15. ALDIZKARIA - 2003ko otsailaren 3a

I. NAFARROAKO FORU KOMUNITATEA

Agintariak eta Langileak

1534/2002 EBAZPENA, abenduaren 12koa, Nafarroako Unibertsitate Publikoko Errektoreak emana, Administrazio Eskalako karrerako funtzionarioaren C Taldeko 18 Mailako 10 lanpostu betetzeko hautaprobak egiteko deialdia egiten duena, barne-sustapenaren bidez.

Abuztuaren 2ko 30/1984 Legearen 22. artikuluan eta martxoaren 10eko 364/95 Errege Dekretuan xedatutakoari jarraikiz, azken horrek onetsi baitzuen Estatuaren Administrazio Orokorraren Zerbitzuan Langileak Sartzeko eta Estatuaren Administrazio Orokorreko Funtzionario Zibilen Lanpostuak Hornitzeko eta Sustapena egiteko Erregelamendua, bidezkoa da deialdia egitea Nafarroako Unibertsitate Publikoko Administrazio Eskalako C Taldeko 18. Mailako 10 lanpostu betetzeko hautaprobetarako deia egitea, barne-sustapenaren bidez.

Giza Baliabideen Zuzendariaren txostena ikusirik, zeinean baieztatzen baita ezen Unibertsitatearen Gizarte Kontseiluak onetsi duen Lanpostuen Zerrendaren arabera badaudela 10 lanpostu huts Administrazio Eskalan, C Taldean, 18 Mailan, aurrekontu-kontusailik badaukatenak eta Unibertsitateak 2002 urterako onetsi duen Enplegurako Eskaintza Publikoan ezartzen denaren arabera bete beharrekoak direnak.

Kontu-hartzailearen txostena izanda.

Unibertsitateko Kudeatzaileak proposaturik.

Unibertsitateei buruzko Lege Organikoaren 20. artikuluak ematen dizkidan eskumenak erabiliz, aipatu legeko 2.2 e) artikuluarekin loturik, eta Unibertsitateko Estatutuetako 40. eta 41. artikuluek ezartzen dutenaren arabera,

EBATZI DUT:

Lehena._Unibertsitate honetako Administrazio Eskalako hamar lanpostu huts betetzeko hautaprobetarako dei egitea, barne-sustapena sistemaren bidez.

Bigarrena._Deialdia arautuko duten oinarriak, Ebazpen honekin batera doazenak, onestea.

Hirugarrena._Sortzen den gastua honako kontusail hauei egotziko zaie: AZLen Oinarrizko Lansariak, AZLen Lansari Osagarriak eta 2003 ekitaldiko gastuen aurrekontuko I. kapituluko Gizarte Segurantza kontusailei.

Laugarrena._Deialdi hau "Estatuko Aldizkari Ofizial"ean argitara dadin agintzea.

Bosgarrena._Ebazpen honek, Unibertsitateen Lege Organikoko 6,4. artikuluak ezartzen duenaren arabera, administrazio bidea agortzen du, aukeran Errektorearen aurrean jartzen ahal delarik berraztertzeko errekurtsoa, edo, zuzenean, Administrazioarekiko Auzi-errekurtsoa Nafarroako administrazioarekiko auzien Epaitegietan hilabeteko epean lehen kasuan, eta bi hilabeteko epean bigarren kasuan, beti ere Ebazpen hau jakinarazten den egunaren biharamunetik kontatzen hasita.

Iruñean, bi mila eta biko abenduaren hamabian._Errektorea, Antonio Pérez Prados.

DEIALDIAREN OINARRIAK

1._Arau Orokorrak

1.1. Deia egiten da Nafarroako Unibertsitate Publikoko Administrazio Eskalako karrerako funtzionarioaren 10 lanpostu betetzeko hautaprobak egiteko, barne-sustapenaren sistemaren bidez, abuztuaren 2ko 30/84 Funtzio Publikoa Eraberritzeari buruzko Legeko 22. artikuluak aipatzen duen Nafarroako Unibertsitate Publikoko D taldeko Eskaletatik, lanpostu bat gordetzen delarik %33 edo %33 baino gehiagoko ezgaitasun maila duten pertsonentzat, uztailaren 28ko 23/1988 Funtzio Publikoa Eraberritzeko Neurriak Aldatzeko Legeko hemeretzigarren xedapen gehigarriak ezartzen duenaren arabera.

Ezgaitasuna duten pertsonentzako lanpostua hutsik geldituko balitz, barne-sustapenerako lanpostuei gehituko litzaieke.

1.2. Hautaprobak egiteko honako arau hauetan xedatuari jarraituko zaio: Funtzio Publikoa Eraberritzeari buruzko abuztuaren 2ko 30/1984 Legea, martxoaren 10eko 364/95 Errege Dekretua, Unibertsitateko Estatutuak eta deialdi honetan dauden arauak.

