Iragarkia

110. ALDIZKARIA - 2002ko irailaren 11

I. NAFARROAKO FORU KOMUNITATEA

Xedapen Orokorrak. Foru Aginduak

420/2002 FORU AGINDUA, abuztuaren 26koa, Hezkuntza eta Kultura kontseilariak emana, Haur Hezkuntzako Bigarren Zikloa, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa eta Lanbide Hastapenerako Programak ematen dituzten ikastetxe publikoen antolaketa eta jarduna 2002-2003 ikasturtean arautuko dituzten jarraibideak onesten dituena.

Ikasketen Antolamendu eta Lanbide Heziketaren Zerbitzuko zuzendariak adostasun txostena aurkeztu du Foru Agindu hau onesteko. Foru Agindu honen xedea da xehetasun osagarriak egitea honako hauei: ikastetxeetako erregelamendu organikoak; 225/1998 Foru Dekretua, uztailaren 6koa; 257/1998 Foru Agindua, uztailaren 16koa, Haur Hezkuntzako eskola publikoen, Lehen Hezkuntzako ikastetxe publikoen eta Haur Hezkuntzako eta Lehen Hezkuntzako ikastetxe publikoen Erregelamendu Organikoa garatzen duena; 153/1999 Foru Dekretua, maiatzaren 10ekoa, Hezkuntza Orientazioa arautzen duena; 279/2001 Foru Agindua, uztailaren 13koa, Nafarroako Foru Komunitatean hezkuntza zerbitzuaren kalitatea hobetzeko ituna argitaratzea agintzen duena; eta 258/1998 Foru Agindua, uztailaren 16koa, Bigarren Hezkuntzako institutuen Erregelamendu Organikoa garatzen duena. Arestian aipatutako arauetan orokorrean aipatzen diren zenbait alderdi zehatzen gainean xehetasunak eman eta garatzeko balio dute, 2002/2003 ikasturtean ikastetxeen antolaketa egokia eta funtzionamendu ona lortzeko eta horrela heziketa lan koherente eta eragilea bermatzeko.

Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legearen 36.2 b) artikuluak esleitutako ahalmenak erabiliz,

AGINDU DUT:

1. Foru Agindu honen eranskinetan ageri diren jarraibideak onestea. Aipatu jarraibide horiek Nafarroako Foru Komunitatearen lurralde esparruan Haur Hezkuntzako Bigarren Zikloa, Lehen Hezkuntza, Derrigorrezko Bigarren Hezkuntza, Batxilergoa, Lanbide Heziketa eta Lanbide Hastapenerako Programak ematen dituzten ikastetxe publikoen antolaketa eta jarduna arautzen dituzte 2002-2003 ikasturterako.

2. Foru Agindu honek aipatutako jarraibideak ikastetxe pribatuei, hots, itunduak direnei, eta dirulaguntza jasotzen dutenei aplikatuko zaizkie, indarra duten arauei jarraikiz, dagozkien afera orotan.

3. Hezkuntza zuzendari nagusiari baimena eman zaio Foru Agindu honetan xedatutakoa aplikatzeko eta garatzeko behar diren xedapen guztiak eman ditzan.

4. Foru Agindu hau eta eranskinak Ikasketen Antolamendu eta Lanbide Heziketaren Zerbitzura, Zerbitzuak Ikuskatzeko eta Ikuskapen Teknikorako Zerbitzura eta Ikasketak Antolatzeko Atalera igortzea, behar diren ondorioak izan ditzan.

5. Foru Agindu hau eta eranskinak Nafarroako ALDIZKARI OFIZIALean argitaratzea.

Iruñean, bi mila eta biko abuztuaren hogeita seian.-Hezkuntza eta Kultura kontseilaria, Jesús María Laguna Peña.

I. ERANSKINA

Haur Hezkuntzako Bigarren Zikloa eta Lehen Hezkuntza ematen dituzten Ikastetxe Publikoen antolaketa eta jarduna 2002/2003 ikasturtean arautzeko jarraibideak

Sarrera

Haur Hezkuntzako Bigarren Zikloa eta Lehen Hezkuntza ematen dituzten ikastetxe publikoak antolatzeko eta funtzionatzeko, funtsean honakoei kasu eginen zaie: Nafarroako Foru Komunitateko lurraldean diren Haur Hezkuntzako Eskola Publiko, Lehen Hezkuntzako Ikastetxe Publiko eta Haur Hezkuntza eta Lehen Hezkuntzako Ikastetxe Publikoen Erregelamendu Organikoa, uztailaren 6ko 225/1998 Foru Dekretuaren I eta II. Tituluetan eta xedapenetan, maiatzaren 10eko 153/1999 Foru Dekretuan, uztailaren 16ko 257/1998 Foru Aginduan, Nafarroako Foru Komunitatean hezkuntza zerbitzuaren kalitatea hobetzeko ituna argitaratzea agintzen duen uztailaren 13ko 279/2001 Foru Aginduan eta, azkenik, Foru Agindu honen I. eta IV. eranskinetan 2002-2003 ikasturterako bildutako jarraibideotan ezarritakoa. Jarraibide hauek, osagarrizko araudia direlarik, aipatutako oinarrizko arauen zenbait alderdi garatzea dute helburu, Haur eta Lehen Hezkuntza mailetako ikastetxe publikoek ahalbait egokien eta eragileen funtzionatzeko.

I.-Ikastetxeko urteko programazio orokorra

1.-Hobekuntza planak.

Koordinazio Pedagogikorako Batzordeak ikasturterako lan plan bat aurkeztuko dio klaustroari horrek irailean onar dezan. Lan plan horretan Hezkuntza eta Kultura Departamentuak ezarriko dituen alderdiak hobetzeko proiektua eginen da.

Lan plan horretan honako hauek agertuko dira: erdietsi nahi diren helburuak, aurrez ikusitako helburuak erdiesteko egin behar diren berariazko jarduerak, horren ardura izanen du(t)en organoa(k), esleitutako baliabideak, lan metodologia edo prozedura eta lan plana ikasturtean zehar egiteko denboralizazioa.

2.-Hezkuntza proiektua hobetzea eta egokitzea.

Hezkuntza proiektuan ikastetxearen nortasuna eta helburuak finkatzeko irizpide orokorrak biltzen dira. Aldian behin berraztertu beharra dago, egoera bereziki adierazgarri batzuk edo testuinguru berriak agertu ahala, hezkuntza proiektuan ezarritako asmoak eta hezkuntza praktikaren inguruko baldintzak bat etor daitezen.

Horren ondorioz, helburu orokorrak, funtsezko balore eta jokabideak eta lehentasunezko lan-ildoak berritu edo aldatu beharko dira, gero, horietatik abiatuta, orientatzen baitira curriculumaren inguruko erabakiak, lan eta eginkizunen antolaketa eta ikastetxean bizikidetza eta, azken finean, kalitate handiagoko heziketa sustatzeko eskola giro egokia lortzeko neurriak.

2002-2003 ikasturtean, zehazki, ikastetxean kultur aniztasunari arreta egiteko irizpide eta prozedurak sartuko dira, bizikidetzarako eremu integratzaile bat sustatzea helburu. Horretarako, hezkuntza komunitatearen kide eta sektore guztiek ekarpenak egitea faboratu eta bultzatuko da, batez ere irakasleek eta familiakoek. Orobat, ikastetxeko hezkuntza orientazioko arduradunek kontuan hartu dituzte familiekin harremanetan izateko bideak hala nola kanpoko erakundeekiko lankidetza (udalak, entitate laguntzaileak, e.a.).

Alderdi horiek guztiak ikastetxe bakoitzeko Aniztasunari arreta egiteko Planean sartuko dira. Betiere, ikastetxean baldin badago inmigrazioko edo gutxietsitako egoera soziokulturaletako jendea, Aniztasunari arreta egiteko 2002-2003 ikasturterako Planean etorkinak eta gutxiengoetako jendea hartzeko atala sartuko da.

Bereziki, Aniztasunari arreta egiteko Planaren barnean argi eta garbi utziko da Haur Hezkuntzako eta Lehen Hezkuntzako etapetan nola eta noiz aterako diren tutoreak ikasgeletatik, haietan espezialistak sartzen direlako, dela atzerriko ikasleei errefortzuak emateko, dela curriculum desfasea dutenei laguntzeko, dela aniztasunari arreta egiteko errefortzuak emateko.

