I. NAFARROAKO FORU KOMUNITATEA
1.3. BESTELAKO XEDAPENAK
1.3.4. Dirulaguntzak eta bekak
161/2004 FORU AGINDUA, ekainaren 2koa, Vianako Printzea Erakundea-Kultura eta Turismo kontseilariak emana, turismo arloko enpresa txiki eta ertainak informatizatzen laguntzeko fondo galdurako dirulaguntzen deialdiko arauak onesten dituena.
Vianako Printzea Erakundea-Kulturako eta Turismo Departamentuak Foru Komunitateko Turismo arloa garatzeko asmoz, Turismoko Plan Estrategikoa prestatu du 2001-2004 urteetarako.
Aipatu plan estrategiko horren xedea Nafarroa turismoko destino bereizi gisara finkatzea da, komunitateko baliabide eta produktu turistikoak antolatuz: natura eta paisaia, ondarea eta kultura, hiri/komunitate aurreratua, gastronomia eta ardoak, eta eskualde guztietan aberastasuna eta enplegua sortuko dituzten produktu berriak ezartzea.
Horretarako, plana sei ildo estrategikotan antolatzen da eta bertan biltzen dira arloko profesionalizazioa, turismoaren garapen orekatua eta baliabide teknikoen eta ekonomikoen erabilpen eraginkorra lortzeko Vianako Printzea Erakundea-Kulturako eta Turismo Departamentuak bultzatu beharreko ekintzak.
Testuinguru horretan, lehenbiziko ildo estrategikoa turismo arloko zerbitzu eta azpisektore guztien kalitatearen alde apustu egitea da. Horretarako, telekomunikazioen teknologia berriak kalitate hori lortzeko tresna oso erabilgarritzat jotzen dira.
Ildo horretan, Departamentuak ezarritako sustapen politikari jarraipena emateko, bidezkotzat jo da laguntzak ematen jarraitzea, turismoko enpresa txiki eta ertainek beren egitura berriak edo lehendik dituztenak egokitu ditzaten. Horrela, bide emanen da ostatu-establezimendu eta jatetxeetan teknologia berriak erabiltzeko eta Turismoko Plan Estrategikoan aipaturiko ekintzetako batzuk burutzeko.
Horrenbestez,
AGINDU DUT:
1. Turismo arloko enpresa txiki eta ertainak informatizatzen laguntzeko fondo galdurako dirulaguntzen deialdiko arauak 2004rako onestea. Foru agindu honetako eranskinean ageri dira.
2. 200.000 euroko gastua baimentzea, foru agindu honek sortzen dituen konpromisoak betetzeko. Ordainketa 2004ko gastu aurrekontuko "Turismo arloko enpresa txiki eta ertainak informatizatzeko plana" deritzon A10001-A1120-7709-751207 kontusailetik finantzatuko da.
3. Foru agindu hau eta bere eranskina Nafarroako ALDIZKARI OFIZIALean argitaratzea.
Foru agindu honen aurka gora jotzeko errekurtsoa jartzen ahal da, Nafarroako Gobernuari zuzendua, jakinarazi eta biharamunetik hilabeteko epean.
Iruñean, 2004ko ekainaren 2an._Vianako Printzea Erakundea-Kultura eta Turismo Departamentuko kontseilaria, Juan Ramón Corpas Mauleón.
E R A N S K I N A
Turismo arloko enpresa txiki eta ertainak informatizatzen laguntzeko fondo galdurako dirulaguntzen deialdiko arauak, 2004ko ekitaldirako
1._Dirulaguntzaren xedea.
Dirulaguntza hauen xedea da turismo arloko enpresa txikiei aukera ematea beren kudeaketa hobetzen duten teknologia berriak eskuratzeko, ekipoak eta informatikako aplikazioak erosteko eta aplikazio horiei buruzko prestakuntza ikastaroak egiteko sostengatuz.
2._Onuradunak.
Enpresa txiki eta ertainen definizioari buruz Europako Batzordeak 1996ko apirilaren 3an eman 96/280/CE Gomendioan xedaturikoaren arabera enpresa txiki eta ertaintzat joak daudenak izan daitezke laguntza hauen onuradun, turismo arloko administrazioak emaniko baimena badute.
3._Laguntzak jasotzen ahal dituzten inbertsioak.
Turismo arloko enpresa txiki eta ertainen kudeaketa hobetzeko inbertsioek jasotzen ahal dituzte laguntza hauek, kontzeptu hauetariko baten bati badagozkio:
_Informatikako ekipoak, altzariak izan ezik.
_Kudeaketa integratua garatzeko bide ematen duten informatikako aplikazioak.
4._Laguntzen zenbatekoa.
Laguntzek ekipoetan eta informatikako aplikazioetan eginiko inbertsioen % 20 eginen dute fondo galdura, 6.000 euro enpresako gehienez.
Dirulaguntza kalkulatzerakoan Balio Erantsiaren gaineko Zergaren (BEZa) zenbatekoa kenduko da.
2004ko gastuen aurrekontuan xede horretarako kontusail bat dago, 200.000 eurokoa, "Turismo arloko enpresa txiki eta ertainak informatizatzeko plana" izenekoa ( A10001-A1120-7709-751207 kontusaila).
