I. NAFARROAKO FORU KOMUNITATEA
Xedapen Orokorrak. Foru Aginduak
268/2000 FORU AGINDUA, ekainaren 29koa, Hezkuntza eta Kultura kontseilariak emana, musikaren gradu ertaineko irakaskuntza arautuak eta Derrigorrezko Bigarren Hezkuntzako aukerako arlo eta ikasgai batzuen artean baliokidetzeko era eta musika arloa baliokidetzeko prozedura ezarri, musikaren araubide orokorreko eta araubide bereziko irakaskuntzak bateragarriak direla xedatu eta gorputz hezkuntzaren arloaren kurrikulua egokitzen duena.
LOGSEk sistema kurrikular ireki eta malgu baten alde jo du eta, beraz, inguruabar eta egoeretara egokitzen ahal den sistema baten alde, proposatzen diren helburuak eta ikasle bakoitzaren emaitzarik hoberenak lortzeko. Ikasle diferenteak bereizten ez dituen aplikazioko kurrikulu zurrun baten bidez hezitzeak, aukera berdintasunaren izenean, gezurrezko berdintasun batera eraman lezake eta irakasle bakoitzak ez luke lortuko hezkuntza arloan aurrerapen handirik.
DBHren xedea oinarrizko heziketa bermatzea da, bai kulturgaiak irakatsi eta ikasterakoan, bai norberaren gaitasunak lantzerakoan, bai herritarren eginbehar eta eskubideek osatzen duten bikotea garatu eta erabiltzerakoan. LOGSEko 19. artikuluak gaitasun sail bat eskaintzen du, DBHk garatzen lagundu behar duena. Hori ildo batzuetatik lortzen ahal da. Ildo horiek ezberdinak dira eta gutxiengoen eta gizabanakoen kasuetara egokitzen ahal dira. Hori dela-eta, ikasleen garapena hoberena izan daiteke.
Bigarren Hezkuntzako graduatuen titulua kurrikulu arrunt baten bidez lortzen ahal da edo, bestela, kurrikuluen egokitzapenen bidez. Horrela, oinarrizko edukien bidez, etapako helburu orokorrak bermatzen dira, Helduen Oinarrizko Hezkuntzak edo hezkuntza administrazioak, bakoitzak bere lurraldean, garatzen dituzten aukeren antzera. Kurrikuluen aniztasunak titulu bera lortzera darama, kurrikulu arrunta diferenteki antolatzen bada ere.
Gaitasunak ildo batzuetatik garatzeko ideia oso emankorra da, eta haren aprobetxamenduak aukera ematen du DBHko arlo batzuk (Teknologia eta Hezkuntza Plastiko eta Ikusizkoa, hain zuzen ere), musika ikasketen gradu ertaineko ikasgaiekin baliokidetzeko, horietan antzeko trebezia eta gaitasunak lantzen baitira, LOGSEko 19. artikuluan zehazten direnen barrenean.
LOGSEko 41.1 artikuluak xedatzen du hezkuntza administrazioek erraztasunak emanen dizkietela ikasleei musika edo dantza eta araubide orokorreko ikasgaiak batera ikasteko. Horretarako, neurri batzuk dira hartzekoak, musika arloko eta Derrigorrezko Bigarrren Hezkuntzako aukerako ikasgaiak musika eta dantzaren araubide orokorreko irakaskuntzekin baliokidetzeko aukera, besteak beste. Orobat, gorputz hezkuntzaren arloa egokitzapen kurrikularraren xede izaten ahal da.
Ekainaren 26ko 756/1992 Errege Dekretuak hirugarren xedapen gehigarrian ezartzen du hezkuntza administrazioek aplikatuko dituztela Hezkuntza eta Kultura Ministerioak (gaur egun Hezkuntza, Kultura eta Kirol Ministerioa denak) onesten dituen baliokidetzeak, araubide orokorreko irakaskuntzaaren arloko eta ikasgaiei eta dekretuak arautzen dituen musika irakaskuntzei dagokienez. Halaber, aukera ematen die hezkuntza administrazioei baliokidetzeak egiteko, Derrigorrezko Bigarren Hezkuntzako edo Batxilergoko aukerako ikasgaien gainekoak direnean.
