106. ALDIZKARIA - 2024ko maiatzaren 23a

3. ESTATUKO ADMINISTRAZIOA

TRANTSIZIO EKOLOGIKORAKO ETA ERRONKA DEMOGRAFIKORAKO MINISTERIOA

Ebazpena, Politika Energetikoaren eta Meategien Zuzendaritza Nagusiak emana, Iberenova Promociones SAUri aldaketen aurretiazko administrazio baimena eta eraikitzeko administrazio baimena ematen dizkiona 296,297 MW-eko potentzia instalatuko FV Peralta instalazio fotovoltaikorako eta haren ebakuazio azpiegituretarako. Nafarroako Azkoien, Funes, Milagro, Cadreita, Valtierra eta Castejongo udal-mugarteetan daude kokatuta. SEE/DGPEM/SGEE/Resolución AAP mod y AAC (PFot-399)

Iberenova Promociones SAUk, 2020ko azaroaren 27an (geroago, 2021eko urriaren 22an eta 2022ko urriaren 28an zuzendu zen), aurretiazko administrazio baimena eta eraikitzeko administrazio baimena eskatu zituen FV Peralta instalaziorako (370,498 MW modulu fotovoltaikoetan eta 296,297 MW inbertsoreetan) eta haren ebakuazio azpiegituretarako (Azkoien, Funes, Milagro, Cadreita, Valtierra eta Castejongo udal-mugarteetan daude, Nafarroako probintzian).

Energia Politika eta Meatzeetarako Zuzendaritza Nagusiaren 2023ko apirilaren 17ko Ebazpenaren bidez, aurretiazko administrazio baimena eman zitzaion Iberenova Promociones SAUri 296,297 MW-eko potentzia instalatuko FV Peralta instalazio fotovoltaikorako eta haren ebakuazio azpiegituretarako. Nafarroako Azkoien, Funes, Milagro, Cadreita, Valtierra eta Castejongo udal-mugarteetan daude kokatuta. (aurrerantzean, aurretiazko administrazio baimenaren ebazpena). 2023ko 101. Estatuko Aldizkari Ofizialean argitaratu zen, apirilaren 28an.

Aurretiazko administrazio baimenaren ebazpen horretan xedatutakoarekin bat etorriz, eta Energia elektrikoa garraiatzeko, banatzeko, merkaturatzeko eta hornitzeko jarduerak eta instalazioak baimentzeko prozedurak arautzen dituen abenduaren 1eko 1955/2000 Errege Dekretuaren 125. artikuluarekin eta ondorengoekin bat etorriz egindako izapidetzearen ondorioz, sustatzaileak proiektuan zenbait aldaketa egiteko konpromisoa hartu zuen, bereziki, Nafarroako Gobernuko Ingurumen Zuzendaritza Nagusiaren errekerimenduari erantzunez. Honako hauek dira:

–FV Peralta TAEren eta Castejón Promotores TAEren arteko 400 kV-eko ebakuazio linea aldatzea, trazaduraren zati bat hegoalderantz eramanez.

Ondorioz, proiektuaren aurretiazko administrazio baimenaren ebazpenean berariaz jasotzen zen beharrezkoa izanen zela proposatutako aldaketaren baten aurretiazko administrazio baimena lortzea, baldin eta ez badira betetzen abenduaren 1eko 1955/2000 Errege Dekretuaren 115.2 artikuluko kasuak (1955/2000 Errege Dekretua, energia elektrikoa garraiatzeko, banatzeko, merkaturatzeko eta hornitzeko jarduerak eta instalazioak baimentzeko prozedurak arautzen dituena).

Iberenova Promociones SAUk (aurrerantzean, sustatzailea), 2023ko maiatzaren 11n, aurrez deskribatutako aldaketaren aurretiazko administrazio baimena eta eraikitzeko administrazio baimena eskatu zituen. Horretarako, dagokion gauzatze proiektua aurkeztu zuen, bai eta Sektore Elektrikoari buruzko abenduaren 26ko 24/2013 Legearen 53.1 artikuluaren arabera aplikatzekoa den araudia betetzen duela egiaztatzen duen erantzukizunpeko adierazpena ere, 296,297 MW-eko potentzia instalatuko FV Peralta instalazio fotovoltaikorako eta haren ebakuazio azpiegiturarako (Nafarroako Azkoien, Funes, Milagro, Cadreita, Valtierra eta Castejongo udal-mugarteetan daude).

Espedienteari hasiera eman zitzaion Gobernuak Nafarroan duen Ordezkaritzako Industria eta Energia Arloan, eta izapidetu zen bat etorriz abenduaren 1eko 1955/2000 Errege Dekretuan xedatutakoarekin, eta kasuan kasuko txostenak eskatu zitzaizkien administrazioei, erakundeei eta zerbitzu publikoko edo interes orokorreko zerbitzuetako enpresei, instalazioak haien kargurako ondasunak eta eskubideak ukitzen dituen heinean.

Nafarroako Gobernuko Kultura Zuzendaritza Nagusiaren erantzuna jaso da, eta ez da ondorioztatzen instalazioaren kontra dagoela. Sustatzaileari igorri zaio erantzun hori, eta horiekin ados dagoela jakinarazi du.

Ebroko Konfederazio Hidrografikoaren, Ingurumen Zuzendaritza Nagusiaren, Herri-lanen eta Azpiegituren Zuzendaritza Nagusiaren, ADIFen eta Enagás Transporte SAren erantzunak jaso dira; horietan baldintza teknikoak ezartzen dira eta, kasuren batean, erakunde horietan baimena eskatzeko betebeharra, instalazioak haien eskumeneko ondasunak edo zerbitzuak okupatzen edo gurutzatzen dituelako. Sustatzaileari igorri zaizkio erantzun horiek, eta ados dagoela jakinarazi du.

