Iragarkia

6. ALDIZKARIA - 2005eko urtarrilaren 14a

II. NAFARROAKO TOKI ADMINISTRAZIOA

2.1. ORDENANTZAK ETA BESTELAKO XEDAPEN OROKORRAK

TAFALLA

Tafallako Udalaren mugapeko herrilurretako ondasunen administrazio, erabilera, defentsa, berreskuratze eta aprobetxamenduari buruzko ordenantza

Hasiera batez onetsi baita Tafallako Udalaren mugapeko herrilurretako ondasunen administrazio, erabilera, defentsa, berreskuratze eta aprobetxamenduari buruzko ordenantza, 2004ko irailaren 28an.

Espedientea jendaurrean hilabetez egon baita, 2004ko 126. Nafarroako ALDIZKARI OFIZIALean, urriaren 20koan, argitaratu ondoren, inork alegaziorik edo erreklamaziorik aurkeztu gabe.

Nafarroako toki araubidea gaurkotzeko 11/2004 Foru Legeko 325.1 artikuluan xedatutakoa aplikatuz, ordenantza behin betikoz onetsitzat hartzen da eta oso-osorik argitaratzera igortzen da.

Erabaki da:

Lehena._Behin betikoz onestea Tafallako Udalaren mugapeko herrilurretako ondasunen administrazio, erabilera, defentsa, berreskuratze eta aprobetxamenduari buruzko ordenantza.

Bigarrena._Behin betiko onespenaren erabakia eta ordenantzaren testua osorik Nafarroako ALDIZKARI OFIZIALean argitaratzea.

Tafallan, 2004ko abenduaren 1ean._Nekazaritzako arduraduna, Javier Tapia Piudo.

I. TITULUA

Xedapen orokorrak

1. artikulua. Ordenantza honen xedea da Tafallako udal mugapeko herrilurretako ondasunen administrazioa, erabilera, defentsa, berreskuratzea eta aprobetxamendua erregulatzen dituzten arauak ezartzea.

2. artikulua. Herri ondasunak dira herri honetako bizilagun guztiek aprobetxatu eta erabil ditzaketenak.

3. artikulua. Herrilurretako ondasunak besterenduezinak, preskribaezinak eta bahitezinak dira eta ez dute beren gain tributurik izanen.

Ez dute aldaketarik jasanen beren izaeran nahiz tratamendu juridikoan, edozein dela ere haiek aprobetxatu edo erabiltzeko era.

4. artikulua. Herrilurretako ondasunei dagozkienetan, arau hauek aginduko dute: Nafarroako Toki Administrazioari buruzko uztailaren 2ko 6/1990 Foru Legea; Nafarroako Toki Entitateen Ondasunen gaineko Erregelamendua (280/1990 Foru Dekretua, urriaren 18koa); Tafallako Udalaren herrilurrei buruzko ordenantza hau; Tafallako Udalaren ordenantzak; eta, bestela, Foru Zuzenbide Pribatuaren arauak, Nafarroako Foru Eraentza Berrezarri eta Hobetzeari buruzko Lege Organikoaren 40. artikuluko hirugarren idatz-zatian xedatutakoa deusetan galarazi gabe.

II. TITULUA

Administrazioa eta xedapen egintzak

I. KAPITULUA

Ahalmenak eta eskumenak

5.1. artikulua. Herri ondasunen gaineko ahalmenak, dela haien erabileraz, dela administrazioaz, dela aprobetxamenduaren araubideaz, dela antolamenduaz, Tafallako Udalari dagozkio, Nafarroako Toki Administrazioari buruzko uztailaren 2ko 6/1990 Foru Legean, Ondasunen gaineko Erregelamenduan eta ordenantza honetan azaltzen den moduan.

5.2. 6/1990 Foru Legean espresuki aipatzen diren kasuetan, Tafallako Udalaren organo eskudunek hartzen dituzten erabakietarako beharrezkoa izanen da Foru Komunitateko Administrazioaren onespena, baina kasu haietan bakarrik.

II. KAPITULUA

Desafektazioa

6. artikulua. Herri ondasunak desafektatzekotan, erabilera lagatu nahiz haien gaineko kargak ezartzeko, baldintza hauek bete beharko dira:

1. Tafallako Udalak edo tokian tokiko entitateko gobernu eta administrazio organo gorenak, osoko bilkuran, hasierako onespena ematea, horretarako erabakia gehiengo osoz harturik.

2. Erabakia Tafallako Udalaren Nafarroako ALDIZKARI OFIZIALean hilabetez jendaurrean edukitzea, aldez aurretik iragarkia Nafarroako ALDIZKARI OFIZIALean argitaratuta, denbora horretan alegazioak edo erreklamazioak aurkezteko aukera izan dadin.

3. Alegazio edo erreklamaziorik aurkezten bada, haiek ebaztea eta Tafallako Udalak, osoko bilkuran, behin betiko erabakia hartzea. Hasiera bateko erabakia behin betikoa bilakatuko da alegazio edo erreklamaziorik aurkezten ez bada.

4. Herri ondasunen arloko eskumenak dituen Foru Komunitateko Administrazioaren Departamentura honako hau igortzea: aurreko ataletan aipatutakoa betetzen dela egiaztatzen duten agiriak, finkaren identifikaziorako beharrezkoak diren agiriak, eta erabileraren lagapen edo kargaren gaineko klausula administratiboen plegua.

5. Nafarroako Gobernuak onestea, Foru Dekretuaren bidez.

7. artikulua. Herri ondasunetako lurzati txikiak desafektatzekotan, saldu edo trukatzeko, honako baldintza hauek bete beharko dira:

1. Tafallako Udalak edo tokian tokiko entitateko gobernu eta administrazio organo gorenak, osoko bilkuran, hasierako onespena ematea, horretarako erabakia bere kideen legezko kopuruaren bi herenek harturik.

2. Jendaurrean jarri eta iragartzea, aurreko artikuluko bigarren atalean aipatutako moduan, epean eta ondorioetarako.

3. Alegazio edo erreklamaziorik aurkezten bada, haiek ebaztea, bere kideen legezko kopuruaren bi herenek hartutako erabakiaren bidez. Hasiera bateko erabakia behin betikoa bilakatuko da alegazio edo erreklamaziorik aurkezten ez bada.

4. Herri ondasunen arloko eskumenak dituen Foru Komunitateko Administrazioaren Departamentura honako hau igortzea: aurreko artikuluetan aipatutakoa betetzen dela egiaztatzen duten agiriak eta 9. artikuluak aipatzen duen justifikazioa, bai eta finkaren identifikaziorako beharrezkoak diren agiriak, bere balorazio teknikoa eta besterentzearen gaineko klausula administratiboen plegua ere.

5. Onura publiko edo sozialaren deklarazioa eta onespena Nafarroako Gobernuak emanda, Foru Dekretuaren bidez.

8.1. artikulua. Aurreko artikuluan ezarritakoaren ondorioetarako, lurzati txikitzat hartuko da, desafektazioaren xedea trukea denean, bost hektareako edo hortik beheitiko azalera duena.

