Iragarkia

6. ALDIZKARIA - 2005eko urtarrilaren 14a

II. NAFARROAKO TOKI ADMINISTRAZIOA

2.1. ORDENANTZAK ETA BESTELAKO XEDAPEN OROKORRAK

IZARBEIBARKO ADMINISTRAZIO ZERBITZUEN MANKOMUNITATEA

Zerbitzuen Mankomunitatearen estatutuak behin betikoz onetsirik

Adiosko, Enerizko, Legardako, Muruzabalgo, Obanosko, Tirapuko, Ukarko eta Utergako Udalek, Izarbeibarko Administrazio Zerbitzuen Mankomunitatea osatzen baitute, aldaketa onetsi dute hura zuzentzen duten estatutuetan. Aldaketaren ondotik haien edukia jarraian zehazten den bezala gelditu da, argitaratzen baita uztailaren 2ko 6/90 Foru Legearen 50. artikuluko 6. araua bete beharrez.

Obanosen, 2004ko azaroaren 22an._Mankomunitateko burua, Joaquín San Martín Ayerra.

MANKOMUNITATEAREN ESTATUTUETAKO ALDAKETAREN PROIEKTUA

I. TITULUA

Eraketa, izena eta helbidea

1. artikulua. Obanosko, Utergako, Legardako, Adiosko, Enerizko, Muruzabalgo, Ukarko eta Tirapuko udalerriek Izarbeibarko Administrazio Zerbitzuen Mankomunitatea (aurrerantzean Mankomunitatea) eratu dute, estatutu hauen II. kapituluan agertzen diren beren eskumeneko zerbitzuak elkarrekin antolatu eta emateko.

Mankomunitate honen antolakuntza eta funtzionamendua Estatutu hauek xedatzen dutenari lotuko zaizkio, eta horien ordez, Nafarroako Toki Administrazioari buruzko uztailaren 2ko 6/1990 Foru Legeari eta Nafarroako Toki Entitateei aplikatzen ahal zaizkien gainerako arauei.

2. artikulua. Nortasun juridikoa eta lurralde esparrua. Mankomunitate honek badu nortasun juridiko berezkoa, hura osatzen duten udalerrien nortasunaz bertzelakoa. Horrenbertzez, gaitasun juridiko osoa izanen du bere helburu berariazkoak betetzearren egin beharreko egintza juridikoetarako.

Mankomunitatearen jardun esparruak hura osatzen duten toki erakundeen mugapeak hartuko ditu.

3. artikulua. Mankomunitateak Obanosko udalerrian izanen du bere egoitza, eta zehaztuko den lokalean ezarriko da hura osatzen duten udalerrien zerbitzu tekniko eta administratiboen gunea. Mankomunitateko organo kolegiatuen bilkurak ere hantxe eginen dira.

Nolanahi ere, behar bezala justifikaturiko kasuetan, hura osatzen duten udalerrietan egiten ahalko dira. Halakoetan, Udalek Mankomunitateari beren egoitzak erabiltzeko baimena eman beharko diote bere organo kolegiatuen bilkurak egin ahal izateko.

II. TITULUA

Mankomunitatearen xedea, eskumenak eta ahalmenak

4. artikulua. Mankomunitatearen xedea da bera osatzen duten udalerrien zerbitzu administratiboak batera ematea eta haiei eustea. Horiek idazkaritza, kontu-hartzailetza eta diruzaintza arlokoak dira, baita beroriei sostengu emateko langilearenak eta aholkularitza teknikoa eman beharrez Mankomunitateko kideek espresuki erabakitzen dituzten gainerako zerbitzuak ere.

Horretarako, udalerri bakoitzeko idazkaritza, kontu hartzailetza eta diruzaintza lanetako funtzio publiko eta beharrezkoak Mankomunitatearen plantilla organikoan horretarako agertzen diren lanpostuak betetzen dituztenei esleituko zaizkie.

Orobat, Mankomunitateak udalerri elkartuei idazkaritza, kontu hartzailetza eta diruzaintza lanetako funtzio publikoetatik heldu diren zerbitzu administratiboak emateaz gain, puntualki eta berrikusteko moduan, bere egoitzetako langile administratiboak atxikiko ditu, udalerri bakoitzak, eraketa eta/edo atxikimendua dela eta, galdatu duen moduan eta denboran.