Azkoiengo Udalaren txostena jaso da. Horren arabera, FV Peralta proiektua bateragarria da indarrean dagoen hirigintza plangintzarekin. Hala ere, "babes lurzorua", "kultura balioa" eta "abelbidea" gisa sailkatutako lurzatiak beren legeriaren eraginpean daude, eta, beraz, zehaztu egin beharko da, batetik, afekzioa eta, bestetik, instalazioak ez duela eraginik izanen abelbidean. Sustatzaileak Azkoiengo Udalaren txostenari erantzun dio ados dagoela adieraziz, eta "babes lurzorua", "kultura balioa" eta "abelbidea" gisa sailkatutako 6. poligonoko 119., 73., 95. eta 205. lurzatien gaineko afekzioa kontuan hartuko dela adierazi du, bai eta udal txostenean adierazten den bezala jardunen dela ere, eragina zehaztuz eta instalazioak abelbidearen erabileran eraginik izan gabe.

Red Eléctrica de España SAren (REE) erantzuna jaso da. Horretan, baldintza teknikoak ezartzen dira eta informazio gehigarria eskatzen da. Sustatzaileari igorri zaizkio erantzun horiek, eta ados dagoela jakinarazi du. Gainera, informazio gehigarria igorri du. Red Eléctrica de España SAk berriz ere bigarren erantzunean adierazi du dokumentazioa falta zaiola Red Eléctrica de España SArena den D/C Castejón - Muruarte 1 eta 2 400 kV-eko linearen 3-4 baoarekin gurutzatzeari buruz iritzia emateko.

2023ko abenduaren 18an, Red Eléctrica de España SAk beste txosten bat egin zuen, gurutzaketa arauzkoa dela adierazteko. Gainera, zenbait baldintza ezarri zituen.

Lurraldearen Antolamenduko Zuzendaritza Nagusiaren erantzuna jaso da. Horretan, proiektuaren aurka dagoela adierazten du, lurren izaerarekin lotutako hainbat arrazoi tarteko, hala nola, mota agrologikoa, babes bereziko eremuak edo ukitutako aztarnategi arkeologikoak, bai eta proiektuak eragiten dien udalerrietako hirigintza plangintza batzuekiko bateraezintasunak ere. Sustatzaileak Lurralde Antolamenduko Zuzendaritza Nagusiaren alegazio bakoitzari erantzuten dio; baina, bigarren erantzunean, Zuzendaritza Nagusi horrek bere hasierako jarrera berresten du.

Galdera eginda Defentsak Nafarroako Foru Komunitatean duen Ordezkaritzari, Cadreitako Udalari, Castejongo Udalari, Funesko Udalari, Milagroko Udalari, Valtierrako Udalari, Iberdrola Distribución Eléctricari, Compañía Logística de Hidrocarburos CLH SAri, Industriaren, Energiaren eta S3 Proiektu Estrategikoen Zuzendaritza Nagusiari eta Desarrollo de Energías Renovables de Navarra SAri, ez da erantzunik jaso; beraz, ados daudela ulertzen da, abenduaren 1eko 1955/2000 Errege Dekretuaren 127.2 eta 131.1 artikuluetan xedatutakoari jarraituz.

Orobat, eskaera jendaurrean jarri da, abenduaren 1eko 1955/2000 Errege Dekretuan eta aipatutako abenduaren 9ko 1955/2000 Legean aurreikusitakoarekin bat, 2023ko 118. Estatuko Aldizkari Ofizialean, maiatzaren 18koan, eta 2023ko 105. Nafarroako Aldizkari Ofizialean, maiatzaren 19koan, argitaratu baitzen. Alegazioak jaso dira, eta sustatzaileak erantzuna eman die.

Nabarmentzekoa da Desarrollo de Energías Renovables de Navarra SAk (aurrerantzean, DERNA) 2023ko maiatzaren 12an aurkeztutako alegazioa. Horren arabera, FV Peralta instalazio fotovoltaikoak eta haren ebakuazio azpiegiturek eragina izaten ahal dute "Caluegno" parke eolikoaren lurpeko goi tentsioko sarean (alegazioa egin zuen merkataritza sozietatearena da). Hori horrela, eskatzen du kontuan har daitezela zenbait ohar obra egitean, eta ordain ekonomikoa eman dakiola obraren ondoriozko kostuengatik. Sustatzaileak 2024ko apirilaren 24an erantzun zuen ados zegoela DERNAk planteatutako alegazioekin.

Gobernuak Nafarroan duen Ordezkaritzako Industria eta Energia Arloak txostena eman zuen 2023ko urriaren 2an, geroago osatu zena.