Foru Agindu honetan, Hezkuntza eta Kultura Departamentuak, lehen emaniko arauak kontuan hartuz, bi helburu lortu nahi ditu. Alde batetik, eskola orduak gutxitzea, irakaskuntzako bi araubideetara joan ahal dadin. Bestetik, aukerako ikasgaiak gehitzea, ikasleen prestakuntza artistiko bereziaz baliatuta. Hori dela-eta, Foru Lege honek baliokidetzeak ezartzen ditu musikaren gradu ertaineko irakaskuntza arautuen eta hezkuntza plastiko eta ikusizko arloen eta Derrigorrezko Bigarren Hezkuntzako aukerako ikasgaien artean. Horrela posible izanen da DBHra doazen ikasleek ikasgai horiei ekitea aukerako ikasgaia edo lehen ikasturteko arlo bat gaindituta, DBHn sartzeko proba gainditu ondoren, eta musikaren araubide bereziko irakaskuntzen gradu ertainean sartzea.
Halaber, Foru Lege honek arauak ematen ditu DBHko 1. ikasmailako musika arloa musikaren gradu ertaineko lehen ikasmailako instrumentu edo kantuarekin baliokidetzeko. Horrela posible da ikasleak musika arloa ikasi beharrean baliokidetu asmo den ikasgaia ikastea. Ikasgaia ikasturtea bukatzean baliokidetuko da, araubide bereziko irakaskuntzen ikasgaia gainditu duela egiaztatzen denean.
Bestaldetik, Foru Agindu honek irakakuntzako bi araubideetara joaten laguntzeko behar diren jarraibideak biltzen ditu, baita musika ikasleen gorputz heziketaren arloko egokitzapen kurrikularrak egitekoak ere.
Horregatik, Nafarroako Foru Komunitateko Gobernua eta Administrazioa arautzen dituen apirilaren 11ko 23/1983 Foru Legeko 36.2 artikuluko b) eta c) letrek eman dizkidaten ahalmenak erabiliz,
AGINDU DUT:
I.-Xedea eta aplikatzeko eremua.
Lehena.
1. Foru Agindu honen xede dira musikaren gradu ertaineko irakaskuntza arautuen, teknologia, hezkuntza plastiko eta ikusizkoaren arloen eta Derrigorrezko Bigarren Hezkuntzako aukerako ikasgaien arteko baliokidetzeak arautzea, musika arloa baliokidetzeko prozedura eta musikaren araubide orokorreko eta araubide bereziko irakaskuntzetara batera joateko aukera ematea eta musikaren gradu ertaineko ikasleendako Gorputz Heziketaren arloko egokitzapen kurrikularra arautzea.
2. Foru Agindu hau aplikatuko da DBH irakasten duten Nafarroako Foru Komunitateko ikastetxe eta institutuetan, baita musikaren gradu ertaineko irakaskuntzak ematen dituzten ikastetxe publiko eta pribatuetan ere.
II.-Teknologia, Hezkuntza Plastiko eta Ikusizkoaren arloetako eta DBHko aukerako arloetako baliokidetzeak.
Bigarrena.
Foru Agindu honetan xedaturiko ondorioetarako, ekainaren 25eko 249/1997 Foru Aginduko hemeretzigarren puntuan ezarririkoa kontuan hartuz, musikaren gradu ertaineko ikasgaiak hartzen dira aukerako arlotzat.
Hirugarrena.
Musikaren irakaskuntza arautuetako ikasgaien eta Teknologia, Hezkuntza Plastiko eta Ikusizkoko arloen eta DBHko aukerako arloen arteko baliokidetzeak honelaxe eginen dira:
a) Musikaren gradu ertainean sartzeko proba gainditu beharrean, DBHko ikasmaila bateko Hezkuntza Plastiko eta Ikusizkoko edo Teknologiako arloa edo DBHko aukerako arlo bat egiten ahalko da.
b) Musikaren irakaskuntzetako gradu ertaineko edozein ikasmailatan gaindituriko ikasgaia Hezkuntza Plastiko edo Ikusizkoaren arloarekin edo Teknologiaren arloarekin edo DBHko edozein ikasmailatako aukerako ikasgai batekin baliokidetzen ahalko da.
Laugarrena.