Hasieran ezarritakoa ukatu gabe, Mankomunitateak konpromisoa hartzen du udalerri bakoitzari eta haren bizkar atxikitzeko aldi bakoitzean eskatzen diren administrazio langileak. Atxikipena, eskatutakoaren eta horren ondoriozko kontratazioaren legezko estalduraren arteko koherentziaren araberakoa izanen da betiere.

Orobat, Mankomunitateak xede izanen du udalen eskumeneko zerbitzuak egitea, udal kideek haien kudeaketarako eskuordetzen badute eta berak onartzen baditu, bereziki honako hauek:

_Mankomunitateko udalerrietan kirol, gazteria eta gizarte eta kultur arloan mota guztietako jarduerak (prestakuntzakoak eta liburutegikoak barne) planifikatu, sustatu, egin, garatu eta koordinatzea, bai zuzenean bai lankidetzan udal bakoitzarekin.

_Udal batek baino gehiagok erabil ditzakeen langile, bitarteko eta zerbitzuak kontratatzea.

_Herrietako argien mantentze lanak.

_Hilerriak eta hilerrien inguruko zerbitzuak.

_Eremu publikoaren garbiketa.

_Hirigintza arloko antolamendua, kudeaketa, betearazpena eta diziplina, eta bereziki etxebizitzen zaharberritzeari dagokiona.

_Mankomunitatearen esparruan garapena bulkatzea, toki erekundeen mailako estrategiak eginez.

Udalen eskumeneko bertze edozein zerbitzutarako eskuordetza egiteko eta Mankomunitateak hura onartzeko, hitzarmena egin beharko da, kasuan kasuko organo eskudunek onetsi beharko dutena; hitzarmen horretan zehaztuko da zerbitzua nola eginen den eta nola finantzatuko den.

4. artikulua-bis. Deskribatutako zerbitzuak hobeki kudeatzeko eta bere eskumenak hobeki erabiltzeko, Mankomunitateak hauek egin ahal izanen ditu:

a) Zerrendan agertzen diren gaien batzuetarako sailak eratu, horietara espresuki atxiki daitezen Mankomunitateko enteak.

b) Zerbitzu horiek egiteko beharrezko diren obra eta instalazio guztiak egin.

Arestian aipatu xedeetarako zuzenean nahiz zeharka balio duten jarduera guztiak egin eta legeriak toki enteei ematen dizkien eskubide eta ahalmen guztiez baliatu.

5. artikulua. Mankomunitateari dagozkio, betiere bere eskumeneko xede eta esukin barnean, toki araubideari buruzko legeriak udalerrien esku uzten dituen ahalmen hauek:

a) Arauak eta barne antolaketa egitea.

b) Finantza eta zerga arloan bere eskumenak erabiltzerakoan bere jardueratik heldu dena.

c) Bere egintzen legitimotasun eta exekutibitatearen ustea.

d) Derrigorrezko dirubilketa eta zehapenak jartzea.

e) Bere egintzak ofizioz berrikustea.

III. TITULUA

Indarraldia

6. artikulua. Mankomunitate honen iraupena edo indarraldia mugagabea izanen da eta Estatutuak Nafarroako ALDIZKARI OFIZIALean argitaratzen direnean hasiko da haren jardunbidea, Nafarroako Toki Administrazioari buruzko uztailaren 2ko 6/1990 Foru Legean xedatutakoari jarraikiz.

IV. TITULUA

Gobernu organoen antolamendua

I. KAPITULUA

Xedapen orokorra

7. artikulua. Mankomunitatearen gobernua eta administrazioa organo hauen esku daude:

a) Batzar Orokorra.

b) Mankomunitateburua.

c) Mankomunitateko buruordea.

II. KAPITULUA

Batzar Orokorra

8. artikulua. Mankomunitateko Batzar Orokorrak Mankomunitateko udalerriak ordezkatzen ditu eta udal bakoitzak osoko bilkuran izendatuko dituen hautetsiek osatuko dute.

Batzar orokorra jendaurreko bilkuran eratuko da, udal hauteskundeak egin eta hiru hilabeteko epearen barnean.

Batzar Orokorrak, bere eraketa berrian, Mankomunitateko idazkariaren aholkularitza izanen du.

9. artikulua. Mankomunitatea zenbat udalerrik osatzen duten, horrenbertze kide izanen du Batzarrak. Kide bakoitzak boto ponderatua izanen du bere biztanleriaren ariora. Hura Estatistikaren Institu Nazionalak onesten dituen azken datu ofizialei dagokiena izanen da beti.