2023ko urriaren 5ean, Garraio, Mugikortasun eta Hiri Agendako Ministerioko Trenbide Sarearen Plangintza eta Ebaluazioko Zuzendaritza Nagusiak txosten teknikoa egin zuen. Ondorioztatzen denez, besteak beste, proiektua ontzat emateko, eguzki instalazioko ebakuazioko aireko lineak honako bi hauen trazadurekin izaten ahal dituen interferentziak konpondu behar dira: "Castejón-Iruñea abiadura handiko linearen Castejón inguruko trenbide konexioari buruzko informazio azterlana" eta "Kantauriko eta Mediterraneoko korridorearen informazio azterlana Zaragoza-Castejón tartean". Erantzun hori sustatzaileari helarazi zitzaion eta, hark jakinarazi zuenez, 2023ko azaroaren 6an, eranskin bat erantsi zioten ebakuazio linearen proiektuari. Eranskin horretan, azken tartean ebakuazio linearen proiektua egokitzen da, azterketa fasean dagoen trenbide korridorearekin bateragarri egiteko. Erakundeak beste txosten bat egin zuen 2023ko azaroaren 22an, eta eskatu zuen, aurkeztutako gehigarria kontuan hartuta, sustatzaileak ebakuazio linearen proiektuaren dokumentazio teknikoan zenbait gogoeta sartzeko, proiektuari oniritzia eman ahal izateko. Erantzun hori sustatzaileari bidali zitzaion, eta hark, 2023ko abenduaren 11n, erakundeak eskatutako preskripzioak sartzeko, berriz erantzun zuen gehigarriaren berrikuspenarekin. "30/400 kV-eko FV Peralta TAEren eta Castejón Promotores TAEren arteko 400 kV-eko linea elektrikoaren proiektuaren gehigarria (1. berrikuspena)" izena du gehigarriak. Erakundeak, 2023ko abenduaren 18an, sustatzaileak aurkeztutako azken gehigarria kontuan hartuta (2023ko abenduaren 11koa), azken txosten tekniko bat egin zuen, eta bertan adierazi zuen bidalitako dokumentazioan jasotako jarduketak egungo trenbide plangintzarekin bateragarriak direla. Hala ere, Castejónen inguruan aipatutako informazio azterlanak oraindik izapidetzen ari direnez, bertan jasotako trenbide trazadurek aldaketak izaten ahal dituzte hurrengo faseetan. Hori dela eta, kontuan hartu beharko da ebakuazio linearekin lotutako edozein jarduketak etorkizunean ingurune horretan aurreikusitako tren azpiegiturei eragiten badie, azpiegitura horiek eraiki edo ustiatu bitartea, sortutako kaltea konpontzeko egin behar diren birkokatze- edo konpontze-obren ondoriozko gastuak eguzki instalazio fotovoltaikoaren instalazioen sustatzailearen kontura izanen direla, eta ez diotela inola ere kostu gehigarririk ekarriko Estatuko Administrazio Orokorrari. Sustatzaileak, 2023ko abenduaren 19an, erakundearen azken erantzunarekin ados zegoela adierazi zuen.

2023ko abenduaren 13an, kontsulta egin zitzaion Castejongo Udalari "30/400 kV-eko FV Peralta TAEren eta Castejón Promotores TAEren arteko 400 kV-eko linea elektrikoaren proiektuaren gehigarria (1. berrikuspena)" izeneko gehigarriari buruz. Castejongo Udalak, 2024ko urtarrilaren 11n, txosten bat egin zuen, eta adierazi zuen jarduketarekin ados zegoela, baldin eta dagozkion lizentzia eta baimen guztiak lortzen badira, aplikatu beharreko araudi guztia betetzen bada, legez ezarritako moduan izapidetzen bada eta jarduera gauzatzeko legezko baldintza guztiak betetzen baditu. Era berean, udalak adierazi du adostasun adierazpen horrek ez dakarrela inolako baimenik edo hirigintza bateragarritasuneko txostenik, eta, hala badagokio, bakoitza bere aldetik ebatziko dela, dagokion prozeduraren bidez.

2023ko abenduaren 11ko "30/400 kV-eko FV Peralta TAEren eta Castejón Promotores TAEren arteko 400 kV-eko linea elektrikoaren proiektuaren gehigarria (1. berrikuspena)" gehigarriari dagokionez, sustatzaileak 2024ko otsailaren 22an egiaztatu du abenduaren 1eko 1955/2000 Errege Dekretuaren 115.2 artikuluan ezarritakoa betetzen duela, baita horri buruzko erantzukizunpeko adierazpena ere.

2024ko martxoaren 12an, Energia Elektrikoaren Zuzendariordetza Nagusian, Lurralde Antolamenduko zuzendari nagusiaren martxoaren 9ko 62E/2024 Ebazpena jaso zen. Ebazpen horren bidez, baimena eman zen "FV Peralta" eguzki parke fotovoltaikoa, 30/400 kV-eko FV Peralta TAE azpiestazioa eta 400 kV-eko aireko ebakuazio linea ezartzeko. Azpiestazio transformatzailetik abiatzen da eta 400 kV-eko Castejón Promotores TAE azpiestazio kolektore partekatuan amaitzen da, poligonoko 5 eta 6 lurzatietan, (Moratiel, Azkoien), Iberenova Promociones SAk sustatuta.

Kontuan izanik ezen, abenduaren 9ko 21/2013 Legearen 42. artikuluak ezartzen duenez, organo substantiboak behar bezala kontuan hartu beharko duela egindako ingurumen eraginaren ebaluazioa.

Instalazioaren proiektuari eta haren ebakuazio azpiegiturari, baita ingurumen eraginaren azterketari ere, ingurumen eraginaren ebaluazioaren prozedura egin zaie, eta ingurumen eraginaren aldeko adierazpena egin da, Trantsizio Ekologikorako eta Erronka Demografikorako Ministerioaren Ingurumen Kalitatearen eta Ebaluazioaren Zuzendaritza Nagusiaren 2023ko urtarrilaren 23ko Ebazpenaren bidez. Ebazpen horretan, ingurumen arloko baldintzak ezartzen dira, egindako ingurumen ebaluazioaren ondoriozkoak, prebenitu, zuzendu eta konpentsatzeko neurriak barne. Behar bezala argitaratuta dago Estatuko Aldizkari Ofizialean.

Ingurumen eraginaren adierazpenean ezarritakoaren arabera, proiektuari aplikatuko zaizkio ezarritako ingurumen arloko baldintzak, prebentzio-, zuzenketa- eta konpentsazio-neurriak eta, hala badagokio, ingurumen eraginaren azterketan jasotako jarraipen neurriak, jendaurreko informazioaren eta kontsulten ondotik onetsitakoak, eta informazio gehigarrian proposatutakoak, betiere ingurumen eraginaren adierazpenean xedatutakoaren aurkakoak ez badira.