Baloreetan oinarrituriko hezkuntza lortzea -eta horien artean pertsona guztien duintasunaren errespetua, bizikidetza positiboa, bakea eta justizia nabarmendu beharko lirateke-, Nafarroako Foru Komunitateko hezkuntza sistemaren lehentasunezko eta etengabeko helburua da. Halaber, lehentasuna izanen du norberak bere burua kontrolatzeko, erantzukizunerako, gauzak neurrian egiteko eta arriskuzko jokabideak saihesteko giza baloreen heziketak. Etapa horietan, hezkuntzak neska eta mutikoek lehenbiziko ezaupide eta gaitasun sistematikoak eskuratzeko oinarriak jartzen ditu, baita haien garapen pertsonala eta soziala egituratzeko funtsezko izanen diren jokabide eta ohiturak bereganatzeko ere.

Horregatik, beharrezkoa da ikastetxeak, batetik, heziketa eta sozializazio prozesuan duen eginkizunaren azterketa egitea, hots, eskola bizitzaren orientazio orokorrak pertsonen garapen pertsonal eta emozionala, izaeraren sendotasuna, frustrazioarekiko tolerantzia edo eskubideen benetako berdintasuna bultzatzen duenetz eta mota guztietako bazterketak errefusatu eta kultura guztien errespetua sustatzen duenetz (LOGSEren 2.3.c) artikulua).

Bizitzeko ohitura eta estilo heldu eta osasuntsuek norbera meneratzeko, borondatea izateko, sormeneko eta erabakiak hartu eta maiz despersonalizatzailea den giro baten aurrean mantentzeko bidea jartzen dute. Berariazko programa jakin batzuek edo zeharkako programa batzuek, tutoretzari dagozkion eginkizunekin batera, ikasleen garapen pertsonaleko alderdi horiek faboratu ditzakete. Oso garrantzitsua izanen litzateke ahalik eta gehienetan familiekin bat etortzea eta haiekin lankidetzan aritzea, helburuak, esku hartzeko ildoak eta jarduerak irakasle taldeekin batera egin daitezen planteatzeko, familiak eta eskolak hezkuntzan batera egin beharreko lana indartzeko.

"Ez diskriminatzea" terminoak gizaki guztiek duintasunez tratatuak izateko eskubidea adierazten du modu negatiboan -nahi ez diren egoerak agertzen ohi direlako-. Hori horrela, hizkuntza eredu ezberdinetako irakaskuntzak ematen dituzten ikastetxeetan elkarrekin egoteko guneak eta eskolaldiak sustatuko dira, eredu ezberdinetako ikasleen bizikidetza faboratzeko asmoz.

Hori dela eta, bestelako jardueren artean, eskola liburutegiko fondoak etengabe erabil daitezen bultzatuko da.

Hezkuntza eta Curriculum proiektuek arreta berezia eginen diote ulermenezko irakurketari curriculumeko arlo guztietan, ikaskuntzaren tresnetan oinarrizkoena eta komunena baita. Etapako irakasle guztiak ahaleginduko dira ikasle orok lehen hezkuntzako ikasketak bukatzean eta haiei dagokien adinaren arabera, beren garapen akademiko eta pertsonalerako beharrezkoak diren hizkuntza gaitasun oinarrizkoak izan ditzaten, besteak beste, honako hauek: isilik edo ahots goraz irakurtzeko gaitasuna; testu zientifiko edo literarioa, edo ikasgelan erabilitako ikasliburua interpretatzeko gaitasuna eta edozein gairen gainean bere pentsamendua eta ideiak, koherentziaz eta zuzentasunez, adierazteko aukera, ahoz eta idatziz, betiere bere bizitza pertsonalarekin edo gizarte, kultura edo zientzia arloarekin harremanetan.

Zikloko taldeek jarduerak diseinatuko dituzte ikasleen irakurtzeko gaitasun maila handitzeko, irakurtzeko ohitura bultzatzeko eta irakurtzeko gogoa sustatzeko, dela ikasgelan, dela liburutegi nagusian. Liburutegi nagusia hartuko da curriculumeko arlo guztien ikaskuntza aktiboari laguntzen dion baliabide zentro antolatu modura.

Hezkuntza eta Kultura Departamentuak etapako curriculumaren testuinguruan ulermenezko irakurketa nola egin behar den jakiteko hainbat orientabide emanen du.

Bestalde, bai ikaskuntza prozesuan denentzat ezarritako behar eta aurreikuspenei, bai behar den curriculum gaitasuna lortu eta goragoko hezkuntza mailetan segitu nahi duten ikasleenei behar bezalako erantzuna ematen ote zaien aztertuko da.

3.-Curriculum proiektua hobetzea eta egokitzea.

2002-2003 ikasturtean, etapako curriculum proiektuen esparruan, irakasle taldeek gelako programazio guztiak artikulatzeko aukerabideak aztertuko dituzte, jakintza arlo bakoitzean sakontze maila ezberdinak zehazki bereizteko asmoz, hezkuntza etapa guztietan.

Eduki tematikoak berdinak izan arren, sakontze maila ezberdinak zehaztuz gero, gelako lana faboratuko duten irakaskuntza eta ikaskuntzarako estrategiak garatu ahalko dira, ikasleek erakusten dituzten aukerabideetatik abiatuta eta hurrengo ziklo edo etapara seguruki igotzeko egoki diren eskakizunak oinarri hartuta. Gaitasunak garatzeko prozesuan eta ikaslearen errendimendu-mailan aurrera eginen dela bermatzea da helburu, aurreko hezkuntza mailetan lorturiko jakintza-mailatik abiatuta. Oroitarazi beharra dago, ikasleak ikasmaila berean beste urte bat emateko erabakia hartuz gero, behar diren curriculum egokitzapenak egin beharko liratekeela, eta hori ahalik eta lasterren egin behar dela, ikaskuntza prozesuan dauden gabeziak lehenbailehen konpentsatzeko.

Ikasleen ikaskuntza lagundu eta bultzatzeko programazio berariazkoak prestatu eta curriculumean oso garrantzitsuak ez diren egokitzapenak sartzeko ahalegin berezia eginen da, izan ere, horiei esker aniztasunari arreta egiteko neurriak hobeki doitu ahalko dira. Curriculumaren egokitzapenak -oso garrantzitsuak direnak zein bestelakoak- egiteko prozedura arrunta ere landuko da, horrek bide emanen baitu gelako programazioetan sakontze maila ezberdinak bereizteko.

4.-Ikastetxeko Prestakuntza Plana.

Irakasleak prestatzeko 2002-2003 ikasturteko Planak prestakuntzarako aukera handia eskaintzen du, irakasleek, beren prestakuntza ibilbideari begira, egokien iruditzen zaizkien jarduerak hauta ditzaten.

Ikasturte honetan, Prestakuntza Planaren lan ildoak honako hauek dira:

-Lehen mailako laguntza izanen dute ondoko programak egiten dituzten ikastetxe hauek: ikasleen kultura aniztasunari arreta egiteko proiektuek (espainiera bigarren hizkuntza modura irakasteko irakasleek prestakuntza aldetik dituzten beharrak betetzeko) eta errespetuan, elkarretaratzean eta elkarrizketan oinarritutako kultura sustatzen dutenek.

-Ikastetxeko Prestakuntza Planak egiteko aholkuak ematea eta haiek sustatzea, irakasleen etengabeko prestakuntzan elkarrekin lanean aritzen ahal diren eragileen arteko koordinazio eta erabakimen esparrua eratzeko.

-Lanean ari diren irakasleen gaitasuna garatzea, jakintza teoriko, irizpide sendo eta ikas-baliabideez horniturik, beren irakaslanerako gero eta hobeki prestatuak egon daitezen.

-Zuzendaritzako eginkizuna zuzen betetzen laguntzea. Horretarako, ikastetxeak kudeatzeko eta zuzentzeko berariazko prestakuntza emanen da, kontuan hartu behar baita prozesu administratiboak eta pedagogikoak elkartzen diren lan konplexua dela hori.

-Ikastetxean eta ikasgeletan elkarbizitzaren kudeaketa gero eta hobea izan dadin bultzatzea.

Zuzendaritza Taldeek irakasleek Prestakuntza Plana garatzeko jardueretan parte hartzeko bidea erraztuko dute.

II.-Irakasleak

1.-Ordutegia ikastetxe batean baino gehiagotan banatua duten irakasleak.

Ikastetxe batean baino gehiagotan aritzen diren irakasleen ordutegia prestatzean bete beharko da irakasle ibiltariendako lan baldintzei buruzko arautegian ezarritakoa.

2.-Ordutegia betetzea eta asistentzia partea.

Zuzendaritza Taldeak jakinaraziko die Giza Baliabideen Zerbitzuari eta Zerbitzuak Ikuskatzeko eta Ikuskapen Teknikorako Zerbitzuari, lan edo administrazio araubideko aldi baterako lan- kontratudunak zein egunetan hasi diren ikastetxean.