Hala ere, udalerri bakoitzak ordezkari titular bat izendatzen ahalko du eta bertze bat haren ordezko. Biek dagokien ordezkaritza izanen dute beren gain, boto bakar baten bidez baizik ez.

10. artikulua. Mankomunitateko batzarkideek, orokorrean, beren kargua utziko dute honelakoetan:

a) Beren udalbatzako kide izateagatik zuten agintaldia betetzean. Horrela izanez gero, Batzar Orokorreko kide diren aldetik lanean jarraituko dute beren ondorengoak karguaz jabetu arte. Dena dela, bakarrik administrazio arruntaz arduratuko dira eta bitarteko epe horretan ez da erabakirik hartzen ahalko gehiengo kualifikatua behar bada horretarako.

b) Epai judizial irmoagatik, heriotzagatik, ezgaitasunagatik, Udaleko zinegotzi edo Mankomunitateko Batzar Orokorreko kide izateko karguari uko egiteagatik. Horrelakoetan, kasuan kasuko Udalak kide berria izendatuko du osoko bilkuran batzartuta.

11. artikulua. Batzarrari eskurantza hauek dagozkio:

a) Mankomunitateburua hautatu eta kargutik kentzea.

b) Mankomunitateburuaren jarduna kontrolatu eta fiskalizatzea.

c) Erregelamendu organikoa onestea eta baita Mankomunitatearen eskumenen barnean dauden bertzelako xedapen orokorrak ere.

d) Zerga bidezko baliabide berezkoak zehaztea, aurrekontuak onetsi eta aldatzea, bere eskumenen barneko arloei dagozkien gastuak xedatzea eta kontuak onestea.

e) Plantilla organikoa, lanpostuen zerrenda, lan eskaintza eta langileak hautatzeko probetarako oinarriak onestea, baita funtzionarioak zerbitzutik kentzeko erabakia hartu eta lan araubideko langileak botatzeko berrespena ematea ere.

f) Kreditu edo bermeei buruzko erabakiak hartzea, kita eta itxoiteak ematea, mankomunitateburuari dagokionean izan ezik.

g) Ondasunak eskuratu eta besterentzea, mankomunitateburuari dagokionean izan ezik.

h) Obra, zerbitzu eta hornidurak kontratatzea, mankomunitateburuari dagokionean izan ezik.

i) Bere zerbitzuak kudeatzeko modua onestea.

j) Egintza administratibo eta judizialak burutzea.

k) Bertze administrazio publikoekin elkarlanean eta lankidetzan aritzeko hitzarmenak onestea.

l) Legeek espresuki haren gain uzten dituen gainerakoak.

12. artikulua. Batzarrak bere edozein ahalmenetarako eskuordetzen ahal du, osorik nahiz partez, mankomunitateburua, toki araubidearen legeriaren ariora eskuordetu ezin direnak salbu.

13. artikulua. Nafarroako toki entitateen erabakien araubidearen ariora hartuko dira erabakiak. Erabakiak bertan diren kideen gehiengo soilez hartzea izanen da arau orokorra, ezarritako boto ponderatua kontuan hartuta. Gehiengo kualifikatuaren botoa beharrezkoa izanen da, ordea, legeak horrela eskatzen duenean.

Azaroaren 26ko 30/92 Legearen 23. artikuluan xedatutakoari jarraikiz, mankomunitateburuari dagokio bere botoaren bidez trenkatzea Batzarraren eskumeneko erabakietan izan daitezkeen berdinketak.

Batzarrak bilkura arruntak izanen ditu aldez aurretik ezarritako aldikotasunez, eta bilkura bereziak ere bai, gainera presakoak izan daitezkeenak. Gutienez ere, hiru hilabetetik behin eginen da bilkura arrunta.

Mankomunitateburuak eginen du Batzar Orokorrerako deia eta berak finkatuko du bilkuraren gai zerrenda. Deia garaiz eginen da, ordezkari guztiek denbora aski izan dezaten garatuko diren gaiak aztertzeko.

Deia bilkura ordua baino gutienez ere berrogeita zortzi ordu lehenago jakinaraziko da, presakoetan salbu erta halakoetan aski arrazoiturik badaude.

Deialditik aitzina, kideek beren esku izanen dituzte espedienteak eta landu beharreko gaiak, horretarako toki egoki batean.