Proiektuaren aurretiazko administrazio baimenaren ebazpenean xedatutakoren arabera, ingurumen eraginaren adierazpenean proiektuari ezarritako baldintza guziak bete behar badira ere, hura baita nahitaezko txosten erabakigarria, ezartzen duena, abenduaren 9ko 21/2013 Legearen 41. artikuluarekin bat, zer baldintzatan garatzen ahal den proiektua, bai gauzatzean bai ustiapenean, proiektua definitzeko kontuan hartuko dira, bereziki eta besteak beste, ingurumen eraginaren adierazpenean xedatutako baldintza eta neurri hauek, eta, horiek betetzen direla egiaztatzeko dokumentazioa aurkeztuko da:

–Eraikitzeko administrazio baimena lortzeko, sustatzaileak memoria xehatu bat aurkeztu beharko du Nafarroako Gobernuko Ingurumen Zuzendaritza Nagusiko Biodibertsitatearen Zerbitzuan, konpentsazio neurriak gauzatzeko. Memoria hori ingurumen eraginaren azterketari erantsiko zaio (aurrekontua eta kronograma barne), eta aldez aurreko aldeko txostena beharko da, bai eta gauzapena ikuskatu ere, proiektuaren baldintzen 1.1.d) puntuan ezartzen den bezala.

–Ahal dela, ez da panel fotovoltaikorik instalatuko % 10etik gorako maldak identifikatu diren azpieremuetan, Geologia eta urzoruari buruzko 3) puntuan ezartzen den bezala (1.2 atala, Prebentzio-, zuzenketa- eta konpentsazio-neurriei buruzko baldintzak inpaktu nabarmenenetarako).

–Nekazaritza eta ingurumeneko neurrien plana aurkeztea autonomia erkidegoko ingurumen arloko organoari, Faunari buruzko 12) puntuan ezartzen den bezala (1.2 atala, Prebentzio-, zuzenketa- eta konpentsazio-neurriei buruzko baldintzak inpaktu nabarmenenetarako).

–Nafarroako Gobernuko Ingurumen Zuzendaritza Nagusiaren argibideei jarraituz, GTALaren trazadura-eremuan, 250 metrora baitago EN-9 "Soto de Granjafría" naturagunea, Nafarroako Naturaguneen Sarekoa, sustatzaileak akordio bat lortu beharko du beste sustatzaile bat(zu)ekin, azpiegitura partekatzeko, trazadura gune sentikor horretatik urruntzeko helburuarekin. Bidezko akordioak lortzen ez badira, baloratu beharko da proiektuaren aldaketen ingurumen ebaluazio sinplifikatua egin behar den, inpaktuak handiagoak liratekeelako partekatzea lortuko ez balitz, Faunari buruzko 1.2 ataleko 12.2) puntuan jasotzen den bezala (Prebentzio-, zuzenketa- eta konpentsazio-neurriei buruzko baldintzak inpaktu nabarmenenetarako).

–Nafarroako Ubidearen Ureztatze Planaren barneko lursailetan dauden azpieremuetan instalazioak ezartzeko, Nafarroako Gobernuko Landa Garapeneko eta Ingurumeneko Departamentuko Nekazaritza eta Abeltzaintza Zuzendaritza Nagusiaren baimenak beharko dira, hala jasotzen baita Landaredia, flora eta BIHei buruzko 1) puntuan (1.2 atala, Prebentzio-, zuzenketa- eta konpentsazio-neurriei buruzko baldintzak inpaktu nabarmenenetarako).

–3.6 eta 3.7 azpieremuetarako, sarbideak aldatu egin beharko dira; izan ere, egungo konfigurazioarekin, ezin baimenduzko jotzen ditu Nafarroako Gobernuko Basoen eta Ehizaren Zerbitzuak. Era berean, 2.4, 3.3 eta 3.8 azpieremuetarako itxiturek 3 km-ko zortasuna errespetatu beharko dute, aipatutako zerbitzuak adierazitako jarraibideekin bat, Kultura ondareari buruzko 7) puntuan jasotzen den bezala (1.2 atala, Prebentzio-, zuzenketa- eta konpentsazio-neurriei buruzko baldintzak inpaktu nabarmenenetarako).

–2.3, 3.5, 3.7 eta 3.9 azpieremuetan, ahal dela ez dira ukituko sustatzaileak identifikatu dituen landaredi naturaleko unaden azalerak, hala jasotzen baita Landaredia, flora eta BIHei buruzko 1) puntuan (1.2 atala, Prebentzio-, zuzenketa- eta konpentsazio-neurriei buruzko baldintzak inpaktu nabarmenenetarako).

–BIHen eremuak edo leku istiltsuak edo hezetasun edafiko handikoak ez dira metaketa-eremu gisa erabiltzen ahalko, handik ez da inolako makinarik igarotzen ahalko, eta ez da paratzen ahalko instalazio edo azalera osagarririk, hala jasotzen baita Landaredia, flora eta BIHei buruzko 1) puntuan (1.2 atala, Prebentzio-, zuzenketa- eta konpentsazio-neurriei buruzko baldintzak inpaktu nabarmenenetarako).

–Paisaia lehengoratzeko plana, Paisaiari buruzko 3) puntuan xedatutakoarekin bat (1.2 atala, Prebentzio-, zuzenketa- eta konpentsazio-neurriei buruzko baldintzak inpaktu nabarmenenetarako). Autonomia Erkidegoko organo eskudunak onetsia izanen da paisaia lehengoratzeko plana.

Halaber, ingurumen eraginaren azterketan eta ingurumen eraginaren adierazpenean ezarritako baldintza eta neurri bakoitza zehaztu eta aurrekontuan sartu beharko ditu sustatzaileak, proiektuan nahiz haren gehigarria batean, xehakatuta, halako eran non aipatutako ingurumen eraginaren adierazpenean zehaztutako neurri bakoitza identifikatzen ahalko baita onetsi aurretik.

Proiektuaren aldaketen aurretiazko administrazio baimena eta hura eraikitzeko administrazio baimena lortzeko, sustatzaileak, 2023ko maiatzaren 22an, ingurumen eraginaren adierazpenean eta aurretiazko administrazio baimenaren ebazpenean ezarritako baldintzak betetzen dituela egiaztatzen duten agiriak aurkeztu zituen, baita erantzukizunpeko adierazpena ere, abenduaren 26ko 24/2013 Legearen 53.4 artikuluan xedatutakoa betez.