1.3. Lanpostuen ematea, guztira lorturiko puntuazioaren arabera egingo da, eskaintzen diren lanpostu betegabeen eta egiten diren destino-eskaeren arabera.

Aurreko atalean ezarri dena galarazi gabe, eta martxoaren 10eko 364/1995 Errege Dekretuko 78. artikuluak ezartzen duenaren arabera, Unibertsitateko Errektoreak baimentzen ahalko du hautaprobak egin arte destino bat bete duten funtzionarioei destino hori bera ematea, baldin eta aldez aurretik halakorik eskatu badute, hautaprobak gainditu badituzte, lanpostuak ezinbestez bete beharrekoak baldin badira eta lanpostuen zerrendan ezarri diren baldintzak betetzen badira.

1.4. Deialdi honek aipatzen duen Eskalako lanpostu huts gehiago geldituko balitz Unibertsitatean, huts horiei dagozkien lanpostuak eta 1.1. atalean eskainitakoak metatu ahal izango dira, Unibertsitateko Errektoreak emandako ebazpenaren bidez. Hori oposizio-aldiaren azken ariketa egin baino lehen gertatuko da, eta baimena emango da lanpostu horiek deialdi honen helburu diren hautaprobetan betetzeko.

2._Izangaiek bete beharrekoak

2.1. Hautaprobetan onartuak izateko izangaiek honako hauek bete beharko dituzte:

a) Espainiako herritarra izatea, edo Europar Batasuneko estaturen batekoa edo, Europar Batasunak izenpetu eta Espainiako estatuak berretsitako nazioarteko itunen arabera, langileen joan- etorri askea aplikatzekoa zaion estaturen batekoa.

Halaber, Europar Batasuneko estatuetako edo aipatu nazioarteko itunetan onartutako estatuetako herritartasuna dutenen ezkontideek parte hartu ahal izango dute, betiere zuzenbidearen arabera bananduta ez badaude; herritartasuna duenaren ondorengoek eta haren ezkontidearen ondorengoek ere parte hartu ahal izango dute, baldin eta 21 urtetik beherakoak badira edo, adin horretatik gorakoak izanda ere, gurasoen kontura bizi badira.

b) Hamazortzi urte beteak izatea, eta erretiro adina beteta ez izatea.

c) Funtzio Publikoa Eraberritzeko Neurriei buruzko abuztuaren 2ko 30/84 Legearen aplikazio eremukoa izatea.

d) Nafarroako Unibertsitate Publikoko Administrazio Laguntzaileen Eskalakoa izatea, bertan karrerako funtzionarioa izanik.

e) Unibertsitateko D taldeko kidego edo eskaletan emandako bi urteko zerbitzu-emanaldiko antzinatasuna edukitzea, gutxienez, eskaerak aurkezteko epea bukatzen den egunean.

f) Abuztuaren 2ko 30/84 Legeko 25. artikuluak ezartzen duen titulazioaren jabe izatea (Goi Batxilergo titulua, Batxilergo Balioaniztun Bateratua, Batxilergo-LOGSE titulua, bigarren mailako Lanbide Heziketa edo baliokidea, edo eta hogeita bost urtez goragokoentzako Unibertsitatean sartzeko proba gainditua izatea), edo, aukeran, Funtzio Publikoa Eraberritzeko Neurriei buruzko abuztuaren 2ko 30/84 Legearen aplikazio-eremuko D taldeko Kidego edo Eskaletan hamar urteko antzinatasuna izatea. Abenduaren 26ko 70/1978 Legearen araberako E taldeko Kidego edo Eskaletan aitortzen diren zerbitzuek balioko dute antzinatasunari dagokionez.

g) Dagozkion funtzioak garatzearekin bateraezina den ezintasun fisiko edo psikikoa, edo gaixotasunik ez izatea.

h) Diziplinako espedientearen bidez edozein Administrazio Publikotako zerbitzutik baztertu izana ez izatea, eta funtzio publikoak garatu ahal izateko ezgaitua ez egotea.

2.2. Aurreko arauetan ezarritako baldintzak eskaerak aurkezteko epea bukatzen denean bete beharko dira, eta karrerako funtzionario izendapena lortu artean eutsi beharko zaie.

3._Eskaerak

3.1. Hautaproba hauetan parte hartu nahi dutenek III. Eranskinean argitara emandako eskabidean asmo hori jakinaraziko dute. Eskabidearekin batera hauek aurkeztuko dira:

a) Izangaiaren Nortasun Agiri Nazionalaren edo haren hiritartasuna eta nortasuna ziurtatzeko agiri baliokidearen fotokopia egiaztatua.

b) Azterketa-eskubideak ordaindu direlako bankuaren egiaztagiria.