Deietan bilkura zer egunetan, ordutan eta tokitan eginen den adieraziko da.

III. KAPITULUA

Mankomunitateburua

14. artikulua. Udaletako ordezkari guztiak izanen dira, txandaka eta bi urtetik behin, mankomunitateburu. Hartara, Mankomunitateak bere egoitza zer udalerritan duen, hantxeko udalerrikoa hasiko da eta epe hori iraganda bere agintaldia bukatzen duenean horren ondotik alfabetoz heldu den udalerrikoa izanen da, eta horrela segiturik, ordezkapen bakoitza zer legegintzaditan egiten den kontuan hartu gabe.

Nolanahi ere, mankomunitateburutza dagokion udalerri elkartu bakoitzak, bere ordezkariaren bitartez, uko egiten ahalko dio karguari. Halakoetan, alfabetoz horren ondotik heldu den udalerriko ordezkariak hartuko du, eta horrela betiere hurrengo kasuetan ere.

Batzarreko gainerako ordezkariek ere, baita lehenago mankomunitateburu ibilitakoak ere, uko egiten badiote mankomunitateburutzari, nahitaez hartu beharko du bere gain mankomunitateburutza azkenekoz izan duenaren ondoko udalerriko ordezkariak, alfabetozko segidari jarraikiz.

15. artikulua. Mankomunitateburuak eskurantza hauek ditu:

a) Mankomunitatearen gobernua eta administrazioa zuzentzea.

b) Mankomunitatearen ordezkari izatea.

c) Batzar Orokorraren bilkuretarako deialdia egin eta haietan buru izatea.

d) Obra, zerbitzu eta hornidurak kontratatzea, zenbatekoak aurrekontuaren baliabide arrunten % 5etik goiti edo zuzeneko kontrataziorako ezarrita dagoen muga orokorraren % 50etik goiti egiten ez duen bitartean, eta, nahiz eta zenbateko hori gainditu, urtebetetik goitiko iraunaldia ez izan eta urteko aurrekontuan kontsignatutakoa baino kreditu handiagorik behar ez duten bitartean.

e) Ekintza judizial nahiz administratiboak egitea presarik izanez gero.

f) Aurrekontuen proiektuak gauzatzea, gastuak xedatu bere eskumenen mugen barnean eta ordaintzeko agindua eman, dirusarreren formalizazioa dakarten agiriak baimendu eta kontuak aurkeztea. Garapena eta kudeaketa ekonomikoa, onetsitako aurrekontuari jarraikiz. Garapena eta kudeaketa ekonomikoa, onetsitako aurrekontuari jarraikiz.

g) Mankomunitatearen interesetarako arrisku larria dagoenean, bere erantzukizunpean, behar diren neurri egokiak hartu eta haien berri ematea berehala Batzarreari.

h) Ondasunak kostu bidez eskuratzea, zenbatekoak aurrekontuaren baliabide arrunten % 5etik goiti eta zuzeneko kontratazioari aplikatzen zaion % 50eko muga orokorretik goiti egiten ez badu.

i) Ondasunak doan eskuratzea, eskuratze horrek kostu bidezko baldintza edo modalitateren bat dakarrenean salbu, kasu horretan batzarrearen eskumena izanen baita hori egitea.

j) Ondasunak, higigarriak nahiz higiezinak, bertzerentzea, zenbatekoak baliabide arrunten %5 etik goiti eta zuzeneko kontratazioari aplikatzen zaion % 50eko muga orokorretik goiti egiten ez badu.

k) Legeak espreski aitortzen dizkion gainerakoak.

l) Zerbitzu administratiboen arloan legeriak udalerriei ematen dizkien eskumenak, bertze organoren bati espreski ematen ez bazaizkio.

16. artikulua. Mankomunitateburuak eskuordetze generiko nahiz berariazkoak egin ditzake Batzarreko bertze edozein kideren alde, legeak eskuordeezintzat jotzen dituen eskumenak izan ezik.

IV. KAPITULUA

Mankomunitateko buruordea

17. artikulua. Mankomunitateburua ordezkatzea zein udalerriri dagokion, haren udalerriko kide titularra izanen da Mankomunitateko buruordea, betiere Estatutu hauen 14. artikuluko edukiaren ondoriekin.