8.2. Desafektazioa salmentarako egiten denean, lurzati txikitzat hartuko da honako baldintza hauek guztiak betetzen dituena:

a) Hiru hektareako edo hortik beheitiko azalera izatea.

b) Azalera hori izatea Tafallako Udalaren herrilurren guztirako azaleraren ehuneko bi edo gutxiago.

c) Lurzatiaren ondare katastroko balioa izatea Tafallako Udalaren herrilur guztien ondare katastroko balioaren ehuneko bi edo gutxiago.

9. artikulua. Desafektazioaren xedea lurzati txikien salmenta edo trukaketa denean, Nafarroako Gobernuak onura publiko edo sozialaren deklarazioa egin ahal izateko, Udalak aldez aurretik frogatu beharko du xede hori kargaren edo erabileraren lagapenaren bidez lortzerik ez dagoela. Nolanahi ere bi aukera horiek lehentasuna izanen dute.

10. artikulua. Onura publikoaren edo sozialaren deklarazioa egiteko, 7. artikuluko azkeneko atalean aipatzen den bezala, kontuan hartuko dira desafektatzeko aintzat hartzen diren irizpide guztiak, eta bereziki honako hauek:

a) Ezarritako xedeak nola hobetzen dituen bizi kalitatea eta garapen ekonomiko-soziala, hala herriarentzat nola eskualdearentzat.

b) Zer lanpostu berri sortzen diren.

c) Egin gogo den jarduerak ingurumenerako egokia ote den.

11. artikulua. Desafektazioak Foru Lege bat beharko du onespena jasotzeko, jabaria kostu bidez edo dohainik aldatzeko eta lurzati txikia gainditzen duten herrilurrak trukatzeko egiten denean, bai eta aurreko artikuluetan aipatu ez diren gainerako kasuetarako ere.

12.1. artikulua. Tafallako Udalak herri ondasunen desafektazioari buruz hartutako erabakiek itzultze klausula bat eduki beharko dute, horien xedeak edo baldintzak desagertu edo betetzen ez diren kasuetarako.

12.2. Udalak desafektazioaren xede diren lagapen, karga, salmenta edo trukaketak arautzeko onesten dituen klasula administratiboen pleguetan aurreko zenbakian aipatutako itzultze klausula hori ere sartu beharko da.

12.3. Kontratua eginen da dokumentu publikoaren bidez, zeinetan sartuko baita itzultze klausula, eta dokumentu hori Jabetza Erregistroan inskribatuko da.

12.4. Itzultzea gertaten bada, ondasunak Tafallako Udalaren ondarera itzuliko dira, herrilurretako ondasun gisa.

13. artikulua. Herri ondasunen desafektazioari buruz aurreko artikuluetan xedatutakoak ez dakar kalterik, baldin eta haien kalifikazio juridikoa aldatu bada Nafarroako Toki Entitateen Ondasunen Erregelamenduko 13.1.a) artikuluan xedatutakoaren arabera.

14. artikulua. Herrilurretako ondasunen nahitaezko desjabetzapenak egiteko, arlo horretan indarra duen legeria beteko da.

III. TITULUA

Herrilurretako ondasunak defendatu eta berreskuratzea

15. artikulua. Tafallako Udala herrilurretako ondasunak zaindu, defendatu, berreskuratu eta hobetzen ahaleginduko da, eta kontra eginen dio horientzat kaltegarri izan daitekeen edozein pribatizazio saio edo ekintzari.

16. artikulua. Tafallako Udalak berez eta noiznahi berreskuratzen ahalko du herri ondasunen jabetza, aldez aurretik legelariaren txostena ikusi eta interesatuari entzutea emanda. Beharrezko denean, ekintza zibilak sustatuko dira, herri ondasunak berreskuratu eta defendatzeko.

17.1 artikulua. Tafallako Udalak Nafarroako Gobernuari Jabetza Erregistroak igortzen dizkion ediktuen berri emanen dio, lursailen immatrikulazioa edo herrilurrekin mugakide diren lursailen hedadura soberakina dela eta.

17.2. Tafallako Udalak hartu beharko du jakinarazpen horien inguruko erabakia.

18. artikulua. Tafallako Udalak Nafarroako Gobernuaren aldez aurretiko onespen berariazkoa beharko du, ondasunak herri ondarerako berreskuratzearren eskualdaketarik egin nahi izanez gero.

19. artikulua. Tafallako Udalak administrazio bidea erabiliko du beti, baimen, kontzesio edo beste zernahiren kariaz herrilurretako ondasunen gainean sortutako eskubideak eta haiek ekarritako okupazioak iraungitzeko, eta ahalmen hertsatzaileez baliatuz. Aldez aurretik kalte-ordaina eman ala ez, zuzenbidearen arabera izanen da.

20. artikulua. Tafallako Udalak, herri ondasunei buruzko kontratuetan partaide denean, interpretatu eginen ditu eta horiek betetzean sortzen diren zalantzak argituko.

20.1. Interpretatzeko erabaki horiek berehala hartuko dute indarra, eta ez dute galaraziko kontratugileek bide jurisdikzionalean behar den deklarazioa lortzeko duten eskubidea.

21. artikulua. Tafallako Udalak herri ondasunak defendatzeko bidezko diren ekintzak sustatzen ez dituenean, herritarren ekimena posible izanen da, Tafallako Udalaren alde eta haren izenean, baldin eta, hala egin dezan errekeritu ondotik, 60 egun natural pasatzen badira aipatutako ekimen horietan hasteko erabakirik hartu gabe.

21.1. Tafallako Udalak ekimena sustatzen duen herritarraren eskura jarriko ditu haren xedearen alde egiteko behar diren aurrekari, agiri eta frogabide guztiak.

21.2. Ekimen horrek aurrera egiten badu, Tafallako Udalak itzuli beharko dizkie herritarrei sortutako gastuak, aldez aurretik eskatu eta justifikatuz gero.

22. artikulua. Tafallako Udalak berez eta edozein unetan bereganatzen ahalko ditu herrilurretako ondasunak, ofizioz edo salaketaz behar den prozedura aldez aurretik irekita, interesatuei entzutea emanez eta legelariak txostena eginda. Bertan, kendutako jabetza kreditatzeko askitzat hartzen diren agiri eta gainerako froga guztiak agertuko dira.

22.1. Hori guztia Toki Administrazioaren gainean foru legerian ezarritako prozedurarekin bat etorriz.

22.2. Halaber, Tafallako Udalak ekintza zibilak bultzatuko ditu, horrelakorik behar denean, herrilurretako ondasunak berreskuratu eta defendatzeko.

IV. TITULUA

Herri ondasunen aprobetxamenduak

I. KAPITULUA

Xedapen orokorrak

23. artikulua. Tafallako Udala ahaleginduko da herri ondasunen ekoizpena abian jartzen, hobetzen eta ahalik egokien aprobetxatzen.

