I. NAFARROAKO FORU KOMUNITATEA
1.1. XEDAPEN OROKORRAK
1.1.4. Ebazpenak
469/2004 EBAZPENA, ekainaren 10ekoa, Eskola eta Lanbide Irakaskuntzaren zuzendari nagusiak emana, 2004/2005 ikasturtean Lanbide Hastapeneko Programetan (Lanbide Lantegietan) ikasleak onartzeko arauak onesten dituena.
Kontuan harturik ekainaren 21eko 233/1999 Foru Dekretua, Nafarroako Foru Komunitatean gizarte garantiako berariazko programak arautzen dituena, maiatzaren 11ko 120/2004 Foru Agindua, diru publikotik ari diren irakaskuntza ez-unibertsitarioko ikastetxeetan ikasleak onartzeko prozedura arautzen duena, eta ikusirik Lanbide Heziketaren Zerbitzuaren adostasun txostena.
Hezkuntza kontseilariak uztailaren 16ko 356/2003 Foru Aginduaren bidez eman dizkidan eskurantzak erabiliz,
EBATZI DUT:
1. Ebazpen honen helburua da Nafarroako Foru Komunitatean 2004/2005 ikasturtean Lanbide Hastapeneko Programetan (Lanbide Lantegietan) ikasleak onartzeko arauak ezartzea.
2. Ebazpen honetan ezartzen den prozedura Lanbide Hastapeneko Programetan (Lanbide Lantegietan) sartzen diren ikasle guztiei aplikatuko zaie, Lanbide Hastapen Berezikoei izan ezik, horiei Dibertsitate, Kultura-aniztasun eta Immigraziorako Zerbitzuak finkatzen duen prozedura aplikatuko baitzaie.
3. 3.1. Izen-ematearen urte naturalean 16-21 bitarteko adina duten gazteek eskatu ahalko dute Lanbide Hastapeneko Programetan sartzea, ondoko baldintza akademiko hauek betetzen badituzte:
_Derrigorrezko Bigarren Hezkuntzako titulua (DBH) ez izatea.
_Lehen Mailako Lanbide Heziketako titulua (LH-1) ez izatea.
_Irakaskuntza Ertainen Erreformako (IEE) lehenbiziko zikloa gainditua ez izatea.
_Batxilergo Bateratu Balioanitzeko (BBB) bigarren kurtsoa gainditua ez izatea.
3.2. Kasu berezietan, Eskolatze Batzordeak matrikula egiteko baimena eman ahalko die ikasturte batez Lanbide Hastapeneko Programa bat egin eta beste Programa bat egiteko eskaera aurkezten duten ikasleei. Matrikula hori egin ahalko da baldin eta ikasleak onartzeko prozedura arrunta bukatutakoan tokirik geratzen bada.
4. Hezkuntza Departamentuak 2004/2005 ikasturtearen plangintzaren barruan eskaintzen dituen Programak egiteko eskaerak ebazpen honen I. eranskineko ereduaren araberakoak izanen dira.
5. Eskatzaile bakoitzak eskabide bakar bat aurkeztuko du eta bertan adieraziko, lehentasunaren araberako hurrenkeran, zer programa, ikastetxe edo entitate eskatzen duen. Lehentasunez eskatzen den ikastetxe edo entitatean aurkeztuko da eskabidea, behar diren ziurtagiriekin batera. Eskabidea bi lekutan aurkeztuz gero, baremoa aplikatu ondoren lortutako puntu guztiak galduko dira.
6. 6.1. 2003/2004 ikasturtean eskolatuak daudenek txosten-ziurtagiri bat aurkeztu beharko dute eskabidearekin batera, eta bertan azaldu egindako maila eta kurtsoa, bai eta Lanbide Hastapeneko Programei (Lanbide Lantegiei) buruzko orientazio psikopedagogiko bat ere, 2. eranskineko ereduaren araberakoa. Eskatzaileak Derrigorrezko Bigarren Hezkuntza osoa egin ez badu, aipatu txosten-ziurtagiriak ikastetxeko ikuskatzailearen ikus-onetsia izanen du nahitaez.
