I. NAFARROAKO FORU KOMUNITATEA
- Xedapen Orokorrak. Foru Aginduak
228/1999 FORU AGINDUA, ekainaren 25ekoa, Hezkuntza eta Kultura kontseilariak emana, Nafarroako Foru Komunitateko Musikako Oinarrizko Graduko antzinako Udal Kontserbatorioen emaitzako Musika Eskolen antolaketa eta jarduna 1999-2000 ikasturtean arautzeko jarraibideak onesten dituena, irailaren 10eko 2618/1966 Dekretuan arautu diren ikasketei dagokienean.
Ikasketa eta Ikastetxeen Antolamendurako Zerbitzuko zuzendariak adostasun txostena aurkeztu du Nafarroako Foru Komunitateko Musikako Oinarrizko Graduko antzinako Udal Kontserbatorioen emaitzako Musika Eskolen antolaketa eta jarduna 1999-2000 ikasturtean arautzeko jarraibideak onesteko irailaren 10eko 2618/1966 Dekretuan arautu diren ikasketei dagokienean.
Nafarroako Foru Komunitateko Gobernu eta Administrazioa arautzen dituen apirilaren 11ko 23/1983 Foru Legearen 36.2 b) artikuluak esleitutako ahalmenak erabiliz.
AGINDU DUT:
1. Foru Agindu honen eranskineko jarraibideak onestea. Aipatu jarraibide horiek Nafarroako Foru Komunitateko Musikako Oinarrizko Graduko antzinako Udal Kontserbatorioen emaitzako Musika Eskolen antolaketa eta jarduna 1999-2000 ikasturtean arautzen dituzte, irailaren 10eko 2618/1966 Dekretuan arautu diren ikasketei dagokienean.
XEDAPEN INDARGABETZAILEA
Indarrik gabe gelditzen dira lerrun bereko edo ttikiagoko xedapenak, Ebazpen honekin bat heldu ez diren orotan.
AZKEN XEDAPENAK
Lehenbizikoa.-Baimena ematen zaio Hezkuntza zuzendari nagusiari Foru Agindu honetan xedatutakoa aplikatu eta garatzeko behar diren xedapen guztiak emateko.
Bigarrena.-Foru Agindu hau eta horren eranskina igortzea Ikasketa eta Ikastetxeen Antolamendurako Zerbitzura, Zerbitzuak Ikuskatzeko eta Ikuskapen Teknikorako Zerbitzura, Giza Baliabideen Zerbitzura, Ikasketak Antolatzeko Atalera eta ondoko Udal Musika eskoletara: Barañain (Luis Morondo), Burlata (Hilarión Eslava), Lizarra (Julián Romano), Iruña (Joaquín Maya), Zangotza (Juan Francés de Iribarren), Tafalla eta Tutera (Fernando Remacha), eta Ikastetxe horiei atxikita dauden Eskolei, behar diren ondorioak izan ditzan.
Hirugarrena.-Foru Agindu honek Nafarroako ALDIZKARI OFIZIALean argitara eman eta biharamunean hartuko du indarra.
Iruñean, mila bederatziehun eta lauretan hogeita hemeretziko ekainaren hogeita bostean.-Hezkuntza eta Kultura kontseilaria, Jesús Javier Marcotegui Ros.
E R A N S K I N A
Musikako Oinarrizko Graduko antzinako Udal Kontserbatorioen emaitzako Musika Eskolen antolaketa eta jarduna, 1966ko ikasketa planari dagokionean, Nafarroako Foru Komunitateko 1999-2000 ikasturtean arautzeko jarraibideak
Antzinako Udal Kontserbatorioen emaitzako Musika Eskolek irakaskuntza 1966ko ikasketa plana iraungi gabe antolatuko dute, horretarako ondoko jarraibide hauek betez:
I.-Ikastetxeko Urteko Programazio Orokorra.
1. Edukia.
Ikastetxeko Urteko Programazio Orokorra Zuzendaritza Taldeak eginen du, horretarako Klaustroak egin dituen proposamenak kontuan hartuta. Programazioak ondoko atalak izanen ditu:
A.-Ikastegiaren ordutegi orokorra.
B.-Irakaskuntzako jarduerak, espezialitate eta irakasgai guztien programazioekin.
C.-Jarduera osagarriak.
D.-Memoria administratiboa, Ikastetxearen Antolakuntzarako Dokumentua ere izanen duena.
2. Prestatu, onetsi eta ebaluatzea.
Ikastetxeko Zuzendaritzari dagokio Urteko Programazio Orokorra era egokian egitea bideratuko duen jarduketa egutegia ezartzea.