3.2. Elbarritasunik eduki eta euren ezgaitasun maila %33 edo gehiago duten izangaiek beren egoera hau baieztatu beharko dute, erakunde eskudunek emandako agiriaren bidez, eta, halaber, beren elbarritasuna eta haren mailaren berri emango dute eskaeraren 5. eta 6. Ataletan. Hautaprobak egin ahal izateko egokitzapenen bat beharrezkoa den kasuetan, zer egokitzapen-klase behar duten aipatu beharko dute, berariaz, eskaeraren 7.8.) atalean. Atal hau betetzen ez bada, oposizio aldiko ariketak egiteko ez dutela inolako egokitzapenik behar ulertuko da.

3.3. Deialdian parte hartu ahal izateko eskaerak Nafarroako Unibertsitate Publikoko Erregistro Orokorrean aurkeztu beharko dira (Administrazio eta Kudeaketa Eraikina Beheko solairua Arrosadiko Campusa, 31006 Iruñea), edo bestela azaroaren 26ko 30/1992 Administrazio Publikoen Eraentza Juridiko eta Guztientzako Administrazio Prozedurari buruzko Legeko 38.4 artikuluak aurreikusten dituen moduetako baten bidez, hogei egun naturaleko epean, deialdi hau Nafarroako ALDIZKARI OFIZIALean argitaratzen den egunaren biharamunetik kontatzen hasita, eta Nafarroako Unibertsitate Publikoko Errektore jaunari bidaliko zaio.

Eskaerak aurkezteko epea ezin izango da luzatu.

3.4. Azterketa-eskubideak 12 euro egingo ditu, eta Nafarroako Kutxako 2054.02.14.72.3000019010 zenbakia duen kontu korrontean sartuko dira, "Hautaprobak Administrazio Eskala Barne-sustapena" ezaugarriarekin.

Azterketako eskubideak ordaintzeak ez du inola ere ordezkatuko 3.3. oinarrian aipatzen den aurkezpen-tramitea, epearen barruan, forma egokian eta behar den organoaren aurrean.

Tasak ordaintzen ez dituen izangaiak hautaprobetatik baztertua izango da.

3.5. Izangaiek berreskuratzen ahalko dituzte aurkeztutako agiriak, berariaz eskatzen badute, izendapena egiten duen Ebazpena Nafarroako ALDIZKARI OFIZIALean argitaratzen den egunetik aurrera. Aipatu egunetik aurrera, eta urtebeteko epearen barruan, agiriak bereganatzen ez dituztenek uko egiten diote agiriak berreskuratzeari, eta hortaz, horretarako eskubidea galduko dute.

4._Izangaiak onartzea

4.1. Eskaerak aurkezteko epea bukatu eta gero, Nafarroako Unibertsitate Publikoko Errektoreak Ebazpena emango du, gehienez hilabeteko epean, Nafarroako ALDIZKARI OFIZIALean argitaratuko dena, zeinean, onartutako eta baztertutako izangaien zerrenda onetsiko baita, baztertuen kasuan baztertzearen zergatiak aipatuz, eta, horretaz aparte, lehen ariketa noiz eta non izango diren azalduko baita.

4.2. Bazterturik gelditzen diren izangaiek hamar eguneko epea edukiko dute baztertuta gelditzeko egin duten akatsa konpontzeko, Ebazpena Nafarroako ALDIZKARI OFIZIALean argitaratzen den egunaren biharamunetik kontatzen hasita.

Onartutako eta baztertutako izangaien zerrenda behin betiko onesten duen ebazpenaren aurka, zeinak administrazio bidea agortzen baitu, aukeran, berraztertzeko errekurtsoa aurkezten ahal zaio Errektoreari, hilabeteko epean argitaratzen den biharamunetik kontatzen hasita, edo administrazioarekiko auzi-errekurtsoa Nafarroako Administrazioarekiko Auzi-errekurtsoen epaitegien aurrean, bi hilabeteko epean ebazpen hau argitaratzen den egunaren biharamunetik kontatzen hasita.

4.3. Azterketako eskubideak hautaprobetatik bazterturik gelditu diren izangaiei baizik ez zaizkie itzuliko, eta hauei ofizioz itzuliko zaizkie.

5._Epaimahaia

5.1. Hautaprobak kalifikatuko dituen Epaimahaia deialdi honetako II. Eranskinean datorrena da.

5.2. Epaimahaiko kideek ezin izango dute jardun, eta halaxe jakinaraziko diote Errektoreari, Eraentza Juridikoari eta Guztientzako Administrazio Prozedurari buruzko Legeko 28. Artikuluak ezartzen dituen gorabeherak gertatzen direnean, edo eta deialdi hau argitaratu eta lehenagoko bost urteetan hautaprobetarako izangaiak prestatzeko lanak egin badituzte.