Mankomunitateko buruordeari dagokio mankomunitateburua haren eginkizun guztietan ordezkatzea, hura kanpoan bada, eri edo bere eginkizunetan aritzeko ezindurik dagoenean, baita mankomunitateburua hautaturik ez dagoenean ere, mankomunitateburua izendatzen den arte.

V. KAPITULUA

Idazkaritza

18. artikulua. Idazkariak bilkura bakoitzeko aktak eginen ditu, eta funtzio publiko hori egiteko izendatu edo kontratatu den pertsonak eginen ditu eginkizun horiek, hura izaten ahal dena aldi baterako gaitzeko legezko ahalbidea ukatu gabe.

IV. TITULUA

Ondasunak eta zerbitzuak

I. KAPITULUA

Ondasunak

19. artikulua. Mankomunitatearen ondarea osatuko dute bereak dituen jabari publikoko edo ondareko ondasun, eskubide eta akzio guztiek.

20. artikulua. Mankomunitateko jabari publikoko ondasunak dira erabilera edo zerbitzu publikorako diren higiezinak eta baita legez izaera hori dutenak ere.

21. artikulua. Udalerriek, Mankomunitatean sartzen direnean, dohainik emanen dizkiote Mankomunitatearen titulartasunaren menpe gelditzen diren zerbitzu guzti-guztiei atxikitako aktibo material eta inmaterialak, subrogazioa eginez udal kargetan.

22. artikulua. Mankomunitateak, bere ondasunei dagokienez, legeriak Udalerriendako onartzen dituen eskubide guztiak ditu, bai ondasun horiek babesteko bai berreskuratzeko.

II. KAPITULUA

Zerbitzuak

23. artikulua. Bere xede diren zerbitzuak emateko, Mankomunitateak edozein kudeaketa bide hauta dezake legeak ezartzen dituenen artean.

V. TITULUA

Ogasuna

24. artikulua. Baliabide hauek osatuko dute Mankomunitatearen ogasuna:

a) Zuzenbide pribatuko dirusarrerak edo berekiak.

b) Isunak.

c) Mankomunitatean sartzen diren udalerrien ekarpenak.

d) Dirulaguntzak eta zuzenbide publikoko bertzelako dirusarrerak.

e) Kreditu eragiketetatik heldu direnak.

f) Tasak, zerbitzuak edo jarduketak egitearen truke.

Udalerri elkartuen ekarpenak eginen dira:

1. Udalerri bakoitzeko biztanle kopuraren ariora (urte bakoitzeko urtarrilaren lehenari dagokionez), Mankomunitatea ezartzeko edo handitzeko gastuak nahiz behar diren funtzio publikoak egiteko langileenak eta langile horiei zuzenean sostengu emateko eta guztien aprobetxamendurako gastuak finantzatu beharrez.

2. Oso-osorik eta bakoitzari berea, Udalerri elkartu bakoitzerako eskatzen diren gainerako zerbitzuetan erabiltzen diren baliabideen ariora.

Udalerri elkartuek, Mankomunitateari egin behar dizkioten ekarpen berariazkoak egozteko, zehaztu beharko dute zein zerbitzutara atxikitzen diren Mankomunitateak kudea ditzan, deusetan ukatu gabe gastu orokorrak finantzatzeko behar diren ekarpenak egin behar izatea zerbitzu bakoitzaren ondoriozkoen heinean.

25. artikulua. Mankomunitatearen dirusarrerak halako zerbitzu edo jarduera baten ondoriozko eginbeharrak betetzeko izanen dira, haiek finantzatzeko ezarri edo bildu baitira.

26. artikulua. Mankomunitateak ahalmena du Nafarroako Gobernuari eskatzeko hura osatzen duten udalerriek berarekin dituzten zorrak ordaintzeko, udalerri zordunari Transferentzia Arrunten Fondoan duen partaidetzatik behar diren diru-kopuruak kenduz.

VI. TITULUA

Langileria

27. artikulua. Mankomunitatearen zerbitzuko langileak funtzionarioak, kontratudun finkoak edo aldi baterakoak eta behin-behinekoak izanen dira, legerian eta plantilla organikoan xedatutakoarekin bat.

Entitate berrian eta honek dirauen bitartean sartzen diren udalerrietako administrazioko funtzionarioen kasuak aparte utzirik, idazkaritza, kontu hartzailetza eta diruzaintzako funtzio publikoak egiteko ezartzen diren langileak baizik ez dira izanen funtzionario, eta horrela agertuko da Mankomunitatearen plantillan. Hala ere, lehenagotik horrelakorik ez bada, eta lanpostu horiek funtzionarioekin behin betikoz betetzen ez diren bitartean, administrazio kontratuak eginen zaizkie.