Asistentzia parteen eredu ofizialak betetzean, honakoak hartu behar dira aintzat:

a) Inoiz ez da utziko hutsik "Hutsegitearen arrazoia" laukia, eta hala egiten bada, justifikatu gabeko hutsegitetzat hartuko da.

b) Hutsegite guztiek agertu behar dute, bat ere utzi gabe.

c) "Hutsegitearen arrazoia" laukian "ordainsaririk gabeko norberaren eginkizunetarako baimena" jartzeko, nahitaezkoa izanen da Giza Baliabideen Zerbitzuak hartarako lizentzia eman izana.

Zuzendariak, justifikazioa aurkezteko epea amaitu eta biharamunean aditzera emanen dio Zerbitzuak Ikuskatzeko eta Ikuskapen Teknikorako Zerbitzuari irakasle baten edozein hutsegite nahiz atzerapen, ikasketaburuari justifikatu gabekoa iruditzen zaiona, bere lansaritik tokatzen den kenketa egiteko eta, hala behartzen bada, espedientea hasteko. Kasuko irakasleari ere emanen zaio, idatziz, aditzera emate horren berri.

Irakasleen hutsegiteen justifikanteak (baja agiriaren kasuan, haren kopia edo fotokopia) Ikastetxearen Zuzendaritzan geldituko dira Zerbitzuak Ikuskatzeko eta Ikuskapen Teknikorako Zerbitzuaren eskura.

Eskola emate normalaren alterazio guztiak berehala emanen zaizkio aditzera telefonoz Zerbitzuak Ikuskatzeko eta Ikuskapen Teknikorako Zerbitzuari, eta bai ondoren asistentzia partean jasoko ere.

3.-Ikastetxean nahitaez egon beharreko ordutegi osagarriaren inguruko azalpenak.

Plangintza instituzionalerako tresnak prestatzearekin edo berrikustearekin zerikusia duten eginkizunetarako orduak honela banatuko dira: ikastetxeko zuzendariak ordu horien erdiak finkatuko ditu eta lehentasunezko eta nahitaezko izaera izanen dute irakasleek berek egin dezaketen beste edozein aukeraren gainean; gainerako erdiak -azkeneko ordu hauek ez diote inolaz ere eragozpenik sortuko aurrekoei- irakasleek nahi erara erabiliko dituzte prestakuntza jarduerak egiteko, aldez aurretik Ikastetxeko Prestakuntza Planean sarturik.

III.-Koordinazio organo osagarriak

Haur Hezkuntzako eta Lehen Hezkuntzako ikastetxe publikoen Erregelamendu Organikoan, uztailaren 6ko 225/1998 Foru Dekretuan eta uztailaren 16ko 257/1998 Foru Aginduan aurrez ikusten diren karguak, zuzendaritzakoak eta didaktikoak, beteko dituzten irakasleak izendatuta, eskolako premia guztiei erantzuna emanik eta Ikastetxeak dituen orduen arabera, zuzendariak zilegi izanen du, idazkariak hala proposaturik, kargu horietarako izendapenik jaso ez duten irakasleen artean Liburutegiko koordinatzaile bat izendatzea. Izendatuak, gehienez, astean bi irakastordu eman ahal izanen ditu karguari dagozkion lanetan.

Liburutegiko irakasle koordinatzaileak, idazkariaren agindupean, honako eginkizunak izanen ditu, besteak beste:

a) Ikastetxeko Liburutegiak duen material didaktikoa behar bezala antolatu eta zaintzea, eta behar bezala erabiltzen dela bermatzea.

b) Ikasleei harrera egin eta aholku ematea ikastetxeko liburutegiaren baliabideak erabiltzeko.

c) Ikastetxeko Liburutegian dagoen material didaktikoari buruzko informazioa zabaltzea irakasle eta ikasleen artean, batez ere gauza berriei buruz, eskuratu ahala.

d) Liburutegirako material eta fondo berriak erosteko aholkuak ematea.

e) Hezkuntza komunitateko sektore ezberdinetan, eta bereziki ikasleen artean, irakurketa sustatzeko lanetan laguntzea.

Arestian aipatutako koordinazio eginkizunei erantzuna emanda, ikastetxeak dituen orduen arabera, eta ikastetxe batean, irakastorduetatik kanpo, kirol, musika, kultura jarduerak, oro har, iraunkorrak, antolatzen badira, zuzendariak zilegi izanen du, ikasketaburuak hala proposaturik, jarduera hauen irakasle arduradunak izendatzea, parte hartzeko interesa dutenen artean. Aukera hau gauzatzeko kirol jardueren irakasle arduradun bat eta arte eta kultur jardueren irakasle arduradun bat izendatu ahal izanen dira. Irakasle horiek, dauden orduen arabera, lan horietan, astean, bi irakastordu eman ahal izanen dute, gehienez.

II. ERANSKINA

Derrigorrezko Bigarren Hezkuntzako lehen zikloa behin-behinekoz irakasten duten Haur Hezkuntza eta Lehen Hezkuntzako ikastetxe publikoen, eta herri bereko ikastetxe publikoekin batera funtzionatzen duten Derrigorrezko Bigarren Hezkuntzako institutuen antolaketa eta jarduna 2002-2003 ikasturtean arautzeko jarraibideak

Sarrera

Ikastetxe hauen antolaketa eta funtzionamendurako, funtsean honakoei kasu eginen zaie: Nafarroako Foru Komunitateko lurraldean diren Haur Hezkuntzako Eskola Publiko, Lehen Hezkuntzako Ikastetxe Publiko eta Haur Hezkuntza eta Lehen Hezkuntzako Ikastetxe Publikoen Erregelamendu Organikoan ezarritakoa, uztailaren 6ko 225/1998 Foru Dekretuaren I eta III. Tituluetan eta xedapenetan, maiatzaren 10eko 153/1999 Foru Dekretuan, Haur Hezkuntzako eta Lehen Hezkuntzako ikastetxe publikoen Erregelamendu Organikoa garatzen duen uztailaren 16ko 257/1998 Foru Aginduan -bereziki Bigarren Xedapen Gehigarrian-, Nafarroako Foru Komunitateko hezkuntza zerbitzuaren kalitatea hobetzeko Ituna argitaratzea agintzen duen uztailaren 13ko 279/2001 Foru Aginduan, eta azkenik, Foru Agindu honen I., II. eta IV. eranskinetan 2002-2003 ikasturterako bildutako jarraibideotan xedatutakoa. Jarraibide hauek, osagarrizko araudia direlarik, aipatutako oinarrizko arauen zenbait alderdi garatzea dute helburu, zenbait idatz-zatitan zehaztu behar baitira, arautegi honek aipatzen dituen ikastetxe publikoek ahalbait egokien eta eragileen funtzionatzeko.

I.-Irakasleak

1.-Ordutegia ikastetxe batean baino gehiagotan banatua duten irakasleak.

Ikastetxe batean baino gehiagotan aritzen diren irakasleen ordutegia prestatzean bete beharko da irakasle ibiltariendako lan baldintzei buruzko arautegian ezarritakoa.

2.-Irakaskuntza konpartitua bi mailetan (Lehen Hezkuntza eta DBHko Lehen Zikloa)

Derrigorrezko Bigarren Hezkuntzako Lehen Zikloa behin- behinekoz ematen den Haur Hezkuntzako eta Lehen Hezkuntzako ikastetxe publikoetan eta herri bereko ikastetxe publikoarekin batera aritzen diren Derrigorrezko Bigarren Hezkuntzako Institutuetan, destinoa Lehen Hezkuntzan duten irakasleek, noizbait suertatuz gero, Derrigorrezko Bigarren Hezkuntzako Lehen Zikloan eskola ematen ahalko dute, zenbait alor eta irakasgaitan.

Halaber, Derrigorrezko Bigarren Hezkuntzako Lehen Zikloari atxikitako maisu-maistren kidegoko irakasleek euren ordutegia osatzen ahalko dute Lehen Hezkuntzako jarduerekin.

3.-DBHko tutoreen koordinazio eginkizunak.

Uztailaren 6ko 225/1998 Foru Dekretuaren 14.4 artikuluaren arabera Derrigorrezko Bigarren Hezkuntzako ikasle taldeen tutoreek koordinazio eginkizunetarako astean duten irakastordua, ahal baldin bada, ikasleen jarraipena egiteko jardueretarako erabiliko da, horretan sartuz bai ikasleekin egiten diren elkarrizketak, bai dagokion irakasle taldearekin egin beharreko bilerak.

4.-Astean kontatu beharreko ordu osagarriei buruzko xehetasunak.