Zerbitzuak Ikuskatzeko eta Ikuskapen Teknikorako Zerbitzuak Musika eskoletara igorriko ditu Ikastetxearen Antolakuntzarako Dokumentuak. Dokumentu hori, bete ondoren, Zerbitzuak Ikuskatzeko zerbitzu horri itzuliko zaio ikasturteko eskolak eta jarduerak hasi eta hogei eguneko epearen barruan.
Urteko Programazio Orokorra, irakasleek txostena egin ondoren, onetsi eginen da eta Zerbitzuak Ikuskatzeko eta Ikuskapen Teknikorako Zerbitzuari igorriko zaio urriaren 31a aurretik.
Zerbitzuak Ikuskatzeko eta Ikuskapen Teknikorako Zerbitzuak ikertuko du Urteko Programazio Orokorra egokitzen zaion Jarraibide hauetan xedatzen denari, eta zer zuzenketa egin behar diren adieraziko du, batere egin behar bada.
Programazioa onetsi ondoren Ikastetxeko Idazkaritzan jarriko dira, irakasleen eta eskolako erkidego osoaren eskura.
Urteko Programazio Orokorra ikastetxeko kide guztiek nahitaez bete beharrekoa izanen da.
Ikasturtea bukatzean, Zuzendaritza Taldeak ebaluatu eginen du Urteko Programazio Orokorra zenbateraino bete den. Ondoriorik aipagarrienak Memoria batean jasoko dira eta hura Zerbitzuak Ikuskatzeko eta Ikuskapen Teknikorako Zerbitzura bidaliko da uztailaren 10a baino lehen.
Maiatzaren 10a aurretik ikastetxeek ekain eta iraileko jardueren behin betiko egutegiaren aurreikuspena igorriko dute Zerbitzuak Ikuskatzeko eta Ikuskapen Teknikorako Zerbitzura eta horretan azken frogak eta ebaluazioak noiz eginen diren adieraziko da, eta baita kontsultak egiteko aldia eta epaimahaien eraketa zein den ere.
II.-Irakaskuntzen banaketa.
Ikasleen matrikulazioa, horiek irakasgai bakoitzaren barruan taldeetan banatzea eta irailaren 10eko 2618/1966 Dekretuaren bidez ezarri diren irakaskuntzak irakastea ondoko era honetan eginen da:
A) Gradu Ertaineko Instrumentuak eta Kantua:
Ikasle bakoitzak, gutxienez, 30 minutuko bakarkako klasea izanen du astero.
B) Gradu Ertaineko beste irakasgai batzuk:
-Solfeoa eta Musikaren Teoria eta Abesbatza:
Ezin da 30 ikasle baino gehiago izanen duen talderik eratu.
18 ikasletik 30era, 3 ordu astero.
10 ikasletik 17ra, 2 ordu astero.
4 ikasletik 9ra, 1 ordu astero
-Estetika, Musikaren Historia eta Kultura eta Artearen Historia, 2 ordu astero 30 ikasleko talde bakoitzeko.
-Harmonia eta Melodia lagundua, 2 ordu astero 15 ikasleko talde bakoitzeko.
-Errepentizazio Instrumentala, Transposizio Instrumentala eta Laguntza, 20 minutu astero ikasleko.
III.-Irakasleak.
1. Titulazioa.
Irakasleek bidezko titulu ofizialaren jabe izanen dira, hau da, Ikastetxeak agindu dien irakaskuntza hori egiteko gaitasuna ematen duena. Titulu horiek edo horien fotokopia benetakotuak ikastetxeko Idazkaritzan egonen dira, Zerbitzuak Ikuskatzeko eta Ikuskapen Teknikorako Zerbitzuak eskuratzeko moduan.
Ikastetxeko irakasleen artean gertatzen ahal diren aldaketa guztien berri emanen zaio Zerbitzuak Ikuskatzeko eta Ikuskapen Teknikorako Zerbitzuari eta kontratatu diren irakasle berrien titulazioa igorriko zaio.
2. Irakasleen betebeharrak.
Irakasleek irakasgai eta mailen bidezko programazioak egin behar dituzte, gradu amaierako programa ofizialetan ezarri denarekin bat. Programazio horiek ezin dira tramite hutsa izan eta ondoko ezaugarri hauek beteko dituzte:
-Irakasleen lanaren gida orokorra eta irakasle guztiek beteko dituzte.