6.2. Eskatzailea 2003/2004 ikasturtean eskolaturik ez badago, egindako azken kurtsoko ziurtagiri akademikoa aurkeztuko du, emaitza eta guzti, dagokion ikastetxeak 3. eranskineko ereduari jarraikiz emana.
7. Programaren batean eskatzaileak ikaspostuak baino gehiago badira, ondoko irizpide orokor hauek aplikatuko dira hurrenez hurren:
1. Deseskolatzea.
2. Eskatzailearen adina.
3. Bizilekuaren hurbiltasuna.
4. Familiaren per capita errenta.
8. Irizpide orokor horiek ondoko baremo honi jarraikiz baloratuko dira:
8.1. Deseskolatzea:
8.1.1. 2003/2004 ikasturtean matrikula egina ez izatea Hezkuntza Departamentuak baimendutako ikasketetan, eta 3. puntuko baldintzak betetzea: 5 puntu.
Atal hau egiaztatzeko 3. eranskineko eredua erabiliko da.
8.2. Eskatzailearen adina:
8.2.1. Izen-ematearen urte naturalean 17 urte edo gehiago dituzten gazteak: 2,5 puntu.
8.2.2. Izen-ematearen urte naturalean 16 urte dituzten gazteak: 0 puntu.
Eskatzaileen adina egiaztatzeko NANaren fotokopia aurkeztuko da.
8.3. Bizilekuaren hurbiltasuna:
8.3.1. Helbidea eskatutako ikastetxe edo entitateari dagokion eskola aldean duten eskatzaileak (4. eranskina): 1,5 puntu.
8.3.2. Beste aldeetako eskatzaileak: 0 puntu.
Familiaren bizilekua egiaztatzeko Udalak emandako ziurtagiria aurkeztuko da.
8.4. Famili unitatearen per capita errenta:
8.4.1. 5.271 euroko edo hortik beherako per capita errentak: puntu bat.
8.4.2. 5.271,01 eurotik 6.905 eurora bitarteko per capita errentak: 0,75 puntu.
8.4.3. 6.905,01 eurotik 8.223 eurora bitartekoak per capita errentak: 0,50 puntu.
8.4.4. 8.223,01 eurotik 9.127 eurora bitarteko per capita errentak: 0,25 puntu.
8.4.5. 9.127 eurotik gorako per capita errentak: 0 puntu.
Familiaren errenta frogatzeko 2002ko Pertsona Fisikoen Errentaren gaineko Zergaren Aitorpenaren kopia aurkeztu beharko da. Aitorpena egin beharrik ez bazuten, urte horretan jasotako dirusarrerak egiaztatzeko agiria aurkeztuko da.
Famili unitatearen errentak behar den bezala egiaztatzen ez badira, atal honetako puntuazioa 0 izanen da.
9. Eskatzaile batzuek puntuazio bera baldin badute, familiaren per capita errentarik txikiena duenaren alde joko da.
10. Ikasleak onartzeko prozesuak ondoko epe hauek izanen ditu: eskabideak aurkezteko epea ekainaren 21etik 30era bitartekoa izanen da, biak barne. Programetan onartu direnen behin-behineko zerrendak jendaurrean izanen dira uztailaren 1ean eta 2an. Matrikula uztailaren 5etik 16ra bitarte eginen da, bi egunak barne.
11. Eskabideak aurkezteko epea bukatuta, baimena duten ikastetxe edo entitateek baremoa aplikatuko diete Ebazpen honen zortzigarren puntuan ezarritakoari jarraikiz. Horretarako, ondoko prozedura honi jarraikiko zaio:
1._Eskola kontseiluak edo horretarako eratzen den batzorde delegatuak onartuen eta baztertuen behin-behineko zerrendak onetsiko ditu. Behin-behineko zerrenda horiek jendaurrean paratuko dira, eskatzaileen puntuazioa adierazita.
2._Ezarrita dagoen epean (uztailaren 1ean eta 2an) aurkezten diren erreklamazioak ebatzi ondoren, matrikulazio epea irekiko da, hamargarren puntuan aipatzen diren egunetan.