Abenduaren 26ko 24/2013 Legearen 21.5 artikuluaren arabera, ekoizpen instalazioak ebakuazio azpiegiturak izanen ditu, horien artean garraio- edo banaketa-sarearekiko konexioa eta, hala badagokio, energia elektrikoaren eraldaketa.

Ingurumen eraginaren adierazpenaren eta sustatzaileak izapidetzean onartutako baldintzen arabera, ebakuazio azpiegiturak honako jarduketa hauek aurreikusten ditu:

–30 kV-eko 52 lurpeko ebakuazio linea, FV Peralta eta 30/400 kV-eko FV Peralta azpiestazio biltzailea lotzen dituztenak.

–FV Peralta 30/400 kV-eko azpiestazio biltzailea.

–400 kV-eko aireko ebakuazio-linea, 30 km-koa, FV Peralta 30/400 kV-eko azpiestazio biltzailea eta Castejón Promotores 400 kV-eko azpiestazioa lotzen dituena.

Red Eléctrica de España SAUren jabetzakoa den Castejón 400 kV-eko azpiestaziorako konexioraino dagoen ebakuazio azpiegituraren gainerakoak eraikitzeko administrazio baimena du, Energia, Enpresa I+G+B eta Ekintzailetzaren Zuzendaritza Nagusiaren 2024ko otsailaren 5eko 12/2024 Ebazpenaren bidez emana (SEMSI-CE-5041 eta SAT-11133):

–Castejón Promotores 400 kV-eko azpiestazioa ebakuazio azpiegitura komunaren parte da, zeina Nafarroako Foru Komunitateak baimendua baita.

–400 kV-eko goi tentsioko aireko linea, Castejón Promotores 400 kV-eko azpiestazioaren eta Castejón 400 kV-eko azpiestazioaren artean; ebakuazio azpiegitura komunaren parte da.

Abenduaren 26ko 24/2013 Legearen 53.1 artikuluaren arabera, eraikitzeko administrazio baimenak aukera ematen dio titularrari instalazioa eraikitzeko, eskatutako baldintza teknikoak betez gero.

Sustatzaileak, 2023ko martxoaren 15ean, erantzukizunpeko adierazpena sinatu zuen, aplikatu beharreko araudia betetzen zuela egiaztatzen duena.

Administrazio Publikoen Administrazio Prozedura Erkideari buruzko urriaren 1eko 39/2015 Legean ezarritakoarekin bat, zuzendaritza nagusi honen ebazpen proposamenari buruzko entzunaldia eman zaio sustatzaileari; sustatzaileak dokumentazioa aurkeztu du eta alegazioak egin ditu. Horiek guztiak aztertu eta ebazpen honetan sartu dira, eta ados daude bai Red Eléctrica de España SAren 2023ko abenduaren 18ko txostenarekin, bai Castejongo Udalak 2024ko urtarrilaren 11n emandako txostenarekin.

Aintzat hartuz administrazioaren jarduera zuzendu behar duten printzipioak, prozesuaren azkartasuna eta ekonomia, alegia, bidezkoa da egintza bakar baten bidez ebaztea eskatzailearen eskaera, proiektuaren aldaketen aurretiazko administrazio baimena eta hura eraikitzeko administrazio baimena emateari buruzkoa.

Baimen horiek ematen badira ere, lurraldearen antolamenduari eta ingurumenari dagozkien eta beharrezkoak diren kontzesio eta baimenak beharko dira, bai eta aplikatzekoak diren xedapenek eragindako beste guztiak ere. Halaber, obra egiteko beharrezkoak diren gainerako baimen guztiak eskuratu beharko dira.

Azaldutakoaren ondorioz, Energia Politikako eta Meatzeetako Zuzendaritza Nagusi honek,

EBAZTEN DU:

Lehenengoa.–Ematea Iberenova Promociones SAUri aldaketen aurretiazko administrazio baimena 296,297 MW-eko potentzia instalatuko FV Peralta instalazio fotovoltaikorako eta haren ebakuazio azpiegituretarako, ebazpen honetan jasotzen diren baldintzetan. Nafarroako Azkoien, Funes, Milagro, Cadreita, Valtierra eta Castejongo udal-mugarteetan daude kokatuta.

Bigarrena.–Ematea Iberenova Promociones SAUri eraikitzeko administrazio baimena ematen dizkiona 296,297 MW-eko potentzia instalatuko FV Peralta instalazio fotovoltaikorako eta haren ebakuazio azpiegituretarako (Nafarroako Azkoien, Funes, Milagro, Cadreita, Valtierra eta Castejongo udal-mugarteetan daude kokatuta), honako proiektu hauten definitutako ezaugarriekin: "FV Peralta instalazio fotovoltaikoa" eta "30/400 kV-eko FV Peralta TAEren eta Castejón Promotores TAEren arteko 400 kV-eko linea elektrikoa", 2023ko martxokoak, eta "30/400 kV-eko FV Peralta TAEren eta Castejón Promotores TAEren arteko 400 kV-eko linea elektrikoaren proiektuaren gehigarria (1. berrikuspena)" gehigarria, 2023ko abendukoa, ebazpen honetan jasotako berezitasunekin.

Proiektuaren xedea da instalazio fotovoltaiko bat eraikitzea, energia elektrikoa sortzeko eta energia hori sarera eramateko.

Hona hemen instalazio fotovoltaikoaren ezaugarri nagusiak:

–Teknologia mota: eguzki energia fotovoltaikoa.

–Potentzia instalatua, ekainaren 6ko 413/2014 Errege Dekretuaren 3. artikuluaren arabera: 296,297 MW.

–Moduluen kopurua eta mota: 474.330 Trina Solar TSM-DEG21C.20 modulu, 670 Wp-eko irteera-potentzia nominalarekin.

–Moduluen potentzia gailurra: 317,801 MW.