-Ikasturtearen amaieran egin den lana ebaluatzeko ardatza.
-Ikasleek maila gainditzeko bete behar dituzten gutxienekoen erreferentzia gunea.
-Zerbitzuak Ikuskatzeko eta Ikuskapen Teknikorako Zerbitzuak egin behar duen lanerako erreferentzia gunea.
Irailaren 10eko 2618/1966 dekretuarekin bat arautu diren eta iraungi ez diren irakasgai eta espezialitateetako programazioek ondoko eduki hauek izanen dituzte:
-Irakasgai eta espezialitate horren edukien programazioa, denboran eta gaietan ikasturtean zehar izanen duen banaketa eta eskatzen ahal diren gutxieneko edukien finkapena.
-Eskuratu nahi diren helburuak eta erabiliko den metodologia.
-Ikasle ofizial eta libreekin eginen diren proba motak eta ebaluazio eta kalifikazio irizpideak.
Eskolak eman eta arestian adierazi dena bete ezezik, irakasleen funtsezko lanak hauek izanen dira:
-Ahal den neurrian maila bereko ikasle edota talde guztien abia beretsua izatea.
-Aurretiaz probak, ariketak eta ebaluatzeko jarduerak zehaztea, beraz, ondoko hauek egitea:
.Ebaluazio irizpideak denen artean ezartzea, irizpide eta eskakizun maila desberdinak egotea ekidinez eta ikasleei ohiko azterketetan, gaitasuna frogatzekoetan, matrikulakoetan eta sarietan horien gutxieneko edukiak argi ezarriz.
.Halaber, ikasle libreei urteko azterketetan eskatuko zaizkien ebaluazio irizpideak eta gutxieneko edukiak ezartzea, eta baita Ikastetxe atxikietako ikasleei eginen zaizkien azterketetan ere. Irizpide eta eduki horiek maila eta disziplina bereko ikasle ofizialentzat indarrean daudenak eurak izanen dira eta beti interesatuek ezagutzearen ondoreetarako beharrezkoa den publizitatea izanen dute
.Ebaluazio probak prestatzea eta egitea, hala bere mailan nola gradu amaierakoan.
.Proben emaitzak aztertzea metodologian izan akatsak antzeman eta zuzentzeko eta baita zuzen egin direnak antzemateko ere.
.Beharrezkoa balitz, edukien kopurua, kalitatea eta maila berrikustea.
-Irakaskuntzako jarduerak programatzea.
-beharrezko bitarteko didaktikoak aukeratzea eta antolatzea.
-Erabili diren metodologiak aztertzea.
-Ekaineko amaierako probak egin ondoren, denen arteko bilerak eginen dira proba horiek emanen dituzten datuak biltzeko eta aztertzeko.
-Ikasleei egiten zaizkien ariketak edo probak gorde egin behar dira ikasturtea amaitu arte, eta baita ikasleen ikaskuntza eta etekin akademikoari buruzko informazioa emanen duen beste edozein informazio ere, salbu eta erreklamazioak dauden kasuetan, horrelakoetan bidezko prozesua amaitu arte gordeko baitira.
-Ikastetxeari atxikita dauden Eskoletan espezialitate horretan dauden irakasleekin harremanetan egotea eta beharrezko koordinazioa edukitzea.
IV.-Ikastetxearen ordutegia jendaurreratzea.
Beti egon beharko du, edozeinek ikusi ahal izateko moduko tokian, irakasleen gelako iragarki oholean eta ikastetxeko kide guztiek sarbide duten beste tokiren batean, ikastetxearen egoera agertuko duen informazioa, bereziki aipatuz irakasle bakoitzaren ordutegia eta lan tokia, gurasoei jaramon egiteko orduak eta abar.
V.-Ebaluazioak.
Gurasoek eta, hala denean, ikasleen legezko eskuordeek unean-unean 2618/1966 Dekretuaren 21. artikuluan adierazi diren irakaskuntzako kalifikazio partzialak jasotzeko aukerak izan ditzaten, irakasleek ikasleen etenik gabeko ebaluazioa eginen dute.
Ebaluazio hori hiruhilero eginen da eta hori idatziz erasoko da ikasleak eta, baldin eta adingutxikoa bada, horren guraso edo legezko eskuordeek ezagutu dezaten. Ebaluazio hori 2618/1966 Dekretuaren 21. artikuluan ezarri dena betez eginen da.
Gradu edo irakasgaiaren amaierako irakasgaia bada, manuzkoa izanen da ikasleak epaimahaiarekin ebaluatzea.