Behin-behineko langileak ez diren gainerakoak, administraziokoak nahiz laguntzarako teknikariak izan, lan-kontratudunak izanen dira.

VII. TITULUA

Aldaketa eta desegitea

28. artikulua. Estatutuak eta, beraz, Mankomunitatea aldatzeko arrazoiak izanen dira bere jardun esparrua aldatzeagatik (udalerri batzuk sartu eta/edo atera) eta/edo eskumen gehiago bereganatzeagatik.

Kasu batean nahiz bertzean, bidea Nafarroako Toki Administrazioari buruzko 6/90 Foru Legearen 50.3 artikuluan ezarritakoa izanen da.

29. artikulua. Udalerriren bat Mankomunitatean sartzeko bide hauetariko bat erabiliko da:

a) Interesa duen udalerriaren eskaera.

b) Batzar orokorraren adostasun txostena; horretarako erabakia hartuko da gehiengo osoaren botoaz.

c) Jendaurreko epea, hilabetekoa.

d) Epe hori alegaziorik gabe iraganez gero, atxikipena behin betikotzat hartuko da. Bertzenaz, batzarrak aurkezturiko erreklamazio edo iradokizunak ebatziko ditu eta behin betiko erabakia hartuko, horretarako ere gehiengo osoaren botoa beharko delarik.

e) Udalerri sartu berriak, zenbat biztanle dituen, horren araberako ekarpena egin beharko du Mankomunitatearen aktiboan, sartzeko momentuan egiten den balorazioaren ariora. Nolanahi ere, kide berria ekarpen horri itzurtzen ahalko zaio, baldin eta, bidezko denean, konpentsatzen bada Nafarroako Gobernuak udal mapa arrazionalizatzeko eta haren berrantoketa administratiboa egiteko ezartzen dituen sustapen neurriekin, edo, hala behar badu, barkatzen bazaio haren atxikimendua onesten denean, haren sarrera antolaketa sisteman desorekarik gabe bermatzeko behar diren ekarpenak egin dituelako.

30. artikulua. 1. Kide batek Mankomunitatea utzi ahal izateko, egiaztatu beharko da lege estaldura eta kaudimen ekonomikoa Mankomunitatearen xede den zerbitzua berak bakarrik emateko ahalmena duela, eta lau urte iragan beharko dira Mankomunitatea eratu denetik. Horretarako arrazoiak hauek izan daitezke:

a) Udalerriak berak eskaturik.

b) Udalerriak Mankomunitearekin dituen obligazioak behin eta berriz ez betetzeagatik. Ateratzeko arrazoia azken hori bada, Mankomunitateak berak hartuko du erabakia, aurreko artikuluaren b), c) eta d) ataletan ezarritako prozedurei jarraikiz.

2. Nola nahi den ere, Mankomunitateak eta delako udalerriak elkarrekiko dituzten obligazioak eta eskubideak nola kitatu erabakiko dute.

3. Udalerri batek edo batzuek Mankomunitatea utzi dutelako zenbait lanpostu beharrezkoak suertatzen ez badira, bi aukera hauek egonen dira: Udalak bere plantilla organikoan sar ditzake Mankomunitateko langile horiek, funtzionario ez direnak, edo, bertzenaz, Mankomunitateak bere gain har ditzake kontratu horiek iraungitzeatik sortutako ondorio ekonomikoak.

4. Mankomunitatea eratu baino lehen legez eraturiko idazkarien batasun batekoa bada, Mankomunitatetik lekutu nahi duen udalerriak hasiera batean elkarturik zegoen gainerako udalerriekin batera egin beharko du. Gainera, horretarako eskumena duen erakundearen baimena beharko du aldez aurretik, aginduzkoa baita.

31. artikulua. Mankomunitatea desegiteko, toki araubideko legerian Estatutuak aldatzeko ezarri tramite berberak egin beharko dira.

Mankomunitatea desegindakoan, udalerriak izanen dira hark hartutako obligazioen erantzule, haren gastu bakoitza finantzatzeko ezarritako irizpideei jarraikiz.