Plangintza instituzionalerako tresnak prestatzearekin edo berrikustearekin zerikusia duten eginkizunetarako orduak honela banatuko dira: ikastetxeko zuzendariak ordu horien erdiak finkatuko ditu eta lehentasunezko eta nahitaezko izaera izanen dute, irakasleek berek egin dezaketen beste edozein aukeraren gainean; gainerako erdiak -azkeneko ordu hauek ez diote inolaz ere eragozpenik sortuko aurrekoei- irakasleek nahi erara erabiliko dituzte prestakuntza jarduerak egin ditzaten, aldez aurretik Ikastetxeko Prestakuntza Planean sarturik.

Aurreko lerroaldean ezarritakoez gainera, Derrigorrezko Bigarren hezkuntzako ikasketak didaktikoki koordinatzeko eginkizunak beteko dituzte ikastetxean berean, zuzendaritza taldeak egindako plangintzaren arabera edo, kasua denean, ikastetxea Derrigorrezko Bigarren Hezkuntzako zein Instituturi dagoen atxikita, hango didaktika departamentuetan. Azkeneko hori, orokorki eta uztailaren 16ko 257/1998 Foru Aginduaren Bigarren Xedapen Gehigarriko 6. puntuan ezarritakoa galarazi gabe, hilean behin egin beharko da. Horretarako, ordutegiak egiteko ados jarri beharko dute Bigarren Hezkuntzako Institutuetako zuzendaritza taldeek eta institutu horiei atxikitako ikastetxeetakoek, uztailaren 16ko 257/1998 Foru Aginduko Bigarren Xedapen Gehigarriko 2. puntuan ezarritakoaren arabera.

III. ERANSKINA

Otsailaren 10eko 25/1997 Foru Dekretuaren hirugarren xedapen gehigarriaren arabera funtzionatzen duten Derrigorrezko Bigarren Hezkuntzako institutuen eta Bigarren Hezkuntzako institutuen antolaketa eta funtzionamendua 2002-2003 ikasturtean arautzeko jarraibideak

Sarrera

Ikastetxe publiko hauen antolaketa eta funtzionamendurako, funtsean, honakoei kasu eginen zaie: Nafarroako Foru Komunitateko lurraldean diren Bigarren Hezkuntzako Institutuen Erregelamendu Organikoan ezarritakoa; uztailaren 6ko 225/1998 Foru Dekretuaren I eta IV. Tituluak eta Xedapenak; maiatzaren 10eko 153/1999 Foru Dekretuan; Bigarren Hezkuntzako institutuen erregelamendu organikoa garatzen duen uztailaren 16ko 258/1998 Foru Agindua; Nafarroako Foru Komunitateko hezkuntza zerbitzuaren kalitatea hobetzeko Ituna argitaratzea agintzen duen uztailaren 13ko 279/2001 Foru Agindua eta, azkenik, Foru Agindu honen III. eta IV. eranskinetan 2002-2003 ikasturterako bildutako jarraibideotan xedatutakoa. Jarraibide hauek, osagarrizko araudia direlarik, aipatutako oinarrizko arauen zenbait alderdi garatzea dute helburu, arautegi honek aipatzen dituen ikastetxe publikoek ahalbait egokien eta eragileen funtzionatzeko.

I.-Ikastetxeko urteko programazio orokorra

1.-Hobekuntza planak.

Koordinazio Pedagogikorako Batzordeak urtero aurkeztuko dio klaustroari ikasturteko lanen plan bat, irailean. Plan hori Hezkuntza eta Kultura Departamentuak ezarriko dituen alderdiak hobetzeko proiektu baten barrenean sartuko da. Aipatu Planean lortu nahi diren helburuak azalduko dira, hala nola aurreikusitako helburuak lortzeko berariazko jarduketak, organo erantzuleak, lan metodologia edo prozedura eta plana ikasturtean burutzeko egutegi edo tenporalizazioa.

2.-Hezkuntza proiektua hobetu eta moldatzea.

Hezkuntza eta Curriculum proiektuek arreta berezia eginen diote ulermenezko irakurketari curriculumeko arlo guztietan, ikaskuntzaren tresnetan oinarrizkoena eta komunena baita. Etapako irakasle guztiak, ez soilik Hizkuntza arlokoak, ahaleginduko dira ikasle orok DBHko eta Batxilergoko ikasketak bukatzean eta haiei dagokien adinaren arabera, beren garapen akademiko eta pertsonalerako beharrezkoak diren hizkuntza gaitasun oinarrizkoak izan ditzaten, besteak beste, honako hauek: isilik edo ahots goraz irakurtzeko gaitasuna; testu zientifiko edo literarioa, edo ikasgelan erabilitako ikasliburua interpretatzeko gaitasuna eta edozein gairen gainean bere pentsamendua eta ideiak, koherentziaz eta zuzentasunez, adierazteko aukera, ahoz eta idatziz, betiere bere bizitza pertsonalarekin edo gizarte, kultura edo zientzia arloarekin harremanetan.

Didaktika departamentuek jarduerak diseinatuko dituzte ikasleen irakurtzeko gaitasun maila handitzeko, irakurtzeko ohitura bultzatzeko eta irakurtzeko gogoa sustatzeko, dela ikasgelan, dela liburutegi nagusian. Liburutegi nagusia hartuko da curriculumeko arlo guztien ikaskuntza aktiboari laguntzen dion baliabide zentro antolatu modura. Hezkuntza eta Kultura Departamentuak etapako curriculumaren testuinguruan ulermenezko irakurketa nola egin behar den jakiteko hainbat orientabide emanen du.

3.-Curriculum proiektua.

2002-2003 ikasturtean, didaktika departamentuek DBHko bigarren eta laugarren kurtsoetako eta Batxilergoko bigarren kurtsoko programazio didaktikoak prestatuko dituzte, eta DBHko lehen eta hirugarren kurtsoetako eta Batxilergoko lehen kurtsoko programazioei jarraipena eginen diete, Nafarroako Foru Komunitateko Derrigorrezko Bigarren Hezkuntzaren curriculuma ezartzen duen otsailaren 22ko 67/1993 Foru Dekretua aldatzen duen martxoaren 25eko 61/2002 Foru Dekretuan eta Nafarroako Foru Komunitateko Batxilergoaren egitura eta curriculuma ezartzen dituen martxoaren 25eko 62/2002 Foru Dekretuan ezarritakoaren arabera.

2002-2003 ikasturtean, irakasle taldeek, barreneko koordinaziorako ohiko lanen esparruan, curriculumak zehazteko prozesuaz gogoeta egin beharko dute, Derrigorrezko Bigarren Hezkuntzako programazio didaktikoetan eta gelako programazioetan sakontze maila ezberdinak ezartzeko, horrela ikastaldearen barruan ikasleak modu pertsonalizatuago batean atenditzeko aukera izanen baita.

Derrigorrezko Bigarren Hezkuntzako antolaketa eta curriculum arloetako alderdiak arautzen dituen maiatzaren 19ko 135/1997 Foru Dekretuko 6. artikuluan ezarritakoaren arabera, didaktika departamentuek kurtso bakoitzeko arloaren programazio orokorra prestatuko dute, ikasleen, ikastetxearen eta haien inguru soziokulturalaren egoerei egokituta. Programazio horretan nagusiki jasoko dira edukien banaketa, ebaluazio irizpideak aplikatzeko ildo orokorrak, curriculumeko egokitzapenak eta metodologia eta jarduera didaktikoak. Horien guztien orientabidea bikoitza da:

-Batetik, oinarrizko kultura prestakuntzarekin lotutako hezkuntza helburu eta edukiak (ikasleek LOGSEko 19. artikuluan deskribatzen diren etapako helburu orokorrak garatuko dituztela bermatuko dutenak), gutxieneko ikasketei dagokienez.

-Bestetik, arloen edo irakasgaien curriculumeko helburuak eta edukiak garatzea, helburu propedeutikoarekin eta LOGSEren 19. artikulua abiapuntutzat hartuta, curriculum gaitasun egokiaz goragoko hezkuntza mailetara igotzeko.

Zehazki, egoki litzateke Bigarren Hezkuntzako ikastetxeetan heziketa akademiko-teorikorako prestutasun gutxi duten ikasleei arreta emateko modua aztertzea, Aniztasunari arreta egiteko Planaren barrenean, derrigorrezko bigarren hezkuntzako helburuak lortzeko bidean aurrera egin ahal izan dezaten, gehienbat izaera praktikoa duten metodologia eta curriculum egokitzapenak eginez, banaka edo taldeka. Bereziki, DBHko laugarren kurtsoa beste modu batean antola daiteke, oinarrizko hezkuntza ikusmolde eta jokabide praktikoekin lotzen dituen aukerabide bat eskaintzeko.