Halaber, izangaiek Epaimahaiko kideak errefusatu ahalko dituzte, oinarri hauetan aipatzen diren inguruabarrak gertatzen direnean.

5.3. Hautaprobak hasi baino lehen, deialdia egiten duten agintariek Nafarroako ALDIZKARI OFIZIALean argitaratuko dute Ebazpen bat, zeinak izendatuko baititu 5.2 oinarrian aipatzen diren arrazoietako batengatik epaimahaiko kide izaera galdu duten kideen ordezkoak.

5.4. Epaimahaiburuak hala deiturik, Epaimahaia eratuko da, bertan egongo delarik, gutxienez, Epaimahaiburua, Idazkaria eta kideen gehiengo absolutua, titularrak edo ordezkoak. Bilera horretan Epaimahaiak hautaprobak behar bezala egin ahal izateko beharrezkoak diren erabaki guztiak hartuko ditu.

5.5. Hautaprobak egin bitartean arautegi hau interpretatzeak eta aplikatzeak sorraraz ditzaketen zalantzak Epaimahaiak garbituko ditu, eta hautaprobak aurrera egin ahala arautegian aurreikusten ez diren eta sor litezkeen auziak ebazteko neurriak hartuko.

Epaimahaiaren jardunak, uneoro, Eraentza Juridikoari eta Guztientzako Administrazio Prozedurari buruzko Legeak ezartzen duenaren arabera gauzatuko da.

5.6. Epaimahaiak erabaki lezake bere lanetan laguntzaile bereziak sartzea, egoki jotzen dituen ariketetan, laguntzaile hauen eginbeharra beren berezitasun teknikoen alorrera mugatuko delarik. Laguntzaile hauen izendapena Unibertsitateko Errektoreari jakinarazi beharko zaio.

5.7. Epaimahai kalifikatzaileak neurri egokiak hartuko ditu hau beharrezkoa den kasuetan, elbarritasun edo ezintasunak dituzten izangaiek gainontzeko izangaien baldintza berberak eduki ditzaten ariketak egiteko orduan.

5.8. Epaimahaiburuak egoki jotzen dituen neurriak hartuko ditu oposizio aldian idatziz egingo diren eta irakurri behar ez diren ariketak zuzen daitezela izangaiak nortzuk diren jakin gabe.

5.9. Jakinarazpenak emateko eta bestelako gorabeheretarako, Epaimahaiaren egoitza Nafarroako Unibertsitate Publikoko Administrazio eta Kudeaketa Eraikuntza izango da.

5.10. Epaimahaiak bigarren kategoria edukiko du, maiatzaren 24ko 462/2002 Errege Dekretuak zerbitzu-arrazoiengatiko kalteordeinei buruz ezartzen duenaren arabera.

5.11. Epaimahaiak ezin izango du inoiz aldarrikatu deitu diren lanpostuak baino izangai gehiagok aprobatu edo gainditu dituztela hautaprobak. Ezarritakoaren kontra doan edozein proposamen erabat deuseza izango da, martxoaren 10eko 364/95 Errege Dekretuak onetsitako Estatuko Administrazioaren Zerbitzuko Langileen Sarbideari buruzko Erregelamenduaren 25.1 artikuluan xedatutakoari jarraikiz.

5.12. Hautaprobak bukatu ondoren, epaimahaiak zerrenda ordenatua egingo du, lanpostua eskuratu ez duten lehiatzaileena, horiek bitarteko funtzionario izendatu ahal izateko, edo, bestela, aldi baterako kontratatu, beti ere, Nafarroako Unibertsitate Publikoan langile beharra baldin badago.

6._Hautatze prozesua.

Izangaiak hautatzeko prozesuak honako aldi hauek edukiko ditu:

A) Oposizioa:

A.1. Lehen ariketa.

Aukera anitzeko galderak deituriko motako test bat izango da, erantzun zuzen bakarreko galderak dituena, I. Eranskinean ezarririko programako gaien gainean.

Lehen ariketa egiteko, gehienez, hirurogei minutu izango da.

A.2. Bigarren ariketa

Hainbat kasu praktiko ebatzi beharko da, kasu bakoitzak dituen erantzunen arteko bat aukeratuz, erantzun zuzen bakar bat egongo delarik. Proba honen bidez balioetsiko da izangaiek zer nolako gaitasuna duten deialdi honetako I. Eranskinean aipatzen diren gaien edukiekin zerikusirik duten administrazio-lanak egiteko.