VI.-Ikasleen eskubideak eta betebeharrak.
Ikasleen eskubide eta betebeharrei dagokienez, maila ez-unibertsitarioko ikastetxeetako ikasleen eskubide eta betebeharrak ezartzen dituen abenduaren 14ko 417/1992 Foru Dekretuari (Nafarroako ALDIZKARI OFIZIAL, 1993ko urtarrilaren 15ekoa) eta uztailaren 14ko 191/1997 Foru Dekreturi (Nafarroako ALDIZKARI OFIZIAL, 1997ko abuztuaren 1ekoa) jarraituko zaio.
1. Ikasleen asistentzia.
-Ikasle ofizial guztien eskubidea eta betebeharra da eskoletara joatea, eta inoiz ez da zilegi izanen borondatezko asistentzia duen sistemarik ezartzea ikaslea matrikulaturik dagoen irakasgaietan.
-Zenbait egun jakinetan arrazoi batengatik edo bestearengatik ikasle gutxi egonagatik ere, ikastetxeak eta irakasleek normalki eman beharko dituzte eskola horiek.
-Asistentziako hutsegiteak gurasoek edo ikaslearen ordezkari legalek justifikatu beharko dituzte irakaslearen aurrean eta Zuzendariak onetsi beharko du.
Inoiz juzkatzen baldin bada ikasle batek behin eta berriz eta oinarririk gabe justifikatzen dituela bere hutsegiteak, Zuzendaritza Taldeak zilegi izanen du Eskola Kontseiluari proposatzea justifikazio horiek hobeki kontrolatzeko neurri zuzentzaileak hartzea.
2. Ikasleek kalifikazioei buruz erreklamazioak egiteko eskubidea.
-Ikasleek beren errendimendu akademikoaren balorazio objektiboa bermatzeko eskubidea dute eta, eskubide hori betetzeko, beharrezkoa da aurrez ikasleek ezagutzea ikasturtean zehar eskatuko diren edukiak eta mailak, eta baita balorazio irizpideak ere. Bada, horiek guztiak irakasle guztiek irakasgaien programazioan azalduko dituzte.
-Ikasle guztiek eskubidea dute beren kalifikazioan eragina izanen duen edozein azterketa edo proba idatzi zuzenduta eta kalifikatua ikusteko.
-Proba edo azterketak irakaslearen eskuetan egonen dira eta horiek ikasturtea amaitu arte gordeko dira, salbu eta erreklamazioak dauden kasuetan, horrelakoetan bidezko prozesua amaitu arte gordeko baitira.
-Ikasle ofizial eta libreei egin zaizkien proba guztiak, eta baita irakaskuntzako prozesuari eta irakaskuntzako etekinari buruzko informazioa duten elementu guztiak ere, ikasturtea amaitu arte gordeko dira, salbu eta erreklamazioak dauden kasuetan, horrelakoetan bidezko prozesua amaitu arte gordeko baitira.
-Proba praktikoen kasuan (instrumentua, kantua, dantza, etab.) ebaluazio buletinak eta proba partzialen eta azken proben ebaluazioak gordeko dira, eta baita bidezko kalifikazioa eragin duten epaimahaiaren iradokizunak ere.
-Erreklamazioak egiteko prozedurak.
Erreklamazioak kasuko irakasleari aurkeztuko zaizkio aurrena. Ikaslea haren erantzunarekin ados ez badago edo irakasleari zuzenean erreklamatu nahi edo ezin baldin badio, ondoren azaltzen diren bideetako bat erabiliko du:
a) Ebaluazio partzialak.
Erreklamazioa idatziz aurkeztuko zaio Zuzendariari, ezagutu denetik zenbatuko den 2 egun balioduneko epearen barruan, eta horrek erreklamatu den kalifikazioaren erantzukizuna duen irakasleari eta Ikastetxeko, arlo horretako edo erreklamazioaren xedea den irakasgaiko beste bi irakasleri, edo horien ezean, eskuhartzeko gaitasuna bermatzen duen espezializazioa dutenei, irizpidea emateko Batzordea eratzeko agindua emanen die. Baldin eta organo horren erabakiak ez badu ikaslea asetzen, behin betiko ebazpena Zerbitzuak Ikuskatzeko eta Ikuskapen Teknikorako Zerbitzuak emanen du.
b) Behin betiko ebaluazioa.
-Behin betiko kalifikazioei buruzko erreklamazioa, hala ikasle ofizialenak eta ikasle libreenak, idatziz aurkeztuko zaio Ikastetxeko Zuzendariari, ezagutu denetik zenbatuko den 2 egun balioduneko epearen barruan.