Eduki tematikoak berdinak izan arren, sakontze maila ezberdinak zehaztuz gero, gelako lana faboratuko duten irakaskuntza eta ikaskuntzarako estrategiak garatu ahalko dira, ikasleek erakusten dituzten aukerabideetatik abiatuta eta hurrengo ziklo edo etapara seguruki igotzeko egoki diren eskakizunak oinarri hartuta. Gaitasunak garatzeko prozesuan eta ikaslearen errendimendu-mailan aurrera eginen dela bermatzea da helburu, aurreko hezkuntza mailetan lorturiko jakintza-mailatik abiatuta. Ikasleen ikaskuntza lagundu eta bultzatzeko programazio berariazkoak prestatu eta curriculumean oso garrantzitsuak ez diren egokitzapenak sartzeko ahalegin berezia eginen da, izan ere, horiei esker aniztasunari arreta egiteko neurriak hobeki doitu ahalko dira.

Lan horren segimendua eta laguntza, espresuki, ikastetxeetako zuzendaritza eta koordinazio organoei eta Zerbitzuak Ikuskatzeko eta Ikuskapen Teknikorako Zerbitzuari esleitzen zaie.

Batxilergoari dagokionez, ahalegin berezia eginen da ikasleek dagozkien helburuak lortzeko eta Unibertsitatean sartzeko probetan eskatzen den maila eskuratuko dutela bermatzeko gaitasun maila egokia lor dezaten, etaparen hasiera-hasieratik bukaera arte.

Ikastetxeek ikasturtea hasi ondoren eskolatzen diren ikasleek curriculuma garatu ahal izateko neurriak aztertuko dituzte: ebaluazio prozedurak eta curriculum arloko gaitasunen diagnostikoa, abegi egiteko edo hizkuntza murgilketarako neurriak, ikasgelako talde bati atxikitzekoak, curriculumaren egokitzapenak, ebaluazio irizpideak, material egokiak, tutorearen laguntza, e.a. Ikastetxeko zuzendarien eskumena izanen da gaztelania atzerriko hizkuntza gisa erakusteko programazioaren ardura egoki iruditzen zaizkienei agintzea, ikastetxeko hizkuntza arloko departamentuen esparruan.

4.-Ikastetxeko Prestakuntza Plana.

Irakasleen Prestakuntza Planak, 2002-2003 ikasturtekoak, prestakuntza jarduera anitz eskaintzen du, eta irakasleek horien artean beren prestakuntza ibilbiderako egokitzat jotzen dituztenak aukeratu ahal izanen dituzte.

Ikasturte honetan, Prestakuntza Planaren lan ildoak honakoak dira:

-Lanean ari diren irakasleen gaitasuna garatzea, jakintza teoriko, irizpide sendo eta ikas-baliabideez horniturik, beren irakaslanerako gero eta hobeki prestatuak egon daitezen.

-Ikastetxean eta ikasgeletan elkarbizitzaren kudeaketa gero eta hobea izan dadin bultzatzea.

Lanbide Heziketaren esparruan, Nafarroako Lanbide Heziketa garatzeko Planean jasotzen da irakasle eta hezitzaileen prestakuntzako berariazko programa. Programa honek hainbat ildo du eta esparru hauetan antolatzen da:

-Jakintza zientifiko eta teknikoa.

-Ekoizpena eta kalitatearen kontrola antolatzeko beste metodo batzuk.

-Lanbide irakaskuntzaren metodologia. Teknologia berriak aplikatzea.

-Behar den espezialitatearen berariazko didaktika.

-Lanbide Heziketaren sistema berria. Kualifikazio profesionalak eta prestakuntzaren moduluz moduluko katalogoa.

Zuzendaritza taldeek ahalegina eginen dute irakasleek Prestakuntza Planeko jardueretan har dezaten parte.

II.-Irakasleak

1.-Tailerren mantentze eta horniketarekin zerikusia duten jarduerak.

Berariazko Lanbide Heziketa ematen duten Bigarren Hezkuntzako Institututetan tailerren mantentze eta horniketaz arduratuko den irakasleak astean hiru irakastordu eman ahal izanen ditu, gehienez, lan horretan.

2.-Bi urteko Heziketa Zikloetan dauden irakasleen jarduna 2. kurtsoko azken hiruhilekoan, irakastorduak gutxitzean.

Ikasleek Lantokietako Prestakuntza Modulua egiten duten bitartean irakastordu gutxiago dituzten irakasleek denbora hori emanen dute, Lantokietako Prestakuntza Moduluan sartu ez diren ikasleak atenditzeaz gainera, tutoreari laguntzen Modulu horretan ari diren ikasleen jarraipena egiten, errekuperaziorako jarduera antolatuetan, ikastetxean Heziketa Zikloak ikasten ari diren beste talde batzuei laguntza ematen, bai eta lan hobekuntzako jardueretan, ikastetxeko instalazioek behar dituzten mantentze lanetan eta Lantokiko Prestakuntzako tutorearekin lankidetzan, ikastetxeak dituen beharren arabera modulu hori egiten ari diren ikasleei jarraipena egiteko eta atzerriko programen ondoriozko beharrak atenditzeko lanetan ere.

3.-Ordutegia ikastetxe batean baino gehiagotan banatua duten irakasleak.

Ikastetxe batean baino gehiagotan aritzen diren irakasleen ordutegia prestatzean bete beharko da Nafarroako Foru Komunitatean hezkuntza zerbitzuaren kalitatea hobetzeko ituna argitaratzea agintzen duen uztailaren 13ko 279/2001 Foru Aginduan irakasle ibiltariendako lan baldintzei buruz ezarritakoa.

4.-Esparruko irakasleak.

Esparruko irakasleak bere esparruko ikasketak emanen ditu curriculum egokituko unitateetan, curriculum ezberdinak eratzeko programetan eta lanbide hastapeneko programetan.

Irakasle hauetakoren batek ez baditu bere esparruari dagokion irakaslanarekin irakastordu guztiak osatzen, horretarako aukera izanen du DBHn aniztasunari arreta egiteko neurriei sostengua emanez eta DBHko 4. kurtsoko aukerabidearekin lotutako irakaskuntzak emanez, halakorik baldin badago, azken horretan batera landu baitaitezke oinarrizko heziketa eta alderdi eta ikuspuntu praktikoak.

Lanbide Hastapenerako Programetako irakasle taldean ari diren esparruko irakasleek koordinaziorako eta tutoretzarako dituzten hiru orduetatik bat bederen gordeko dute programazio didaktikoaren garapen eta ebaluazioaren inguruko koordinazio lanetarako eta tutoretza lana koordinatzeko lanetarako (uztailaren 6ko 225/1998 Foru Dekretuaren 22.3 artikulua).

5.-DBH, Batxilergo eta Berariazko Lanbide Heziketako tutoreen koordinazio eginkizunak.

Uztailaren 6ko 225/1998 Foru Dekretuaren 22.3 artikuluaren arabera Derrigorrezko Bigarren Hezkuntzako, Batxilergoko eta Lanbide Heziketako ikasle taldeen tutoreek koordinazio eginkizunetarako astean duten irakastordua, ahal baldin bada, ikasleen jarraipena egiteko jardueretarako erabiliko da, horretan sartuz bai ikasleekin egiten diren elkarrizketak, bai dagokion irakasle taldearekin egin beharreko bilerak.

6.-Institutuetako zuzendarien koordinaziorako ordutegia.

Ikastetxeen arteko koordinazioa areagotzeko, Institutuetako zuzendariek ez dute eskolarik eman beharrik izanen astearte goizetan.

7.-Asteazken arratsaldeko ordutegiari buruzko xehetasunak.

Plangintza instituzionalerako tresnak prestatzearekin edo berrikustearekin zerikusia duten eginkizunetarako orduak honela banatuko dira: ikastetxeko zuzendariak ordu horien erdiak finkatuko ditu eta lehentasunezko eta nahitaezko izaera izanen dute, irakasleek berek egin dezaketen beste edozein aukeraren gainean; gainerako erdiak -azkeneko ordu hauek ez diote inolaz ere eragozpenik sortuko aurrekoei- irakasleek nahi erara erabiliko dituzte prestakuntza jarduerak egin ditzaten, aldez aurretik Ikastetxeko Prestakuntza Planean sarturik.

Aurreko lerroaldean ezarri ordu kopuruari puntualizazio hauek egin beharko zaizkio:

-Orientazio Departamentuko irakasleak programazio didaktikoak prestatzen arituko dira, zehazki, curriculum ezberdinak eratzeko Programetara eta curriculumaren egokitzapenetara egokitutako curriculum unitateen arloetakoak.

-Gainerako irakasleek programa berariazkoak, oso esanguratsuak ez diren curriculum egokitzapenak eta irakasle- lana lagundu eta indartzeko baliabideak landuko dituzte.