24. artikulua. Titulu honetan aprobetxamendu hauei buruzkoak jorratzen dira:

1. Laborantzako herrilurren aprobetxamendua.

2. Herrilarreen aprobetxamendua.

3. Zura eta egurra emateko aprobetxamenduak.

4. Bestelako aprobetxamenduak.

25. artikulua. Orokorrean, herrilurretako aprobetxamenduen onuradun izateko, famili unitateen titularrek eta legez eratutako izatezko bikoteek honako baldintza hauek bete beharko dituzte:

a) Adinez nagusi izatea edo adingabe burujabea nahiz judizialki gaitua.

b) Udaleko erroldan bizilagun bezala inskribatua egotea, gutxienez sei urteko antzinatasuna izanik.

c) Tafallan urtean bederatzi hilabetez gutxienez egiazki eta jarraian bizitzea.

d) Tafallako Udalarekin zerga betebeharrak egunean izatea, berankorren zerrendan egon gabe.

25.1. artikulua. Kasu berezi bezala, irabazi asmorik gabe eta Nafarroako Gobernuak onetsitako ehiza antolatzeko plana bete ahal izateko, Tafallako ehiztari eta arrantzaleen elkarteak laborantzako herrilurraren lote bat zuzenean esleitzeko eskubidea izanen du.

Lote hori zein izan behar duen erabakitzeko, Tafallako Udalaren landazainaren eta Tafallako ehiztari eta arrantzaleen elkartearen artean proposamena eginen dute.

26. artikulua. Etxebizitza batean elkartuta bizi diren guztiak famili unitateko kidetzat hartuko dira.

26.1. Edonola ere, famili unitate independentetzat hartuko da guraso jubilatuek osatua, familiakoekin bizi arren, betiere beraien dirusarrerak lanbidearteko gutxieneko soldata baino txikiagoak badira.

27. artikulua. Herrilurretako aprobetxamenduen enkanteetan, esleitu gabe gelditzen badira, bigarren eta are hirugarren enkanteak ere egiten ahalko dira, tasazioaren hasierako prezioa hurrenez hurren ehuneko hamar eta hogei merkeago.

27.1. Halaber, enkantea esleitu gabe gelditu bada, aprobetxamenduak zuzenean esleitzen ahalko dira, betiere prezioa egindako azken enkantearen hasierako prezioa baino merkeagoa ez bada.

27.2. Enkantea Nafarroako ALDIZKARI OFIZIALean eta Foru Komunitatean argitaratzen diren egunkarietako batean edo gehiagotan iragarriko da, enkantearen eguna baino hamabost egun natural lehenago gutxienez ere.

27.3. Aurreko zenbakian xedatutakoa gorabehera, laborantzako herrilurren edo herrilarreen bigarren eta hirugarren enkanteetarako aski izanen da Tafallako Udalaren iragarki oholean iragartzearekin, haietako bakoitza egin baino bost egun lehenago, gutxienez.

27.4. Oihan aprobetxamenduen enkanteetan, kontuan hartuko da, baita ere, Nafarroako toki entitateen ondasunen erregelamenduko 4. ataleko 210. artikuluan eta hurrengoetan ezarritakoa.

27.5. Herri ondasunen aprobetxamenduen enkanteetan sesteoa egiteko aukera izanen da, Nafarroako Toki Administrazioari buruzko uztailaren 2ko 6/90 Foru Legearen 231. artikuluan bildutako zehaztapenen arabera.

II. KAPITULUA

Laborantzako herrilurren aprobetxamenduak

1. ATALA

Aprobetxamenduen modalitateak

28. artikulua. Laborantzako herrilurren aprobetxamenduak hiru modutan eginen dira:

a) Lehentasuna duten herritarrendako aprobetxamenduak.

b) Herritarren artean zuzenean esleitutako aprobetxamenduak.

c) Tafallako Udalaren zuzeneko ustiapena edo enkante publikoaren bidezko esleipena.

28.1. Tafallako Udalak laborantzako herrilurren aprobetxamendua esleituko du, aurreko zenbakian aipatzen diren moduak bata bestearen ondotik aplikatuz, bertan zehazten den ordenari jarraituz.

2. ATALA

Lehentasuna duten herritarrendako aprobetxamenduak

29. artikulua. Lehentasuna duten herritarrendako aprobetxamenduen onuradun izateko, famili unitateen titular diren herritarrek 25. artikuluan ezarritako baldintzak bete beharko dituzte, eta famili unitateko kide bakoitzarengatik, dirusarrerek izan beharko dute lanbidearteko gutxieneko soldataren ehuneko hogeita hamar baino txikiagoak, edo famili unitatearen guztirako dirusarrerek egon behar dute soldata hori halako bat eta erdiaren azpitik.

29.1. Famili unitatean gorputzez edo adimenez ezinduak diren kideak baldin badaude, agiri bidez egiaztatuta, lanbidearteko gutxieneko soldataren ehuneko hirurogeiren pareko dirusarrera kontatuko da kide bakoitzeko.

29.2. Lehentasuna duten herritarrendako aprobetxamenduaz baliatzeko eskubidea dutela uste duten famili unitateek honako agiri hauek aurkeztu beharko dituzte:

1. Famili unitateko kideen P.F.E.Z.ko aitorpenen justifikagiriak edo kopiak.

2. Famili unitateko kideen soldaten edo nolanahi jasotako dirusarreren justifikagiriak edo kopiak.

3. Katastroko justifikagiri edo egiaztagiriak, famili unitateko kide bakoitzak dituen jabetzenak, hala landalurretakoak nola hirilurretakoak, familiaren etxebizitzarena salbu.

4. Famili unitateak errentan edo beste nolanahi lantzen dituen lurren zinpeko aitorpena.

5. Famili unitateak dituen motorrezko ibilgailuen eta laborantzako lanabesen zinpeko aitorpena.

6. Nafarroako Gobernuko Nekazaritza, Abeltzaintza eta Elikadura Departamentuko Azienden Erroldaren Erregistroko ziurtagiria, famili unitateak zenbat abelburu dituen zehazten duena.

7. Famili unitateko kideen ezgaitasun fisiko edo mentala egiaztatzeko behar diren agiri guztiak, ezgaitasun horiek alegatzen dituzten famili unitateko kideei dagozkienak.

8. Famili unitateek aipatzen dituzten egoerak frogatzeko Tafallako Udalak beharrezkotzat jotzen dituen gainerako guztiak.

9. Nafarroako Gobernuak ezarriko du zein errendimendu aplikatu ondare balioei.

30. artikulua. Aprobetxamendu mota honetarako ereduko loteak ondoko azalera hau izanen du:

_Lehorreko lurra: 200 erregu, 100 erreguko bi lote-erditan banaturik.

31. artikulua. Lehentxeagoko 29. artikuluan ezarritakoaren ondorioz onuradun suertatzen direnei entregatuko zaizkien loteak, famili unitateko kideen kopuruaren arabera, ereduko loteari ondoko koefizienteak aplikatuz aterako dira:

a) Hiru kide bitarteko famili unitateak, 1 koefizientea, hots, lote bat.

b) Lau kidetik seira bitarteko famili unitateak, 2 koefizientea, hau da, bi lote.

c) Zazpi kidetik bederatzira bitarteko famili unitateak, 3 koefizientea, hau da, hiru lote.

d) Bederatzi kide baino gehiagoko famili unitateak, 5 koefizientea, hau da, bost lote.