Bigarren ariketa egiteko, gehienez, hirurogei minutu izango da.

A.3. Oposizioko ariketak balioestea

Lehen ariketak 0 eta 40 punturen artean balioko du. Gutxienez 20 puntu lortzen ez dituzten izangaiak baztertu egingo dituzte.

Bigarren ariketak 0 eta 30 punturen artean balioko du. Gutxienez 15 puntu lortzen ez dituzten izangaiak baztertu egingo dituzte.

Bi ariketotan, gaizki emandako erantzunek balioespen negatiboa edukitzen ahalko dute, Epaimahaiak ezartzen duen puntuazioaren arabera, ariketak hasi baino lehen izangaiei jakinaraziko zaien bezala.

B) Lehiaketa.

B.1. Lehiaketa aldian Administrazio Publikoan emandako zerbitzuak balioetsiko dira (E.A.O., 1979ko urtarrilaren 10), zerbitzu hauek abuztuaren 2ko 30/84 Legearen aplikazio eremukoak diren Kidego edo Eskaletan egin direnean, baita norberaren gradu finkatua nola betetzen ari den lanpostuko destino-osagarriaren mailaren arabera garatutako lana ere, hori guztia deialdi hau argitaratzen den egunean; bestetik, eskaerak aurkezteko epea bukatzen den egunean nork bere titulazio akademikoarekin loturiko prestakuntza maila ere aintzat hartuko da.

B.2. Oposizio aldia gainditu duten izangai guztiek agiriaren bidez frogatu beharko dituzte alegatutako merezimendu guztiak, oposizio aldiko emaitzak jakinarazi eta hamar egun naturalen epean, dela jatorrizko agiriaren bidez, dela administratiboki erkaturiko kopien bidez, deialdi honetan ezartzen den baremoaren arabera.

Merezimenduak balioesteko kontuan hartuko dira, bakarrik, 3.3 oinarriak aipatzen duen eskaerak aurkezteko epera arte lortu direnak, egun hori eta gero lortutakoak baliogabeak direlarik.

Merezimenduak justifikatzeko, emandako zerbitzuak baieztatzen dituen ziurtagiria, Unibertsitateko Kudetzailetzak emana, aurkeztu beharko da.

B.3. Epaimahaiak egingo du merezimenduen balioespena, ondoren aipatzen den baremoa aintzat hartuz:

B.3.1. Antzinatasuna: Abuztuaren 2ko 30/84 Legearen aplikazio eremuko Kidego edo Eskalako funtzionarioen antzinatasuna, eskaerak aurkezteko epea bukatzen den egunera arte egiazki eman edo aitortu diren zerbitzuak aintzat hartuz balioetsiko da, jardunean egondako urtebete oso bakoitzeko puntu 1 emango delarik, gehienezko puntuazioa 12 puntu izanik.

B.3.2. Norberaren gradu finkatua: Ondoren aipatzen den puntuazio hau emango da, eskaerak aurkezteko epea bukatzen den egunean agintari eskumendunek emandako gradu-aitorpenaren erabakiak finkatu eta formalizatu duen norberaren graduaren arabera:

14 Gradu: 4 puntu

15 Gradu: 4,50 puntu

16 Gradu: 5 puntu

17 Gradu: 5,50 puntu

18 Gradu: 6 puntu

B.3.3. Egindako lana: Ondoren aipatzen den puntuazioa emango da, eskaerak aurkezteko epea bukatzen den egunean Nafarroako Unibertsitate Publikoan betetzen den lanpostuari dagokion destino-osagarriaren mailaren arabera:

14 Gradu: 5 puntu

15 Gradu: 5,5 puntu

16 Gradu: 6 puntu

17 Gradu: 6,5 puntu

18 Gradu: 7 puntu

Atal honetan egiten den balioespena ezin izango da aldatu etorkizunean egiten diren maila-berrantolaketak direla-eta, berrantolaketa hauen eragin ekonomikoaren kaltetan gabe.

Zerbitzu eginkizunean dauden funtzionarioei jatorrizko lanpostuko destino-osagarriaren maila balioetsiko zaie, eta behin-behineko esleipenean daudenei finkatuta daukaten graduari dagokion maila balioetsiko zaie, edo, ez balute, D taldeko gutxieneko maila.

B.3.4. Titulazio Akademikoa: Gehienez ere 3 puntu, 2. oinarrian hautaprobetan parte hartzeko eskatzen diren titulazioez aparteko beste bat edo batzuk edukitzeagatik, ondorengo sailkapen honen arabera:

1._Lizentziadun, Ingeniari, Arkitekto edo baliokide den tituluaren j abe izateagatik: 2 puntu titulu bakoitzeko.