Derrigorrezko Bigarren Hezkuntzako Institutuetako irakasleek plangintza instituzionalerako tresnak egiteko erreserbaturiko asteroko ordu osagarriak, bai eta Departamentuko bilerarako asteroko ordu osagarria ere, ondoko jardueretarako erabiliko dituzte:

-Derrigorrezko Bigarren Hezkuntzako programazio didaktikoak egin edo/eta berrikustea, haien ikastetxeak atxikirik dituzten Bigarren Hezkuntzako Institutuen Didaktika departamentuekin koordinatuta.

-Derrigorrezko Bigarren Hezkuntzako irakaskuntzen koordinazio didaktikoa egitea beren ikastetxean, Zuzendaritza taldeak egindako planifikazioaren arabera, edo ikastetxea atxikirik duen Bigarren Hezkuntzako Institutuaren Didaktika departamentuetan. Horretarako, eta Bigarren Hezkuntzako Institutuen Erregelamendu Organikoa garatzen duen uztailaren 16ko 258/1998 Foru Aginduaren 25. artikuluan ezarritakoa deusetan galarazi gabe, Derrigorrezko Bigarren Hezkuntzako Institutuetako irakasleak beren ikastetxeak atxikirik dauden Bigarren Hezkuntzako Institutuetako Didaktika departamentuen bileretara joanen dira hilabetean behin.

8.-Zaintzak.

Zaintzako irakaslearen eginkizun nagusiak hauexek dira:

a) Irakasleak huts egiteagatik edo beste edozein arrazoirengatik zaindaririk ez duten ikasleei kasu egitea.

Irakasleren batek aurrez baldin badaki huts eginen duela, antolaturik utziko du ikasleek zer lan egin behar duten gelan, eta ikasketaburuari emanen dio laneko plan hori.

Ikasleek ez badute inolako lan berezirik, edo hala hitzartzen badu hutsegiten duen irakasleak zaintzako irakaslearekin, zaintzako irakasleak zilegi izanen du ordu hori ikasleei bere gai propioa emateko erabiltzea, betiere ikasketaburuaren baimena baldin badu, eta gainerako ordutegia aldatzen ez bada.

b) Korridoreetan ordena zaintzea eta, oro har, ikasleek gelaz kanpo duten portaera. Horrek ez du esan nahi beste irakasleek eginkizun hori bete behar ez dutenik.

c) Beren txandan sortzen diren gorabehera guztiak ebaztea, bai eta ikastetxeko norbait mediku beharrean gertatuz gero hartarako dilijentziak egitea ere, horrez gain ikasketaburua lehenbailehen jakinaren gainean jarriz.

d) Beren txandan irakasleek duten puntualitate eta asistentziaren berri ematea idatziz, klaseei, zaintzei, liburutegiari eta bestelako jarduerei dagokienez.

Ikasketaburuak zaintzei buruzko parte bat prestatuko du egunero, beti Zerbitzuak Ikuskatzeko eta Ikuskapen Teknikorako Zerbitzuaren eskura egonen dena. Gutxienez honako datuak izanen ditu:

-Irakasleen hutsegite eta atzerapenak.

-Ikastetxeko edozein egoitzatan izan diren gorabeherak.

-Gertatu diren istripuak.

-Zaintzako irakasleen sinadurak.

Zaintzetarako irakasle aski baldin badaude, zuzendariak baimena eman ahal izanen du irakasleren baten zaintzako orduen trukaketa egin eta berariazko jarduera batzuk burutzeko, azken horiek klaustroak aurretik onetsi baldin baditu.

9.-Ordutegia betetzea eta asistentzia partea.

Zuzendaritza Taldeak jakinaraziko die Giza Baliabideen Zerbitzuari eta Zerbitzuak Ikuskatzeko eta Ikuskapen Teknikorako Zerbitzuari, lan nahiz administrazio araubideko aldi baterako lan-kontratudunak zein egunetan hasi diren ikastetxean.

Asistentzia parteen eredu ofizialak betetzean, honakoak hartu behar dira aintzat parte horietan:

a) Inoiz ez da utziko hutsik "Hutsegitearen arrazoia" laukia, eta hala egiten bada, justifikatu gabeko hutsegitetzat hartuko da.

b) Hutsegite guztiek agertu behar dute, bat ere utzi gabe.

c) "Hutsegitearen arrazoia" laukian "ordainsaririk gabeko norberaren eginkizunetarako baimena" jartzeko, nahitaezkoa izanen da Giza Baliabideen Zerbitzuak hartarako lizentzia eman izana.

Eskola emate normalaren alterazio guztiak berehala emanen zaizkio aditzera telefonoz Zerbitzuak Ikuskatzeko eta Ikuskapen Teknikorako Zerbitzuari, eta bai ondoren asistentzia partean jasoko.

III.-Irakaskuntza Koordinatzeko Organoak

1.-Didaktika departamentuak.

A. Nafarroako Urrutiko Hizkuntza Eskola Ofizialarekin egin beharreko koordinazio bilerak.

Urrutiko Hizkuntza Eskola Ofizialarekin lankidetzan aritzeko Programari jarraikiz atzerriko hizkuntzak irakasteko baimena duten Bigarren Hezkuntzako institutuetako didaktika departamentuek beharrezkoak diren bilera guztiak eginen dituzte aipatutako Eskolako arduradunekin, ikasturte hasieran, UHEOkoek ezarriko dutenari jarraikiz. Bilera horietara nahitaez joan beharko dute programan parte hartzen duten irakasle guztiek.

Ikasturtean zehar gutxienez hilabetean behin bilera bat eginen da curriculumaren garapena aztertzeko hala nola Programa horren aplikazio praktikoaren ondorioz sor daitezkeen arazoak konpontzeko.

Irakasle horien eginkizunak Nafarroako Urrutiko Hizkuntza Eskola Ofizialeko Jarraibideetako "Irakasle laguntzaileak" izeneko 2.5 puntuan bildu dira.

Era berean, ekainean ebaluatuko da programa, hurrengo ikasturteetan aipatu programa hobetzeko neurriak hartzeko.

Ebaluazioan programazioa bete den aztertuko da, koordinazio bilkurak nola egin diren ikusiko eta erabilitako materialak eta egindako ebaluazio probak aztertuko.

B. Departamentuburua. Bestelako eginkizunak.

Departamentuburuak, Erregelamendu Organikoan, uztailaren 16ko 258/1998 Foru Aginduan eta jarraibide hauetan aipatzen diren eginkizunak bere gain hartu beharko ditu eta ikasturte hasieran Urteko Lan Plana aurkeztu, Departamentuak urtean zehar egin beharrekoa bilduko duena. Departamentuan eztabaidatu ondoren, onartu beharko da. Plan horretan, besteak beste, ikasturtearen hasieran lehentasuna emanen zaio hezkuntza etapei dagozkien ikasketen programazio didaktikoak prestatzeko egin beharreko lanari, Batxilergoa irakasten duten Institutuen kasuan, edo Heziketa Zikloetako Curriculum Proiektua eta ziklo bakoitzeko moduluetako programazio didaktikoa, Berariazko Lanbide Heziketaren ikasketak ematen dituzten Institutuen kasuan.

2.-Koordinazioko beste eginkizun batzuk.

Bigarren Hezkuntzako Institutuen Erregelamendu Organikoan eta uztailaren 16ko 258/1998 Foru Aginduan aurrez ikusten diren karguak, zuzendaritzakoak eta didaktikoak, beteko dituzten irakasleak izendatuta, eskolako premia guztiei erantzuna emanik eta Institutuak dituen orduen arabera, zuzendariak zilegi izanen du, idazkariak hala proposaturik, kargu horietarako izendapenik jaso ez duten irakasleen artean Liburutegiko koordinatzaile bat izendatzea, zeinak, gehienez, astean bi irakastordu eman ahal izanen baititu karguari dagozkion lanetan.

Liburutegiko irakasle koordinatzaileak, idazkariaren agindupean, honako eginkizun hauek izanen ditu, besteak beste:

a) Ikastetxeko liburutegiak duen material didaktikoa behar bezala antolatu eta zaintzea, eta behar bezala erabiltzen dela bermatzea.

b) Ikasleei kasu egin eta aholku ematea Ikastetxeko liburutegiaren baliabideak erabiltzeko.

c) Ikastetxeko liburutegian dagoen material didaktikoari buruzko informazioa zabaltzea irakasle eta ikasleen artean, batez ere gauza berriei buruz, eskuratu ahala.

d) Liburutegirako material eta fondo berriak erosteko aholkuak ematea.

e) Hezkuntza komunitateko sektore ezberdinetan, eta bereziki ikasleen artean, irakurketa sustatzeko lanetan laguntzea.