32. artikulua. Tafallako Udalak, kontuan harturik herrilurren ezaugarriak eta herritarren egoera soziala, proportzionalki apaltzen ahalko ditu aurreko hiru artikuluetan aipatzen diren faktoreak, Nafarroako Foru Komunitateko Administrazioak aldez aurretik baimena ematen badu eta behar den bezala justifikatuz gero, baina ez handitu, ordea.

32.1. Tafallako Udalak, kasu hauetan, laborantzako herrilurren ehuneko berrogeita hamar bereizi beharko du, gutxienez, banaketa mota honetarako.

33. artikulua. Laborantza urtekoa eta txandakatua izanen da, eta aprobetxamendu epea zortzi urtekoa, alegia, lau ereinaldi.

33.1. Tafallako Udalak egokitzat jotzen badu frutarbolak edo mahatsondoak landatzeko baimena ematea, epe hori 24 urtera bitarte luza daiteke, beste 3, 4 edo 5 urte gehiago luzatzeko aukera emanik, laborearen egoeraren arabera, betiere kontuan hartuz emandako epea amaitzen denean hondar-balioa Tafallako Udalaren jabetzara pasako dela, kalte-ordainik gabe.

34. artikulua. Aprobetxamendu modu honetan, herrilurren onuradunek hurrengo kanon hauek ordainduko dituzte:

_Lote ona: 9,09 euro/erregua.

_Hala-holako lotea: 5,91 euro/erregua.

34.1. Kopuru horiek urtero eguneratuko dira, nekazariek jasaten duten prezio aldaketaren arabera, zerealarentzat eskumena duen erakunde ofizialak onesten dituen urteko indizeei jarraikiz, hala jartzen baitu Nafarroako Toki Ogasunei buruzko 2/1995 Foru Legeko 27. artikuluan.

35. artikulua. Herrilurretako lurzatiak onuradunek zuzenean eta pertsonalki landu beharko dituzte, eta ezin izanen dituzte errentan eman edo ustiatu lan pertsonala ez den beste moduren baten bidez.

35.1. Onuradunei esleitutako lurzatien laborantza hainbaten artean egitea zuzeneko laborantza pertsonaltzat hartuko da, haiek kooperatibetan edo legez eratutako lan taldeetan elkartzen direnean eta kide guztiek ordenantza honetako 25. artikuluan adierazitako baldintzak betetzen badituzte.

35.2. Tafallako Udalaren ordenantzak esleipenerako prozedura jakin batzuk ezartzen ahalko ditu, lurzati elkartuak esleitzeko aurreko lerroaldean aipatzen den egoeran daudela egiaztatzen duten onuradunei.

36. artikulua. Ezintasun fisikoa edo besteren bat izateagatik esleipendunak ezin baditu lurzatiak zuzenean eta pertsonalki landu, herritarren artean zuzenean esleituko dira edo, bestela, Tafallako Udalak zuzenean ustiatuko ditu, edo enkante publikoaren bidez esleituko dira.

36.1. Tafallako Udalak onuradunei ordainduko dizkie esleipenetik jasotako dirusarrerak, dagokion kanona kenduta, horretarako eskaera aurkeztu eta pertsonalki lantzeko daukaten ezintasunaren arrazoia egiaztatu ondotik.

37. artikulua. Beren laborea apartzerian eman edo besteri lagatzen dioten onuradunei herrilurrak kenduko zaizkie esleipenaldia bukatu arte.

37.1. Herrilurren loteak hala kentzen zaizkien onuradunek Tafallako Udalaren Toki Ogasunari eman beharko dizkiote apartzeria edo lagapena hasi zenetik jaso dituzten mozkinak; Tafallako Udalak finkatuko du mozkin horiei dagokien zenbatekoa.

37.2. Lur kentze horretarako, aurretik Tafallako Udalak espedientea irekiko du eta interesatuari entzutea emanen zaio.

38. artikulua. Tafallako Udalak edozein unetan egokiak iruditzen zaizkion egiaztapenak egin eta onuradunei behar dituen agiriak aurkez ditzaten eskatzen ahalko die, era horretan ikusi ahal izateko laborea zuzenean eta pertsonalki lantzen dela.

39. artikulua. Tafallako Udalak usteko du esleipen hartzaileak dagozkion herrilurren loteak ez dituela zuzenean eta pertsonalki lantzen, honako kasu hauetan:

a) Norbaitek, nekazaritzako makineria izanik, esleitu zaizkion herrilurren loteak lantzeko erabiltzen ez badu.

b) Baldin eta egiaztagiria eskaturik justifikatzeko erosi direla erregaiak, ongarriak, haziak, lehengaiak edo saldu direla norberak egindako produktuak, agindutako epean aurkezten ez badira.

c) Pertsona Fisikoen Errentaren gaineko Zergaren aitorpenean zerealari dagozkion nekazaritzako etekinak aitortzen ez direnean, horretara beharturik egonda.

d) Landalurren jabeak izanik, hirugarrenei errentan emanda badituzte.

40. artikulua. Onuradunek ezin izanen dituzte landu esleitu zaizkien herrilurrak esleipenean ezarritako xedea ez bezalako beste erabilera, aprobetxamendu edo labore motarako, Tafallako Udalak espresuki emandako baimena ez badute, deusetan ukatu gabe ordenantza honetan ezarritakoa.

3. ATALA

Herritarren arteko zuzeneko esleipena

41. artikulua. Herritarren arteko lehentasunezko esleipenari dagozkionak banatu ondoren, gelditzen diren laborantzako herrilurrak, bai eta onuradunek zuzenean eta pertsonalki lantzen ez dituzten lurzatiak ere, zuzenean esleituko dira herritarren artean, baldin eta 25. artikuluan ezarritako baldintzak betetzen dituzten famili unitateko titularrak badira, nagusiki nekazari badira, nekazaritzako gizarte segurantzan alta emanak badaude bost urteko antzinatasunarekin eta beren ordainketak eguneratuak izanik, eta 65 urte beterik ez badituzte, erretiraturik egonik nahiz egon gaberik, salbu interesatuaren beharrengatik, Tafallako Udalaren iritziz behar bezala egiaztatuta.

41.1. Onuradun gisa sartu berriak diren nekazari gazteen kasuan, ez da beharrezkoa izanen bost urteko antzinatasuna izatea nekazaritzako gizarte segurantzan, baina egiaztatu beharko da nekazari berria izatea, alta emana egotea eta ordaindu beharrekoak eguneraturik izatea.

42. artikulua. Hau da aprobetxamendu mota honetarako ezarri den herrilurretako lotearen azalera:

_Lehorreko lurra: 200 erregu, 100 erreguko bi lote-erditan banaturik.

