurtatzailea.
Kontseiluaren 1290/2005 EE Erregelamenduko 7. artikuluan aipatzen den erakunde ziurtatzailea Nafarroako Foru Komunitateko Administrazioko Kontu-hartzailetza Orokorra izanen da. Horrexek luzatu beharko du agiria egiazkotasunaz, osotasunaz eta zehaztasunaz, ezarririko kudeaketa eta kontrol sistema kontuan hartuz.
9. artikulua. Baimenaren ebaluazioa.
Kontu-hartzailetza Orokorrak etengabe gainbegiratuko du erakunde ordaintzailea eta gutxienez ere hiru urtean behin txosten bat eginen du gainbegiratzearen emaitzez, non adieraziko baitu erakunde ordaintzaileak baimena hartzeko irizpideak betetzen segitzen ote duen. Hori dena agintaritza eskudunari jakinaraziko zaio.
10. artikulua. Agintaritza kudeatzailea.
Nekazaritza Garatzeko Europar Funtsaren bidez nekazaritzaren garapenerako eman beharreko laguntzari buruz Kontseiluak irailaren 20an eman 1698/2005 EE Erregelamenduko 75. artikuluan xedaturikoa betetzeko, Landa Garapenerako Zuzendaritza Nagusia izendatzen da agintaritza kudeatzaile.
XEDAPEN GEHIGARRIAK
Lehena._Laguntza kontratuetarako eskumena.
Batzordeak, 2006ko ekainaren 21eko 885/2006 EE Erregelamenduaren bidez, Europar Batzordeak, ekainaren 21eko 885/2006 EE Erregelamenduaren bidez, Kontseiluaren 1290/2005 EE Erregelamendua aplikatzeko xedapenak ezarri ziren erakunde ordaintzaileak eta beste organo batzuk baimentzeko eta FEAGA eta FEADER funtsetako kontuak likidatzeko. Erregelamendu haren ondoriozko eginbeharrak egiten direla bermatzeko, Nekazaritza, Abeltzaintza eta Elikadura Departamentuak beharrezkotzat jotzen diren laguntza kontratuak izenpetzen ahalko ditu FEAGAR eta FEADER funtsetako laguntzak eskatzen dituztenei pagatzeko arrazoi diren gertaerak kontrolatu eta egiaztatzeko edo erakunde ordaintzailearen eginkizunak egiten laguntzeko. Eta Nafarroako Gobernuko entitate instrumentalei eginkizun horiek betetzeko mandatua ematen ahal die.
Bigarrena._Zehapen araubidea.
1. Europar Batasuneko arautegiak zuzenean betearazteko aukera galarazi gabe, FEAGAR eta FEADER funtsetako dirulaguntzen arloko arau-hausteak eta zehapen administratiboak Dirulaguntzei buruzko azaroaren 9ko 11/2005 Foru Legeko 42. eta 43. artikuluetan xedaturikoarekin bat arautuko dira.
2. Arau-hausteak zehazteko eta zehapenak ezartzeko zehapen prozedura administratiboa abenduaren 9ko 369/1997 Foru Dekretuan ezarritakoa izanen da, haren bidez onetsi baitzen nekazaritza, abeltzaintza eta elikadura arloetako zehapenak jartzeko administrazio prozedura.
Hirugarrena._Abalak.
Aurrerakinak FEAGA eta FEADER funtsen kontu hartzeko abalak eta diruzkoak ez diren bestelako bermeak Foru Komunitateko Administrazioan aurkezturikoetarako eskumena daukan unitate organikoak gorde, kontrolatu eta jarraituko ditu.
Laugarrena._Berreskuratze prozeduratik salbuestea.
Europar Batasuneko arautegiari jarraikiz, erakunde ordaintzaileak berreskuratzeko prozeduratik salbuetsita daude FEAGA eta FEADER funtsen kontura diren laguntzen zenbateko osoak, behar ez bezala ordainduak, baldin eta honelakoak edo txikiagoak badira:
a) berrogei euro, FEADERen bidez batera finantzaturiko laguntzen kasuan.
b) hogei euro, FEAGAren bidez finantzaturiko laguntzen kasuan.
XEDAPEN IRAGANKORRAK
Bakarra._Aurrerakinaren ordainketa 2000-2006 programazioaldian.
2006ko abenduaren 31 arte, Nekazaritza, Abeltzaintza eta Elikadura Departamentuak segituko du FEOGAko Bermea Sailaren bidez finantzaturiko laguntzak ordaintzen dituen erakundea den aldetik dagozkion eginkizunak egiten 2000-2006 programazioaldian nekazaritza garatzeko neurrien aurrerakinari eragotziriko gastuetarako.
XEDAPEN INDARGABETZAILEAK
Lehena._Indargabetze espresua.
Indarrik gabe gelditzen da 116/2001 Foru Dekretua, maiatzaren 14koa, Nafarroako Foru Komunitatean FEOGA-Bermearen saileko laguntzen Erakunde Ordaintzailearen antolamendu eta funtzionamenduaren Erregelamendua onesten duena.
Bigarrena._Klausula indargabetzailea.
Indarrik gabe gelditu dira foru dekretu honetan ezarritakoaren kontra dauden maila bereko edo beheragoko xedapen guztiak.
AZKEN XEDAPENAK
Lehena._Nekazaritza, Abeltzaintza eta Elikadura Departamentuaren egituraren aldaketa.
Nekazaritza, Abeltzaintza eta Elikadura Departamentuaren egitura organikoa ezartzen duen otsailaren 24ko 48/2005 Foru Dekretuan eta Nekazaritza, Abeltzaintza eta Elikadura kontseilariak Nekazaritza, Abeltzaintza eta Elikadura Departamentuko bulegoak ezartzeko irailaren 1ean eman zuen 33/2003 Foru Aginduan "FEOGA-Bermea" eta "FEOGAko Bermea Saila" aipatzen den bakoitzean ulertuko da Nekazaritzako Bermerako Europako Funtsa-FEAGAz eta Nekazaritza Garatzeko Europako Funtsa-FEADERez ari dela.
Bigarrena._Garatu eta betearazteko eskumenak.
Nekazaritza, Abeltzaintza eta Elikadura kontseilariari esku ematen zaio, bere eskumenen barruan, foru dekretu hau garatu eta betearazteko behar diren xedapen guztiak eman ditzan, bereziki nekazaritzarako Europar Batasuneko funtsen bidez osorik edo hein batean finantzaturiko dirulaguntzei buruzko arau eta deialdiak eman ditzan.
Hirugarrena._Indarra hartzea.
Foru dekretu honek 2006ko urriaren 16an hartuko du indarra, Nafarroako ALDIZKARI OFIZIALean argitaratu ondoren.
Iruñean, 2006ko urriaren 2an._Nafarroako Gobernuko lehendakaria, Miguel Sanz Sesma._Nekazaritza, Abeltzaintza eta Elikadura kontseilaria, José Javier Echarte Echarte.
Iragarkiaren kodea: F0615623