3._Uztailaren 19an, 20an eta 21ean, hasieran eman eta interesatuek hartu ez dituzten tokiak Eskola Kontseiluak edo aipatu batzorde delegatuak banatu ahalko ditu, kontuan harturik hautaturiko aukera guztiak, eskatzaileek adierazitako hurrenkeran.
4._Prozesua erabat bukatutakoan, onartuen eta baztertuen behin betiko zerrendak eta azken horien eskaera espedienteak igorriko zaizkio Eskolatze Batzordeari, 2004ko uztailaren 30a baino lehen.
12. Agiri horiek jaso eta gero, Eskolatze Batzordeak zilegi izanen du eskolatu gabeko ikasleen eskabideak beste ikastetxe batzuetara igortzea, batzordeak ezartzen duen moduan eskolatzeko.
13. Tuterako "El Castillo" lantegi-eskolak, Ilundaingo "Haritz-Berri" baserri-eskolak, Iruñeko "Etxabakoitz" lantegi-eskolak eta Berriozarko "Lantxotegi" lantegi-eskolak, Lanbide Hastapeneko Programa egokituak eta oinarrizkoak emateko ituna baitute Hezkuntza Departamentuarekin eta Gizarte Ongizate, Kirol eta Gazteri Departamentuarekin, matrikulazio prozesuan lehentasuna emanen diete Nafarroako Gizarte Ongizatearen Institutuak egiten dituen programa eta ekintzetatik heldu diren gazteei.
14. Lanbide Hastapeneko Programetan (Lanbide Lantegietan) tokia lortzen dutenek ebazpen honen 10. eta 11.3 ataletan ezarritako epeetan egin beharko dute matrikula, 5. eranskineko matrikula orriaren eredua erabiliz.
15. Ebazpen honetan arautzen ez diren gainerako arazoak ebazteko, Hezkuntza kontseilariak maiatzaren 11n emandako 120/2004 Foru Aginduan ezarritakoari jarraikiko zaio.
16. Ebazpen hau Nafarroako ALDIZKARI OFIZIALera igortzea, argitara dadin.
17. Ebazpen hau honako hauei igorriko zaie: Lanbide Heziketaren Zerbitzua, Hezkuntzaren Plangintzako Zerbitzua, Zerbitzuak Ikuskatzeko eta Ikuskapen Teknikorako Zerbitzua, Ikastetxeen eta Ikasketetarako Laguntzen Zerbitzua, Dibertsitate, Kultura-aniztasun eta Inmigraziorako Zerbitzua, Lanbide Heziketa Berriztatu eta Garatzeko Atala, eta ikastetxe eta erakunde interesatuak.
Iruñean, 2004ko ekainaren 10ean._Eskola eta Lanbide Irakaskuntzaren zuzendari nagusia, Fermín Villanueva Ferreras.
1. ERANSKINA
2. ERANSKINA
3. ERANSKINA
4. ERANSKINA
"Bizilekuaren hurbiltasuna" izeneko 8.3.1. atala
aplikatzeari begira, kontuan hartuko diren
eskola alde eta barrutiak
ESKOLA ALDEAK:
A aldea (Sakana): 1. barrutia.
B aldea (Baztan): 2., 7. eta 11. barrutiak.
C aldea (Lizarra): 4. barrutia.
D aldea (Martzilla-Azkoien): 5. barrutia.
E aldea (Lodosa-San Adrian): 8. barrutia.
F aldea (Tafalla): 9. barrutia.
G aldea (Tutera-Corella): 3. eta 10. barrutiak.
H aldea (Irunberri-Zangoza): 6. barrutia.
I aldea (Iruña): 7., 11., 12., 13., 14., 15., 16., 17. eta 18. barrutiak.
ESKOLA BARRUTIAK:
Eskola barrutiak martxoaren 13an eman eta apirilaren 8ko Nafarroako ALDIZKARI OFIZIALean (43. zk.) argitaratutako 150/1996 Foru Dekretuaren 1. eranskinean (Hezkuntza eskualdeak) ezarri ziren.
5. ERANSKINA
Iragarkiaren kodea: F0409690