42.1. Abeltzainek lote erdia eskuratzeko eskubidea izanen dute, esleituko zaiena haietako bakoitza aprobetxatzen ari den bazkalekuaren barrenean, eskorta edo artegiarekin muga egiten duela, betiere eskaera aurkezten badute.

43. artikulua. Lehentasunezko esleipenak eta herritarren arteko zuzenekoak egin ondotik, Tafallako Udalak erreserban utziko ditu laborantzako lurren gainerakoak, gerta daitezkeen onuradun berrientzat.

43.1. Tafallako Udalak aurreko zenbakian aipatzen diren erreserbako lurrak urtero esleituko ditu, ordenantza honetako baldintzak betetzen dituzten herriko nekazarien artean, baina esleipen horiek indarrik gabe geldituko dira, aprobetxamendua lehentasuna duen beste onuradun berriren bati emateko.

44. artikulua. Esleipen hartzaileak berak eta zuzenean landu beharko ditu lurrak.

44.1. Horretarako, bete beharko da Nafarroako Toki Entitateen Ondasunen Erregelamenduko 164.etik 168.era bitarteko artikuluetan eta ordenantza honetako 35.etik 39.era bitartekoetan xedatutakoa.

45. artikulua. Ordenantza honetako 33. artikuluan ezartzen da zein diren esleipen epea eta labore mota.

46. artikulua. Aprobetxamendu mota honetan, onuradunek hurrengo kanon hauek ordainduko dituzte:

_Lote ona: 9,09 euro erreguko.

_Hala-holako lotea: 6,36 euro erreguko.

46.1. Kopuru horiek urtero eguneratuko dira, nekazariek jasaten dituzten prezioen aldaketaren arabera, zerealarentzat eskumena duen erakunde ofizialak onesten dituen urteko indizeei jarraikiz, hala jartzen baitu Nafarroako Toki Ogasunei buruzko 2/1995 Foru Legeko 27. artikuluan.

47. artikulua. Herritarren arteko zuzeneko esleipenaren onuradunek ezin izanen dituzte herrilurrak erabili, Udalaren aldez aurreko baimenik gabe, esleipenekoak ez diren beste xede, aprobetxamendu edo labore batzuetarako, non Tafallako Udalak ez dituen, ordenantzak onesteko tramiteen araberako erabakiaren bidez, labore lote berriak ezartzen, ofizioz edo onuradungaiek eskaturik, mahatsondoak edo olibondoak landatzeko, esate baterako, edo herrilurrak ororentzat baldintza hobeetan aprobetxatzeko interesgarritzat jotzen diren beste labore batzuetarako.

47.1. Halako kasuetan, Tafallako Udalak berak finkatuko ditu ustiapenerako baldintzak, epeei, kanonari eta gainerakoei buruz, aprobetxamenduaren berezitasuna kontuan harturik.

48. artikulua. Baldin eta Tafallako mugapean herrilur egokirik bada, toki entitateak famili baratze izateko edo antzekorako lurzati bat ematen ahalko du, zozketa bidez, eskaera aurkezten duten herritarren artean, haiek halako lurrik ez badute.

48.1. Lurzati horren azalera, kanona eta baldintzak libreki finkatuko dira dagokion ordenantzan; betiere, xede honetarako erabiltzen den lurra ez da inola ere izanen laborantzako herrilurraren azaleraren ehuneko hamar baino gehiago.

4. ATALA

Tafallako Udalak zuzenean egindako ustiapena edo enkante publikoa

49. artikulua. Laborantzako herrilurra sobrante gelditzen bada, lehentasunezko esleipenaren eta herritarren arteko zuzenekoaren ondotik, Tafallako Udalak enkante publikoan esleituko du, banaketa berri hori egiten den unean esleipena amaitzeko falta den denborarako.

49.1. Tafallako Udalak finkatuko du hasierako prezioa, betiere eskualde honetan antzeko ezaugarriak dituzten lurrak errentan emateko prezioaren parekoa izanen dena.

50. artikulua. Enkante publikoa egin ondotik laborantzako herrilurra sobrante gelditzen bada, Tafallako Udalak zuzenean ustiatzen ahalko du.

5. ATALA

Herritarren artean esleitzeko prozedura

51. artikulua. Laborantzako herrilurrak esleitzeko prozedurari hasiera emateko, iragarkia Nafarroako ALDIZKARI OFIZIALean eta Tafallako Udalaren iragarki oholean argitaratuko da, bertan adierazita eskabideak onartzeko epea, zeina hamabost egunekoa izanen baita, Nafarroako ALDIZKARI OFIZIALean argitaratzen denetik hasita.

52. artikulua. Eskatzaileak agiri hauek aurkeztu beharko ditu:

a) Erroldatze agiria.

b) Tafallan, urtean bederatzi hilabetez bederen, egiazki eta jarraian bizi dela egiaztatzen duten agiriak (telefono fakturak, gasarenak, argiarenak, eta abar).

c) Tafallako Udalarekin dagozkion ordaindu beharrak eguneratuak dituela frogatzen duena.

d) Jabetzan dituen laborantzako lurrei eta haietako labore motei buruzko katastroko ziurtagiria.

e) Famili unitatea osatzen duten kideen zinpeko aitorpena, bai eta, lehentasuna duten herritarrentzako aprobetxamenduak eskatzen dituztenen kasuan, ezintasun fisikoa edo adimenekoa duten kideena.

f) Errentan, edo jabetzatik aparteko bestelako tituluaren bidez, lantzen dituzten lurrei buruzko zinpeko aitorpena, bai eta haietako labore motei buruzkoa ere.

g) Zergapeko hiri ondasunen kapitalen katastroko ziurtagiria, norberaren etxebizitzari dagokiona izan ezik.

h) Nekazaritza, Abeltzaintza eta Elikadura Departamentuko Azienden Erroldako ziurtagiria, famili unitate bakoitzeko abelburuei buruzkoa.

i) P.F.E.Z.ren aitorpena, edo famili unitatearen dirusarrera guztiak ageri diren frogagiriak, nekazaritzaren, abeltzaintzaren, industriaren edo zerbitzuen sektoreei buruzkoak, bai eta Gizarte Segurantzako pentsioei edo bestelako errentei buruzkoak ere.

j) Eskatzaileak edo onuradunak Nekazaritzako Gizarte Segurantzaren araubidean ordenantza honetako 41. artikuluan aipatzen den antzinatasunarekin sartuak daudela egiaztatzen duten agiriak, eta horri dagozkion ordainketak eguneraturik dituztela frogatzen dutenak, salbu nekazaritzarako erretiro aurreratua hartua dutenen edo nekazaritzarako ezintasun egoeran daudenen kasuan, horiek ezin izanen baitira onuradun izan. Tafallako Udalak urtero berrikusiko ditu egiaztagiri horiek.

k) P.A.C. aitorpenaren agiria, edukiz gero, edo haren ordezko aitorpena.

l) Zein labore mota egin gogo den adieraztea, zereala ez bada.

53. artikulua. Tafallako Udalak esleipen mota bakoitzeko onartuen zerrenda onetsiko du, behin-behinekoz, Tafallako Udalaren iragarki oholean jarriko du eta interesatuei jakinaraziko die, eta hamar eguneko erreklamazio epeari hasiera emanen dio.