2._Unibertsitateko Diplomadun, Ingeniari Tekniko, Arkitekto Tekniko edo baliokide den tituluaren jabe izateagatik: Puntu 1 titulu bakoitzeko.

B.3.5. Euskara eta beste hainbat hizkuntza ezagutzea: Gehienez ere 2 puntu, ondoren esaten denaren arabera:

1._Euskara Gaitasun Agiria (EGA) edo baliokidea den titulazio ofiziala, edo Europar Batasuneko edozein hizkuntza ofiziali dagokion Gaitasun Agiri Ofiziala, edo baliokidea, edukitzeagatik, Hizkuntza Eskola Ofizialek emana: 2 puntu.

2._Euskarazko Oinarrizko Zikloari dagokion Agiri Ofiziala, edo baliokidea den titulazio ofiziala, edo Europar Batasuneko edozein hizkuntza ofiziali dagokion Oinarrizko Zikloari dagokion Agiri Ofiziala, edo baliokidea, edukitzeagatik, Hizkuntza Eskola Ofizialek emana: 1 puntu.

7._Ariketen garapena.

7.1. Oposizio aldiko lehen ariketa 2003ko martxotik aurrera egingo da.

7.2. Oposizio aldiko bi ariketak bazterrerazleak izango dira, eskatzen den gutxiengo puntuazioa lortzen ez duten izangaiak bazterturik geldituko direlarik.

7.3. Epaimahaiko kideek, edozein unetan, eskatzen ahal diete izangaiei beren nortasuna egiazta dezatela.

7.4. Izangaiak oposizio aldiko ariketa egiteko deituko dituzte, deialdi bakarrean, eta agertzen ez direnak baztertuta geldituko dira, ezinbesteko kasuetan salbu, beti ere Epaimahaiaren aurrean justifikatu eta honek justifikazioa onartu eta gero.

Izangaiak deitzeko, ordena alfabetikoari jarraituko zaio, Administrazio Publikorako Estatuko Idazkaritzak urtero egiten duen zozketaren ondoren ateratzen den letratik hasita.

7.5. Hautaproben edozein unetan, Epaimahaiak jakiten badu izangaietakoren batek ez dituela deialdi honetan eskatzen diren betebeharreko baldintza guztiak, eta interesatuari entzun ondoren, Unibertsitateko Errektoreari proposatuko dio izangai hori baztertzeko, esanez ere zeintzuk diren izangaiak, hautaprobetan sartzeko eskaeran, esan dituen zehazgabetasunak edo gezurrak, bere ondorioak sor ditzan.

8._Onartuen zerrenda

8.1. Lehen ariketa bukatu eta gero, Epaimahaiak jendaurrean jakinaraziko du, ariketa egin den tokian eta Administrazio eta Kudeaketa Eraikineko iragarki-oholean, onartutako izangaien zerrenda, lortu duten puntuazioaren arabera sailkaturik, eta beren nortasun agiri nazionala zein den esanez. Zerrenda horretan jakinaraziko da, baita ere, oposizio aldiko bigarren ariketa non, noiz eta zer ordutan egingo den, gutxienez 24 orduko aurrerapenarekin.

8.2. Oposizio aldia bukaturik, Epaimahaiak jendaurrean jakinaraziko du, ariketak egin diren tokian eta Administrazio eta Kudeaketa Eraikineko iragarki-oholean, oposizo-aldia gainditu duten izangaien zerrenda, lortu duten behin betiko puntuazioaren arabera sailkatuta, ariketa bakoitzean lorturikoak gehitu eta gero, eta esanez beren nortasun agiri nazionala zein den.

8.3. Epaimahaiak izangaien behin betiko zerrenda argitaratuko du, lortu duten behin betiko postuaren arabera antolatuta, oposizio aldian eta lehiaketa aldian lortu dituzten puntuazioak batu eta gero.

Hautaproben azken emaitzan gertatzen diren berdinketak ebazteko, lehen ariketan puntuaziorik altuena lortu duenaren alde egingo da; berdinketak segitzen badu, bigarren ariketan puntuaziorik altuena lortu duenaren alde egingo da, eta hala ere berdinketak irauten badu, Administrazio Publikoan emandako zerbitzuen arabera ebatziko da.

8.4. %33ko edo gehiagoko ezintasuna duten izangaiek lehentasuna edukiko dute lanpostu hutsak aukeratzeko txanda libreko izangaien aurretik, baldin eta txostenik bada, deialdiaren gaia den lanpostuarekin bateragarria dela esaten duena, horretan adituak diren balioespen eta orientazio taldeek eginda.