Ikasleak zer ikastetxetan egiten dituen araubide orokorreko irakaskuntzak, hango zuzendariak aplikatuko ditu Foru Agindu honetan aipatzen diren baliokidetzeak, interesatuak edo hura ordezkatzen duenak eskaturik. Eskari horri baliokidetzearen xede diren musika irakaskuntzen ziurtagiri akademikoa erantsiko zaio, musika ikastetxeak luzatua.
Bosgarrena.
Egiten diren baliokidetzeak idatziko dira, eginbide baten bidez, kasuan kasuko ikastaroko azken ebaluazioko aktan, Oinarrizko Irakaskuntzako Eskolatze Liburuan, eta ikaslearen espediente akademikoan, "baliokidetua" oharrarekin eta, ondoren, parentesi artean, baliokidetzearen arrazoia den ikasgaian, musika ikastetxean lorturiko kalifikazioa jarriko da.
Baliokidetze hori aitortzeko sorturiko dokumentazioa ikaslearen espediente akademikoari erantsiko zaio.
III.-DBHko musika arloa baliokidetzeko prozedura.
Seigarrena.
1. Eskuarki, DBHko ikasmaila bakoitzeko musika arloa gradu ertaineko musika irakaskuntzetako kasuan kasuko ikasgaiarekin baliokidetuko da, Foru Agindu honetako laugarren puntuan aipatzen den prozedurari jarraituz, eta Estatuko hezkuntza administrazioko arautegiak horretaz xedatzen duenarekin bat.
2. Ikasle bati ikasturte berean DBHko musika arloko irakaskuntzak eta baliokidetzearen xede den gradu ertaineko ikasgaikoak egitea dagokionean, honelaxe jokatuko da:
-Ikasleak, DBHko kasuan kasuko matrikula egitean, agiri bat aurkeztuko du, musikaren gradu ertaineko ikasmailan matrikulaturik dagoela frogatuko duena. Ikasmaila hori izanen da, hain zuzen ere, DBHko musika arloa baliokidetzeko ikasgaia bilduko duena.
-Matrikularen inprimakian aderazi beharko da ikasleak gradu ertaineko musika irakaskuntzetako ikasgaia eginen duela, DBHko musika arloko irakaskuntzen ordez. Gertaera hori, eginbide baten bidez, ebaluazioko dokumentuetan adieraziko da.
-Ikasleak, DBHko musika arloa egin beharrean, musikaren gradu ertaineko instrumentua edo kantua eginen du.
-Ikasturtea bukatzean, DBHko irakaskuntzetako azkeneko ebaluazioa egin baino lehen, musika ikastetxeak ikasleak lorturiko kalifikazioaren frogagiria igorriko du DBHko musika arloa ikasgaia baliokidetzeko.
-Araubide orokorreko ikastetxeak DBHko musika arloko ebaluazio dokumentuen laukian adieraziko du ikasleak araubide bereziko musika irakaskuntzetako ikasgaian lorturiko kalifikazioa, honelaxe:
* "Baliokidetua" oharra jarriko da, hala bada, eta, parentesi artean, lorturiko kalifikazioa adieraziko da.
* Ikasle taldeari irakasten dioten irakasleek, hurrengo mailara pasatzerakoan edo ikaslearen tituluaz erabakitzerakoan, kontuan hartuko dute ikasleek gradu ertaineko musika irakaskuntzetako ikasgaian lorturiko kalifikazioa, DBHko irakaskuntzei buruz.
IV.-Araubide orokorreko irakaskuntzetara eta musikaren gradu ertainekoetara batera joateko aukera
Zazpigarrena.
1. DBHko irakaskuntzak ematen dituzten ikastetxe eta institutuetako zuzendariek, bertako ikasleren bat irakaskuntza haiek eta musikaren gradu ertainekoak batera egiten ari baldin bada, bi araubideetara joaten laguntzeko neurriak hartzen ahalko dituzte, hala nola:
-Ikasle horiek biltzea eta haiendako ordutegi bat prestatzea. Egutegi horretan, ikasi behar dituzten DBHko arlo eta ikasgaiak bilduko dira.
-Ordu multzo hori goizeko lehen orduetan ematea.