54. artikulua. Erreklamazioetarako epea amaitzen bada inork halakorik aurkeztu gabe, behin-behineko zerrenda behin betikoa bilakatuko da.

54.1. Erreklamaziorik aurkezten bada, Tafallako Udalak haien gaineko ebazpena emanen du, behin betiko zerrenda onetsi eta entitatearen iragarki oholean argitaratuko du.

55. artikulua. Esleipena zozketaz eginen da, lehentasuneko aprobetxamenduetarako lehendabizi, eta, ondoren, herritarren arteko esleipen zuzenekoetarako, era honetan:

1. Modu batean zein bestean onartutakoen behin betiko zerrendei zenbakiak emanen zaizkie.

2. Herrilurretako lurzati bakoitzari dagokion zenbakia jarriko zaio.

3. Ondoren, tradizioari jarraikiz, boltsatik aterako da zenbaki bat, eskatzaile onuradunari dagokiona, eta beste bat lurzati bati dagokiona, eta biak elkartuko dira, eta horrela gainerakoekin.

4. Lurzatien zozketa amaitu ondotik, Tafallako Udaleko Gobernu Batzordeak behar diren erabakiak hartuko ditu, onuradun berriei eta egokitzen zaizkien lurzatiei buruzkoak, eta interesatuei jakinaraziko zaizkie.

56. artikulua. Behin betiko esleipenen erabakiak banan-banan eta zuzenean jakinaraziko zaizkie onuradunei.

56.1. Tafallako Udalaren erabakien aurka jotzen ahalko da, Nafarroako Toki Administrazioari buruzko uztailaren 2ko 6/1990 Foru Legean ezarrita dauden bideak erabiliz.

6. ATALA

Zura eta egurra emateko aprobetxamenduak

Atal honetan jarraitu beharko zaio Nafarroako Toki Entitateen Ondasunei buruzko Erregelamenduko 205. etik 213.era bitarteko artikuluetan araututakoari (280/1990 Foru Dekretua) eta Tafallako Udalak onesten dituen ordenantzetan ezarritakoari.

7. ATALA

Bestelako aprobetxamenduak

57. artikulua. Herrilurrak sartuz eraturiko barrutietako ehizaren aprobetxamendua gai horri buruzko foru araudian ezarritakoari jarraikiz eginen da. (Nafarroako Toki Administrazioari buruzko Foru Legeko 171. artikulua).

58. artikulua. Herrilurren okupazioa, herrilurretan harrobiak ustiatzea eta herrilurretan ezarri gogo den beste edozein aprobetxamendu edo hobekuntza, kasu bakoitzerako Tafallako Udalak prestatzen dituen baldintza pleguei lotuko zaizkie.

58.1. Horretaz gain, beharrezkoa izanen da jendaurreko epe bat, hamabost egunekoa, eta Nafarroako Foru Komunitateko Administrazioak onestea.

8. ATALA

Dirubilketa

59. artikulua. Ordainarazpena urtero izanen da, abuztuan, eta likidatuko dira aurreko nekazaritza-urtean landu diren eta, beraz, uzta bildurik duten lurzatietako eskubideen erdiak eta hurrengo nekazaritza-urtean landuko direnetakoen erdiak.

9. ATALA

Hobekuntza herrilurretan

60. artikulua. Tafallako Udalak indarrik gabe uzten ahal ditu herrilurren gainean dauden aprobetxamendu esleipenak, lur horiek ukitutako proiektuek honako xede hauek baldin badituzte:

a) Herrilurren gaineko kargak kentzea.

b) Herrilurra hobetzea.

c) Gizarterako proiektuak egitea, inguruabar pertsonalak, familiarrak edo sozialak direla medio beharrean daudela justifikatzen duten herritarrei laguntzeko. Proiektu hauek Udalak nahiz interesaturik dauden herritarrek sustatzen ahal dituzte eta lehentasuna izanen dute.

d) Oihanberritze proiektuak aurrera eramateko aukera.

60.1. Hauxe da kasu horietan jarraitu beharreko prozedura:

a) Tafallako Udalaren erabakia, proiektua eta ukitutako herrilurren aprobetxamendua arautuko duen erregelamendua onesten dituena.

b) Hilabeteko epean jendaurrean edukitzea eta aurkezten diren alegazioei buruz Tafallako Udalak hartutako erabakia.

c) Nafarroako Gobernuaren onespena. Nafarroako Gobernuaren onespenak indarrik gabe utziko ditu ukitutako herrilurretan diren esleipenak, eta titularrei sorrarazten zaizkien kalte eta galerak, bai eta lurretan eginak dituzten hobekuntzak ere, ordainduko zaizkie, zuzenbidez hala badagokie.

61. artikulua. Aprobetxamenduaren onuradunak herrilurra hobetzeko egiten dituen proiektuak Tafallako Udalak berak onetsi beharko ditu, aldez aurretik hamabost egunean jendaurrean jarri eta gero aurkezten diren alegazioak ebatzi ondoren.

62. artikulua. Herrilurretan luberriak ateratzeko aldez aurretik Nafarroako Gobernuaren baimena beharko da.

V. TITULUA

Arau-hausteak eta zehapenak

63. artikulua. Tafallako Udalak bere esku dauka Ordenantza honetan ezarritakoaren aurka egiten dutenak zehatzeko ahalmena.

63.1. Nafarroako Gobernua arduratuko da aztertu eta zehatzeaz herrilurrei eragiten dieten eta indarra duen oihan legeria hausten duten egitateak.

63.2. Aurrekoa oinarri, arau-hauste administratibotzat hartzen dira herrilurretako laboreei dagozkien egitate hauek:

Arau-hauste arinak:

1. Esleitutako lurzatiaren ehuneko laurogei gutxienez ez lantzea, salbu ezinbesteko kasua bada, Nekazaritza Batzordeak proposaturik, esleipen-hartzailea ados egonik, eta Tafallako Udalak hala iritzita.

2. Ezarritako epeen barrenean ez ordaintzea kanona, landazaintza, gizarte segurantzak, edo erregelamenduz ezartzen diren bestelako tasak.

3. Lurzati bat goldatzean ildoa irekia uztea bide baten ertzean, betiere bideari edo arekari kalte egiten badio.

4. Herrilurra esleipenarena ez den beste xede baterako erabiltzea.

5. Erreten, ubidexka eta gisakoen irteera-ahoak bideetara ematea.

6. Ordenantza honetan xedatuaren aurkako beste edozein gertakari edo egintza, arau-hauste larri edo oso larri gisa sailkatu ez dena.