-Baldin eta kalifikazio hori irakasle batek eman duenean eta ez epaimahai batek, Zuzendariak a) atalean ezarri den bezala eratuko den Batzordeari aurkeztuko dio erreklamazioa, gehienez 2 egun balioduneko epean hari buruzko eztabaida egin eta ebazpena eman dezan; ebazpena emateko, aintzat hartuko da proba ezarritako eta jendaurrean paratutako maila eta edukiekin, hala nola balorazioa egiteko irizpideekin bat datorren. Hala denean, berrikuspena eta horren txostena epaimahai aztertzaileak eginen ditu baldin eta hori bada jardun zuena.
.Erreklamazioa ontzat ematen baldin bada, ukitutako irakaslea ebazpenarekin ados ez badago, zilegi izanen du erreklamazio idatzia aurkeztea Zerbitzuak Ikuskatzeko eta Ikuskapen Teknikorako Zerbitzuan, eta horrek, beharrezkotzat jotzen baldin badu, proba berria egitea proposatzen ahalko du.
.Ikaslearen erreklamazioa ezetsi eta hark erreklamazioari eutsiz gero, zuzendariak erreklamazioaren idatzia, Departamentuaren bilkuraren Akta eta erreklamatutako ariketak igorriko ditu Zerbitzuak Ikuskatzeko eta Ikuskapen Teknikorako Zerbitzura eta horrek, beharrezkoa juzkatzen baldin badu, beste proba bat proposatzen ahalko du; Ebazpenaren proposamena Zerbitzuak Ikuskatzeko eta Ikuskapen Teknikorako Zerbitzuko zuzendariari igorriko dio.
-Ikasleak zuzendariari erreklamazioa aurkezteko epea 2 egun baliodunekoa da eta zuzendariak dokumentazio guztia Zerbitzuak Ikuskatzeko eta Ikuskapen Teknikorako Zerbitzura bidaltzeko duena, aldiz, 3 egun baliodunekoa.
-Zerbitzuak Ikuskatzeko eta Ikuskapen Teknikorako Zerbitzuko Zuzendaritzak ebazpena emanen du 15 egun balioduneko epean, Zerbitzuak Ikuskatzeko eta Ikuskapen Teknikorako Zerbitzuak berak espedientea aztertu eta hari buruzko txostena eman ondoren.
VII.-Ikasleen onespena eta matrikulazioa.
Ikasleen onespena hezkuntza sistemaren antolamendu berria aplikatzeko egutegia onetsi duen ekainaren 14ko 986/1991 Errege Dekretuan ezarri denari egokituko zaio ("Estatuko Aldizkari Ofizial"a, 1991ko ekainaren 25ekoa) eta hor izan diren aldarazpenak aplikatu zaizkio.
VIII.-Beste jarraibide batzuk.
1. Azterketak.
Ikasle ofizialen azterketa arruntak ekainaren lehen egunetan eginen dira, eta apartekoak irailean. Ikasle libreek otsailean eginen dituzte azterketak baldin eta gradua edo karrera bukatzeko betetzeke irakasgai bat edo bi badituzte, eta gauza bera aurrez bidezko matrikulatu uko egin dioten ikasle ofizialek, baldin eta gradua edo karrera bukatzeko badira.
Ikasle libreen azterketak eta ikastetxe atxikietako ikasleen azterketak ikasle ofizialenak bukatu ondoren hasiko dira.
2. Ikasturte amaierako proben epaimahaiak.
Ikasturte amaierako probak epaitu behar dituzten epaimahaietan mahaiburu bat, musika katedraduna edo irakaslea izanen dena, eta bi mahaikide izanen dira, eta horietariko batek idazkari lanak eginen ditu. Kide guztiek irakasgai berekoak izanen dira edo, horrela ezean, antzeko irakasgaietakoak.
3. Ikastetxe atxikiak.
Antzinako Oinarrizko Graduko Udak Kontserbatorioetatik eratu diren Musika Eskolek, hau da, 1991-92 ikasturtera arte iraungitzeko araubidean ikastetxe atxikiak zituztenak lotuta, otsailaren 19ko 38/1987 Foru dekretuan ezarri dena beteko dute.
4. Jarraibide hauen publizitatea.
Zuzendaritza Taldeak ardura hartuko du hezkuntza komunitateko sektore guztiek Foru Agindu honen edukiaren berri izan dezaten.
Iragarkiaren kodea: A9906769