–Inbertsoreen kopurua eta mota: 181 INGECON SUN 1640TL B630 inbertsore, 1.637 kVA-ko potentzia unitarioarekin.

–Inbertsoreen guztizko potentzia: 296,297 MW.

–Sarbiderako ahalmena, Red Eléctrica de España SAUk emandako sarbide eta konexio baimenetan ezarritakoaren arabera: 264 MW.

–Euskarri mota: finkoa.

–Transformazio zentroak: 52 transformazio zentro (6400 kVA-ko 30; 4800 kVA-ko 19; 3200 kVA-ko 1 eta 1600 kVA-ko 2), tentsioa 30 kV-era igo ahal izateko.

–Ukitutako udal-mugartea: Azkoien, Nafarroako probintzian.

Ebakuazio azpiegitura baimenduak honela daude osatuta:

–30 kV-eko 52 lurpeko zirkuitu; horietatik 41 zirkuitu bakunak dira eta 11, berriz, duplexak, eta FV Peralta instalazio fotovoltaikoa FV Peralta 30/400 kV-eko azpiestazio biltzailearekin konektatzen dutenak.

  • 150, 240, 300, 400 eta 630 mm2-ko sekzioak erabili dira zirkuituetan.

FV Peralta 30/400 kV-eko azpiestazio biltzailea Azkoiengo udal-mugartean dago, Nafarroan, eta ezaugarri hauek ditu:

  • 30 kV-eko parkea:
    • Konfigurazioa: barra bakuna.
    • Instalazioa: kanpoko instalazioa.
    • Bi transformadore posizio.
  • 400 kV-eko parkea:
    • Konfigurazioa: barra bakuna.
    • Instalazioa: kanpoko instalazioa.
    • Lineako posizio bat.

–400 kV-eko goi tentsioko aireko ebakuazio-linea FV Peralta 30/400 kV-eko azpiestazio biltzailean hasten da, eta Castejón Promotores 400 kV-eko azpiestazioan amaitzen da. Hauexek dira aipatu linearen ezaugarri nagusiak:

  • Sistema: korronte alterno trifasikoa.
  • Tentsioa: 400 kV.
  • Ukitutako udal-mugarteak: Cadreita, Castejón, Funes, Milagro, Azkoien eta Valtierra, Nafarroako Foru Komunitatean.
  • Ebakuazio potentzia: 500 MVA.
  • Luzera: 29.864 m, bost tartetan banatuta:
    • 1. tartea: 6.714 m 400 kV-eko zirkuitu bakunean, hiruzuloka, FV Peralta azpiestaziotik 20 zenbakiko euskarriraino.
    • 2. tartea: 18.539 m 400 kV-eko zirkuitu bakunean, proiektu honen xedea ez den bigarren zirkuitu bat hartzeko diseinatutako euskarriekin, 20 zenbakiko eta 73 zenbakiko euskarrien artean.
    • 3. tartea: 2.162 m zirkuitu bakunean, 73 zenbakiko eta 80 zenbakiko euskarrien artean.
    • 4. tartea: 694 m 400/220/66 kV-eko zirkuitu hirukoitzean, 80 zenbakiko eta 81 zenbakiko euskarrien artean.
    • 5. tartea: 1.755 m 400 kV-eko zirkuitu bakunean, 81 zenbakiko euskarriaren eta ST Castejón Promotores 30/400 kV-eko azpiestazioaren artean.
  • Ezaugarri orokorrak:
    • Maiztasuna: 50 Hz.
    • Eroale mota:
      • 1., 2., 3. eta 5. zatietan (zirkuitu bakuna): LA-510 (RAIL).
      • 4. zatian (zirkuitu hirukoitza): 1 LA-510 (RAIL) zirkuitu eta 2 LA-380 (GULL) zirkuitu.
    • Euskarriak: dorre metalikoak, sareta itxurakoak.
    • Euskarri kopurua: 87.
    • Bakartzea: U210bp
    • Zimenduak: tetrablokea, sekzio karratuko enbor-piramide formakoa.

Ebakuazio azpiegituren gainerakoak –garraio sarearekin konektatzen den puntura arte– eraikitzeko administrazio baimena du, Energia, Enpresen I+G+b eta Ekintzailetzaren Zuzendaritza Nagusiaren 2024ko otsailaren 5eko 12/2024 Ebazpenaren bidez emana (SEMSI-CE-5041 eta SAT-11133), bai eta Red Eléctrica de España SAUren jabetzakoa den eta martxan dagoen Castejón 400 kV-eko azpiestazioak ere.

Sustatzaileak izapidetzean onartutako baldintzak bete beharko ditu, bai eta Ingurumen Kalitatearen eta Ebaluazioaren Zuzendaritza Nagusiaren ingurumen eraginaren adierazpenean ezarritako baldintzak ere.

Era berean, bete beharko ditu Sistemaren Operadoreak ezartzen dituen arau teknikoak eta jarduteko prozedurak.

Baimen hau emateak ez du ezertan ukatzen aplikatu beharreko beste xedapen batzuen arabera beharrezkoak diren bestelako kontzesio eta baimenak lortzea, eta, bereziki, lurraldearen antolamenduari eta ingurumenari dagozkionak; halaber, obra gauzatzeko behar diren gainerako baimenak ere beharko dira.

Proiektuari aldaketak aurkezteko, abenduaren 1eko 1955/2000 Errege Dekretuaren 115. artikuluan ezarritakoa aplikatuko da.

Administrazio Publikoen Administrazio Prozedura Erkideari buruzko urriaren 1eko 39/2015 Legearen 121. eta 122. artikuluetan eta Sektore Publikoaren Araubide Juridikoari buruzko urriaren 1eko 40/2015 Legearen 62.2.i) artikuluan xedatutakoarekin bat, ebazpen honek ez du administrazio bidea amaitzen, eta honen kontra gora jotzeko errekurtsoa aurkezten ahalko da Energiaren estatu-idazkariaren aurrean, Estatuko Aldizkari Ofizialean argitaratzen den egunetik hasita hilabeteko epean.