Arau-hauste larriak:

1. Esleipen baten epearen barrenean hiru arau-hauste arin egitea.

2. Datu faltsuak ematea esleipena eskuratzeko asmoz.

3. Asmo gaiztoz, Tafallako Udalari ez ematea esleipen baldintzetan gerora izandako aldaketen berri.

4. Nekazaritzako lanak ordenantza honek baimentzen ez dituen aroetan egitea, larreen ustiapenaren kaltean.

5. Laborantza iraunkorrak (frutarbolak, zainzuriak, etab.) Tafalllako Udalaren baimenik gabe landatzea.

6. Ezpondak, landarteak, altxonbideak, bideak eta errekak goldatzea.

7. Harriak edo bestelako materialak bideetan, altxonbideetan edo herrilurretan botatzea Tafallako Udalaren baimenik izan gabe.

8. Esleipenetan zehazturiko epeak ez errespetatzea.

Arau-hauste oso larriak:

1. Esleipen baten epearen barrenean hiru arau-hauste larri egitea.

2. Esleitutako loteetako lurra norberak ez lantzea edo hirugarrenei lagatzea.

3. Herrilurretako loteak lantzea haiek esleiturik izan gabe.

4. Herrilurrak luberritzea gero laboreak jartzeko, udal baimen edo esleipenik izan gabe, nahiz eta landu gabeko lurrak edo larre utziak izan.

5. Azienden idoietatik ura hartzea eta horretarako tratamendu fitosanitarioetako makineria erabiltzea.

6. Laboreetakoak ez diren arbolak moztu edo botatzea, behar den baimena izan gabe.

63.3. Ordenantza honetan aurreikusi gabeko gainerako arau-hauste guztien kasuan, Tafallako Udaleko Nekazaritza Batzordeak proposatu eta Gobernu Batzordeak interpretatu, zehaztu eta zehatuko ditu.

64. artikulua. Batere ukatu gabe lehengoratu edo konpondu eta eragindako kalteak kitatu beharra, edota bidegabeki eskuratutako produktuen eta arau-haustean erabilitako baliabide eta tresnen konfiskazioa, arestian aipatutako arau-hausteak honela zehatuko dira:

a) Arau-hauste arinengatik, 60,10 eurotik 300,50 eurora bitarteko zehapen ekonomikoa.

b) Arau-hauste larriengatik, 300,51 eurotik 601,01 eurora bitarteko zehapen ekonomikoa, eta indarra duten esleipenak iraungitzea.

c) Arau-hauste oso larriengatik, 601,02 eurotik 1.202,02 eurora bitarteko zehapen ekonomikoa, eta herrilurren aprobetxamenduetako esleipen-hartzaile izateko ezgaikuntza.

65. artikulua. Arau-hausteak preskribatuko dira egitateak gauzatzen direnetik hasi eta bi hilabeteren buruan.

VI. TITULUA

Bestelako xedapen orokorrak

66. artikulua. Herrilurretako laborantzako loteen esleipen berrirako zozketa orokorra egin ondoren, beste esleipen batzuk eginen dira urtero, eta horietarako erreserbako loteak eta esleitu gabekoak erabiliko dira.

66.1. Esleipen berri horiek eskaera guztiei erantzuteko aski ez badira, lehenbizi emanen zaie lehentasunezko esleipeneko onuradun izateko baldintzak lortu dituztenei, eta gero ezkontzagatik edo legez finkatutako izatezko bikotea formalizatzeagatik; gainerakoentzat, behar den zozketa baztergarria eginen da, eta horretan bazterturik gertatzen direnek lehentasuneko txanda bat izanen dute hurrengo urteko kontzesioa arte.

67. artikulua. Herrilurretako laborantzako loteak esleitzeko urteko zozketa, aurreko artikuluan aipatzen dena, urteko azkeneko hiru hilabeteen barrenean eginen da, Tafallako Udaleko Gobernu Batzordeak finkatzen duen egunean, eskaerak hartu ondotik Tafallako Udalaren iragarki oholean jendaurrean jarriko den ediktuaren bidez iragarrita, hala jartzen baitu ordenantza honetako IV. tituluko II. kapituluko 1.tik 5.era bitarteko ataletan eta 8.ean.

68. artikulua. Herrilurretako laborantzako lote bat esleitzean, ikusten bada landuta dagoela, okerren bat dela kausa, bi aldeen arteko akordio zuzena bilatuko da, landazaina bitarteko dela. Akordiorik lortzen ez bada, kasu eginen zaio indarra duen Herri ondasunei buruzko Legeak dioenari.

68.1. Herrilurretan esleitutako lotea ereinda badago, fruitua aurreko esleipen-hartzailearena izanen da uzta jaso arte, eta orduan onuradun berriak okupatuko du.

69. artikulua. Bati egokitu zaion herrilurretako lurzatian laborantza zuzenean eta pertsonalki egiteari borondatez uko eginez gero, galduko da hura erabiltzeko aukera aprobetxamenduaren epe osorako, zeina finkaturik baitago ordenantza honen 33. artikuluan.

69.1. Hala ere, Tafallako Udalaren Gobernu Batzordearen ustean arrazoia behar bezala justifikatzen bada (lanpostua galtzea, langabezi sorospenik gabeko langabetua izatea edo ezinbesteko bestelako arrazoiren bat), eta eskatzaileak 25. artikuluko baldintzak betetzen baditu, beste esleipen baterako aukera izanen du.

70. artikulua. Herrilurretako laborantzako lurzatiak erabiltzeko aukera, edonola ere, hurrengo arrazoiengatik galduko da: herriko bizilagun izatetik gelditzeagatik, Tafallan urtean bederatzi hilabetean egiazki ez bizitzeagatik, edo Tafallako Udalarekin zerga arloko betebeharrak beterik ez izateagatik, ordenantza honetako 52. artikuluak agintzen duen moduan.

VII. TITULUA

Auzalana eta errekurtsoak

I. KAPITULUA

Auzalana

71. artikulua. Lehentasunezko esleipena nahiz herritarren arteko zuzenekoa dela medio herrilur baten onuradun diren herritar guztiak beharturik daude auzalanean parte hartzera, Tafallako Udalaren mugapeko auzo-bideak eta landabideak egin, konpondu eta kontserbatzeko lanetan.

72. artikulua. Halako obligazioa betetzen ez dutenei isuna jarriko zaie, 1.000 euro bitartekoa, eta kendu eginen zaizkie esleituak dituzten herrilurretako laborantza loteak edo herrilurretako gainerako aprobetxamenduak, zerbitzu hori ez emateagatik dagokiena ordaindu arte, batere galarazi gabe premiamendu bidea.

73. artikulua. Auzalana orain arte bezala eginen da, esleipen-hartzaile bakoitzari dagokion ekarpen ekonomikoarekin, behar den materiala garraiatzeko.

73.1. Zerbitzuagatik ordaindu beharreko kuota, esleipen-hartzaile bakoitzeko, 15 m³ legarren garraioa izanen da, edo dagokion baliokide ekonomikoa legar kopuru hori bideak konpontzeko behar den lekuraino eramateagatik.

74. artikulua. Obra horietan erabiltzen diren materialak Tafallako Udalaren eta Nafarroako Gobernuak edo bestelako erakunde ofizialek ezarritako dirulaguntzen kontura izanen dira.