8.5. Epaimahaiak jendaurrean jakinaraziko du hautaprobak gainditu dituztelako aldarria, eta oposizio aldian eta lehiaketa aldian lortu dituzten puntuak batuz, punturik gehien lortu duten izangaiak Administrazio Eskalako karrerako funtzionario izendatzeko proposamena bidaliko dio Unibertsitateko Errektoreari, eta hauen zenbakia ez da eskaintzen diren lanpostuen zenbakia baino handiagoa izango, deialdi honetako 5.11 oinarriak ezartzen duenarekin bat etorriz.

9._Agiriak aurkeztea eta funtzionarioak izendatzea

9.1. Proposatzen diren izangaiek 2.1.f) oinarrian eskatzen den Tituluaren fotokopia aurkeztu beharko dute, behar bezala erkaturik, Unibertsitateko Erregistro Orokorrean, hogei egun naturaleko epean, hautaprobak gainditu dituzten izangaien zerrenda argitaratzen den egunaren biharamunetik kontatzen hasita.

9.2. Ezinbesteko kasuak alde batera utzita, ezarri den epearen barruan agiriak aurkezten ez dituztenak, edo agiriak aztertzearen ondorioz, 2.1 oinarrian aipatzen diren betebeharretakoren bat betetzen ez dutenak, ezin izendatuko dira Administrazio Eskalako funtzionario, eta bere jardun guztiak deuseztu egingo dira, hasierako eskaeran faltsukeriatan ibiltzeagatik eduki lezaketen erantzukizunaren kaltetan gabe.

Lehengo atalean aurreikusten den kasuan, Nafarroako Unibertsitate Publikoko Errektoreak baja beteko du 8.3 atalak aipatzen duen onartuen zerrendan ondoren dagoenarekin, honekin aurreko ataletan aipatu den moduan jokatuko delarik.

9.3. Deialdia egiten duen aginteak, Epaimahai kalifikatzaileak hala proposaturik, karrerako funtzionarioak izendatuko ditu, Nafarroako ALDIZKARI OFIZIALean argitaratuko den ebazpenaren bidez.

10._Azken araua

Deialdi honen aurka, bere oinarrien aurka eta berauek aplikatzearen ondorioz zein Epaimahaiaren jardunaren ondorioz gertatzen diren administrazio-egintzen aurka, azaroaren 26ko 30/1992 Adminsitrazio Publikoen Eraentza Juridiko eta Guztientzako Administrazio Prozedurari buruzko Legeak, urtarrilaren 13ko 4/1999 Legeak aldatuak, ezartzen duen kasu eta moduko errekurtsoak paratzen ahalko dira.

Halaber, Unibertsitateak Epaimahaiaren erabakiak berraztertzen ahalko ditu, Administrazio Publikoen Eraentza Juridikoari eta Guztientzako Administrazio Prozedurari buruzko 30/1992 Legeak aurreikusten duenaren arabera.

I. ERANSKINA

Administrazio, unibertsitate eta langile kudeaketa

1._Europar Batasuna: Jatorria eta bilakaera. Europako Erkidegoko erakundeak: Europako Parlamentua, Kontseilua, Justizia Auzitegia eta Batzordea. Europako kontseilua eta beste hainbat organo. Europako Erkidegoko zuzenbidea: bere iturriak. Amsterdameko Ituna: Ideia orokorrak.

2._Espainiako 1978ko Konstituzioa. Oinarrizko eskubideak: bermeak. Auzitegi Konstituzionala. Erregearen betebehar konstituzionalak. Gorte Nagusiak. Estatuaren lurralde-antolamendua.

3._Nafarroako Foru Erakundeak: Nafarroako Parlamentua edo Nafarroako Gorteak. Parlamentuak Gobernuaren gainean duen kontrol-eginkizuna. Nafarroako Gobernua edo Foru Diputazioa. Gobernuko Lehendakaria. Lehendakaria aukeratzea. Erregelamenduetako xedapenen eta administrazio ebazpenen eraentza.

4._Administrazio Publikoen Eraentza Juridikoari eta Guztientzako Administrazio Prozedurari buruzko Legea: Printzipio orokorrak. Organo kolegiatuak: araubidea, osaera eta eginbeharrak. Interesatuak. Administrazio Publikoaren jarduna zuzentzen duten arau orokorrak.

5._Administrazio egintza. Arau orokorrak. Terminoak eta epeak. Administrazio egintzen baldintzak. Administrazio egintzen eraginkortasuna. Jakinarazpena eta argitalpena.

6._Administrazio prozedura. Administrazio prozeduraren hasiera, ordena, instrukzioa, bukaera eta betetzea. Administrazio errekurtsoak: Gora jotzeko errekurtsoa, aukerako berraztertzeko errekurtsoa, berrikusteko errekurtsoa.