Orobat, bi lanbide arlo edo gehiagoko heziketa zikloak ematen dituzten Bigarren Hezkuntzako institutuetan, idazkariak hala proposatuta, zuzendariak ahalmena izanen du irakasle bat ekipamendu didaktikoaren arduradun izendatzeko, lanbide arlo guztietarako konpartitua. Horren dedikazioa arestian aipatutako koordinatzaileena bezalakoa izanen da.

IV.-Beste jarraibide batzuk

1.-Salbuespena eta egokitzapenak, Gorputz Hezkuntzaren arloan.

Salbuetsiak daude soilik hogeita bost urtetik goitikoak edo matrikulatutako ikasturtean adin hori betetzen dutenak.

Egokitzapenak egiteko eskabideak ikasleek edo, adin txikikoak baldin badira, beren gurasoek edo legezko ordezkariek aurkeztuko dituzte ikastetxeko Zuzendaritzan, eta medikuen ziurtagiriak erantsiko zaizkie.

Batxilergoko Gorputz Hezkuntza egitetik salbuesteko eskaera egiten ahalko dute, bakar-bakarrik, mugikortasun arazo larriak dituzten ikasleek, ohiz kanpoko kasuetan. Egoera hori behar bezala egiaztatu beharko da.

2.-Derrigorrezkoaren ondoko Bigarren Hezkuntzan matrikulari uko egitea.

Derrigorrezkoaren ondoko Bigarren Hezkuntzako edozein ikasketa, baita goi mailako Heziketa Zikloak ere, egiten ari diren ikasleek, ikasketak bukatzeko deialdiak mugatuak badira, zilegi izanen dute beren espediente akademikoak gordetzen dituen institutuko zuzendariari eskatzea matrikula baliogabetzeko, baldin eta agiri bidez eta era frogagarrian egiaztatzen badute ondoko gorabehera hauetako bat:

-Eritasunen bat, fisikoa nahiz psikikoa izan dutela.

-Lanpostu bat eskuratu dutela.

-Familiako beharkizunak dituztela.

Eskaerak apirilaren 30a baino lehen egin beharko dituzte, ikasturtea ekainaren 30ean bukatzen duten irakaskuntzen kasuan, eta ikastaroko azkeneko ebaluazioa egin baino bi hilabete lehenago, gainerako kasuetan.

Eskaerak institutuko zuzendariak ebatziko ditu, irakasle taldeak dioena entzun ondoren, hala behar bada. Zuzendariak baimena emanen du matrikula baliogabetzeko, baldin eta egiaztatzen bada arestian aipatu arrazoietako bat izan dela eta horrek galarazi diola eskatzaileari eskolara normal joatea eta, ondorioz, etengabeko ebaluazioaren prozedurarekin bera kalifikatzea ezinezkoa izan dela.

Arestian esandakoez landara, ohiz kanpoko beste arrazoirik izaten bada, ikaslearen espediente akademikoa gordetzen duen Bigarren Hezkuntzako institutuko zuzendariari eginen zaizkio matrikula baliogabetzeko eskaerak, epe berean. Kasu horretan, zuzendariak eskaera eta harekin batera txosten bat eta, beharrezkoa bada, dagokion dokumentazioa bidaliko ditu Hezkuntza Zuzendaritza Nagusira, egokia den Ebazpena eman dadin.

Matrikula baliogabetzeko baimena ematen den aldi oro, horri dagokion dilijentzia agertaraziko da ikaslearen espedientean. Baliogabetze hori baimena eman den ikasturte horrexetarako dela ulertuko da. Horrelako kasuetan, ikasturte hori ez da kontuan hartuko ikasketa horietan egoteko gehieneko epea kontatzean. Nolanahi ere, lanbide heziketako eta arte plastikoetako eta diseinuko ikasketetan izan ezik, matrikula baliogabetze horren onuradun den ikaslea behartuta egonen da baimena jaso ondoko urtean matrikula egitera, aurreko ikasturtean matrikulatu zen ikasmaila berean, bestela, ikasle ofiziala izateko eskubide guztiak galduko ditu.

3.-Ikasleen kalifikazioei buruzko erreklamazioak.

Ikasleei beren errendimendu akademikoaren balorazio objektiboa bermatzeko, beharrezkoa da ikasleek aurretik izatea helburuen, edukien eta ebaluazio irizpideen berri, hala nola balorazio positiboa izateko eskatutako gutxieneko emaitzena, kalifikazio irizpideena eta ikasketak ebaluatzeko ikasturtean erabiliko diren prozedurena.

Arlo edo irakasgai bakoitzeko irakasle titularrak ikasleek, haien gurasoek edo legezko ordezkariek programazio didaktikoei buruz eskatzen dituzten argibideak emanen dizkie. Ebaluazioa egiteko tresnei buruzko informazioa ere emanen die eta ikasleek zilegi izanen dute egin dituzten idatzizko proba, ariketa eta lanak ikusi eta irakaslearekin batera aztertzea.

Ebaluazioa egiteko tresnak azken erabaki edo kalifikazioak hartu ondoko hiru hilabeteetan gordeko dira gutxienez.

Ikasleek, haien gurasoek edo legezko ordezkariek zilegi izanen dute balorazio eta kalifikazioei buruzko argibideak eskatzea arlo edo irakasgai bakoitzeko irakasle titularrei. Informazio hori eman ondoren ados ez badaude izandako azken kalifikazioarekin, mailaz igotzeari buruzko erabakiarekin edo, Derrigorrezko Bigarren Hezkuntzaren kasuan, titulazioarekin, hura berriz aztertzeko eskatzen ahalko diote idatziz ikasketaburuari, jakinarazpena egin eta bi egun balioduneko epean.

Azken kalifikazioa berraztertzen baldin bada, Didaktika departamentuek, hurrengo egun baliodunean, berraztertzeko eskakizunak ikusi eta dagozkien txostenak eginen dituzte. Txostena ikasketaburuari igorriko zaio eta horrek kopia bat bidaliko die ikasleei edo haien gurasoei.

Berraztertzeko eskaera irakasle taldeak Derrigorrezko Bigarren Hezkuntzako ikasle baten mailaz igotze edo titulazioari buruz hartutako erabakiari dagokionean, berraztertzeko eskaera aurkezteko epea bukatu eta gehienez bi eskola eguneko epean, irakasle taldeak aparteko bilera eginen du, eta bertan aztertuko du hartutako erabakia, kontuan hartuz aurkeztutako alegazioak.

Irakasle-tutoreak bilkura berezi hartako aktan honakoa jasoko du: aurretiazko gorabeheren azalpena, egitateak eta jarduerak, Ebaluazio Batzordearen edo irakasle taldearen deliberoen alderdi nagusiak eta berraztertu den erabakiaren aldaketa edo berrespena, ikasleek mailaz igo eta titulazioak eskuratzeari dagokionez, ikastetxearen Curriculum Proiektuan ezarrita dauden irizpide orokorren arabera arrazoitua.

Ikasketaburuak idatziz jakinaraziko die ikasleari eta haien guraso edo tutoreei mailaz igotzearen edo titulua ematearen gainean hartutako erabakia, aurrekoa berrestekoa edo aldatzekoa, eta horretarako arrazoiak emanen ditu. Erabaki horrek amaiera emanen dio erreklamazio bideari.

Arlo, ikasgai edo modulu bateko ziklo edo ikasmaila baten azken kalifikazioa ikastetxeetan berraztertzeko prozesua agortzen duten ikasleek zilegi izanen dute, dela nork bere kasa, dela guraso edo tutoreen bitartez, ikastetxeko zuzendariari eskatzea erreklamazioa Zerbitzuak Ikuskatzeko eta Ikuskapen Teknikorako Zerbitzura igor dezala, azken jakinarazpena egin eta bi eguneko epean.

Ikastetxeko zuzendariak, gehienez hiru eguneko epean, espedientea bidaliko du Zerbitzuak Ikuskatzeko eta Ikuskapen Teknikorako Zerbitzura. Hezkuntza zuzendari nagusiaren ebazpena, administrazio bideari amaiera emanen diona, hamabost eguneko epean emanen da, espedientea jasotzen denetik, kontuan hartuz Zerbitzuak Ikuskatzeko eta Ikuskapen Teknikorako Zerbitzuaren txostenak.

Ikaslearen alegazioaren aldeko ebazpena ematen baldin bada arestian aipatutako instantziaren batean, dagokion zuzenketa agertaraziko da ebaluazio agirietan, ikastetxeko idazkariak sinatutako eta zuzendariak ikus-onetsitako eginbidearen bitartez.

Kalifikazioen kontrako berraztertze eskaerak eta erreklamazioak 1995eko abuztuaren 28ko Aginduari lotuko zaizkio (1995-9-20ko "E.A.O.").