75. artikulua. Auzalanaren prestaziorako atxikitzen ahalko dira traktoreak, palak, lanabesak, makineria eta atoiak, herrilanetarako legezko egokitzapena dutenak, Udalak kasu bakoitzean zehazten dituen beharren arabera, eta haien balorazioa kuota finkatzeko unean eginen da; ordea, ez dago onuradunen esku aukera honetaz baliatzea.

II. KAPITULUA

Errekurtsoak

76. artikulua. Ordenantza hau edo Tafallako Udalaren osoko bilkuraren egintzak edo erabakiak interpretatzearen ondorioz sortzen diren gorabehera guztiak ondoko errekurtsoetako bat aurkeztuz ebatziko dira:

a) Gora jotzeko errekurtsoa, Nafarroako Administrazio Auzitegiari zuzendua, errekurtsoa paratzen zaion egintza edo erabakia jakinarazi edo argitaratu ondoko hilabetearen barrenean.

b) Administrazioarekiko auzi-errekurtsoa, hilabeteko epean, errekurtsoa paratzen zaion egintza edo erabakia jakinarazi edo argitaratzen denetik hasita.

VIII. TITULUA

Herrilurretarako batzorde artekariak

77. artikulua. Halakorik sortzen bada, haren jarduerak beharko du halakoetarako ezarrita dagoen araubidearen arabera, zeina eman baitzen Nafarroako Toki Entitateen Ondasunen Erregelamenduan, urriaren 18ko 280/1990 Foru Dekretuaren bidez onetsi zen hartan, hain zuzen ere 229. artikulutik 236.era bitartekoetan, bi horiek barne.

IX. TITULUA

Herrilurren aprobetxamenduen onuradunak eta belar eta uren aprobetxamenduaren esleipen-hartzaileak

78. artikulua. Herrilurretako laborantzako loteen esleipen-hartzaileek errespetatu beharko dituzte bazkalekuen esleipen-hartzaileek haien gainean egiten duten belar eta uren aprobetxamendua eta dauzkaten eskubideak, eta, beren aldetik, bazkalekuen esleipen-hartzaileek errespetatu beharko dituzte herrilurretako laborantzako loteen esleipen-hartzaileek haien gainean egiten duten laborantzako loteen aprobetxamendua eta dauzkaten eskubideak.

78.1. Ildo horretan, kontsideratzen da belar eta uren aprobetxamendurako ordenantza sartua dagoela Tafallako Udalaren mugapeko herrilurretako ondasunen administrazio, erabilera, defentsa, berreskuratze eta aprobetxamenduari buruzko ordenantzan, eta nahitaez bete beharko dute Tafallako Udalaren mugapeko herrilurretako aprobetxamenduren baten onuradun gertatzen direnek, betiere dagokien neurrian.

XEDAPEN OSAGARRIAK

Ikusirik Nafarroako Gobernuaren Foru Dekretua, Nafarroako estepako hegaztientzako eremuak zaindu eta kontserbatzeko laguntzak arautzen dituena, eragina izan bailezake ordenantza honen aplikazioa garatzen denean.

Ikusirik Foru Dekretu horren xedeen artean aipatzen dela nekazaritzako praktika egokiak sustatzea, estepako hegazti basatiek habia egiten duten, umatzen diren edo bizi diren Nafarroako eremuak zaindu eta kontserbatu ahal izateko, eta zehazten direla bete behar diren neurriak, ondotik ematen dira Tafallako Udalaren mugapean gai hau dela eta ukituak gertatzen diren herrilurretako laborantzako loteen esleipen-hartzaileentzako betebeharrak.

_Betebehar orokorrak:

a) Galondoak erre beharko dira urte bakoitzeko irailaren batetik aurrera, betiere aurkakorik agintzen ez bada Nafarroako Gobernuak urtero argitaratzen duen araudi orokorrean.

b) Debekaturik dago parke eolikoak paratzea.

Baldin eta Tafallako Udalak hitzarmena egiten badu Nafarroako Gobernuarekin, eremua zaindu eta kontserbatzea xede, esleipen-hartzaileek honako hauek bete beharko dituzte:

1. Produktu fitosanitarioei dagokienez, bakar-bakarrik erabiltzen ahalko dira sailkapen toxikologikoan "A.A.A." izena ematen zaienak. Salbuespen gisa, zuzeneko ereintzaren edo lurlantze minimoaren kasuan, "A.A.B." motako herbizidak erabiltzen ahalko dira.

2. Ereitean bakar-bakarrik erabiliko dira hegazti faunaren iraupena arriskuan jar dezakeen produktu fitosanitariorik ez duten haziak.

3. Debekaturik dago galondoak erretzea, salbu plagak eta eritasunak kontrolatzeko biderik egokiena hori dela erabakitzen den kasu jakinetan.

4. Debekaturik dago zereala gauaz biltzea.

5. Herrilurren esleipen-hartzaileak beharturik daude Tafallako Udalak hartzen dituen konpromisoak betetzera, halakorik hartzen badu Tafallako Udalaren mugapean eraginaren pean gertatzen den eremua zaintzeko eta hartarako laguntzak lortzeko.

6. Herrilurretako lotearen esleipen-hartzaile izateak eta hura erabiltzeko kanona ordaintzeak esleipen-hartzailea ustiapenaren titular bihurtzen du, halako moldez non behin laguntzak tramitatu eta eskuratuz gero, errentariek atzera hartuko baituzte.

7. Estepako hegaztien eremuaren eraginaren pean dauden loteak ustiatzeko baldintzak ez betetzea zehapenetako hutsegite oso larria da eta ordenantza honetako 64. artikuluaren aplikazioa ekarriko du.

XEDAPEN INDARGABETZAILEA

Indarrik gabe gelditzen dira Tafallako Udalaren mugapeko herrilurretako ondasunen administrazio, erabilera, defentsa, berreskuratze eta aprobetxamenduari buruzko ordenantza, 1997ko urtarrilaren 30eko osoko bilkuran onetsi zena, eta ordenantza honetan ezarritakoei aurka egiten dioten maila bereko edo apalagoko gainerako xedapen guztiak.

AZKEN XEDAPENA

Ordenantza honi onespena emateko, Nafarroako Toki Administrazioari buruzko uztailaren 2ko 6/1990 Foru Legeko 325.1 eta 2 artikuluetan ezarritako prozedurari jarraituko zaio.

2004ko irailaren 28an eman zitzaion hasierako onespena.

Hasiera batez onetsi baita Tafallako Udalaren mugapeko herrilurretako ondasunen administrazio, erabilera, defentsa, berreskuratze eta aprobetxamenduari buruzko ordenantza, 2004ko irailaren 28an.

Espedientea jendaurrean egon da hilabetez, 2004ko 126. Nafarroako ALDIZKARI OFIZIALean, urriaren 20koan, argitaratu ondoren, eta inork ez du alegaziorik aurkeztu.

Nafarroako toki araubidea gaurkotzeko 11/2004 Foru Legeko 325.1 artikuluan xedatutakoa aplikatuz, ordenantza behin betikoz onetsitzat hartzen da eta oso-osorik argitaratzera igortzen da.

Iragarkiaren kodea: L0419385