Epe hori iraganik errekurtsoa jarri gabe, ebazpena irmoa izanen da ondorio guzietarako. Epeak hilabeteka zenbatzeko, urriaren 1eko 39/2015 Legearen 30. artikuluan xedatutakoa bete beharko da.

2024ko apirilaren 25ean.–Zuzendari nagusia, Manuel García Hernández.

ERANSKINA

Eraikitzeko administrazio-baimena ematen da, abenduaren 1eko 1955/2000 Errege Dekretuan xedatutakoarekin bat eta baldintza berezi hauekin:

1. Lanak egin beharko dira aurkeztu den proiektuarekin eta aplikatzekoak zaizkion erregelamenduzko xedapenekin bat, eskatu eta baimentzen diren aldaketak eginda, beharrezkoak badira.

2. 1955/2000 Errege Dekretuaren 131.10 artikuluarekin bat, ustiatzeko baimena emateko epea honako hauetako txikiena izanen da: a) hogeita lau hilabeteko epea, ebazpen hau eskatzaileari jakinarazten zaion egunetik aurrera kontatuta, edo b) proiektu honi ekainaren 23ko 23/2020 Errege Lege Dekretuaren 1. artikuluan ustiapen baimena lortzeko ezarritako aldia aplikatzearen ondoriozko epea (23/2020 Errege Lege Dekretua, ekainaren 23koa, Energiaren arloko eta ekonomia suspertzeko beste eremu batzuetako neurriak onartzen dituena).

Sustatzaileak, eraikitzeko administrazio baimena lortu eta gehienez ere hiru hilabeteko epean, epea luzatzea eskatzen ahalko du, ekainaren 23ko 23/2020 Errege Lege Dekretuaren 1.1.b) 5 artikuluan jasotako mugarria betetzeko, honako hauek adierazita, gutxienez: (i) instalazioak ustiatzeko administrazio baimena lortuko duen urte naturalaren seihilekoa eta (ii) behin-behineko edo behin betiko ustiatzeko administrazio baimena lortzeko ezintasuna espresuki onartzeko konpromisoa, bai eta energia elektrikoa ekoizteko instalazioen administrazio erregistroan adierazitako seihilekoa hasi baino lehen aldez aurretik edo behin betiko inskribatzeko ezintasuna ere.

Ukrainako eta Ekialde Hurbileko gatazken ondorio ekonomiko eta sozialei aurre egiteko eta lehortearen ondorioak arintzeko neurriak hartzen dituen abenduaren 27ko 8/2023 Errege Lege Dekretuaren 28. artikuluaren arabera, ustiatzeko administrazio baimena izateko epea ez da inoiz zortzi urtetik gorakoa izanen.

3. Instalazio horren titularrak lanen amaieraren berri eman beharko dio probintziako organo eskudunari, ustiapen baimena behin betikoz onartu eta zabaltzeko.

4. Sustatzaileak ingurumen eraginaren adierazpenean ezarritako baldintza guztiak bete beharko ditu; izan ere, nahitaezkoa eta erabakigarria da txosten hori. Abenduaren 9ko 21/2013 Legearen 41. artikuluaren arabera, txosten horretan ezartzen dira proiektua gauzatzeko eta ustiatzeko baldintzak, gauzatzen den bitartean eta, bereziki, obrek dirauten bitartean:

–Lur mugimenduek dirauten bitartean, azaleko jariatze urak hustu aurretik solidoak atxikitzeko beharrezko neurriak ezarri beharko dira, baita azaleko urak kutsatzeko arriskua ahalik eta gehien murrizteko beste neurri batzuk ere, 2. baldintzan (ura) jasotzen den bezala.

–Hormigoia erabiltzea behar-beharrezkoa den kasuetan, modu lokalizatuan eginen da egiturak lurrera lotzeko puntuetan. Une oro saihestuko da leherketak egitea. Geologia eta lurzoruari buruzko 1. baldintzan jasotzen den bezala.

–Obrak egin aurretik, prospekzio botanikoa eginen da azterketa eremuan, Nafarroako Espezie Mehatxatuen Katalogoan sartutako espezierik ez dagoela egiaztatzeko. Eremuan espezieren bat badago, eremua behar bezala mugatu eta adostuko da, bertan eraginik izan ez dezan.

–BIHen eremuak edo leku istiltsuak edo hezetasun edafiko handikoak ez dira metaketa eremu gisa erabiltzen ahalko, handik ez da inolako makinarik igarotzen ahalko, eta ez da paratzen ahalko instalazio edo azalera osagarririk, hala jasotzen baita 1. baldintzan (landaredia, flora eta BIHak).

–Lanak hasi aurretik, faunaren prospekzioa eginen da, lurrean habiak egin ahal izan dituzten abifaunako espezieak identifikatu ahal izateko. Prospekzio hori obren kronograman aurreikusitako lehen okupazioen aurreko egunetan egin beharko da. Prospekzio horren emaitzak faunaren arloan eskumena duten erakunde autonomikoei bidaliko zaizkie, neurri egokiak har ditzaten, Faunari buruzko 1. baldintzan jasotzen den bezala.

–Eraikuntza- eta eraispen-faseetan, martxoaren 15etik ekainaren 15era bitarteko geldialdi biologikoa errespetatzea, landaredi naturala duten eremuetan eragiketak egiteko. Obrak gauzatzen diren bitartean espezie mehatxatuen habia aktiboak hautematen badira, jarduketak bertan behera utziko dira 100 bat metroko tartean, hazkuntza amaitu arte, Faunari buruzko 2. baldintzan jasotzen den bezala.

–Basoilo txikiak eta pteroklidoak daudenez, obrak hasi aurretik, instalazioaren inguruan dagoen populazioaren erradiojarraipena eginen da, bai ale arrenena, bai emeena, Faunari buruzko 5. baldintzan jasotzen den bezala.

