I. NAFARROAKO FORU KOMUNITATEA
Xedapen Orokorrak. Foru Dekretuak
263/2002 FORU DEKRETUA, abenduaren 23koa, Nafarroako Gobernuak emana. Baimena ematen dio Nafarroako Unibertsitate Publikoko Gizarte Kontseiluari unibertsitate horretako irakasle bakoitzari 2003ko ekitaldian merezimenduen ondorioz dagozkion lansari osagarriak banatzeko.
Unibertsitateei buruzko abenduaren 21eko 6/2001 Lege Organikoak 69. artikuluko 2. idatz-zatian xedatzen duenez, autonomi erkidegoetako gobernuek unibertsitateetako irakasleen artean lansari osagarriak banatzen ahalko dituzte, norberak irakaskuntzan, ikerketetan eta kudeaketan izaniko merezimenduen arabera. Artikulu hartako 3. idatz-zatiak xedatzen du, bestetik, autonomi erkidegoek horretarako ezartzen dituzten mugen barruan, Gizarte Kontseiluak, Unibertsitateko Gobernu Kontseiluak proposaturik, erabakitzen ahalko duela lansari osagarri horiek irakasle bakoitzari ematea. Azkenik, hurrengo idatz-zatian esaten da osagarriak emanen direla Kalitatearen Ebaluazioko eta Kreditazioko Agentzia Nazionalak edo kasuan kasuko autonomi erkidegoko Legeak kanpoko ebaluaziorako zehazten duen organoak merezimenduak baloratu ondoren.
Nafarroako Foru Komunitatean gaur egun aztertzen ari da Nafarroako Unibertsitate Publikoa garatzeko gorabeheren kalitatea baloratu eta kreditatzeko egokiena den kanpoko ebaluazioko sistema ezartzeko modua. Horretarako orotariko ikuspegi bat behar da. Hori dela-eta, bitartean komeni da irakasleen lansari osagarrien araubidea ordurako uztea. Hala ere, Nafarroako Unibertsitate Publikoa Finantzatzeko Hitzarmena 2003. urtean iraungiko da. Horretan bada kapitulu bat irakasleen lansari osagarriei buruz. Horregatik beharrezkoa da Unibertsitateko Gizarte Kontseiluari baimena ematea osagarri hori ematen segitu ahal dezan, aldatzekoak aldaturik, Nafarroako Unibertsitate Publikoko irakasleen lansariei buruzko 19/1998 Foru Legean xedaturikoaren arabera, 2003. urtean osagarria zehaztu eta pagatzearren.
Nafarroako Foru Eraentza Birrezarri eta Hobetzeari buruzko abuztuaren 10eko 13/1982 Lege Organikoko 47. artikuluan xedaturikoarekin bat, Nafarroak eskumen osoa du irakaskuntzako hedapen, maila eta espezialitate guztiak arautu eta kudeatzeko.
Ikusirik Nafarroako Unibertsitate Publikoko Gizarte Kontseiluak harturiko 41/2002 Erabakia, Unibertsitate hartako Behin Behineko Gobernu Kontseiluak proposaturik,
Horiek horrela, Hezkuntza eta Kultura kontseilariak proposaturik, eta Nafarroako Gobernuak bi mila eta biko abenduaren hogeita hiruko bilkuran harturiko Erabakiarekin bat,
DEKRETATU DUT:
Artikulu bakarra._Baimena ematen zaio Nafarroako Unibertsitate Publikoko Gizarte Kontseiluari irakasle bakoitzaren merezimenduen ondoriozko lansari osagarriak banatzeko irizpideak erabiltzen segitzeko, aldatzekoak aldaturik, 2003. urtean osagarri horiek banatu eta pagatzearren.
AZKEN XEDAPENA
Foru Dekretu honek Nafarroako ALDIZKARI OFIZIALean argitaratzen den egunean hartuko du indarra.
Iruñean, bi mila eta biko abenduaren hogeita hiruan._Nafarroako Gobernuko lehendakaria, Miguel Sanz Sesma._Hezkuntza eta Kultura kontseilaria, Jesús María Laguna Peña.
Iragarkiaren kodea: A0214096