Dirulaguntza eskaerek deialdi honi esleitutako kontusaileko dirua gainditzen badute, dirulaguntza kopuruak hainbanatu eginen dira, dagoen diruari egokitzeko.
5._Eskaerak eta agiriak aurkezteko epea.
Eskabideak aurkezteko epea hilabete batekoa da, deialdi hau Nafarroako ALDIZKARI OFIZIALean argitaratu eta biharamunetik hasita.
Eskaera beteko da horretarako propio eratutako formularioa betez. Delako formularioa eskura dago Turismoaren Sektorea Sustatu eta Antolatzeko Zerbitzuan eta Interneteko helbide honetan: www.navarra.es/home_es/Catalogo+de+servicios/Ayudas/
a) Pertsona fisikoak: NANaren fotokopia.
b) Pertsona juridikoak: IFKren fotokopia. Merkaritza sozietateak izanez gero, sozietatea eratzeko eskritura publikoaren kopia eta horren aldaketena (Merkataritza Erregistroan behar bezala inskribatuak). Beste sozietate edo entitateetarako, eraketa frogatzen duen agiriaren kopia, kasuan kasuko Erregistroan inskribatua, hala bada.
c) Entitatearen legezko ordezkariaren aitorpena, azken hiru urteetan -aurtengoa barne-Administrazio honetatik edo beste batetik jasotako laguntzei buruzkoa (Europako Batasuneko "de minimis" arauaren menpeko laguntzak betiere).
d) Dirua transferentzia bidez jasotzeko inprimakia, behar bezala betea.
e) Memoria eta aurreikusiriko inbertsioaren aurrekontu zehatza.
Agiriak Industria eta Teknologia, Merkataritza eta Lan Departamentuko erregistroan (Tomás Caballero parkea, 1, Iruña) aurkeztuko dira, edo Nafarroako Gobernuaren Erregistro Orokorraren antolamendua eta funtzionamendua arautzen dituen ekainaren 24ko 137/2002 Foru Dekretuaren II. eranskinean aipaturiko Nafarroako Gobernuaren Erregistro Orokorreko edozein bulegotan, edo Administrazio Publikoen Araubide Juridikoari eta Guztiendako Administrazio Prozedurari buruzko azaroaren 26ko 30/1992 Legeko 38.4 artikuluan adierazitako gainerako moduetan.
6._Eskaeren izapidaketa.
Aurkeztutako dokumentazioa osorik ez badago, interesatuari eskatuko zaio 10 eguneko epean okerrak zuzen ditzala; adieraziko zaio hala egiten ez badu eskaerari uko egiten diola ulertuko dela.
Laguntza-eskaerak Turismoaren Sektorea Sustatu eta Antolatzeko Zerbitzuaren bidez tramitatuko dira, ebazpen proposamena igorriko baitu.
Aurkeztutako eskaerak ebazteko bi hilabeteko epea dago, eskaerak aurkezteko epea bukatzen den egunetik hasita. Epe horretan ebazpenik ematen ez bada, ezetsitzat jo beharko da.
7._Laguntzen ordainketa.
Vianako Printzea Erakundea-Kultura eta Turismo Departamentuak onetsitako dirulaguntzaren zenbatekoa ordainketa bakarrean pagatuko da, eginiko inbertsioaren justifikazioa aurkeztu ondoren:
8._Onuradunen betebeharrak.
Hona hemen laguntza hauen onuradunen eginbeharrak:
a) Egindako gastuak 2004ko urriaren 31 baino lehen justifikatzea, fakturak eta ordainagiriak aurkeztuta.
b) Dirulaguntzaren xede izan den informatikako aplikazioaz ikastaro bat egin dutela frogatzea.
c) Dirulaguntzak eman, kudeatu eta kontrolatzeko araubide orokorrari buruzko ekainaren 9ko 8/1997 Foru Legean ezarritako gainerako betebeharrak.
9._Errekurtsoak.
Deialdi honen eta bere aplikazio egintzen kontra gora jotzeko errekurtsoa jar daiteke, Nafarroako Gobernuari zuzendua, Nafarroako ALDIZKARI OFIZIALean argitara eman eta biharamunetik hilabeteko epean.
10._Bateragarritasuna.
Deialdi honetako laguntzak bateragarriak dira beste administrazio publikoek, xede eta helburu bererako, ematen ahal duten beste edozein laguntzarekin. Administrazio honek edo besteren batek emaniko laguntzek ez dute, inola ere, lagunduriko jardueraren kostua baino gehiago eginen. Kostu hori gainditzen bada, soberakina Nafarroako Foru Komunitateko Administrazioari itzuli beharko zaio.
Foru agindu honetan jasotako laguntzak Europako "de minimis" arauaren pean daude; arau horren arabera, "de minimis" laguntza guztiek, guztira, ezin dute egin, hiru urteko epean, 100.000,00 euro baino gehiago, "de minimis" izaerako lehenbiziko laguntza eman zenetik kontatzen hasita.
Iragarkiaren kodea: F0409515
