I. NAFARROAKO FORU KOMUNITATEA
1.1. XEDAPEN OROKORRAK
1.1.3. Foru Aginduak
167/2005 FORU AGINDUA, abenduaren 12koa, Lehendakaritza, Justizia eta Barne kontseilariak emana, Nafarroako Foru Komunitateko Administrazioaren eta haren erakunde autonomoen zerbitzuko langileen 2006ko lan egutegia onesten duena.
Lan zuzendari nagusiak, maiatzaren 26ko 462/2005 Ebazpenaren bitartez, Nafarroako Foru Komunitatean 2006. urteko jaiegunak zein izanen diren erabaki ondoren, eta nahiz ez diren bukatu sindikatuekin egiten ari diren negoziazioak Nafarroako Foru Komunitateko Administrazioko eta haren erakunde autonomoetako langileek 2006. urtetik aurrera izanen dituzten lan baldintzak zehazteko, bidezko da langile horien 2006ko aste tarteko jaien egutegia eta haien lanaldiaren urteko lanordu kopuruaren banaketa onestea, abenduaren 27ko 624/1999 Foru Dekretuak ezarritako urteko lanordu kopuruaren arabera, alde batera utzi gabe sindikatuen ordezkariekin egiten diren negoziazioetan lortzen ahal diren akordioak.
Horrenbestez, otsailaren 21eko 30/2005 Foru Dekretuaren bidez esleiturik ditudan eskurantzak erabiliz,
AGINDU DUT:
1. artikulua. Jaiegunak zehaztea.
1. Nafarroako Foru Komunitateko Administrazioaren eta haren erakunde autonomoen zerbitzuko langileendako, 2006an, aste tartean izanen dituzten jaiegunak hauexek izanen dira:
Urtarrilaren 6a: Errege eguna.
Apirilaren 13a: Ostegun Santua.
Apirilaren 14a: Ostiral Santua.
Apirilaren 17a: Pazko biharamuna.
Maiatzaren 1a: Langileen eguna.
Uztailaren 6a: San Fermin bezpera, 12:00etatik aurrera jai Iruñean lan egiten dutenendako.
Uztailaren 7,8 eta 10a: Sanferminak, jaiegunak Iruñean lan egiten dutenendako.
Uztailaren 25a: Santiago eguna.
Abuztuaren 15a: Abuztuko Andre Maria.
Urriaren 12a: Espainiako jai nazionala.
Azaroaren 1a: Santu Guztien eguna.
Azaroaren 29a: San Saturnino, jaieguna Iruñean lan egiten dutenendako.
Abenduaren 4a: astelehena, San Frantzisko Xabierkoa, Nafarroako Eguna denaren biharamuna.
Abenduaren 6a: Konstituzioaren eguna.
Abenduaren 8a: Ama Birjina Sortzez Garbia.
Abenduaren 25a: Eguberri eguna.
2. Iruñean lan egiten ez dutenentzat jaiegun izanen dira, herriko bestak direla-eta, santu zaindariaren eguna, hurrengo hirurak eta bezpera, azken hori 12:00etatik aurrera. Gainera, beste jaiegun bat ere izanen da, herriari usadioz edo erlijioaren aginduz dagokiona hain zuzen ere.
2. artikulua. Urteko lanorduen banaketa.
Nafarroako Foru Komunitateko Administrazioan eta haren erakunde autonomoetan urteko lanorduen kopurua, 1.592koa izanen dena, honela banatuko da:
1. Astelehenetik ostiralera bitarteko eguneroko lanaldia, orokorrean, 7 ordu eta 21 minutukoa izanen da. Nahitaez aritu beharko da 8:00etatik 15:00ak arte; gainerako 21 minutuak egiteko langileek malgutasuna izanen dute, 7:39tik 8:00ak arte eta 15:00etatik 15:21 arte.
2. Artikulu honetan ezarritako urteko lan orduen banaketa doitzeko, aurreko atalak ezarritako lanaldia duten eta Iruñean lan egiten ez duten langileek 25 ordu eta 6 minutuko murrizketa orokorra izanen dute herriko bestetan, edo herriari usadioz edo erlijioaren aginduz dagokionean, kasu bakoitzeko egoeraren arabera banatuta. Murrizketa honek Iruñean diharduten langileei dagokienak bezainbat ordu egiten du.
3. Artikulu honetako aurreko ataletan ezarritako lanaldiaren banaketa ez zaie aplikatuko, zerbitzuko beharrak direla eta, lanaldi berezia edo ordu konpentsazioren bat (lana txandaka, gauez, e.a.) dutenei, ez eta ikastetxeei eta osasun zentroei atxikita daudenei ere, horiek lan egutegi berezia izanen baitute.
Urteko lanorduen kopurua banatzeko orokorrean ezarritakoa ez bezalako erregimena dagoen kasuetan, lan egutegi berezi horrek, betiere lanaldiaren urteko kopurua errespetatuz, indarrean dagoen erregimenari eutsiko dio, bai eguneko lanaldiaren edo txanden iraupenari dagokionez, bai urteko lanorduak asteko egunetan banatzeko kasu bakoitzean erabiltzen den moduari dagokionez; horrek guztiak ez du galarazten beste ordutegi batzuk edo urteko lanorduak banatzeko bestelako erregimenak ezartzeko aukera, zerbitzuaren beharrek hala aholkatzen dutenean, dagokion Mahai Orokorrean edo sektorialean negoziatu ondoren.
4. Zerbitzuaren beharrak direla-eta hala komeni denean, Lehendakaritza, Justizia eta Barne Departamentuak, horretan interesa duen Departamentuak proposaturik, zenbait kasu edo administrazio unitatetan artikulu honetako lan ordutegia ez bezalakoa izatea baimen dezake, aitzinetik Mahai Orokorrarekin edo sektorialarekin negoziatu ondoren eta, betiere, ezarritako urteko lanordu kopurua errespetatzen bada.
AZKEN XEDAPENA
Azken xedapen bakarra. Indarra hartzea.
Foru agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, 2005eko abenduaren 12an._Lehendakaritza, Justizia eta Barne kontseilaria, Javier Caballero Martínez.
Iragarkiaren kodea: F0523911