Era berean, irizpide horixe bera erabiliko da Udalerri bakoitzak Mankomunitateko ondasun eta eskubideetan duen partaidetza zehazteko.

Mankomunitateko kide diren udalerriek aukera izanen dute toki entitate horren langileetan funtzionario ez direnak udal batek berak bakarrik hartzeko edo, bertzenaz, lan kontratuak iraungitzeagatik heldu diratekeen ondorio ekonomikoen erantzukizuna hartzeko, bakoitzaren atxikipen denboraren heinean. Hala ere, funtzionario ez diren langileak Mankomunitatean sartu badira Mankomunitateko udalerriren batekin lehenagotik kontratua izateagatik, jatorrizko administraziora itzuliko dira, eta horrek nahi bezala hautatuko du aipatu diren bi aukera horien artean.

Mankomunitateko funtzionarioek, hura desegitean, bere egoera administratiboaren arabera aukera hauek izanen ditu:

_Hasierako administraziora itzultzea, Mankomunitateko langile horiek hartan sartu badira, abuztuaren 30eko 251/93 Legegintzako Foru Dekretuaren hamabigarren xedapen gehigarrian xedatutakoari jarraikiz.

_Nafarroako Toki Administrazioari buruzko 6/90 Foru Legearen VII. tituluko II. kapituluko 1., 2. eta 3. sekzioetan aurreikusten diren merezimendu lehiaketetan parte hartzea.

Mankomunitatea desegitetik funtzionariek bere lanpostu berrien jabetza hartzen duten arte, Mankomunitateko kideek haien lansariak ordaindu beharko dituzte, bakoitzak bere heinean.

XEDAPEN IRAGANKORRAK

Lehenbizikoa._Mankomunitateak bere gain hartzen ditu Mankomunitateko udalek dituzten eskubide eta obligazio guztiak administrazio zerbitzuak egiteko hemendik aitzina Mankomunitatea osatuko duten udalerrietan, salbu eta elkarte berrian bertzerik gabe sartzen ahal ez diren langileekin kontratuak izateagatik zituzten konpromisoetatik etorritako obligazioak.

Mankomunitateko udalerrietako funtzionarioak, estatutu hauek indarra hartzen duten unean haren zerbitzu eta eginkizunetan ari zirenak, sortutako entitate berriaren funtzio publikoaren antolaketan sartuko dira hasiera batean, abuztuaren 30eko 251/93 Legegintzako Foru Dekretuaren hamabigarren xedapen gehigarrian aurreikusten den bideari jarraikiz.

Orobat, Mankomunitateko udalerrien funtzionario ez diren langileei dagokienez, aukera izanen da elkarte berrian beren borondatez sartzeko jatorrizko administrazioan zuten kontratuaren eduki bera izanik, edo bertzenaz, bakoitzak bere udalerriarekin zuen kontratua deseginik.

Bigarrena._Estatutu hauek indarra hartzen dutenetik hamabortz eguneko epean, Mankomunitateko udalerri guztien ordezkariei dei eginen zaie Batzarre Orokorra eratzeko bilkurara etor daitezen. 8. artikuluko azken lerroaldeak aurreikusitakoari jarraikiz idazkaritza lanak nori dagozkion, harexek eginen du delako bilkuraren deialdia, eta hartan mankomunitateburua hautatuko da.

Horrez gain, batzarrearen aburuz presakoak diren gaiak eztabaidatzen ahalko dira.

Hirugarrena._Mankomunitateak indarra hartzetik plantilla organikoan sarturiko lanpostu bakoitza kontratatu eta/edo izendatzeko hautapen prozedurak prest egon arte luzatuko da mankomunitatearen xede diren zerbitzu administratiboak ematea.

Bitarte horretan, kontrakoa erabaki ezik, indarra izanen dute beti Mankomunitateko udalerriek lehenagotik itxuratutako lanpostuen jabetza zuten langileekin funtzionari izan ala lan-kontratudun izan zeuzkaten ardurek, administrazio zerbitzu horiek emateko.Epe hori amaitzen denean iraungi eta/edo deseginen dira denak batera.

Orobat, Mankomunitateak behar dituen funtzio publikoak Obanosko udalerriko idazkariak beteko ditu bitarte horretan, hura baita Mankomunitatearen egoitza. Hala ere, ez da ukatzen horretarako baldintzak betetzen dituenak lehenagoko arrazoiengatik egin ahal izatea.

Iragarkiaren kodea: L0418650