7._10/98 Foru Legea, ekainaren 16koa, Nafarroako Administrazio Publikoetako Kontratuei buruzkoa. Xedapen orokorrak Administrazioarekin kontratuak egiteko baldintzak, eta kontratatu aurretiko jardunak. Kontratuen adjudikazioa eta formalizazioa. Kontratuak betzetzea, eraldatzea eta etetea.

8._Administrazio Publikoen zerbitzuetako langileak. Araubide juridikoa. Funtzionarioak: Karrerako funtzionarioak eta enpleguko funtzionarioak. Funtzionarioak aukeratzea. Funtzionario izaera lortzea eta galtzea. Funtzionarioen administrazio egoerak. Horietako bakoitzaren baldintzak eta ondorioak.

9._Abenduaren 21eko Unibertsitateei buruzko 6/2001 Lege Organikoa.

10._Unibertsitateko irakasleak. Unibertsitateko Irakaskidegoetako irakasleak: Sarrera eta aukeraketa. Administrazio egoerak.

11._Kontratupeko irakasleak. Araubide juridiko aplikagarria.

12._Unibertsitate Publikoetako administrazio eta zerbitzuetako langileak.

13._Artxibozaintza printzipioak eta oinarrizko kontzeptuak. Artxibo agiria eta informazio- laguntzarako agiria. Agiri-multzoak. Agirien balioak. Bizi-zikloa. Agiriak kudeatzeko moduak.

Finantza-kudeaketa

1._Aurrekontua: Kontzeptua. Aurrekontuari buruzko printzipioak. Egitasmoen araberako Aurrekontua: Kontzeptua eta faseak. Zero oinarriko aurrekontua.

2._Unibertsitateko aurrekontua: prestatzeko modua, organo eskudunak. Urteanitzeko programazioa Unibertsitatean.

3._Unibertsitateko aurrekontua eta gastuen eta dirusarreren aurrekontuaren egitura Estatuaren legeen arabera.

4._Aurrekontuaren aldaketak. Motak, Nafarroako Ogasun publikoari buruzko 8/88 Legearen arabera, eta Unibertsitateko aurrekontua. Aurrekontua gauzatzearen aldiak.

5._Unibertsitateak aurrekontua gauzatzeko duen arautegia. Gauzatzeko oinarriak eta garatzeko arautegia. Kontuhartzailetza.

6._Kontabilitaterako sarrera. Bere garrantzia. Oinarrizko kontzeptuak: Ondarea, inbentarioa. Motak. Egitura. Prestaketa-aldiak.

7._Egoera-balantzea. Aktiboa. Pasiboa. Ondare garbia. Egoera-balantzearen oinarrizko ekuazioa. Egoera-balantzearen interpretazioa.

8._Ondare-aldaketak. Kontuak. Kontzeptua eta funtzionamendua. Terminologia. Kontusail bikoitza. Kontuetan kontabilitate-izendapenak egiteko moduak. Eguneroko liburua. Liburu Nagusia. Egiaztapen-balantzea eta saldoak.

Irakaskuntza-kudeaketa

1._Unibertsitateko irakaskuntzen iraupena, antolamendu ziklikoa eta edukia. Jarraibide orokorrak eta berekiak. Ikasketa-planak. Ikasketa-planak homologatzea eta aldatzea.

2._Ikasketak eta irakaskuntzak Nafarroako Unibertsitate Publikoan: arautegia. Ikasketa-planak.

3._Unibertsitateko ikasleak. Unibertsitatean sartzea. Unibertsitatean irauteko erregimena. Eskubideak eta betebeharrak. Unibertsitateko gobernuan parte hartzea. Bekak eta ikasketetarako laguntzak.

II. ERANSKINA

Hautaproben epaimahaia

Epaimahai titularra:

Epaimahiburua: Nafarroako Unibertsitate Publikoko Kudeatzailea.

Mahaikideak: Itziar Ayerdi Fernández de Barrena andrea, Nafarroako Unibertsitate Publikoko Giza Baliabideen Zerbitzuko zuzendaria.

María Sauleda Munárriz andrea, Ekonomi Kudeaketaren Ataleko burua.

Nafarroako Unibertsitate Publikoko Administrazio eta Zerbitzuetako Langileen Batzordeak izendaturiko bi ordezkari.

Epaimahai ordezkoa:

Epaimahiburua: Nafarroako Unibertsitate Publikoko Idazkari Nagusia.

Mahaikideak: Pedro Ardaiz Labairu jauna, Langileen Kudeaketa Ataleko Burua.

Eduardo Pérez Urdánoz jauna, Nafarroako Unibertsitate Publikoko Kudeaketaria.

Nafarroako Unibertsitate Publikoko Administrazio eta Zerbitzuetako Langileen Batzordeak izendaturiko bi ordezkari.

Iragarkiaren kodea: A0300123