–Instalazio fotovoltaikoaren gaueko argiztapena saihestuko da, baita eraikitzeko fasean gaueko lanak egitea ere. Salbuespen bakarrak dira araudiak eskatzen dituen sistemak eta eraikin osagarrietan ezinbestekoak diren edo arrisku-egoerei aurre egiteko diren argiztapen gailuak. Kasu horietan, uhin laburreko luzera ugariko argi zuria (urdina eta ultramorea) igortzen ez duten luminariak erabiliko dira, argiztapena plano horizontalaren azpitik proiektatuko da lurrerantz eta behar den unetara mugatuko da, Faunari buruzko 9. baldintzan jasotzen den bezala.

–Naumann belatzaren habia-kutxak instalatuko dira, gordeleku beharra duten kolonietan. Habia-kutxa motak kalitatezkoa eta iraunkorra izan behar du, eta Naumann belatza leheneratzeko proiektuetan probatutakoa. Instalatutako kutxak egoera onean mantendu beharko dira eta hondatzen direnak ordeztu beharko dira. Gehienez ere sei hilabeteko epean gauzatuko da, organo substantiboak proiektua onartzen duenetik hasita, Faunari buruzko 12.3 baldintzan jasotzen den bezala.

–Berariaz baimendutako arkeologo batek egin beharko du lanak eragindako lur-mugimendu guztien zuzeneko kontrol eta ikuskapen arkeologikoa. Horretarako, kultura ondarean agertzen ahal diren ondasun higiezinak eta higigarrien hondarrak in situ kontserbatu eta dokumentatuko dira (txosten arkeologikoak, memoriak eta Karta Arkeologikoaren inbentario fitxak), Kultura ondareari buruzko 1. baldintzan jasotzen den bezala.

–Aurreikusitako jarduketak geldiarazi eginen dira ondare garrantzia duten ondasunak aurkitzen badira, Kultura ondareari buruzko 2. baldintzan jasotzen den bezala.

–Moratiel I, Cayola eta Pico del Águila aztarnategietako lurrak okupatuz gero, aldez aurretik indusketa arkeologiko bat egin beharko da haren hedadura osoan, Kultura ondareari buruzko 3. baldintzan jasotzen den bezala.

–3. mailakotzat katalogatutako aztarnategietan (La Ladera eta Moratiel IV) eta 2. mailakotzat katalogatutako aztarnategien inguruan (Moratiel I, Cayola eta Pico del Águila) jarraipen arkeologiko intentsiboa eginen da, eta bertan arkeologo bat egonen da edozein lur mugimendu egiten den bitartean, Kultura ondareari buruzko 4. baldintzan jasotzen den bezala.

–Nafarroako Erregistro, Ondasun Higigarri eta Arkeologia Zerbitzuak egindako gogoeten arabera, sustatzaileak linea elektrikoaren prospekzio arkeologikoa egin beharko du, Kultura ondareari buruzko 6. baldintzan jasotzen den bezala.

–Obra fasean ukitutako inguruneko edozein guneren paisaia lehengoratuko da, beharrezkoa ez bada ustiategiak normal funtzionatzeko. Aurreikusitako jarduketek okupatutako lursail osoa hartuko duen paisaia lehengoratzeko plan bat eginen da –obrak amaitzean ezarri beharko da–, non zehatz-mehatz jasoko baitira barneko pantaila perimetralaren landaketa eta instalazioaren barneko landare teselak instalatzeko eta mantentzeko jarduketak. Plan horrek hutsarteak birlandatzeko konpromisoa hartu behar du, ezarpenaren hamargarren urtean hasierako dentsitateen % 10 izan dadin gehienez. Pantailaren gutxieneko zabalera 5 m-koa izanen da, hiruzuloka landatuta eta gutxienez hiru ilara jarrita. Ahal dela, naturaltasuna bilatuko da, zuhaitz-, zuhaixka- eta sastraka-espezieak erabiliz, eta zabalera aldakorreko forma bihurgunetsu bat emanez, garaiera maila desberdinak estaltzeko. Eskualdeko administrazio eskudunak egin beharko du protokoloa, Paisaiari buruzko 3. baldintzan ezarrita dagoen bezala.

5. Ingurumenaren Kalitatearen eta Ebaluazioaren Zuzendaritza Nagusiaren ingurumen eraginaren adierazpenak, halaber, baldintza espezifiko batzuk ezartzen ditu, ustiapen baimena lortu aurretik bete beharrekoak, eta baldintza horiek betetzen direla jakinarazi beharko zaio probintziako organo eskudunari, eskatzaileak zehaztutako eta aurrekontuan sartutako neurriak proiektu batean edo haren eranskin batean aurkeztu ondoren.

6. Eraikitzeko administrazio baimenak ez du inola ere instalazioaren titularra salbuesten instalazioek behar dituzten gainerako baimen osagarriak lortzetik; besteak beste, lortu beharko ditu industria segurtasunaren arloko legeriak, sistema laguntzaileei dagokienez, horiek instalatu edo abian jarri aurretik, eskatzen dituen baimenak, autonomia erkidegoen eskumenekoak, edo, bestela, kontrolerako beste formalitate guztiak bete beharko ditu.

7. Administrazioak ondoriorik gabe utziko du ebazpen hau baldin eta ikusten bada, denboraren joanean, ebazpenean ezartzen diren eskubideen titularrak ez dituela betetzen bertan ezarritako baldintzak. Kasu horietan, Administrazioak, behar den espedientea bideratu ondoren, kasuko baimena baliogabetzea erabakiko du, horrek dakartzan ondorio administratibo eta zibil guztiekin, indarra duten lege xedapenekin bat.

8. Instalazioaren titularrak kontuan hartuko ditu, hura egiteko, erakundeek ezarri dituzten baldintzak, zeinak jakinarazi zaizkion eta berak berariaz onartu dituen.

Iragarkiaren kodea: E2407103