IV. ERANSKINA

Nafarroako Foru Komunitateko hezkuntza zerbitzuaren kalitatea hobetzeko ituna

Irakasleen lanaldia eta ordutegia arautzen dituen uztailaren 6ko 225/1998 Foru Dekretua aldatu arte, eta kontuan harturik beharrezkoa dela 2002-2003 ikasturtean ikastetxeek Nafarroako Gobernuko Hezkuntza eta Kultura Departamentuko ordezkariek eta sindikatuetako ordezkariek sinatutako itun berrian ezarritako aldaketa batzuk, ikastetxeen antolaketa eta funtzionamenduari buruzkoak, hartzea, honako xedapen hauek aplikatuko dira:

I.-Haur Hezkuntzako eta Lehen Hezkuntzako Irakasleak

1.-Irakastorduen murriztapena adina dela kausa.

a) 55 urtetik gora izan eta lanaldi osoa duten Haur Hezkuntzako irakasleek, hala nahi badute, bi irakastorduko murriztapena izanen dute astean. Horrek ez du berarekin ekarriko murriztapenik ikastetxean egon beharreko asteko ordutegian.

b) 58 urtetik gora izan eta lanaldi osoa duten irakasleek, hala nahi badute, bost irakastorduko murriztapena izanen dute astean. Horrek ez du berarekin ekarriko murriztapenik ikastetxean egon beharreko asteko ordutegian.

c) 58 urtetik gorako Lehen Hezkuntzako irakasle espezialistek gehienez ere 18 irakastordu zuzen izanen dituzte eta ez dute atsedenaldi eta zaintzetan lanean aritu beharko, betiere ikastetxearen beharrek hori egiten uzten badute.

d) Aurreko hizki horietan aipatu borondatezko murriztapen hori aplikatuko da murriztapena aipatu adina betetzen den urte naturalean hasten den ikasturtetik aurrera, eta zuzendaritza edo didaktika arloko karguetan aritzeagatik onartzen diren beste murriztapen batzuekin bateraezina izanen da.

e) Adina dela kausa eskola ordutegiaren murriztapena duten 58 urtetik gorako irakasleek, 65 urte betetzearekin batera, murriztapen hori egiteko eskubidea galduko dute, zerbitzu aktiboan segitzea eskatzen badute, non eta erretiro- sariaren % 100 jasotzeko behar den gabealdia ez duten.

2.-Teknologia Berrien arduraduna.

Teknologia Berrien arduradunak eginkizun hauek izanen ditu: informatikako eta ikus-entzunezko ekipoak koordinatzeko eta mantentzeko lanak, ikastetxeko sare informatikoa zaintzea, gorabeherak konpontzeko teknikoki laguntzea, instalatutako ekipoen material informatikoa eta ikus-entzunezkoa zuzen erabiltzea eta informatika gelen erabilera koordinatzea.

Bi lerroko Haur Hezkuntzako eta Lehen Hezkuntzako ikastetxeetako Teknologia Berrien arduradunak lau ordu erabiliko ditu astean: lehen biak, irakastordu zuzenak ez diren bi irakastordu eta, ikastetxearen beharrek horretarako bide ematen badute, beste bi ordu osagarri, betiere arestian aipatu diren eginkizunetarako.

II.-Bigarren Hezkuntzako Irakasleak

1.-Berariazko Lanbide Heziketa.

Berariazko Lanbide Heziketako ikasketak ematen dituzten irakasleek beren irakas-ordutegia osatzen ahalko dute lanerako edo etengabeko lanbide prestakuntzako jarduerekin, hala ezartzen den kasuetan eta irakaslea behin betiko destinoko ikastetxean egonen dela bermatzeko.

2.-Irakastorduak.

Lanaldi osoko irakasleek 18 irakastordu izanen dituzte astean. Horien artean sartuko dira irakastordu zuzenak eta irakaskuntza konputukoak.

Ohiz kanpo, gehienez ere hogei irakastordu izaten ahalko dira, ikastetxearen ordutegiaren banaketak hala egitea eskatzen duenean eta betiere ikastetxean berean.

3.-Irakastorduak murriztea.

a) 58 urtetik gora izan eta lanaldi osoa duten irakasleek, hala nahi badute, bost irakastorduko murriztapena izanen dute astean. Horrek ez du berarekin ekarriko murriztapenik ikastetxean egon beharreko asteko ordutegian.

b) 58 urtetik gorako irakasle bat Departamentuko buru bada, bost orduko murriztapenaldi hori departamentuko burutzaren lanetarako erabiliko du.

c) Aurreko hizki horietan aipatu borondatezko murriztapen hori aplikatuko da murriztapena aipatu adina betetzen den urte naturalean hasten den ikasturtetik aurrera, eta zuzendaritza edo didaktika arloko karguetan aritzeagatik onartzen diren beste murriztapen batzuekin bateraezina izanen da.

d) Adina dela kausa eskola ordutegiaren murriztapena duten 58 urtetik gorako irakasleek, 65 urte betetzearekin batera, murriztapen hori egiteko eskubidea galduko dute, zerbitzu aktiboan segitzea eskatzen badute, non eta erretiro- sariaren % 100 jasotzeko behar den gabealdia ez duten.

4.-Teknologia Berrien arduraduna.

Bigarren Hezkuntzako ikastetxeetako Teknologia Berrien arduradunak arestian aipatu diren eginkizunetarako ondoko ordu kopuru hau erabiliko du:

a) 30 irakasle bitarteko ikastetxeak: astean 2 irakastordu, eta 2 ordu osagarri gehienez (ikastetxearen beharrek horretarako aukera ematen badute).

b) 31 irakasletik 60 irakasle bitarteko ikastetxeak: astean 3 irakastordu, eta 3 ordu osagarri gehienez (ikastetxearen beharrek horretarako aukera ematen badute).

c) 60 irakasletik gorako ikastetxeak: astean 4 irakastordu, eta 4 ordu osagarri gehienez (ikastetxearen beharrek horretarako aukera ematen badute).

5.-Departamentuburu albokoa.

Lanbide arlo bereko ziklo bat baino gehiago ematen duten Lanbide Heziketako ikastetxeetan departamentuburutza alboko bat sortuko da, zuzendaritza taldeak esleitzen dizkion eginkizunak betetzeko. Departamentuburuarekin batera arituko da lanean, astean hiru irakastorduz eta behar den osagarria jasoko du, betiere ondoko baldintza hauek betetzen badira:

-Lanbide arlo bereko bost heziketa ziklo eta/edo Lanbide Hastapeneko Programa edo gehiago eskaintzea.

-Ikastetxean lanbide arlo bereko ziklo eta/edo programetan (presentzialetan) zortzi ikastalde edo gehiago egotea.

6.-Koordinazio didaktikoa Derrigorrezko Bigarren Hezkuntzako Institutuetan.

Bigarren Hezkuntzako Institutu bati atxikita dauden Derrigorrezko Bigarren Hezkuntzako Institutuetan koordinazio didaktikoaz arduratzen diren irakasleek astero irakastordu bat emanen dute ikastetxearen barreneko aldizkako koordinazio pedagogikoaren inguruko lanetan.

III.-Eskubide Sindikalak

2004-2005 ikasturtea bukatu arte, goizeko eta arratsaldeko jarduna duten ikastetxeetan Langileria Batzordeko edo Atal Sindikaleko ordezkari izan eta liberaturik ez dauden irakasleek astearte arratsaldea hartzen ahalko dute sindikatu lanerako. Haien ordutegian bi irakastordu zuzen konputatuko dira ekintza sindikal bakoitzeko, betiere ikastetxeak dituen beharrak hori egiten uzten badute. Era berean, langile horiek beraiek astero ordu bat liberatzen ahalko dute goizetan, ikasleei zuzenean dedikatzekoak ez diren orduetatik.

Goizeko txanda duten ikastetxeetan, langile horiei ez zaie irakaslanik jarriko astearteetan, eta lan ordutegiko azkeneko bi orduetan ikastetxera joateaz salbuetsita egonen dira. Ekintza sindikalerako bi ordu horiek irakastordutzat hartuko dira.

Halaber, liberazio sindikal erdia duten irakasleak dauden ikastetxeetan haien berezitasuna kontuan hartuko da, ordutegia bateratu ahal izateko, ekintza sindikalaren ondoriozko beharren eta ikastetxeen antolakuntzako aukeren arabera.

Iragarkiaren kodea: a0209407

Sarbidea

Loturiko estekak

Nafarroako Aldizkari Ofiziala

Paseo Pablo Sarasate, 38, 2.º izda.

31001 - Iruña

848 42 12 50

bon@navarra.es