-Neurri horiek hartzen ez dituzten ikastetxeetan, Foru Agindu honek ukituriko ikasle bakoitzaren ordutegia ahalik eta gehien metatzeko, ikasketaburuak erabakiko du zer talderekin doan klasera haietariko bakoitza, arlo eta ikasgai bakoitzean. Ohartaraziko die erreferentziako talde batean egon behar dutela, ebaluazio, orientazio eta tutoretza kontuetarako.
2. Foru Agindu honen eranskineko Bigarren Hezkuntzako Institutuak nahitaez aurreko idatz-zatian adierazten diren bi neurriak hartuko ditu. Besteek hirugarrena hartzen ahalko dute.
3. DBHko irakaskuntzak ematen dituzten ikastetxe eta institutuetako zuzendariek, Foru Agindu honek ukituriko ikaslerik badute, musika irakaskuntza arautuen ikastetxeetako zuzendariekin koordinatu beharko dute.
4. Ordu kontuengatik, ikasleak DBHko ikastetxetik atera behar badu, baina ez gainerako ikasleak ateratzen direnean, adinez nagusi bada, ikasleak berak idazki batean hartuko du erantzukizun guztia ikastetxetik atera bezain laster; adin txikikoa bada, gurasoek eta legezko tutoreek, adinez nagusi ez bada, idatziz hartuko dute beren gain erantzukizun osoa ikaslea ikastetxetik ateratzen denetik.
5. Ikaslea, baliokidetua duen edo baliokidetzeko prozesuan dagoen arlo edo ikasgaia ematen denean ikasgelatik atera baina DBHko ikastetxean gelditzen bada, ikasketaburuak behar diren neurriak hartuko ditu denbora horretan kasu egin dakion.
Araubide bereziko eta araubide orokorreko irakaskuntzak batera egiten dituzten ikasleek, azaroaren 20ko 9/1995 Lege Organikoko hirugarren xedapen gehigarriko 4. idatz-zatiaren arabera, lehentasuna izanen dute Foru Agindu honen Eranskinean aipatzen den ikastetxean onartuak izateko.
V.-Gorputz Hezkuntzaren arloko egokitzapen kurrikularra.
Bederatzigarrena.
1. DBHko irakaskuntzak ematen dituzten ikastetxeetan Gorputz Hezkuntzaren Arloko egokitzapen kurrikularrak egiten ahalko dira DBHko eta musikaren gradu ertaineko irakaskuntzak batera egiten dituzten ikasleendako, ikasle bakoitzaren instrumentu espezialitatearekin zerikusia duen gorputz atala indartu eta zaintzeko. Egokitzapen hauetarako, espezifikoak baitira, ez da beharrezkoa izanen ebaluazio psikopedagogikoa.
2. Egokitzapen horiek egiteko, kontuan hartuko da ikasleak musikaren gradu ertaineko irakaskuntzak egiten dituen ikastetxeko ikasketaburuak igorri beharko duen txostena.
AZKEN XEDAPENAK
Lehena.-Baimena ematen zaio Hezkuntza zuzendari nagusiari Foru Agindu honetan xedaturikoa aplikatu eta garatzeko behar diren xedapen guztiak eman ditzan.
Bigarrena.-Foru Agindu hau eta haren eranskina igortzea Araubide Bereziko Irakaskuntza eta Teknologia Berrien Zerbitzura, Ikasketen Antolamendu eta Lanbide Heziketako Zerbitzura, Zerbitzuak Ikuskatzeko eta Ikuskapen Teknikorako Zerbitzura, Pedagogi Berrikuntzako Zerbitzura, Araubide Bereziko Irakaskuntza eta Atzerriko Hizkuntzen Atalera, Ikasketak Antolatzeko Atalera, Hezkuntza Berrikuntza eta Sustapenaren Atalera, Musika Irakaskuntzen Unitate Teknikora eta Nafarroako ALDIZKARI OFIZIALera, bertan argitara dadin.
Hirugarrena.-Foru Agindu honek Nafarroako ALDIZKARI OFIZIALean argitaratu eta biharamunean hartuko du indarra.
Iruñean, bi milako ekainaren hogeita bederatzian.-Hezkunza eta Kultura kontseilaria, Jesús Laguna Peña.
Iragarkiaren kodea: A0006399
